23214	MAT 1:1	Nonei teka u tubur e Iesu Kristo. E Iesu e tubunen e Devit, na e Devit a hatutubunei tere Abraham.
23215	MAT 1:2	E Abraham e hatuhanei e Aisak. Ne Aisak e hatuhanei e Jekop. E Jekop e hatuhaner ere Juda mera u toulanen.
23216	MAT 1:3	Ne Juda e hatuhaner ere Peres mere Sira. E tsinaren e Tamar. Ne Peres e hatuhanei e Hesron. Ne Hesron e hatuhanei e Ram.
23217	MAT 1:4	Ne Ram e hatuhanei e Aminadap. Ne Aminadap e hatuhanei e Nason. Ne Nason e hatuhanei e Salmon.
23218	MAT 1:5	Ne Salmon e hatuhanei e Boas. E tsinana e Boas e Rehap. Ne Boas e hatuhanei e Obet. E tsinana e Obet e Rut. Ne Obet e hatuhanei e Jesi.
23219	MAT 1:6	Ne Jesi e hatuhanei e Devit a king. Ne Devit e hatuhanei e Solomon. E tsinana e Solomon a tahol tere Uraia.
23220	MAT 1:7	Ne Solomon e hatuhanei e Rehaboam. Ne Rehaboam e hatuhanei e Abitsa. Ne Abitsa e hatuhanei e Asa.
23221	MAT 1:8	Ne Asa e hatuhanei e Jihosapat. Ne Jihosapat e hatuhanei e Joram. Ne Joram e hatuhanei e Usaia.
23222	MAT 1:9	Ne Usaia e hatuhanei e Jotam. Ne Jotam e hatuhanei e Ahas. Ne Ahas e hatuhanei e Hesekia.
23223	MAT 1:10	Ne Hesekia e hatuhanei e Manase. Ne Manase e hatuhanei e Amon. Ne Amon e hatuhanei e Josaia.
23224	MAT 1:11	Ne Josaia e hatuhaner ere Jekonaia mera u toulanen. Na tara pöata teka a tei Israel i lu meralei i Babilon, tina karabusien.
23225	MAT 1:12	Nori i lu meralei i Babilon, be Jekonaia ena hatuhanena e Sieltiel. Be Sieltiel e hatuhanena e Serubabel.
23226	MAT 1:13	Be Serubabel e hatuhanena e Abiut. Be Abiut e hatuhanena e Eliakim. Be Eliakim e hatuhanena e Asor.
23227	MAT 1:14	Be Asor e hatuhanena e Sedok. Be Sedok e hatuhanena e Akim. Be Akim e hatuhanena e Eliut.
23228	MAT 1:15	Be Eliut e hatuhanena e Eliasa. Be Eliasa e hatuhanena e Matan. Be Matan e hatuhanena e Jekop.
23229	MAT 1:16	Be Jekop e hatuhanena e Josep a tson tere Maria. E Maria te posei e Iesu, te ngö haseri e Kristo e Mesaia.
23230	MAT 1:17	E markato uana teka, a man mun tamana hoboto ti taniama tere Abraham batemi noa ria tere Devit, nori i antunaia turu töa u maloto na tohats tara man mun tamana. Ba man mun tamana te taniama tere Devit batemi noana tara pöata ti lu mera leien i Babilon, u töa u maloto na tohats u mun tamana noahas. Na man mun tamana te taniama tara pöata ti lu mera leien i Babilon batemi noana tara pöata te butuia e Mesaia, nori u töa u maloto na tohats noahas u mun tamana.
23231	MAT 1:18	E Iesu Kristo i mar posa menai teka. E Maria i hopö kap bei tego tölo menaien e Josep. Kaba nori ima soho gono noai, be Maria e pikana turu Namnamei u Göagono.
23232	MAT 1:19	E Josep a tson tere Maria e poei, e Maria e pikaia tara tana tson. Na nonei a katuun a matskö koru na nonei e raman hamatsingolein e Maria i matar u katuun tego markato uen teka, ba nonei e katsin la momous ba tuun nena e Maria.
23233	MAT 1:20	E Josep e hakhakats noa hasin a ka teka, ba töa angelo tara Tsunono e butuna i tanen turu sinasoho me poeiena, “O Josep, a hatutubunei tere Devit, alö goma matout ii tego lu menai lö e Maria a tahol i tamölö. Taraha, nonei e pikana turu Namnamei u Göagono.
23234	MAT 1:21	Nonei e pose nou a pien tson, balö te ngöe moien e Iesu, e mar mouna uana teka, A Katuun a Hihitaguhu. Nonei e taguhu ranou u katuun i tanen bate luba nanou a man markato a man omi i taren.”
23235	MAT 1:22	A mamanaka hoboto teka e butu sil korueiena tega kato hamana menaien u raranga te ranga naia a Tsunono tara töa propet i manasa. A propet e mar ranga uu teka: “Hengoiam! A tahol a kukubei tema soho gono noa menei ta tson e pika nou. Ba nonei te pose nou a pien tson, ba nori te ngöe roi a solonen e Emanuel.” A solo e Emanuel e mar mouna uana teka, “E Sunahan e ka gono mera noura.”
23237	MAT 1:24	Be Josep e tagulena ba nonei e kato tatatiena temar ranga menaien a angelo tara Tsunono me töleiena a tahol i tanen.
23238	MAT 1:25	Kaba nonei ema soho gono noa meien, e antunaia tara pöata tena poseia a tahol i tanen a pien tson. Ba e Josep e ngöe neien e Iesu.
23239	MAT 2:1	E Iesu i poseia i Betlehem i Judia tara pöata te king ia e Herot. Na tara pöata ti posa hakapeia e Iesu, ba palair u tson atei tara pala te butu nama a pitala e la uarima i Jerusalem memi rangatar, “Ime te kana a pien ti posa sile ii ega kingir u Jiu? Alam u tarema a pitopito i tanen tara makum te roron butu nama a pitala, ba lam e la sile muma tegomi hatsunono uu lam i tanen.”
23241	MAT 2:3	Pöata te hengo naia e King Herot u ranga teka, ba nonei e toku koruna. Na u katuun hobotor i Jerusalem i toku koru has.
23244	MAT 2:6	‘Alimiou u katunura i Betlehem, turu tsiktsikina i Judia, alimiou e ka tala memou a solo a kapan i gusuna a pal tsunono i Judia. Taraha, a töa tsunono pan e butuna romana i Betlehem, ba nonei te tarakap ranou u katuun i tar a tei Israel.’”
23245	MAT 2:7	Be Herot e ngö momous tuun rena u tson atei. Ba nonei e rangrangata raneien a saha pöata te butuia a pitopito teka.
23246	MAT 2:8	Ba nonei e tula mera neien i Betlehem tegina sake menaien nonei a pien teka. “Pöata te sabie mumen romana limiou, ba limiou temi hatei poutse moulia. Ba lia tena hatsunono hase gouen.”
23247	MAT 2:9	Ba nori e hengoer u raranga tere king ba nori e lar. Na pitopito ti röto mam me len tara pala te roron butu nama a pitala e mam raien, mena ka hamatianan töana tara makum te kaia a pien.
23248	MAT 2:10	Ba nori e tareier a pitopito me sasaala korur.
23249	MAT 2:11	Ba nori e tasur iahana luma te kaia a pien na e tsinanen e Maria, mena hatukunur me hatsunono uar tara pien. Ba nori e kalater a man pora i taren me luer a manka a man niga me halerien a pien: a goul na u insens te haatser bate soka hamasi hanigan töana, na u uapi u soksoka.
23250	MAT 2:12	Nori i hakopis pouts uala i han i taren me sila lila tara tana maroro. Taraha, turu sinasoho i taren e Sunahan e ranga meraien, nori gima tatei la pouts uai tere Herot.
23251	MAT 2:13	Pöata ti la hakapaia u tson atei, ba töa angelo tara Tsunono e butuna turu sinasoho tere Josep me poeiena i tanen, “Alö go takei ba lö te lu rem u mun tsinana, ba limiou te bus uamiou tara han i Itsip. Ba limiou tena ka möa i Itsip e antunana tara pöata te ranga lel goa lia i tamölö. Taraha, e King Herot e sake la nanou a pien bate atung hamatie nouen.”
23252	MAT 2:14	Be Josep e takei noa mena a bong me lu rena u mun tsinana ba nori e la uar i Itsip.
23253	MAT 2:15	Ba nori ena ka ria i Itsip e antunaia tara pöata tega mateia e Herot. A ka teka e butu sil tego kato hamana menaien u raranga te ranga naia a Tsunono tara propet i manasa: “Alia u ngö ba namei a pien tson i tar a han i Itsip.”
23254	MAT 2:16	Pöata te atei sil hamanaseia e Herot u tson atei tara pala te roron butu nama a pitala i gamoeien, ba torinen e raharaha koruna. Ba nonei e hala meranei u soldia i Betlehem, na tara man han i sukusuku, ba nori ena atung hamate rer a galapien tson hoboto ti kamei u huol u hiningal, temar bobo uen tara pöata ti hateien u tson atei.
23255	MAT 2:17	Nonei a mar maroro teka e hatara hamana nena u raranga te ranga naia e Sunahan tere propet Jeremaia.
23256	MAT 2:18	Nonei e mar ranga uu teka, “A nitaatagi pan e butuna tara han i Rama. U katuun e ku hapan koru mer te tabe hataatagi uaren. E Retsel e tabe hataatagi sil koru reiena a galapien i tanen. Na nonei ema ngilenei tegi hasokolei menaien. Taraha, a galapien i tanen i mate hakapa nitöa.”
23257	MAT 2:19	I murina te mate hakapaia e Herot, ba töa angelo tara Tsunono e butuna turu sinasoho tere Josep i Itsip.
23258	MAT 2:20	Ba nonei e poeiena, “Alö go takei, ba lö te lu rem u mun tsinana, ba limiou te la pouts miou tara han i Israel. A katuun te katsin atung hamati a pien e mate hakapa.”
23259	MAT 2:21	Be Josep e takeina me lu rena u mun tsinana, ba nori e la poutsur tara han i Israel.
23260	MAT 2:22	Kaba e Josep e hengoen te lu menai e Akelaus a makum tere tamanen e Herot, me king nena a provins i Judia. Be Josep e matout koruna. Na turu tana u sinasoho e Sunahan e hateien nonei goma la uai i Judia, ba nonei e la uana tara provins i Galili.
23261	MAT 2:23	Ba nonei ena kana tara töa taun te ngöeri i Nasaret. A ka teka e butu sil hasi tego hatara hamana menaien u raranga ti habulunganein u propet. Nori i mar ranga uu teka, “Nonei e ngöe roi a toun Nasaret.”
23262	MAT 3:1	Nonei tara pöata teka e Jon a Tsonun Baptais, e habulungana naia u raranga tere Sunahan tara makum a palaka i Judia.
23263	MAT 3:2	Ba nonei e poeiena, “Alimiou go palis ba naiam a man markato a man omi. A Nipepeito tere Sunahan e sukusuku hakapa.”
23264	MAT 3:3	E Jon nonei a katuun te rangein e Aisaia a propet i manasa. Ba nonei e poeiena, “A töa katuun ena ku hapan noa romana tara makum a palaka bate poeiena, ‘Kato hamatsköeiam a maroro, a Tsunono e ngilin sila nama romana tara maroro a matskö.’”
23265	MAT 3:4	E Jon e roron hasogi u hasobö ti katoei a huluna a kemol, bate pouseiena a lete. Na nonei e roron noui a köno na möröana.
23266	MAT 3:5	Na tara pöata teka, u katunura i Jerusalem na tara man han hoboto tara provins i Judia na tara man han has i rehina a ramun i Jodan, i la hoboto uama tere Jon.
23267	MAT 3:6	Ba nori e pokeier a man markato a man omi i taren, ba nonei e baptais ranen tara ramun i Jodan.
23269	MAT 3:8	Te hapolasa ba namia limiou a man markato a man omi i tamilimiou, bora hatara marei tala naiam a markato a niga, tu habirits ba menami limiou a man markato a man omi i tamilimiou.
23270	MAT 3:9	Alimiou goma tatei mar hakats uami teka, ‘Alam e kamem e Abraham e tubumulam.’ Alia e hatei ragou limiou, e Sunahan e antunan katoe nei u hatu teka a hun haposa tere Abraham. E Sunahan ema antunan ngil pinopinoe nei a katuun te pala uana tere Abraham. E möa. E ngileiena a katuun te kato hanigana.
23271	MAT 3:10	A nikö e ka hakapaia i mouna u ruei. A man ruei tema hua haniga ri e ngats ba rariou bate lapo ba raroa turu tula.
23272	MAT 3:11	“Alia e baptais ragi limiou u ramun tuun, e hatara nena alimiou u habirits ba hakapa naiam a man markato a man omi i tamilimiou. Kaba a katuun te la hamurimuri nama romana i tar e pan bala koru nanou lia. Nonei a tsunono pan, na lia a katuun papala koru ema antunan söata nagi u sendol i tanen. Nonei te baptais ranoui limiou u Namnamei u Göagono na u tula.
23273	MAT 3:12	Nonei e katsin kato hamanasena a toukuin hamou turu wit. Nonei e lu kaakata ranou u katuun u niga na u katuun u omi. Nonei e haka ranoa u katuun u niga tara han a niga, ba nonei te tsuga mera noi u katuun u omi turu tula tema antunan hoso nari.”
23274	MAT 3:13	Na tara pöata teka e Iesu e la ba nema i Galili me la uana tara ramun i Jodan tegomi habaptais uen tere Jon.
23275	MAT 3:14	Kaba e Jon e torohanan katoeien ego palis u hakats i tanen me poeiena, “Alia ego habaptaisia i tamölö, kaba lö e la noa has uamuma i tar? Alö e pan bala koru namou lia.”
23276	MAT 3:15	Be Iesu e ranga palisenen me poeiena, “E noahasina alö go markato uu temar ranga uagu lia. Tara markato teka bara te kato hantunera a mamanaka a matskö te ngilena e Sunahan.” Be Jon e töa kukutiena temar ranga uu e Iesu.
23277	MAT 3:16	Pöata lahas te baptais hakapeien e Iesu me takei sei nama i ramun, ba u kolö e takalatana, ba nonei e tarena u Namnamei tere Sunahan e koul heremei a apena te ngöeri a kulu, memi töna tere Iesu.
23278	MAT 3:17	Ba u töa u raranga e butu nama i Kolö me poeiena, “Nonei a Pien Tson koru i tar. Alia e ngil korue gen, na lia e sasaala koru has megen.”
23279	MAT 4:1	Tara pöata teka u Namnamei tere Sunahan e peigi menai e Iesu tara makum a palaka tegona torohana menaien e Satan.
23280	MAT 4:2	E Iesu ema nouei ta kannou e antunaia turu tohats u maloto u lan na u tohats u maloto a bong. Ba i murinen ba nonei e bes koruna.
23281	MAT 4:3	Be Satan emi torohane nen me poeiena i tanen, “Tego Pien uu lö tere Sunahan, ba lö te rangam, bu hatu teka te palis uar tara beret.”
23282	MAT 4:4	Kaba e Iesu e ranga palis uu i tanen me poeiena, “Turu Buku u Göagono tere Sunahan i koloto hasiin, ‘A beret peisa ema antunan hala nanei a nitöatöa tara katuun. E möa. A katuun te kukutiena a man raranga tere Sunahan nonei e luenou a nitöatöa.’”
23283	MAT 4:5	Nonei e mar ranga uu teka, be Satan e lu mena neien tara taun i Jerusalem, mena hatuole nen iasa koru i pungana tara Luman Lotu Pan.
23284	MAT 4:6	Ba nonei e poeiena tere Iesu, “Tego Pien uu lö tere Sunahan, ba lö te kurapa uam i puta. Taraha, turu Buku u Göagono i koloto hasiin, ‘E Sunahan e ranga mera nou u angelo i tanen tegi tara kap menaien lö. Na nori e pile sei nariou lö, ba u hatu tema tatei toke roi a mou mölö.’”
23285	MAT 4:7	Be Iesu e ranga menen me poeiena, “Turu Buku u Göagono i koloto hasiin, ‘Alö goma torohanei a Tsunono. Nonei e Sunahan i tamölö.’”
23286	MAT 4:8	Be Satan e lu mena neien turu töa u pokus iasa koru. Ba nonei e haröte neien a man han hoboto i puta na mamanaka a niga i taren.
23287	MAT 4:9	Be Satan e poeiena tere Iesu, “Te hatukun moa lö bate hatsunono uaiem i tar, ba lia te hale goi lö a mamana han hoboto teka.”
23288	MAT 4:10	Be Iesu e ranga menen me poeiena, “Satan, alö go laba naiou lia! Turu Buku u Göagono i koloto hasiin, ‘Alö go hatsunono uu tere Sunahan. Nonei puku a töa a Tsunono i tamölö tego kukuti lö.’”
23289	MAT 4:11	Be Satan e laba nanen. Ba u angelo e la rima memi taguheier e Iesu.
23290	MAT 4:12	Pöata te hengo naia e Iesu u raranga ti haka menai e Jon tara karabus, ba nonei e lana i Galili.
23291	MAT 4:13	Ba nonei e laba nena i Nasaret mena kana tara taun i Kapenium i rehina a Ramun a Perperere i Galili. I Kapenium e kaia tara pala turu Sebulun na u Naptali, a huol a pala turu Jiu.
23292	MAT 4:14	A ka teka e butu sil tega kato hamana menaien u raranga te ranga naia e Sunahan tere propet Aisaia i manasa.
23293	MAT 4:15	Ba nonei e poeiena, “U katunura turu tsiktsiki i Sebulun na turu tsiktsikina i Naptali, te ka ria tara maroro pan te la uana i tasi na turu tsiktsiki te kana i hapalana ramun i Jodan, na turu tsiktsikina i Galili te ka has ria u katuun tema Jiu ri.
23294	MAT 4:16	U katuun ti kaia turu kuhil, nori i tara hakapi u ualesala pan! Na pala ti kaia turu tsiktsiki turu kuhilina tara tou mate, u ualesala pan e alesala uanou i taren.”
23295	MAT 4:17	Nonei tara pöata teka, e Iesu e tanian habulunganein a man raranga i tanen ba e poeiena, “Alimiou go palis ba naiam a man markato a man omi! Taraha, a Nipepeito tere Sunahan e sukusuku hakapa.”
23296	MAT 4:18	Pöata te tataalaia e Iesu i kotolana tara Ramun a Perperere i Galili, ba nonei e tareiena e Saimon ti ngö hase ii e Pita na e toulanen e Endru, bate hagala ria i ramun, taraha nori u katunun hagala. Nori i holei a kannou i taren a iena.
23297	MAT 4:19	Be Iesu e poeiena i taren, “La gono memu moulia, ba lia te hatuts ragoui limiou temar sooho merari u katuun.”
23298	MAT 4:20	Ba nori e laba ner u abe i taren, me kukuteier e Iesu.
23299	MAT 4:21	Ba nonei e gamon la lenina me tarena u taina u mun toulana ere Jemis mere Jon, a galapien tere Sebedi. Nori i kaia tara tolaala i taren bate sugeier a man abe i taren, ba nonei e ngö ranen egi la gono meien.
23300	MAT 4:22	Ba nori e laba ner e tamaren na tolaala na u tsonun kui. Ba nori a huol e la gono meier e Iesu.
23301	MAT 4:23	E Iesu e hula laia tara man han hoboto i Galili, me hihatutsna tara man luman lotu turu Jiu. Nonei e hihatutsin u Bulungana u Niga tara Nipepeito tere Sunahan bate kato haniga pouts has raiena u katuun ti ka mei a mamana mar siki.
23302	MAT 4:24	Ba u katunura tara mamana han hoboto tara provins i Siria e hengo ner a toukui na u hihatuts te katoe e Iesu. Ba nori e la merarima u katuun hoboto ti ka mei a mamana mar siki, u katuun ti sagohi a mamana mar kamits, na u katuun u popolöana, nu katuun u kotskotsibong, nu katuun u matekata. E Iesu e kato haniga hoboto pouts raien.
23303	MAT 4:25	Bu katuun u parpara koru e kukutier e Iesu: u katunura i Galili na i Dikapolis na i Jerusalem na i Judia na turu tsiktsiki i hapalana a ramun i Jodan.
23304	MAT 5:1	A pöata te tareia e Iesu u katuun u parpara koru i gonoma, ba nonei e sei uana iasa turu pokus, me gumuna ba u katunun tsitsilo i tanen e larima, ba nonei e tanian hihatutsna i taren.
23306	MAT 5:3	Ba nonei e poeiena, “U katuun te kato hateteneier a peisaren egi sasaala. E Sunahan e ngö raneien u katunun sasaala, taraha a Nipepeito tere Sunahan e ka uana i taren.
23307	MAT 5:4	Na u katuun te taatagir egi sasaala. E Sunahan e ngö raneien u katunun sasaala, taraha nonei e kato hagigaha poutse nou a nitaatagi i taren.
23308	MAT 5:5	Na u katuun te kakamotor batema tatei raharahari egi sasaala. E Sunahan e ngö raneien u katunun sasaala, taraha nori e lue riou a han i puta.
23309	MAT 5:6	Na u katuun te ngil korueier a markato te matsköna i matana e Sunahan egi sasaala. Nori e here rari u katuun te besir na te maka siler a ka a niga. E Sunahan e ngö ranoien u katunun sasaala, taraha nori e masul riou.
23310	MAT 5:7	Na u katuun te taatagi rer a palair u katuun egi sasaala. E Sunahan e ngö ranoien u katunun sasaala, taraha nonei e taatagi has ranoien.
23311	MAT 5:8	Na u katuun a toriren te gogosona egi sasaala. E Sunahan e ngö ranoien u katunun sasaala, taraha nori ena tare roien.
23312	MAT 5:9	Na u katuun te nolo pouts rer a pala te hiaraharahar egi sasaala. E Sunahan e ngö ranoien u katunun sasaala, taraha nonei e ngö has ranoien romana a galapien i tanen.
23313	MAT 5:10	Na u katuun te kato hamatskö ria i matana e Sunahan ba palair u katuun te kato homi raren egi sasaala. E Sunahan e ngö ranoien u katunun sasaala, taraha a Nipepeito tere Sunahan e ka uana i taren.
23314	MAT 5:11	“Alimiou te ka uamiou tara pala i tar, ba nori te ranga hohomi rariou limiou, bate kato hohomi rariou limiou, bate saka rari limiou u mamana u mar ranga u gamo, alimiou e tatei sasaala noahas miou.
23315	MAT 5:12	Alimiou go sasaala koruiam, taraha alimiou ena lue mou u hamatana pan koru i Kolö. Nonei ti markato hohomi has merai u propet ti ka i manasa.”
23316	MAT 5:13	E Iesu e ranga lel me poeiena, “Alimiou e here rami u soluna i puta. Kaba te tia banena u sol a nimal i tanen, e möa len ta maroro tegi markato menaien bate mal poutsina. E gi ba lasiin ba u katuun te tötö ria i oulunen.
23317	MAT 5:14	“Alimiou e here hasemi u ualesala tara mamana makum. Na taun te kana i ouluna u pokus ema antunan hamous nari.
23318	MAT 5:15	Na u katuun ema ron hakuluperi u lam bate kopo kap narien a sosopene. E möa. Nori e haka seie rien tara makumun gumgum turu lam bate alesala uana turu katuun hoboto te ka ria iahana luma.
23319	MAT 5:16	Na u ualesala i tamilimiou ega kato has uu iesana bate alesala uana turu katuun. Ba nori te tare riou a markato a niga i tamilimiou bate soloseier e Tamamilimiou i Kolö.”