13946	PSA 1:3	Aie hoing tiga ina daha di soi ra gagen taah, nong i la huhuai ta ira uno pakana bung na hunhuai, ma ira pakana pai la mahmahiawa. Ma bia ing i gil ra linge sa, i la manga petlaar at.
13959	PSA 2:10	Io huo, muat ira ut na harkurai, muat na mintot. Muat na taram ira nianga na harakatom, muat ira lualua tano ula hanuo.
13960	PSA 2:11	Muat na taram no Watong ma ra urur, ma muat na guama, ma sen bia muat na dedar mah.
13976	PSA 4:6	Muat na tar ira takodasiana hartabar tupas no Watong, ma muat na nurnur tana.
13987	PSA 5:8	Iesen tano num tamat na harmarsai, iau ni laka uram narako tano num hala. Ma iau ni singa bukunkek ma ra tamat na urur tupas no num halhaliana hala na lotu.
13989	PSA 5:10	Pai tale bia da nurnur ta ira nianga ing i suur ta ira ha diet. Ira kaati diet i hung ma ra harhagawai. Ira ha diet i mapus hoing no hurhuraan meram ta tiga midi di rarik tar ie. Ma diet tange ra bis ma ira karame diet.
13999	PSA 6:7	Iau te tamaubal um tano sunuah. Tano kidilona bung ra bung iau suah tano suhugu. Ma iau hasulutne no kubegu ma ra polo na matagu.
14000	PSA 6:8	I te hansik um ira matagu ing iau suah ma ra tapanuk. Ma dir pai dadas um, i burena ta ira agu suk.
14001	PSA 6:9	Muat haan talur iau, muat bakut ing muat gil magingin sakena, kanong no Watong i te taram ira nugu sunuah.
14021	PSA 7:18	Iau ni tanga tahut tano Watong uta ira uno taktakodas. Ma iau ni inge na pirharlat tano hinsana no Watong Nong i Naliu Harsakit.
14024	PSA 8:3	Mekatiga ta ira palabulu diet ira nat na bulu ma ira bana, u te hatahuat a mon pirhakasing kanong ta ira am suk, wara hamarur ira ut na harhuli ma diet ing diet wara binabalu ma ra sakena.
14045	PSA 9:14	Watong, nes ira agu suk ing diet helar tagu huo. Marse iau ma nu hatut iau talur no hanuo na minaat,
14082	PSA 12:5	ing diet la tangtange bia, “Mehet na petlaar ma ira karame mehet. Mehet at, mehet kure ira palabulu mehet. Taie tikai i tale bia na tikal mehet.”
14084	PSA 12:7	Ma ira nianga tano Watong i bilai harsakit hoing ira siliwa ing di tun sare leh narako tano tamat na mamahien tano ula iaah wara kapkap se ira bilinge ra liman ma iruo na pakaan.
14098	PSA 14:6	Muat ira ut na sakena, muat habatbat ira lilik udiet ira maris, iesen no Watong aie no udiet barbarahit.
14099	PSA 14:7	Maris, iau manga sip bia no harhalon ta ira Israel na hanuat me Saion! Ing no Watong na bul pukus habaling ira bilbilai taar ta ira uno matanaiabar, i tahut bia ira bulumur te Iakop diet na guama. I bilai bia ira Israel diet na laro.
14125	PSA 17:10	Pataie ta harmarsai ta ira udiet nilon. Ma ira ha diet i iangianga ma ra minok.
14129	PSA 17:14	Watong, ma no limaam nu halon iau sukun kaiken ra mangana tunotuno. Nu halon iau talur ira tunotuno ta iakan ra ula hanuo ing ira udiet kunkulaan ta ira udiet nilon kaiken tano ula hanuo. Diet ing u manga kalak diet, nu tabar hahos diet, ma na kisi mah ira nati diet. Ma diet na bul hulungan ra bunbulaan uta ira tubu diet.
14130	PSA 17:15	Ma iau, iau ni nes no num matmataan kanong iau te gil ra takodas. Ing iau ni pada, iau ni guama wara nesnes ugu.
14137	PSA 18:7	Tano nugu tapunuk iau ga tataau uram tano Watong. Iau ga suah uram hono nugu God wara harharahut. Meram tano uno hala na lotu ga hadade no ingagu. No nugu sunuah ga haan tupas ie ma ga hadade.
14139	PSA 18:9	A mis ga tubuala suur ta ira matana ngarngarona. No iaah nong i la tuntun haliare ira linge ga hansur tano hana. Ma no kalangaruana iaah ga lulungo suur tano hana mah.
14143	PSA 18:13	Meram tano pilpilakas tano uno matmataan, ira bahuto diet ga haan saakit tika ma ra polo na bata ho ira haat, ma ra tamat na hile.
14162	PSA 18:32	Kanong warah, no Watong sen mon aie no God. Taie tiga mes. Ma sige mah um no Haatkis? Taie tiga mes. No udahat God sen mon.
14166	PSA 18:36	U tar tagu no num bahbahit na papaas hasur ira ebar. Ma no kata na limaam i la hadadas iau. U la tudu suur wara hatamat iau.
14179	PSA 18:49	ma nong mah i la halhalon leh iau mekaia ta ira nugu ebar. U ga hatamat iau naliu ta ira sukagu. Mekaia ta ira ut na ngalngaluan u ga halangalanga ise iau.
14213	PSA 21:7	Tutun saakit, u te bale tar tana ira haraidaan ing pa na pataam. Ma i hung ma ra gungunuama kanong u kis tika mei.
14244	PSA 22:24	Pirlat ie, muat ing muat burte no Watong. Muat bakut ira bulumur ta Iakop muat na urur tana. Muat na nes hatamat ie, muat bakut ira bulumur ta Israel!
14258	PSA 23:6	Tutun saakit, a bilbilai ma ra harmarsai na mur iau ta ira nugu bungbung na nilon bakut. Ma iau ni kis hathatikai narako tano ngasina no Watong.
14261	PSA 24:3	Sige na kawas no uladih tano Watong? Ma si mah na tur narako tano uno halhaliana subaan?
14265	PSA 24:7	Muat ira matanangaas, tapapos! Muat ira matanangaas menalua saakit, tamapapos, waing no King nong a tamat no minarine na me haan laka.
14267	PSA 24:9	Muat ira matanangaas, tapapos! Muat ira matanangaas menalua saakit, tamapapos, waing no King nong i tamat no minarine na me haan laka.
14268	PSA 24:10	Ma sige ie, iakano King nong i tamat no minarine? No Watong Nong i Dadas Harsakit. Aie no King nong i tamat no minarine.
14316	PSA 27:14	Kis kawase no Watong. Nu dadas ma nu balaraan taar. Masa, nu kis kawase no Watong.
14326	PSA 29:1	Muat na pirlat no Watong, muat ira dadasine aram ra mawe. Muat na pirlat no Watong tano uno minamar ma tano uno dadas.
14327	PSA 29:2	Pirlat no Watong tano minamarine nong i haruat ma no hinsana. Muat na lotu tupas no Watong ra matmataan tano uno halhaliana kinkinis nong i manga melmel harsakit.
14334	PSA 29:9	No ingana no Watong i la hurhurusane ira dadasina daha, ma i la ramas sare ira malit. Ma narako tano uno hala na lotu diet bakut diet kakonga bia, “A pirhakasing tupas ie!”
14359	PSA 31:10	Marse iau, Watong, kanong iau kis taar ra tamat na tinirih. Ira matagu i sus ma ra sunuah na tapunuk. No balagu ma no tamaigu i sakena mah.
14369	PSA 31:20	A tamat saakit no num bilbilai nong u bul tagure tar ie wara udiet ing diet ru ugu. Ma ta diet ing diet barahit taam, huo mah u la tamtabar diet ma no num bilbilai kaia ra matmataan ta ira tunotuno.
14374	PSA 31:25	Muat na tur dadas ma muat na balaraan, muat ing muat kis nanahai tano Watong.
14385	PSA 32:11	Muat na guama tano Watong ma muat na laro, muat ira ut na takodas. Muat na inge, muat bakut ing ira kaati muat i gamgamatien.
14386	PSA 33:1	Muat ira ut na takodas, muat na inge ma ra gungunuama tupas no Watong. Sige ing i gamgamatien i haruat tunat bia na pirlat ie.
14399	PSA 33:14	Mekaia hono katon i la kiskis tana, i la ngokngok ta diet bakut ing diet lon tano ula hanuo.
14411	PSA 34:4	Muat tika ma iau, dahat na hatamat no Watong, dahat gi raun tikane no hinsana.
14412	PSA 34:5	Iau ga silihe no Watong ma ga taram iau. Ma ga halangalanga iau sukun ira nugu harangunngutaan na bunurut ing i ubal iau.
14414	PSA 34:7	No maris na tunotuno ga tataau, ma no Watong ga hadadei. Ma ga halon ie sukun ira uno tinirih.
14417	PSA 34:10	Muat na ru no Watong, muat ira uno tus, kanong sige nong i urur tana pa na supi tiga linge.
14419	PSA 34:12	Mai, ira natigu, muat taram iau. Iau ni hausur muat wara urur tano Watong.
14437	PSA 35:7	Diet te se bat iau ma ira nudiet uben, ma taie ta burena. Ma taie ta burena, iesen diet ga kil tar tiga naan wara utagu.
14443	PSA 35:13	Ma sen ing diet ga maset, iau ga sigam tamadiris na sigasigam wara hamines no nugu marmaris, ma iau ga bul hasur no nugu nilon ma ra minilo! Ing ira nugu sinasaring no Watong pa ga taram, ga tapukus baal taar tagu,
14445	PSA 35:15	Ma sen ing iau ga laleka, diet ga hanuat hurlungen ma ra gungunuama. Iau ga kis kabong taar ma diet gaam hung luhutane iau wara hinarubu ma iau. Diet pai la sasangeh wara timtibe hapenpen iau.
14538	PSA 39:4	Aram narako tagu no balagu ga mamahien. Ma ing iau ga kis matien taar ma ra lilik, no iaah ga iaiaan. Kaik um, iau gaam ianga ma no hagu hoken:
14551	PSA 40:3	I ga rakun leh iau sukun no malmalagir na lulur, ma sukun mah no pikaia ma ra pesa. I ga hatur ira kakigu naliu tiga haatkis. Ma ga balaure timaan no nugu tuntunur.
14561	PSA 40:13	Kanong warah, a saksakena ing i kalkalala bia da was, i luhutane iau. Ira nugu magingin sakena i te burung iau ma pai tale iau bia ni nanaas. Diet manga haleng saakit ta ira higu tano ulugu. Ma no kaatigu i te rurungo aram narako tagu.
14587	PSA 42:7	nugu God.” No balagu i tapunuk, io kaik, iau nigi lik leh ugu, merau Ioridaan, meram hono uluno no uladih Hermon ma mekaia hono uladih Misar.
14600	PSA 44:3	Ma no num dadas at, u ga pasak hasur se ira mes na hunhuntunaan, ma u ga hakisi ira hintubu het tano udiet pise. U ga haliare ira mes na matanaiabar, ma u ga manga hakisi timaan ira hintubu het.
14603	PSA 44:6	Mehet la paspasak pukus diet ma no num dadas. Tano dadas tano hinsaam mehet papasuane diet ing diet malentakuane het.
14607	PSA 44:10	Iesen kaiken um u te malok se tar het ma u te bul hasur het. Ma pau la saksakate habaling um ira nuhet matana ubane.
14616	PSA 44:19	Mehet pa ga lilik tatohun taam. Mehet pa ga mur tiga mes na ngaas. Mehet murmur hani at no num ngaas.
14629	PSA 45:5	Ma ira num minamar nu hilau laah ma tiga hos bia u te petlaar wara bubu ira num ebar, kanong ta ira burena ira tutun, no magingin na kis matien, ma no takodasiana magingin. I tahut bia no kata na limaam na haminas ira gingilaan ing pai a malmaliana.
14633	PSA 45:9	Ira num sigasigam bakut i sangsangin kala mismisien ma ra lamara naas ma ra lamara boiah. Mekatiga ra ngasia diet ira watong ing di hamar ma ra linge di gil ma ra lako na wawaguai, ira kinakel na ninge di ting mur, i haguama ugu.
14644	PSA 46:2	God aie no nudahat subaan na barbarahit ma no udahat baso. Ma i la balbalaure haitne dahat ta ira bung na harangunngutaan.
14651	PSA 46:9	Mai, ma muat na nes ira pakpakilai tano Watong ing i hamau taman tano ula hanuo.
14656	PSA 47:2	Muat ira matanaiabar ta ira kantri bakut, muat na pasapasar ma ira lima muat. Ma muat na kup ma ra gungunuama uram ho God.
14670	PSA 48:6	diet ga nes Saion ma diet ga manga karup saakit. Ma diet ga hilau ma ra tamat na bunurut.
14677	PSA 48:13	Kaia, muat na haan luhutane Saion. Muat na lik murmur timaan ira uno taltalona balo. Muat na nes ma muat na was ira katon na barbarahit aram naliu ine, naga tale bia muat na hinawase diet ing diet na lon tano pakana bung namur.
14702	PSA 50:2	Meram Saion, no katon nong i melmel saakit, God i la murmurarang mekaia.
14706	PSA 50:6	Ma no mawe i hinawas palai bia God i takodas, kanong aie at no ut na gil harkurai.
14715	PSA 50:15	Ma nu tataau tupas iau tano pakana bung na harangunngutaan. Iau ni halon ugu, ma nu pirlat iau.”
14726	PSA 51:3	God, marse iau haruat ma no num magingin na harkalak tupas iau nong pai la patpataam. Ma haruat ma no num tamat na harmarsai, kap se tano num lilik ira nugu magingin na tabuna mur nianga.
14761	PSA 53:6	Diet ke, nora ramramin i manga ubal diet, ing ga taie ta linge bia da burte menalua. God ga bul harbasiane ira suru diet, ing diet ga harubu ma muat. Muat ga gil hahirhir diet, kanong God ga malentakuane diet.
14762	PSA 53:7	Maris, iau manga sip bia no harhalon ta ira Israel na hanuat me Saion! Ing God na bul pukus habaling ira bilbilai taar ta ira uno matanaiabar, i tahut bia ira bulumur te Iakop diet na guama. I bilai bia ira Israel diet na laro.
14786	PSA 55:15	Ma augu ing dar git guguama tika ing dar git hanahaan tika ma ra haleng tunotuno tano hala ta God.
14811	PSA 57:2	Marse iau, God, marse iau, kanong no nugu nilon i la barahit taar taam. Iau ni kap barbarahit tano ududuh ta ira babaam, tuk no halhaliarai na saakit.
14820	PSA 57:11	kanong a tamat no num harmarsai. I haruat aram ra mawe. Ma no num tutun na magingin i hanut uram ra bahuto.
14823	PSA 58:2	Muat ira lualua, muat lik bia i takodas ira numuat nianga? Ira numuat harkurai i takodas nalamin ta ira tunotuno?
14825	PSA 58:4	Mekaia laah di ga kaha diet, ira ut na sakena diet haan taltalur. Meram laah tano lienat ta ira pawasi diet, diet mur leh at ira udiet lilik ma diet harabota.
14831	PSA 58:10	Menalua ma ira sosopen na hamaan no mamahien tano iaah i lulungo gasien, God na sah se ira ut na sakena sukmaal bia diet lon taar at baak.
14860	PSA 60:9	No hanuo Gileat a nugui, ma no huntunaan Manase a nugu mah ie. Epraim no nugu kukuha na hinarubu, ma Iudeia no nugu hakilang na harkurai.
14861	PSA 60:10	Moab aie no nugu tultulai wara gisgis ira kakigu. Iau te se tar ira nugu pala lamaas na pinpaas ta Edom wara hamines bia iau te hahirhir ie. Iau te barangang ing iau petlaar Pilistia.”
14868	PSA 61:3	Mekai ra hauhawatine no ula hanuo iau tataau ugu. Iau tataau ing iau malmalungo hanahaan. Lamus iau taar tano ula habo nong i manga naliu tagu,
14883	PSA 62:9	Matanaiabar diet, muat na so nurnur tana ta ira kaba bungbung bakut. Muat na hapuasne ira kaati muat taar tana, kanong aie no nudahat katon na barbarahit.
14906	PSA 64:7	Diet pingit ira linge ing pai takodas ma diet tange, “Mehet te tagure tar tiga lilik ing i manga tale bia mehet na petlaar ie.” A tutun bia ira lilik ma ira bala diet ira tunotuno i manga kangkonga.
14912	PSA 65:2	God, a num ira pirharlat aram Saion. Mehet na pakile haruatne ira numehet kunubus ukatiga ho ugu.
14915	PSA 65:5	A haraidaan na kis ta diet ing u te gilamis leh ma u te lam hutaten diet bia diet na lon narako ta ira num katon na lotu. Mehet hung ma ira bilai na linge tano num hala, iakano tamat na halhaliana hala na lotu.
14919	PSA 65:9	Diet ing diet la lalon tapaka saakit taam diet burte ira num dadas na gingilaan. Mekatiga ing no laar i daras ie ma ing no kasakes i suguh, u tataau hawaat a ninge na gungunuama.
14925	PSA 66:1	Muat kup ma ra gungunuama uram ho God, ira tunotuno bakut.
14929	PSA 66:5	Mai, ma nu nas ing God i te pakile, ma nu nas mah bia pai malmaliana ira uno pinapalim wara gaena ira tunotuno!
14932	PSA 66:8	Muat ira matanaiabar, muat na pirlat no nudahat God. Da hadade ira numuat kinakel na pirharlat uram ho ie.
14940	PSA 66:16	Muat bakut ing muat ru God, muat mai, ma muat na hadoda. Iau ni hinawase muat ta ing i te gil wara gaegu.
14966	PSA 68:14	Ma diet mah ing diet ga mona taar, diet ga kap ira bun di pulus ira baba diet ma ra siliwa ma ing ira hi diet i pilpilakas ma ra gol.”
14969	PSA 68:17	Muat ira tamat na uladih me Basan, wara bih muat nes haliare ma ra sakana bala no uladih nong God ga gilamis leh ie bia na lon tana? A tutun, no Watong at na kis kaia hatikai.
14978	PSA 68:26	Ira ut na ninge diet lulua haan. Menamur ta diet ira ut na hus tulaal, tika ma ira bulahin ing diet tingting ira tamborin.
14985	PSA 68:33	Muat na inge uram ho God, muat ira kingdom tano ula hanuo. Inge ra pirharlat uram hono Watong,
15021	PSA 69:33	Ira maris diet na nas ma diet na laro. Muat ing muat sisilih ta God, ira numuat lon na nunuhuan baling.
15037	PSA 71:6	Mekaia laah di ga kap iau, iau ga soh lilik taar taam. U ga kap hawaat iau mekatiga ra balana no nugu makai. Iau ni pirlat ugu hathatikai.
15049	PSA 71:18	Ma ing mah iau patuana ma iau te ul hipala, God, waak u haan sukun iau, tuk iau ni hinawase hapalaine tar ira bulumur tano num dadas, ma utano num baso ta diet baak ing diet na hanuat.
15051	PSA 71:20	U te gil iau bia ni kilingane ra haleng na tinirih ma ra ngunngutaan, iesen nu ru timaan habaling no nugu lon. Mekatiga ra balana no pise, nu raun haut habaling iau.