23214	MAT 1:1	Ie sab naam Jiesoe Kriest ke baap-daada log ke hai. Oe Daawied aur Aabraaham ke aulaad hai.
23215	MAT 1:2	Aabraaham Iesaak ke baap raha. Iesaak Jaakob ke baap raha. Jaakob Joeda aur okar bhaai log ke baap raha.
23216	MAT 1:3	Joeda Peres aur Serah ke baap raha aur oelogke maai Taamar raha. Peres Hesron ke baap raha aur Hesron Aaram ke baap raha.
23217	MAT 1:4	Aaram Aamienaadab ke baap raha. Aamienaadab Nahson ke baap raha. Nahson ke beta Saalmon raha.
23218	MAT 1:5	Saalmon Boas ke baap raha djaun ke maai Raahab raha. Boas Obed ke baap raha aur okar maai Roet raha. Obed Jesai ke baap raha.
23219	MAT 1:6	Jesai raadja Daawied ke baap raha. Daawied Saalomo ke baap raha aur Saalomo ke maai Oeria ke aurat raha.
23220	MAT 1:7	Saalomo Rehaabeam ke baap raha. Rehaabeam Aabia ke baap raha. Aabia Aasa ke baap raha.
23221	MAT 1:8	Aasa Josaafat ke baap raha. Josaafat Joram ke baap raha. Joram Oesia ke baap raha.
23222	MAT 1:9	Oesia Jotam ke baap raha. Jotam Aahas ke baap raha. Aahas Heskia ke baap raha.
23223	MAT 1:10	Heskia Maanase ke baap raha. Maanase Aamon ke baap raha. Aamon Josia ke baap raha.
23224	MAT 1:11	Josia Jekonia ke aur okar bhaai ke baap raha oe samai djab Israel ke djaatie log Baabielonia ke des me djabar-djastie se ledjaawal gail raha.
23225	MAT 1:12	Ekare baad Jekonia ke beta Sealtiejel paida bhail. Sealtiejel Seroebaabal ke baap raha.
23226	MAT 1:13	Seroebaabal Aabioed ke baap raha. Aabioed Eljaakem ke baap raha. Eljaakem Aasor ke baap raha.
23227	MAT 1:14	Aasor Saadok ke baap raha. Saadok Aahem ke baap raha. Aahem Elioed ke baap raha.
23228	MAT 1:15	Elioed Eleaasar ke baap raha. Eleaasar Matan ke baap raha. Matan Jaakob ke baap raha.
23229	MAT 1:16	Jaakob Josaf ke baap raha. Josaf Maria ke aadmie raha, aur Maria Jiesoe ke maai raha. Jiesoe bhie Kriest bolaawal dja hai.
23230	MAT 1:17	Aabraaham se Daawied talak tjauda pierahie hai. Aur bhie tjauda pierahie hai Daawied se leike djab talak djanta ke Baabielonia des me djaai ke paral. Aur djab se oesab Baabielonia se lautke aail Kriest ke djanam talak bhie tjauda palwaar hai.
23231	MAT 1:18	Ab ham bataab Jiesoe Kriest ke djanam kaise bhail. Maria ke tjhekaai Josaf se hoi gail raha. Aur oesabke biaah howe se pahiele aise bhail kie Maria ke Pawietr Aatma dwaara larka howat.
23232	MAT 1:19	Maria ke hone waala patie ek bhala aadmie raha aur oe na maangat raha kie Maria ke saram pahoetje. Ohie se oe aapan man me sotjies Maria ke biena haltjal matjaawe tjhor dewe ke.
23233	MAT 1:20	Bakie djab oe aisan bietjaar karat raha tab oe ekgo sapana me dekhies kie ek Parmeswar ke parie okar paas aail aur bolies: „He Josaf, Daawied ke aulaad, toe na sotj kar Maria se biaah kare ke. Oe Larka to Pawietr Aatma ke dwaara paida hoi.
23234	MAT 1:21	Maria ke ek beta hoi aur toe okar naam Jiesoe dharaihe. Oe aapan djaatie ke paap me se batjaaiga.
23235	MAT 1:22	Ie sab hoiga djeme Parmeswar ke baat poera howe djaun oe dher dien pahiele aapan sanesia Jasaaja ke dwaara djanaais raha. Oe ose bolies raha:
23236	MAT 1:23	‘Soen, kania ke ek beta paida hoiga. Aur okar naam Emaanoewel rahiega. Ie naam ke matlab hai: Parmeswar hamlogke saath hai.’ ”
23237	MAT 1:24	Djab Josaf djaag gail tab oe karies djaise Prabhoe ke parie ose bolies raha. Oe Maria ke aapan ghare legail.
23238	MAT 1:25	Bakie oe okar saath na soetal djab talak okar beta na paida bhail. Aur oe Larka ke naam Jiesoe dharaais.
23239	MAT 2:1	Jiesoe Betlehem me paida bhail aur oe sahar Joedea ke diehaat me hai. Oe samai hoewa ke raadja ke naam Herodes raha. Tab okare baad koetjh boeddhiemaan poerab kait se aail djaaha soeroedj oege hai aur oelog Jeroesaalem ke sahar me pahoetjal.
23240	MAT 2:2	Tab oesab hoewa ke manai log se poetjhies kie: „Israel ke raadja djaun ab paida bhail hai, oe kaaha rahe hai? Hamlog poerab kait me rahiela aur hoewa par hamlog okar tarai dekhlie hai. Ohie khaatien hamlog ailie hai oke poedje.”
23241	MAT 2:3	Tab raadja Herodes soenke bahoet ghabaraail aur sab Jeroesaalem ke manai log bhie.
23243	MAT 2:5	Tab oesab bolies: „Betlehem sahar Joedea diehaat me. Aise pahiele Parmeswar ke sanesia Mieka liekhies raha kie:
23244	MAT 2:6	‘He Joedea diehaat ke Betlehem sahar, toe ek tjhota sahar baate. Tabbo tore me ek barka aadmie paida hoiga. Oe hamaar Israel ke djaatie ke ek attjha tjaraawe waala ghat rahiega. Ohie se toe sab se tjhota sahar na baate!’ ”
23245	MAT 2:7	Tab raadja Herodes boeddhiemaan log ke tjoeppe se aapan paas bolwaaike oesabse poetjhies kie: „Hamse bataaw, toelog oe tarai kab dekhle baate?” Tab oesab bataais.
23246	MAT 2:8	Tab oe oesabke Betlehem sahar pathaais aur bolies: „Dja larka ke khodj. Aur djab toelog oke paihe tab aaike hamse bataihe. Tab ham bhie djaab oke poedje.”
23247	MAT 2:9	Ekare baad oesab tjal gail. Aur dekh, oe tarai djaun oesab poerab kait se dekhies raha, oesabke aage aage tjale lagal oe djagaha talak djaaha Larka raha aur hoewa par roek gail.
23249	MAT 2:11	Tab djab oesab ghar me gail tab Larka aur okar maai ke paais. Oelog Larka ke aage gaathie par gierke oke poedjies. Aur aapan djhorie kholke oke sona ke tjiedj, lohbaan aur mahakauwa taufa deis.
23250	MAT 2:12	Tab ek sapana me Parmeswar oesabse bolies kie: „Raadja Herodes ke paas lautke na djaihe.” Ohie khaatien oesab ek doesar rasta se aapan des laut gail.
23251	MAT 2:13	Djab boeddhiemaan log tjal gail raha tab Josaf bhie ek sapana dekhies. Ek Parmeswar ke parie ose bolies: „Oethke Larka aur okar maai ke leike Egypte des me bhaag dja, nahie to raadja Herodes Larka ke marwaai dhaarie. Ohie se hoewa rahiehe djab talak ham tose na bolab.”
23252	MAT 2:14	Josaf bietj raat me oethke Larka aur okar maai ke leike Egypte me bhaag gail.
23253	MAT 2:15	Aur djab talak raadja Herodes na mar gail oesab hoewa raha. Aisane poera bhail djaun Parmeswar aapan sanesia Hosea dwaara bolies raha kie: „Ham aapan Beta ke Egypte ke des me se bolailie hai.”
23254	MAT 2:16	Raadja Herodes djab dekhies kie boeddhiemaan log okar baat na soene hai, tab oe bahoet goessaail. Aur oe hoekoem deis kie Betlehem sahar me aur okare aas-paas ke sab laundan doei baries tak marwaai dhaare ke. Oe boeddhiemaan log se to poetjhies raha kie Jiesoe kab paida bhail hai.
23255	MAT 2:17	Aisane dekhaail kie Parmeswar ke sanesia Jeremia ke baat poera hoi gail. Oe bolies raha:
23256	MAT 2:18	„Raama sahar me soena hai kie Raahel aapan larkan khaatien piet-pietke rowe hai aur koi na oke samdjhaai sake hai. Oesab to mar gail hai.”
23257	MAT 2:19	Josaf log Egypte des me rahat raha djab talak raadja Herodes na maral. Tab Josaf phien se ek sapana me ek Parmeswar ke parie okar paas aawat dekhies. Parie bolies kie:
23258	MAT 2:20	„Dje maangat raha Larka ke maar dhaare, oesab mar gail. Ohie se Larka aur okar maai ke leike phien se Israel des me dja.”
23259	MAT 2:21	Josaf oethke Larka aur okar maai ke leike hoewa phien laut gail.
23260	MAT 2:22	Bakie djab oe soenies kie Herodes ke beta Arkelaajoes ab Joedea ke diehaat ke raadja hai, tab oke dar lagal hoewa djaai ke. Tab ek doesar sapana me oe raai paais Gaalielea ke diehaat me djaai ke.
23261	MAT 2:23	Djab oesab hoewa par pahoetjal tab Naasaaret sahar me rahe lagal. Aisane poera bhail djaun Parmeswar ke sanesia log Kriest ke biese me bolies raha: „Oe ek Naasaaret waala bolaawal djaaiga.”
23265	MAT 3:4	Johaanas oet ke baar waala kapra pahienat raha. Oe ekgo tjamra ke tjamotie aapan karhiaaw me lagaawat raha. Oe phatienga khaat raha aur maidaan me madh tjaatat raha.
23266	MAT 3:5	Tab Jeroesaalem sahar aur sab Joedea diehaat aur Jordaan nadie ke galie ke log okar paas aail.
23267	MAT 3:6	Aur oesab okar baat maanke bolies kie: „Hamlog paapie baatie.” Aur oelog apane ke Jordaan nadie me Johaanas se dopoe karwaais.
23268	MAT 3:7	Tab dher Fariesie aur Sadoesie log bhie aail dopoe lewe khaatien. Bakie djab Johaanas oelogke dekhies tab oesabke daate lagal aur bolies: „Are, dhokhaabaadj log! Ke toelogse bataais hai kie toelog Parmeswar ke goessa me se batj sake hai?
23269	MAT 3:8	Bestar hai kie toelog aapan tjaal-tjalan se dekhaihe kie toelog maange hai aapan djiewan badale aur bietaawe djaise Parmeswar ke parsand howe hai.
23270	MAT 3:9	Toelog na sotjiehe kie: ‘Hamlog Parmeswar ke bieswaasie Aabraaham ke aulaad baatie, ohie se hamlog Parmeswar ke goessa me se batj djaab.’ Ham toelogse boliela kie Parmeswar Aabraaham khaatien ie patthar se aulaad banaai sake hai.
23271	MAT 3:10	Taanga per ke lage rakhaai gail. Djab ek per attjha phal na dewe hai, tab oe kaatal djaai aur aagie me djaraawal djaaiga.
23272	MAT 3:11	Ham toelogke paanie se dopoe kariela dekhaawe khaatien kie toelog aapan paap pastaaike ek naawa djiewan soeroe karle hai. Bakie hamare baad ek Aadmie aaiga djaun ke hamse djaada saktie hai. Ham okar djoeta oethaawe laaik na baatie. Oe toelogke Pawietr Aatma aur aagie se dopoe kariega.
23273	MAT 3:12	Oe iensaan logan ke faisala kariega djaise ek khetiar dhaan osaaike bakhaar me rakhie aur paija ke aagie me djaraai dei. Aur oe aagie kabhie na boetiega.”
23274	MAT 3:13	Tab Jiesoe Gaalielea ke diehaat tjhorke Johaanas ke paas gail Jordaan nadie me apane ke dopoe karwaawe ke.
23276	MAT 3:15	Tab Jiesoe bolies: „Hamlogke tjaahie Parmeswar ke sab hiettjha poera kare ke. Ohie se toe hamme dopoe kar.” Tab Johaanas oke dopoe karies.
23277	MAT 3:16	Toerant Jiesoe dopoe hoike paanie me se nieksal. Aur dekh, swarag khoel gail aur Johaanas dekhies kaise Parmeswar ke Aatma ek kaboettar ke roep me oetarke Jiesoe ke oeppar aawe hai.
23278	MAT 3:17	Aur swarag me se bhie ek aawaadj soenaail. Pieta Parmeswar bolies: „Ie hamaar pjaara Beta hai aur hamme bahoet parsand howe hai.”
23279	MAT 4:1	Ekare baad Pawietr Aatma Jiesoe ke maidaan me legail djeme saitaan oke adjmaaike dekh sake kie oe Parmeswar ke baat soene hai kie na.
23280	MAT 4:2	Jiesoe tjaalies dien aur raat bhoekha raha. Tab ant me oke bhoekh lagal.
23283	MAT 4:5	Tab saitaan oke Jeroesaalem sahar me legail aur Parmeswar ke mahal par thara karwaais.
23284	MAT 4:6	Oe bolies: „Parmeswar ke poestak me liekhal hai kie: ‘Parmeswar aapan parie log se boliega tor rakhwaala kare ke. Oesab toke aapan haath par rok leiga djeme tor gor ieta me na lage.’ Ohie se djab toe Parmeswar ke Beta baate tab toe nietje koed dja.”
23286	MAT 4:8	Tab oe oke ek bahoet oetja pahaar par legail aur hoewa se doenia bhar ke raadj-paat aur okar soendarta dekhaais.
23289	MAT 4:11	Saitaan oke tjhorke tjal gail. Aur toerant Parmeswar ke parie log aaike Jiesoe ke sewa kare lagal.
23290	MAT 4:12	Djab Jiesoe ke pata mielal kie Johaanas dopoe kare waala pakaraaike djahal me band hai, tab oe Gaalielea ke diehaat me tjal gail.
23291	MAT 4:13	Oe Naasaaret sahar tjhorke Kaapernaum sahar me gail rahe. Oe sahar Gaalielea samoendar ke kienaare hai Seboelon aur Naftaalie ke galie me.
23292	MAT 4:14	Aisane Parmeswar ke sanesia Jasaaja ke baat poera bhail. Oe Jiesoe ke biese me hoewa ke manai log se bolies raha kie:
23293	MAT 4:15	„He Seboelon aur Naftaalie ke diehaat log, toelog samoendar ke kienaare rahe hai. Aur Jordaan ke nadie ke oepaar rahane waalan, aur Gaalielea ke diehaat ke dher manai log,
23294	MAT 4:16	toelog ekdam se andhiaar me rahe hai. Bakie toelog ek biesaal djotie dekhiehe. Aur andjor hoi djaaiga oe manai log khaatien djaun ek andhiaar des me rahe hai djaaha maut raadj kare hai.”
23295	MAT 4:17	Oe tem se Jiesoe partjaar kare lagal. Oe bolies kie: „Swarag ke raadj nagietj aai gail. Ohie se aapan paap pastaaw aur Parmeswar ke rasta par tjal.”
23296	MAT 4:18	Ek dien Jiesoe Gaalielea ke samoendar ke kienaare kienaare tjalat djaat raha. Tab hoewa par doei bhaai ke dekhies. Oesab aapan djaal paanie me bahaawat raha. Oelogke naam Siemon aur Andreas hai. Siemon bhie Petras bolaawal dja hai. Aur ie doeno matjhar marwa raha.
23298	MAT 4:20	Oesab toerant aapan djaal tjhorke okar saath tjal gail.
23299	MAT 4:21	Tab hoewa se aage tjalke phien se doei bhaai ke dekhies. Oesab Sebedeas ke betwan raha. Aur oesabke naam Jaakobas aur Johaanas raha. Oesab aapan baap ke saathe bot me baithke djaal setiaawat raha. Tab Jiesoe oe doeno bhaai ke bhie apane paas bolaais.
23300	MAT 4:22	Aur oesab toerant aapan baap aur bot tjhorke okar saathe tjale lagal.
23301	MAT 4:23	Jiesoe Gaalielea ke diehaat bhar me ghoem ghoemke partjaar ke ghar me khoes khabar ailaan karat raha kie Parmeswar manai log ke diel me maange hai raadj tjalaawe. Aur oe bhie har ek rakam bemaria log ke attjha karat raha.
23302	MAT 4:24	Sieria des bhar me manai log okare baare me bhie soenies. Tab oelog aapan kharaab bemarian ke okar paas laais. Oelogke har ek rakam ke bemaarie aur piera raha, ketane ke bhoet pakaries raha, miergie aawat raha aur loendj log ke. Aur Jiesoe ie sab ke attjha karies.
23303	MAT 4:25	Djhoend bhar manai log okar paatjhe paatjhe tjalat raha. Oesab Gaalielea ke diehaat ke raha aur bhie Das-sahar-ke galie, Dekaapoles diehaat, Jeroesaalem sahar, Joedea diehaat aur Jordaan nadie ke habara ke raha.
23304	MAT 5:1	Jiesoe oe barka djhoend ke dekhke pahaar par baith gail. Aur okar tjela log okar paas gail.
23306	MAT 5:3	„Soekhie hai djekar diel garieb hai. Oe swarag ke raadj me bhiettar djaaiga.
23307	MAT 5:4	Soekhie hai dje oedaas hai. Parmeswar oke tieha deiga.
23308	MAT 5:5	Soekhie hai dje sadhaaran hai. Dhartie oelogke khaatien rahiega.
23309	MAT 5:6	Soekhie hai dje diel bhar se maange hai kie Parmeswar ke hiettjha poera howe. Okar hiettjha ekdam poera hoiga.
23310	MAT 5:7	Soekhie hai dje daajaaloe hai. Oke Parmeswar ke daaja mieliega.
23311	MAT 5:8	Soekhie hai dje safa diel se Parmeswar ke maane hai. Oe Parmeswar ke dekhiega.
23312	MAT 5:9	Soekhie hai dje doesman log ke ek karwaawe hai. Oe Parmeswar ke larka bolaawal djaaiga.
23313	MAT 5:10	Soekhie hai dje Parmeswar ke baat maane ke dwaara sataawal dja hai. Oe swarag ke raadj me bhiettar djaaiga.
23314	MAT 5:11	Soekh me rahiehe djab manai log toelogke niendara karie, sataai aur hamaar baat soene ke dwaara toelogke baare me har ek rakam djhoeth bolie.
23315	MAT 5:12	Aisane Parmeswar ke sanesia logan pahiele bhie sataawal gail. Swarag me toelogke barka ienaam mielie. Ohie se hardam khoesie rahoe.”
23316	MAT 5:13	Jiesoe bolies: „Toelog doenia khaatien djaise niemak baate. Aur djab niemak me taagat aur sawaad na hai, tab kaun tjiedj se khaaik sawaad dei sake hai? Oe to be-kaamiel hoi gail hai aur phekal djaaiga djaaha manai log gor se katjariega.
23317	MAT 5:14	Toelog doenia me djaise djotie baate. Koi na tjieraag baarke top dewe hai, bakie oke oetja dhar dewe hai, tab ghar bhar thiek se dekh paawe hai. Aur ek pahaar par ke sahar bhie thiek se dekha hai.
23320	MAT 5:17	Jiesoe bhie bolies: „Toelog na sotjiehe kie ham ailie hai Parmeswar ke kaanoen aur okar sanesian ke baat toere. Ham na ailie hai toere bakie poera kare.
23321	MAT 5:18	Ham toelogse satj boliela kie djab lek ie dhartie aur swarag rahiega Parmeswar ke kaanoen ke ek attjhar na badaliega. Aur doenia aur swarag ke samaap howe se pahiele Parmeswar ke sab baat poera hoiga.
23322	MAT 5:19	Dje okar kaanoen ke ek tjhota toekkara toerie aur manai logan ke aise siekhaai, oe swarag ke raadj me bahoet tjhota maanal djaaiga. Bakie dje ie kaanoen ke baat maaniega aur doesare ke bhie siekhaaiga, oe swarag ke raadj me barka bolaawal djaaiga.
23324	MAT 5:21	Jiesoe samdjhaaike bolies: „Toelog soenle hai kie Mosas toelogke baap-daada log se bolies raha: ‘Koi ke na maar dhariehe. Dje ek doesare ke maar dhaariega, djadj oke sadja deiga.’
23325	MAT 5:22	Ie satj hai, bakie ham toelogse boliela kie dje ek doesare se moeh phoelaaike rahe hai, djadj ke tjaahie ohoeke sadja dewe ke. Dje goessa me bole hai: ‘Toe gadaha baate,’ oke tjaahie djadj ke sab se barka sadja miele ke. Aur dje bole hai: ‘Toe paagal baate,’ oe narak ke aagie me pahoetjiega.
23327	MAT 5:24	tab toke tjaahie aapan daan hoewa par tjhorke ose phien ek howe ke. Tab toe aaike Parmeswar ke aapan daan dei sakiehe.
23328	MAT 5:25	Djab toe koi ke koetjh dharta baate, tab ose kaida se agahie se batia le, nahie to oe toke djadj ke hawaale kar dei aur toe djahal katiehe.
23329	MAT 5:26	Ham toelogse satj boliela kie toelog djahal me se na niekar paihe djab lek ek ek sies na bhariehe.
23331	MAT 5:28	Ie satj hai, bakie ham toelogse boliela kie dje ek doesar koi ke aurat ke taake hai aur oke maange hai rakhe, oe aapan diel me aapan biaah ke waada toer tjoekal hai.