13944	PSA 1:1	A haraidaan na kis tano tunotuno nong pai la murmur ira harpir audiet ira ut na sakena, ma pai tur tano ngaas audiet ing diet gil nironga, ma pai kis mah tano kinkinis audiet ira ut na kukutur.
13946	PSA 1:3	Aie hoing tiga ina daha di soi ra gagen taah, nong i la huhuai ta ira uno pakana bung na hunhuai, ma ira pakana pai la mahmahiawa. Ma bia ing i gil ra linge sa, i la manga petlaar at.
13956	PSA 2:7	No King i hinawas tano dadas na nianga tano Watong. Ga tange tagu, “Augu no Natigu. Katin iau te hanuat no raam Sus.
13961	PSA 2:12	Hanapu augu tano Natine, kabi ngalngaluan ma na gil haliare ugu tano num hinahaan, kanong warah no uno bala mamahien i tale bia na tut hut kaik at mon. A haraidaan na kis ta diet ing diet barahit taar menapu ta God.
13970	PSA 3:9	A harhalon i la hanhanuat meram tano Watong. Iau sasaring bia no num haraidaan na kis ta ira num matanaiabar.
13984	PSA 5:5	Augu pai tiga mangana God nong i guama ta ira saksakena. Pai haruat bia ira ut na sakena diet na kis tika ma ugu.
14012	PSA 7:9	Waak tar no Watong na kure ira matanaiabar. Watong, kure iau haruat ma ira nugu taktakodas. Augu Nong u Naliu Harsakit, kure iau haruat ma ira bilbilai ken i kis taar tano balagu.
14015	PSA 7:12	God aie tiga takodasiana ut na gil harkurai. Aie tiga God nong i la hapuasne no uno ngalngaluan ta ira kaba bungbung.
14026	PSA 8:5	asa tunat ira tunotuno kaik u lilik uta mehet? A linge bia mon mehet. Wara bih u balaure mehet ira tunotuno?
14038	PSA 9:7	A halhaliarai ing pana le pataam i te haan tupas ira adahat suk. U te dure ira udiet pise na hala, ma di te luban hatikane um diet.
14040	PSA 9:9	Aie na kure no ula hanuo ma ra taktakodas. Aie na balaure ira matanaiabar ma ra tutun na harkurai.
14059	PSA 10:7	No hana i hung ma ra nianga sakasaka. A hinarabota ma ra harburut, a haragahai ma ra sakena i la sursuur tano hana.
14066	PSA 10:14	Iesen augu, God, u la nesnes ira haragahai ma ira tapunuk. U la liklik kaike ra magingin wara balbalu pukus ma no limaam. Nong taie ta harharahut tana, i la tartar ise tar ie ukaia ho ugu. Augu no ut na harharahut ta ira tintana.
14071	PSA 11:1	Aram narakoman tano Watong iau kis barahit taar. Hobibih balik bia i tale ugu bia nu tange tagu bia, “Pupungo laah hoing tiga maan uram tano num uladih.”
14101	PSA 15:2	Aie sen mon nong pa di tung ie ta mon nironga ta ira uno hinahaan, ma nong i la gilgil ira takodasiana magingin, nong i la tangtange ira tutun meram tano kaatine,
14104	PSA 15:5	ma nong mah i la tartar ira uno kinewa ma pai la liklik leh bia na hatamat no uno kinewa ing no tunotuno na balu pukus, ma pai la hauhaut leh tikai bia na kukulei wara gil sakena taar tano ut na takodas. Aie nong i la gilgil kaiken ra linge, pa na tale bia da gunei.
14106	PSA 16:2	Iau ga tange tano Watong, “Augu no nugu Tamat. Iau pai kap tiga bilai na linge sen bia mekaia ho augu sen mon.”
14112	PSA 16:8	Iau te bul hatikane tar no Watong menalua tagu. Aie ken ra kata na limagu, kaik, pai tale be da gune iau.
14122	PSA 17:7	Haminas no num tamat na harmarsai bia daga ngalabo tano bilbilai tana. Augu nong u la halhalon ma no dadas na kata na limaam diet ing diet la kis barahit taam talur ira adiet suk.
14133	PSA 18:3	No Watong aie no nugu haatkis, no nugu subaan na munmun ma no nugu Ut na Harhalon. No nugu God aie no nugu haatkis, aie nong iau barahit tana. Aie no nugu bahbahit ma no dadas tano nugu harhalon, no nugu dadas na balo.
14139	PSA 18:9	A mis ga tubuala suur ta ira matana ngarngarona. No iaah nong i la tuntun haliare ira linge ga hansur tano hana. Ma no kalangaruana iaah ga lulungo suur tano hana mah.
14145	PSA 18:15	I ga lapotane ira uno rumus ma gaam pasak harbasiane ira ebar. A tamat na hile ga haliare harbasiane diet.
14161	PSA 18:31	Iesen ing ta God, ira uno ngaas i bilai harsakit. No nianga tano Watong i tutun, taie ta bis tana. Aie tiga bahbahit ta diet ing diet na barahit tana.
14177	PSA 18:47	No Watong i lon! A pirharlat tupas no nugu Haatkis! Da hatamat God no nugu Ut na Harhalon.
14178	PSA 18:48	Aie no God nong i la turtur wara utagu, nong i paas hasur ira hunhuntunaan ta ira mes na hanuo, ma i bul diet napu ra nugu harkurai,
14186	PSA 19:5	No ingana no mawe i la hanahaan harbasia tano ula hanuo bakut. Ira katona nianga i haan taar ta ira hauhawatine no ula hanuo. Aram ra mawe God i te hatur tiga palpalih wara utano kasakes,
14204	PSA 20:8	Ari diet nurnur ta ira karis ma ari diet nurnur ta ira hos wara hinarubu, iesen dahat nurnur tano hinsana no Watong, no udahat God.
14218	PSA 21:12	A linge bia be diet pingpingit sakena utaam ma ira udiet lilik kumkumaan, iesen diet pa na petlaar tiga linge.
14262	PSA 24:4	Aie nong ira iruo lumana pai bilinge ma no kaatine i gamgamatien, pa na lotu tupas ira palimpuo, ma pa na sasalim ma ira linge pai tutun.
14268	PSA 24:10	Ma sige ie, iakano King nong i tamat no minarine? No Watong Nong i Dadas Harsakit. Aie no King nong i tamat no minarine.
14322	PSA 28:6	A pirharlat uram tano Watong, kanong i te hadade ira nugu tintaau wara gaiena harmarsai.
14334	PSA 29:9	No ingana no Watong i la hurhurusane ira dadasina daha, ma i la ramas sare ira malit. Ma narako tano uno hala na lotu diet bakut diet kakonga bia, “A pirhakasing tupas ie!”
14342	PSA 30:6	Kanong warah no uno ngalngaluan i la kiskis dahin mon, iesen no uno bala malum i la kis hatika taar tano num kudulena nilon bakut. A sunuah i haruat be na kis mon ma tiga bung ra bung, iesen no gungunuama i la hananuat ra malaan.
14346	PSA 30:10	“Asa naga taam ing bia ni hiruo na minaat, bia ni hansur tano lulur? I haruat be kaabus na pirlat ugu? No kaabus na hinawas palai bia u la gilgil haruat ma ira num nianga?
14353	PSA 31:4	Augu no nugu haatkis ma no nugu dadas na subaan na munmun. Io kaik, nu lua tagu ma nu lam iau waing da ru no hinsaam.
14363	PSA 31:14	kanong iau hadade bia a halengin diet tangtange hagahe iau. A ramramin i luhutane iau. Diet wor tika wara hinelar tagu, ma diet iangianga tika wara kapkap se no nugu lon.
14364	PSA 31:15	Iesen iau nurnur taam, Watong. Iau tange, “Augu no nugu God.”
14369	PSA 31:20	A tamat saakit no num bilbilai nong u bul tagure tar ie wara udiet ing diet ru ugu. Ma ta diet ing diet barahit taam, huo mah u la tamtabar diet ma no num bilbilai kaia ra matmataan ta ira tunotuno.
14371	PSA 31:22	A pirhakasing tupas no Watong, kanong i ga haminas no uno bilai na harmarsai tagu ing di ga tur luhutane iau ma di ga ubu iau.
14375	PSA 32:1	A haraidaan na kis tano tunotuno nong ira uno magingin na laka hartula God te lik luban, ma ira uno magingin sakena God i te kasar.
14376	PSA 32:2	A haraidaan na kis tano tunotuno nong no Watong pai lik habaling tar um ira uno magingin, ma taie ta harabota tano uno nilon.
14381	PSA 32:7	Augu no nugu katon na munmun. Nu balaure bat iau sukun ra tinirih ma nu luhutane iau ma ra ninge na harhalon.
14384	PSA 32:10	A haleng ira tinirih ta ira ut na sakena, iesen no harmarsai tano Watong nong pai la patpataam i la luhutane tar no tunotuno nong i nurnur tana.
14397	PSA 33:12	A haraidaan na kis tano huntunaan nong no uno God no Watong, diet ira matanaiabar ing gate gilamis leh diet bia auno tus.
14402	PSA 33:17	Waak bia u nurnur tano num hos bia na halangalanga ugu tano hinarubu. A tutun bia ana mon but na baso, iesen pai tale bia na halon tikai.
14405	PSA 33:20	Dahat kis nanaho ma ra nurnuruan utano Watong. Aie no udahat harharahut ma no udahat bahbahit.
14416	PSA 34:9	Namien baak, ma nu nes bia no Watong i bilai. A haraidaan na kis tano tunotuno nong i kis barahit tano Watong.
14497	PSA 37:26	Diet la manga hartabar bia, ma diet la hatatol mah ira mes. A haraidaan na kis ta ira nati diet.
14510	PSA 37:39	Iesen no harhalon ta ira ut na takodas na hanuat meram tano Watong. Aie nong i la balbalaure hadadas diet ta ira pakana bung na tinirih.
14531	PSA 38:20	A haleng ira nugu ebar, ma diet bakut adiet mon tabi bolbol. Diet manga haleng saakit ing diet malentakuane bia mon iau.
14538	PSA 39:4	Aram narako tagu no balagu ga mamahien. Ma ing iau ga kis matien taar ma ra lilik, no iaah ga iaiaan. Kaik um, iau gaam ianga ma no hagu hoken:
14553	PSA 40:5	A haraidaan na kis tano tunotuno nong no Watong i burena tano uno nurnuruan, ma pai haan tupas ira ut na latlaat, ma pai harwis tika mah ma diet ing diet tahurus taar ta ira inabis na god.
14566	PSA 40:18	Iesen kana iat iau tiga maris ma ra nugu mon sunupi. Io kaik, na bilai bia no Watong na lik leh iau. Augu no nugu harharahut ma no nugu Ut na Harhalon. Nugu God, waak u halis.
14568	PSA 41:2	A haraidaan na kis ta nong i mon lilik uta diet ing taie udiet ta dadas. No Watong na halon leh ie ta ira pakana bung na tinirih.
14580	PSA 41:14	A pirharlat tupas no Watong, no God ta Israel, mekatiga laah menalua tano hamhaburen tano ula hanuo tuk taar tano hauhawatine ma pana le pataam. Amen ma Amen.
14602	PSA 44:5	Augu no nugu King ma no nugu God, nong i kure bia no huntunaan ta Iakop na petlaar ira hinarabu ma ira nuhet ebar.
14627	PSA 45:3	Augu, u nanaas timaan ta ira tunaan bakut, ma God gate kapal ira palabulum ma ra harmarsai, kanong gate haidane hatikane ugu.
14637	PSA 45:13	A hinasik me Taia na hanuat ma ra hartabar, ma ira watong diet na silihe no num harkalak.
14645	PSA 46:3	A linge bia be no ula hanuo na ruh ma ira uladih na puko taar narako tano tingena tes, iesen dahat pa na burut.
14664	PSA 47:10	Ira lualua ta ira kantri diet kis hulungai hoing bia diet ira matanaiabar tano God ta Abaram. Ira king tano ula hanuo diet gar ta God. Di manga raun haut ie.
14679	PSA 48:15	Kanong iakan ra God aie no nudahat God hathatika. Aie na lue dahat kaiken ma ukaia mah hono haphapataam.
14691	PSA 49:12	A ngasia diet hatika at um ira udiet midi, ma nudiet katon na kinkinis mah ta ira kaba pakana bung, sukmaal bia diet te hasur hinsa diet taar ta ira kaba katon na pise.
14703	PSA 50:3	No udahat God i hanuat, ma pa na hanuat kunkun. A iaah na iaiaan haan menalua tana, ma a tamat na baiangin na luhutane ie.
14730	PSA 51:7	Tutun saakit, a ut na sakena iau ing di ga kaha iau. A ut na sakena iau mekaia laah ing no pawasigu ga tianane leh iau.
14731	PSA 51:8	Tutun saakit, u sip bia no tutun na kis aram narakoman tagu. A kai narako tagu tano katon i kis susuhai, u hausur iau tano minmintot.
14777	PSA 55:6	A bunurut i haan tupas iau ma iau manga dedar. A ramramin i sigam iau.
14778	PSA 55:7	Iau ga tange bia, “Awai! Ing bia gor mon babagu hoing ra bun, iau gor pupungo laah ma nigi sangeh.
14782	PSA 55:11	Ra kasakes ma ra bung diet haan kumaan hurbit ta ira lar tano pise na hala. A sakana tintalen ma ra purpuruan kenam narako tana.
14783	PSA 55:12	A tintalen wara halhaliarai kenam narako tano pise na hala. A harabota ma ra harmang pai la patpataam ta ira uno mansuk bakut.
14790	PSA 55:19	A haleng diet tur mamate iau iesen God i kul pukus iau ma iau pai hiruo tano hinarubu di gil ie ma iau.
14800	PSA 56:5	God nong no uno nianga iau pirlat ie, ta iakano God iau nurnur. Iau pa ni burburut. Asa kaik ira tunotuno mon diet tale bia diet na gil tagu?
14807	PSA 56:12	io, ta iakano God iau nurnur. Iau pa ni burburut. Asa kaik ira tunotuno mon diet tale bia diet na gil tagu?
14833	PSA 58:12	Ira tunotuno diet na tange, “Tutun! A mon kunkulaan audiet ira ut na takodas. Tutun! Tiga God kana nong i kure no ula hanuo.”
14841	PSA 59:8	Nes asa diet maruane se ta ira ha diet. A mon sakana nianga ta ira palabulu diet ho ira wise na hinarubu, ma diet tange bia, “Sige tikai i tale bia na hadade dahat?”
14843	PSA 59:10	Augu no nugu dadas. Iau naanaas utaam. God, augu no nugu subaan na munmun.
14851	PSA 59:18	God, iau ni inge na pirharlat ukatiga ho ugu, augu no nugu dadas. Augu no nugu subaan na munmun ma no God nong i la marmarse iau.
14865	PSA 60:14	Dahat na bul hasur ira adahat suk ma no harharahut ta God. Aie at na papasuane hasur diet.
14877	PSA 62:3	Aie sen mon no ula habo nong iau nes leh no nugu harhalon kaia. Aie no nugu dadas na subaan na munmun, pa da le gune at iau.
14878	PSA 62:4	Na haruat hunanges ma kana u iangianga huli tikai? I tale bia muat bakut muat na se hasur ie napu? Aie hoing tiga balo i ioh taar, ma hoing tiga wer pai dadas.
14881	PSA 62:7	Aie sen mon no ula habo nong iau nes leh no nugu harhalon kaia. Aie no nugu dadas na subaan na munmun, pa da gune at iau.
14882	PSA 62:8	No nugu harhalon ma no bilai na hinsagu i burena sen ta God. Aie no nugu dadas na ula habo, no nugu katon na barbarahit.
14906	PSA 64:7	Diet pingit ira linge ing pai takodas ma diet tange, “Mehet te tagure tar tiga lilik ing i manga tale bia mehet na petlaar ie.” A tutun bia ira lilik ma ira bala diet ira tunotuno i manga kangkonga.
14913	PSA 65:3	Augu nong u la hadada sinasaring, ira tunotuno bakut diet na hanuat ukatiga ho ugu.
14915	PSA 65:5	A haraidaan na kis ta diet ing u te gilamis leh ma u te lam hutaten diet bia diet na lon narako ta ira num katon na lotu. Mehet hung ma ira bilai na linge tano num hala, iakano tamat na halhaliana hala na lotu.
14917	PSA 65:7	Augu at u ga huul ira uladih ma no num dadas ing u ga papalim ma ra baso.
14918	PSA 65:8	Augu nong u ga hamarur no nunungo tano tes, no wawaang ta ira pakananoh, ma ira tamat na purpuruan ta ira kantri.
14934	PSA 66:10	Augu God, u te walar het. U te hagamgamatien het hoing di la hagamgamatien ra siliwa.
14941	PSA 66:17	Iau ga tataau uram ho ie ma no hagu. A pirharlat tupas ie ga kis tano karamegu.
14944	PSA 66:20	A pirharlat uram ho God, nong pai malok se no nugu sinasaring, ma pai rut bat no uno harmarsai tagu.
14969	PSA 68:17	Muat ira tamat na uladih me Basan, wara bih muat nes haliare ma ra sakana bala no uladih nong God ga gilamis leh ie bia na lon tana? A tutun, no Watong at na kis kaia hatikai.
14972	PSA 68:20	A pirharlat tupas no Watong, aie God, no nudahat Ut na Harhalon, nong i la puspusak ira udahat tinirih ta ira bungbung bakut.
14984	PSA 68:32	A mon tultulai na hanuat me Isip, ma ira Itiopia diet na tar se hagasiaan ira audiet hartabar uram ho God.
14988	PSA 68:36	God, a tamat na urur tupas ugu narako tano num halhaliana katon na lotu. No God ta Israel i la tartar ra dadas ma ra baso ta ira uno matanaiabar. A pirharlat tupas God.
15031	PSA 70:6	Iesen kana iat iau tiga maris ma ra nugu mon sunupi. God, hanuat habir ukai ho iau. Augu no nugu harharahut ma no nugu Ut na Harhalon. Watong, waak u halis.
15053	PSA 71:22	Nugu God, iau ni pirlat ugu ma no haap, kanong u la gilgil haruatne ira num kunubus. Augu no Halhaliana me Israel, iau ni inga ninge na pirharlat tupas ugu ma no nugu gita.
15065	PSA 72:10	Ira king me Tasis ma mekaia ta ira mugurlamin, diet na tar hartabar tana. Ira king me Arebia ma Seba, diet na tabar ie ma ra hartabar mah.
15067	PSA 72:12	Aie na halon ira maris ing diet na tataau tupas ie, diet at ing diet kilingana ngunngutaan ma taie tikai wara harharahut diet.
15070	PSA 72:15	Na tahut bia no king na lon lawas! Na bilai bia ira gol me Arebia da tar tana. Iau sip bia ira matanaiabar diet na sasaring hait utana ma tano kidilona bung bakut bia diet na saring God bia na haidane ie.
15073	PSA 72:18	A pirharlat tupas God no Watong, no God ta Israel, nong aie sen mon i la gilgil ira tamat na gingilaan na kinarup ing i melmel saakit.