23233	MAT 1:20	ሃይሳ ኢዚ ቆፒሺን ፆሳ ኪታንቻይ ኣጉሞራ ኢዛስ ቆንጪዲ “ዳዉቴ ና ዮሴፌ! ኔ ጊጊሲዳ ማራማ ቃንꬃቲዳይ ፂሎ ኣያናን ጊዲዳ ጊሽ ኢዞ ኔሶ ኤፋናስ ባቦፋ።
23234	MAT 1:21	ኢዛ ኣቱማ ና ዬላና፤ ኢዚ ኣሳ ናጋራፔ ኣሻናዴ ጊዲዳ ጊሽ ኢዛ ሱንꬅ ኔ ‘ዬሱሳ’ ጋ ሱንꬃና” ጊዴስ።
23235	MAT 1:22	ጎዳይ ናቤ ኢሳያሳ ዱናን “ሄኮ! ጌላዖይ ቃንꬃታና፤ ኣቱማ ናካ ዬላና፤ ናዛ ሱንꬃይካ ኣማኑዔላ ጌቴታና፤ ሄሳ ቢርሼꬂካ ‘ፆሲ ኑናራ ዴስ’ ጌቴቲዲ ፃፌቲዳይሲ ፖሌታና ማላ ሃይሲ ዉሪካ ሃኒዴስ” ጊዴስ።
23238	MAT 1:25	ጊዶ ኣቲን ባዳ ኢዛ ኮይሮ ናዛ ዬላና ጋካናስ ኢዞ ኤኪቤና። ዬሌቲዳ ጉꬃ ናዛ ሱንꬃ “ዬሱሳ” ጊዴስ።
23240	MAT 2:2	“ዬሌቲዳ ኣይሁዳ ካዎይ ኣዋን ዲዜ? ኣዋ ኣርሼይ ሞኪዛ ባጋራ ኢዛ ፆሊንቴዛ ቤዪዲ ኢዛስ ጎይናና ዪዶስ” ጊዲ ኦይቺዳ።
23242	MAT 2:4	ኢዚካ ቄሴታ ሃላቃታኔ ዎጋ ታማርሲዛይታ ኡባ ሺሺዲ “ኪርስቶሲ ኣዋን ዬሌታኔ?” ጊዲ ኦይቺዴስ።
23243	MAT 2:5	ኢስቲካ ኢዛስ “ናቤይ ‘ዩሁዳ ቢታን ዲዛሬ ሃኔ ቤቴሌሜ! ታ ዴሬ ኢስራዔሌ ናጊዛዴይ ኔፔ ኬዛና ጊሽ ሃንኮ ዩሁዳ ሃሪዛይታፔ ኣዛንካ ጉፃካ’ ጊዲ ፃፊዳ ጊሽ ኢዚ ቤቴሌሜ ዩሁዳን ዬሌታና” ጊዲ ዮቲዳ።
23246	MAT 2:8	ኤራንቻታ ቤቴሌሜ ዬዲዲ “ቢዲ ጉꬃ ናዛ ኮዪቴ፥ ታካ ባዳ ኢዛስ ጎይናና ማላ ዴሚዳ ማላ ሃ ታኮ ሲሚዲ ኢዚ ኣዋን ዲዛኮን ታስ ዮቲቴ” ጊዴስ።
23251	MAT 2:13	ኤራንቻቲ ቢዳፔ ጉዬ ጎዳ ኪታንቻይ ዮሴፌስ ኣጉሞራ ቤቲዲ “ሄርዶሲ ጉꬃ ናዛ ዎꬋና ኮዪዛ ጊሽ ኔ ሲማና ዎዴ ታ ኔና ኤሪሳና ጋካናስ ዴንዳዳ ጉꬃ ናዛ ኣዬይራ ኤካዳ ዱጌ ጊብፄ ቢታ ባቃታዳ ሄን ዳሻ” ጊዴስ።
23253	MAT 2:15	ሄርዶሲ ሃይቃና ጋካናስ ሄን ዴዒዴስ። ሄሳንካ “ታ ናዛ ታ ጊብፄ ቢታፌ ፄይጋዲስ” ጊዲ ጎዳይ ካሴ ናቤ ዱናን ሃሳዪዳይሲ ፖሌቲዴስ።
23255	MAT 2:17	ሄሳን “ዬሆይኔ ጊታ ዋሶ ጊሪሳይ ኤራማን ሲዬቲዴስ፤ ኢራዔላ ባ ናይታስ ዬካዱስ፤ ናይቲ ዉሪ ዉሪዳ ጊሽ ሚናናስ ዳንዳዮንታ ኢፃዱስ” ጌቴቲዲ ናቤ ኤርማሳን ዮቴቲዳይስ ፖሌቲዴስ።
23258	MAT 2:20	“ዴንዳዳ ጉꬃ ናዛኔ ኢዛ ኣዪዮ ኤካዳ ኢስራዔሌ ቢታ ሲማ፤ ናዛ ዎꬋና ኮዪዛይቲ ሃይቂዳ” ጊዴስ።
23261	MAT 2:23	ናዚሬቴ ጌቴቲዛ ካታማዮ ቢዲ ሄን ዱስ ኦይኪዴስ። ሄሳንካ ካሴ ናቤታን “ናዚሬቴ ኣስ ጌቴታና” ጌቴቲዲ ካሴቲዲ ሲንꬃፌስ ሃሳዬቲዳይሲ ኩሚዴስ።
23262	MAT 3:1	ሄ ዎዴ ፃማቂዛ ዮሃኒሲ ኣሳስ “ሳሎ ካዎቴꬂ ማቲዳ ጊሽ ኢንቴ ናጋራፔ ሲሚቴ” ጊ ሳባኪሼ ዩሁዳ ባዞራ ዪዴስ።
23264	MAT 3:3	“ጎዳ ኦጌ ኦꬂቴ፥ ዎጋ ኦጌዛካ ሎዔꬂቴ ጊሼ ባዞ ቢታን ዋሲዛ ቃላ” ጌቴቲዲ ካሴ ናቤ ኢሳያሳን ዮቴቲዳይሲ ዮሃኒሳ ጊሻሳ።
23268	MAT 3:7	ዳሮ ፋርሳዌቲኔ ሳዱቃዌቲ ኢዚ ፃማቂዛሶ ዪሺን ቤዪዲ ዮሃኒሲ “ኢንቴኖ ሾሻቶ! ኢንቴ ሲንꬃራ ዲዛ ሃንቆፌ ኣታና ማላ ኢንቴና ኦኒ ቤሲዴ?
23270	MAT 3:9	‘ኑ ኣዋይ ኣብራሃሜይ ኑስ ዴስ’ ጊዛይሳን ኢንቴርካ ኢንቴና ባሌꬆፍቴ፤ ታ ኢንቴስ ፆሲ ሃይታ ሹቻታፔ ኣብራሃሜስ ና ኦꬂ ዴንꬃናስ ዳንዳዬስ ጋይስ።
23273	MAT 3:12	ካꬅ ሱራጊዛ ፒꬃይ ኢዛ ኩሼን ዴስ፤ ኢዚካ ባ ካꬃ ባሌዛ ፒቲ ጌሻና፤ ባ ጊስቴዛካ ካꬃ ዲዔን ቆላና፤ ሃፓ ጊዲኮ ቶዖንታ ታማን ፁጋና” ጊዴስ።
23275	MAT 3:14	ጊዶ ኣቲን ዮሃኒሲ “ሃይሲ ሃኔና፤ ታኒ ኔናን ፃማቄታና ቤሲሺን ኔኒ ዋናዳ ታኮ ያይ?” ጊዲ ኢዛራ ማርሼቲዴስ።
23276	MAT 3:15	ዬሱሲካ “ኣይኮይ ባዋ፥ ኤሮ ጋርኪ? ሃይሳ ኦꬂዲ ኑኒ ፂሎቴꬅ ኡባ ፖላናስ ኑስ ቤሴስ” ጊዴስ። ዮሃንሲካ ኢዛ ቆፋ ኤሮ ጊ ኤኪዴስ።
23278	MAT 3:17	ሳሎፔካ “ታኒ ኢዛን ኡፋዬቲዛ ናዚኔ ታ ሲቂዛ ታ ናዚ ሃይሳ” ጊዛ ቃላይ ሲዬቲዴስ።
23281	MAT 4:3	ፓጪዛይሲ ዬሱሳኮ ሺቂዲ “ኔ ፆሳ ና ጊዲኮ ኣኔ ሃይታ ሹቻታ ኡኬꬅ ጊዳና ማላ ኣዛዛ” ጊዴስ።
23282	MAT 4:4	ዬሱሲካ “ ‘ኣሲ ፆሳ ዱናፔ ኬዚዛ ቃላንፔ ኣቲን ካꬃን ፃላ ዴና’ ጌቴቲ ፃፌቲዴስ” ጊዲ ኢዛስ ዛሪዴስ።
23284	MAT 4:6	“ኔ ፆሳ ና ጊዲኮ ኣኔ ሃይሳፌ ዱጌ ጉፓ፤ ኣይሲ ጊኮ ‘ኔ ቶሆይ ሹቻን ꬉጴቶንታ ማላ ኪታንቻቲ ባ ኩሼራ ኔና ኦይኪ ዴንꬃና ማላ ኔ ጊሽ ፆሲ ባ ኪታንቻ ኪታና’ ጌቴቲ ፃፌቲዴስ” ጊዴስ።
23285	MAT 4:7	ዬሱሲካ “ጌሻ ማፃፋን ‘ኔ ጎዳ ፆሳ ፓጮፋ’ ጌቴቲ ፃፌቲዴስ” ጊዲ ዛሪዴስ።
23287	MAT 4:9	“ኔ ኩንዳዳ ታስ ጎይኒኮ ሃይሳ ኡባ ታ ኔስ ኢማና” ጊዴስ።
23288	MAT 4:10	ዬሱሲ “ሃይሶ ፃላዔ! ታ ሲንꬃፌ ሃካ! ‘ኔኒ ኔ ጎዳስ ፆሳስ ጎይና፤ ኢዛስ ፃላላ ኣዛዜታ’ ጌቴቲ ጌሻ ማፃፋን ፃፌቲዴስ” ጊዴስ።
23292	MAT 4:14	“ሄሳን ዛቢሎኔኒኔ ኒፍታሌሜ ቢታን፥ ዮርዳኖሴፔ ሄ ፒንꬃን ኣባ ላንቄራ ኤፊዛ ኦጌ ማታን ዲዛ ኣይዛቤ ጊዲዳ ጋሊላ ዴሬ ኣሳይ፥ ꬉማን ዲዛ ዴሬይ ዎልቃማ ፖዖ ቤዪዴስ። ሃይቆ ኩዋ ጊዶን ዲዛ ዴሬስ ፖዖይ ፖዒዴስ” ጌቴቲዲ ናቤ ኢሳያሳ ዱናን ካሴቲዲ ሃሳዬቲዳይሲ ፖሌቲዴስ።
23295	MAT 4:17	ዬሱሲ ሄ ዎዴፔ ሃ ሲሚን “ሳሎ ካዎቴꬂ ማቲዴስ፥ ማሮታ ጌሊቴ” ጊዲ ሳባኮ ኦይኪዴስ።
23297	MAT 4:19	ዬሱሲ ኢስታ “ሃ ዪቴ! ታና ካሊቴ! ታ ኢንቴና ኣስ ኦይኪዛ ኣስ ኬሳና” ጊዴስ።
23306	MAT 5:3	“ኣያናን ባና ካዉሺዛይቲ ኣንጄቲዳይታ፤ ኣይሲ ጊኮ ሳሎ ካዎቴꬅ ኢስታሳ።
23314	MAT 5:11	“ታ ጌዶን ኣሳይ ኢንቴና ጫዪኮ፥ ጎዲኮኔ ኢታ ዮዖ ዎርዶራ ኢንቴ ቦላ ሃሳዪኮ ኢንቴ ኣንጄቲዳይታ።
23316	MAT 5:13	“ኢንቴ ሃ ቢታ ኣሳስ ማፂኔ ማላ። ማፂኔይ ባ ማልዖቴꬃ ዬዲዛ ጊዲኮ ጌዴ ካሬ ዬጌቲዲ ዬꬌቴꬃፌ ኣቲን፥ ዛሪዲ ዴማናስ ዳንዳዪዜ?
23320	MAT 5:17	“ታኒ ሙሴ ዎጋኔ ናቤታ ቃላ ሻራና ዪዳ ኢንቴስ ሚሳቶፖ፤ ፖላናስ ያዲስ ኣቲን ሻራናስ ያቤኬ።
23324	MAT 5:21	“ካሴ ኣሳታስ ‘ዎꬎፓ፤ ዎꬊዳዴ ቦላ ፒርዴታና’ ጌቴቲዳይሳ ኢንቴ ሲዪዴታ።
23325	MAT 5:22	ታ ቃሴ ኢንቴስ ጊዛይ ባ ኢሻ ቦላ ኦጌይ ባይንዳ ሃንቄቲዛዴ ቦላ ፒርዴታና፤ ኦኒካ ባ ኢሻ ‘ናፓይ’ ጊዛዴይ ዱላታ ሲንꬃን ኦይሼታና። ‘ኤያይ’ ጊዛዴ ጋናሜ ታማ ፒርዳይ ናጌስ።
23328	MAT 5:25	“ኔና ሞቲዳ ኔ ሞርኬይ ኔ ቦላ ፒርዲሶንታ ማላ፥ ፒርዲዛ ዳናይ ቃቺዛይሳስ ኔና ኣꬂ ኢሞንታ ማላ፥ ቃሾ ኬꬃን ኔ ዎꬎንታ ማላ ቡሮ ኦጌ ቦላ ዳሼ ኔ ሞርኬራ ኤሌላ ጊጋይቻ።
23330	MAT 5:27	“ ‘ላይማቶፓ’ ጊዛይሳ ኢንቴ ሲዪዴታ።
23334	MAT 5:31	“ ‘ማቾ ኣንጂ ዬዲዛዴይ ፒርማ ዋራቃታ ኢዚስ ኢማና ቤሴስ’ ጌቴቲዴስ።
23336	MAT 5:33	“ካሴ ኣሳታስ ‘ዎርዶ ጫቆፋ፤ ፆሳ ሲንꬃን ኔ ጫቂዳይሳ ናጋ’ ጌቴቲዳይሳ ኢንቴ ሲዪዴታ።
23340	MAT 5:37	ሄሳ ጊሽ ኢንቴ ኢንቴ ጊዶን ሃሳዬቲሺን ኢንቴ ሃሳያይ “ኤ” ጋናዝ ጊዲኮ “ኤ” ጊቴ “ኣካይ” ጋናዝ ጊዲኮ “ኣካይ” ጊቴ፤ ሄሳፌ ካሬ ጊዲዳይ ዉሪ ኢታ ኣሳፔ ዪዛዛ።
23341	MAT 5:38	“ ‘ኣይፌ ጊሻስ ኣይፌ ኣቻ ጊሻስ ኣቻ’ ጌቴቲዳይሳ ኢንቴ ሲዪዴታ።
23346	MAT 5:43	“ ‘ኔ ላጌ ሲቃ፤ ኔ ሞርኬ ኢፃ’ ጌቴቲዳይሳ ሲዪዴታ።
23352	MAT 6:1	“ኣሲ ኢንቴና ቤያና ማላ ኣሳ ሲንꬃን ሎዖ ኦꬆንታ ማላ ናጌቲቴ፤ ሄሳꬆ ኦꬂኮ ኢንቴ ሳሎ ኣዋፔ ጎዓ ዴሜኬታ።
23356	MAT 6:5	“ኢንቴ ዎሲሼ ቆꬌፔ ቆሞን ሃኒዛይታ ማላ ሃኖፒቴ፤ ኢስቲ ኣሲ ቤያና ማላ ኣይሁዳ ዎሳ ኬꬃታኒኔ ኦይዱ ኦጌ ቦላ ኤቂዲ ዎሳናስ ዶሴቴስ። ታ ኢንቴስ ቱሙ ጋይስ፤ ኢስቲ ኩሜꬃ ዋጋ ኤኪቺዳ።
23358	MAT 6:7	“ኣማኖንታ ኣሳይ ኢሲ ቃላ ዛሪ ዛሪ ዎሲኮ ኢስታስ ሲዬቲዛ ሚሳቲን ኢስቲ ዛሪ ዛሪ ጊዛይሳꬆ ኢንቴካ ዎሲሼ ኢሲ ቃላ ዛሪ ዛሪ ጎፒቴ።
23360	MAT 6:9	ኢንቴ ዎሲሼ ‘ሳሎን ዲዛ ኑ ኣዋዉ! ኔ ሱንꬂ ኣንጄቶ።
23364	MAT 6:13	ኢታፔ ኑና ኣሻ ኣቲን ኑና ፓጬን ጌልꬆፋ፤ ቦንቾይ ሜርፔ ሜርና ጋካናስ ኔይሳ። ኣሚን’ ጊ ዎሲቴ።
23365	MAT 6:14	“ኢንቴ ኢንቴና ቆሂዳይታስ ኣቶ ጊኮ ኢንቴ ሳሎ ኣዋይ ኢንቴስ ኣቶ ጋና።
23367	MAT 6:16	“ኢንቴ ፆማ ፆሚሼ ቆꬌፔ ቆሞራ ፆሚዛይታꬆ ሹሎፍቴ። ኢስቲ ባ ፆሚዛይሳ ኣሲ ኤራና ማላ ባ ኣይፌሶ ኢሴቴስ። ታ ቱሙ ጋይስ፤ ሄሳꬆ ኦꬂዛይቲ ባ ዋጋ ኩሜꬅ ኤኪቺዳ።
23370	MAT 6:19	“ቢላይ ሚዛሶን ቡቂዲኔ ሺይዲ ሞሬቲዛሶን ካይሶይ ቦኪዲ ካይሳናስ ዳንዳዪዛሶን፥ ሃ ቢታ ቦላ ኢንቴስ ሚሼ ሺሾፍቴ።
23373	MAT 6:22	“ኣይፌይ ኣሳቴꬃስ ፖዖ፤ ሄሳ ጊሽ ኔ ኣይፌይ ፓፃ ጊዲኮ፥ ኔ ኩሜꬃ ኣሳቴꬃይካ ፖዖ ጊዳና።
23375	MAT 6:24	“ኢሲ ኣሲ ናምዑ ጎዳስ ኦꬃና ዳንዳዬና። ኢሳ ኢፂዲ ናምዓንꬆዛ ዶሳና፤ ዎይኮ ኢሳ ቦንቺዲ ናምዓንꬃ ሌቃና፤ ፆሳሲኔ ሚሻስ ናምዓታስ ጋꬂ ኦꬃናስ ዳንዳዬቴና።
23376	MAT 6:25	“ሄሳ ጊሽ ታ ኢንቴና ኢንቴ ዱሳ ጊሽ ኣይ ሚኖ? ኣይ ኡዪኖ? ኣይ ማይዒኖ? ጊዲ ሂርጎፍቴ ጋይስ። ሼምፖይ ቁማፔ፥ ኣሾይ ማይዖፔ ኣꬌኔ?
23379	MAT 6:28	“ቃሴ ማይዖ ጊሽ ኣዛስ ሂርጌቲ? ኣኔ ጮ ዴንባን ዲዛ ጪሻታ ፄሊቴ፤ ዳቡሬቴና ዎይኮ ሱቄቴና።
23386	MAT 7:1	“ኢንቴ ቦላ ፒርዴቶንታ ማላ ሃራ ኣሳ ቦላ ፒርዶፍቴ።
23389	MAT 7:4	ኔ ኣይፌን ጊታ ሚꬂ ዲሺን ኔ ኢሻ ‘ኣኔ ታ ኔ ኣይፌፔ ቄሪ ቡራዮ ኬሳይስ’ ጋናስ ዋና ዳንዳያይ?
23392	MAT 7:7	“ዎሲቴ ኢንቴስ ኢሜታና፤ ኮዪቴ ኢንቴ ዴማና፤ ካሬ ቆፂቴ ኢንቴስ ዶዬታና።
23398	MAT 7:13	“ፁንꬃ ፔንጌራ ጌሊቴ፤ ꬋዮሶ ኤፊዛ ኦጌይ ጊታ፤ ፔንጌይካ ኣሆ፤ ዳሮ ኣሳይ ሄ ፔንጌዛራ ጌሌስ።
23400	MAT 7:15	“ኢስታስ ጊዶ ባጋይ ካና ሱይቴ ማላ ጊዲ ኡቲዲኔ ዶርሳ ኢቴ ማይዒዲ ኢንቴ ጊዶ ጌሊዲ ጊዶራ ኦꬂዛ ዎርዶ ናቤታፔ ናጌቲቴ።
23406	MAT 7:21	“ሳሎን ዲዛ ታ ኣዋ ሼኔ ፖሎንታ ዲሼ ታና ‘ጎዶ! ጎዶ!’ ጊዛይ ዉሪ ሳሎ ካዎቴꬅ ጌሌና።
23407	MAT 7:22	ሄ ጋላስ ዳሮቲ ‘ጎዶ! ጎዶ! ኑኒ ኔ ሱንꬃን ቲንቢቴ ዮቲቤኮኒ? ኔ ሱንꬃን ዳይዳንꬂ ኬሲቤኮኒ? ኔ ሱንꬃን ዳሮ ማላታ ኦꬂቤኮኒ?’ ጋና።
23408	MAT 7:23	ሄ ዎዴ ታ ኢስታስ ‘ታ ኢንቴና ሙሌካ ኤሪኬ! ኢንቴ ኢታቲ ታፔ ሃኪቴ’ ጋዳ ቆንጬራ ታ ኢስታስ ዮታና።
23409	MAT 7:24	“ሂስቲኮ ሃይሳ ታ ቃላ ሲይዲ ኦሶን ፔይሺዛዴይ ባ ኬꬄ ዛላ ቦላ ኬፂዛዴ ሚሳቴስ።
23411	MAT 7:26	“ሃይሳ ታ ቃላ ሲይዲ ኦꬆንታዴይ ጊዲኮ ባ ኬꬄ ኣጬ ቦላ ኬፂዳ ኤያ ኣሳ ማላ።
23412	MAT 7:27	ዴፆ ኢራይ ቡኪን ሃሮይካ ሃሮቲዴስ፤ ጫርኮይካ ጫርኪዴስ፤ ሄ ኬꬃካ ሱጊዴስ፤ ኬꬃይካ ኢታ ኩንዴꬅ ኩንዲዴስ” ጊዴስ።
23416	MAT 8:2	ኢሲ ኢንቺራቻ ሃርጌይ ዲዛዴይ ዬሱሳኮ ሺቂዲ ኢዛ ሲንꬃን ጉልባቲዲ “ጎዶ! ኔ ኮይኮ ታና ፓꬃናስ ዳንዳያሳ” ጊዴስ
23417	MAT 8:3	ዬሱሲ ባ ኩሼ ዬዲዲ “ታ ዶሳዲስ፤ ፓፃ!” ጊን ኣዴዚ ሄ ሃርጌዛፔ ሄራካ ፓፂዴስ።
23418	MAT 8:4	ቃሴካ ዬሱሲ ኣዴዛ “ኔ ፓፂዳይሳ ኦናስካ ዮቶፓ፤ ጊዶ ኣቲን ባዳ ኔና ቄሴስ ቤሳ። ኢስቲ ኣዛዚዳ ያርሾዛ ጋꬃ፤ ሄሲካ ኢስታስ ማርካ ጊዳና” ጊዴስ።
23420	MAT 8:6	“ጎዶ! ታ ኣሽካራይ ኬሂ ሳኬቲዲ ኬꬃን ኢቺዲ ዴስ” ጊዴስ።
23421	MAT 8:7	ዬሱሲካ ኢዛስ “ታ ባዳ ፓꬃና” ጊዴስ።
23422	MAT 8:8	ማቶ ሃላቃይ ኢዛስ ዛሪዲ “ታ ኔና ታ ኬꬄ ጌልꬃናስ ቤሲዛዴ ጊዲኬ፤ ጊዶ ኣቲን ኔ ሃን ዳዳ ኢሲ ቃላ ፃላ ጊኮ ታ ኣሽካራይ ፓፃና።
23423	MAT 8:9	ታስካ ታና ኣዛዚዛ ሃላቃቲ ታፔ ቦላራ ዴቴስ፤ ቃሴካ ታስ ኣዛዜቲዛ ዎታዳራቲ ታፔ ጋርሳራ ዴቴስ፤ ኢስታፌ ኢሳ ‘ባ!’ ጊኮ ቤስ፤ ቃሴ ኢሳ ‘ሃያ!’ ጊኮ ዬስ፤ ታ ኣሽካራ ‘ሄሳ ኦꬃ!’ ጊኮ ኦꬄስ” ጊዴስ።
23424	MAT 8:10	ዬሱሲ ኢዛ ዛሮዛን ማላሌቲዲ ባና ካሊዛይታስ “ታ ኢንቴስ ቱሙ ጋይስ፤ ሃራይ ኣቶሺን ኢስራዔሌታ ጊዶን ሃይሳ ማላ ኣማኖይ ዲዛዴ ኢሳዴካ ዴማቤኬ።
23426	MAT 8:12	ሳሎ ካዎቴꬂ ኢስታስ ጊዳና ቤሲዛ ኣሳቲ ሄን ካሬ ꬉማን ዬጌታና። ሄንካ ዬሆይኔ ኣቻ ጋርጬች ጊዳና” ጊዴስ።
23427	MAT 8:13	ዬሱሲካ ማቶ ሃላቃስ “ኔ ባ ኔ ኣማኖ ማላ ኔስ ሃኖ” ጊዴስ፤ ኣሽካራዚ ሄራካ ፓፂዴስ።
23431	MAT 8:17	ኢሳያሲ “ኢዚ ኑ ሃርጌ ኤኪዴስ፤ ኑ ሳኮካ ቶኪዴስ” ጊዳ ቃላይ ሃይሳን ፖሌቲዴስ።
23433	MAT 8:19	ሄሳ ዎዴ ኢሲ ኣይሁዳ ኣማኖ ታማርሲዛዴይ ኢዛኮ ሺቂዲ “ኣስታማሬ! ኔ ቢዛሶ ኣዋካ ታ ኔና ካላና” ጊዴስ።
23434	MAT 8:20	ዬሱሲካ ኢዛስ ዛሪዲ “ዎርካናታስ ኦላይ ዴስ፤ ሳሎ ካፎታስ ኬꬂ ዴስ፤ ታስ ኣሳ ናስ ጊዲኮ ሁዔ ጌልꬂዛሶይ ባዋ” ጊዴስ።
23435	MAT 8:21	ኢዛ ካሊዛ ኢሲ ሃራ ኣሲ ቃሴ “ጎዶ! ኮይሮ ባዳ ታ ኣዋ ሞጎ?” ጊዴስ።
23436	MAT 8:22	ኢዚ ቃሴ “ሃይቂዳይቲ ባ ሃይቄꬅ ሞጌቶ፤ ኔኒ ጊዲኮ ታና ካላ” ጊዴስ።
23439	MAT 8:25	ኢዛ ካሊዛይቲ ኢዛ ቤጎꬂዲ “ጎዶ! ኑ ꬋዮስ፤ ኑና ኣሻ!” ጊዳ።
23440	MAT 8:26	ዬሱሲካ ኢስታ “ኢንቴኖ ኣማኖይ ፓጪዳይቶ! ኣዛስ ሃይሳ ማላ ባቤቲ?” ጊዴስ። ሄሳፌ ዴንዲዲ ጫርኮዛኔ ኣባ ዳምባላ ኢዚ ሃንቂን ሄራካ ሲርጵ ጊዴስ።
23441	MAT 8:27	ኢስቲካ “ሃይሲ ኣባይኔ ጫርኮይካ ኢዛስ ኣዛዜቲዛዴይ ኢዚ ዋኒዳዴ?” ጊዲ ማላሌቲዳ።
23443	MAT 8:29	ኢስቲካ “ፆሳ ናዉ! ኔስ ኑናራ ኣዛ ኢሲፌቴꬅ ዲዜ? ኑ ዎዴይ ጋኮንታ ዲሺን ኑና ፁጋና ያዲ?” ጊዲ ዋሲዳ።
23445	MAT 8:31	ዳይዳንꬃቲ ዬሱሳ “ኔ ኑና ኬሳና ጊዲኮ ሃይታን ዳሮ ጉዱንꬃታን ኑ ጌላና ማላ ኑስ ፒቃዴ ኢማ” ጊዲ ዎሲዳ።
23446	MAT 8:32	ዬሱሲካ ኢስታ “ቢቴ!” ጊዴስ። ዳይዳንꬃቲካ ኢስታፌ ኬዚዲ ጉዱንꬃታን ጌሊዳ። ጉዱንꬃቲ ዉሪካ ባ ዲዛሶ ኣፎራ ቢቻርሼ ኣባን ጌሊዲ ሃꬃን ሚቴቲዲ ሃይቂዳ።
23450	MAT 9:2	ሄን ኢሲ ጉንዳ ኣዴዛ፥ ኣሳይ ሃላራ ቶኪዲ ዬሱሳኮ ኤሂዴስ። ዬሱሲካ ኢስታ ኣማኖ ቤዪዲ ጉንዳ ኣዴዛ “ኣይኮይ ባ፤ ሃይሶ ናዞ! ኔ ናጋራይ ኣቶ ጌቴቲዴስ” ጊዴስ።
23451	MAT 9:3	ሄ ዎዴ ሙሴ ዎጋ ታማርሲዛይቲ “ሃይሲ ፆሳ ጫሻ” ጊዲ ባ ዎዝናን ቆፒዳ።
23452	MAT 9:4	ዬሱሲ ኢስታ ቆፋ ኤሪዲ “ኢንቴ ዎዝናን ኢታ ዮዖ ኣዛስ ቆፔቲ?
23453	MAT 9:5	‘ኔ ናጋራይ ኣቶ ጌቴቲዴስ’ ጉሳፌኔ ‘ዴንዳዳ ባ!’ ጉሳፌ ኣዋይሲ ካዉሼ?
23454	MAT 9:6	ጊዶ ኣቲን ኣሳ ናስ ቢታ ቦላ ኣሴ ናጋራፔ ማራናስ ሼኔይ ዲዛይሳ ኤራና ማላሳ” ጊዲ ጉንዳ ኣዴዛ “ዴንዳ! ኔ ሃላ ኤካዳ ጌዴ ኔሶ ባ” ጊዴስ።
23457	MAT 9:9	ዬሱሲ ሄፔ ዴንዲዲ ቢሼ ኢሲ ማቶሳ ጌቴቲዛዴይ ቃራፃ ቃንፂሲዛሶን ኡቲዳይሳ ቤዪዲ “ታና ካላ!” ጊን፥ ዴንዲዲ ኢዛ ካሊዴስ።
23459	MAT 9:11	ፋርሳዌቲ ሄሳ ቢዪዲ ዬሱሳ ካሊዛይታ “ኢንቴና ታማርሲዛይሲ ቃራፃ ቃንፂሲዛይታራኔ ናጋራንቻታራ ዎስቲ ኢስታራ ኢሲፌ ካꬅ ሚዜ?” ጊ ኦይቺዳ።
23460	MAT 9:12	ዬሱሲካ ኢስቲ ጊዛይሳ ሲይዲ ኢስታ “ኣኪሜይ ኮሺዛይ ሳኬቲዳይታስ ኣቲን ሳኬቶንታ ፓፃታስ ጊዴና።
23461	MAT 9:13	ሄሳ ጊሽ ‘ኢንቴ ቢዲ ያርሾ ጊዶንታ ማሮቴꬅ ዶሳይስ’ ጊዛ ቃላ ቢርሼꬅ ታማሪቴ። ናጋራንቻታ ፄይጋና ያዲስ ኣቲን ፂሎታ ፄይጋናስ ያቤኬ” ጊዴስ።
23462	MAT 9:14	ፃማቂዛ ዮሃኒሳ ካሊዛይቲ ዬሱሳኮ ዪዲ “ኑኒኔ ፋርሳዌቲ ፆሚሺን ኔና ካሊዛይቲ ኣዛስ ፆሜቴኔ?” ጊ ኦይቺዳ።
23463	MAT 9:15	ዬሱሲ ኢስታስ “ሚሺራ ላጌቲ ሚሺራዚ ኢስታራ ዲሺን ሙዞታና ቤሲዜ? ሚሺራይ ኢስታፌ ኤኬታና ዎዴይ ያና፤ ኢስቲ ሄ ዎዴ ፆማና።
23464	MAT 9:16	“ጋልዓ ማይዖ ቦላ ኦራꬃ ዎሶ ዎꬂ ሲኪዛ ኣሲ ዴና። ጋልዓ ቦላ ኦራꬅ ዎꬂ ሲኪኮ ኦራꬃዚ ጋላዓዛ ፔꬌሬꬂዲ ሃ ዳሲ ዳሪሳና።
23465	MAT 9:17	ኦኒካ ኦራꬃ ዎይኔ ጫጄ ጋልዓ ሉካሞን ጉጄና። ጉጂዛ ጊዲኮ ሉካሞዚ ꬉቃና፤ ዎይኔ ጫጄዚካ ጉካና፤ ሉካሞዚካ ጎዓይ ባይንዳዚ ጊዳና። ጊዶ ኣቲን ኦራꬃ ዎይኔ ጫጄይ ኦራꬃ ሉካሞዛን ጉጄቴስ። ሄሳ ማላራ ዎይኔ ጫጄዚኔ ሉካሞዚ ሎዖ ናጌቲዲ ጋምዓና” ጊዴስ።
23466	MAT 9:18	ዬሱሲ ኣሳ ሃሳይሶን ዲሺን ኢሲ ሹሜይ ኢዛ ሲንꬃን ኩንዲዲ “ታስ ና ዳራ ሃይቃና ጋዉስ። ኢዛ ፓፃ ዳና ማላ ያዳ ኔ ኩሼ ኢዚ ቦላ ዎꬃርኪ?” ጊን፥
23469	MAT 9:21	ኢዛ ሄሳ ኦꬂዳይ “ታ ኢዛስ ኣፋላ ማጫራ ቦቺዳኮ ፓፃና” ጊዛ ኣማኖይ ኢዚ ዎዝናን ዲዛ ጊሽ ቦቻዱስ።
23470	MAT 9:22	ዬሱሲካ ጉዬ ሲሚ ፄሊዲ ማጫሳዮ “ኣይኮይ ባ፥ ታ ናዬ፤ ኔና ኔ ኣማኖይ ፓꬂዴስ” ጊን ማጫሳያ ሄራካ ፓፃጋዱስ።
23472	MAT 9:24	“ኪቺቴ! ናያ ꬊስካዱስ ኣቲን ሃይቃቤኩ” ጊን ኢስቲ ኢዛ ቦላ ሚጪዳ።
23475	MAT 9:27	ዬሱሲካ ሄፔ ቢሺን ናምዑ ቆቄቲ “ዳዉቴ ናዉ! ኑና ማራሪኪ!” ጊዲ ዋሲሼ ኢዛ ጌዶ ካሊዳ።
23476	MAT 9:28	ቆቄቲካ ዬሱሲ ጌሊዳ ኬꬃ ኢዛ ካሊዲ ጌሊዳ። ዬሱሲካ ኢስታ “ታ ኢንቴ ኣይፌ ፓꬃና ዳንዳዒዛይሳ ኣማኔቲ?” ጊዲ ኦይቺዴስ። ኢስቲካ “ኤ፥ ጎዶ!” ጊዳ።
23477	MAT 9:29	ሄሳፌ ጉዬ ዬሱሲ ኢስታ ኣይፌ ቦቺዲ “ኢንቴ ኣማኖ ማላ ኢንቴስ ሃኖ!” ጊዴስ።
23478	MAT 9:30	ኢስታ ኣይፌይካ ፄሊዴስ። ዬሱሲካ “ሃይሳ ኦኒካ ኤሮንታ ማላ” ጊዲ ሚንꬂ ዮቲዴስ።
23481	MAT 9:33	ዳይዳንꬃዚ ኬዚዳፔ ጉዬ ሄ ዱና ዱዴ ኣዴዚ ሃሳያ ኦይኪዴስ፤ ዴሬዚካ ማላሌቲዲ “ሃይሳ ማላ ሃኖይ ኢስራዔሌ ቢታን ሃኒን ኑ ቤዪ ኤሮኮ” ጊዳ።
23482	MAT 9:34	ጊዶ ኣቲን ፋርሳዌቲ ዛሪዲ ኢዛ “ዳይዳንꬂ ኬሲዛይ ዳይዳንꬃታ ሃላቃና” ጊዳ።
23485	MAT 9:37	ባና ካሊዛይታስካ “ማፃ ጋኪዳ ካꬃይ ዳሮ ሺን ማፂ ሺሺዛይቲ ጉꬃታ።
23486	MAT 9:38	ሄሳ ጊሽ ካꬃ ጎዳይ ካꬃኮ ኦሳንቻታ ዬዳና ማላ ዎሲቴ!” ጊዴስ።
23491	MAT 10:5	ሃይታ ታማኔ ናምዓታ ኡባ “ጌዴ ኣይዛቤታ ጋꬅ ቦፒቴ፤ ሳማሪያ ኣሳ ካታማ ጌሎፒቴ።
23493	MAT 10:7	ቢዲኔ ‘ሳሎ ካዎቴꬅ ማቲዴስ!’ ጊዲ ሳባኪቴ።
23497	MAT 10:11	“ኢሲ ካታማ ዎይኮ ኢሲ ጉታ ኢንቴ ጌሊዛ ዎዴ ኢንቴና ሞካናዴ ኮዪ ዴሚዲ ኢዛ ኬꬃን ሼምፒቴ፤ ሄፔ ኬዛና ጋካናስ ሄን ዲሺቴ።
23498	MAT 10:12	ኢንቴ ኦና ኬꬂካ ጌሊሼ ‘ሳሮ’ ጊቴ።
23502	MAT 10:16	“ታ ኢንቴና ዶርሳ ማላ ካና ሱይቴታ ጊዶራ ኪታይስ። ሄሳ ጊሽ ሾሻ ማላ ጪንጫታኔ ሃራጴ ማላ ኣሽኬታ ጊዲቴ።
23505	MAT 10:19	ኢንቴና ኢስቲ ኦይኪዛ ዎዴ ‘ኑ ኣይ ጊ ሃሳዪኖ? ዎዝጊ ዛሮ ኢሚኖ?’ ጊ ሂርጎፍቴ። ሄ ዎዴ ኢንቴ ጋናዚ ኢንቴስ ኢሜታና።
23507	MAT 10:21	“ኢሻይ ባ ኢሻ ሃይቆስ ኣꬂ ኢማና፤ ኣዋይ ባ ና ቦላ፥ ናይቲ ባና ዬሊዳይታ ቦላ ማካላቴꬃን ዴንዲዲ ሃራ ኣሳን ዎꬊሳና።
23510	MAT 10:24	“ኣሽካራይ ጎዳፔ ዎይኮ ካሊዛዴይ ካሌꬂዛዴፌ ኣꬌና።
23511	MAT 10:25	ታማሬይ ባና ታማርሲዛይሳ ማላ ዎይኮ ኣሽካራይ ጎዳ ማላ ጊዲኮ ሄሲ ኢዛስ ጊዳና። ኬꬃ ኣዋ ‘ቢዔሊዜቡላ’ ጊኮ ሶ ኣሳ ኣይሲ ሄሳፌ ኢታ ጌቴኔ!
23512	MAT 10:26	“ሄሳ ጊሽ ኢስታስ ባቦፍቴ፤ ጌሜቲዳይ ቆንጮንታ ቆቴቲዳይ ጌሽ ኬዞንታ ኣቴና።
23518	MAT 10:32	“ኣሳ ሲንꬃን ታስ ማርካቲዛዴስ ታካ ሳሎን ዲዛ ታ ኣዋ ሲንꬃን ኢዛዴስ ማርካታና።
23520	MAT 10:34	“ታ ቢታ ቦላ ሳሮቴꬅ ኤሃናስ ዪዳ ኢንቴስ ሚሳቶፖ፤ ማሻ ኤሃናስ ኣቲን ሳሮቴꬅ ኤሃናስ ያቤኬ።
23523	MAT 10:37	“ታፔ ኣꬂዲ ባ ኣዋ ዎይኮ ባ ኣዮ ሲቂዛዴይ ታስ ጊዳናስ ቤሴና። ታፔ ኣꬂዲ ባ ኣቱማ ና ዎይኮ፥ ማጫ ና ሲቂዛዴይ ታስ ጊዳናስ ቤሴና።
23526	MAT 10:40	“ኢንቴና ሞኪ ኤኪዛዴይ ታናካ ሞኪ ኤኬስ። ታና ሞኪ ኤኪዛዴይ ታና ኪቲዳዴካ ሞኪ ኤኬስ።
23528	MAT 10:42	ሄሳ ጊሽ ታ ኢንቴስ ቱሙ ጋይስ፤ ኦኒካ ሃይታ ጉꬃታፔ ታና ካሊዛዴ ጊዲዳ ጊሽ ኢሲ ፁዓ ኢርፃ ሃꬅ ኡሺኮ ሂኒስካ ዋጋይ ꬋዬና” ጊዴስ።
23530	MAT 11:2	ዮሃኒሲ ቃሾ ኬꬃን ዲሼ ኪርስቶሳስ ኦꬂዛ ሃኖታ ሲይዲ ባና ካሊዛይታ ኢዛኮ ዬዲዲ “ኣሲ ኣሺዛዴይ ያና ጌቴቲዳይ ኔኔዬ? ሃራ ናጊኖ?” ጊዲ ኦይቺዴስ።
23532	MAT 11:4	ዬሱሲካ ዛሪዲ “ቢዲ ኢንቴ ሲዳይሳኔ ኢንቴ ቤዪዳይሳ ዮሃኒሳስ ዮቲቴ።
23534	MAT 11:6	ታናን ꬉጴቶንታዴይ ኣንጄቲዳዴ” ጊዴስ።
23535	MAT 11:7	ዮሃኒሳ ካሊዛይቲ ቢዳፔ ጉዬ ዬሱሲካ ኣሳስ ዮሃኒሳ ጊሽ “ኣይ ቤያናስ ዱጌ ባዞ ቢዴቲ? ጫርኮይ ቃꬂዛ ሾምቦቆ ቤያናስ ዪዴቲ?
23538	MAT 11:10	‘ኔ ባና ኦጌ ኔስ ጊጊሳናዴ ኔፔ ካሴታ ታ ኔስ ኪታና ጌቴቲዲ ኢዛ ጊሽ ካሴ ፃፌቲዳዴይ ኢዛኮ!’ ጊዴስ።
23540	MAT 11:12	“ፃማቂዛ ዮሃኒሳ ዎዴፔ ሃ ሲሚን ሃዒ ጋካናስ ሳሎ ካዎቴꬃያ ዳሮ ባፄታ ቦላ ዳዉስ። ሚኖ ኣሳቲ ፃላ ኢዞ ዴማና።
23544	MAT 11:16	“ሃይሳ ሃ ዎዴ ኣሳ ኣዛን ሌሚሶ? ጊያን ኡቲዲ ባ ላጌታ ‘ኑ ኢንቴስ ዲꬂ ዲፂን ኢንቴ ዱርቤኬታ! ዬሆ ዚላልꬅ ዚላሊን ዬኪቤኬታ!’ ጊዛ ናይታ ሚሳቴቴስ።
23546	MAT 11:18	ዮሃኒሲ ሙሳፌኔ ኡሻፌ ናጌቲዲ ዪዳ ጊሽ ‘ኢዚ ዳይዳንꬃራ ዴስ’ ጊዳ።
23547	MAT 11:19	ታ ኣሳ ናይ ማሼኔ ኡያሼ ዪን ‘ሃይሲ ሚዲ ካሎንታ ኣሳ፥ ኡሻንቻ፥ ቃራፃ ሺሺዛይታሲኔ ናጋራንቻታስ ላጌኮ!’ ጊዳ። ጊዶ ኣቲን ፆሳ ኤራቴꬂ ባ ኦሶን ፂላዱስ” ጊዴስ።
23548	MAT 11:20	ሄሳፌ ጉዬ ዬሱሲ ኢዚ ማላታታ ኦꬂዳ ካታማ ኣሳይ ማሮቴꬃን ጌሎንታ ኣጊዳ ጊሽ “ኩራዚኔኔ ቤቴሳይዳ! ኢንቴና ኣዬ ኣና! ኢንቴ ቦላ ኦሴቲዳ ማላታይ ፂሮሴ ቦላኔ ሲዶና ቦላ ኦሴቲዳኮ ኢስቲ ማቃ ማይዒዲኔ ቢዲንꬃን ኡቲዲ ቤኒ ቤኒ ማሮቴꬃን ጌላናኮሺን።
23551	MAT 11:23	“ሃኔ ቂፊርናሆሜ ፑዴ ሳሎ ꬎቁ ꬎቁ ጋናስ ኮያዲ? ጊዶ ኣቲን ኔኒ ዱጌ ሲዖሌ ዎꬋንዳሳ፤ ኔ ቦላ ኦሴቲዳ ማላታይ ሶዶሜን ኦሴቲዳኮ ሶዶሜይ ሃቺ ጋካናስ ዳናኮሺን።
23552	MAT 11:24	ሄሳ ጊሽ ታ ኔና ጊዛይ ፒርዳ ጋላስ ቂፃቴይ ኔፔ ሶዶሜስ ካዉያና” ጊዴስ።
23553	MAT 11:25	ሄ ዎዴ ዬሱሲ “ሳሎኔ ሳዓ ጎዶ! ታ ኣዋዉ! ሃይሳ ዳሮ ኤራንቻታፔኔ ጪንጫታፔ ቆታዳ ቄሪ ናይታስ ኔ ቆንጪሲዳ ጊሽ ታ ኔና ጋላታይስ።
23555	MAT 11:27	“ዉሪካ ታ ኣዋፔ ታስ ኢሜቲዴስ፤ ኣዋፔ ኣቲን ናዛ ጊሽ ኤሪዛ ኣስ ባዋ፤ ቃሴ ናዛፔኔ ናዚ ባ ሼኔን ቆንጪሲዳ ኣሳፔ ሃራይ ኣዋ ኤሪዛ ኣስ ባዋ።
23556	MAT 11:28	“ቶሆይ ዴፂዳይቶ፥ ዳቡሪዳይቶ ኢንቴ ዉሪካ ታኮ ሃ ዪቴ፤ ታካ ኢንቴስ ሼምፖ ኢማና።
23558	MAT 11:30	ታ ቃምባራይ ሻይኮኔ ታ ቶሆይ ካዉሻ” ጊዴስ።
23560	MAT 12:2	ፋርሳዌቲ ሄሳ ቤዪዲ ዬሱሳ “ሄኮ ኔና ካሊዛይቲ ሳምባታ ጋላስ ኦꬄታናስ ቤሶንታይሳ ኦꬄቴስ” ጊዳ።
23561	MAT 12:3	ኢዚካ ኢስታስ ዛሪዲ “ዳዉቴይኔ ኢዛራ ዲዛ ኣሳቲ ጋፊዳ ዎዴ ኢዚ ኣይ ኦꬂዳኮኔ ናባቢቤኬቲ?
23565	MAT 12:7	‘ታኒ ያርሾ ጊዶንታ ማሮቴꬅ ዶሳይስ’ ጊዛ ቃላይ ኣይ ጉሲኮኔ ኢንቴ ኤሪዛኮ ፂሎታ ቦላ ፒርዴኬታኮሺን።
23566	MAT 12:8	ኣሳ ናይ ሳምባታስ ጎዳ” ጊዴስ።
23568	MAT 12:10	ሄንካ ኢሲ ኩሼ ሲሊዳዴይ ዴስ። ዬሱሳ ሞታናስ ጋሶ ኮይዲ “ሳምባታ ጋላስ ፓꬃናስ ቤሲዜ?” ጊዲ ኢዛ ኦይቺዴስ።
23569	MAT 12:11	ኢዚካ ኢስታ “ኢንቴፌ ኢሳዴ ዶርሲ ሳምባታ ጋላስ ኦላን ጌሊኮ ባ ዶርሳ ኢዚ ጌሊዲ ኦላፌ ጎቺ ኬሲ ኤሬኔ?
23570	MAT 12:12	ሂስቲኮ ኣሲ ዶርሳፌ ኬሂ ኣꬌኔ? ሄሳ ጊሽ ሳምባታ ጋላስ ሎዖ ኦሶይ ዲጌቴና” ጊዴስ።
23571	MAT 12:13	ቃሴካ ኣዴዛ “ኔ ኩሼ ፒዲሳ!” ጊዴስ፤ ኣዴዚካ ባ ኩሼ ፒዲሲን ሂንኮ ኩሼዛ ማላ ፓፃ ጊዲዴስ።
23575	MAT 12:17	ሄሲካ ሃኒዳይ ናቤ ኢሳያሳን “ታ ዶሪዳይኔ ታ ኢዛን ኡፋዬቲዛ ታ ናይ ሃይሳኮ! ታ ኣያናፔ ታ ኢዛ ቦላ ዎꬃና፤ ኢዚካ ኣማኖንታ ዴሬታስ ቱሙ ፒርዳ ኣዋጃና፤ ማርሼቴና፤ ዎይኮ ዋሴና። ኢዛስ ቃላይካ ካሬን ሲዬቴና፤ ቱማ ፒርዳ ፆኖስ ጋꬃና ጋካናስ ዲንጬቲ ኡቲዳ ሾምቦቆካ ሜንꬄናኔ ጩዋቲዛ ሙቃዳካ ቶይሴና፤ ኣይዛቤቲ ኢዛ ኡፋይሳን ናጋና” ጌቴቲ ዮቴቲዳ ቲንቢቴ ቃላይ ፖሌታና።
23581	MAT 12:23	ኣሳይ ዉሪካ ማላሌቲዲ “ሃይሲ ኣዴዚ ዳዉቴ ናሻ?” ጊዴስ።
23582	MAT 12:24	ጊዶ ኣቲን ፋርሳዌቲ ሄሳ ሲዪዳ ዎዴ “ሃይሲ ኣዴዚ ዳይዳንꬅ ኬሲዛይ ዳይዳንꬃ ሃላቃ ቢዔሊዜቡላ ዎልቃን ፃላ ጊዳናስ ቤሴስ” ጊዳ።
23583	MAT 12:25	ዬሱሲካ ኢስታ ቆፋ ኤሪዲ “ባ ጊዶን ኢሶይ ኢሳፌ ሻኬቲዛ ካዎቴꬂ ዉሪካ ኩንዳና፤ ባ ጊዶን ሻኬቲዛ ካታማይ ዎይኮ ኬꬃ ኣሲ ሚኔና።
23587	MAT 12:29	“ዎይኮ ኢሲ ኣስ ዎልቃራ ዲዛዴ ኬꬄ ጌሊዲ ሚሼ ቦንቃና ኮይኮ ካሴቲዲ ሄ ዎልቃራ ዲዛ ኣዴዛ ኦይኪ ቃቾንታ ዎስቲ ቦንቃኔ? ቃቺዳፔ ጉዬ ቦንቃና ዳንዳዬስ።
23588	MAT 12:30	“ታናራ ጊዶንታዴይ ታናራ ኤቄቴስ፤ ታናራ ኢሲፌ ሺሾንታ ኣሲ ዉሪካ ላሌስ።
23591	MAT 12:33	“ሚꬂ ዉሪ ኣይፌን ኤሬቲዛይሳ ማላ ኢንቴ ሎዖ ኣይፌ ዴማናስ ኢንቴስ ሎዖ ሚꬂ ዶ፤ ኢንቴስ ኢታ ሚꬂ ዲዛ ጊዲኮ ኢንቴ ኢታ ኣይፌ ኤካና።
23593	MAT 12:35	“ሎዖ ኣሲ ባ ዎዝናን ኩንꬂ ዎꬂዳ ሎዖ ቆፋፔ ሎዖ ሃሳዬስ፤ ኢታ ኣሲካ ባ ዎዝናን ኩንꬂ ዎꬂዳ ኢታቴꬃፌ ኢታ ዮዖ ኬሴስ።
23595	MAT 12:37	ጋሶይካ ኔ ቃላፔ ዴንዲዳይሳን ኔ ፂላዳ ኣታናኔ ኔ ቃላፔ ዴንዲዳይሳን ኔ ቦላ ፒርዴታና” ጊዴስ።
23596	MAT 12:38	ሄሳፌ ጉዬ ኢሲ ኢሲ ሙሴ ዎጋ ታማርሲዛይቲኔ ፋርሳዌቲ ዬሱሳ “ኣስታማሬ! ኑ ኔፔ ማላሊሲዛ ማላታ ቤያናስ ኮዮስ” ጊዳ።
23597	MAT 12:39	ኢዚ ኢስታስ ዛሪዲ “ሃ ኢታኔ ላይማ ዬሌታይ ማላታ ኦይቼስ፤ ጊዶ ኣቲን ናቤ ዮናሳ ማላታፔ ኣቲን ሃራ ማላታይ ኢሜቴና።
23601	MAT 12:43	“ቱና ኣያናይ ኣሳፔ ኬዚዲ ሼምፖ ዴማናስ ሃꬂ ባይንዳ ሜላ ቢታን ዳቡሬስ። ጊዶ ኣቲን ባ ኮዪዛ ሼምፖ ዴሜና።
23603	MAT 12:45	ሄሳፌ ቢዲ ሃራ ባፔ ኢቲዛ ላፑን ኢታ ኣያናታ ባናራ ኤኪዲ ዬስ። ኢስቲካ ሄ ኣዴዛን ጌሊዲ ዴዓና። ሄ ኣዴዛስ ካሴ ዱሳፌ ጉዬ ዱሳይ ኢታ ጊዳና። ሃይሳ ኢታ ዬሌቴꬃስካ ሄሳ ማላ ሃናና” ጊዴስ።
23605	MAT 12:47	ኢሲ ኣሲ “ሄኮ ኔ ኣያኔ ኔ ኢሻቲ ኔና ሃሳዪሳናስ ካሬን ኤቂዲ ኔና ኮዬቴስ” ጊዴስ።
23606	MAT 12:48	ዬሱሲካ “ታ ኣያ ኦኔ? ታ ኢሻቲች፥ ኢስቲ ኦናንቴ?” ጊዴስ።
23607	MAT 12:49	ባ ኩሼራ ባና ካሊዛይታኮ ማላቲዲ “ታ ኣያኔ ታ ኢሻቲ ሃይታንታ።
23608	MAT 12:50	ሳሎን ዲዛ ታ ኣዋ ሼኔ ኦꬂዛይቲ ዉሪካ ታስ ኢሻ፥ ሚቾኔ ኣዮ” ጊዴስ።
23611	MAT 13:3	ዳሮ ዮዖ ሌሚሶራ “ኢሲ ጎሻንቻይ ዜሬꬅ ዜራናስ ኬዚዴስ።
23617	MAT 13:9	ሲዪዛ ሃይꬂ ዲዛዴይ ሲዮ!” ጊ ዮቲዴስ።
23618	MAT 13:10	ሄሳፌ ኢዛ ካሊዛይቲ ኢዛኮ ሺቂዲ “ኣዛስ ሌሚሶራ ዮታይ?” ጊዳ።
23619	MAT 13:11	ኢዚካ ኢስታስ “ሳሎ ካዎቴꬃ ፁራ ኤሮይ ኢንቴስ ኢሜቲዴስ፤ ኢስታስ ጊዲኮ ኢሜቲቤና።
23622	MAT 13:14	“ኢሳያሲ ‘ኢንቴ ሲሳ ሲያናሺን ዩሺ ቆፔኬታ፤ ፄሎ ፄላና ሺን ዎዝናን ዎꬄኬታ፤ ዴሬዛ ዎዝናይ ሙሚዴስ፤ ኢስታ ሃይꬃይካ ሲዬና፤ ፄሎንታ ማላ ባ ኣይፌ ቂልምዒዳ፤ ሄሲ ባይንዳኮ ኢስቲ ባ ኣይፌራ ቤዪዲኔ ባ ሃይꬃራ ሲይዲ ባ ዎዝናን ዩሺ ቆፒዲ ታኮ ሃ ሲሚን ታ ኢስታ ፓꬃና ሺን’ ጊዳ ቲንቢቴ ቃላይ ኢስታን ፖሌቲዴስ።
23624	MAT 13:16	“ኢንቴ ኣይፌይ ፄሊዛ ጊሺኔ ኢንቴ ሃይꬃቲ ሲዪዛ ጊሽ ኢንቴ ኣንጄቲዳይታ።
23626	MAT 13:18	“ሂስቲኮ ሃዒ ዜሬꬃ ሌሚሶዛ ቢርሼꬅ ሲዪቴ፡
23631	MAT 13:23	ሎዖ ቢታን ዜሬቲዳ ዜሬꬃይ ቃሴ ቃላ ሲይዲ ዩሺ ቆፒዛዴ ሚሳቴስ፤ ቱሙ ኣይፌ ኣይፌስ፤ ኢሶይ ፄቱ፥ ኢሶይ ኡሱፑን ታሙ፥ ኢሶይ ሄꬑ ታሙ ኣይፌ ኢሚዴስ” ጊዴስ።
23632	MAT 13:24	ዬሱሲ ቃሴካ ሃራ ሌሚሶ ኢስታስ “ሳሎ ካዎቴꬂ ባ ጎሻ ጋዴን ሎዖ ዜሬꬅ ዜሪዳዴ ሚሳቴስ።
23635	MAT 13:27	“ካꬃ ጎዳ ኣሽካራቲ ጎዳዛኮ ሺቂዲ ‘ጎዶ! ኔኒ ኔ ጎሻን ሎዖ ዜሬꬅ ዜራቤኪ? ሃይሲ ሌሾይ ኣዋፔ ዪዴ?’ ጊዳ።
23636	MAT 13:28	“ኢዚካ ኢስታስ ‘ሄሳ ሞርኬይ ኦꬂዴስ’ ጊዴስ። ኣሽካራቲካ ‘ኑ ቢዲ ሌሾዛ ሾዳና ማላ ኮያይ?’ ጊ ኦይቺዳ።
23637	MAT 13:29	“ኢዚካ ኢስታስ፥ ‘ኣካይ ሃኔና፤ ጋሶይካ ኢንቴ ሌሾዛ ሾዲሼ ጊስቴዛራ ጋꬂ ሾዳና፤
23638	MAT 13:30	ኣጊቴ! ማፃ ዎዴይ ጋካናስ ኢሲፌ ዲጮ፤ ሄ ዎዴ ማፂዛይቲ ሌሾዛ ካሴቲዲ ቆሪ ማፂዲ ታማን ፁጋናስ ሚርቄን ሚርቄን ቃቺቴ፤ ጊስቴዛ ቃሴ ሺሺዲ ጎታራን ጌልꬂቴ’ ጋዳ ታ ኢንቴስ ዮታና” ጊ ዮቲዴስ።
23639	MAT 13:31	ሃራ ሌሚሶ ኢስታስ “ሳሎ ካዎቴꬂ ኢሲ ኣሲ ባ ጋዴ ጊዶን ዜሪዳ ባርዛፌ ሚꬃ ኣይፌ ማላ።
23640	MAT 13:32	ባርዛፌ ሚꬃ ኣይፌይ ሃራ ሚꬃ ኣይፌ ኡባፌ ዳሮ ላፋ ጊዲኮካ ዲጫዳ ሚꬃ ኡባፌ ጊታ ጊዳዉስ። ሳሎ ካፎቲካ ኢዚ ሃጋ ቦላ ኬፂዲ ዳና ጋካናስ ጊታ ሚꬂ ጊዳዉስ” ጊዴስ።
23641	MAT 13:33	ሃዒካ ሃራ ሌሚሶ ኢስታስ “ሳሎ ካዎቴꬂ ማጫሲ ሊፄይ ዴንዳና ማላ ሊፄ ጊዶን ጉጂዳ ጉꬃ ኢርሾ ሚሳታዉስ” ጊዴስ።
23643	MAT 13:35	ሄሳንካ ካሴ ናቤ ዱናን “ታ ዱና ታ ሌሚሶን ዶያና፤ ኣላሜይ ሜꬌቶሳፔ ሃ ሲሚን ቆቴቲዳይሳ ታ ሃሳያና” ጌቴቲ ዮቴቲዳይስ ፖሌቲዴስ።
23644	MAT 13:36	ሄሳፌ ዬሱሲ ኣሳ ኣጊዲ ሶ ጌሊዴስ። ኢዛ ካሊዛይቲ ኢዛኮ ሺቂዲ “ካꬃ ጊዶን ዲዛ ሌሾዛ ጊሽ ኔ ዮቲዳ ሌሚሶዛ ቢርሼꬅ ኑስ ዮታ” ጊዳ።
23645	MAT 13:37	ኢዚካ ኢስታስ ዛሪዲ “ሎዖ ዜሬꬅ ዜሪዳይ ኣሳ ና።
23648	MAT 13:40	“ሌሾይ ቆሬቲዲ ታማን ፁጌቲዛይሳ ማላ ኣላሜ ዉርሴꬃን ሄሳꬆ ሃናና።
23652	MAT 13:44	“ሳሎ ካዎቴꬂ ጋዴ ጊዶን ቆቴቲዳ ሚሼ ሚሳቴስ። ኢሲ ኣስ ሄ ሚሻዮ ዴሚዲ ዛሪ ቆቲዴስ። ኡፋይሳፌ ዴንዲዳይሳን ቢዲ ባስ ዲዛዚ ኡባ ባይዚዲ ሄ ሚሺያ ዲዛ ቢታ ሻሚዴስ።
23653	MAT 13:45	“ሄሳꬆካ ሳሎ ካዎቴꬂ ኣልዖ ዎርቃ ኮዪዛ ዛልዓንቻ ሚሳቴስ።
23655	MAT 13:47	“ቃሴካ ሳሎ ካዎቴꬂ ኣባ ጊዶን ዬጌቲዲ ዱማ ዱማ ሞሌ ኦይኪዳ ሞሌ ጊቴ ሚሳቴስ።
23659	MAT 13:51	“ዬሱሲ ኢስታ ሃይሲ ዉሪ ኢንቴስ ጌሊዴ?” ጊዴስ። ኢስቲካ “ኤ” ጊዳ።
23660	MAT 13:52	ኢዚካ ዛሪዲ “ሄሳ ጊሽ ሳሎ ካዎቴꬃ ፁራይ ጌሊዳ ሙሴ ዎጋ ታማርሲዛዴይ ኦኒካ ኢዛስ ሚንጂ ዎꬂዳ ኣልዖ ሚሻፌ ኦራꬃኔ ካሴ ጋልዓ ሚሽ ኬሲዛዴ ሚሳቴስ” ጊዴስ።
23662	MAT 13:54	ጌዴ ባ ዴሬ ቢዲ ኣይሁዳታ ዎሳ ኬꬃን ኣሳ ታማርሶ ኦይኪዴስ። ኢስቲካ ማላሌቲዲ “ሃይሲ ኣዴዚ ሃይሳ ኤራቴꬃኔ ሃይታ ማላታታ ኦꬃና ዎልቃ ኣዋፔ ዴሚዴ?
23664	MAT 13:56	ሚቼቲ ኑናራ ዲዛይታ ጊዴቴኔ? ሂስቲን ሃይሲ ኣዴዚ ሃይሳ ኡባ ኣዋፔ ኤኪዴ?” ጊዳ።
23665	MAT 13:57	ሄሳ ጊሽ ኢስቲ ኢዚ ጊዛይሳ ኤኪቤቴና። ዬሱሲካ ኢስታስ “ናቤይ ባ ዴሬኒኔ ባ ኬꬃን ቦንቼቴና ኣቲን ሃራሶን ቦንቼቴስ” ጊዴስ።
23668	MAT 14:2	ሄርዶሲ ባ ኣሽካራታስ “ሄሳ ጊዲኮ፥ ፃማቂዛ ዮሃኒሲ ሃይቆፔ ዴንዲዲ ዪዴስ ጉሳካ! ሃይሲ ዉሪ ጊታ ማላታይ ኢዛ ኩሼን ኦሴቲዛይ ሄሳሳ” ጊዴስ።
23670	MAT 14:4	ጋሶይካ ዮሃኒሲ ሄርዶሳ “ኔ ኢዞ ኤካና ማላ ዎጋ ጊዴና ጊዳ ጊሻሳ” ጊዴስ።
23674	MAT 14:8	ናያካ ኣዬይ ዞሬን “ፃማቂዛ ዮሃኒሳ ሁዔ ኬሬን ዎꬃዳ ሃዒ ሃኒን ታስ ኢማ” ጋዱስ።
23681	MAT 14:15	ጋዴይ ቃሚ ቃሚ ቢዛይሳ ቤዪዲ ኢዛ ካሊዛይቲ ኢዛኮ ሺቂዲ “ሃይሲ ኑ ዲዛሶይ ባዞ፤ ጋዴይካ ቃሚ ቃሚ ቢዛ ጊሽ ጌዴ ጉታታን ጉታታን ቢዲ ባሲ ማናዝ ሻማና ማላ ኣሳ ዬዳ” ጊዳ።