23233	MAT 1:20	Dopa lao masoo kateamopa, Kamongonya enjele mendeme baa kombeame lamaiyoo, “Josepe, Dapiti yumbange, embame enda Matia doko embanya enda jina lao lanyalanya paka nakayape. Baanya inginya wane pilyamo doko Oli Sipitisame maiya.
23234	MAT 1:21	Baame wane ane mende manditana, embame baa kenge doko Jisasa lape. Doko baame baanya endakali dupanya koo dupa kunanya nepatakamaitala pyoo nyetana,” lea-pyaa.
23235	MAT 1:22	Piamo dutupa pitaka wamba Kamongome potopesa mende-kisa pii leamo datupa angi injisoo pia-pyaa: “Enda mapuakae akali mendepa tole napingi mendenya inginya wane ane mende pititamopa mandita. Mandipatamopa dupame baanya kenge doko Emanyuele latamina,” potopesa dokome dopa lea-pyaa. (Kenge Emanyuele dokonya tenge doko Gote naima-pipa tole kalyamano.)
23239	MAT 2:1	Matiame Jisasa Jutia yuu taono Beteleme lenge dokonya mandea-pyaa. Gii dokopa akali Etote lenge doko kiŋi katea-pyaa. Maitakao niki pyakaengesa tange buinya tenge masingi akali mendapuame Jetusaleme ipupala lao pituu, “Jutamanya kiŋi katatana lapae wane ŋaŋa doko anja mandipae silyape? Naimame baanya bui doko niki pyakaengesa-kaita katamosa kandatala baa tama pyaa epelyamanona,” leami-pyaa.
23242	MAT 2:4	Etoteme pitisa mupapi dee Jutamanya mana setapae masingi akalipi dupa pitaka epena lao nyoo elyambu pia-pyaa. Dopa petala, “Kataisa doko yuu andukunya mandipengepe?” lao pisia-pyaa.
23243	MAT 2:5	Dupame baa lamaiyoo, “Jutia yuu dokonya yuu taono Beteleme dokonyana,” leami-pyaa. “Doko potopesa dokome dapa lao pepa pia-pyaa:
23244	MAT 2:6	‘Jutamanya yuu Beteleme, emba Juta tata isoo kalyamino akali andake dupanya pundipundi joo nasilino. Emba-kisa akali andake mende pyakalyeta. Baame nambanya Isataele endakali dupa setao katakatana,’ lao pia-pyaana,” leami-pyaa.
23245	MAT 2:7	Dopa lateaminopa Etote baame elyakawaka akali niki pyakaengesa tange kanja paanya epeamino dupa epena latala tipa-tipa pyoo, “Gii andukupa bui doko kateape?” lao pisia-pyaa.
23246	MAT 2:8	Dopa petala dupa Beteleme pena latala lamaiyoo, “Nyakamame wane doko kutakondape pyoo kutalapape. Kutao kandatala dokopa, nambame apata tama pyaa patona langya ipupape,” lea-pyaa.
23251	MAT 2:13	Akali dokaita pateaminopa, kuka Kamongonya enjele mendeme Josepe kombea pimaiyoo, “Emba sakatala wane dokopa endangipa dolapo laminao Isipe yuu dokonya paka puu. Dokonya katatenopa nambame emba tenda dee langitoli pyoo pilyetena, Etoteme wane doko kutao pyao kumasalanya pilyamona,” lea-pyaa.
23253	MAT 2:15	Pupala Josepe Isipeaka katao Etote kumiamo gii dokonya tuu lea-pyaa. Dopa piamo dokome potopesa mendenya nengekaita lungu petala Kamongome lao pituu, “Nambanya ikiningi doko Isipe yuu dokonya kateamopa, nambame epena leona,” leamo pii doko etete angi jia-pyaa.
23256	MAT 2:18	“Dupame yuu Lama lenge dokonya pii dupa setami. Dupame yako lao kondo-kondo pyoo ee latamino dupa setami. Enda Lesolome baanya wane dupa lao ee latamopa endakali mendaipi mendeme kapa pao baanya mona minao auu pisakamaiya nayata. Doko, baanya wane dupa pitaka nakatataminosa dopa latana,” lea-pyaa.
23257	MAT 2:19	Etote kumateamopa, maitakao Kamongonya enjele mende Isipe yuu dokonya ipupala Josepe kombea pimaiyoo, “Emba wane dokopa endangipa dolapo laminao Isataelemanya yuu dokonya pilyepe. Wane doko pyalanya piamino endakali dupa kumatelyaminona,” lea-pyaa.
23261	MAT 2:23	Baa pao yuu taono Nasatete lenge dokonya katea-pyaa. Dopa piamo dokome wamba potopesa dupame, “Baa Nasatete tangena latamina,” leamino pii doko angi jia-pyaa.
23263	MAT 3:2	Baame lao pituu, “Kaitinya Katenge dokome isingi doko tengesa petelyamona mona kapilyalapa!” lao lamaiyoo katea-pyaa.
23264	MAT 3:3	Potopesa Aisayame lao pituu, “Endakali napalenge yuu mendasa akali mendeme katapala wii lao, ‘Kamongonya kaitini doko depa lanya setakamaiyepape! Baanya kaitini dupa tolasakamaiyepape!’ lao katatana,” lea-pyomo doko akali Jone baa kandao lea-pyaa.
23268	MAT 3:7	Dee akali Patasipi Satyusipi longo mendapua kaimbu pyekena lao epeamino kandatala, baame dokaita lamaiyoo, “Nyakama kanopato pambeanya mandipae dupa, apimi nyakama Goteme kapa pao imbu kayata doko langipumosa paka kayao wandyalanya epelyamipi?
23270	MAT 3:9	Nyakamame nyakama tangenya mona dokome, ‘Apotakame naimanya takangena,’ lao masala nayalapape. Kana silyamo datupa Goteme kapa pao Apotakamenya wane jina lapyalina lao, nambame nyakama langilyo.
23273	MAT 3:12	Baame baanya yati doko minao wiisa angi imbupi pyasoo silyamo dupa pitaka yapapala angi dupa baanya nee setenge anda dokonya setata. Imbu dupa ita konjala naenge dokonya soo yangatana,” lea-pyaa.
23275	MAT 3:14	Dopaka doko, Joneme Jisasanya mona aloo pyakamaitoo latala lao pituu, “Embame nambanya kaimbu pyakapili doko yakana, nambame embanya kaimbu pyakatale lao epelepe?” lea-pyaa.
23276	MAT 3:15	Dopa leamoaka doko, Jisasame baanya pii yanu pyakamaiyoo, “Kayapala indupa nambame lelyoli pii. Nalimbame dopa pyoo mana tolatae dupa pitaka kapa pisatambanopa auu pitana,” lea-pyaa. Dopa leanya Joneme baanya pii doko watao minao kaimbu pyakamaiya-pyaa.
23278	MAT 3:17	Dokopa kaiti-kisa katao pii mende lea dokome, “Doo kalyamo doko nambanya Ikiningi etete mona setenge doko kalyamo. Nambame baa kandao etete mona epe palyingina,” lea-pyaa.
23281	MAT 4:3	Dokopa makande pingi akali dokome baa kateasa ipupala lao pituu, “Emba Gote Ikiningi tamo kandao doko, embame kana silyamo datupa kapilyetala nee jina laa!” lea-pyaa.
23282	MAT 4:4	Dopa leamoaka doko, Jisasame baanya pii yanu pyakamaiyoo lao pituu, “‘Endakali mende nee nenge tenge dokonya iki saka nakatenge. Daa, Gotenya kaimbu dokonya pii lapae epenge dupa pitakame endakali saka katasingina,’ dopa lao pepa pyapae silyamona,” lea-pyaa.
23284	MAT 4:6	Dopa latala baame Jisasa lamaiyoo, “Pii mende dapa lao pepa pyapae silyamo: ‘Goteme emba lao masetala baanya enjele dupa lamaiyapomona,’ dee, ‘Aopyoo latala kaname embanya mokopi mende koyatame lao enjele dupame emba kopyoo nyalamino.’ Dopana, emba Gote Ikiningi tamo kandao doko, ketae dokonya katao isa manga!” lea-pyaa.
23285	MAT 4:7	Dokopa Jisasame baa lamaiyoo, “‘Embame embanya Kamongo Gote doko minao makande napipi,’ lao pepa pyapae silyamoakana,” lea-pyaa.
23287	MAT 4:9	Dopa petala baame Jisasa lamaiyoo, “Embame luma lakapala namba tama pitino kandao doko, oapi datupa pitaka nambame emba ditoana,” lea-pyaa.
23288	MAT 4:10	Dopa leamopa Jisasame baa lamaiyoo, “Satane, emba puu! ‘Embame embanya Kamongo Gote doko tama pyoo baanya iki kalai pyakamaiyoo katape!’ lao pepa pyapae silyamona,” lea-pyaa.
23293	MAT 4:15	“Sepyulanemanya yuupi, Napatalaimanya yuupi, endaki pete lembapi, endaki Jotanenya yangi-kaitapi, endakali tata waka dupanya yuu Galili dokonyapi, endakali iminjetaenya katatamino dupame tii pipae andake doko kandatami. Endakali kumapenge yuu iminjetae dokonya katatamino dupa tii pipae dokome tii pisetana,” Aisayame dopa lea-pyaa.
23295	MAT 4:17	Gii dokopa pituu, Jisasame baanya pii doko tee pyao dapa lao panao lamaiya-pyaa: “Kaitinya Katenge dokome isingi doko tengesa petelyamona, nyakama mona kapilyalapa!” lao lamaiya-pyaa.
23297	MAT 4:19	Baame akali dolapo lamaiyoo, “Nambame nyalambo endakali lanyingi injisotona, namba watao ipupa,” lea-pyaa.
23306	MAT 5:3	“Monanya tipya joo kalyamano lao masoo katenge endakali dupa, Kaitinya Katenge dokome isilyamona mona yaepena.
23307	MAT 5:4	“Ee lao katenge endakali dupa, Goteme mona epe palisetana mona yaepena.
23308	MAT 5:5	“Endakali andanda semaiyoo katenge dupame yuu dake nyakamanya moya nyetamina mona yaepena.
23309	MAT 5:6	“Lopo pilyamopapi endaki nanu pilyamopapi napu laka lao putiti kaengeli pyoo, mana tolatae doko nyipu laka lao putiti kayao katenge endakali dupa, Goteme maiyoo etete kapa pisetana mona yaepena.
23310	MAT 5:7	“Endakali yango kondo kaenge dupa, Goteme kondo kayatana mona yaepena.
23311	MAT 5:8	“Mona epe palenge endakali dupame, Gote kandatamina mona yaepena.
23312	MAT 5:9	“Mona mendai paliuu katamana lao kyoto joo akema lenge endakali dupa, Goteme baanya ikiningina latana mona yaepena.
23313	MAT 5:10	“Mana tolatae watao minapiminosa kenda pipae nyilyamino endakali dupa, Kaitinya Katenge dokome isilyamona mona yaepena.
23314	MAT 5:11	“Nyakamame namba watao minataminosa endakali dupame nyakama kenda pisowapi, sambo pii koo tata tata dupa lawapi, pyao watawapi pitamino dokopa, nyakama mona yaepapenge.
23316	MAT 5:13	“Nyakama aipi joo yuunya kalyamino. Aipi doko tende napitamo kandao doko, dee aipa petala tende pisepengepe? Aipi dopaleme mende etete napipenge. Endakali dupame soo nepatala moko katao paengema.
23317	MAT 5:14	“Nyakama lama kaiyepae joo yuunya kalyamino. Yuu taono mende manda mendenya singi doko kapa pao yalo petae nasingi.
23319	MAT 5:16	Dopaka pyoo nyakamame endakali dupa tii pisoo kalyepape! Dopa pitaminopa dupame nyakamanya kalai epe dupa kandatala nyakamanya Takange kaitinya katenge doko lao lalyetamina,” Jisasame lea-pyaa.
23320	MAT 5:17	“Moseseme pii pepa piapi potopesa dupame pii pepa piamipi dupa nambame mee injisala epena lao masala nayalapape! Nambame etete angi injisala epeo.
23323	MAT 5:20	Nyakamame mana tolao minatamino dokome mana setapae masingi akalipi Patasipi dupanya mana tolatae dupa ita minala nayatamo kandao doko, Kaitinya Katenge dokome nyakama etete isala nayatana lao nambame nyakama langilyona,” lea-pyaa.
23324	MAT 5:21	“‘Embame endakali pyao kumasala nayape. Endakali mendeme endakali yango mende pyao kumasetamopa, baa laminao kosa laa pupengena,’ lao nyakamanya yumbange dupa lamaiyamino doko nyakamame sepeami.
23326	MAT 5:23	Dopana, embame epe mende Gote kundi maiyanya minao pao setakamaingi olata toko tengesa dosa katao, embanya endakali yango dokome emba-kisa kenda pipae mende setelyamona lao masii kandeno doko, epe minao pateno doko olata toko enombasa dosa sina setape. Setapala emba wambao pao baapa pii lao tolatala mona mendai palyalapape. Dopa petala embame dee ipao epe mende Gote maipenge doko maipina,” Jisasame lea-pyaa.
23328	MAT 5:25	“Dee akali mendeme emba kosimi laanya pia kandeno dokopa, kosa laa pao pituu kaitinisa ene pitamopa yapa mona mendai palyalapape. Daa tamo kandao doko, akali dokome emba laminao pao pii tolasingi akali jasa doko maitamopa, dokome yanda singi dupa maita. dupame emba anjingi andaka pyandatami.
23329	MAT 5:26	Emba dokonya anjetae paliuu akali dokonya saandi emba-kisa setamo dupanya etete mendaipi mende nasina lao yanu pyao etapala dokopaka ipatena lao nambame emba kiningi langilyona,” lea-pyaa.
23330	MAT 5:27	“‘Embame kepo kolala nayape,’ lapae pii doko wamba nyakamame sepeami.
23333	MAT 5:30	Embanya kingi tolae dokome emba koo pyaale lao mapisia kandeno doko, kepanya nepape! Embanya yonge dokonya kuki mende alu pitamo kandao doko, kuki auu pyoo katate. Dopaka doko, embanya yonge pitaka kateta yuu koo dokonya pateno doko, etete auu pyoo nakatatena,” Jisasame lea-pyaa.
23334	MAT 5:31	“‘Akali mendeme baanya etanenge doko watao pyao pituu, watao pingi pepa mende maipengena,’ leamiaka-pyaa.
23335	MAT 5:32	Dopaka doko, nambame nyakama dapa langilyo: akali mendenya etanenge dokome kepo kolala nayatamopa mee watao pyatamosa, enda dokome dee akali waka mende nyetamo kandao doko, akali wambatae doko mambele enda dokome kepo kolao nyilyamo. Enda watao pyatae doko dee akali waka mendeme lanyilyamo dokome kepo kolawaka nyilyamo,” Jisasame lea-pyaa.
23336	MAT 5:33	“‘Embame Kamongo doko kandao opale mende kiningi etete pituu muli mauwana lateno doko, kayala nayao latenoli pyoo pipina,’ lao nyakamanya yumbange dupa lamaiyamino doko nyakamame sepeami.
23340	MAT 5:37	Dopana, nyakamame pii mende ŋee lao pituu ŋee iki laapape. Daa lao pituu daa iki laapape. Pii waipa sinyoo lelyamino dupa Sataneme sakatasingina,” Jisasame lea-pyaa.
23341	MAT 5:38	“‘Akali mendeme embanya lenge lukatamopa itingi lengeaka lukope. Nenge longatamopa itingi nengeaka longape,’ lapae pii doko wamba nyakamame sepeami.
23345	MAT 5:42	Endakali mendeme oapi mende dii lao tee latamopa maipi. Endakali mendeme saandi mende tee latamopa maita tuu laa nayape,” Jisasame lea-pyaa.
23346	MAT 5:43	“‘Embame embanya kaita miningi dupa auu kayao katao yandapipi dupa imbu kayape,’ lapae pii doko nyakamame sepeami.
23351	MAT 5:48	Dopana, nyakamanya Takange kaitinya katenge dokome tolalakao tolatae katengeli pyoaka nyakama kalyepape!” Jisasame lea-pyaa.
23352	MAT 6:1	“Nyakamame nyakamanya mana tolatae dupa endakali dupame kandapimili lao minatamane lao kandao kalyepape. Dopa pitamino kandao doko, nyakamanya Takange kaitinya katenge dokome nyakama yole mende nandita.
23353	MAT 6:2	“Nyakamame opale mende endakali tipya mende nisoo maiyoo pituu dokopa, minakasingi endakali dupame Jutamanya losuu andapi kaitini kembopi dupanya endakali dupame nyakama lalyipimili lao maku longo lengemali pyoo laa nayalapape. Minakasingi endakali dupame nyakama lalyipimi laka lao masingima. Dopa pingi endakali dupame nyakamanya yole doko nyepelyaminona lao nambame nyakama kiningi langilyo.
23355	MAT 6:4	Dopa pyoo nyakamame kondo kaenge mana doko yalo pyoo minataminopa nyakamanya Takange dokome mana yalo pyoo minatamino dupa kandatala nyakama yole mende ditana,” Jisasame lea-pyaa.
23356	MAT 6:5	“Dopana nyakamame loma setamino gii dokopa minakasingi endakali dupame loma singimali pyoo sala nayalapape! Dupame losuu andapi kaitini kembopi dupanya katao endakali enombanya loma sipuma laka lao masilyamino. Dopa pingi endakali dupame nyakamanya yole doko nyepelyaminona lao nambame nyakama kiningi langilyo.
23358	MAT 6:7	“Dee nyakamame loma soo pituu, kamalya katenge endakali dupame pingimali pyoo niminamu lao loma sala nayalapape! Dokaitame pii longo lao loma silyamano doko mambele Goteme setana lao masingima.
23366	MAT 6:15	Dopaka doko, nyakamame endakali waka dupanya koo pitamino dupanya yanu dupa kayala nayatamino kandao doko, Goteme nyakamanya koo pitamino dupa kunanya nepakala nayatakana,” Jisasame lea-pyaa.
23367	MAT 6:16	“Nyakamame Gote lao masalanya nee nanao katatamino dokopa, minakasingi endakali dupame pingimali pyoo enomba kumala nayalapape. Dokaitame nee nanao kalyamini lamo lao endakali dupame nyakama kandena lao enomba kumao lambalu pyapae paengema. Dopa pingi endakali dupame nyakamanya yole doko nyepelyaminona lao nambame nyakama kiningi langilyo.
23369	MAT 6:18	Endakali dupame nyakama nee nanao kalyaminona lao masala naena lao dopa pyepape. Dopa pitaminopa nyakamanya Takange yalo pyoo katenge dokome iki maseta. Baame nyakamanya yalo pyoo pitamino doko kandatala nyakama yole mende ditana,” Jisasame lea-pyaa.
23370	MAT 6:19	“Nyakamame oapi epe dupa yuu dakenya nyoo limbala nayalapape. Yuu dakenya setapaesa kokalyame koyasingi. Dee kaa tao koenge. Pake nenge endakali dupame anda kalupala pake nyingimaka.
23372	MAT 6:21	Nyakamanya oapi epe dupa setenge panda dokonyaka nyakamanya mona yukuoo setengema daape!” Jisasame lea-pyaa.
23373	MAT 6:22	“Lenge doko yongenya kia joo telyamo. Embanya lenge doko auu pyoo tao payateno kandao doko, embanya yonge doko pitaka etete tii pita.
23374	MAT 6:23	Dopaka doko, embanya lenge lapo tao payateno kandao doko, embanya yonge doko pitaka iminjeta. Tii pipae emba-kisa silyamo doko iminjetamo kandao doko, iminjetae doko etete andaka jetana,” Jisasame lea-pyaa.
23375	MAT 6:24	“Endakali mendeme kamongo lapomanya kalai pakao pyakamaipenge nanjilyamo. Dopa pitoo lao masetamo kandao doko, tenda baame mende doko auu nakayapala mende doko auu kayata. Dee baame mende doko mona setapala mende doko maka kayata. Dopana nyakamame Gotepa munipa lapota mona setapenge nanjetana,” Jisasame lea-pyaa.
23376	MAT 6:25	“Dopana nyakamame nyakama tange auu pyoo katapenge dupanya lao masetala, ‘Naima neepi endakipi aki nao katatama laa kanjemape?’ dee ‘Yonge yati akimi pitamape?’ lao nea kayala nayalapape. Endakali auu pyoo katenge tenge doko neepi endakipi, yongenya yati pingipi dutupape?
23379	MAT 6:28	“Angi aipuma nyakamanya yongenya pingi dupa lao masetala nea kaelyamipi? Nyakamame mee tanu dupanya dii yati pipae dupa aipa pyoo pyakalyingipi lao masokondape pyepape. Dupame kalai mende pyaa naengema. Dee yonge peepi mende wasala naengemaka daape!
23382	MAT 6:31	Dopana nyakamame ‘Neepi endakipi aki nalamane laa kanjemape, yonge pee aki pyaamane laa kanjemape?’ lao nea nakayalapape!
23385	MAT 6:34	Tenge dokonya minao nyakamame taitanya lao masetala nea nakayalapape. Taita doko taitanya kalai. Kenda pipae yuu mendai doko gii dokopa ikiaka jingina,” Jisasame dopa lea-pyaa.
23386	MAT 7:1	“Nyakamame endakali mende koo epe lao yapala nayalapape. Dopa pitaminopa Goteme nyakama koo epe lao yapala nayataka.
23389	MAT 7:4	Emba tangenya lenge dokonya ita waiyepae andake mende setamopa aipa petala embame embanya endakali yango mende kandao, ‘Embanya lengenya kuni silyamona nyakatoo,’ latepe?
23391	MAT 7:6	“Nyakamame epe etete dupa endakali yana jepae dupa namaiyepape. Dee nyakamanya mamaku epe dupa endakali mena jepae dupa katatamisa pyale lao namaiyepape. Maitamino kandao doko, dokaitame moko katanya iki nepatala, kapilyetala nyakama nao indyuu nepatamina,” Jisasame lea-pyaa.
23392	MAT 7:7	“Nyakamame tee laapape! Kapa pao nyetami. Kutalapape! Kapa pao kandatami. Andakaita watawata pyepape! Kapa pao lumbakata.
23397	MAT 7:12	“Endakali dupame nyakamanya pyakapimili lao masetamili pyoaka nyakamame dupanya pyakamaiyepape! Moseseme pii pepa piapi potopesa dupame pii pepa piamipi dupame pii dokonyaka tenge paliuu lapae silyamona,” Jisasame lea-pyaa.
23398	MAT 7:13	“Koenge panda koo ongonya penge kaitini doko andake. Kaitini dokonya kembo doko pee latae. Endakali longo dupame kaitini kembo dokonya kolamengema. Dopana nyakama kaitini kembo tambukinatae dokonya kolamalapape.
23399	MAT 7:14	Lete etete katenge panda dokonya penge kaitini doko yakane. Kaitini dokonya kembo doko tambukinatae. Endakali kuki mendai mendiaimi iki kaitini kembo doko kandasingimana,” Jisasame lea-pyaa.
23400	MAT 7:15	“Nyakamame sambo potopesa dupa kandao isoo kalyepape! Dokaitame mena sipisipi yanu pee petala nyakama katatamisa ipatamiaka doko, monanda-kaita yana kapua joo ipatami.
23405	MAT 7:20	Dopana, nyakamame sambo potopesa dokaitanya mana minatamino dupa kandatala dopale lamo lao masetamina,” Jisasame lea-pyaa.
23406	MAT 7:21	“Namba kandao, ‘Kamongo, Kamongo,’ lenge endakali dupa pitaka Kaitinya Katenge dokome isingi dokonya napatami. Nambanya Takange kaitinya katenge dokome masingili pingima dupa iki patami.
23407	MAT 7:22	Gii andake doko ipatamopa endakali longo dupame namba kandao, ‘Kamongo, Kamongo, naimame embanya kenge doko lao Wai Pii Epe doko lamaiyama. Naimame embanya kenge doko lao enjele koo longo watao piama. Naimame embanya kenge doko lao kalai pupu lapae longo dupa piamana,’ latami.
23408	MAT 7:23	Gii dokopa nambame dokaita lamaiyoo, ‘Nambame nyakama kukipi masala naengena, nyakama endakali koo pingi dupa namba kalyosa naepenya pupa!’ latona,” Jisasame lea-pyaa.
23409	MAT 7:24	“Dopana, nambanya pii dutupa sepala watao minatamino endakali dupa pitaka, akali masepae mendeme baanya anda yuu kyotonya piamo dopale.
23412	MAT 7:27	Aiyuu ipao endaki lyoo poo pupu lao lao piamo dupame anda doko pyao takiamopa etete takyoo pandu pyambea-pyaana,” Jisasame lea-pyaa.
23416	MAT 8:2	Dokopa akali kopetali mendeme Jisasa kateamo dosa ipao luma lakapala baa lamaiyoo, “Akali Andake, embame nambanya kopetali doko mee jakatoo lao maseteno kandao doko, kapa pao mee jakalapenona,” lea-pyaa.
23417	MAT 8:3	Dopa leamopa Jisasame akali doko kingimi watandatala, “Nambame emba mee jipili lao masilyona, emba mee jaa!” lea-pyaa. Dopa lalu piamo gii dokopaka akali dokonya kopetali doko mee jakamaiya-pyaa.
23418	MAT 8:4	Dopa piamopa Jisasame akali doko lamaiyoo, “Kandeleno! Embame endakali mendaipi mende lamaiya naenya, pitisa dokome emba kandena puu! Dopa petala emba mee jilino doko dokaitame kandena laitaka pyoo wamba Moseseme makande seteamoli pyoo, opale epe mende Gote lao kundi maiyalena,” lea-pyaa.
23419	MAT 8:5	Jisasa Kapaneame yuu taono dokonya pao pyakameamopa yanda singi amii isingi akali mendeme ipupala baa nisina lao kyoto joo dapa lao tee lea-pyaa: “Akali Andake, nambanya kendemane mende yaina nyepala kuli akipi dupa pitaka kumao etapapumopa tanda andake nao andaka yaina silyamona,” lea-pyaa.
23421	MAT 8:7	Dopa leamopa, Jisasame baa lamaiyoo, “Nambame baa saka nyala ipatoana,” lea-pyaa.
23422	MAT 8:8	Dopa leamopa yanda singi isingi akali dokome baanya pii yanu pyakamaiyoo, “Akali Andake, dopa napipi! Emba nambanya andaka kapa pao ipupenge namba akali epe daana, embame piimi iki latenopa nambanya kendemane doko saka paapomo.
23423	MAT 8:9	Namba apata akali kenge singi mendenya pundipundi katenge. Dee yanda singi mendapua nambanya pundipundi katengemaka. Dupanya mende pena lelyopa baa penge. Mende epena lelyopa baa epenge. Dee nambanya kendemane mendeme mende pina lelyopa baame pingina,” lea-pyaa.
23424	MAT 8:10	Jisasame pii doko sepala akali doko kandao longo lao masia-pyaa. Dopa petala baa watao epeamino endakali dupa lamaiyoo, “Nambame nyakama kiningi langilyona, Isataele endakali dupanya dapa pyoo masoo miningi endakali mende nambame nakandapu.
23426	MAT 8:12	Dopaka doko, isingi pandanya katapenge endakali dupa iminjetae panda koo dokonya watao pyandata. Dopa pitamopa dokonya katao ee lao yamataka lao nenge gilyoo katatamina,” Jisasame lea-pyaa.
23427	MAT 8:13	Dopa latala baame yanda singi isingi akali doko lamaiyoo, “Embanya kendemane doko embame masoo minatenoli pyekenana, indupa emba andaka puu,” lea-pyaa. Dopa leamo gii dokopaka isingi akali dokonya kendemane doko saka pea-pyaa.
23431	MAT 8:17	Baame dopa piamo dokome wamba potopesa Aisayame lao pituu, “Baame naimanya yonge nepenge dupa nyia. Dee baame naimanya yaina tata dupa soo nepekeana,” leamo doko etete angi jia-pyaa.
23432	MAT 8:18	Endakali kambu mendeme Jisasa baa katao kakopeamino kandatala baame lao pituu, “Naima endaki pete ongonya omotena muaa,” lea-pyaa.
23433	MAT 8:19	Dokopa mana setapae masingi akali mendeme baa kateasa ipupala lao pituu, “Mana Lenge Akali, emba payateli pyoo nambame emba watao payatoana,” lea-pyaa.
23434	MAT 8:20	Dopa lateamopa Jisasame baa lamaiyoo, “Yana kapua dupanya palenge yuli tombapae dupa singi. Dee yaka dupanya palenge panda singiaka doko, Endakalinya Ikiningi dokonya imambu soo aiyomba setenge panda mende nasingina,” lea-pyaa.
23435	MAT 8:21	Dokopa dee akali waka baa watao payamino dupanya mendeme Jisasa lamaiyoo, “Akali Andake, wambao nambame nambanya takange doko malu petala puu lapoko,” lea-pyaa.
23436	MAT 8:22	Dopa leamopa Jisasame baa lamaiyoo, “Endakali kumapae joo katengema dupame kumapae yango dupa tange malu pina, embame namba watao ipu,” lea-pyaa.
23439	MAT 8:25	Dopa piamopa baanya disaipele dupame baa pyale tatala, “Kamongo, naima kumalanya petelyamanona, embame naima pyoo nyaa!” leami-pyaa.
23440	MAT 8:26	Dopa leaminopa Jisasame dokaita lamaiyoo, “Nyakama kuki masoo miningima lamo dupa aipuma paka kaelyamipi?” lea-pyaa. Dokopa baame sakatatala poo leapi endaki buu miniapi dupa kaena leamopa kuki emapi mende napia-pyaa.
23441	MAT 8:27	Dopa piamopa akali dupame mona etete andapala, “Poopa endakipa dolapome baanya pii sakamaingimba lamo doko, akali dake aki akali mende laa kanjemape?” leami-pyaa.
23443	MAT 8:29	Dokopa akali dolapome puu lao ae lao, “Gote Ikiningi, embame naima aipa pyaanya epelepe? Embanya pipenge gii doko ipatala nayapumopa embame naima tanda andake dyaanya ae wambao epelepe?” leambi-pyaa.
23445	MAT 8:31	Dokopa enjele koo dupame Jisasa kandao, “Naimame akali dalapo yakinatala pupale lao pyao watateno kandao doko, mena kalyamino dupanya koko palya pupa lapoko,” leami-pyaa.
23446	MAT 8:32	Dopa leaminopa Jisasame dupa kandao, “Pupana!” lea-pyaa. Dopa leamopa enjele koo dupame akali dolapo yakinatala pao mena dupa-kisa landa piami-pyaa. Dopa peteaminopa mena elyambu doko alo pyao pao papatale mendenya pyakatala endaki pete dokonya tumbitambi napala kumiami-pyaa.
23448	MAT 8:34	Dopa leaminopa yuu taono dokonya palenge endakali dupa pitakame Jisasa kutao pupala kandanyiami-pyaa. Kandanyetala, “Embame naimanya yuu dake yakinatala puu!” lao kongo leami-pyaa.
23450	MAT 9:2	Dokopa endakali mendapuame akali papa tambotae mende lapa tokonya soo baa kateasa epeami-pyaa. Dopa piaminopa Jisasame dokaitanya masoo miniamino doko kandatala, akali papa tambotae doko lamaiyoo, “Wane, embanya koo dupa kunanya nepekelyona, emba mona yaepa!” lea-pyaa.
23451	MAT 9:3	Dopa leamopa mana setapae masingi akali mendapuame nyakama lapo lao pituu, “Akali dakeme Gote kilya kandao lelyamona,” leami-pyaa.
23452	MAT 9:4	Dopa leamino doko Jisasame kandatala dokaita lamaiyoo, “Aipuma nyakamame koo dopale dupa masilyamipi?
23454	MAT 9:6	Dopaka doko, Endakalinya Ikiningi dokome isa yuu dakenya katao endakali dupanya koo dupa kunanya nepenge pupu lapae doko baa-kisa singi lamo lao kanjepalena,” lea-pyaa. Dopa latala baame akali papa tambotae doko lamaiyoo, “Emba sakata! Sakatatala embanya lapa toko doko nyoo soo andaka puuna!” Jisasame lea-pyaa.
23457	MAT 9:9	Jisasame yuu doko yakinatala ipao pituu, takisa nyingi akali Matyu lenge mende takisa nyingi anda dokonya peteamo kandea. Kandatala baa lamaiyoo, “Emba namba watao ipu,” lea. Dokopa baa sakatatala Jisasa watao pea.
23459	MAT 9:11	Dopa piamino doko akali Patasi dupame kandatala Jisasanya disaipele dupa pisoo, “Nyakamanya mana lenge akali dokome takisa nyingi akalipi mana koo minao paenge endakalipi dupa-pipa awapa nee nao pituu kalyamo doko aipuma pilyape?” leami.
23460	MAT 9:12	Dopa leamino doko Jisasame sepala yanu pyao, “Endakali yaina napingi dupame dokosaa katatasa pupenge nanjilyamo. Endakali yaina pyapae dupa pupenge jilyamo.
23461	MAT 9:13	‘Kundi dingi doko daana, kondo kayamaingi doko nambame auu kaenge.’ Pii dopa lapae singi doko nyakamame mana nyala pupa. Nambame endakali tolatae dupa lanyala naepeo. Endakali mana koo minao paenge dupa lanyala epeona,” lea.
23462	MAT 9:14	Gii dokopa Jonenya disaipele dupame Jisasa kateasa ipupala baa pisoo, “Naimapi Patasi dupapimi Gote lao masalanya nee nanenya kaengena, embanya disaipele dupame aipuma dopa napingimape?” leami.
23463	MAT 9:15	Dopa leaminopa Jisasame dokaitanya pii yanu pyakamaiyoo, “Akali mendeme enda kelyapala watapae pyao baanya kaita miningi dupa-pipa awapa kalyamo gii dokopa baanya kaita miningi dupame mona kenda kaengemape? Daa! Dopaka doko, yuu gii mende ipatamo dokopa enda kelenge akali doko dupanya kainanya nyokonyetatamopa dupa nee nanao katatamina,” lea.
23464	MAT 9:16	“Endakali mendaipi mendeme lapalapa kangupae enenge mendeme yonge pee wambatae mendenya tii telya dokonya kii pimbala naenge. Endakali mendeme dopa pitamo kandao doko, enenge doko inungunyetala wambatae doko kangutamopa tii andake tata.
23465	MAT 9:17	Dee endakali dupame waene enenge doko penge mena meme yanungimi wasepae wambatae dupanya kambuoo pisala naengema. Dupame dopa pitamino kandao doko, waene enenge dokome bolo lao penge dupa polapala kai lala patamopa penge dupa koyata. Endakali dupame waene enenge doko penge enengenya pisilyaminopa pengepa kopao petengena,” Jisasame lea.
23466	MAT 9:18	Jisasame pii doko dokaita lamaiyoo kateamopa Jutamanya losuu anda isingi akali mendeme ipupala baa kandao luma lakapala lao pituu, “Nambanya wanenge doko epapu kumatalamo. Kumatalamoaka doko, embame ipao baa kingimi watandatale. Dopa pitinopa baa dee lenge talapomona,” lea.
23469	MAT 9:21	Enda dokome, “Nambame baanya yonge peenya iki watandato kandao doko, nambanya yaina doko mee jakalapomona,” lao masetala dopa pia.
23470	MAT 9:22	Dopa piamopa Jisasame kapilyetala enda doko kandatala lamaiyoo, “Wanaku, embame masoo minapino dokome emba mee injisetelyamona, emba mona yaepa!” lea. Dopa leamo gii dokopaka enda dokonya yaina doko mee jia.
23472	MAT 9:24	Dopa piaminopa baame dokaita lamaiyoo, “Nyakama pyuu pupa! Wanaku dake kumatala nayalamo. Baa luu palyeme lamona,” lea. Dopa leamopa endakali dupame baa kilya kandao gii kayami.
23475	MAT 9:27	Jisasame yuu doko yakinatala peamopa akali lenge monda mendalapome baa watao ipao wii lao, “Dapiti Yumbange, embame nalimba kondo kayape!” leambi.
23476	MAT 9:28	Jisasa andaka kolandatala peteamopa akali lenge monda dolapo epeambi. Epeambinopa baame dolapo pisoo, “Nambame kapa pao nyalambome pyakapili lao masilyambinoli pyakalapenona lao masoo minilyambipi?” lea. Dopa leamopa dolapome yanu pyao, “Kamongo, kini dopaka lao masilyambanona,” leambi.
23477	MAT 9:29	Dokopa Jisasame baanya kingimi dolaponya lengenya watandatala lao pituu, “Nyalambome masoo minilyambinoli pinana!” lea.
23478	MAT 9:30	Dopa leamopa akali dolapo dee lenge teambi. Dokopa Jisasame akali dolapo kyoto joo lamaiyoo, “Dake endakali mendeme setana kandao kalyepape!” lea.
23481	MAT 9:33	Dokopa Jisasame akali doko-kisa enjele koo paleamo doko watao pyakamaiya. Pyatakamaiyamopa akali doko pii lea. Dopa piamopa endakali kambu piamino dupame mona etete andapala, “Wamba naima Isataele endakali dupame mana dapale mendaipi mende nakandeamana,” leami.
23482	MAT 9:34	Dopa leaminoaka doko, Patasi dupame lao pituu, “Enjele koo dupanya isingi doko mambele baame enjele koo dupa watao pilyamona,” leami.
23485	MAT 9:37	Dopa petala baame baanya disaipele dupa lamaiyoo, “Eenya nee longo wambu petelyamoaka doko, mandyuu mau pyapenge endakali longo nakalyamino.
23486	MAT 9:38	Dopana ee tange dokome baanya nee mandyuu mau pyakamaitami endakali mendapua epena lape lao nyakamame loma salapape!” lea.
23491	MAT 10:5	Jisasame akali kingi ita mende-kisa dee lapoma dutupa kalai pyaa pena lao pituu dapa pyepape lea: “Nyakamame endakali tata waka dupanya yuusa napupape. Dee Samatiamanya yuu taono mendenya napupapeaka.
23493	MAT 10:7	Pupala, ‘Kaitinya Katenge dokome isingi doko tengesa petelyamona,’ lao pii lamaiyepape.
23497	MAT 10:11	“Nyakama yuu taono andake mendenya tamopi yakane mendenya tamopi pupala endakali mendepa nyakama kapa pao awapa katapengepe lao kutao kanjepape. Kutao kandatala baapaka tole katapala paanya pituu ongopa baa yakinatala pupape.
23501	MAT 10:15	Goteme endakali dupa mokosetamo gii dokopa yuu taono dokonya kenda pipae ipatamo dokome yuu taono Sotoma Gomotapanya kenda pipae ipatamo doko ita minatana lao nambame nyakama kiningi langilyona,” Jisasame lea.
23502	MAT 10:16	“Kandeleno! Nambame nyakama mena sipisipi jepae dupa yana kapua dupanya kainanya pupa lelyo. Dopana kanopato dupame waa katengemali pyoo nyakama kandao isoo katao, yaka maileo dupame mona epe mendai palyoo petengemali pyoo kalyepape.
23507	MAT 10:21	“Akali mendapuame nyakamanya kaiminingi etete dupa enge nyepala pyao kumasina lao maitami. Akali mendapuame nyakamanya wane dupa dopaka pitami. Wane mendapuame kandapilyetala nyakamanya endangi takangepi dupa pyao kumasina lao maitamiaka.
23510	MAT 10:24	“Mana nyingi akali mendeme baa mana lamaingi akali doko ita naminingi. Kendemane mendeme baa isingi doko ita naminingiaka.
23511	MAT 10:25	Dopana mana nyingi mendeme baa mana lamaingi akali dopale joo katatamo kandao doko, mona yaepapenge. Dee kendemane mendeme baa isingi akali dopale joo katatamo kandao doko, mona yaepapengeaka. Endakali dupame endakali isingi doko kandao kenge koo Belesapulu latamino kandao doko, baa tata dupa kandao kenge etete koo mendapua latamina,” Jisasame lea.
23512	MAT 10:26	“Dopana, nyakamame endakali dupa paka nakayalapape. Sanga pyatae silyamo dupa pitaka tenda lopalyeta. Yalo petae silyamo dupa tenda panasetaka.
23517	MAT 10:31	Dopana, nyakamame yaka longo dupa ita minao alyasale joo kalyaminona paka nakayalapape!” Jisasame lea.
23518	MAT 10:32	“Endakali mendeme endakali dupa-kisa ‘Namba Kataisanyana,’ lao lao panatamo doko kandao, nambame nambanya Takange kaitinya katenge doko-kisa ‘Baa nambanyana,’ lao lao panatoaka.
23519	MAT 10:33	Dopaka doko, endakali mendeme endakali dupa-kisa ‘Namba Kataisanya daana,’ latamo doko kandao, nambame nambanya Takange kaitinya katenge doko-kisa ‘Baa nambanya daana,’ latoakana,” lea.
23520	MAT 10:34	“Nambame yuunya endakali dupa mona mendai paliuu katena lao epe yuu yongasalanya epeena lao masala nayalapape. Daa! Nambame epe yuu yongasala naepeona, ŋiliŋali lenge mana doko sakatasala epeo.
23523	MAT 10:37	“Endakali mendeme baanya takange tamopi endangi tamopi mende auu kayapala, namba auu kayalakao nakayatamo doko kapa pao nambanya joo nakatata. Dee endakali mendeme baanya ikiningi tamopi wanenge tamopi mende auu kayapala, namba auu kayalakao nakayatamo doko kapa pao nambanya joo nakatata.
23525	MAT 10:39	Endakali mendeme namba lao masetala baa tange yakinatamo kandao doko, baa auu pyoo katata. Dee endakali mendeme baa tange yakinala nayatamo kandao doko, baa koyatana,” Jisasame lea.
23526	MAT 10:40	“Endakali mendeme nyakama lanyetamo dokome namba lanyeta. Namba lanyetamo dokome namba puu leamo doko lanyeta.
23528	MAT 10:42	Dee endakali mendeme namba watao paenge endakali mee datupanya mende nambanya endakalina lao masetala endaki kii napae mende iki nena lao kambuoo maitamo endakali dokonya yole doko eteteaka kapa pao sulu soo setana lao nambame nyakama kiningi langilyona,” Jisasame lea.
23530	MAT 11:2	Jone Kaimbu Pingi doko anjetae paliuu Kataisame kalai pupu lapae dupa pilyamo lapae sepala, baanya disaipele mendatupame Kataisa kateasa pupala, “Emba akali mende ‘Ipatana’ latae dokope, pande naimame akali waka mende malisemape?” lao pisoo sala pena lea-pyaa.
23532	MAT 11:4	Dupame pupala pisiaminopa, Jisasame dokaitanya pii yanu pyakamaiyoo, “Nyakamame pilyetala kandelyamino dupapi silyamino dupapi Jone lamaiyepape.
23533	MAT 11:5	‘Lenge koo dupa dee lenge telyamino. Moko koo dupa kaita paelyamino. Kopetali dupa mee jilyamino. Kaleketa dupame pii silyamino. Endakali kumapae dupa dee lenge tao kalyamino. Endakali tipya dupame Wai Pii Epe doko silyamino.
23534	MAT 11:6	Dee akali mendeme namba maka kayapala mona lapo palyala naenge doko mona yaepasetae kalyamona,’ pii dutupa Jone lamaiyepape!” Jisasame lea.
23535	MAT 11:7	Jonenya disaipele dutupa pilyeteaminopa, endakali kambu pyao kateamino dupa Jonenya lao Jisasame pii lamaiyoo, “Wamba nyakamame endakali napalenge yuu dokonya aki mende kanja peamipi? Kembo maitangepi mende poome ema ema pyoo kateamo kanja peamipi?
23538	MAT 11:10	Akali doko kandao dapa lao pepa pyapae silyamo: ‘Kandeleno! Nambame nambanya wai minao paenge akali doko embanya wambao pekena latopa embanya kaita doko depa lanya setakata!’ lapae silyamo.
23542	MAT 11:14	Dee nyakamame setami tamo kandao doko, dake apata salapape: ‘Ipatana’ latae Ilainja doko Jonena, nyakama kalekaita singi dupame pii doko salapape!
23544	MAT 11:16	“Nambame endakali tata indupa palelyamino dupa aki mendepa makande pyuape? Wane kole dupame kamapi dupanya kambu lapoma pyao pitipala pii dapa lao yanu pyaloo pyoo lengema: ‘Naimame nyakamanya pulupapulatakalamanoaka doko, nyakama lyala nayalamino! Nyakama kondo kayao ee latakalamanoaka doko, nyakama itingi laa nayalamino!’ Wane dupame dopa lao katengemana nyakama dopalema lamo.
23546	MAT 11:18	Doko, Jone baa ipupala nee endakipi epe mende nanao katapumopa dupame baa kandao, ‘Enjele koo mendeme baa minao kyakasilyamona,’ lelyamino.
23547	MAT 11:19	Endakalinya Ikiningi doko ipupala nee endakipi epe dupa nao kalyamo. Dopa pimopa dupame baa kandao, ‘Akali dakeme neepi endakipi tuu lao nawaka katao, takisa nyingi akalipi mana koo minao paenge endakalipi dupa-pipa kaita minao kalyamona,’ lelyamino. Dopaka doko, Gotenya masepae dokome dii angi mandyuu, baanya masepae doko tolataena lao panasingina,” Jisasame lea.
23549	MAT 11:21	Baame lao pituu, “Taono Kotasina tange dupame koyatama iki lamo lao masina! Taono Betesaita tange dupame koyatamaka iki lamo lao masina! Dupame kalai pupu lapae nyakamanya yuu dolaponya kandeami dupa wamba Taya yuupa Saitone yuupa dolaponya endakali dupame kandeamili kandao doko, dokaitame kenai lumbanya aiyombanya pyalyetala mena kende matapu pyoo yuu wamba waka mona kapilyiamili!
23552	MAT 11:24	Goteme endakali mokosetamo gii dokopa yuu dokonya kenda pipae ipatamo dokome Sotoma yuu dokonya kenda pipae ipatamo doko ita minatana lao nambame nyakama langilyona,” Jisasame lea.
23553	MAT 11:25	Gii dokopa Jisasame lao pituu, “Apane, emba yuupi kaitipi dupa pitakanya Kamongo kalyeno! Mana longo kandenge endakalipi masepae endakalipi dupame nakandena lao yalo piino dupa wane ŋaŋa joo katengema endakali dupame kandena lao embame panasiino dokonya nambame emba lao tama pilyo.
23555	MAT 11:27	“Nambanya Takangeme dupa pitaka nambame isepe lao namba-kisa setea. Endakali mendaipi mendeme Ikiningi doko masala naenge. Takangeme iki masingi. Dee endakali mendaipi mendeme Takange doko masala naengeaka. Ikiningimi iki masingi. Dee Ikiningi dokome Takange doko endakali mende laitaka pitoo lao masetala petelyamopa endakali dokome Takange doko lao masingiaka.
23556	MAT 11:28	“Nambame nyakama imambu nyalapa latona, kenda pipae andake dupa pitaka soo namba-kisa ipupape.
23558	MAT 11:30	Nambanya itakalya epe soo kalyamino doko tawe lapaena,” Jisasame dopa lea.
23560	MAT 12:2	Dopa piaminopa Patasi dupame kandatala Jisasa lamaiyoo, “Embanya disaipele dupame Sambasa gii dokonya daa latae singi mana doko minilyamino kandape!” leami.
23561	MAT 12:3	Dokopa Jisasame pii doko yanu pyao, “Nyakamame Dapitipi dee baa-pipa awapa kateamino akali dupapi lopo kayapala Dapitimi piamo doko nyakamame pepanya itaki pyala nayamipi?
23565	MAT 12:7	Pii mende dapa lapae silyamo: ‘Kundi dingi doko daana, kondo kayamaingi doko nambame auu kaenge.’ Pii dopa lapae silyamo dokonya tenge doko nyakamame masiamili kandao doko, tenge nasingi endakali dupa-kisa kapa pao tenge setala nayamili.
23566	MAT 12:8	Endakalinya Ikiningi dokome Sambasa gii doko isoo kalyamona,” Jisasame lea.
23568	MAT 12:10	Peamopa akali kingi kumapae mende petea. Endakali mendapuame Jisasa kosimi lamana lao masetala baa pisoo, “Sambasa gii dupanya endakali yaina pyapae dupa mee injisepenge doko, naimanya mana setapae dupanya kapa pelyape daape?” leami.
23569	MAT 12:11	Dopa leaminopa Jisasame dokaita lamaiyoo, “Nyakamanya akali mendenya mena sipisipi mende katatamo kandao doko, Sambasa gii mendenya yuli koko mendenya mangatamopa sipisipi tange dokome minatala kopyoo kamanda nanyetape?
23570	MAT 12:12	Endakalimi sipisipi dupa etete ita minao kalyamino daape! Dopana naimame Sambasa gii dokonya mana epe dupa minapengena,” lea.
23571	MAT 12:13	Dopa latala baame akali kingi kumapae doko lamaiyoo, “Embanya kingi doko tinoka,” lea. Tinokateamopa kingi doko yangi epe dopaleaka jia.
23574	MAT 12:16	Dopa petala baame kyoto joo dokaita lamaiyoo, “Nyakamame namba lao panala nayalapape,” lea.
23576	MAT 12:18	“Dake nambanya kalai akali doko nambame baa yapao nyepeo. Nambame baa etete auu kayapala, baa kandao etete mona epe palyingi. Nambanya Sipitisa doko baa-kisa setatopa, baame nambanya mana tolatae doko endakali tata dupa pitaka panao lamaita.
23579	MAT 12:21	Dokopa endakali tata dupa pitakame baa lao masoo minatala malisoo katatamina,” Aisayame dopa lea-pyaa.
23581	MAT 12:23	Dokopa endakali kambu piamino dupa pitakame mona andapala lao pituu, “Akali dake Dapiti Yumbangepe?” leami.
23582	MAT 12:24	Dopaka doko, Patasi dupame pii doko sepala lao pituu, “Enjele koo isingi Belesapulu mambele iki baame enjele koo dupa watao pilyamona,” leami.
23583	MAT 12:25	Dopa leaminopa Jisasame dokaitanya masiamino doko kandatala dokaita lamaiyoo, “Yuu dupanya kiŋi mendeme isingi tata dupanya mende wakale pyoloo petala yanda pitaminopa tata doko etete koyata. Dee yuu taono mendenya tamopi anda mendenya tamopi endakali dupa wakale pyoloo petala yanda pitaminopa taono doko tamopi anda doko tamopi etete koyataka.
23585	MAT 12:27	Nambame Belesapulu mambele enjele koo dupa watao pyapuli kandao doko, nyakamanya mana nyingi dupame api mambele enjele koo dupa watao pyapimilipi? Dokonya dokaitame, ‘Nyakamame kopeta leami lamona,’ latami.
23587	MAT 12:29	“Aipa petala akali mendeme akali pupu lapae mendenya andaka kolandatala baanya pinju setamo dupa kapa pao nyetape? Baame akali pupu lapae doko wambao kendeme yaki pinya setapala tamo kandao doko, kapa pao baanya andaka pinju setamo dupa pyao nyeta.
23588	MAT 12:30	“Endakali mende namba tata joo nakalyamo doko nambanya yandapipi lamo. Dee endakali mendeme namba-pipa endakali nyoo limbala naelyamo dokome endakali dupa saa lasingi.
23590	MAT 12:32	Endakali mendeme Endakalinya Ikiningi doko kandao lamba latamo kandao doko, Goteme baanya doko kunanya nepakamaita. Dopaka doko, endakali mendeme Oli Sipitisa doko kandao lamba latamo kandao doko, Goteme baanya koo doko indupapi tendapi kunanya nepakamaiya nayatakana,” Jisasame lea.
23591	MAT 12:33	“Ita epe dupame dii epeaka mandenge. Ita koo dupame dii ka mandenge. Ita mendenya dii mandelyamo dupa wambao kandatala ita angi doko dopale lamo lao masingima.
23594	MAT 12:36	“Nambame nyakama dapa langilyo: tenda mokosetamo gii dokopa Goteme endakali pii mee ambe lengema dupanya maa minao tenge angi doko piseta.
23595	MAT 12:37	Emba tangenya pii dokonyaka Goteme, ‘Emba-kisa tenge mende nasilyamona,’ lata. Daa tamo kandao doko, emba tangenya pii dokonyaka Goteme, ‘Tenge emba-kisa silyamona,’ latana,” Jisasame lea.
23596	MAT 12:38	Gii dokopa mana setapae masingi akalipi Patasipi mendapuame Jisasa lamaiyoo, “Mana Lenge Akali, embame kongali mende pipinopa naimame kandapuma laka lao masilyamanona,” leami.
23597	MAT 12:39	Dopa leaminopa baame dokaitanya pii yanu pyakamaiyoo, “Endakali indupa palelyamino dupame Gote yakinenge kooma lamo! Nyakamame kongali mende kandamana lelyaminoaka doko, nambame kongali mende pyakala nayatoo. Goteme potopesa Jonaa-kisa kongali piamo dokoaka makande petae seta.
23600	MAT 12:42	Wamba Isingi Enda Kuini mendeme yuu Sauta-kaita pituu masingi akali Solomone lenge doko kanjanya kaita etete londe mendenya epea-pyaa. Dopaka doko, indupa akali mendeme Solomone etete ita minao ae kalyamo. Tenge dokonya Goteme endakali mokosetamo gii dokopa, Isingi Enda Kuini dokome sakatatala nyakama kosimi latana,” lea.
23601	MAT 12:43	“Enjele koo mendeme endakali mende yakinatala dokopa, baa mendasa koto nyoo kalyanya yuu sapu dupanya paelya paena pyoo panda kutingi. Kutao kayapala, baame lao pituu, ‘Nambame anda wamba yakineo dokonya dee pilyoo pato,’ lenge. Dopa latala baame anda dokonya pao kandelyamopa anda kuaa doko potoma polao yati petae kalyamo kandenge.
23603	MAT 12:45	Dopa petae kalya silyasa baame pupala enjele etete koo kalange lanyepala anda dokonya dee pilyoo ipao katengema. Dokopa akali doko wamba kopeta kateamoaka doko, indupa etete kopeta katenge. Endakali tata koo indupa palelyamino dupa mendai dopaka pyoo katatamina,” Jisasame lea.
23605	MAT 12:47	[Dopa piaminopa akali mendeme Jisasa lamaiyoo, “Yaa, embanya endangi dokopi kaiminingi dupapi kamaka katapala emba-pipa pii lamua laka lao masilyaminona,” lea.]
23606	MAT 12:48	Dopa leamopa Jisasame akali dokonya pii yanu pyakamaiyoo, “Nambanya endangi doko apipi? Nambanya kaiminingi dupa apitupape?” lea.
23607	MAT 12:49	Dopa latala baame baanya disaipele dupa kingimi laitaka petae katao lao pituu, “Datupa nambanya endangipi kaiminingipina, kanjepape.
23608	MAT 12:50	Nambanya Takange kaitinya katenge dokome masingili pingima endakali dupa nambanya kaiminingipi, pimalengepi, endangipina,” Jisasame lea.