1	GEN 1:1	Aba vatowo goi Yaubada kaga liliuuna iwodugudi, nakae yábana be poyapoya.
2	GEN 1:2	Ego poyapoyayana ame geya ana katubayasinamo be nakae daakakaina. Go madabokina bwae dimówana ilatao. Dimowanayana yatanaina goi kokonótuya gagaina ikaaiyaka nakae Yaubada Balomaina itaakavata.
3	GEN 1:3	E Yaubada sopana goi imadágina idigo kana, ‘Mavada kusowōduwo!’ E mavadayana isowóduwo.
4	GEN 1:4	Mavadayana igite dedevina, e iuyaone. Imadagi ikavava, mavada be kokonótuya ikiwotaidi, e mavada ituli, kokonótuya ituli.
5	GEN 1:5	E mavadayana ivayou maliyalina go, kokonotuyayana ivayou sabamgo. Lavilavi ima namlieta nobuyana ima. Moe maliyalina vakuumgoina bogina ikavava.
7	GEN 1:7	E tauna nakae isowóduwo. Sekulapeyayana isowóduwo, e bwaeyana iwotai. Bwae diligaema ituli, bwae ditonema ituli.
8	GEN 1:8	Sekulapeyayana ivayoko yábana. Lavilavi ima namlieta nobuyana ima. Moe maliyalina aiyuwoina bogina ikavava.
9	GEN 1:9	E Yaubada sopana goi imadágina idigo kana, ‘Bwae ditonema, kōna dadava tayamo goi kolamgōgana bei dadava tayamo sayasayaina isowóduwo!’ E tauna nakae isowóduwo.
10	GEN 1:10	Imadagi ikavava, dadavayana sayasayaina ivayoko poyapoya go, bwaeyana ivayoko négwasa. Igitedi dedevidi, e iuyaonedi.
11	GEN 1:11	Aiyuwoina Yaubada idigo kana, ‘Poyapoya, kom goi náuna sisūsuwo go, limou sidīdi be nakae kokowoika keuwoidi sikéuwo, taudi nakae ma kutukutudi.’ E tauna nakae isowóduwo.
12	GEN 1:12	Poyapoya goi náuna madabokidi nakae sisúsuwo. Yaubada igitedi dedevidi, e iuyaonedi.
13	GEN 1:13	Lavilavi ima namlieta nobuyana ima. Moe maliyalina aitonina bogina ikavava.
14	GEN 1:14	E Yaubada sopana goi imadágina idigo kana, ‘Aba mavada yábana osasaina goi kosowōduwo, bei maliyalina nakae sabamgo kowotaidi! Aba mavadayami moe aba kinana maliyalina, tukówana be nakae tala tamo tamo manudi.
15	GEN 1:15	Komi aba mavada yábana osasaina goi konininīma bei poyapoya koomavade.’ E tauna nakae sisowóduwo.
16	GEN 1:16	Aba mavadayadi aiyuwo gagaidi iwodugudi, tayamo gagaina toina moe maliyalina iloovinae go, tayamo tupwana giyaina moe sabamgo iloovinae. Go utuna nakae taiyao iwodugudi.
18	GEN 1:18	be maliyalina sabamgo siloviinaedi be nakae mavada kokonótuya siwootaidi. Yaubada igitedi dedevidi, e iuyaonedi.
19	GEN 1:19	Lavilavi ima namlieta nobuyana ima. Moe maliyalina aivasina bogina ikavava.
21	GEN 1:21	Tauna Yaubada íyana gagaidi be kaga liliuna maa yawoidi be nakae mánuwo liliudi iwodugudi, taudi idi sinapu nakae. Yaubada igitedi dedevidi, e iuyaonedi.
22	GEN 1:22	E ikaipakuyedi idigo kana, ‘Négwasa iyaiyanimi kosusāila gagaina, e negwasayana kovakayaodēi. Mánuwo nakae, poyapoya goi kosusāila.’
23	GEN 1:23	Lavilavi ima namlieta nobuyana ima. Moe maliyalina ainimaina bogina ikavava.
24	GEN 1:24	E Yaubada sopana goi imadágina idigo kana, ‘Poyapoya, kom goi kaga liliuna maa yawoidi sisowōduwo, maisidi taudi nakae, yoguyogu daladalaidi, bolitavanu be woiwoi, gagaidi be giyaidi.’ E tauna nakae sisowóduwo.
25	GEN 1:25	Kaga liliuna maa yawoidi, bolitavanu be woiwoi be nakae yoguyogu daladalaidi iwodugudi go, igitedi dedevidi, e iuyaonedi.
26	GEN 1:26	E Yaubada sopana goi imadágina idigo kana, ‘Tomota taodugūdi ada tapata, tauyadi kita nakae. Tauna íyana, mánuwo, bolitavanu, yoguyogu daladalaidi be nakae kaga liliuna maa yawoidi poyapoya ame goi sikaaiyaka bei sikalibubudi.’
27	GEN 1:27	Tomota iwodugudi Tauyana toinina ana tapata. Moitamo, ana tapata iwodugudi. Tomotayadi koroto be vavina iwodugudi.
28	GEN 1:28	Iwodugudi ikavava, ikaipakuyedi idigo kana, ‘Kosusāila be poyapoya kovakayaodēi, e poyapoyayana koepaisēwe ami dedevina manuna. Nakae íyana, mánuwo be nakae kaga liliuna maa yawoidi poyapoya goi sidaladala kokaliibubūdi.’
29	GEN 1:29	Kana, ‘Konōve! Náuna kutukutudi liliudi be nakae kokowoika keuwoidi liliudi bogina avinimi moe avami.
30	GEN 1:30	Woiwoi liliudi gagaidi be giyaidi, mánuwo liliudi, kaga liliuna poyapoya goi sidaladala nakae maa yawoidi, e náuna liliudi avinidi, moe avadi.’ E tauna nakae isowóduwo.
31	GEN 1:31	Kaga liliuna Yaubada bogina iwoodugudi igitedi madabokina moe dedevidi, e iuyaonedi gagaina. Lavilavi ima namlieta nobuyana ima. Moe maliyalina ainima tayamoina bogina ikavava.
32	GEN 2:1	Moeko goi yábana be poyapoya be nakae kaga liliuna adi madágina bogina ikavava.
33	GEN 2:2	Tuwo maliyalina ainima tayamoina goi Yaubada ina paisewa ilukavavedi go, maliyalina ainima aiyuwoina ina paisewa madabokina goi iwaiwasi.
34	GEN 2:3	Ago maliyalinayana ikaipakuye sowona be nakae ikimasabe toinina umana unana ina paisewa madabokina bogina ikavava, e maliyalinayana goi iwaiwasi. Tauna ikaipakuye be ikimasabe.
35	GEN 2:4	Ame kaga liliuna sisowóduwo yábana be poyapoya goi tetelidi boi tutayana Yauwe Yaubada iwodugudi.
36	GEN 2:5	E Yauwe Yaubada kúwana nava geya ietuneyeta poyapoya goi be nakae geya tayaamo avatau ikaaiyaka bei ibágula, tauna náuna poyapoyayana goi nava geya sisowoduwoita nakae geya kada tayaamo kutukutu itabo geya.
37	GEN 2:6	Kúwana geya go, bwae doelu goi ituko imamaima bei poyapoya ana madabokina ivakaanapoive.
38	GEN 2:7	E amo tutayana Yauwe Yaubada poyapoya kaukauna ikabi, koroto imolului. Imolului ikavava, kubuna goi yawoina isalauwe, e korotoyana maa yawoina.
39	GEN 2:8	E Yauwe Yaubada alova tanuina tayamo Ideni goi ikatubayasi, moe bomatu dadavina. Amoko goi korotoyana bogina iiwodugu iyato.
40	GEN 2:9	Iyato go, alova liliudi neta adi kaigigita dedevidi be nakae keuwoidi adi káika dedevidi ilovinaedi poyapoya goi sitabo. Ego tanuwoyana nauyayanaina goi alova aiyuwo sikaaiyaka, tayamo neta tomota sikani, e yawoidi vata sibabane. Ago tayamo neta tomota sikani, e dedevina be goyo adi nanamsa siyagoidi.
41	GEN 2:10	E sákala tayamo Ideni goi idaudau tanuwoyana ivakaanapoive. Sakalayana Ideni goi isowóduwo iwotai, e sákala aivasi sidau.
42	GEN 2:11	Sákala tayamo yoina Paisoni idau ina asa Kevila idaunibisi go, amoko goi goura ikaaiyaka.
43	GEN 2:12	Amo asayana ana goura moe dedevina toina. Pútuma dedevina toina yoina bidelium be nakae gurewa maisana gagaina yoina anikisi nakae sikaaiyaka.
44	GEN 2:13	Sákala aiyuwoina yoina Gikoni. Ame sakalayana asa Kosa idaunibisi.
45	GEN 2:14	Sákala aitonina yoina Tigirisi. Ame sakalayana asa Asiriya bomatu dadavina goi idau. Sákala aivasina yoina Yuparetisi.
46	GEN 2:15	E korotoyana kina Yauwe Yaubada ikabi, tánuwo Ideni goi iyato bei ipaaisewa Yaubada umana be nakae tanuwoyana imataakavate.
48	GEN 2:17	go, dedevina be goyo adi nanamsa alovaina taabu kukanikāni. Neta kukani, e moitamo toina bei kukámasa. Tauna taabu kukanikāni.’
49	GEN 2:18	E Yauwe Yaubada idigo kana, ‘Geya idedevineta neta korotoyana anetava ikaaiyaka. Tuwo tayamo tovaita aodugu bei koroto sowona.’
50	GEN 2:19	E tuwo poyapoya ikabi, yoguyogu be mánuwo liliudi iwodugudi. Iwodugudi ikavava, imedi korotoyana yaina. Latuwona iyagoi korotoyana manakaena bei tamo tamo ivayoudi. Neta ava you iivinidi, e moe yoidi.
51	GEN 2:20	Tuwo moitamo korotoyana yoguyogu be mánuwo be woiwoi liliudi ivayoudi go, geya kada tayaamo yoguyogu itoboine bei tauyana ina tovaita geya.
52	GEN 2:21	Tauna korotoyana matamasimasisi gagaina kina Yauwe Yaubada ivini ikanamatáiya. Ikanaamatáiya go, korotoyana silalumina tayamo ikabi, íwaya iyato, silaluminayana kiyauna ivasumapu.
53	GEN 2:22	Ivasumapu ikavava, silaluminayana ikabi, vavina iwodugu. Iwodugu ikavava, ikabi ime korotoyana yaina.
54	GEN 2:23	Tuwo korotoyana idigo kana, ‘E ame moitamo! Ame tauyana luluna, yau lulugu maisiyana. Nakae sakavaina, yau sakavaigu maisiyana. Yau silalumigu goi isowóduwo, e maisiyagu. Tauna tauyana yoina moe vavina.’
55	GEN 2:24	E tauna moe pasina koroto tamana be sinana yaidi itumasaba go, monena taiyao situyuwo, tauna adi taiyuwokova wowodi tayamo.
56	GEN 2:25	Korotoyana ma monena adi taiyuwo sipawaku go, geya siomaemaeta.
57	GEN 3:1	E moteta tonuwosinapu gagaina. Nakae woiwoi madabokidi Yauwe Yaubada iwoodugudi ikalisavedi. Tauyana ima vavina ilatuwoko idigo kana, ‘Iyaa! Moitamo Yaubada idigodigo bego alova keuwoidi madabokiidi tánuwo sinaena taabu kookanīdi, ae?’
60	GEN 3:4	Go kina motetayana idigo kana, ‘Geya kokamaseta. Geya toina!
61	GEN 3:5	Moitamo. Yaubada iyagoi neta keuwoinayana kokani, nukotomi ikipolaledi, e komi Tauyana nakae, dedevina be goyo koyagoidi.’
62	GEN 3:6	Tuwo vavinayana ikandolaga alova keuwoina igite bego ana kaigigita dedevina. Aiyuwoina nakona ana káika dedevina be ana kaikayana goi itoboine nanamsa ibabane, tauna iyale. Tuwo moitamo keuwoina tayamo iguwe, e ikani. Ikavava, monena nakae tayamo ivini ikani.
63	GEN 3:7	Sikani ikavava, mainao adi taiyuwokova nukotodi ikipolaledi, tauna siyagoi sipawaku. Tuwo lao vagana siguledi, sigilumidi adi tabodaboda.
64	GEN 3:8	Sigíluma ikavava, lavilavi Yauwe Yaubada aena butukáona sinove tánuwo goi ivaabebeo. Tuwo kidi alova nauyayanaidi goi sivatamtamumuye.
66	GEN 3:10	‘Tánuwo goi aem butukáona anove go, apawaku, tauna amatoita, tuwo avatamtamumuyem’, korotoyana kaena.
68	GEN 3:12	‘Vavinayana boi kuuvinigu, alova keuwoina ivinigu akani’, korotoyana kaena.
69	GEN 3:13	Tuwo Yauwe Yaubada vavinayana ilatuwoko idigo kana, ‘Iyaa! Kaga unana moe nakae kuguinuwe?’ ‘Moteta ikatubaugu, akani’, vavinayana kaena.
70	GEN 3:14	Tuwo Yauwe Yaubada itaoya, motetayana ilatuwoko idigo kana, ‘Moe im guinuwa pasina akatubolatem. Yoguyogu madabokiidi yaidi goi kom amta sikasilaliyem. Yawoim madabokina gamom goi bei kudaladala, e poyapoya tobum goi bei ikaaiyaka.
71	GEN 3:15	Go vakaleya kom be vavinayana nauyayanaimi goi bei ayato. Kom im boda be tauyana ina boda nakae bei sivaakaleya. Ago kina ina bodayana bei dabam ikaumotui go, tauyana aegedugeduna kom bei kukalimotui.’
72	GEN 3:16	E vavinayana ilatuwoko idigo kana, ‘Im venátuna ana gedageda bei avaituwe gagaina, tauna mam gedageda natumowo kuvenatunidi. Im yala bego monem kulovinae go, tauyana bei ilovinaem.’
73	GEN 3:17	E Adama ilatuwoko idigo kana, ‘Kom pasim poyapoya akatubolate unana monem sopana kukabikaone, e keuwoinayana boi asanaabodem taabu kukanikāni go, tuwo kukani. Yawoim ana madabokina goi bei mam gedageda kukokōila gagaina bego avam kubabane.
74	GEN 3:18	Go náuna nakae taliboibo poyapoyayana goi bei sitabo manum. Ago pai be awoinu bei kukakáika.
75	GEN 3:19	Mam mosali bei kupaaisewa gagaina bego avam kubabane ana kadókana kukámasa, e kwaluvila kuna poyapoya goi. Bogina kuyagoi. Poyapoya goi aodugum. Moitamo. Kom taum poyapoyayana ana vaituwo, tauna bei kwaluvila kuna poyapoyayana goi. Tutayana kukámasa, bei kumalapoyapoyamna.’
76	GEN 3:20	E korotoyana monena tomota liliudi unadi, tauna ivayou Ivi.
77	GEN 3:21	E Yauwe Yaubada yoguyogu sakavaidi ikabidi, Adama ma monena adi kwama imadagidi, ivalosidi.
79	GEN 3:23	E tuwo moitamo tánuwo Ideni goi ivalilivedi sina go, Adama poyapoya goi bei ibágula. Ego amo poyapoyayana goi boi Yauwe koroto iwodugu!
80	GEN 3:24	Tuwo ivatapiyedi ikavava, e tanuwoyana Ideni ana kaba siu goi moe bomatu dadavina yábana ana tomatakavatayao iyatoidi. Tayamo sisi yeu sabeninimina iyato go, sisiyana ikaivivilo bego aba siu itubode. Moe dogoiyadi iyatoidi bego geya vatau tayaamo bei tanuwoyana goi isiu ina yawana vata alovaina keuwoina ikabi, ikani.
81	GEN 4:1	E kina go Adama monena Ivi taiyao simasisi, ikéuwama go, niga ivenátuna, natuna koroto. Tuwo idigo kana, ‘Yauwe ina vaita goi natugu bogina ababane.’ Tauna natunayana ivayou Keni.
82	GEN 4:2	Niga aiyuwoina ivenátuna, natuna koroto moe Keni siyana yoina Ebeli. Sikaiyaka, gogómana sibíbina gagaidi. E kina go Ebeliyana yoguyogu sipi ana tomatakavata go, kina Keniyana tobágula.
83	GEN 4:3	E niga go dibayoya ana tuta goi Keni ina dibayoya keuwoina maniyedi ikabidi ina vininabeso go, imedi Yauwe yaina ikasaledi.
84	GEN 4:4	E kina go Ebeliyana nakae ina vininabeso moe sipi bonatudiyao botomoya be saabalidi, e ikaumatedi. Ikavava, imedi Yauwe yaina ikasaledi. Yauwe igitedi, e Ebeli be ina vininabesoyadi iuyaonedi
85	GEN 4:5	go, Keniyana be ina vininabesoyadi geya iuyaonedita. Tuwo Keni gamona igoyo toina, e kubuna ipulu.
88	GEN 4:8	E tuta tayamo Keni siyana Ebeli ilatuwoko idigo kana, ‘Tāna yoyowo.’ Tuwo moitamo sina yoyowo goi go, tutayana amoko goi sikaaiyaka, e Keniyana itaoya, siyana Ebeli ikaumate.
89	GEN 4:9	E Yauwe Keni ilatuwoko idigo kana, ‘Siyam Ebeli nako?’ ‘Seki, geya ayagoiyeta. Manakae? Yau siyagu ana tomatakavata?’ Keniyana kaena.
90	GEN 4:10	Go kina Yauwe idigo kana, ‘Moe kaga kuguinuwe! Kunōve! Siyam ikaikaina tomota nakae poyapoya goi itaiyaduduwo yau yaigu. Latuwona im kaumata pasina yau akatumapum.
91	GEN 4:11	E tauna ame tuta im guinuwa pasina akatubolatem. Poyapoya goi avalilivem, tauna geya tuwaina bei itoboinem poyapoya goi kubágula. Ame poyapoyayana siyam ikaikaina inim tutayana kwaumate.
92	GEN 4:12	Bego poyapoyayana goi kubágula go, kom manum poyapoya ilogoyo. Tauna poyapoya ame goi kom bei kuketoiya beso; geya im kasamo.’
93	GEN 4:13	Go kina Keniyana idigo kana, ‘Iyaa! Guna liuna moumou ivakaigaga yaigu! Geya itoboineguta atogaga.
94	GEN 4:14	Kunōve! Ame bei poyapoya ame goi kuvatapiyegu, tauna matam goi geya itoboineguta akaaiyaka. Tuwo bei poyapoya ame goi avabebeo beso unana geya guna kasamo. Tauna avatau neta ibabanegu, bei ikaumategu.’
95	GEN 4:15	Tuwo kina Yauwe idigo kana, ‘Moe nakae geya. Ame nakae bei aguinuwe: Avatau neta ikaumatem, tauyana ana katumapu moe aliune gagaina toina.’ E tuwo tayamo aba kinana Keni goi iyato, govila bei avatauwa neta tauyana sibabane sikaumate.
96	GEN 4:16	E Keni itaoya Yauwe matana goi isowóduwo ina asa yoina Nodi; moe Ideni bomatu dadavina.
97	GEN 4:17	E Keni monena taiyao simasisi, e ikéuwama. Niga ivenátuna, natuna Enoki. Ego amo tutayana Keni ilokasa, tauna asayana ivayou Enoki, nakae natuna yoina.
98	GEN 4:18	Ago Enokiyana natuna koroto Iradi. Iradi natuna koroto Mekuyaeli. Mekuyaeli natuna Metusaeli go, Metusaeli natuna Lemeki.
99	GEN 4:19	Kina Lemekiyana vevina adi taiyuwo inaidi, tayamo yoina Eda, tayamo yoina Sila.
100	GEN 4:20	Edayana ivenátuna, natuna koroto yoina Yabali. Tauyana yoyou parai goi igimimasisi go, yoguyogu sipi be bulumakau imatakaavatedi. Ago tubunao giyaidi nakae siguinuwe, situliya asa tamo tamo.
101	GEN 4:21	Yabaliyana siyana yoina Yubali. Tauyana api ana láuwo be kokopi ana uwa unadi.
102	GEN 4:22	E kina Silayana nakae ivenátuna, natuna koroto yoina Tubali Keni, tauyana kainum goi turu iwodúguna. Tauyana niuna yoina Nama.
103	GEN 4:23	E tuta tayamo Lemeki mana gágasa monenao adi taiyuwo ilatuwokoidi idigo kana, ‘Eda be Sila, guna livala konovedokōidi. Tubuwau ilauigu nakae ipwaikigu go, tauyana akaumate.
105	GEN 4:25	E Adama monena taiyao aiyuwoina simasisimna, e ikéuwama, ivenátuna natuna koroto. Monenayana idigo kana, ‘Yaubada natugu ivinigu Ebeli ana katumapu unana Keni ikaumate.’ Tauna natuna ivayou Seti.
106	GEN 4:26	Niga Seti ibíbina gagaina ivenátuna, natuna koroto yoina Enosi. E amo tutayana goi tomota sivatowo Yauwe yaina sisakululu.
107	GEN 5:1	E buki ame moe Adamayana ana liliu bukina: Tutayana Yaubada tomota iwodugu, toinina ana tapata nakae iwodugu.
108	GEN 5:2	Tomotayadi koroto be vavina iwodugudi. Ikavava, ikaipakuyedi go, ivayokoidi tomota tutayana iwodugudi.
109	GEN 5:3	E Adama ana tala ana badabada tayamo andedi teti (130) tutayana natuna koroto ibíbina. Gomanayana tamana Adama ana tapata, e Adamayana nakae. E ivayou Seti.
110	GEN 5:4	Seti ana bíbina mlina, Adamayana ikaaiyaka tala ana badabada eita andedi (800) tuwaina. Ego amo talayadi goi natunao koroto be vevina liliudi sibíbina.
111	GEN 5:5	Tauyana yawoina ana madabokina moe tala ana badabada nain andedi teti (930), e ikámasa.
112	GEN 5:6	E Setiyana ana tala ana badabada tayamo andedi paibi (105) tutayana natuna koroto yoina Enosi ibíbina.