23214	MAT 1:1	Jiquio esohui etehueꞌyo Jesosa Quitoja etiiquiana. Yahuajo jama poa baꞌa: Dabi Jesosaja etiiquiana poa, Amajama peaꞌai.
23215	MAT 1:2	Eꞌe, jamaya poa: Amajamaja bacua ejja Isaaca bajjani poa. Isaacaja bacua ejja Jacobo bajjani poa. Jacoboja bacua Joda bajjani poa; echahua mese cuana enequia poa peaꞌai.
23216	MAT 1:3	Jodaja bacua cuana Panesi bajjani, pea Sana bajjani poa, Tamaja mejo poa. Panesija bacua Esomo bajjani poa. Esomoja bacua Anami bajjani poa.
23218	MAT 1:5	Sanamoja bacua Bosi bajjani poa, Shajamija mejo poa. Bosija bacua Obeda bajjani poa, Shotija mejo poa. Obedaja bacua Isaiꞌ bajjani poa.
23219	MAT 1:6	Isaija bacua emeshi mese Dabi poa. Dabija bacua Sanomoni bajjani poa. Sanomonija enaese eꞌahuemano poa, Oniaja quijjojea, Dabija huanaꞌyo poa.
23224	MAT 1:11	Josiaja bacua Jeconia bajjani poa; echahua mese cuana enequia poa peaꞌai. Jeconia nequinajejo, Babinonia dejja cuaa Isaeni cuana iña majje dojo ca poa oja meshi yasijje sosemaꞌ chaco meeya.
23229	MAT 1:16	Jacoboja bacua Jose bajjani poa. Oya Maniaja yahue poa. Maniaja bacua Jesosa bajjani aca poa, Quito bajjani peaꞌai poa, Eyacuiñajjija huoojeaꞌyo ojjaña cuana jaahuanajji.
23230	MAT 1:17	Jamajjeya Amajamaja bacua ejja tii majje jea ca poa pea. Majoya tii majje ohuaya pea jea ca poa. Jamaya aca poquiapoquia poa. Quijje nei etiiquiana Dabi cuaya poa. Etiiquiana Amajamaja jeaja osecua cuana 14 poa Dabi cuaya jjimahuajo. Majoya oya jayojja Dabija bacua ejja tii majje jea ca poa pea. Tii majje ohuaya pea jea ca poa. Quijje nei Dabija osecuaja jeaja osecua cuana 14 po majje, dejja mase cuaa etiiquiana cuana Babinonia meshi yasijje dojo ca poa. Majoya Babinonia meshi yasijje poqui majje oya jayojja aca poquiapoquia poa. Majoya quijje nei Jesosa Quito cuaya poa Joseja tii mee. Ma etiiquinaja jeaja osecua cuana 14 poa Jesosa Quito cuaya jjimahuajo. Eꞌe, jamaya poa.
23231	MAT 1:18	Jesosa Quitoja ecuayaꞌyo jama poa baꞌa: Joseja Mania emese na poa. Mania bii ania poa; dejja cuana ba jjima poa. Jamatii oꞌejji poa. Eyacuiñajjija Edojjoshahua Pameya ebacua baꞌe mee ca poa, Maniaja ebacua.
23232	MAT 1:19	Jose quea pame nee poa. Jamajjeya Mania oꞌejji poajo jjahuanaqui sa po ajja poa. Jjashahuabaquia poa jama baꞌa: —Eꞌe pojjaꞌa Mania pea cojjojji poanaje. Jamajjeya oya jjamejoquinaje. Eyaya oya cajaa aje. Quehuajje cajaa aje Mania, pea cuanaja ba jjima. Jamajjeya pea cuana Maniajo maimai ajja poaje.
23233	MAT 1:20	Jamaya jjashahuabaquianijo Joseya cahuiba ca poa. Oe Eyacuiñajjija esohuidojojji miminaje onijje. Jama poanaje baꞌa: —Jose, ¡aꞌa Mania cajaa ajji! ¡Oya huanacue! Oja bacua Eyacuiñajjija Edojjoshahua Pameja baꞌe mee.
23235	MAT 1:22	Eꞌe, Eyacuiñajjija esohui huohuijjija esohui yahuajo nei nei jayojjaya jjeya nei jamaya poani. Jamaya yahuajo poa baꞌa:
23237	MAT 1:24	Majoya shequiꞌyo majje Eyacuiñajjija esohuidojojjija esohuijo Mania huana canaje, Joseya.
23238	MAT 1:25	Jamatii ebacua cuaya jjimajo, Joseja Mania napa jjima poa. Ebacua cuayajo Jesosa bajjani acanaje.
23239	MAT 2:1	Jesosa cuayanaje Jodea meshijo, Benena cuiñajjijo. Cuayanajejo dejja Enode bajjani emeshi mese poa. Jamajjeya Jesosa Quito cuayanajejo, pea dejja cuana majametajo jjashahuaba neineiquiani, eshequi poeje mijijje meshijo baꞌe quea huesha nee poeyanaje Jenosanena cuiñajji yasijje.
23240	MAT 2:2	Majoya oya cuanaa Enode huohuiꞌajja canaje jama baꞌa: —Emeshi mese, ¿achejo jaa ebacua eshoꞌi nei, ma Jodio cuanaja Emeshi Mese poajeꞌyo? Pea meshijo eshequi poeje mijijjejo nequi ojaya majameta ai quea jiji nee nee ecuaa banaje. Majoya ecuana poeyanaje o bihuiaa —poanaje.
23242	MAT 2:4	Jamajjeya Enodeya ojjaña Eyacuiñajji nijje emimijji etii cuana, ojjaña Moisesija esohui etehueꞌyo huohuijji cuana peaꞌai iyaa canaje o que. Jama huohuiꞌajjame acanaje baꞌa: —¿Achejo shai cuayaje ebacua Quito? Oya Eyacuiñajjija huoojeaꞌyo ese jaahuanajji poajeꞌyo —acanaje Enodeya.
23243	MAT 2:5	Oya cuanaa huohui canaje jama baꞌa: —Quito Benenajo cuayaje, Jodea meshijo. Yahuajo nei nei huohui canaje Eyacuiñajjija esohui huohuijjiya jama baꞌa:
23245	MAT 2:7	Emeshi mese Enodeya dejja cuana eshequi poeje mijijje baꞌe iyaa ca oꞌoyanaje o que. Quehuajje huohuiꞌajja canaje ebacuajo. Ma dejja cuaa huohui canaje ache mecajje majameta ai quea jiji nee nee ba coo canaje, ebacua cuayajo pojjaꞌa.
23247	MAT 2:9	Emeshi mese Enodeya huoojea cajje ma dejja cuana poquinaje ejiojjijje. Ejiojjijo poquianijo majameta ai quea jiji nee eyajo ba ca oꞌoyanaje ehui dojojji, yahuajo jama. Majameta ai nequi cojja nei poquiꞌyonaje ebacua huasijje. Majameta jijinequinaje tii ebacua jaa cojja nei.
23249	MAT 2:11	Equi yasijje dobiquinaje. Ebacua Jesosa ba canaje enaese nijje, Mania nijje. Ba majje ebacua bihuia canaje ecuiꞌoshajjajo nequiya. Bashosoco pichojea majje aquiana quea nahue quia canaje ebacuaja. Mei huoꞌo quia canaje, shiyeshiye quea nahue quia canaje, esei quea shiye nee quia canaje peaꞌai.
23250	MAT 2:12	Majoya ma dejja cuana jjacahuibaquianijo, Eyacuiñajji onijje miminaje jama baꞌa: —¡Aꞌa poqui oꞌoyajji emeshe mese Enode yasijje! Jamajjeya oya cuana poqui oꞌoyanaje oja meshi yasijje pea ejiojjijje. Enode banaꞌyo jjima aca poa.
23251	MAT 2:13	Majameta eba neineiꞌyojji dejja cuana poquiꞌyo majje Eyacuiñajjija esohuidojojji poeyanaje Jose que, Jose ecahuijaajo. Miminaje Jose nijje jama baꞌa: —¡Shequicue oe! ¡Nequisohuacue oe! ¡Ebacua, enaese peaꞌai dojocuajicue jjeyahua nei Ejito meshi yasijje! ¡Jomajo nequicue! Quijje eyaya miya huohuije miquea meshi yasijje epoe oꞌoyajji. Jjeya emeshi mese quea maseya Enode bajjaniya ebacua saꞌajja neinei cani equecuajeaꞌyojji.
23252	MAT 2:14	Jose nequisohua majje ebacua, enaese peaꞌai dojocuaji canaje ejiojjijje Ejito meshi yasijje, mecashono.
23253	MAT 2:15	Ejito meshijo nequiꞌyonaje emeshi mese Enode eshe nequijo. Enode manoꞌyajo Isaenija meshi yasijje poe oꞌoyanaje, Jose. Jamajjeya Eyacuiñajjija esohui huohuijjija esohui yahuajo nei nei jayojja jama poa. Eyacuiñajjija esohui tehue ca poa yahuajo nei nei jama baꞌa: “Ecuea ebacua Ejito meshijo baꞌe eyaya iyaaꞌyonaje”.
23254	MAT 2:16	Emeshi mese Enodeya ba canaje dejja majameta eba neineiꞌyojji cuanaa oya dasia ca poa. Jamajjeya oya quea quene nee nee poa. Oja sohuinano cuana huoojea caꞌya poa: —¡Ojjaña ebacua joya tonatona aiꞌai quecuajeaquicue! ¡Benenajo baꞌeja ebacua dejja shoꞌi cuana, Benena pejjejo baꞌeja peaꞌai oe quecuajeaquicue! Jamajjeya manoꞌyonaje ojjaña ebacua dejja shoꞌi daqui she becanejjijji peaꞌai epo tonatona aiꞌai, eshoꞌi nei peaꞌai. Eꞌe, majameta eba neineiꞌyojji dejja cuanaja ehuohuiꞌyojo, majameta ai quea jiji nee poanaje, ojjaña ebacua quecua sa poa Enode.
23257	MAT 2:19	Emeshi mese Enode manoꞌyajo Eyacuiñajjija esohuidojojji poeyanaje Jose que, Jose cahuijaajo, Ejito meshijo baꞌejo.
23258	MAT 2:20	Huohui canaje jama baꞌa: —¡Nequisohuacue, oe! ¡Ebacua, ojaya enaese peaꞌai dojoꞌyocue Jodio meshi yasijje! Emeshi mese Enode manoꞌyonaje, ma ebacua Jesosa quecuaꞌyojji nisho poanaje.
23259	MAT 2:21	Jamajjeya Joseya nequisohua majje ebacua Jesosa, enaese peaꞌai dojo ca oꞌoyanaje oja meshi yasijje, Jodioja meshi yasijje.
23260	MAT 2:22	Enodeja bacua ejja Aquenao bajjani Jodea meshi mese eyacua poanaje. Jose jama shajjaꞌajja majje quea mete poanaje ma meshijo ebaꞌejji. Eyacuiñajjiya huohui canaje Jose jjacahuibaquianijo: —¡Janinea meshi yasijje poquicue, Jose! Jamajjeya Jose poquinaje Janinea meshi yasijje baꞌeꞌyohua.
23262	MAT 3:1	Jesosa Nasanenajo baꞌyanijo, Huani, ona besameejji poani poeyanaje Jodea meshi yasijje. Dejja cuana meshi jabojo anica huasijje sohuihuohui huichaꞌa huichaꞌa canaje Huaniya. Jama acanaje baꞌa:
23264	MAT 3:3	Isaiaa Eyacuiñajjija esohui huohuijjiya jama huohui ca poa yahuajo nei nei Huanijo baꞌa: “Oe dejja meshi jabojo nequi taaanequije. Jama poaje baꞌa: —Jiquio ecua Emeshi Cuiñajji nei neija ejiojji shabo jea cani jama, quea pojje nee nee acani jayojja jamaya ¡miquea ejjashahuabaquijji tai quea boejea nee nee aꞌyocue! Emeshi Mese nei nei poeje”. Jamaya Isaiaa yahuajo nei nei tehue ca poa.
23265	MAT 3:4	Huaniya huo ña, cameno ña oja sipi huosho canaje. Ejjayicaꞌaquijji ejee iya canaje. Shacui ijjia canaje, huini peaꞌai ishi canaje Huaniya.
23266	MAT 3:5	Quea huiso dejja cuana Jodea meshijo baꞌe, pea cuana Jenosanenajo baꞌe peaꞌai, pea cuana cuei Jodana sahuajo baꞌe peaꞌai Huani que poeyanaje o shajjaꞌajjaa.
23267	MAT 3:6	Oya cuana quea mimishi poanijo quea yeno poani. Jamajjeya oja mimishi cuana huohui caꞌyonaje. Mimishi cuana pajea sa poanijo, Huaniya oya cuana Eyacuiñajji nijje epoꞌyojji besa mee canaje Jodana cueijo.
23268	MAT 3:7	Jodioja esohui huohuijji Paniseo bajjani cuana, Sanoseo dejja cuana peaꞌai poeyanaje Huani que; Eyacuiñajji nijje ejjapeequiꞌyojji nisho besaꞌyo sa poani peaꞌai. Huaniya oya cuana ba majje tecuea canaje. Jama acanaje baꞌa: —Miya peyo jama, jjadasiaquiani. ¿Aya acuae mi huohui canaje? Jama baꞌa: “¡Eyacuiñajjijo besa meecue! Jamajjeya ojaya miquianaya enapaꞌyojji pojjeama”.
23270	MAT 3:9	Aꞌa jjashahuabaquijji jama baꞌa: “Amajama ecuanaja etiiquiana. Oya quea pame nee poanaje. Ecuana Amajamaja bacua poanijojo, Eyacuiñajjija enapajji pojjeama”. Chojja de. Miquiana Amajamaja bacua quea mimishi poanijo, Eyacuiñajjiya cajaa mi acajeꞌyo. Eꞌe de, ohuaya pea Amajamaja bacua jayojja epojji pana cajeꞌyo pojjaꞌa mei, meshi pojjaꞌa —Huaniya acanaje.
23272	MAT 3:11	Eyaya miquianaya Eyacuiñajjijo besa meejeꞌyo enajo, ca mique mimishi cuana epajeaꞌyojo. Quijje pishana poeje Quito. Ohuaya mi que Eyacuiñajjija Edojjoshahua Pame dobiqui mee cajeꞌyo. Jamajjeya miya quea pame poajeꞌyo. Mimishi cuana pajea sa poꞌyo ajjajo ca ca jeajea cajeꞌyo cuaqui yasijje. Jamaya peaꞌai baꞌa: Quito oe nei quea caꞌa nee nee nequi. Eya ca iña quea caꞌa pishana nequi. Jamajjeya eya ca iña onijje nequi sa po ajja miquiana que cojja. Quea bicho.
23274	MAT 3:13	Majoya Jesosa Janinea meshi yobijo ani macua huasijje poꞌoquequinaje Jodana cuei yasijje Huani que. Jesosaa Huani ba majje jama acanaje baꞌa: —Huani, ¡eya besa meecue Eyacuiñajjijo, miyaya!
23275	MAT 3:14	—Chojja, Emeshi Mese —Huani poanaje—. ¡Miyaya eya besa meecue Eyacuiñajjijo, miya quea pame nee neejo! ¿Yajjajje miya e que poeꞌyonaje? Eya ca ca iña quea pame pishana, de.
23277	MAT 3:16	Huaniya Jesosa besa mee majje jjequicuaya caꞌyajje, ba canaje eyatahuatahua caꞌapejo canaje. Eyacuiñajjija Edojjoshahua Pame huiaꞌ jama o sapa biajje cuabesa baꞌenaje. Ecapashinei baꞌeoquenaje.
23280	MAT 4:2	Jesosa jomajo nequinaje peaja ejiojji cahui huisome, 40 cahuime. Mahuiso epojja, mecajje peaꞌai nequinaje quimajo bobimaꞌ nei nei. Majoya quea shoe poanaje.
23281	MAT 4:3	Majoya aje Edosiquiana poeyanaje Jesosa que; miminequinaje jama baꞌa: —Miya Eyacuiñajjija Bacua Ejja jjabaqui majje ¡miyaya jiquio mei cuana pahui jayojja acue, miquea eꞌijjiajji!
23284	MAT 4:6	—Miya Eyacuiñajjija Bacua Ejja jjabaqui majje ¡tohuaacue meshi yasijje! Jamajjeya Eyacuiñajjija esohui jama etehueꞌyo jaa baꞌa: “Eyacuiñajjiya esohuidojojji cuana huoojea caje mi yasijje, mi jaahuanaa. Oquequiajo ojaya emeya miya iñajjequisohua cajeꞌyo, ohuaya. Jamajjeya miya ejjajiojji quecuasajaqui jjima poaje meijo”.
23286	MAT 4:8	Majoya Edosiquiaa Jesosa dojosohuaqui canaje eyiyo ao huasijje. O shajjaꞌajjajji nisho jamaya Edosiquiaa Jesosa huohui canaje: —¡Bacue ojjaña meshi cuana, emeshi mese cuana peaꞌai, cuiñajji cuana, aquiana quea nahue cuana peaꞌai! Ojjaña quea pame nee nee.
23287	MAT 4:9	Ojjaña jiquio aquiana cuana, dejja cuana peaꞌai miquea poajeꞌyo; miya Emeshi Mese nei nei eyaya po meejeꞌyo jjeya nei ca miyaya eya bihuiaꞌyajo ecuiꞌoshajjajo nequi majje —jama siajje ameya acanaje Edosiquiaa Jesosa.
23288	MAT 4:10	Jamajjeya Jesosaa jama huoojeajeame acanaje baꞌa: —¡Chojja Edosiquiana! Eyaya miya bihuia ajja, de. ¡Poquicue miya! Jamaya Eyacuiñajjija esohui etehueꞌyo yahuajo peaꞌai baꞌa: “¡Eyacuiñajji oe nei bihuiacue! Oya oe nei ojjañaja Emeshi Mese nei nequi. ¡Ojaya esohui jama oe acue!”
23289	MAT 4:11	Jamajjeya Jesosaa huoojea cajje Edosiquiana, Satanasa poquiꞌyonaje. Majoya Eyacuiñajjija esohuidojojji cuana quea huiso poeyanaje Jesosa jaahuanaa, bobiaa peaꞌai.
23290	MAT 4:12	Quijje pea cuaa Huani, ma ona besameejji poa jeanobiajea canaje. Shajjaꞌajja majje Jesosa posohuaqui oꞌoyanaje oja meshi yasijje, Janinea meshi yasijje.
23291	MAT 4:13	Oya nequiñaqui jjima Nasanenajo. Pea cuiñajji yasijje, Capenaoma huasijje poquinaje baꞌeya. Janinea bae sahuajo, Samononi meshi, Netani meshi peaꞌai pejjejo baꞌenaje.
23293	MAT 4:15	“Ojjaña cuana quea mimishijo, esohui ba jjimajo quea apo baꞌyani. Eyacuiñajji ba majje oya cuana quea jaꞌa nee baꞌe mee cajeꞌyo. Eyacuiñajji ojaya ba jjimajo quea yeno nee baꞌyani. Jjeya ca ca quea jaji nee baꞌe mee cajeꞌyo. Eꞌe, Samononi meshijo, Netani meshi peaꞌaijo, Janinea bae sahuajo baꞌeca cuana, Cueji Pashi ma Jodana cuei bajjani sahuajo, ojje baꞌeca cuana, Janinea meshijo, pea bajjani Ese Ejja sohuijo baꞌa: Eyacuiñajji ba po jjimaja meshijo baꞌeca cuana peaꞌai quea mimishi poanaje. Jjeya ca ca quea jaꞌa nee baꞌe mee cajeꞌyo”. Jamaya Isaiaa huohui ca poa yahuajo nei nei Jesosaja epoejjijo.
23296	MAT 4:18	Majoya Jesosa poquinaje Janinea bae sahua huasijje. Jomajo ohuaya Anesi, Anesija oꞌi Peno bajjani, ma Simohui peaꞌai bajjani ba canaje. Oya cuana nahuoo cuiashajajji nei nei bajio. Nahuoo cuiashaja cani.
23299	MAT 4:21	Majoya Jesosaa poqui pishana majje pea cuana ba canaje. Semeneoja bacua ejja Jacobo ba canaje ojaya echahua mese nijje, Huani nijje. Bishe aijo eshajajji jeꞌeꞌyo poꞌani ba canaje. Jjeyahua nei Jesosaa oya cuana iyaa canaje.
23301	MAT 4:23	Jesosa poquinaje ojjaña cuiñajji cuana huasijje Janinea meshijo. Jodio dejja cuanaja equi ojee ejjachichaquijji yasijje dobiquinaje esohui huohuiya. Jama poanaje baꞌa: —Eya ojjañaja Emeshi Mese poajeꞌyo. Ohuaya quea huiso emanojaa cuana jjaajaqui mee caꞌyonaje, huaquia mee caꞌyonaje peaꞌai.
23302	MAT 4:24	Quea huiso Sinia meshijo baꞌeca cuaa Jesosaa huaquia mee caꞌyoqui shajjaꞌajja canaje peaꞌai. Jamajjeya o que jjequi canaje quea huiso emanojaa cuana. Eꞌe, ojjaña cuana quea nee poani, pea cuana niñepoqui cuana, jjequiꞌihuicajaa cuana peaꞌai, jiojjijjajja cuana peaꞌai o que jjequi canaje. Ojjaña cuana huaquia mee caꞌyonaje, jjaaja meequi caꞌyonaje, Jesosaa.
23303	MAT 4:25	Jamajjeya Jesosa poquianijo, quea huiso nee nee cuana ojee poquinaje onijje. Eꞌe, dejja cuana quea huiso nee, ponaponaña peaꞌai Janinea meshijo baꞌe cuana, Jenosanenajo baꞌe cuana, Jodea meshijo baꞌe cuana, pea Ome miji peaꞌai Cuiñajjijo baꞌe cuana, Cuei Cueji Pashijo Jodana cuei ojje mijijje baꞌe cuana peaꞌai; quea huiso nee nee Jesosa nijje poquinaje.
23306	MAT 5:3	—¡Bacue! Beca cuana jjashahuabaquiani jama baꞌa: “Eꞌe, de, eya quea mimishi nee. ¡Eyacuiñajjiya ecuea mimishi cacuijea caꞌyahua!” Jamaya jjashahuabaquianijo Eyacuiñajjiya oya baꞌe tiitii mee cajeꞌyo onijje eyajo. ¡Oya cuana quea bihui nee capoꞌyahua!
23307	MAT 5:4	Oja epeejji cuana mimishijo quea yeno poanijo, Eyacuiñajjiya quea bihui nee po mee cajeꞌyo mimishi cuijea caꞌyajje.
23309	MAT 5:6	—Ojaya epeejji cuana Eyacuiñajjija esohui jayojja jama a sa neinei poanijo, Eyacuiñajjiya oya cuana quea jaji nee nee baꞌe meesahua cajeꞌyo. ¡Quea bihui nee capoꞌyahua oya cuana!
23310	MAT 5:7	—Ojaya epeejji cuana pea cuanajo jjashahuabaquiani pea jaahuanajji. Jamaya poanijo pea cuaa, Eyacuiñajjiya peaꞌai oya cuana jaahuana cajeꞌyo. Tecueꞌama poajeꞌyo ona nijje. ¡Eꞌe jojo nei quea bihui nee capoꞌyahua ojaya epeejji cuana!
23312	MAT 5:9	Ojaya epeejji cuaa pea cuana quea bei po meesahua canijo, ojjañaja eba oya cuana Eyacuiñajjija bacua cuana eꞌe jojo nei; quea pame nee.
23313	MAT 5:10	Ojaya epeejji cuana quea jaꞌa nee baꞌyanijo, onaaya oya cuana cuia cajeꞌyo. ¡Jamatii oya cuana quea bihui nee capoꞌyahua! Eꞌe, quijje eyajo oya cuana ojjaña huoojeaꞌyojji enijje poajeꞌyo —Jesosaa huohui canaje.
23314	MAT 5:11	Majoya Jesosa Quitohua ojaya epeejji cuana huohui canaje jama baꞌa: —Miquianaya ecuea epeejji poanijo, pea cuana minijje mimijajije; miya napa caje peaꞌai, siajje poaje mijo peaꞌai. Jamatii Eyacuiñajjiya miquianaya quea bihui nee po mee cajeꞌyo. Eyajo onijje baꞌe tiitii mee cajeꞌyo.
23315	MAT 5:12	Eꞌe, Eyacuiñajjija esohui huohuijji yahuajo nei nei baꞌya poa cuana jamaya aca poa mimishi cuaa; napa ca poa peaꞌai. Jamajjeya ¡ona jayojja jama pocue, quea bei! Eyacuiñajjiya miquianaya ojee baꞌe mee cajeꞌyo tiitii eyajo quea bihui nee nee —Jesosaa huohui canaje.
23316	MAT 5:13	—Ecuea esohui jayojja jama añajo, pea cuana mi jayojja jama baꞌeje quea pame nee peaꞌai. Jamajjeya miya sane jama, mei sese jama. Mei seseya shicui cajje bobi ihuiꞌyo ajja poani. Jamatii mei sese seseꞌama poa jojjemo ¿aꞌa quea sese po meeje oꞌoya? Chojja. Seseꞌamajo quea huesha jeajeaꞌaña seya. Jiquio ecua sane seseꞌama jeajeaꞌaña seya jama miya ecuea esohui jama po ajjajo, cajaa achanaꞌ eyaya.
23318	MAT 5:15	Cuaquijiji sisi capaca ajja. Chojja. Cuaquijiji sisi nequia cajji acui biajje, ojjaña equijo ani cuana jeajaꞌajji.
23319	MAT 5:16	¡Jiquio ecua cuaquijijiya ojjaña equijo ani jeajaꞌa cani jayojja jama quea pame nee baꞌecue! Jamajjeya miquianaya quea pame ba majje pea cuanaa Eyacuiñajji, esejaya Chii eyajo bihuia cajeꞌyo —Jesosa poanaje.
23320	MAT 5:17	Jesosaa pea esohui huohui canaje jama baꞌa: —Eyaya Moisesija esohui yahuajo etehueꞌyo cajaa aꞌajja. Eyacuiñajjija esohui huohuijji cuanaja esohui yahuajo nei eyaya cajaa aꞌajja peaꞌai. Cho. Eya poeyanaje onajaya esohui jama aꞌyohua. Eꞌe, oya cuaa yahuajo nei nei ejo huohui ca poa. Jjeya eyaya onajaya esohui jayojja jama ajeꞌyo.
23322	MAT 5:19	Jamajjeya joya Moisesija esohui etehueꞌyo jama baꞌe sa po ajjajo, oja sohui jama pojjeama huohui cajo, enijje baꞌe meemee ajja quijje eya ojjañaja Emeshi Mese nei poajo. Joya Moisesija etehueꞌyo jama acani, oja sohui jama huohui cani peaꞌai ca ca enijje baꞌejeꞌyo quijje eya ojjañaja Emeshi Mese oe nei poajo.
23323	MAT 5:20	¡Bacue! Moisesija etehueꞌyo huohuijji poani, Jodioja esohui huohuijji Paniseo bajjani cuana peaꞌaiya quea pame nee huohui ajja; quea pame baꞌe ajja peaꞌai. Jamajjeya miquiana ona jama baꞌyajo, ona jama huohuiajo peaꞌai miquianaya baꞌe ajja enijje quijje eya ojjañaja Emeshi Mese nei poajo —Jesosa poanaje.
23325	MAT 5:22	¡Jjeya ecuea esohui eyacua shajjaꞌajjacue oe! Ojjaña joya pea nijje quea quene nee nee poani aje oe emeshi mese yasijje poquije. Quea tecue poaje emeshi mese onijje. Joya pea nijje mimijajiajo, “miya cajaa” acajo, cadojo cahua emeshi meseja esohui huohuijji cuana huasijje jjabahuejjaqui meeya. Joya pea nijje panajaji neineiyajo, cajaa nei nei acajo peaꞌai cuaqui yasijje huoojea ca chanaꞌ peaꞌai —Jesosa poanaje.
23328	MAT 5:25	—¡Pea cuana quea quene minijje poajo o que poquicuajicue! ¡Quea bei po mee oꞌoyacue jjeya nei! Ohuaya miya dojo ca chanaꞌ emeshi mese yasijje, napa meeya. Emeshi meseya miya huoojea ca chanaꞌ sohuinano huasijje. Sohuinanohua miya equi ejjajeanobiaquijji yasijje jeanobia ca chanaꞌ.
23329	MAT 5:26	Jomajo nequi tiitii mee caje. Ma minijje quea quene nee poanaje sosequiajeyoꞌyo majje miya ejeanobianequi jeacuaya cajeꞌyo, de —Jesosa poanaje—. ¡Jiquio jayojjaya oe pocue! ¡Jamajjeya Eyacuiñajji nijje jjapeequicuajicue manoꞌyo jjimahua, cuaqui yasijje jeajea jjimahua!
23331	MAT 5:28	Jjeya ecuea esohui eyacua shajjaꞌajjacue jama baꞌa: Dejja pea eponajo jjashahuabaquianijo oya pea cojjojji epojji jayojja jama poani, ojaya ejjashahuabaquiꞌyojjijo; quea mimishi poani.
23332	MAT 5:29	Jamajjeya ¡aꞌa quea mimishi pojji! Miya quea mimishi poani epona, aquiana pojjaꞌa baqui majje ¡maya bapajeaꞌyocue! Jea ba majje mimishi po majamajañajo cuaqui yasijje dobiquijeꞌyo tii. Jamajjeya ¡aꞌa jea bajji!
23334	MAT 5:31	—Moisesija etehueꞌyo jama poa peaꞌai baꞌa: “Dejjaa ojaya ehuanase cajaa acajo, huei canijo ¡esohui catehue cahua ehueijji!”
23335	MAT 5:32	¡Ecuea esohui eyacua shajjaꞌajjacue! ¡Aꞌa miquea ehuanase pea dejjaja sii jjima hueijji! Epona quea pame baꞌe hueiꞌyo majje pea dejja nijje jjahueaquiajo, yahue ebionei eshe nequijo, quea mimishi po mee cani ebionei yahueya. Oya eshe enequijojo oja yahue eyacua quea mimishi poani peaꞌai —Jesosa poanaje.
23336	MAT 5:33	—Moisesija etehueꞌyo jama poa peaꞌai baꞌa: “Miyaya huohuiaña jama baꞌa: —Eyacuiñajjiya eya shajjaꞌajja canijo, eꞌe jojo nei eyaya ecuea esohui jama ajeꞌyo. ¡Jamaya mimi majje miquea esohui jama acue; aꞌa pajeaꞌyojji!”
23337	MAT 5:34	¡Jjeya ecuea esohui eyacua shajjaꞌajjacue! Jama baꞌa: ¡Aꞌa oe siajje pojji! ¡Pea nijje mimi majje miquea esohui jayojja jama acue! Jamajjeya pea nijje mimianijo aꞌa huohuijji jama baꞌa: “Eyacuiñajji eshe eyajo yanijo, ecuea esohui jama eyaya ajeꞌyo. Ecuea esohui eꞌe nei pojjeama jojjemo eya quea nee po mee caꞌyome”. Cho. Eyajo Eyacuiñajji ejjahuoojeaquijji tii tii.
23338	MAT 5:35	Jamaya aꞌa mimijji peaꞌai baꞌa: “Meshi yanijo, oe po jjimajo ecuea esohui jama eyaya ajeꞌyo. Ecuea esohui eꞌe nei pojjeama jojjemo meshi jjani yasijje eya mojea caꞌyome”. Cho. Meshi cuana miquea pojjeama; Eyacuiñajji Emeshi Mese oe nei poani. Jamaya aꞌa mimijji peaꞌai baꞌa: “Jenosanena yanijo, oe po jjimajo ecuea esohui jama eyaya ajeꞌyo. Ecuea esohui eꞌe nei pojjeama jojjemo Jenosanena cuiñajji esecue yasijje mo huoojeacuaya caꞌyome”. Cho, Jenosanena miquea pojjeama; Eyacuiñajji Jenosanena Meshi Mese poani.
23340	MAT 5:37	Jamajjeya huohuicue jama baꞌa: “Eꞌe, eyaya jama ajeꞌyo”. “Chojja eyaya jama aꞌajja” acue —Jesosa poanaje.
23343	MAT 5:40	Peaa miquea daqui sa poanijo miya dojo cani dejja etii bajjani yasijje huohuiya; miquea daqui dojo cajo, jamatii ¡miquea daqui moo quiacue peaꞌai!
23344	MAT 5:41	Dejja maseya miya iña cajje ojaya aquiana quea huesha pishana dojo mee cajo, ¡quea huesha nee dojocue, jamatii!
23345	MAT 5:42	Pea Ese Ejja miquea aquiana sa neinei poanijo ¡aꞌa quea dejja tai pojji! ¡Aꞌa quea nishehui pojji! ¡Oya quiacue! Pea cuana miquea aquiana dojo sa poanijo ¡oe pojji cahuime dojo meecue! Minijje mimiajo: “¡Che iña jiquio dojo meecue; quijje aje jje jeahuajeꞌyo!” acajje; “¡Eꞌe, dojocue!” sajaꞌame acue. Jamajjeya ¡ojjaña cuana nijje quea bei baꞌecue! ¡Aꞌa o jayojjaya quea mimishi, quea tai pojji! —Jesosa poanaje.
23346	MAT 5:43	—Miquea eba etehueꞌyo yahuajo nei jama baꞌa: “¡Miquea epeejji quea jea nee acue! Miquea epeejji pojjeama, cho. ¡Onijje quea quene pocue epeejji pojjeama jjejojo!”
23347	MAT 5:44	Ecuea esohui eyacua ca ca jama baꞌa —Jesosa poanaje—: ¡Miquea epeejji pojjeama quea jea nee acue peaꞌai! Miya Eyacuiñajjija epeejji poanijo, miya napa cajje ¡Eyacuiñajji nijje mimicue maa mi napajji poanijo! Jamajjeya eꞌe pojjaꞌa oya cuana Eyacuiñajji nijje jjapeequijeꞌyo peaꞌai.
23348	MAT 5:45	Jamaya poanijo miquianaya Eyacuiñajji eseja Chii eyajo anija bacua cuana poani. Eꞌe, Eyacuiñajjiya eshequi quea jaꞌa nee jiji mee cani dejja quea pamejo, dejja quea mimishijo peaꞌai. Ohuaya ena huoojea cani dejja quea pame neeja que shepajji, dejja quea mimishija que shepajji peaꞌai —Jesosa poanaje.
23349	MAT 5:46	—Joya mi quea jea nee ajji poani miquea quea jea nee peaꞌai; minijje quea mase ca ca miquea botiꞌama. Eyacuiñajjija epeejji pojjeama cuana aje oe jamaya poani peaꞌai, de. Jamajjeya miya jamaya poanijo ¿aꞌa Eyacuiñajjiya miya bihuia caje? Cho.
23350	MAT 5:47	Miquianaya aje jja oe miquea epeejji cuana nijje quea bei nee mimiani, pea cuana nijje mimi ajja. ¿Aꞌa jamaya poani ojjaña dejja cuana? Eꞌe. Eyacuiñajjija epeejji pojjeama cuana aje oe jamaya poani peaꞌai, de.
23352	MAT 6:1	Jesosa poanaje peaꞌai: —¿Apiojji miya Eyacuiñajjijo chacochacoani pea cuaa ba canijo? Eꞌe pojjaꞌa jjashahuabaquiani miya bihuia caje cuaa ba majje. Onaja ebajji chacochacoanijo, quijje eyajo miquea echaco ojo Eyacuiñajjiya miya bihuia ajja, esosequiajji pojjeama —Jesosa poanaje.
23353	MAT 6:2	—Aquiana aema huasijje quiaꞌyo majje aꞌa mimijji jama baꞌa: “¡Bacue, eya quea pame nee poani!” Chojo. Jamaya poani Eyacuiñajjija epeejji nisho cuana Eyacuiñajjija equijo, ejiojji cuanajo peaꞌai. Onaaya Eyacuiñajjijo chaco cani pea cuanaja ebajji. Jamajjeya quijje eyajo Eyacuiñajjija oya ebihuiajji pojjeama; ojaya echaco esosequiajji pojjeama peaꞌai.
23356	MAT 6:5	Jesosaa o shajjaꞌajjajji cuana huohui canaje pea jama baꞌa: —Eyacuiñajji nijje mimianijo ¡aꞌa joya ecua Eyacuiñajji nijje jjapee nishoquiani jayojja jama mimijji! Oya cuana aje oe Jodioja ojee ejjachichaquijji equijo nequiani, ojjañaja ebajji miminequiani. Esecuejo ojjaña anica cojja nei peaꞌai miminequiani. Eyaya miya eꞌe jojo nei huohuiaña oya cuana miminishonequiani —Jesosa poanaje—. Jamajjeya Eyacuiñajjija epeejji nei poso ojjañaa oya ba cani. Jamajjeya onaaya bihuia canaje sosejje Eyacuiajji nijje miminishoꞌaninajejo quijje eyajo oya cuana enijje enequiꞌyojji pojjeama, Eyacuiñajjija epeejji nisho jjejojo.
23357	MAT 6:6	¡Miquianaya ca ca miquea equi quecuayijjijo mee nei mimiꞌanicue Eyacuiñajji nijje, pea cuaa eba ca poani jjejojo! ¡Eseja Chii nijje jomajo mimicue! Ohuaya miya ba cani, shajjaꞌajja cani; mi pejjejo nequiani oya. Esejaya emimi bame bame jayojja jama acajeꞌyo, eseja Chiiya —Jesosa poanaje.
23359	MAT 6:8	¡Aꞌa o jayojja jama pojji! Eyacuiñajji nijje mimi sa po jjimahuajo, ojaya esejaya ejjashahuabaquijji eba, de, eseja Chiija eyajo anija —Jesosa poanaje.
23360	MAT 6:9	—Jamajjeya Eyacuiñajji nijje mimianijo mimicue jama baꞌa: Eyacuiñajji, miya ecuanaja Chii quea bame nee. Miya eyajo quea caꞌa nee ani. ¡Ojjaña cuaa miya cabihuia cahua, oe nei quea jaꞌa nee!
23363	MAT 6:12	Eya queneꞌama pea cuana nijje, joya enijje quea mimishi poani nijje. Jamajjeya ¡ecuea mimishi cuanajo aꞌa quea quene pojji peaꞌai!
23364	MAT 6:13	¡Aꞌa eya quea mimishi po meejji! ¡Nahue neineicue mo, Eyacuiñajji! ¡Edosiquianaja epeejjijo eya jaahuanacue! Eꞌe Eyacuiñajji, miya ojjañaja Emeshi Mese poani tii tii. Miya oe nei quea caꞌa nee enequi tii tii, quea pame nee. ¡Ojjañaa miya cabihuia cahua tii tii! Eꞌe, jamaya apoa ecuea emimi. ¡Jamaya Eyacuiñajji nijje mimicue! —Jesosa poanaje.
23365	MAT 6:14	—Eꞌe, ¡jiquio ecua eya jama jjashahuabaquime oe pocue! Pea cuana nijje mimicue jama baꞌa: “Miya enijje mimijajinaje quea tai. Jamatii eya miquea mimishijo queneꞌama” jamaya pocue. Jamaya pea nijje mimianijo Eyacuiñajji miquea mimishijo queneꞌama poajeꞌyo peaꞌai.
23367	MAT 6:16	—Eyacuiñajjija epeejji nisho ijjiaꞌijjia jjima mimianijo quea yeno jayojja poani, ecojja topo jjima ojjaña cuanaja ebajji. Jamajjeya ojo jama poani baꞌa: “Eꞌe, oya Eyacuiñajjija epeejji nei nei; ijjiaꞌijjia jjima mimiani Eyacuiñajji nijje, de” poani —Jesosa poanaje—. Chojja, edasiaꞌyojji poani. Eyacuiñajjija epeejji nei poso pea cuaa acani. Jamajjeya ojjañaja ebajji oya mimiani. Quijje oya cuana enijje enequiꞌyojji pojjeama eyajo Eyacuiñajjija epeejji nisho jjejojo —Jesosa poanaje—.
23368	MAT 6:17	Miquianaya ca ca ecuea epeejji nei. Ijjiaꞌijjia jjima Eyacuiñajji nijje mimianijo ¡aꞌa quea yeno jayojja pojji! ¡Aꞌa jjadasiaquijji jayojja jama pojji! Chojja —Jesosa poanaje—. Ijjiaꞌijjia jjima Eyacuiñajji nijje mimi huichaꞌa huichaꞌanijo ¡jamatii emeꞌ, ecojja peaꞌai shacuacue; ehuojjaña shiyeshiyejo shacue!