12	GEN 1:12	ותוצא הארץ דשא עשב מזריע זרע למינהו ועץ עשה פרי אשר זרעו בו למינהו וירא אלהים כי טוב׃
20	GEN 1:20	ויאמר אלהים ישרצו המים שרץ נפש חיה ועוף יעופף על הארץ על פני רקיע השמים׃
21	GEN 1:21	ויברא אלהים את התנינם הגדלים ואת כל נפש החיה הרמשת אשר שרצו המים למינהם ואת כל עוף כנף למינהו וירא אלהים כי טוב׃
24	GEN 1:24	ויאמר אלהים תוצא הארץ נפש חיה למינה בהמה ורמש וחיתו ארץ למינה ויהי כן׃
26	GEN 1:26	ויאמר אלהים נעשה אדם בצלמנו כדמותנו וירדו בדגת הים ובעוף השמים ובבהמה ובכל הארץ ובכל הרמש הרמש על הארץ׃
27	GEN 1:27	ויברא אלהים את האדם בצלמו בצלם אלהים ברא אתו זכר ונקבה ברא אתם׃
32	GEN 2:1	ויכלו השמים והארץ וכל צבאם׃
36	GEN 2:5	וכל שיח השדה טרם יהיה בארץ וכל עשב השדה טרם יצמח כי לא המטיר יהוה אלהים על הארץ ואדם אין לעבד את האדמה׃
38	GEN 2:7	וייצר יהוה אלהים את האדם עפר מן האדמה ויפח באפיו נשמת חיים ויהי האדם לנפש חיה׃
39	GEN 2:8	ויטע יהוה אלהים גן בעדן מקדם וישם שם את האדם אשר יצר׃
40	GEN 2:9	ויצמח יהוה אלהים מן האדמה כל עץ נחמד למראה וטוב למאכל ועץ החיים בתוך הגן ועץ הדעת טוב ורע׃
41	GEN 2:10	ונהר יצא מעדן להשקות את הגן ומשם יפרד והיה לארבעה ראשים׃
47	GEN 2:16	ויצו יהוה אלהים על האדם לאמר מכל עץ הגן אכל תאכל׃
50	GEN 2:19	ויצר יהוה אלהים מן האדמה כל חית השדה ואת כל עוף השמים ויבא אל האדם לראות מה יקרא לו וכל אשר יקרא לו האדם נפש חיה הוא שמו׃
51	GEN 2:20	ויקרא האדם שמות לכל הבהמה ולעוף השמים ולכל חית השדה ולאדם לא מצא עזר כנגדו׃
52	GEN 2:21	ויפל יהוה אלהים תרדמה על האדם ויישן ויקח אחת מצלעתיו ויסגר בשר תחתנה׃
53	GEN 2:22	ויבן יהוה אלהים את הצלע אשר לקח מן האדם לאשה ויבאה אל האדם׃
54	GEN 2:23	ויאמר האדם זאת הפעם עצם מעצמי ובשר מבשרי לזאת יקרא אשה כי מאיש לקחה זאת׃
67	GEN 3:11	ויאמר מי הגיד לך כי עירם אתה המן העץ אשר צויתיך לבלתי אכל ממנו אכלת׃
72	GEN 3:16	אל האשה אמר הרבה ארבה עצבונך והרנך בעצב תלדי בנים ואל אישך תשוקתך והוא ימשל בך׃
73	GEN 3:17	ולאדם אמר כי שמעת לקול אשתך ותאכל מן העץ אשר צויתיך לאמר לא תאכל ממנו ארורה האדמה בעבורך בעצבון תאכלנה כל ימי חייך׃
74	GEN 3:18	וקוץ ודרדר תצמיח לך ואכלת את עשב השדה׃
82	GEN 4:2	ותסף ללדת את אחיו את הבל ויהי הבל רעה צאן וקין היה עבד אדמה׃
84	GEN 4:4	והבל הביא גם הוא מבכרות צאנו ומחלבהן וישע יהוה אל הבל ואל מנחתו׃
90	GEN 4:10	ויאמר מה עשית קול דמי אחיך צעקים אלי מן האדמה׃
91	GEN 4:11	ועתה ארור אתה מן האדמה אשר פצתה את פיה לקחת את דמי אחיך מידך׃
94	GEN 4:14	הן גרשת אתי היום מעל פני האדמה ומפניך אסתר והייתי נע ונד בארץ והיה כל מצאי יהרגני׃
95	GEN 4:15	ויאמר לו יהוה לכן כל הרג קין שבעתים יקם וישם יהוה לקין אות לבלתי הכות אתו כל מצאו׃
96	GEN 4:16	ויצא קין מלפני יהוה וישב בארץ נוד קדמת עדן׃
99	GEN 4:19	ויקח לו למך שתי נשים שם האחת עדה ושם השנית צלה׃
102	GEN 4:22	וצלה גם הוא ילדה את תובל קין לטש כל חרש נחשת וברזל ואחות תובל קין נעמה׃
103	GEN 4:23	ויאמר למך לנשיו עדה וצלה שמען קולי נשי למך האזנה אמרתי כי איש הרגתי לפצעי וילד לחברתי׃
109	GEN 5:3	ויחי אדם שלשים ומאת שנה ויולד בדמותו כצלמו ויקרא את שמו שת׃
135	GEN 5:29	ויקרא את שמו נח לאמר זה ינחמנו ממעשנו ומעצבון ידינו מן האדמה אשר אררה יהוה׃
143	GEN 6:5	וירא יהוה כי רבה רעת האדם בארץ וכל יצר מחשבת לבו רק רע כל היום׃
144	GEN 6:6	וינחם יהוה כי עשה את האדם בארץ ויתעצב אל לבו׃
146	GEN 6:8	ונח מצא חן בעיני יהוה׃
147	GEN 6:9	אלה תולדת נח נח איש צדיק תמים היה בדרתיו את האלהים התהלך נח׃
152	GEN 6:14	עשה לך תבת עצי גפר קנים תעשה את התבה וכפרת אתה מבית ומחוץ בכפר׃
154	GEN 6:16	צהר תעשה לתבה ואל אמה תכלנה מלמעלה ופתח התבה בצדה תשים תחתים שנים ושלשים תעשה׃
160	GEN 6:22	ויעש נח ככל אשר צוה אתו אלהים כן עשה׃
161	GEN 7:1	ויאמר יהוה לנח בא אתה וכל ביתך אל התבה כי אתך ראיתי צדיק לפני בדור הזה׃
165	GEN 7:5	ויעש נח ככל אשר צוהו יהוה׃
169	GEN 7:9	שנים שנים באו אל נח אל התבה זכר ונקבה כאשר צוה אלהים את נח׃
173	GEN 7:13	בעצם היום הזה בא נח ושם וחם ויפת בני נח ואשת נח ושלשת נשי בניו אתם אל התבה׃
174	GEN 7:14	המה וכל החיה למינה וכל הבהמה למינה וכל הרמש הרמש על הארץ למינהו וכל העוף למינהו כל צפור כל כנף׃
176	GEN 7:16	והבאים זכר ונקבה מכל בשר באו כאשר צוה אתו אלהים ויסגר יהוה בעדו׃
187	GEN 8:3	וישבו המים מעל הארץ הלוך ושוב ויחסרו המים מקצה חמשים ומאת יום׃
191	GEN 8:7	וישלח את הערב ויצא יצוא ושוב עד יבשת המים מעל הארץ׃
193	GEN 8:9	ולא מצאה היונה מנוח לכף רגלה ותשב אליו אל התבה כי מים על פני כל הארץ וישלח ידו ויקחה ויבא אתה אליו אל התבה׃
200	GEN 8:16	צא מן התבה אתה ואשתך ובניך ונשי בניך אתך׃
201	GEN 8:17	כל החיה אשר אתך מכל בשר בעוף ובבהמה ובכל הרמש הרמש על הארץ הוצא אתך ושרצו בארץ ופרו ורבו על הארץ׃
202	GEN 8:18	ויצא נח ובניו ואשתו ונשי בניו אתו׃
203	GEN 8:19	כל החיה כל הרמש וכל העוף כל רומש על הארץ למשפחתיהם יצאו מן התבה׃
205	GEN 8:21	וירח יהוה את ריח הניחח ויאמר יהוה אל לבו לא אסף לקלל עוד את האדמה בעבור האדם כי יצר לב האדם רע מנעריו ולא אסף עוד להכות את כל חי כאשר עשיתי׃
206	GEN 8:22	עד כל ימי הארץ זרע וקציר וקר וחם וקיץ וחרף ויום ולילה לא ישבתו׃
212	GEN 9:6	שפך דם האדם באדם דמו ישפך כי בצלם אלהים עשה את האדם׃
213	GEN 9:7	ואתם פרו ורבו שרצו בארץ ורבו בה׃
216	GEN 9:10	ואת כל נפש החיה אשר אתכם בעוף בבהמה ובכל חית הארץ אתכם מכל יצאי התבה לכל חית הארץ׃
224	GEN 9:18	ויהיו בני נח היצאים מן התבה שם וחם ויפת וחם הוא אבי כנען׃
225	GEN 9:19	שלשה אלה בני נח ומאלה נפצה כל הארץ׃
240	GEN 10:5	מאלה נפרדו איי הגוים בארצתם איש ללשנו למשפחתם בגויהם׃
241	GEN 10:6	ובני חם כוש ומצרים ופוט וכנען׃
244	GEN 10:9	הוא היה גבר ציד לפני יהוה על כן יאמר כנמרד גבור ציד לפני יהוה׃
246	GEN 10:11	מן הארץ ההוא יצא אשור ויבן את נינוה ואת רחבת עיר ואת כלח׃
248	GEN 10:13	ומצרים ילד את לודים ואת ענמים ואת להבים ואת נפתחים׃
249	GEN 10:14	ואת פתרסים ואת כסלחים אשר יצאו משם פלשתים ואת כפתרים׃
250	GEN 10:15	וכנען ילד את צידן בכרו ואת חת׃
253	GEN 10:18	ואת הארודי ואת הצמרי ואת החמתי ואחר נפצו משפחות הכנעני׃
254	GEN 10:19	ויהי גבול הכנעני מצידן באכה גררה עד עזה באכה סדמה ועמרה ואדמה וצבים עד לשע׃
255	GEN 10:20	אלה בני חם למשפחתם ללשנתם בארצתם בגויהם׃
261	GEN 10:26	ויקטן ילד את אלמודד ואת שלף ואת חצרמות ואת ירח׃
266	GEN 10:31	אלה בני שם למשפחתם ללשנתם בארצתם לגויהם׃
269	GEN 11:2	ויהי בנסעם מקדם וימצאו בקעה בארץ שנער וישבו שם׃
273	GEN 11:6	ויאמר יהוה הן עם אחד ושפה אחת לכלם וזה החלם לעשות ועתה לא יבצר מהם כל אשר יזמו לעשות׃
276	GEN 11:9	על כן קרא שמה בבל כי שם בלל יהוה שפת כל הארץ ומשם הפיצם יהוה על פני כל הארץ׃
298	GEN 11:31	ויקח תרח את אברם בנו ואת לוט בן הרן בן בנו ואת שרי כלתו אשת אברם בנו ויצאו אתם מאור כשדים ללכת ארצה כנען ויבאו עד חרן וישבו שם׃
300	GEN 12:1	ויאמר יהוה אל אברם לך לך מארצך וממולדתך ומבית אביך אל הארץ אשר אראך׃
303	GEN 12:4	וילך אברם כאשר דבר אליו יהוה וילך אתו לוט ואברם בן חמש שנים ושבעים שנה בצאתו מחרן׃
304	GEN 12:5	ויקח אברם את שרי אשתו ואת לוט בן אחיו ואת כל רכושם אשר רכשו ואת הנפש אשר עשו בחרן ויצאו ללכת ארצה כנען ויבאו ארצה כנען׃
309	GEN 12:10	ויהי רעב בארץ וירד אברם מצרימה לגור שם כי כבד הרעב בארץ׃
310	GEN 12:11	ויהי כאשר הקריב לבוא מצרימה ויאמר אל שרי אשתו הנה נא ידעתי כי אשה יפת מראה את׃
311	GEN 12:12	והיה כי יראו אתך המצרים ואמרו אשתו זאת והרגו אתי ואתך יחיו׃
313	GEN 12:14	ויהי כבוא אברם מצרימה ויראו המצרים את האשה כי יפה הוא מאד׃
315	GEN 12:16	ולאברם היטיב בעבורה ויהי לו צאן ובקר וחמרים ועבדים ושפחת ואתנת וגמלים׃
319	GEN 12:20	ויצו עליו פרעה אנשים וישלחו אתו ואת אשתו ואת כל אשר לו׃
320	GEN 13:1	ויעל אברם ממצרים הוא ואשתו וכל אשר לו ולוט עמו הנגבה׃