2	GEN 1:2	Ego poyapoyayana ame geya ana katubayasinamo be nakae daakakaina. Go madabokina bwae dimówana ilatao. Dimowanayana yatanaina goi kokonótuya gagaina ikaaiyaka nakae Yaubada Balomaina itaakavata.
16	GEN 1:16	Aba mavadayadi aiyuwo gagaidi iwodugudi, tayamo gagaina toina moe maliyalina iloovinae go, tayamo tupwana giyaina moe sabamgo iloovinae. Go utuna nakae taiyao iwodugudi.
44	GEN 2:13	Sákala aiyuwoina yoina Gikoni. Ame sakalayana asa Kosa idaunibisi.
49	GEN 2:18	E Yauwe Yaubada idigo kana, ‘Geya idedevineta neta korotoyana anetava ikaaiyaka. Tuwo tayamo tovaita aodugu bei koroto sowona.’
58	GEN 3:2	Go kina vavinayana idigo kana, ‘Geya! Tánuwo alovaidi keuwoidi mama tagona kakanidi
60	GEN 3:4	Go kina motetayana idigo kana, ‘Geya kokamaseta. Geya toina!
67	GEN 3:11	Go Yaubada idigo kana, ‘Avatau ilatuwokoim bego kom kupawaku? Manakae? Alovayana keuwoina asanaabodem bogina kukani?’
71	GEN 3:15	Go vakaleya kom be vavinayana nauyayanaimi goi bei ayato. Kom im boda be tauyana ina boda nakae bei sivaakaleya. Ago kina ina bodayana bei dabam ikaumotui go, tauyana aegedugeduna kom bei kukalimotui.’
74	GEN 3:18	Go náuna nakae taliboibo poyapoyayana goi bei sitabo manum. Ago pai be awoinu bei kukakáika.
87	GEN 4:7	Neta im guinuwa dedevina, bei mam uyáwana ae? Go neta im guinuwa geya idedevineta, e bágala yoguyogu sasasaina nakae totom goi iyokabúbuna; latuwona kom ilovinaem go, ina togaga kulovināe.’
90	GEN 4:10	Go kina Yauwe idigo kana, ‘Moe kaga kuguinuwe! Kunōve! Siyam ikaikaina tomota nakae poyapoya goi itaiyaduduwo yau yaigu. Latuwona im kaumata pasina yau akatumapum.
93	GEN 4:13	Go kina Keniyana idigo kana, ‘Iyaa! Guna liuna moumou ivakaigaga yaigu! Geya itoboineguta atogaga.
109	GEN 5:3	E Adama ana tala ana badabada tayamo andedi teti (130) tutayana natuna koroto ibíbina. Gomanayana tamana Adama ana tapata, e Adamayana nakae. E ivayou Seti.
141	GEN 6:3	Tuwo Yauwe idigo kana, ‘Geya atagoneta guna togaga maa yawoina ikaiyako vata tomota yaidi unana tauyadi sakava kaka. Tauna adi tala bei akatuyaivi tayamo andedi tuwenti (120) baige sikámasa.’
145	GEN 6:7	Tuwo idigo kana, ‘Ategu igeda guna madágina pasina. Neta boi geya aodugudita! Tauna tauyadi boi aodugudi ame bei asamatedi, tomota, yoguyogu, dogoi daladalaidi be nakae mánuwo. Geya kada tayaamo poyapoya goi bei ikaaiyaka geya.’
153	GEN 6:15	Ego dedeogayana ana yówana ame nakae: Ana mamanao ova ana badabada nainti (90). Ana papaeva ovayawou ovanima. Go ana tukotuko ovanima ovavasi.
154	GEN 6:16	Go lupa ana tukotuko aba katugúyala. Niga ina kátava kukāu. Kukau ikavava, kikina goi ana niboda kuyāto. Go ana bósima aito, tayamo ditonema, tayamo diligaema be nakae tayamo nauyayana.
156	GEN 6:18	Go sem kom bei akanasiukoim. Kom ma monem be natumiyao monediyao taiyao dedeogayana goi bei kosowoya go, ayavemi.
159	GEN 6:21	Go kom sem kūna awoinu tamo tamo maniyedi kukabīdi kumēdi dedeogayana goi kudodōidi. Moe kom mam bodao avami be nakae yoguyogu be mánuwo avadi.’
183	GEN 7:23	Tauna nakae kaga liliuna maa yawoidi poyapoya goi kina Yauwe isamatedi. Madabokidi, tomota, yoguyogu, kaga liliuna sidaladala be mánuwo isamatedi. Geya kada tayaamo ikesa geya, go sem Nowa mana bodao aditava dedeoga goi sikaaiyaka.
210	GEN 9:4	Go íwaya ma ikaikaidi taabu kookanīdi! Ikaikayana moe yáwana ana kaba kaiyaka.
218	GEN 9:12	Tuwaina Yaubada kana, ‘Guna kanasiunayana bei ikaiyako vata komi be tubumiyao be nakae kaga liliuna maa yawoidi yaimi go, ana kaba kinana avinimi.
219	GEN 9:13	Aba kinanayana ame nakae: Guna kíyala gaota goi bogina ayato. Moe aba kinana komi be kaga liliuna maa yawoidi poyapoya goi bogina akanasiukoimi.
227	GEN 9:21	E tuta tayamo oineyana inim ginagina, iyaluwo. Go ina yaluwoyana goi ana kwama ivalilivi, e ma paawakuna ina yoyou parai goi imasisi.
229	GEN 9:23	Ago kidi Semi be Diyepeta tanigo sikabi, sina yoyouyana goi sisiu go, sidumasiyasiya, unana tamadi ma pawakuna. Geya vavagidi tamadiyana sigite. E tanigoyana valavadi goi siyoisi, e mlidi goi sivamnamnae tamadi sivatum.
233	GEN 9:27	Diyepeta ina poyapoya kom Yaubada kukidedēde bei ana dedevina ibabane. Diyepetayana be Semi kutagonēdi madi tuboina taiyao sikaaiyaka. Go Kenani kuvayōko kina Diyepeta ina pákwana.’
237	GEN 10:2	Diyepeta natunao koroto ame nakae: Gomeri, Megogi, Madai, Yavani, Tubali, Meseka be Tirasi.
238	GEN 10:3	Gomeriyana tubunao koroto ame nakae: Asikenasi, Ripata be Togarama.
251	GEN 10:16	Kenani tubunao boda tamo tamo yoidi ame nakae: Da Yavusi, da Emori, da Giragasi,
254	GEN 10:19	Tuwo Kenani tubunaoyadi adi túwana ivatowo Saidoni goi ina Garara, moe Gasa goi. Ana papaeva nakae Sodoma, Gamora, Adima be Siboim goi ina asa Lasi goi.
258	GEN 10:23	Aram natunao koroto ame nakae: Uso, Kulu, Geteri be nakae Mise.
329	GEN 13:10	Tuwo Lotiyana imatavilavila Iyoridani butumina madabokina igite poyapoya dedevina, nuugusina. (Amo tutayana Yauwe Sodoma be Gamora nava geya imtulidita.) Poyapoyayana ana kaigigita Yauwe ina tánuwo o nakae Itipita ina Sowa poyapoyaidi nakae.
334	GEN 13:15	Guna nuwonúwana bego ava poyapoyava itoboinem kugite, madabokina kom be nakae im boda bei avinimi be ikaiyako vata yaimi.
338	GEN 14:1	E tutayana da Sinari adi tolovina Amrapeli, da Elasa adi tolovina Ariyoki, da Elam adi tolovina Kedolaomera be da Goim adi tolovina Tidali siilovina, e tolovinayadi adi taivasi madi tovayaviyayao silamgógana yaviya manuna.
339	GEN 14:2	Silamgógana, sideli sina bego sivayaviya tolovina adi tainima taiyao. Tauyadi moe da Sodoma adi tolovina Bera, da Gamora adi tolovina Bisa, da Adima adi tolovina Sinabi, da Siboim adi tolovina Semibera be nakae da Bela adi tolovina. Belayana youyuwoina Sowa.
347	GEN 14:10	E kidi Kedolaomera sitogaga, tauna kidi da Sodoma be da Gamora bego sisiya. Ego Sidim butumina goi bobosiu sikaaiyaka go, sépwala potapotaina ilataoidi. Tauna tutayana da Sodoma be da Gamora idi tovayaviyayao sisiya, koroto maniyedi sisou bobosiuyadi sinaedi goi go, maniyedi sisiya sina koya goi.
348	GEN 14:11	Sisiya go, kidi Kedolaomera sitogaga, tuwo sina da Sodoma be da Gamora idi kasa goi konadi be avadi madabokidi sivainaoidi.
360	GEN 14:23	Guna katotulayana ame nakae: Geya kada tayaamo konam bei akabi geya. Neta gagaina o giyaina, geya akabiyeta, govila kom kam, “Yau pasigu Eberam iguyau.”
363	GEN 15:2	Go kina Eberamyana idigo kana, ‘Yauwe guna Tomoya, yau bei geya natugumo akámasa go! Tauna kaga ana dedevina neta kónana kuvinigu? Yau guna katumapu moe guna pákwana Eliyesa guma Damasiko.’
369	GEN 15:8	Go kina Eberam idigo kana, ‘Go Yauwe guna Tomoya, manakaegu bei ayagoi poyapoya ame moitamo yau toinigu guna poyapoya?’
382	GEN 15:21	Emori tubunao idi poyapoya, Kenani tubunao idi poyapoya, Giragasi tubunao idi poyapoya be nakae Yavusi tubunao idi poyapoya.’
388	GEN 16:6	Go kina Eberamyana idigo kana, ‘Gwa. Kom im pakonayana nimam goi ayato. Kaga latuwom, nakae kuguinūwe yaina.’ Tuwo Serai ina pákwana Ega iyogedegede, tauna isiya ina yoyowo goi ikaaiyaka.
389	GEN 16:7	Isiya ina doelu tayamo asa Sura kenaoina goi ikaaiyaka. Go Yauwe ina anerose tayamo ima amoko goi Egayana ibabane.
390	GEN 16:8	Ibabane, e idigo kana, ‘Ega, Serai ina pákwana, nako kuma? Bei nako kuna?’ ‘Guna towosi Serai matana goi asiya’, Egayana kaena.
405	GEN 17:7	Guna kanasiunayana akamoitamoe bego ikaiyako vata kom ma natumowo nakae tubumowo be yau yaida. Yau bei im Yaubada go, nava bei tubumowo idi Yaubada.
408	GEN 17:10	Guna kanasíuna ana lovinayana ame nakae: Kom be nakae koroto madabokimi yaimi sakavaimi kokupōidi. Nava tubumowo koroto nakae latuwogu sakavaidi sikupoidi.
416	GEN 17:18	Go tauyana Yaubada ilatuwoko idigo kana, ‘Neta im kaipaku isowóduwo natugu Isimaeli goi! Sera ikágala, tauna kaga liliuna kukaatotule yau yaigu, nakona natugu Isimaeli yaina kuguinuwe.’
417	GEN 17:19	Go kina Yaubada idigo kana, ‘Tauyana geya, go sem monem Sera bei ivenátuna, natuna koroto go, bei kuvayou Aisake. Tauyana be nakae tubunao bei akanasiukoidi go, anasiunayana bei ikaiyako vata yaidi.
419	GEN 17:21	Go tala tayamo ikavava, Sera bei ivenátuna, natumi Aisake go, niga bei Aisakeyana akanasiuko.’
426	GEN 18:1	E tuwo Eberamo nava asa Mamre alovaina gagaidi goi ikaaiyaka. Go tuta tayamo dine goi ituwodo ina yoyou parai totomna goi itusobu ikaaiyaka. Ikaaiyaka, e Yauwe isowóduwo tauyana yaina.
428	GEN 18:3	Tuwo idigo kana, ‘Guna tomoya, neta itoboinegu im kanuwóiya ababane, geya kunoita, go sem yau im pákwana taiyao takaiyāka.
434	GEN 18:9	E kidi korotoyadi sidigo kadi, ‘Go monem Sera nakoina?’ ‘Amoni yoyou sinaena’, Eberamo kaena.
438	GEN 18:13	Go kina Yauwe idigo kana, ‘Kaga unana Sera ivanama? Kaga unana idigo kana, “Yau bogina akainamoya, bei moitamo avenátuna”?
439	GEN 18:14	Geya kada kaga tayaamo imou yau Yauwe yaigu. Moitamo guna upa bogina ayato bei akaluvila moe tukówana ainima aivasi sikavava nakae go, Sera bogina bei ivenátuna, natuna koroto.’
440	GEN 18:15	E Serayana imatoita, tauna ilawoiwoi kana, ‘Yau geya avanameta.’ Go kina Yauweyana idigo kana, ‘Geya. Moitamo, kuvanama; bogina anovem.’
444	GEN 18:19	Guna nuwonúwana geya avamouyeta. Tauyana bogina akatuveko bei natunao nakae tubunao ilovinaedi kana, “Yauwe ina kenao goi taaketōiya ame nakae: Nuwona takiboobosīdi be nakae takínona vavasa taguuinūwe. Neta nakae taguuinuwe, e Yauwe ina katótula bei isowóduwo komi be yau yaida.”’
445	GEN 18:20	E tuwo Eberamo ilatuwoko idigo kana, ‘Eberamo, da Sodoma be da Gamora valedi bogina anove, idi bágala ivakaigaga toina.
450	GEN 18:25	Go moe geya nakae im sinapu geya. Iyaa! Neta toogoyoidi tokibóbwata taiyao kumtulidi, moe ana kaigigita tauyadi matam goi sivavasa. Ago kom kai da poyapoya ama totakínona; itoboinem kutakinona vavasa ae?’
452	GEN 18:27	E Eberamo idigo kana, ‘Tomoya, yau kaga? Tomota tayamo poyapoya kaukauna tauna. Go tuwo bokoyo magu katepatu avadigoim go, guna digopopóita kunuwotao.
454	GEN 18:29	E Eberamo ibobwaramna idigo kana, ‘Go neta tokibóbwata adi badabada poti (40) taudi amoko goi kubabanedi?’ ‘Tokibóbwata adi badabada poti (40) pasidi toni kasayadi geya amtulidita’, Yauwe kaena.
460	GEN 19:2	e idigo kana, ‘Guna tomoyamoya, konōve. Kōma tāna yau imi pákwana guna vada sabamgo ame goi aemi konikīdi, kokaiyāka komasīsi. E vanuwo itomo nobuyana giyaina kotāoya, e kōna.’ ‘Tuwo. Bareki goi bei kamasisi’, kidi kaedi.
467	GEN 19:9	Go kidi korotoyadi sidigo kadi, ‘Geya! Kusiyāmo!’ Go taudiva kadi, ‘Iyaa! Ame tauyana ogaoga go, manakae? Bego itakinoida?’ Tuwo Loti silatuwoko kadi, ‘Ima guinuwa yaim bei igoyo toina.’ Tuwo Lotiyana sivatubibi nakae niboda sivalabelabene; latuwodi bego sikaugaegae, e sisiu.
469	GEN 19:11	Go korotoyadi totom goi sikaaiyaka, e madabokiidi matadi sikigawuwulidi, tauna totom sikamyayai go, geya sibabaneyeta, go sem ana lusala ilausidi.
472	GEN 19:14	E Loti vada goi isowóduwo ina natunao adi kamatakwanayao ibabanedi, e ilatuwokoidi idigo kana, ‘Kotāoya! Giyakainava bei Yauwe asa ame madabokina imtulidi. Tauna woilīmi kosīya!’ Go korotoyadi sinuwonúwana kadi, ‘Loti nakona ivaponuponu.’
476	GEN 19:18	Go kina Lotiyana idigo kana, ‘Tomoya, moe nakae geya!
477	GEN 19:19	Kunōve. Yau im pákwana bogina kukanuwoiyegu be nakae bogina kukubunuwegu tutayana Sodoma aná mtula goi yawoigu kuyave. Go kai geya itoboinemeta kasiya kana amo koyayana goi. Aduwanau isaki. Tauna taabu kueetunēma kana maeko goi govila bei ame vailaiyana ibabanema, e kakámasa.
480	GEN 19:22	Go woilīmi kosīya kōna amoko goi. Geya tayamo kaga itoboinegu aguinuwe ana kadókana kosowóduwo asayana goi.’ Moe pasina asayana yoina Sowa.
482	GEN 19:24	E kina go Yauweyana yeu mana poiseni mokauna ibisilave yábana goi isou ina Sodoma be Gamora yaidi.
484	GEN 19:26	Go Lotiyana mlina goi monena inonoina ikandovila, e imalagurewa go, gurewayana moe soroti.
486	GEN 19:28	Ikandosobu Sodoma be Gamora be nakae Iyoridani butumina madabokina igitedi, aubowoidi itukotuko limou aubowoina nakae.
489	GEN 19:31	E sikaaiyaka, tuta tayamo natunao adi taiyuwo aditava sibobóbwara go, botomoya idigo kana, ‘Guna gómana, kita geya natudamo go, geya tayaamo koroto ikaaiyaka ameko bego tanai, taiyao tamasisi, e kidi goi takéuwama, tavenátuna nakae poyapoya ame sinapuna. Tamada ikaaiyaka go, giyakainava bei ikaitomoya, geya itoboineyeta ivanátuna.
492	GEN 19:34	Niga go vanuwo itomo botomoya ana gómana ilatuwoko idigo kana, ‘Guna gómana kunōve. Nuwobuna tamada amasisiye. E sabamgo ame aiyuwoina oine tavini inim ginagina iyaluwo gobe kom kusīu tauyana kumasisīye, e bei tamada goi ida boda ikaiyako vata.’
497	GEN 20:1	E tuwo Eberamo ma monena asa Mamre sikalave go, situliya sina Negevi dadavina moe Kenani sinaena go, youya dadavina. Amoko goi asa Kadesi be Sura nauyayanaidi sikaaiyaka. Niga sina asa Garara goi tuta kaakupina sisuvadavada.
498	GEN 20:2	Amoko goi sikaaiyaka go, koroto maniyedi sima Eberamo monena sigite kadi, ‘Eberamo, moe ava vavina?’ Eberamoyana imatoita, tauna ipoledi idigo kana, ‘Tauyana niugu. Yoina Sera.’ E da Garara adi tolovina yoina Abimeleka ikaaiyaka go, inove Sera moe Eberamo niuna; latuwona ikabi bego monena. Tauna ina pakonayao ilatuwokoidi idigo kana, ‘Kōna Sera kokābi kōme.’
500	GEN 20:4	E kina go Abimelekayana idigo kana, ‘Tomoya, tauyana geya abisikoneyeta. Yau koroto kiboobosigu be nakae guna bodao dedevidi. Go manakae? Kwaumatema?
503	GEN 20:7	Go tuwo! Eberamo yau guna tokabivalavala, tauna vavinayana kwābi, Eberamo kuvinimnēi bei ikawanoi manum, e bei geya kukamaseta. Go sem neta geya kuviniyeta, moitamo kom be nakae im bodao bei akaumatemi.’
506	GEN 20:10	Go kaga unana ame dogoiyana kuguinuwe yaigu?’
508	GEN 20:12	Go tauyana moitamo yau niugu. Tamama tayamo go, sinamao ituli. Niga go, kanai.
511	GEN 20:15	Go idigo kana, ‘Eberamo kunōve. Kumatavilavīla guna poyapoya kugīte. Nako latuwom kwaiyaka, bogina atagona.’
512	GEN 20:16	Go Serayana ilatuwoko kana, ‘Kunōve. Nium siriba ana badabada tayamo tausani (1,000) moe guna takona bogina avini, e bei im bodao liliudi siyagoi bego kom geya kada tayaamo goyo kuguinuwe. Tomota liliudi matadi goi kom geya im pikwanamo.’
521	GEN 21:7	Kana, ‘Geya vatau tayaamo inuwonúwana bego itoboinegu Eberamo natuna avenatuni. Tauyana bogina ikaitomoya go, tuwo natuna avenatuni.’
525	GEN 21:11	Go livalayana Eberamo inove, atena igeda unana Isimaeli nakae natuna.
526	GEN 21:12	Go kina Yaubada idigo kana, ‘Eberamo, atem taabu igedagēda natum be im pákwana pasidi. Guna katótula tubumowo manudi Aisake goi bei imalatomota. Aiyuwoina kina Isimaeliyana natum, tauna bei akisaili, e bei tubunao boda tayamo gagaina. Tauna kaga liliuna Sera ilatuwokoim kuguinuwēdi, e sopana kwabikaōne be kuguinuwēdi.’
530	GEN 21:16	Ago kina sinanayana ibala ina masigava tupwana aduwanau itusobu, nakae itaitáiya. Ina nuwonúwana kana, ‘Bwae ikavava, tauna natugu bei ikámasa. Geya latuwogu gómana matagu goi go, ivailai.’
531	GEN 21:17	Ago gomanayana ina táiya Yaubada inove, tuwo ina anerose yábana goi itumasobu idigo kana, ‘Ega, kaga kutaiyae? Taabu kuumatōita. Gomanayana amoko goi iitusobu ina táiya Yaubada bogina inove.
536	GEN 21:22	E amo tutayana da Garara adi tolovina Abimeleka ina tovayaviyayao adi tovakumgo yoina Pikoli taiyao sina Eberamo silatuwoko sidigo kadi, ‘Eberamo, im guinuwa liliudi goi Yaubada ivakitaum bogina kagite.
539	GEN 21:25	Eberamoyana itagona go, Abimeleka ikamatanako kana, ‘Go im pakonayao guna doelu situugagale. Go bei kaga kuguinuwe?’