13963	PSA 3:2	Watong, haleng saakit um diet malentakuane iau! Haleng mah diet tut hut wara hinarubu ma iau!
13969	PSA 3:8	Watong, taman tut! Halangalanga iau, nugu God! Pasar ira iase diet ira nugu ebar. Warat ira ngise diet ira ut na sakena.
13990	PSA 5:11	God, tange bia diet ronga! Bale leh diet bia ira udiet harpingit na burena ta ira udiet punuko. Tule isisai ta diet kanong ira udiet magingin sakena i haleng, kanong warah, diet te tur talur ugu.
14018	PSA 7:15	Nes baak! Tiga nong i tianane ra saksakena. I balaan ma ra purpuruan ma i kaha hapuasne ra bisbis.
14023	PSA 8:2	Watong, numehet Watong, no hinsaam i manga lua harsakit tano ula hanuo bakut! U te haminas no minamarim aram naliu tano mawe.
14031	PSA 8:10	Watong, numehet Watong, no hinsaam i manga lua harsakit tano ula hanuo bakut!
14051	PSA 9:20	Nora Watong, taman tut! Waak u bale leh tiga tunotuno mon bia na petlaar ugu. Bale ira kantri ing diet pai Iudeia bia diet na tur ra matmataan taam, ma nu kure diet.
14064	PSA 10:12	Watong, taman tut! Raun no limaam, God. Waak u lumluban diet ing taie ta harharahut ta diet.
14099	PSA 14:7	Maris, iau manga sip bia no harhalon ta ira Israel na hanuat me Saion! Ing no Watong na bul pukus habaling ira bilbilai taar ta ira uno matanaiabar, i tahut bia ira bulumur te Iakop diet na guama. I bilai bia ira Israel diet na laro.
14128	PSA 17:13	Taman tut, Watong! Tur bat diet ma nu me bul hasur diet. Halon iau ma no num wise sukun ira ut na sakena.
14177	PSA 18:47	No Watong i lon! A pirharlat tupas no nugu Haatkis! Da hatamat God no nugu Ut na Harhalon.
14206	PSA 20:10	Watong, halon no king! Taram het ing het tataau!
14244	PSA 22:24	Pirlat ie, muat ing muat burte no Watong. Muat bakut ira bulumur ta Iakop muat na urur tana. Muat na nes hatamat ie, muat bakut ira bulumur ta Israel!
14247	PSA 22:27	Ira maris diet iaan ma diet na hahos. Diet ing diet silsilihe no Watong diet na pirlat ie. I tahut bia muat na lon hathatika!
14265	PSA 24:7	Muat ira matanangaas, tapapos! Muat ira matanangaas menalua saakit, tamapapos, waing no King nong a tamat no minarine na me haan laka.
14267	PSA 24:9	Muat ira matanangaas, tapapos! Muat ira matanangaas menalua saakit, tamapapos, waing no King nong i tamat no minarine na me haan laka.
14443	PSA 35:13	Ma sen ing diet ga maset, iau ga sigam tamadiris na sigasigam wara hamines no nugu marmaris, ma iau ga bul hasur no nugu nilon ma ra minilo! Ing ira nugu sinasaring no Watong pa ga taram, ga tapukus baal taar tagu,
14453	PSA 35:23	Tangahun, ma taman tut ukai wara gaiegu! Hargor wara gaiegu, augu no nugu God ma no nugu Watong.
14466	PSA 36:8	No num tutun na harmarsai ing pa na pataam i manga tamat ma pai tale be da hapupuo! Ira tunotuno bakut diet barahit napu ra ududuh ta ira babaam.
14471	PSA 36:13	Nes ira ut na gil nironga ing diet te puko taar huo. Di te se hasur diet, ma diet pai haruat bia diet na taman tut!
14621	PSA 44:24	Watong, tangahun! Wara bih u kubaba? Nu pada! Waak bia u malentakuane hatikane het.
14657	PSA 47:3	No Watong Nong i Naliu Harsakit i haruat bia da rui, aie no tamat na King tano ula hanuo bakut!
14750	PSA 52:6	U sip ira kaba nianga na harangunngutaan, augu nong a ut na harabota augu!
14762	PSA 53:7	Maris, iau manga sip bia no harhalon ta ira Israel na hanuat me Saion! Ing God na bul pukus habaling ira bilbilai taar ta ira uno matanaiabar, i tahut bia ira bulumur te Iakop diet na guama. I bilai bia ira Israel diet na laro.
14818	PSA 57:9	Nugu nilon, tangahun! Ira haap ma ira gita, muat kakel! Hokaiken, iau ni hangun no laar.
14828	PSA 58:7	God, warat ira ngise diet mekaia ra ha diet! Watong, ragatane ira lako diet ira laion!
14833	PSA 58:12	Ira tunotuno diet na tange, “Tutun! A mon kunkulaan audiet ira ut na takodas. Tutun! Tiga God kana nong i kure no ula hanuo.”
14837	PSA 59:4	Nes baak! Diet mun kawase tar iau. Ira ngangarina tunotuno diet ianga kumaan tika wara hanghagahe bia mon iau, ma iau pai lake tiga harkurai ma taie mah nugu ta sakana magingin, Watong.
14854	PSA 60:3	God, u te malok se het ma u te bul hasur het. U gate ngalngaluan. Kaiken um, kap pukus habaling leh mehet ukatiga ho ugu!
14927	PSA 66:3	Tange ta God, “Pai a malmaliana ira num gingilaan! I manga tamat no num dadas, kaik ira num ebar diet rurungo pas ugu.
14929	PSA 66:5	Mai, ma nu nas ing God i te pakile, ma nu nas mah bia pai malmaliana ira uno pinapalim wara gaena ira tunotuno!
15070	PSA 72:15	Na tahut bia no king na lon lawas! Na bilai bia ira gol me Arebia da tar tana. Iau sip bia ira matanaiabar diet na sasaring hait utana ma tano kidilona bung bakut bia diet na saring God bia na haidane ie.
15285	PSA 81:9	Muat ira nugu matanaiabar, muat na hadade, ma iau nigi hakatom muat. Muat ira Israel, maris, iau manga sip bia muat na taram iau!
15443	PSA 89:53	A pirharlat tupas no Watong hathatika! Amen! Amen!
15456	PSA 90:13	Watong, waak um u manga ngalngaluan! Nu sal halawaas ie haruat hunanges? Nu hamines ra marmaris ta ira num tultulai.
15460	PSA 90:17	Watong, no numehet God, i tahut bia nu kanakana ta mehet. Nu tar ira hunena ira pinapalim na lima mehet. Masa! Nu tar ira hunena ira pinapalim na lima mehet.
15482	PSA 92:6	Watong, a tamat saakit ira linge u gil, ira num lilik i manga naliu saakit tunat!
15499	PSA 94:2	Augu no ut na gil harkurai tano ula hanuo, tut hut! Balu pukus ira ut na tangarot haruat ma ira udiet tintalen.
15662	PSA 104:24	Watong, u te gil ira haleng na mangana linge saakit! U ga gil diet bakut ma no num minminonas. No ula hanuo i hung ma ira num hakhakisi.
15812	PSA 108:3	Ira haap ma ira gita, muat kakel! Hokaiken, iau ni hangun no laar.
15952	PSA 118:15	A kunup na gungunuama tika ma ra barangang kenam narako ta ira hala ta ira ut na takodas. No kata na limana no Watong i te gil ra dadas na gingilaan!
15953	PSA 118:16	No Watong i te raun haut no kata na limana. No kata na limana no Watong i te gil ra dadas na gingilaan!
15963	PSA 118:26	A haraidaan na kis ta nong i hanuat wara gilgil haruatne ira sinisip gar tano Watong! Meram tano hala na lotu tano Watong mehet haidane muat.
16063	PSA 119:97	Iau la manga kalak tar no num harkurai! Iau lik mur ie tano kidilona bung bakut.
16069	PSA 119:103	Ira num nianga i namien ududuh! I manga namnamien ta ira tiri na imara akai ra hagu!
16147	PSA 120:5	Maris tagu, i hoing bia iau gaar goota ares Mesek ing i tapaka saakit, bia iau gaar kis longai ta ira palpalih arau Kedar!
16208	PSA 129:8	Ma taie tikai nong na haan saakit na tale bia na tange bia, “No Watong na haidane ugu! Mehet haidane ugu tano hinsana no Watong.”
16238	PSA 133:1	Ai, i manga tahut ma da guama tunat ing ira haratasin diet lon tika timaan!
16297	PSA 137:7	Watong, lik tar asa ing ira Idom diet ga gil tano bung di ga dure hasur Ierusalem. Diet ga kakonga bia, “Dure hasur ie! Dure hasur ie ures muk ta ira burena!”
16324	PSA 139:17	God, tano nugu ninanaas, ira num lilik i melmel ma a tabi matana! Bia da bul tikane i manga haleng saakit.
16326	PSA 139:19	Maris, God, bia nugu bu bing se um ira ut na sakena! Muat haan talur iau, muat ira ut na hinarubu bingibing.
23268	MAT 3:7	Ma bia Jon ga nes a haleng na Parisi ma Sadiusi diet ga hanhanuat ukaia ho ie wara kap baptais, ga tange ta diet, “A sakana ut na harabota muat! Sige ga hakatom muat bia muat na hilau sukun no harpidanau nong God i hutet bia na tar ie?
23269	MAT 3:8	Gaar tahut bia muat na gil ira linge ing na haminas bia muat te lilik pukus!
23288	MAT 4:10	Jisas ga tange tana, “Sataan, haan laah! Tiga harkurai gar ta God di ga pakat ie wara gaie mehet ira matanaiabar i tange mah hoken, ‘Muat na lotu tupas no Watong no numuat God, ma aie sen mon muat na hanapu muat tana.’”
23321	MAT 5:18	Io, muat nes baak! Ing bia no mawe ma no ula hanuo dir kis taar, pa na benben tiga nat na katon i manga hansik sakit ta ira harkurai tane Moses, tuk taar bia da pakile haruatne bakut diet.
23329	MAT 5:26	Io, hadade baak! Pa da hasur ugu ra hala na harpidanau tuk taar bia nu tar bakut ira num kunkulaan.
23349	MAT 5:46	Ma ing bia muat sip sen mon ing diet la sipsip muat, God pa na balu pukus muat ma ta bilai na harharahut. Io, ira ut na kap takis, ing muat la nesnes diet bia a ut na sakena diet, diet la gilgil huo mah!
23350	MAT 5:47	Bia muat pai haianga leh ing muat bala ngungut taar ta diet, io, muat pai gil ra tahut ta ke ra mes. Io, ing diet pai la nurnur ta God, diet mah, diet la gilgil huo!
23353	MAT 6:2	Io, ing bia u tabar tiga maris, waak u gilgil ta linge wara hatalingaan diet tano num hartabar, hoing ira ut na harababo diet la gilgil narako ta ira hala na lotu ma ta ira ngaas mah. Diet la gilgil huo bia ira tunotuno na ru diet. Muat hadade baak! Diet te hatur kawase bakut leh at mon ira hunena ira udiet mangason.
23356	MAT 6:5	“Bia muat sasaring, waak muat ngan hoira ut na harababo. Diet la sipsip bia diet na turtur narako ta ira hala na lotu ma diet na sasaring. Ma diet la sasaring ta ira katon mah ing ira matanaiabar diet la hanhanuat ukaia, waing ira tunotuno na nes diet. Muat hadade baak! Diet te hatur kawase bakut leh at mon ira hunena ira udiet mangason.
23367	MAT 6:16	“Io, bia muat hahal uram hone God, waak muat nanaas malahuan hoing ira ut na harababo diet la matamalahuan huo. Diet la gilgil huo wara haminas ta ira tunotuno bia diet haahal. Muat hadade baak! Diet te hatur kawase bakut leh at mon ira hunena ira udiet mangason.
23374	MAT 6:23	Iesen bia ira iruo mataam dir sakena, na ngan hoing bia no num kidilona nilon i kankado. Iesen bia iakano palai i kis taar taam i te kankado, nu manga baaba sakit!
23377	MAT 6:26	Muat na nes ira maan kenam ra mauho. Diet pai la saaso. Diet pai la kilkil hulungan nian. Diet pai la bulbul tanakurua mah. Iesen namuat Sus aram ra mawe i la tamtabar diet. Nes baak! Muat palai bia, tano sinisip ta God, muat manga tamat ta diet.
23378	MAT 6:27	Muat ngarngarau warah? Waak muat gilgil huo! Bia muat na ngarngarau, pa na halawaas ira numuat nilon ta dahin.
23381	MAT 6:30	Kaik, God i gil hamaririsuan ira pitoka nong i lon mon katin ma marakan da halo iaah mei. Bia i tutun ing God i gil huo tano pitoka, i tutun sakit bia na hasigam muat mah ma ira kiniasi muat. Maris! Pai patpatuan ira numuat nurnuruan!
23390	MAT 7:5	A ut na harababo ugu! Nu kap se hanalua baak no pokona daha tano mataam at. Kaik, nugu nanaas timaan wara kapkap se no nat na pet na daha tano matana no hinsakaam.
23407	MAT 7:22	Ma bia no bung na harkurai na hanuat, a haleng diet na tange tagu bia, ‘Watong! Numehet Watong! Hohe um ta het? Mehet git iangianga na tangesot ma no num dadas. Ma mehet git hasur se ira sakana tanuo ma no num dadas. Ma no num dadas mah, mehet git gilgil haleng na dadas na gingilaan na kinarup mei. U biha?’
23408	MAT 7:23	Ma sen ni hinawase hamadaraas diet bia, ‘Iau pai le nunure tun at bia sige muat. Muat haan sukun iau! A sakana tunotuno muat!’
23418	MAT 8:4	Ma Jisas ga tange um tana, “Harbalaurai timaan! Waak bia nu hinawase ta tiga nong. Iesen nu haan ma nu haminas ugu tano ut na pakila lotu. Ma nu tar no hartabar haruat ma no harkurai tane Moses. Ma iakano hartabar na hinawas palai wara hatutun bia u te langalanga ma bia pai tale mah bia tikai na hatabune habaling ugu.”
23424	MAT 8:10	Ma bia Jisas ga hadade huo, ga karup, ma ga tange hoken ta diet ing diet ga murmur hanii. “Muat nes baak! Iau pai ga nas tikai nalamin kai Israel ing i dadas no uno nurnur hoing iakan.
23427	MAT 8:13	Io, ma Jisas ga tange um tano tamat na umri, “Nu haan! Na ngan hoing u nurnur taar huo.” Ma no uno tultulai ga langalanga ta iakano pakana bung at mon.
23439	MAT 8:25	Io, ira bulu na harausur diet ga haan, diet ga hangun ie, ma diet ga tange tana bia, “Watong, halon dahat! Dahat wara ruhruh!”
23440	MAT 8:26	Ma Jisas ga balu diet, gaam tange bia, “Waak muat ra bunurut! Pai patpatuan ira numuat nurnur!” Io, Jisas ga taman tut, ga tigal hadadas no dadaip ma ira pakananoh, io, gaam manga malile harsakit.
23443	MAT 8:29	Ma dir ga kakongane, “Nati God, waak u kis na gil mir! Pai no pakana bung baak bia nu gil hangungut mir!”
23452	MAT 9:4	Ma Jisas ga nunure kilam ira udiet lilik, gaam tange, “Waak muat lik kaike ra sakena!
23472	MAT 9:24	Io, ga tange ta diet, “Muat hansur! No hinasik pai maat. I kubaba mon.” Ma diet ga kurus balik ie.
23501	MAT 10:15	Muat hadade timaan! Muat palai taar bia God na gil tiga tamat na harpidanau ta Sodom ma Gomora tano pakana bung na harkurai nong na hanuat namur. Iesen no harpidanau ta iakano taman nong pa na bale leh muat, na manga tamat ta ira udir harpidanau.
23502	MAT 10:16	“Muat hadade timaan! Iau tultule muat hoira sipsip ukaia nalamin ta ira tamat na rakaia na paap. Io kaik, i tahut bia muat na keskes hoira taragau ma muat na tahut hoira bun.
23509	MAT 10:23	Ing bia diet na hagahe muat tiga taman, muat na hilau taar tiga mes na taman. Muat hadade baak! Muat pa na haan bakut baak ta ira tamtaman ta Israel, nalua bia ing Nong a Tunotunoi na hanuat.
23528	MAT 10:42	Io, muat hadade baak! Bia sige tikai i hamamo tiga maris ma tiga gingop na taah madahon kanong aie anugu tiga bulu na harausur, io, no hunena no uno mangason pa na panim laah.”
23539	MAT 11:11	“Muat hadade baak! Jon no ut na baptais i tamat ta ira tunotuno bakut ing diet ga lon ta iakan ra ula hanuo. Iesen sige tiga nong ta muat i manga hansiksik narako tano kinkinis na harkurai ma ra harbalaurai ta God, i tamat tane Jon.
23549	MAT 11:21	Ga tange hoken: “Maris ta muat me Korasin, na kabit muat! Maris mah ta muat me Betsaida, na kabit muat! Bia di gor gil ira dadas na gingilaan na kinarup kaia Tair ma Saidon, hoing iau te gil ta mur ira iruo taman, io, dir gor te lilik pukus. Dir gor te bul hagasiaan ira bilingana put na maal ma dir gor te mormor ma ra tahuna iaah wara haminas bia dir te lilik pukus. Iesen dir pa ga gil huo!
23550	MAT 11:22	Muat hadade baak! God na gil tiga tamat na harkurai ta Tair ma Saidon tano pakana bung na harkurai nong na hanuat namur. Iesen na gil tiga tamat na harkurai sakit ta mur Korasin ma Betsaida.
23551	MAT 11:23	Ma muat me Kapeneam, waak muat lat ira hinsa muat uram ra mawe! Muat na hansur uras napu ra subaan ta ira minaat! Bia daga gil ira dadas na gingilaan na kinarup kaia Sodom hoing iau te gil ta muat, io, gor kis taar at tuk taar katin.
23552	MAT 11:24	Muat hadade baak! God na gil tiga tamat na harkurai ta Sodom tano pakana bung na harkurai nong na hanuat namur. Iesen na gil tiga tamat na harkurai sakit ta muat me Kapeneam.”
23554	MAT 11:26	Masa, Mama! U ga gil huo kanong u guama bia na ngan huo.
23560	MAT 12:2	Bia ira Parisi diet ga nes huo, diet ga tange tane Jisas, “Nas baak! Ira num bulu na harausur diet lake no harkurai utano Bung na Sinangeh.”
23625	MAT 13:17	Io, muat hadade baak! A haleng na tangesot ma haleng na ut na takodas mah, diet ga manga sip bia diet na nas kaiken muat te nas. Iesen diet pa ga nas. Ma diet ga manga sip mah bia diet na hadade kaiken muat te hadade. Iesen diet pa ga hadade.
23662	MAT 13:54	Ma ga hanuat tano uno taman at. Io, ga tur leh wara hausur diet ira matanaiabar narako tano udiet hala na lotu. Ma diet ga manga karup tana, diet gaam tiri, “Iakan ra tunotuno i kap kaiken ra mintota ma kaiken ra dadas na gingilaan na kinarup meh? Dahat pai palai tun at ta dahin!
23693	MAT 14:27	Iesen habir at mon Jisas ga habalaraan diet ma ga tange, “Iau mon! Waak muat ra bunurut!”
23703	MAT 15:1	Io, ari a Parisi ma ari a tena harausur ta ira harkurai tane Moses diet ga hanuat meram Ierusalem, diet gaam haan ukaia ho Jisas, ma diet gaam tange bia, “Pai tahut bia ira num bulu na harausur diet hagahe ira magingin ira hintubu dahat ga tar ta dahat. Nes baak! Diet pai taptapir nalua bia diet na iaan!”
23709	MAT 15:7	A ut na harababo muat! No tangesot Aisaia ga tange ra tutun uta muat hoken bia ga pakat iakan ra nianga ta God. Ma God ga tange bia,
23712	MAT 15:10	Ma Jisas ga tatau hulungan no tamat na matanaiabar, gaam tange ta diet, “Muat hadade! Iau sip bia muat na palai!
23716	MAT 15:14	Waak se um diet! Diet haruat ma ira lualua diet pulo. Ma bia tiga pulo i sal tiga pulo mah, dir bakut, dir na puko ta tiga tungtung.”
23724	MAT 15:22	Ma tiga hahin mekaia ta iakano hanuo, tano hun me Kena, ma pai Iudeia ie, ga hanuat taar tane Jisas. Io, ga hanuat, gaam kakongane hoken: “Nora Watong, no tubu Dawit, nu marse iau! A sakana tanuo i te sosoha tano nugu hinasik ma i manga haliare hagahei.”
23729	MAT 15:27	Ma no hahin ga tange, “Masa, nora Watong! Iesen ira paap at mon mah, diet la ienien ira petpetine ing i la pukpuko suur meram tano suuh na nian ta ira hunuge diet.”
23763	MAT 16:22	Io, ne Pita ga lamus hasisingen ie, gaam bor ie, gaam tange bia, “Taie tun at, nugu Watong! Pa da gil taam hokaike!”
23767	MAT 16:26	Ma na hatahutne tiga nong hohe, bia na tinane iakan ra ula hanuo bakut sen bia na ber tano uno nilon tutun? Io kaik, tiga nong na kul pukus no uno nilon tutun ma ra sa? Taie at!
23769	MAT 16:28	Muat hadade baak! Tari ta muat kaiken pa na maat tuk taar bia muat na nas ie Nong a Tunotunoi, i hananuat ma no uno tamat na kinkinis na harkurai ma ra harbalaurai.”
23781	MAT 17:12	Iesen iau hinawase mutal, tikai hoing Elaija gate hanuat taar! Ma pa di ga nunure kilam ie, iesen di ga gil haruatne ira udiet sakana sinisip utana. Ma diet na tar ra ngunngutaan mah huo ta iakano Nong a Tunotunoi.”