12	GEN 1:12	Poyapoya goi náuna madabokidi nakae sisúsuwo. Yaubada igitedi dedevidi, e iuyaonedi.
36	GEN 2:5	E Yauwe Yaubada kúwana nava geya ietuneyeta poyapoya goi be nakae geya tayaamo avatau ikaaiyaka bei ibágula, tauna náuna poyapoyayana goi nava geya sisowoduwoita nakae geya kada tayaamo kutukutu itabo geya.
37	GEN 2:6	Kúwana geya go, bwae doelu goi ituko imamaima bei poyapoya ana madabokina ivakaanapoive.
43	GEN 2:12	Amo asayana ana goura moe dedevina toina. Pútuma dedevina toina yoina bidelium be nakae gurewa maisana gagaina yoina anikisi nakae sikaaiyaka.
87	GEN 4:7	Neta im guinuwa dedevina, bei mam uyáwana ae? Go neta im guinuwa geya idedevineta, e bágala yoguyogu sasasaina nakae totom goi iyokabúbuna; latuwona kom ilovinaem go, ina togaga kulovināe.’
102	GEN 4:22	E kina Silayana nakae ivenátuna, natuna koroto yoina Tubali Keni, tauyana kainum goi turu iwodúguna. Tauyana niuna yoina Nama.
127	GEN 5:21	E Enokiyana ana tala ana badabada sikstipaibi (65) tutayana natuna koroto yoina Metúsela ibíbina.
128	GEN 5:22	Metúsela ana bíbina mlina, Enokiyana iiketoiya nakae Yaubada iuyaone tala ana badabada teri andedi (300). Ego amo talayadi goi natunao koroto be vevina liliudi sibíbina.
154	GEN 6:16	Go lupa ana tukotuko aba katugúyala. Niga ina kátava kukāu. Kukau ikavava, kikina goi ana niboda kuyāto. Go ana bósima aito, tayamo ditonema, tayamo diligaema be nakae tayamo nauyayana.
164	GEN 7:4	Moe nakae kuguinūwe unana maliyalina ainima aiyuwo mlidi kúwana bei aetune isou iwo maliyalina poti be nakae sabamgo poti. Kaga liliuna ma yawoidi poyapoya goi boi aoodugudi bei asamatedi. Tauna yoguyogu be mánuwo kudodōidi.’
172	GEN 7:12	e kúwana gagaina isou ima poyapoya goi maliyalina poti (40) be nakae sabamgo poti (40).
186	GEN 8:2	Yaubada doelu ikaubodedi, tauna adi dau sisayata. Kúwana yábana goi nakae ikaubode, tauna kuwanayana idoideo.
205	GEN 8:21	E yoguyogu aiigabudi mainidi dedevina ituko ina Yauwe yaina, e maininayana inove dedevina toina, ivauyaone go, toinina inuwonúwana kana, ‘Tomota idi yalagau nuwodi goi sigoyo adi bíbina kunu goi go, tuwo tomotayadi idi guinuwa pasidi geya tuwaina bei poyapoya abugoyai. Nakae geya tuwaina bei kaga liliuna maa yawoidi amtulidi nakae ame bogina aguinuwe.
206	GEN 8:22	Poyapoya ame ina kaiyaka madabokina goi bágula be dibayoya adi tuta, tula be yaviyavi adi tuta, losiye be kúwana adi tuta, maliyalina be sabamgo geya sikavaveta.’
243	GEN 10:8	E kina go Kosayana natuna koroto tayamo yoina Nimrodi, tauyana togilúluna tayamo poyapoya ame goi.
244	GEN 10:9	Yauwe matana goi Nimrodiyana tovakauko toogagaina. Tauna tauyana tomota adi kaba katutúkwana. Avatau neta nakae iguuinuwe tomota siyapaliye kadi, ‘Tauyana Nimrodi nakae; tauyana tovakauko toogagaina Yauwe matana goi.’
254	GEN 10:19	Tuwo Kenani tubunaoyadi adi túwana ivatowo Saidoni goi ina Garara, moe Gasa goi. Ana papaeva nakae Sodoma, Gamora, Adima be Siboim goi ina asa Lasi goi.
269	GEN 11:2	E tutayana tomota situliya sina bomatu dadavina, dúmiya gagaina Sinari goi sibabane. Tuwo amoko goi silokasa.
311	GEN 12:12	Tutayana Itipita korotoidi sigitem, bei sinuwonúwana kadi, “Ame vavinayana Eberam monena.” Tuwo bei sikaumategu go, kom sem maa yawoim sikabim.
313	GEN 12:14	E tuwo moitamo tutayana Itipita goi sisiu, Itipita korotoidi sikandobala Serai sigite idi nuwonúwana kadi, ‘Amo vavinayana gumaboina toina.’
314	GEN 12:15	E Pero ina topaisewayao adi tovakumgoyao maniyedi sikandobala Serai sigite, tuwo sina Pero silatuwoko sidigo kadi, ‘Ima tomoya, vavina tayamo kagite, tauyana gumaboina toina.’ Tuwo Pero ina lovina goi sina Serai sikabi sime Pero ina vada goi. Idi nuwonúwana bego Serai moe Eberam niuna.
317	GEN 12:18	E Peroyana inuwonúwana kana, ‘Ame vavinayana geya Eberam niuna geya, go sem monena!’ Tuwo Eberam iduduwe ima idigo kana, ‘Eberam, ame kaga kuguinuwe yau yaigu! Kaga unana geya kulatuwokoiguta bego Serai monem!
334	GEN 13:15	Guna nuwonúwana bego ava poyapoyava itoboinem kugite, madabokina kom be nakae im boda bei avinimi be ikaiyako vata yaimi.
354	GEN 14:17	E Eberam Kedolaomera ina tovayaviyayao be senao idi tovayaviyayao ilauidi ikavava, ikaluvila ina ina kasa. Inonoina, Sava Butumina goi Sodoma adi tolovina ima ivalobode. Savayana ana yagoina moe Tokalibúbuna Butumina.
355	GEN 14:18	E kina go da Salema adi tokalibúbuna yoina Melikisedeki ima go, beredi be oine bwaena imedi. Tauyana Yaubada Tokanayatanatoina ana Tonúwala.
378	GEN 15:17	E níyala isaliu, e bogina ikamamaníwana go, Eberam ikandobala igite vaega tayamo isowóduwo. Vaegayana tobuna goi aubowo itukotuko be nakae dúgala ininínima, e yoguyogu boboyuwoidi talaidi nauyayanaidi goi sinonoina.
379	GEN 15:18	E amo maliyalinayana goi Yauwe ikanasíuna Eberam yaina idigo kana, ‘Eberam, akatótula bego im boda poyapoya ame bei avinidi. Poyapoyayana ana túwana ame nakae: Itipita ina sákala gagaina Yuparetisi.
401	GEN 17:3	Tuwo Eberamyana ivatugúyala ikanakabobo go, Yaubada idigo kana,
404	GEN 17:6	Bei akisailim gagaina, e bei kom goi boda badabadaidi sisowóduwo nakae kom tubumowo goi tokalibúbuna maniyedi bei sisowóduwo.
414	GEN 17:16	Bei akaipakuye, e bei tauyana goi natum koroto avinim. Aiyuwoina akaipakuye bei tubunao goi boda badabadaidi sisowóduwo go, bodayadi tubudi moe tauyana. Ago tubunao goi tokalibúbuna maniyedi bei sisowóduwo.’
415	GEN 17:17	Tuwo Eberamo aena ivatugúyala ikanakabobo go, ivanama; ina nuwonúwana kana, ‘Yau guna tala tayamo andedi (100) go, Sera ana tala naintinain (99). Manakae? Itoboinema kavenátuna?’
418	GEN 17:20	E kina go Isimaeli manuna, im kawanoi bogina anove, tauna kunōve. Moitamo tauyana nakae bei akaipakuye. Bei akisaili gagaina, e natunao badabadaidi. Nakae natunao be tubunao akisailidi, e badabadaidi sisowóduwo. Tauyana natunao koroto adi badabada yawou aiyuwo go, tauyadi tokalibúbuna. Niga be tubunao moe boda tayamo gagaina.
422	GEN 17:24	Ego Eberamo ana tala ana badabada naintinain (99) tutayana sakavaina ana kúpwana ibabane.
423	GEN 17:25	Natuna Isimaeli ana tala ana badabada tetin (13) tutayana sakavaina ana kúpwana ibabane.
425	GEN 17:27	Koroto madabokidi ina vada goi, nakona ina vada goi sibíbina o nakona ogaoga goi paakonidi igimonedi, madabokidi nakae sakavaidi adi kúpwana sibabane.
427	GEN 18:2	E Eberamoyana ikandobala koroto adi taito igitedi sitataoya. Igitedi, ina yoyou parai totomna goi isowóduwo, woilina ibala ina ikauyagu yaidi goi, e aena ivatugúyala, ikanakabobo.
437	GEN 18:12	E tuwo Yauwe ina livala inove, tauna ivanama; ina nuwonúwana kana, ‘Ii, yau bogina akainamoya go! Monegu nakae ikaitomoya go, manakae? Masisi ana uyáwana bei alotowomnei?’
442	GEN 18:17	Sigitegite go, Yauwe inuwonúwana kana, ‘Manakae? Eberamo alatuwoko manakaegu bei aguinuwe Sodoma yaina gea geya?
444	GEN 18:19	Guna nuwonúwana geya avamouyeta. Tauyana bogina akatuveko bei natunao nakae tubunao ilovinaedi kana, “Yauwe ina kenao goi taaketōiya ame nakae: Nuwona takiboobosīdi be nakae takínona vavasa taguuinūwe. Neta nakae taguuinuwe, e Yauwe ina katótula bei isowóduwo komi be yau yaida.”’
459	GEN 19:1	E bogina lavilavi go, anerose adi taiyuwo bogina sisou sina Sodoma. Kina go Loti asa ana kaba siu goi iitusobu. Iitusobu, ikandobala aneroseyadi igitedi simamaima. Tuwo itaoya ina ivalobodedi ikauyagu yaidi go, ivatugúyala ikanakabobo,
472	GEN 19:14	E Loti vada goi isowóduwo ina natunao adi kamatakwanayao ibabanedi, e ilatuwokoidi idigo kana, ‘Kotāoya! Giyakainava bei Yauwe asa ame madabokina imtulidi. Tauna woilīmi kosīya!’ Go korotoyadi sinuwonúwana kadi, ‘Loti nakona ivaponuponu.’
507	GEN 20:11	Eberamoyana idigo kana, ‘Unana anuwonúwana bego ameko goi Yaubada geya kowowoineyeta, tauna amatoita koroto tayamo bei ikaumategu bego Serayana ikabi.
521	GEN 21:7	Kana, ‘Geya vatau tayaamo inuwonúwana bego itoboinegu Eberamo natuna avenatuni. Tauyana bogina ikaitomoya go, tuwo natuna avenatuni.’
530	GEN 21:16	Ago kina sinanayana ibala ina masigava tupwana aduwanau itusobu, nakae itaitáiya. Ina nuwonúwana kana, ‘Bwae ikavava, tauna natugu bei ikámasa. Geya latuwogu gómana matagu goi go, ivailai.’
535	GEN 21:21	Yoyowoyana goi sikaaiyaka, sinana inuwonúwana kana, ‘Vavina tayamo guma Itipita akabi, natugu monena.’ Tuwo vavina tayamo ikabi ime, natunayana monena.
549	GEN 22:1	E Eberamo ikaaiyaka go, Yaubada inuwonúwana kana, ‘Moitamo Eberamo bei sopagu ikabikaone gea geya? Tuwo bei avakakone, agite.’ E idigo kana, ‘Eberamo!’ ‘U, amegu’, Eberamoyana kaena.
575	GEN 23:3	Itáiya ikavava, mana nuwomou inuwonúwana kana, ‘Nako goi bei avaliwoge?’ Inuwonúwana geya, tuwo itaoya ina Eta tubunao ilatuwokoidi idigo kana,
579	GEN 23:7	Tuwo Eberamoyana itaoya, Eta tubunaoyadi matadi goi ivatugúyala
580	GEN 23:8	go, idigo kana, ‘Neta moitamo imi nuwonúwana bego ameko goi guna tomata avaliwoge, e konovēgu. Sokara natuna Epironi yaina goi kokawanōi manugu
582	GEN 23:10	E kina go Epironiyana ina bodao nauyayanaidi iitusobu asa ana kaba siu goi moe idi kaba tugúguna. Tuwo senao liliudi matadi goi itaoya, Eberamoyana ilatuwoko idigo kana,
594	GEN 24:2	Go tauyana imatoita inuwonúwana kana, ‘Bei akámasa go, natugu inai beso Kenani goi.’ Tuwo ina pákwana vakuumgoina iduduwe ima. Eberamo konana madabokidi tauyana irugwaausidi. Ima, e Eberamo idigo kana, ‘Nimam kuvaisīu dibuwatugu kuyōisi go,
602	GEN 24:10	Ikatótula ikavava, ina ina tomoya Eberamo ina kameri ana badabada yawou ikabidi, ikatubayasidi. Ikatubayasi ikavava, búwana dedevidi badabadaidi ikabidi, idodoidi. Idodoidi ikavava, senao taiyao sina Aram Naraim isiu ina Nakori ina kasa.
603	GEN 24:11	Siketoiya, siketoiya, sisowóduwo asayana ina doelu goi, e kameri silovinaedi bego sivatugúyala siwaiwasi. Moe bogina lavilavi, e vevina adi tuta bwae sitegatega.
618	GEN 24:26	Tuwo korotoyana aena ivatugúyala Yauwe yaina goi isakululu,
640	GEN 24:48	aegu avatugúyala Yauwe yaina asakululu be nakae Tauyana ayapaliye. Tauyana guna tomoya Eberamo ina Yaubada. Enao aba numisa goi bogina ivakedegu ama guna tomoya ana gómana tubuna yaina bego akabi anave natuna monena.
641	GEN 24:49	E komi Eberamo boda tayamo. Tauna manakae? Neta guna tomoya Eberamo bei kokubunuwe be nakae imi guinuwa goi komi bei aba numisa tauyana yaina, e kolatuwokōigu, e vavinayana akabi anave. Go geya, kolatuwokōigu bei imi nuwonúwana ayagoi, e bei ana alusala aivina kenao sikaaiyaka Aisake monena.’
642	GEN 24:50	E Betuweli ma natuna Lebani taiyao sidigo kadi, ‘Ame Yauwe ina guinuwa, tauna kai ima nuwonúwana dogoi besobeso.
644	GEN 24:52	Tutayana Eberamo ina pakonayana idi livala inove, Yauwe matana goi aena ivatugúyala.
645	GEN 24:53	Ikavava, goura be siriba pasapasa be nakae kwama ikabidi Ribeka ivini. E nakae búwana maisadi gagaidi Ribeka niuna be sinana ivinidi.
649	GEN 24:57	Kidi kadi, ‘Tauyana taduduwe ima go, talumadade bei ina nuwonúwana tayagoi.’
655	GEN 24:63	Lavilavi tayamo iiketoiya yoyowo goi inuwonúwana go, ikandobala kameri igitedi simamaima.
677	GEN 25:18	E tauyadi natunao be tubunao silokasa Kevila be Sura nauyayanaidi goi, moe Itipita idi túwana kikina neta kunonoina bego Asiriya. Ago Isimaeli natunao Aisake natunao sivakaleyedi.
681	GEN 25:22	Ikéuwama go, gamona goi gogómana lalavi sivadidídina, tuwo Ribekayana ina nuwonúwana kana, ‘Kaga unana ame isowóduwo yau yaigu?’ Tuwo ikawanoi Yauwe yaina; latuwona bego iyagoi.
695	GEN 26:2	E Aisakeyana ina nuwonúwana bego ina Itipita go, Yauwe toinina isowóduwo tauyana yaina idigo kana, ‘Aisake, taabu kunonōina Itipita, go sem asa bei avatulukoim, moeko goi kwaiyāka.
698	GEN 26:5	unana Eberamo sopagu ikabikaone; guna lovina, guna vatulúkwana, guna liwola be nakae guna livala ikabikaonedi. Tauna boda liliudi bei siyagoi yau akaipakuyedi.’
701	GEN 26:8	E Aisakeyana bogina tuta maanawena amoko goi ikaaiyaka, e tuta tayamo ma monena Ribeka siituyuwo. Siituyuwo go, Aisake ibisibala Ribeka wowona ikatumoyasu. Adi taiyuwokova sinuwonúwana kadi, ‘Nakona adetava.’ Kom go avatau? Abimeleka, tauyana da Palisiti adi tolovina, ina vada goi ikaaiyaka, ikandosobu igitedi.
702	GEN 26:9	Tuwo Aisake iduduwe ima ilatuwoko idigo kana, ‘Aisake, amo vavinayana moitamo monem ae? Kaga unana kupola kam, “Tauyana niugu”?’ Aisakeyana idigo kana, ‘Unana amatoita. Guna nuwonúwana kagu, “Vavinayana pasina bei sikaumategu.” Tauna kagu, “Tauyana niugu.”’
756	GEN 27:28	‘Yaubada ina nuwonúwana goi númla sigugumina im poyapoya bei ivakaanapoive be nakae im tánuwo goi oine be awoinu siiloboina.
757	GEN 27:29	Aiyuwoina Yaubada ina nuwonúwana goi boda liliudi kom im pakonayao bei sivaatugúyala yaim be nakae osemowo liliudi sobuyekoim bei kuloviinaedi. Avatauwa neta sikatubolatem, Yaubada nakae bei ikatubolatedi. Go sem avatauwa neta sikaipakuyem, Yaubada nakae bei ikaipakuyedi.’
767	GEN 27:39	E tamana Aisake idigo kana, ‘Im kaiyaka poyapoya goi númla sigugumina im poyapoya Yaubada bei geya ivakanapoiveyeta. Im tánuwo goi oine be awoinu bei geya siloboineta.
769	GEN 27:41	E tuwo Iso gamona igoyo unana tamana ina kaipaku ana gómana Yakobo ivini go, kina geya, tauna Yakoboyana ikaolilive. Inuwonúwana kana, ‘Tamagu ina kámasa mlina go, táiya ana tuta ikavava, tauyana bei akaumate.’
790	GEN 28:16	E Yakobo masisi goi itaoya go, inuwonúwana kana, ‘Moitamo Yauwe ameni asa ame goi go, mainao geya ayagoiyeta.’
816	GEN 29:20	Tuwo moitamo tala ainima aiyuwo goi ipaaisewa bego Reitiyeli ikabi inai go, ina matakoi Reitiyeli yaina pasina ina nuwonúwana paisewayana moe tuta giyaina.
819	GEN 29:23	Sikáika ikavava, vanuwo bogina isabamgo, Lebani natuna Reya ikabi inave Yakobo yaina goi bego taiyao simasisi, e moe bogina bei sinai. Kina go Yakobo ina nuwonúwana kana, ‘Reitiyeli bogina anai.’ Go Reitiyeli geya, go sem Reya taiyao simasisi, sinai!
845	GEN 30:14	Sikaiyaka, sikaiyaka, witi ana dibayoya ana tuta Rubeni ina tánuwo goi go, náuna mandareki ibabane bogina ikéuwo, tuwo keuwoina maniyedi iguwedi. Iguwedi ikavava, imedi sinana Reya ivini. Ago Reitiyeli keuwoinayadi igitedi, inuwonúwana kana, ‘Neta akanidi, bei akéuwama.’ Tuwo idigo kana, ‘Tuwowogu, natum ana mandareki keuwoina maniyedi kuvinīgu akáika.’
863	GEN 30:32	Dogoiyana ame nakae: Ame bei im yoguyoguyao akiwotaidi gúguna aiyuwo. Gúguna tayamo sipi be goti wowodi kaupolapolaidi be nakae lami wowodi kalaakovidi kaka. Go gúguna tayamo sipi wowodi poowoudi kaka be nakae goti wowodi kalaakovidi kaka. E niga tutayana sivenátuna, ava yoguyoguva wowodi kaupolapolaidi, e moe yau guna yoguyoguyao.
871	GEN 30:40	E tutayana sivenátuna, natudiyao ikiwotaidi gúguna ituli. Ego yoguyogu gagaidi ikabidi, imedi yoguyogu kaupolapolaidi matadi goi sikaaiyaka. Tutayana siváunuwo yoguyogu kaupolapolaidi kaka sigitedi sikatonoidi, e bei sivenátuna, natudiyao kaupolapolaidi. E tauna ame nakae kenaoyana goi Yakobo ina yoguyoguyao ivaituwedi sibadabada go, Lebani geya.
875	GEN 31:1	E Yakobo vala inove bego Lebani natunao koroto sikúluwo sidigo kadi, ‘Tamada konana madabokidi Yakobo isonanedi. Yakobo ina esaesa madabokina moe tamada ina esaesa isonane.’
905	GEN 31:31	Go kina Yakoboyana idigo kana, ‘Kasiya unana amatoita. Guna nuwonúwana kagu, “Asiya govila bei Lebani natunao be tubunao ineboigu.”
906	GEN 31:32	Go im tokwalu sem, sedao matadi goi kulusalēdi. Neta ameko goi kubabanedi, e avatau ivainaoidi takaumate. Ava konam kubabane, e kwābi.’ E Yakobo inuwonúwana Lebani ina tokwaluyadi manudi ibágala, tauna moe nakae ibóbwara. Kom go vatau? Tokwaluyadi Reitiyeli ivainaoidi!
937	GEN 32:9	Ina nuwonúwana kana, ‘Neta Iso ima boda tayamo ilauidi, imaiko go, boda tayamo itoboinedi sisiya dedevidi.’
949	GEN 32:21	Ego konuwookavāte kami, “Im pákwana Yakobo mlima imamaima.”’ Yakobo ina nuwonúwana kana, ‘Ame yoguyoguyadi moe guna yabobona sivakumgo go, yoguyoguyadi goi anúwala tauyana yaina bei guna goyo inuwotao go, agu gogo yaina bei dedevina.’
967	GEN 33:6	E Yakobo ina pakonayaoyadi ma natudiyao sima aedi sivatugúyala.
968	GEN 33:7	Reya nakae ma natunao sima aedi sivatugúyala. Tauyadi mlidi Iyosepa be Reitiyeli sivámliya sima aedi sivatugúyala.
1006	GEN 34:25	E maliyalina aito sikavava, korotoyadi sakavaidi adi kúpwana ana gedageda nava siilotowo go, idi lotówana kidi dedevidi. Ago Yakobo natunao, Simioni be Livai, tauyadi Daina niunao, idi sisi sikabidi, sina asayana goi koroto liliudi sivaopedi sikaumatedi.
1023	GEN 35:11	E Yaubada aiyuwoina Yakobo ilatuwoko idigo kana, ‘Yau Yaubada Tokalika. Kom kususāila, tubumowo badabadaidi, e bei tubumowo boda tayamo gagaina. Tubumowoyadi goi boda badabadaaidi be nakae tokalibúbuna maniyedi bei sisowóduwo.
1089	GEN 37:5	E tuta tayamo Iyosepa ikanamimi. Niga ina kanamimiyana manuna tuwowonao ilatuwokoidi idigo kana, ‘Tuwowogowo, guna kanamimi konōve. Anamimiyana ame nakae: Witi tolobodi tánuwo goi tapaatumidi go, yau guna pátuma mainao toinina itaoya. Itataoya go, komi imi pátuma toinidi sitaoya, sideli sima yau guna pátuma sitaoyakobu go, sivatugúyala.’ E tutayana tuwowonao sinove, idi kaoliliwo ivaituwaiko tauyana yaina.
1092	GEN 37:8	E tuwo sibolagu, sidigo kadi, ‘Manakae? Bego kom kulovinaema ae? Manakae? Kom bego kuetokalibúbuna yaima ae?’ Tuwo tuwowonao sikaolilive gagaina toina ina kanamimi be nakae ina bóbwara pasidi.
1093	GEN 37:9	E niga Iyosepayana imasisi, aiyuwoina ikanamimimna. Tuwo tuwowonao ilatuwokoidi, idigo kana, ‘Tuwowogowo, akanamimimna, e guna kanamimiyana konōve. Guna kanamimiyana ame nakae: Níyala, tukówana be nakae utuna adi badabada yawou tayamo sivatugúyala yau yaigu.’
1094	GEN 37:10	E nakae ina kanamimiyana tamana ilatuwoko go, tamanayana ibolagu kana, ‘Moe kaga kukanamimiye! Manakae? Kunuwonúwana bego sinam, tuwowomowo nakae yau bei aema kavatugúyala kom yaim goi?’
1095	GEN 37:11	E tuwo tuwowonao bogina sivakipikipiye go, kina tamadi anamimiyana inuwokavate, e manuna inuwonúwana.
1102	GEN 37:18	E nava aduwanau goi iiketoiya go, kidi tuwowonao sikandobala tauyana sigite imamaima. Tuwo nuwonúwana situlu manakaedi bego tauyana sikaumate.