23214 | MAT 1:1 | Ikin no harmur ta ira hinsa di ira hintubu ne Jisas Krais nong a bulumenamur ie tane Dawit ma ne Dawit a bulumenamur tane Abraham. |
23215 | MAT 1:2 | Abraham no mama tane Aisak, Aisak no mama tane Iakop, ma ne Iakop no mama tane Iuda ma ira tasine bileng. |
23217 | MAT 1:4 | Ma ne Ram no mama tane Aminadap, Aminadap no mama tane Nason, ma ne Nason no mama tane Salmon. |
23220 | MAT 1:7 | Ma ne Solomon no mama tane Rihobuam, Rihobuam no mama tane Abaisa, ma ne Abaisa no mama tane Asa. |
23221 | MAT 1:8 | Ma ne Asa no mama tane Iosopat, Iosopat no mama tane Ioram, ma ne Ioram no mama tane Usia. |
23222 | MAT 1:9 | Ma ne Usia no mama tane Iotam, Iotam no mama tane Ahas, ma ne Ahas no mama tane Hesekia. |
23223 | MAT 1:10 | Ma ne Hesekia no mama tane Manase, Manase no mama tane Amon, ma ne Amon no mama tane Iosia. |
23226 | MAT 1:13 | Ma ne Serababel no mama tane Abiut, Abiut no mama tane Eliakim, ma ne Eliakim no mama tane Asor. |
23227 | MAT 1:14 | Ma ne Asor no mama tane Sadok, Sadok no mama tane Akim, ma ne Akim no mama tane Eliut. |
23230 | MAT 1:17 | Io, a sangahul ma ihet na harmur na nilon ta ira turadi mekatika leh tane Abraham tuk ter tane Dawit. Ma a sangahul ma ihet mekatika hone Dawit tuk tano pana bung di ga lamus leh ira Israel utua Babilon be di na lon hoke ra wasire kaia. Ma a sangahul ma ihet bileng mekaia ta ing di ga lon hoke ra wasire tua Babilon tuk ter di ga kaho no Mesaia. |
23253 | MAT 2:15 | Ma duhat ga kis kaia tuk Herot gom mat. Iga ngan hobi ura gilgil haruatne hokike no Watong ga tange tano tangetus horek: “Aiou ga tato leh no natigu tunana me Isip.” |
23256 | MAT 2:18 | “Dait te hadade a ingana tikenong tuma Rama hutate Betlehem. A sunuah ma a tamat na tapunuk. Ira hatatnana na Israel di susuah pane ira nati di, ma i malok be da habil ie, kinong di te mat bakut.” |
23260 | MAT 2:22 | Ma be Iosep ga hadade be Akeleas gate kap leh no mahuo tano nuno mama Herot, be na king ta di ira Iudeia, iga burut be na hana ukaia. Urah, God ga hakatom habaling ie ma tike barbarien, kaie igom hana tano katano Galili. |
23264 | MAT 3:3 | Ma ne Jon no turadi nong no tangetus Aisaia ga iangianga utana horek, “Metuma ra katano bia a ingana tikenong i taato, ‘Tagure no ngas tano Watong, Gil hatakadosne ie ura nuno hinanawat.’” |
23268 | MAT 3:7 | Ma be Jon ga nes a haleng na Parisi ma ra Sadiusi di ga hananawat ukaia ho ie ura kap baptais, iga tange ta di, “A ut na harabota mu! Nesi ga hakatom mu be mu na hilo talur no harpadano nong God i hutate be na ter ie? |
23270 | MAT 3:9 | Io, mu tange be a bulumenamur tane Abraham mu, kaie mu haruat be mu na hilo talur no harpadano tane God. Iesene waak mu lik hobi. Paile tutuno. Paile tamat na linge be mu ira bulumenamur tane Abraham. Aiou hinawase mu be God i petlaar be na hatawat ta bulumenamur tane Abraham ta kakarek ra hot mon. |
23272 | MAT 3:11 | “Io, tikenong na hanawat namur tagu ma i tamat tagu. Aiou paile haruat be ni kap ira pala lamas na kakine. Aiou baptais mu tano taho ura hapuasne be mu te lilik pukus. Aie na baptais mu ma no Halhaaliena Tanuo, ma ra eh bileng. |
23292 | MAT 4:14 | Iga ngan hobi ura hatutuno ira nianga tane God ing no tangetus Aisaia ga tange hokarek, |
23296 | MAT 4:18 | Be ne Jisas ga hanana ra hena no tamat na taho kis Galili iga nes leh airuo ut na kap aen, dur tesne, ne Simon nong di kilam ie be Pita, ma no tesne Andru, dur ga isise tike ubane. |
23302 | MAT 4:24 | Kaie, no hininaawas ura utana gom hana hurbit tano katano bakut Siria. Ma ira matanabar di ga kap hawat ira mangana minaset ukaia hone Jisas. Ari ga ubal di ra tamat na ngunungut, ari sana tanuo ga sasoh ta di, ari ngokngok, ma ari pengpeng. Ma ne Jisas ga halangalanga di. |
23320 | MAT 5:17 | “Paile tahut be mu na lik be iou te hanawat ura kapkap leise ira harkurai tane Moses ma ira harausur ta ira tangetus. Aiou paile hanawat be ni kap leise, sene be iou te hanawat be ni hatutuno di. |
23325 | MAT 5:22 | Iesene iou iat, iou tange ta mu be nesi tikenong i ngalngaluan ter ta tike hinsaana, i tale be da lamus ter ie ra harkurai tano komiti. Ma be nesi tikenong ing na tange ter tano hinsaana be, ‘A ba ugo!’, io, i tale be da lamus ter ie tano harkurai tano kaunsil. Ma nesi tikenong ing na kilam no hinsaana be, ‘A ba hurungo ugo!’ na tale bileng be ina hana ter tano ula eh. |
23364 | MAT 6:13 | Ma mem sip bileng be nu balaure bat mem ta ira harwalar, ma nu kap pukus mem tano Ut na Gil Sana. [Io, a num no kingdom, no dades, ma no minamar hathatikai. Amen.]’ |
23385 | MAT 6:34 | Io, waak mu ngaangel katiak ta ira linge umaran bileng. Ira tirih umaran, mu na waak umaran. A mon tirih iat uta ira bung tiketike. |
23390 | MAT 7:5 | A ut na harababo ugo! Nu kap leise hanalalie baak no poona dahe tano matam iat. Kaie, nuge nanaas timaan ura kapkap leise no not no pet na puputo tano matana no hinsaam. |
23399 | MAT 7:14 | Iesene no ngas tupas no nilon i didisuan, ma no nuno matanangas a hansik ie. A bar nong mon dong ing di nes tupas leh ie. |
23408 | MAT 7:23 | Ma sene ni hinawase hamadares di be, ‘Aiou paile nunure tutuno iat be nesi mu. Mu hana talur iou! A sana turadi mu!’ |
23417 | MAT 8:3 | Io, Jisas ga sasangaho igom sigire no turadi, ma iga tange, “Aiou sip ter. Nu langalanga!” Kaie iat mon no minaset ga pataam tano turadi. |
23421 | MAT 8:7 | Io, Jisas ga tange tana, “Aiou ni hana, nige halangalanga ie.” |
23423 | MAT 8:9 | Aiou tange hobi kinong iou bileng, iou palai be ta nong i kis ter tano kinkinis na harkurai. Ma ina tule ta tikenong be na gil haruatne ira nuno sinisip. Hoke bileng iou. Ari mes di la kure ter iou, ma iou la kure ter di tike matana ubane. Aiou tange ta tikenong, ‘Hana,’ io, ina hana. Aiou tange ta tike mes, ‘Hilo u ra,’ io, ina hanawat. Ma iou tange tano nugu tultule, ‘Gil kin,’ ma ina gil ie.” |
23425 | MAT 8:11 | Aiou tange hapalaine ta mu be a haleng di na hanawat mekaia ta ira katano bakut ma di na kis tano gil nian tikai ma ne Abraham, Aisak, ma ne Iakop tano kingdom tane God. |
23431 | MAT 8:17 | Iga gil hobi ura hatutuno no nianga tano tangetus Aisaia i tange horek, “Aie iat ga kap leh ira nudait minaset, ma iga pusak leh ira nudait ngunngutaan.” |
23441 | MAT 8:27 | Ma ira turadi di ga karup ma di ga hartiritiri ta di horek: “A mangana turadi ho bibiha ikin? No kih ma ira paananoh iat bileng, dur taram ie!” |
23461 | MAT 9:13 | Mu na hana ma mu na silihe tupas no pipilaina ta ikin ra nianga tane God nong di ga pakat ie horek: ‘Iou sip be mu na marse ira turadi. Ma ing be pa mu le gil hobi, iou paile manga sip be mu na hartabar utuma ho iou.’” Ma ne Jisas ga tange baling, “Aiou pai gale hanawat be ni tato mu ing mu lik be a ut na takados mu, iesene di sene ing di palai be di sana.” |
23485 | MAT 9:37 | Io, iga tange ta ira nuno bulu na harausur, “A haleng na nian te matuko, iesene a bar nong mon ira ut na kinkilaan. |
23488 | MAT 10:2 | Ira hinsa dong ra sangahul ma iruo na apostolo karek. No luaina, ne Saimon (nong di la kilkilam ie be Pita) ma no tesne ne Andru; ne Jemes no natine Sebedi, ma no tesne ne Jon; |
23489 | MAT 10:3 | Pilip ma ne Batalomiu; Tomas ma ne Matiu no ut na kap takis; Jemes no natine Alpias, ma ne Tadius; |
23502 | MAT 10:16 | “Mu hadado timaan! Aiou tultule mu hora sipsip ukaia nalamin ta ira tamat na raaia na pep. Io kaie, i tahut be mu na melem hora tarago ma mu na tahut hora bun. |
23515 | MAT 10:29 | A hansik na barbarat mon i haruat be nu kul ta iruo seek. Iesene paile tale be tikenong na puko napu be ing no numu Mama paile haut. |
23520 | MAT 10:34 | “Waak mu lik be iou te hanawat be a malum na kis harbasie ta mu. Pata. Aiou paile hanawat hokike. No nugu hinanawat no burwana ura hinarubu. |
23521 | MAT 10:35 | Aiou te hanawat be ‘no tunana na tur talur no nuno mama, no hinasik bileng, no nuno makai, ma no haine na tur talur no enana. |
23530 | MAT 11:2 | Ma ne Jon no ut na baptais ga kis ra hala na harpadano. Ma be iga hadade uta ira pinapalim tane Krais, Jon ga tule a iruo ta ira nuno bulu na harausur iat be dur na tiri Jisas horek: “Augo nong mem la kiskis kawase ie be na hanawat, be mem na kis kawase baak tike mes?” |
23537 | MAT 11:9 | Sene be ing mu ga hana ura nesnes ie, mu ga palai be mu na nes tike tangetus. I tutuno. Iesene i tamat bileng ta ira tangetus, kinong aie mon, ing di ga pakat ira nianga tane God utana, i tange horek, ‘Aiou ni tule no nugu ut na kap nianga menalalie tano num hinanawat, nong na tagure no num ngas.’ |
23546 | MAT 11:18 | Hokike iat mon pa di gale laro bileng tane Jon. Be Jon ga hanawat, iga hahal ma pai gale mame ta wain. Kaie, di gom tange hagae ie be, ‘A sana tanuo i sasoh tana.’ |
23547 | MAT 11:19 | Ma be Nong a Turadi ie ga hanawat, iga iaiaan ma iga mama wain. Ma di ga tange utana be, ‘A tabi tingana ma a ut na minamo ie. Ma a hinsaana di ra ut na kap takis ma ira mes na sakalepwana.” Io, Jisas ga tange baling be, “Di tange hobi iesene aiou tange be ira tintalen ta ira ut na minminanes di na hamanis be no minanes tane God i takados.” |
23553 | MAT 11:25 | Taitus ikino pana bung Jisas ga tange be, “Aiou pirlet ugo Mama, a Watong tuma ra mawe ma kira bileng napu, kinong u ga sie kakarek ra linge ta dong ira ut na minminanes ma u ga hapuasne ta di ing pa dile minanes. |
23564 | MAT 12:6 | Aiou tange ta mu, tike turadi kira i tamat tano tamat na hala na lotu. |
23565 | MAT 12:7 | No nianga tane God i tange be, ‘Aiou sip be mu na marse ira turadi. Ma ing be pa mu le gil hobi, iou paile manga sip be mu na hartabar utuma ho iou.’ Be mu ira Parisi nage palai tano pipilaina ta ikin ra nianga, pa mu gorle tibe hapenpen di ing pa dile gil tike sasana. |
23568 | MAT 12:10 | Ma tike turadi ga luma mat ga kis ter kaia. Ari di ga kis ter bileng kaia ing di ga sip be di na tung Jisas. Io kaie, di gom tiri ie horek: “I takados be da halangalanga ira ina minaset tano Bung na Sinangeh be pata?” |
23575 | MAT 12:17 | Kike ra linge ga hanawat ura hatutuno no nianga nong God ga tange tano tangetus Aisaia horek: |
23576 | MAT 12:18 | “No nugu tultule ikin, nong iou ga gilamis ie. Aiou manga sip ie ma iou laro utana. Aiou ni bul no tanuagu tana, ma ina harpir tano nugu taktakados na lilik ta ira huntunana bakut tano ula hanuo. |
23580 | MAT 12:22 | Ma di ga lamus hawat tike tunana ukaia hone Jisas. A pulo ie ma a ngulo bileng ie kinong a sana tanuo gate sasoh tana. Ma ne Jisas ga halangalanga ie, kaie igom ianga ma iga nanaas baling. |
23591 | MAT 12:33 | “Ira tintalen ta ira turadi i ngan mon hora dahe. Airuo mangana dahe mon. Nong i bilai i huei ira bilai na puspusno, ma nong i sana i huei ira sana puspusno. Io kaie, da nes kilam ira dahe ta ira hunuei idi. |
23602 | MAT 12:44 | Io, i lik horek: ‘Aiou ni tapukus baling ter tano ngasiagu.’ Ma be i hanawat ukaia, i nes be pata tari kaia ma i taguro ter be na lala baling. |
23606 | MAT 12:48 | Ma ne Jisas balik ga balu ie, “Aiou ni hinawase mu be nesi no nugu makai ma ira tasigu.” |
23613 | MAT 13:5 | Ari patna bileng ga puko ter ra ula hothot ing paile haleng ira pu kaia. Di ga kubur haiah kinong pai gale haleng ira pu. |
23615 | MAT 13:7 | Ari patna bileng ga puko ter nalamin ta ira kuikui kaie igom lul burung di. |
23616 | MAT 13:8 | Ari patna bileng ga puko ter ta ira bilai na pu. Di ga tamat ma di ga huei. Ari ga huei aititul a sangahul na patna, ari limliman ma tike na sangahul na patna, ma ari maarmaar. |
23619 | MAT 13:11 | Io, iga balu di, “Aiou te hapuasne ta mu utano kingdom tane God. Iga susuhai nalalie, sene iou te hapuasne um ie ta mu. Iesene aiou paile hapuasne ta di ira mes. |
23621 | MAT 13:13 | Aiou ianga ma di ma ra nianga harharuat kinong di nesnes, sene be pa dile nes kilam. Ma di hadade, sene be pa dile hadade kilam. |
23622 | MAT 13:14 | Io, kaie di hatutuno no nianga tano tangetus Aisaia i tange horek, ‘Mu na hadade, sene be pa mu nale hadade kilam; Mu na nesnes, sene be pa mu nale nes kilam. |
23625 | MAT 13:17 | Io, mu hadado baak! A haleng na tangetus ma a haleng na ut na takados bileng, di ga manga sip be di na nes kakarek mu te nes. Iesene pa di gale nes. Ma di ga manga sip bileng be di na hadade karek mu te hadade. Iesene pa di gale hadade. |
23630 | MAT 13:22 | Ma tike mes na turadi na ngan hokike ga puko ter nalamin ta ira kuikui. Aie nong i hadade ira nianga, iesene i ngaangel uta ikin ra nilon ma i manga sip ra kinkinis na watong. Karek ra linge na burung no hininaawas ma pai nale tahuat timaan. |
23640 | MAT 13:32 | A tutuno be i hansik ta ira pat na dahe bakut, iesene namur be ing ite kubur i tamat ta ira humangana dahe na nian dait la sooso. Kaie, ira mon di hanawat, di gil ira nudi pawas ta ira singarna.” |
23643 | MAT 13:35 | Ikin ga hatutuno no nianga no tangetus ga tange horek, “Aiou ni ianga ta di ma ra nianga harharuat, ma iou ni hinawase di ta ira linge ga susuhai ter metua leh tano hakhakisi tano ula hanuo.” |
23663 | MAT 13:55 | Aie mon no natine no ut na pakila hala. Ma no nuno makai, ne Maria. Ma ira tesne, ne Jemes, Iosep, Simon, ma ne Iudas. |
23674 | MAT 14:8 | Ma no nuno makai, Herodies, ga sip be da ubu bing Jon, kaie igom pir ter no nuno hinasik be na saring no ulu ne Jon. Io, no bulahine ga tange tane Herot no king be, “Aiou sip be nu ter tagu no ulune Jon no ut na baptais naramon tike pelet!” |
23683 | MAT 14:17 | Ma di ga balu ie, “A liman na katano beret ma airuo aen mon karek.” |
23692 | MAT 14:26 | Be ira nuno bulu na harausur di ga nes ie ga hanana tano ula taho di ga manga burut, di gom tangtange be, “A tanuo ie!” Ma di ga kup na bunurut. |
23693 | MAT 14:27 | Iesene kaie iat mon Jisas ga habalaraan di ma iga tange, “Aiou mon! Waak mu ra bunurut!” |
23699 | MAT 14:33 | Ma di bakut kaia tano mon, di ga lotu tupas ie, di gom tange be, “Augo tutuno iat mon no Natine God!” |
23706 | MAT 15:4 | Aiou te tange hobi ta mu kinong God ga tange be, ‘Ru no num mama ma no num makai’ ma ‘Nesi i ianga hagae no nuno mama be no nuno makai, mu na ubu bing ie.’ |
23707 | MAT 15:5 | Iesene mu la tangtange be tike turadi a nuno mon linge i tale be na harahut no nuno mama ma no nuno makai me, i tale bileng be na tange horek: ‘Aiou te ter ikin ukaia hone God. Paile tale be ni ter ie tam ura harahut ugo.’ |
23709 | MAT 15:7 | A ut na harababo mu! No tangetus Aisaia ga tange ra tutuno uta mu horek be iga pakat ikin ra nianga tane God. Ma ne God ga tange be, |
23712 | MAT 15:10 | Ma ne Jisas ga tato hulungan no tamat na matanabar, igom tange ta di, “Mu hadado! Aiou sip be mu na palai! |
23724 | MAT 15:22 | Ma tike haine mekaia ta ikino katano, tano huno me Kena, ma paile Iudeia ie, iga hanawat ter tane Jisas. Io, iga hanawat, igom kakongane horek: “No Watong, no tubune Dawit, nu marse iou! A sana tanuo te sasoh tano nugu hinasik ma i manga hagae ie.” |
23730 | MAT 15:28 | Io, Jisas ga balu ie be, “Augo tike haine i manga tamat no num nurnur. Nu hatur kawase hoke u te saring.” Io, ta ikino pana bung iat mon no nuno hinasik ga langalanga muk. |
23734 | MAT 15:32 | Io, Jisas ga tato leh ira nuno bulu na harausur, igom tange ta di, “Aiou manga marmaris uta ikin ra matanabar. Di te kis tikai ma iou aitul a bung ma pata um adi ta nian. Aiou paile sip be ni tule ise di ma di taburungan ter. Di nahula mat kalo ura adi tari na ngas. |
23735 | MAT 15:33 | Ma ira nuno bulu na harausur di ga tange balik tana be, “Pa dait le tale be dait na silihe leh ta nian i haruat ma ikin ra tamat na matanabar sakit. A hurlamin kakarek.” |
23736 | MAT 15:34 | Ma ne Jisas ga tiri di be, “Aise katano beret kike ho mu?” Di ga balu ie, “A liman ma iruo na katano ma a bar hana not no aen.” |
23743 | MAT 16:2 | Ma ne Jisas ga tange balik ta di horek: “Be ite matmatarahien, ma a bilai na melsur, mu tange horek be, ‘A bilai na bung maran.’ |
23749 | MAT 16:8 | Io, Jisas ga nunure kilam ira linge di ga tangtange, kaie, igom tange ta di be, “Paile tur dades ira numu nurnur. Aiou tapunuk be mu tange harbasiane ta mu be pata ta beret. |
23750 | MAT 16:9 | Pa mu le palai iat baak? Hohaam be mu te luban ira liman na katano beret ing iga haruat ma liman na arip na matanabar? Aise ira kalot na subana nian mu ga hahung? |
23751 | MAT 16:10 | Ma mu te luban bileng ira liman ma iruo na katano beret ing iga haruat ma aihet na arip na matanabar? Aise ira kalot na subana nian baling mu ga hahung? |
23755 | MAT 16:14 | Di ga tange, “Ari di tange be Jon no ut na baptais, ari be tikenong ta ira tangetus, Elaija dak, be Ieremia, be ta tikenong ta ira mes na tangetus.” |
23757 | MAT 16:16 | Pita ga balu ie ma iga tange, “Augo no Mesaia, no Natine no lilona God.” |
23760 | MAT 16:19 | Aiou ni ter tam ira dades tano kingdom tane God. Aso ing u tigel kira napu, God iat gate hadades ter tuma ra mawe. Ma aso ing u haut ine kira napu, God gate hadades ter bileng tuma ra mawe.” |