1	GEN 1:1	Aba vatowo goi Yaubada kaga liliuuna iwodugudi, nakae yábana be poyapoya.
2	GEN 1:2	Ego poyapoyayana ame geya ana katubayasinamo be nakae daakakaina. Go madabokina bwae dimówana ilatao. Dimowanayana yatanaina goi kokonótuya gagaina ikaaiyaka nakae Yaubada Balomaina itaakavata.
3	GEN 1:3	E Yaubada sopana goi imadágina idigo kana, ‘Mavada kusowōduwo!’ E mavadayana isowóduwo.
6	GEN 1:6	E Yaubada sopana goi imadágina idigo kana, ‘Sekulapeya kusowōduwo go, bwae kuwotāi.’
7	GEN 1:7	E tauna nakae isowóduwo. Sekulapeyayana isowóduwo, e bwaeyana iwotai. Bwae diligaema ituli, bwae ditonema ituli.
8	GEN 1:8	Sekulapeyayana ivayoko yábana. Lavilavi ima namlieta nobuyana ima. Moe maliyalina aiyuwoina bogina ikavava.
9	GEN 1:9	E Yaubada sopana goi imadágina idigo kana, ‘Bwae ditonema, kōna dadava tayamo goi kolamgōgana bei dadava tayamo sayasayaina isowóduwo!’ E tauna nakae isowóduwo.
10	GEN 1:10	Imadagi ikavava, dadavayana sayasayaina ivayoko poyapoya go, bwaeyana ivayoko négwasa. Igitedi dedevidi, e iuyaonedi.
11	GEN 1:11	Aiyuwoina Yaubada idigo kana, ‘Poyapoya, kom goi náuna sisūsuwo go, limou sidīdi be nakae kokowoika keuwoidi sikéuwo, taudi nakae ma kutukutudi.’ E tauna nakae isowóduwo.
12	GEN 1:12	Poyapoya goi náuna madabokidi nakae sisúsuwo. Yaubada igitedi dedevidi, e iuyaonedi.
14	GEN 1:14	E Yaubada sopana goi imadágina idigo kana, ‘Aba mavada yábana osasaina goi kosowōduwo, bei maliyalina nakae sabamgo kowotaidi! Aba mavadayami moe aba kinana maliyalina, tukówana be nakae tala tamo tamo manudi.
15	GEN 1:15	Komi aba mavada yábana osasaina goi konininīma bei poyapoya koomavade.’ E tauna nakae sisowóduwo.
16	GEN 1:16	Aba mavadayadi aiyuwo gagaidi iwodugudi, tayamo gagaina toina moe maliyalina iloovinae go, tayamo tupwana giyaina moe sabamgo iloovinae. Go utuna nakae taiyao iwodugudi.
17	GEN 1:17	Iwodugudi ikavava, yábana osasaina goi iyatoidi bei sininínima poyapoya siimavade
20	GEN 1:20	E Yaubada sopana goi imadágina idigo kana, ‘Négwasa iyaiyanimi badabadaimi kosowōduwo! Nakae mánuwo kosowōduwo, e poyapoya yábana osasaidi goi koyovayōva!’
21	GEN 1:21	Tauna Yaubada íyana gagaidi be kaga liliuna maa yawoidi be nakae mánuwo liliudi iwodugudi, taudi idi sinapu nakae. Yaubada igitedi dedevidi, e iuyaonedi.
22	GEN 1:22	E ikaipakuyedi idigo kana, ‘Négwasa iyaiyanimi kosusāila gagaina, e negwasayana kovakayaodēi. Mánuwo nakae, poyapoya goi kosusāila.’
24	GEN 1:24	E Yaubada sopana goi imadágina idigo kana, ‘Poyapoya, kom goi kaga liliuna maa yawoidi sisowōduwo, maisidi taudi nakae, yoguyogu daladalaidi, bolitavanu be woiwoi, gagaidi be giyaidi.’ E tauna nakae sisowóduwo.
26	GEN 1:26	E Yaubada sopana goi imadágina idigo kana, ‘Tomota taodugūdi ada tapata, tauyadi kita nakae. Tauna íyana, mánuwo, bolitavanu, yoguyogu daladalaidi be nakae kaga liliuna maa yawoidi poyapoya ame goi sikaaiyaka bei sikalibubudi.’
27	GEN 1:27	Tomota iwodugudi Tauyana toinina ana tapata. Moitamo, ana tapata iwodugudi. Tomotayadi koroto be vavina iwodugudi.
28	GEN 1:28	Iwodugudi ikavava, ikaipakuyedi idigo kana, ‘Kosusāila be poyapoya kovakayaodēi, e poyapoyayana koepaisēwe ami dedevina manuna. Nakae íyana, mánuwo be nakae kaga liliuna maa yawoidi poyapoya goi sidaladala kokaliibubūdi.’
30	GEN 1:30	Woiwoi liliudi gagaidi be giyaidi, mánuwo liliudi, kaga liliuna poyapoya goi sidaladala nakae maa yawoidi, e náuna liliudi avinidi, moe avadi.’ E tauna nakae isowóduwo.
32	GEN 2:1	Moeko goi yábana be poyapoya be nakae kaga liliuna adi madágina bogina ikavava.
33	GEN 2:2	Tuwo maliyalina ainima tayamoina goi Yaubada ina paisewa ilukavavedi go, maliyalina ainima aiyuwoina ina paisewa madabokina goi iwaiwasi.
34	GEN 2:3	Ago maliyalinayana ikaipakuye sowona be nakae ikimasabe toinina umana unana ina paisewa madabokina bogina ikavava, e maliyalinayana goi iwaiwasi. Tauna ikaipakuye be ikimasabe.
35	GEN 2:4	Ame kaga liliuna sisowóduwo yábana be poyapoya goi tetelidi boi tutayana Yauwe Yaubada iwodugudi.
36	GEN 2:5	E Yauwe Yaubada kúwana nava geya ietuneyeta poyapoya goi be nakae geya tayaamo avatau ikaaiyaka bei ibágula, tauna náuna poyapoyayana goi nava geya sisowoduwoita nakae geya kada tayaamo kutukutu itabo geya.
37	GEN 2:6	Kúwana geya go, bwae doelu goi ituko imamaima bei poyapoya ana madabokina ivakaanapoive.
38	GEN 2:7	E amo tutayana Yauwe Yaubada poyapoya kaukauna ikabi, koroto imolului. Imolului ikavava, kubuna goi yawoina isalauwe, e korotoyana maa yawoina.
40	GEN 2:9	Iyato go, alova liliudi neta adi kaigigita dedevidi be nakae keuwoidi adi káika dedevidi ilovinaedi poyapoya goi sitabo. Ego tanuwoyana nauyayanaina goi alova aiyuwo sikaaiyaka, tayamo neta tomota sikani, e yawoidi vata sibabane. Ago tayamo neta tomota sikani, e dedevina be goyo adi nanamsa siyagoidi.
41	GEN 2:10	E sákala tayamo Ideni goi idaudau tanuwoyana ivakaanapoive. Sakalayana Ideni goi isowóduwo iwotai, e sákala aivasi sidau.
45	GEN 2:14	Sákala aitonina yoina Tigirisi. Ame sakalayana asa Asiriya bomatu dadavina goi idau. Sákala aivasina yoina Yuparetisi.
46	GEN 2:15	E korotoyana kina Yauwe Yaubada ikabi, tánuwo Ideni goi iyato bei ipaaisewa Yaubada umana be nakae tanuwoyana imataakavate.
50	GEN 2:19	E tuwo poyapoya ikabi, yoguyogu be mánuwo liliudi iwodugudi. Iwodugudi ikavava, imedi korotoyana yaina. Latuwona iyagoi korotoyana manakaena bei tamo tamo ivayoudi. Neta ava you iivinidi, e moe yoidi.
52	GEN 2:21	Tauna korotoyana matamasimasisi gagaina kina Yauwe Yaubada ivini ikanamatáiya. Ikanaamatáiya go, korotoyana silalumina tayamo ikabi, íwaya iyato, silaluminayana kiyauna ivasumapu.
53	GEN 2:22	Ivasumapu ikavava, silaluminayana ikabi, vavina iwodugu. Iwodugu ikavava, ikabi ime korotoyana yaina.
55	GEN 2:24	E tauna moe pasina koroto tamana be sinana yaidi itumasaba go, monena taiyao situyuwo, tauna adi taiyuwokova wowodi tayamo.
56	GEN 2:25	Korotoyana ma monena adi taiyuwo sipawaku go, geya siomaemaeta.
57	GEN 3:1	E moteta tonuwosinapu gagaina. Nakae woiwoi madabokidi Yauwe Yaubada iwoodugudi ikalisavedi. Tauyana ima vavina ilatuwoko idigo kana, ‘Iyaa! Moitamo Yaubada idigodigo bego alova keuwoidi madabokiidi tánuwo sinaena taabu kookanīdi, ae?’
61	GEN 3:5	Moitamo. Yaubada iyagoi neta keuwoinayana kokani, nukotomi ikipolaledi, e komi Tauyana nakae, dedevina be goyo koyagoidi.’
63	GEN 3:7	Sikani ikavava, mainao adi taiyuwokova nukotodi ikipolaledi, tauna siyagoi sipawaku. Tuwo lao vagana siguledi, sigilumidi adi tabodaboda.
66	GEN 3:10	‘Tánuwo goi aem butukáona anove go, apawaku, tauna amatoita, tuwo avatamtamumuyem’, korotoyana kaena.
67	GEN 3:11	Go Yaubada idigo kana, ‘Avatau ilatuwokoim bego kom kupawaku? Manakae? Alovayana keuwoina asanaabodem bogina kukani?’
70	GEN 3:14	Tuwo Yauwe Yaubada itaoya, motetayana ilatuwoko idigo kana, ‘Moe im guinuwa pasina akatubolatem. Yoguyogu madabokiidi yaidi goi kom amta sikasilaliyem. Yawoim madabokina gamom goi bei kudaladala, e poyapoya tobum goi bei ikaaiyaka.
73	GEN 3:17	E Adama ilatuwoko idigo kana, ‘Kom pasim poyapoya akatubolate unana monem sopana kukabikaone, e keuwoinayana boi asanaabodem taabu kukanikāni go, tuwo kukani. Yawoim ana madabokina goi bei mam gedageda kukokōila gagaina bego avam kubabane.
74	GEN 3:18	Go náuna nakae taliboibo poyapoyayana goi bei sitabo manum. Ago pai be awoinu bei kukakáika.
75	GEN 3:19	Mam mosali bei kupaaisewa gagaina bego avam kubabane ana kadókana kukámasa, e kwaluvila kuna poyapoya goi. Bogina kuyagoi. Poyapoya goi aodugum. Moitamo. Kom taum poyapoyayana ana vaituwo, tauna bei kwaluvila kuna poyapoyayana goi. Tutayana kukámasa, bei kumalapoyapoyamna.’
79	GEN 3:23	E tuwo moitamo tánuwo Ideni goi ivalilivedi sina go, Adama poyapoya goi bei ibágula. Ego amo poyapoyayana goi boi Yauwe koroto iwodugu!
80	GEN 3:24	Tuwo ivatapiyedi ikavava, e tanuwoyana Ideni ana kaba siu goi moe bomatu dadavina yábana ana tomatakavatayao iyatoidi. Tayamo sisi yeu sabeninimina iyato go, sisiyana ikaivivilo bego aba siu itubode. Moe dogoiyadi iyatoidi bego geya vatau tayaamo bei tanuwoyana goi isiu ina yawana vata alovaina keuwoina ikabi, ikani.
82	GEN 4:2	Niga aiyuwoina ivenátuna, natuna koroto moe Keni siyana yoina Ebeli. Sikaiyaka, gogómana sibíbina gagaidi. E kina go Ebeliyana yoguyogu sipi ana tomatakavata go, kina Keniyana tobágula.
84	GEN 4:4	E kina go Ebeliyana nakae ina vininabeso moe sipi bonatudiyao botomoya be saabalidi, e ikaumatedi. Ikavava, imedi Yauwe yaina ikasaledi. Yauwe igitedi, e Ebeli be ina vininabesoyadi iuyaonedi
85	GEN 4:5	go, Keniyana be ina vininabesoyadi geya iuyaonedita. Tuwo Keni gamona igoyo toina, e kubuna ipulu.
86	GEN 4:6	E Yauwe idigo kana, ‘Keni, kaga unana gamom igoyo? Kaga unana kubum ipulu?
90	GEN 4:10	Go kina Yauwe idigo kana, ‘Moe kaga kuguinuwe! Kunōve! Siyam ikaikaina tomota nakae poyapoya goi itaiyaduduwo yau yaigu. Latuwona im kaumata pasina yau akatumapum.
91	GEN 4:11	E tauna ame tuta im guinuwa pasina akatubolatem. Poyapoya goi avalilivem, tauna geya tuwaina bei itoboinem poyapoya goi kubágula. Ame poyapoyayana siyam ikaikaina inim tutayana kwaumate.
92	GEN 4:12	Bego poyapoyayana goi kubágula go, kom manum poyapoya ilogoyo. Tauna poyapoya ame goi kom bei kuketoiya beso; geya im kasamo.’
94	GEN 4:14	Kunōve! Ame bei poyapoya ame goi kuvatapiyegu, tauna matam goi geya itoboineguta akaaiyaka. Tuwo bei poyapoya ame goi avabebeo beso unana geya guna kasamo. Tauna avatau neta ibabanegu, bei ikaumategu.’
95	GEN 4:15	Tuwo kina Yauwe idigo kana, ‘Moe nakae geya. Ame nakae bei aguinuwe: Avatau neta ikaumatem, tauyana ana katumapu moe aliune gagaina toina.’ E tuwo tayamo aba kinana Keni goi iyato, govila bei avatauwa neta tauyana sibabane sikaumate.
100	GEN 4:20	Edayana ivenátuna, natuna koroto yoina Yabali. Tauyana yoyou parai goi igimimasisi go, yoguyogu sipi be bulumakau imatakaavatedi. Ago tubunao giyaidi nakae siguinuwe, situliya asa tamo tamo.
101	GEN 4:21	Yabaliyana siyana yoina Yubali. Tauyana api ana láuwo be kokopi ana uwa unadi.
103	GEN 4:23	E tuta tayamo Lemeki mana gágasa monenao adi taiyuwo ilatuwokoidi idigo kana, ‘Eda be Sila, guna livala konovedokōidi. Tubuwau ilauigu nakae ipwaikigu go, tauyana akaumate.
104	GEN 4:24	Neta Keni ana kámasa ana katumapu moe Yaubada bei tokaumata iliune gagaina toina, e neta yau silauigu, guna láuwo ana katumapu moe bei gagaina toina namlieta Keni ina kámasa ana katumapu.’
105	GEN 4:25	E Adama monena taiyao aiyuwoina simasisimna, e ikéuwama, ivenátuna natuna koroto. Monenayana idigo kana, ‘Yaubada natugu ivinigu Ebeli ana katumapu unana Keni ikaumate.’ Tauna natuna ivayou Seti.
107	GEN 5:1	E buki ame moe Adamayana ana liliu bukina: Tutayana Yaubada tomota iwodugu, toinina ana tapata nakae iwodugu.
108	GEN 5:2	Tomotayadi koroto be vavina iwodugudi. Ikavava, ikaipakuyedi go, ivayokoidi tomota tutayana iwodugudi.
109	GEN 5:3	E Adama ana tala ana badabada tayamo andedi teti (130) tutayana natuna koroto ibíbina. Gomanayana tamana Adama ana tapata, e Adamayana nakae. E ivayou Seti.
112	GEN 5:6	E Setiyana ana tala ana badabada tayamo andedi paibi (105) tutayana natuna koroto yoina Enosi ibíbina.
116	GEN 5:10	Kenani ana bíbina mlina, Enosiyana ikaaiyaka tala ana badabada eita andedi piptin (815) tuwaina. Ego amo talayadi goi natunao koroto be vevina liliudi sibíbina.
117	GEN 5:11	Tauyana ana tala madabokina moe nain andedi paibi (905), e ikámasa.