1	GEN 1:1	Aba vatowo goi Yaubada kaga liliuuna iwodugudi, nakae yábana be poyapoya.
2	GEN 1:2	Ego poyapoyayana ame geya ana katubayasinamo be nakae daakakaina. Go madabokina bwae dimówana ilatao. Dimowanayana yatanaina goi kokonótuya gagaina ikaaiyaka nakae Yaubada Balomaina itaakavata.
4	GEN 1:4	Mavadayana igite dedevina, e iuyaone. Imadagi ikavava, mavada be kokonótuya ikiwotaidi, e mavada ituli, kokonótuya ituli.
5	GEN 1:5	E mavadayana ivayou maliyalina go, kokonotuyayana ivayou sabamgo. Lavilavi ima namlieta nobuyana ima. Moe maliyalina vakuumgoina bogina ikavava.
6	GEN 1:6	E Yaubada sopana goi imadágina idigo kana, ‘Sekulapeya kusowōduwo go, bwae kuwotāi.’
7	GEN 1:7	E tauna nakae isowóduwo. Sekulapeyayana isowóduwo, e bwaeyana iwotai. Bwae diligaema ituli, bwae ditonema ituli.
8	GEN 1:8	Sekulapeyayana ivayoko yábana. Lavilavi ima namlieta nobuyana ima. Moe maliyalina aiyuwoina bogina ikavava.
9	GEN 1:9	E Yaubada sopana goi imadágina idigo kana, ‘Bwae ditonema, kōna dadava tayamo goi kolamgōgana bei dadava tayamo sayasayaina isowóduwo!’ E tauna nakae isowóduwo.
11	GEN 1:11	Aiyuwoina Yaubada idigo kana, ‘Poyapoya, kom goi náuna sisūsuwo go, limou sidīdi be nakae kokowoika keuwoidi sikéuwo, taudi nakae ma kutukutudi.’ E tauna nakae isowóduwo.
13	GEN 1:13	Lavilavi ima namlieta nobuyana ima. Moe maliyalina aitonina bogina ikavava.
14	GEN 1:14	E Yaubada sopana goi imadágina idigo kana, ‘Aba mavada yábana osasaina goi kosowōduwo, bei maliyalina nakae sabamgo kowotaidi! Aba mavadayami moe aba kinana maliyalina, tukówana be nakae tala tamo tamo manudi.
16	GEN 1:16	Aba mavadayadi aiyuwo gagaidi iwodugudi, tayamo gagaina toina moe maliyalina iloovinae go, tayamo tupwana giyaina moe sabamgo iloovinae. Go utuna nakae taiyao iwodugudi.
18	GEN 1:18	be maliyalina sabamgo siloviinaedi be nakae mavada kokonótuya siwootaidi. Yaubada igitedi dedevidi, e iuyaonedi.
19	GEN 1:19	Lavilavi ima namlieta nobuyana ima. Moe maliyalina aivasina bogina ikavava.
21	GEN 1:21	Tauna Yaubada íyana gagaidi be kaga liliuna maa yawoidi be nakae mánuwo liliudi iwodugudi, taudi idi sinapu nakae. Yaubada igitedi dedevidi, e iuyaonedi.
22	GEN 1:22	E ikaipakuyedi idigo kana, ‘Négwasa iyaiyanimi kosusāila gagaina, e negwasayana kovakayaodēi. Mánuwo nakae, poyapoya goi kosusāila.’
23	GEN 1:23	Lavilavi ima namlieta nobuyana ima. Moe maliyalina ainimaina bogina ikavava.
24	GEN 1:24	E Yaubada sopana goi imadágina idigo kana, ‘Poyapoya, kom goi kaga liliuna maa yawoidi sisowōduwo, maisidi taudi nakae, yoguyogu daladalaidi, bolitavanu be woiwoi, gagaidi be giyaidi.’ E tauna nakae sisowóduwo.
25	GEN 1:25	Kaga liliuna maa yawoidi, bolitavanu be woiwoi be nakae yoguyogu daladalaidi iwodugudi go, igitedi dedevidi, e iuyaonedi.
26	GEN 1:26	E Yaubada sopana goi imadágina idigo kana, ‘Tomota taodugūdi ada tapata, tauyadi kita nakae. Tauna íyana, mánuwo, bolitavanu, yoguyogu daladalaidi be nakae kaga liliuna maa yawoidi poyapoya ame goi sikaaiyaka bei sikalibubudi.’
28	GEN 1:28	Iwodugudi ikavava, ikaipakuyedi idigo kana, ‘Kosusāila be poyapoya kovakayaodēi, e poyapoyayana koepaisēwe ami dedevina manuna. Nakae íyana, mánuwo be nakae kaga liliuna maa yawoidi poyapoya goi sidaladala kokaliibubūdi.’
29	GEN 1:29	Kana, ‘Konōve! Náuna kutukutudi liliudi be nakae kokowoika keuwoidi liliudi bogina avinimi moe avami.
30	GEN 1:30	Woiwoi liliudi gagaidi be giyaidi, mánuwo liliudi, kaga liliuna poyapoya goi sidaladala nakae maa yawoidi, e náuna liliudi avinidi, moe avadi.’ E tauna nakae isowóduwo.
31	GEN 1:31	Kaga liliuna Yaubada bogina iwoodugudi igitedi madabokina moe dedevidi, e iuyaonedi gagaina. Lavilavi ima namlieta nobuyana ima. Moe maliyalina ainima tayamoina bogina ikavava.
32	GEN 2:1	Moeko goi yábana be poyapoya be nakae kaga liliuna adi madágina bogina ikavava.
33	GEN 2:2	Tuwo maliyalina ainima tayamoina goi Yaubada ina paisewa ilukavavedi go, maliyalina ainima aiyuwoina ina paisewa madabokina goi iwaiwasi.
34	GEN 2:3	Ago maliyalinayana ikaipakuye sowona be nakae ikimasabe toinina umana unana ina paisewa madabokina bogina ikavava, e maliyalinayana goi iwaiwasi. Tauna ikaipakuye be ikimasabe.
35	GEN 2:4	Ame kaga liliuna sisowóduwo yábana be poyapoya goi tetelidi boi tutayana Yauwe Yaubada iwodugudi.
36	GEN 2:5	E Yauwe Yaubada kúwana nava geya ietuneyeta poyapoya goi be nakae geya tayaamo avatau ikaaiyaka bei ibágula, tauna náuna poyapoyayana goi nava geya sisowoduwoita nakae geya kada tayaamo kutukutu itabo geya.
37	GEN 2:6	Kúwana geya go, bwae doelu goi ituko imamaima bei poyapoya ana madabokina ivakaanapoive.
38	GEN 2:7	E amo tutayana Yauwe Yaubada poyapoya kaukauna ikabi, koroto imolului. Imolului ikavava, kubuna goi yawoina isalauwe, e korotoyana maa yawoina.
39	GEN 2:8	E Yauwe Yaubada alova tanuina tayamo Ideni goi ikatubayasi, moe bomatu dadavina. Amoko goi korotoyana bogina iiwodugu iyato.
40	GEN 2:9	Iyato go, alova liliudi neta adi kaigigita dedevidi be nakae keuwoidi adi káika dedevidi ilovinaedi poyapoya goi sitabo. Ego tanuwoyana nauyayanaina goi alova aiyuwo sikaaiyaka, tayamo neta tomota sikani, e yawoidi vata sibabane. Ago tayamo neta tomota sikani, e dedevina be goyo adi nanamsa siyagoidi.
41	GEN 2:10	E sákala tayamo Ideni goi idaudau tanuwoyana ivakaanapoive. Sakalayana Ideni goi isowóduwo iwotai, e sákala aivasi sidau.
42	GEN 2:11	Sákala tayamo yoina Paisoni idau ina asa Kevila idaunibisi go, amoko goi goura ikaaiyaka.
43	GEN 2:12	Amo asayana ana goura moe dedevina toina. Pútuma dedevina toina yoina bidelium be nakae gurewa maisana gagaina yoina anikisi nakae sikaaiyaka.
44	GEN 2:13	Sákala aiyuwoina yoina Gikoni. Ame sakalayana asa Kosa idaunibisi.
45	GEN 2:14	Sákala aitonina yoina Tigirisi. Ame sakalayana asa Asiriya bomatu dadavina goi idau. Sákala aivasina yoina Yuparetisi.
47	GEN 2:16	Iyato ikavava, ina lovina ivini idigo kana, ‘Alova keuwoidi madabokidi tánuwo goi atagonem kukanidi
48	GEN 2:17	go, dedevina be goyo adi nanamsa alovaina taabu kukanikāni. Neta kukani, e moitamo toina bei kukámasa. Tauna taabu kukanikāni.’
50	GEN 2:19	E tuwo poyapoya ikabi, yoguyogu be mánuwo liliudi iwodugudi. Iwodugudi ikavava, imedi korotoyana yaina. Latuwona iyagoi korotoyana manakaena bei tamo tamo ivayoudi. Neta ava you iivinidi, e moe yoidi.
51	GEN 2:20	Tuwo moitamo korotoyana yoguyogu be mánuwo be woiwoi liliudi ivayoudi go, geya kada tayaamo yoguyogu itoboine bei tauyana ina tovaita geya.
52	GEN 2:21	Tauna korotoyana matamasimasisi gagaina kina Yauwe Yaubada ivini ikanamatáiya. Ikanaamatáiya go, korotoyana silalumina tayamo ikabi, íwaya iyato, silaluminayana kiyauna ivasumapu.
53	GEN 2:22	Ivasumapu ikavava, silaluminayana ikabi, vavina iwodugu. Iwodugu ikavava, ikabi ime korotoyana yaina.
54	GEN 2:23	Tuwo korotoyana idigo kana, ‘E ame moitamo! Ame tauyana luluna, yau lulugu maisiyana. Nakae sakavaina, yau sakavaigu maisiyana. Yau silalumigu goi isowóduwo, e maisiyagu. Tauna tauyana yoina moe vavina.’
57	GEN 3:1	E moteta tonuwosinapu gagaina. Nakae woiwoi madabokidi Yauwe Yaubada iwoodugudi ikalisavedi. Tauyana ima vavina ilatuwoko idigo kana, ‘Iyaa! Moitamo Yaubada idigodigo bego alova keuwoidi madabokiidi tánuwo sinaena taabu kookanīdi, ae?’
58	GEN 3:2	Go kina vavinayana idigo kana, ‘Geya! Tánuwo alovaidi keuwoidi mama tagona kakanidi
59	GEN 3:3	go, Yaubada alova tayamo isanabode idigo kana, “Alova tánuwo nauyayanaina, e keuwoina taabu kokanikāni be nakae taabu kobiisikōne, govila bei kokámasa.”’
61	GEN 3:5	Moitamo. Yaubada iyagoi neta keuwoinayana kokani, nukotomi ikipolaledi, e komi Tauyana nakae, dedevina be goyo koyagoidi.’