23233	MAT 1:20	Hayet lan̈an yecꞌ huneꞌ tuꞌ yin̈ isnabal naj, isyeni isba huneꞌ yángel Comam Dios tet naj yul iswayic; yalni naj ángel tuꞌ hacaꞌ tiꞌ: —José, hach titnajach yin̈ yuninal naj rey David, mach chinanon hacꞌul hamohyi yeb ix María, yuto haꞌ nichꞌan unin ijbilico yu ix yet Comam Espíritu Santo.
23240	MAT 2:2	iskꞌamben ebnaj: —¿Baytuꞌwal ay huneꞌ naj nichꞌan xapitzcꞌahi, naj chioc isreyalo anma Israel tiꞌ? Jilan̈ yahilo huneꞌ txꞌumel yin̈ yetcꞌulal bay chiahilo tzꞌayic, haꞌ xin akꞌni cotxumulojan̈ tato xapitzcꞌa naj. Yuxin macon̈titan̈ jikꞌayo cobahan̈ tet naj, ẍi ebnaj.
23242	MAT 2:4	Yuxin yawte naj Herodes tuꞌ ebnaj yahawil yin̈ ebnaj sacerdote Israel, yeb ebnaj cuywawom yin̈ isley naj Moisés; iskꞌamben naj tet ebnaj: —¿Baytaxca tuꞌ chipitzcꞌa naj Cristo? ẍi naj.
23243	MAT 2:5	Istakꞌwi ebnaj tet naj: —Yul con̈ob Belén yul ismajul Judea chipitzcꞌa naj, yuto hac tuꞌ yu istzꞌibn̈elaxcanayo yul Yum Comam Dios yu huneꞌ ischejab yet payat, bay chal hacaꞌ tiꞌ:
23246	MAT 2:8	Lahwi tuꞌ xin ischejnito naj Herodes tuꞌ ebnaj bey con̈ob Belén, yalni naj tet ebnaj: —Asiwe bey Belén tuꞌ, caw xin chekꞌambe yin̈ tzet caw ye nichꞌan unin tuꞌ. Lahwi yilcha naj heyu cat heyul heyalno wetan cat intopaxojan winayo inbahan tet naj, ẍi naj.
23251	MAT 2:13	Haxa yet xapaxto ebnaj mago hulicꞌo ilno nichꞌan Jesús, isyeni isba huneꞌ yángel Comam Dios tet naj José yul iswayic, yalni naj ángel tuꞌ: —Ahan̈wano yin̈ an̈e, ito nichꞌan unin tiꞌ yeb ismiꞌ cat hato bey Egipto. Wal haweh bey tuꞌ masanto haninan chiwalan tawet bakꞌin chachmeltzohi, yuto chati naj Herodes issayomal nichꞌan unin tiꞌ cat ispotxꞌni naj yalni, ẍi naj ángel tet naj José.
23253	MAT 2:15	Haꞌ bey tuꞌ xin ehayo naj yeb ix masanto cam naj rey Herodes. Hac tuꞌ yu yijnicano isba tzet halbilcano yu Comam Dios tet huneꞌ ischejab yet payat yet istzꞌibn̈encano naj hacaꞌ tiꞌ: “Bey Egipto chiwawteti Incꞌaholan,” ẍiayoj.
23258	MAT 2:20	—Ahan̈wanoj cat hameltzo yeb nichꞌan unin tiꞌ yeb ismiꞌ bey hacon̈ob Israel, yuto xacam ebnaj ochen potxꞌno camo nichꞌan unin tiꞌ, ẍi naj ángel.
23263	MAT 3:2	Yalni naj tet anma apni bey tuꞌ: —Bejwecano hewatxꞌen istxꞌojal, yuto yocxa Comam Dios ay yul satcan̈ yahawo teyin̈, ẍi naj.
23264	MAT 3:3	Haꞌ ton yin̈ naj Juan tiꞌ bay yal naj Isaías, huneꞌ ischejab Comam Dios yet payat, yet istzꞌibn̈encano naj hacaꞌ tiꞌ: Ay huneꞌ naj chiawi yin̈ caw ip bey huneꞌ txꞌotxꞌ desierto, chalni naj: “Watxꞌeweco heyanma yuto chihul Comam Dios Jahawil. Hacaꞌ chu istoholban̈elax hunu beh yet chihul hunu naj jahaw, hac tuꞌ cheyute hayanma,” ẍi naj, ẍi yul Yum Comam Dios.
23268	MAT 3:7	Hayet yilni naj Juan tato txꞌiꞌal ebnaj fariseo yeb ebnaj saduceo apni iscꞌatan̈ yu yah haꞌ iswiꞌ, yalni naj tet ebnaj: —Hex tiꞌ caw hacaꞌtan̈e heyicꞌal heba yeb noꞌ laba, caw helanex hecolni heba. ¿Mac halni teyet ta yun̈e chꞌah haꞌ hewiꞌ yuxin chexcolcha tet huneꞌ isyaꞌtajil chati Comam Dios?
23270	MAT 3:9	Tajca chetxum hacaꞌ tiꞌ: “Han̈on̈tiꞌan̈ jichmaman̈ ye icham Abraham, yuxin xacon̈colchahan̈ yalan̈ isyaꞌtajil chatiꞌ Comam Dios, tajca quexchi. Wal xin chiwalan teyet, tato choche Comam Dios chu yanico Comam huntekꞌan chꞌen chꞌen tiꞌ yuninalo icham Abraham heseleloj.
23273	MAT 3:12	Naj chul tuꞌ lahan naj hacaꞌ hunu naj chixunilo iskꞌal ixim trigo, nan chakꞌ naj ixim sat, nan chakꞌpaxo naj ixim yoj, wal ixim sat tuꞌ chiscꞌubato naj ixim yul iscꞌun̈a, haxa ixim yoj tuꞌ xin chiskꞌojto naj ixim xol kꞌa kꞌaꞌ mach istan̈bal,” ẍi naj Juan tuꞌ.
23275	MAT 3:14	Wal naj Juan tuꞌ mach chisje naj yakꞌaꞌcan̈ haꞌ iswiꞌ Comam. Yalni naj tet Comam: —Machoj, wal xin haꞌ hawet hach yilal hawanican̈ haꞌ inwiꞌan, maẍtajach chachhul incꞌatan̈an yu wanican̈an haꞌ hawiꞌ, ẍi naj.
23276	MAT 3:15	Yajaꞌ takꞌwi Comam tet naj: —Mach chu haman̈cꞌon huneꞌ tiꞌ, wal xin yilal coyijen tzet chal Comam Dios, ẍi Comam. Hac tuꞌ xin yu isyijen naj Juan yanican̈ haꞌ iswiꞌ Comam Jesús.
23278	MAT 3:17	Yabelax huneꞌ yul nukꞌe satcan̈, halni hacaꞌ tiꞌ: —Haꞌ naj tiꞌ Incꞌaholan, caw xahan ay wuhan, caw chintzalahan yin̈ naj, ẍiaytij.
23281	MAT 4:3	Yapni naj matzwalil yilweno Comam, yalni naj tet Comam: —Ta yeli Iscꞌahol Dios hawehi, hal tet huntekꞌan chꞌen chꞌen tiꞌ meltzojabico chꞌen wahil, ẍi naj.
23282	MAT 4:4	Istakꞌwi Comam tet naj: —Wal xin tzꞌibn̈ebilcano yul Yum Comam Dios tato maẍn̈etaj yu tzet chicolo yuxin ay cokꞌinal, to yupaxo Istzotiꞌ Comam, ẍiayoj, ẍi Comam tet naj.
23284	MAT 4:6	yalni naj tet Comam: —Tato caw yeli Iscꞌahol Dios hawehi kꞌojayto haba bey tiꞌ, yuto tzꞌibn̈ebilcano yul Yum Comam Dios hacaꞌ tiꞌ: Chakꞌati Comam Dios yángel chachistan̈eꞌ yun̈e mach chaẍischayo ebnaj sat txꞌotxꞌ, haxinwal mach chilahwi hawoj yin̈ chꞌen chꞌen, ẍiayoj, ẍi naj.
23285	MAT 4:7	Istakꞌwi Comam Jesús tet naj: —Tzꞌibn̈ebilpaxcanayo yul Yum Comam Dios hacaꞌ tiꞌ: “Mach chinheyacojan yin̈ ilwebal yuto Heyahawil yeb heDiosal wehan,” ẍiayoj, ẍi Comam.
23287	MAT 4:9	Yalni naj tet Comam: —Sunil huntekꞌan chawil tiꞌ chiwakꞌan tawet, yaj tato chaẍay jahno insatajan cat hawinayo haba wetan, ẍi naj tet Comam.
23288	MAT 4:10	Istakꞌwi Comam: —Ach matzwalil hitzan̈ilo incꞌatan̈an yuto chal yul Yum Comam Dios hacaꞌ tiꞌ: “Iweyo heba tet Comam Dios yuto Heyahawil yeb heDiosal ye Comam, han̈e tet Comam xin cheyije tzet chala,” ẍiayoj, ẍi Comam.
23295	MAT 4:17	Haꞌ bey tuꞌ xin ichico Comam Jesús yalnicꞌo Istzotiꞌ Comam Dios, chalni Comam: —Bejwecano hewatxꞌen istxꞌojal yuto yocxa Comam Dios ay yul satcan̈ Yahawo teyin̈, ẍi Comam.
23297	MAT 4:19	Yalni Comam tet ebnaj: —Ocan̈we tzujno wintajan, wal tinan̈ haxa anma chexoc heyikꞌahtij cat yoc yul inkꞌaban, ẍi Comam.
23306	MAT 5:3	—Sakꞌal yet mac chitxumchalo yu ta mach chu iscolni isba ischuquil, yuxin yin̈n̈e Comam chicawxi iscꞌul. Huneꞌ mac tuꞌ yet ay yoc yul iskꞌab Comam Dios.
23316	MAT 5:13	Yalnipaxo Comam Jesús: —Hex tiꞌ, hacaꞌ atzꞌam atzꞌam, hac tuꞌ heye yul sat yiban̈kꞌinal tiꞌ. Kꞌinalo ta chiel iscꞌachiꞌal atzꞌam matxa chu yoc iscꞌachiꞌal atzꞌam hunelxa, hacꞌ tuꞌ xin matxa tzet chꞌocnico atzꞌam, to chitirlaxtoj cat isxan̈laxicꞌo yu anma, ẍi Comam.
23317	MAT 5:14	Yalnipaxo Comam Jesús: —Hex tiꞌ hacaꞌpaxo sajilkꞌinal heye yul sat yiban̈kꞌinal tiꞌ. Kꞌinalo ta ay hunu con̈ob yin̈ iswiꞌ hunu witz, caw haban jilnilto nahat.
23320	MAT 5:17	Yalnipaxo Comam Jesús hacaꞌ tiꞌ: —Tajca chetxumu ta yu intan̈tzenilojan isley naj Moisés yeb cuybanile aycano yu ebnaj ischejab Comam Dios yuxin quinhulan, machoj, walxinto yun̈e wakꞌnihan ohtan̈elaxilo yin̈ tzet chaliloj yuxin quinhulan.
23324	MAT 5:21	Yalnipaxo Comam Jesús: —Hex tiꞌ heyohtaj tato hallax tet ebnaj jichmam hacaꞌ tiꞌ: “Mach chepotxꞌcamo heyet anmahil, yuto haꞌ mac chipotxꞌni hunu yet anmahil yilal yilaxto sata naj juez cat yoc yin̈ isyaꞌtajil yu naj,” ẍi.
23330	MAT 5:27	Yalnipaxo Comam Jesús: —Hex tiꞌ heyohtaj tato hallax hacaꞌ tiꞌ: “Mach chexixli,” ẍi.
23334	MAT 5:31	Yalnipaxo Comam: —Hallaxpaxo yet payat hacaꞌ tiꞌ: “Ta ay hunu naj chispoh isba yeb yixal, yilal iswatxꞌicano yumal cat yakꞌnicano naj huneꞌ hum tuꞌ tet ix,” ẍiayoj.
23336	MAT 5:33	Yalnipaxo Comam Jesús: —Hex tiꞌ, heyohtapaxoj tato hallax tet ebnaj jichmam hacaꞌ tiꞌ: “Ta cheyawte isbi Comam Dios yin̈ hunu tzet chetakꞌwe teyin̈, yilal heyijen huneꞌ tuꞌ,” ẍiayoj.
23341	MAT 5:38	Yalnipaxo Comam Jesús hacaꞌ tiꞌ: —Hex tiꞌ heyohtaj tato hallaxpaxo hacaꞌ tiꞌ: “Tato ay hunu mac chimakꞌni poho isbakꞌsat hunu maca, makꞌlaxojabpaxo poho isbakꞌsat huneꞌ mac tuꞌ. Tato ay hunu mac chimakꞌnilti yeh hunu maca, makꞌlaxojabpaxilti yeh huneꞌ mac tuꞌ,” ẍiayoj.
23346	MAT 5:43	Yalnipaxo Comam Jesús: —Hex tiꞌ heyohtaj tato hallax hacaꞌ tiꞌ: “Xahan cheyil mac xahan chexilni. Mac ayco ishowal teyin̈ xin, ocojabpaxo hehowal yin̈,” ẍiayoj.
23349	MAT 5:46	Wal xin tato han̈cꞌan̈e anma xahan chexilni, haꞌn̈e xin xahan cheyilpaxoj, ¿mataxca chechah ispaj huneꞌ tuꞌ tet Comam Dios? Machoj, yuto hac tuꞌ chute isbeybaln̈e ebnaj mulum, hacaꞌ ebnaj ikꞌomilo tohlabal chito bey Roma.
23350	MAT 5:47	Yeb xin tato han̈cꞌan̈e tet heyuẍtaj chextioẍli, ¿cꞌulmi huneꞌ tuꞌ? Machoj. Wal xin haꞌ anma mach ohtan̈eho Comam Dios hac tuꞌ chisbeybaln̈e.
23352	MAT 6:1	Yalni Comam Jesús: —Caw nann̈e heyu yin̈ tzet chewatxꞌe, machn̈ehojab yin̈ sat anma cꞌul cheyute heba, yuto ta yun̈e heyillaxi yuxin chewatxꞌe iscꞌulal, mach chechah ispaj selel tet Comam Dios ay yul satcan̈.
23356	MAT 6:5	Yalnipaxo Comam Jesús: —Hayet chextxahli tet Comam Dios, mach cheyute hacaꞌ chute ebnaj chal isba cꞌulal. Haꞌ ebnaj tuꞌ yun̈e yillax ebnaj yu anma, yuxin ton̈eticꞌa choche islin̈ba isba istxahli yulaj iscapilla ebnaj Israel, yebpaxo yin̈la istxiquin txon̈bal. Yin̈ caw yeli chiwalan teyet, yet chitxahli ebnaj hacaꞌ tuꞌ chischahnina ebnaj ispaj selel tet anma.
23365	MAT 6:14	Yalnipaxo Comam: —Ta cheyakꞌ nimancꞌulal yin̈ anma chiwatxꞌen istxꞌojal teyin̈, haꞌ Comam Dios ay yul satcan̈ chꞌakꞌnipaxo nimancꞌulal teyin̈.
23367	MAT 6:16	Lahwi tuꞌ yalnipaxo Comam Jesús: —Hayet mach chexwaꞌ yu hetxahli tet Comam Dios, mach biscꞌulalo cheyute hesat hacaꞌ chute ebnaj chal isba cꞌulal, yuto ebnaj tuꞌ caw biscꞌulal chute ebnaj sat yun̈e yillax ebnaj yu anma tato ayco ebnaj yin̈ yet mach chon̈wahi yu cotxahli tet Comam Dios. Yin̈ caw yeli chiwalan teyet chischahna ebnaj ispaj selel yet chiillax ebnaj yu anma tuꞌ.
23370	MAT 6:19	Yalnipaxo Comam Jesús hacaꞌ tiꞌ: —Mach chetenba hekꞌalomal sat txꞌo txꞌotxꞌ tiꞌ, yuto chioc noꞌ ih yetaꞌtoj, cat xin yocpaxo iskꞌuxewal. Macato chul ebnaj elkꞌom yin̈ cat yinito ebnaj.
23375	MAT 6:24	Yalnipaxo Comam Jesús hacaꞌ tiꞌ: —Machi hunu mac chu yoc chejabo tet cawan̈ patrón, yuto ta chisyije naj tzet chal naj babel, chisman̈cꞌo naj tzet chal naj iscab. Yeb xin tato xahan chil naj naj babel, chisyah naj naj iscab. Hac tuꞌ heye hex tiꞌ, mach chu heyijen tzet chal Comam Dios tato ecꞌbal cheyaco heyanma yin̈ kꞌalomal, ẍi Comam.
23376	MAT 6:25	Yalnipaxo Comam Jesús: —Yuxin chiwalan teyet, mach cheyaco yin̈ hecꞌul yin̈ tzet chelo, yeb yin̈ tzet chu yoc xil hekꞌap yul sat yiban̈kꞌinal tiꞌ. Ta chakꞌ Comam Dios cocawil, ¿haꞌ tom xin tzet chicolo mach chakꞌ Comam, heyalni? Ta haꞌ Comam akꞌn̈e conimanil, ¿haꞌ tom xil cokꞌap mach chakꞌ Comam?
23377	MAT 6:26	Ilwecꞌanab noꞌ chꞌic chiecꞌ satcan̈, machi yawal noꞌ chacoj, mach chihatxꞌwi noꞌ, machipaxo iscꞌun̈a noꞌ, yajaꞌ xin chiakꞌlax tzet chislo noꞌ yu Comam ay yul satcan̈. ¡Hajxamex to caw ecꞌbal heyelapno sata noꞌ!
23378	MAT 6:27	¿Aymi hunujex tiꞌ yu caw cheyaco yin̈ hecꞌul yuxin chu heyanico hanicꞌoxa yakꞌbil hakꞌinal yul sat yiban̈kꞌinal tiꞌ?
23379	MAT 6:28	¿Tzet yin̈ xin caw cheyaco yin̈ hecꞌul yin̈ tzet chu yoc xil hekꞌap? Ilwecꞌanab teꞌ caj chichꞌib xol kꞌebtaj, mach chimunla teꞌ, mach chichemlipaxo teꞌ,
23381	MAT 6:30	Walca caw cꞌulchꞌan jilni isxumaquil teꞌ tinan̈, yajaꞌ yet hecal cabe chin̈uslaxto teꞌ yul horno. Ta chakꞌ Comam iscꞌulchꞌanil teꞌ caj tuꞌ, ¿haꞌ tom xin xil hekꞌap mach chakꞌ Comam? Hex tiꞌ caw mach cheyaco heyanma yin̈ Comam Dios.
23382	MAT 6:31	Yuxin mach cheyaco yin̈ hecꞌul cheyalni hacaꞌ tiꞌ: ¿Baytaxca chitit tzet chicolo yeb xil cokꞌap?
23386	MAT 7:1	Yalnipaxo Comam Jesús: —Mach comono chexoc heyilaꞌ tzet ye hunu heyet anmahil, haꞌ xin wal mach chiocpaxo Comam Dios yilaꞌ tzet heyehi.
23388	MAT 7:3	Kꞌinalo tato ay hunu hawuẍtaj ayicto iskꞌal teꞌ chꞌim yul isbakꞌsat, wal hachpaxo xin patzab teꞌ aypaxicto yul isbakꞌ hasat. Ta mach chawilti teꞌ patzab ayicto yul isbakꞌ hasat tuꞌ, ¿hatocꞌanab nichꞌan iskꞌalemal teꞌ chꞌim ayicto yul isbakꞌsat hawuẍta tuꞌ chu hawiniltij? ¡Machoj!
23389	MAT 7:4	¿Mataxca xin chu hawalni tet heyuẍta tuꞌ hacaꞌ tiꞌ: “Wuẍtaj, wikꞌaltijan huneꞌ iskꞌal teꞌ chꞌim ayicto yul isbakꞌ hasat,” ta cachi? Wal hachpaxo xin kꞌatanicto huneꞌ teꞌ patzab yul isbakꞌ hasat.
23390	MAT 7:5	Tato hac tuꞌ hawalni, ¡lekꞌtiꞌach! Wal xin icanilti teꞌ patzab ayicto yul isbakꞌ hasat babel, lahwi tuꞌ cat hawinilti iskꞌal teꞌ chꞌim ayicto yul isbakꞌsat hawuẍtaj.
23392	MAT 7:7	Yalnipaxo Comam Jesús: —Kꞌanwe tet Comam Dios cat yakꞌni Comam teyet, saywej cat yilcha heyu, elojabico heyaw sat pulta cat ishajlax teyet.
23394	MAT 7:9	Kꞌinalo tato chiskꞌan heyuninal tzet chislo teyet, ¿tom cheyakꞌ hunu chꞌen chꞌen tet?
23395	MAT 7:10	Maca tato chiskꞌan hunu noꞌ cay iscꞌuxuꞌ, ¿tom cheyakꞌ hunu noꞌ laba tet?
23396	MAT 7:11	Yajaꞌ waxan̈ca caw txꞌojex heyohta heyakꞌni iscꞌulal tet heyuninal, hajxam xin Comam Dios ay yul satcan̈, ¿tom mach chꞌakꞌ iscꞌulal teyet, ta chekꞌana?
23398	MAT 7:13	Yalnipaxo Comam Jesús: —Wal ispultahil satcan̈ bay ay Comam Dios, lahan hacaꞌ hunu pulta nichꞌanchꞌan sat, haꞌ tuꞌ xin chexoctoj. Yuto huneꞌ pulta yeb huneꞌ beh caw nimajal sat, yul cambal chitohi. Caw xin niman anma chito yul huneꞌ pulta yeb huneꞌ beh tuꞌ.
23400	MAT 7:15	Yalnipaxo Comam Jesús: —Caw cheyil heba tet ebnaj lekꞌtiꞌwom chisbalico isba ischejabo Comam Dios, yuto hayet chitzotel ebnaj teyet, caw cꞌulchꞌan chute iscꞌul ebnaj hacaꞌ noꞌ meꞌ, yajaꞌ wal yanma ebnaj xin lahan hacaꞌ noꞌ oj chon̈cꞌuxnitoj.
23401	MAT 7:16	Ixtan̈ hetxumilo tzet nabil yu ebnaj yuto haꞌ tzet chiswatxꞌe ebnaj chihalniloj. Kꞌinalo teꞌ uva tinan̈, ¿tom chakꞌ teꞌ sat teꞌ txꞌix? Maca teꞌ higo, ¿tom satpaxo teꞌ txꞌix chakꞌ teꞌ? ¡Machoj!
23403	MAT 7:18	Teꞌ satnom teꞌ cꞌul, ¿tom machiswalil sat teꞌ chakꞌa? ¡Machoj! Yeb te teꞌ machiswalil, ¿tom cꞌul sat teꞌ chakꞌa? ¡Machoj!
23406	MAT 7:21	Yalnipaxo Comam Jesús: —Mach sunilo mac chihalni: “Mamin, Mamin,” win̈an, chioc yul iskꞌab Comam Dios, wal xin han̈e mac chiyijen tzet chal Inmaman ay yul satcan̈.
23407	MAT 7:22	Hayet chiapni islahobal tzꞌayic hantan̈e mac chihalni hacaꞌ tiꞌ: “Mamin, Mamin, han̈on̈tiꞌan̈ con̈ecꞌan̈ jalaꞌan̈ hatzotiꞌ tet anma. Jinipaxilojan̈ ischejab naj matzwalil yin̈ anma yin̈ habi, yeb xin txꞌiꞌal cꞌaybalcꞌule coyehan̈ tet anma,” ẍi anma yin̈ huneꞌ tzꞌayic tuꞌ.
23408	MAT 7:23	Yajaꞌ chintakꞌwihan tet hacaꞌ tiꞌ: “Mach quexwohtajojan, hitzan̈welo yin̈ insatan. Hex tiꞌ istxꞌojaln̈eticꞌa hewatxꞌe,” quinchin̈eticꞌahan, ẍi Comam.
23409	MAT 7:24	Yalnipaxo Comam Jesús: —Mac chiaben Intzotiꞌan cat isyijeni, lahan yeb huneꞌ naj caw ay yitzꞌatil iswiꞌ, yuto hayet yanican̈ naj yatut, yiban̈ chꞌen chꞌen yayto naj isxeꞌal teꞌ.
23416	MAT 8:2	Yelilo huneꞌ naj yul beh, ayco huneꞌ yabil chiyij lepra yin̈. Ishitzico naj iscꞌatan̈ Comam, yay jahno naj sata Comam, yalni naj: —Mamin, ta chawoche chu hawinilo huneꞌ yabil tiꞌ win̈an, ẍi naj tet Comam.
23417	MAT 8:3	Yanayo Comam iskꞌab yiban̈ naj, yalni Comam: —Hoꞌ, chiwochehan ta chiel huneꞌ yabil tiꞌ tawin̈, ẍi Comam. Yin̈n̈ena xin yel huneꞌ yabil tuꞌ yin̈ naj.
23418	MAT 8:4	Lahwi tuꞌ, yalni Comam tet naj: —Machi mac tet chawalicꞌo huneꞌ tiꞌ, wal xin as ye haba tet naj sacerdote, cat hawakꞌni haxahanbal hacaꞌ yalni isley naj Moisés, yun̈e yohtan̈encanilo anma tato xaelcano huneꞌ yabil tiꞌ tawin̈, ẍi Comam tet naj.
23420	MAT 8:6	Yalni naj tet Comam: —Mamin, ay huneꞌ inchejaban caw yaꞌay, mach chibili isnimanil, caw xin chꞌecꞌyaꞌ yanma naj yu huneꞌ yabil tuꞌ, ẍi naj tet Comam.
23421	MAT 8:7	Yalni Comam tet naj: —Cꞌulticꞌa, chintohan wakꞌaꞌ cawxojan naj, ẍi Comam.
23422	MAT 8:8	Istakꞌwi naj capitán tuꞌ tet Comam: —Mamin, caw mach chu hawapni yul watutan chiwabehan yuto caw matzet welapnojan. Wal xin ton̈e chachtzotelnato yin̈ hacn̈e tiꞌ cat iscawxican̈ inchejabtuꞌan.
23423	MAT 8:9	Wohtajan huneꞌ tiꞌ, yuto hanintiꞌan ayinictojan yalan̈ ischejbanil ebnaj wahawan, aypaxo xin ebnaj soldado ayico yalan̈ wipan. Ta chiwalan tet hunu naj: “Asiꞌ bey tuꞌ,” ta quinchiyan, cat isto naj. Taca chiwalan tet hunuxa naj: “Cata,” ta quinchiyan, cat istit naj. Yebpaxo xin ta chiwalan tet hunuxa naj inchejaban: “Watxꞌe huneꞌ tilah,” ta quinchiyan, cat yoc naj iswatxꞌenoj, ẍi naj.
23424	MAT 8:10	Hayet yaben Comam yalni naj hacaꞌ tuꞌ, caw cꞌayilo iscꞌul Comam, yalni Comam tet anma tzujanico yinta tuꞌ: —Yin̈ caw yeli chiwalan teyet, maẍto hunu mac chiwilan yanico yanma yin̈ Comam Dios yul con̈ob Israel hacaꞌ huneꞌ naj tiꞌ.
23427	MAT 8:13	Lahwi tuꞌ xin, yalni Comam tet naj capitán: —Paxan̈to hawatut, yubojab hacaꞌ chawoche yuto maxawayto yul hawanma win̈an, ẍi Comam tet naj. Yin̈ticꞌa huneꞌ orahil tuꞌ xin cawxican̈ ischejab naj capitán.
23431	MAT 8:17	Yin̈ huntekꞌan iswatxꞌe Comam tuꞌ yijcano isba tzet halbilcano yu naj Isaías, huneꞌ ischejab Comam yet payat, yet yalni naj hacaꞌ tiꞌ: “Yiban̈ naj chitocano yabil ayco jin̈, cat xin yabenpaxo isyaꞌil coseleloj,” ẍi naj Isaías tuꞌ.
23433	MAT 8:19	Yajaꞌ yet yalan̈to maẍto chito Comam yeb ebnaj, ishitzico huneꞌ naj chicuywa yin̈ isley naj Moisés iscꞌatan̈ Comam, yalni naj: —Mam cuywawom, chinoc tzujnojan tawintaj bajxan̈etuꞌwal chachtohi, ẍi naj.
23434	MAT 8:20	Yalni Comam tet naj: —Noꞌ wech ay isn̈achꞌen noꞌ bay chiwayi, yebpaxo noꞌ chꞌic ay yatut noꞌ. Yajaꞌ Hanin Akꞌbilintijan texol yu Comam Dios, machi watutan bay chinxewninojan, ẍi Comam.
23435	MAT 8:21	Yalnipaxo huneꞌxa naj iscuywom Comam: —Mamin, chinoc tzujnojan tawintaj, yaj estam chawakꞌ inhamanilan chito inmujcano inmaman babel, ẍi naj.
23436	MAT 8:22	Yalni Comam tet naj: —Wal xin ocan̈ tzujno wintajan yuto haꞌ mac camom yul sat Comam Dios, haꞌ chimujni yet camomal, ẍi Comam tet naj.
23439	MAT 8:25	Hayet yilni ebnaj iscuywom Comam huneꞌ tuꞌ, yoc ebnaj yinolo iswayan̈ Comam, yalni ebnaj: —¡Mamin colon̈an̈, yuto lan̈an coto yich haꞌ! ẍi ebnaj tet Comam.
23440	MAT 8:26	Istakꞌwi Comam tet ebnaj: —¿Tzet yin̈ xin caw chexxiwi? ¡Caw mach cheyaco heyanma yin̈ Comam Dios! ẍi Comam tet ebnaj. Lahwi tuꞌ xin yahwano Comam, iscachni Comam jakꞌekꞌ yeb ha haꞌ. Hac tuꞌ yu islin̈ban isbili ha haꞌ tuꞌ yeb jakꞌekꞌ, ispaxtzꞌin̈nahi.
23441	MAT 8:27	Wal ebnaj iscuywom Comam tuꞌ, caw cꞌaycanilo iscꞌul ebnaj, yalni ebnaj tet hunun: —¿Mac anmahil huneꞌ yaꞌ tiꞌ yuxin chisyije jakꞌekꞌ yeb ha haꞌ tzet chal yaꞌ? ẍi ebnaj yin̈ Comam.
23443	MAT 8:29	Yah yaw ebnaj tet Comam yin̈ caw ip: —¿Tzet hawoc jin̈an̈ hach Jesús Iscꞌahol Dios? ¿Tom chachhul hawakꞌaꞌ ecꞌoyaꞌ janmahan̈ yalan̈to maẍto chiapni istiempohal? ẍi ebnaj tet Comam.
23445	MAT 8:31	yuxin iskꞌan ebnaj ischejab naj matzwalil tuꞌ tet Comam hacaꞌ tiꞌ: —Tato chon̈hawilojan̈ yin̈ ebnaj tiꞌ, chicokꞌanan̈ tawet, chejon̈tojan̈ yin̈ noꞌ txitam tuꞌ lah, ẍi ebnaj tet Comam.
23446	MAT 8:32	Istakꞌwi Comam: —Cꞌulticꞌa, asiꞌwej, ẍi Comam. Hac tuꞌ xin yu yel ebnaj ischejab naj matzwalil yin̈ ebnaj cawan̈ tuꞌ, istocano ebnaj yin̈ noꞌ txitam. Lahwi tuꞌ xin yelcan̈ noꞌ txitam tuꞌ, iskꞌojnito isba noꞌ sat pahaw, yay apno noꞌ xol ha haꞌ, ishikꞌnito noꞌ haꞌ.
23450	MAT 9:2	Yilaxto huneꞌ naj mach chibili isnimanil iscꞌatan̈ Comam sat batxteꞌ. Hayet yilni Comam xin tato caw ayco yanma ebnaj initi naj tuꞌ yin̈ Comam, yalni Comam tet naj yaꞌay tuꞌ: —Hach wet anmahil aco yip hawanma, tinan̈ chiakꞌlaxcano nimancꞌulal yin̈ hamul, ẍi Comam tet naj.
23451	MAT 9:3	Ay xin huntekꞌan ebnaj cuywawom yin̈ isley naj Moisés, istxum hacaꞌ tiꞌ: “Huneꞌ naj tiꞌ caw txꞌoj istzotel naj yin̈ Comam Dios, yuto chaco isba naj Diosal,” ẍi ebnaj yul yet ischuquil.
23452	MAT 9:4	Wal Comam xin, yohta tzet chiecꞌ yin̈ isnabal ebnaj, yuxin yal Comam: —¿Tzet yin̈ xin caw txꞌoj chiecꞌ yin̈ henabal?
23453	MAT 9:5	¿Baytet subuta walnihan heyalni, tom “chꞌakꞌlax nimancꞌulal yin̈ hamul,” mato “ahan̈wanoj cat hapaxtoj?”
23454	MAT 9:6	Tinan̈ xin chinyehan heyilaꞌ tato Hanin Akꞌbilintijan texol yu Comam Dios, ay wipan wakꞌnihan nimancꞌulal yin̈ ismul anma yul sat yiban̈kꞌinal tiꞌ, ẍi Comam. Yalni Comam tet naj yaꞌay tuꞌ: —Ahan̈wanoj, ican̈ habatxteꞌ tiꞌ cat hapaxto hawatut, ẍi Comam tet naj.
23457	MAT 9:9	Lahwi tuꞌ isto Comam Jesús. Hayet yecꞌto Comam xin, yilni Comam huneꞌ naj ikꞌomilo tohlabal, Mateo isbi. Tzꞌon̈anayo naj bay chiel chꞌen tohlabal chialaxto bey Roma. Yalni Comam Jesús tet naj: —Ocan̈ tzujno wintajan incuywomojan, ẍi Comam. Hayet yaben naj huneꞌ tuꞌ, yahwano naj, yoc tzujno naj yinta Comam.
23459	MAT 9:11	Hayet yilni ebnaj fariseo huneꞌ tuꞌ, yalni ebnaj tet ebnaj iscuywom Comam: —¿Tzet yin̈ xin chiwaꞌ naj hecuywawom tiꞌ xol ebnaj ikꞌomilo tohlabal, yeb xol ebnaj txꞌoj isbeybal? ẍi ebnaj.
23460	MAT 9:12	Hayet yaben Comam huneꞌ tuꞌ xin, yalni Comam tet ebnaj: —Haꞌ anma mach yaꞌo ay, matzet chiocnico naj an̈lom yu, to haꞌ anma yaꞌay haꞌ chiocnico naj an̈lom yu.
23461	MAT 9:13	Yuxin chiwalan teyet, saywe yul Yum Comam Dios cat hetxumni yin̈ bay chal hacaꞌ tiꞌ: “Haꞌ huneꞌ chiwochehan ta chitzꞌay hecꞌul yin̈ heyet anmahil, maẍn̈etaj heyakꞌni hexahanbal wetan,” ẍiayoj. Mach hulnajojinan wawteꞌan anma chalni ta cꞌul yecoj, ¡machoj! Walxinto yu anma chistxumu ta mulum, yuxin hulnajinan, yun̈e isbejnicano yanico ismul, ẍi Comam.
23462	MAT 9:14	Yet hunel apni ebnaj ischejab naj Juan anican̈ haꞌ iswiꞌ anma iscꞌatan̈ Comam Jesús, iskꞌamben ebnaj tet Comam: —Han̈on̈tiꞌan̈ yeb ebnaj fariseo caw chicoyijehan̈ huneꞌ yet mach chon̈waꞌ cotxahli. Walpaxo ebnaj hacuywom xin, ¿tzet yin̈ xin mach chisyije ebnaj huneꞌ tuꞌ? ẍi ebnaj.
23463	MAT 9:15	Yalni Comam tet ebnaj: —Kꞌinalo tato ay hunu mohyilal tinan̈, aypaxo xin anma awtebil yin̈ mohyilal tuꞌ. ¿Tom xin chioc anma tuꞌ yijle wahil yet aycꞌo naj mohyom tuꞌ? ¡Machoj! Wal xin hato yet chiapni istiempohal yilaxilo naj mohyom tuꞌ xol anma, catto yoc anma yin̈ yijlen wahil, ẍi Comam.
23464	MAT 9:16	Yalnipaxo Comam: —Mach chu yalaxico hunu kꞌap kꞌap acꞌto isbujilo huno xilkꞌape xilxa, yuto hayet chitxꞌahlax kꞌap, chimoqꞌui kꞌap acꞌ ayco isbujilo kꞌap xilxa tuꞌ, cat xin istzilmocanto huneꞌ xilkꞌape tuꞌ.
23466	MAT 9:18	Hayet lan̈an yalni Comam Jesús huntekꞌan cuybanile tuꞌ, yapni huneꞌ naj yahawil yin̈ ebnaj Israel iscꞌatan̈ Comam, yalni naj tet Comam: —Mamin, ay huneꞌ nichꞌan incutzꞌinan lan̈anto iscamayoj, yaj ta chachto wintajan cat hawanayo hakꞌab yiban̈ ix, chihulcan̈ iscꞌul ix, ẍi naj tet Comam.
23469	MAT 9:21	yuto istxum ix hacaꞌ tiꞌ: “Walca han̈e istiꞌ xil iskꞌap Comam chinpitan cat incawxocan̈an,” ẍi ix.
23470	MAT 9:22	Wal Comam xin, ismeltzo isba Comam, yoc tꞌan̈no Comam yin̈ ix, yalni Comam hacaꞌ tiꞌ: —Aco yip hawanma miyay. Macachcawxican̈ tinan̈ yuto maxawaco hawanma win̈an, ẍi Comam tet ix. Yin̈n̈ena tuꞌ xin iscawxican̈ ix.
23472	MAT 9:24	Hayet yilni Comam huneꞌ tuꞌ, yalni Comam tet anma: —Elan̈wetoj, ix nichꞌan tiꞌ mach camnajo ix, ton̈e chiway ix, ẍi Comam. Wal anma tuꞌ xin oc tzebo yin̈ tzet yal Comam.
23475	MAT 9:27	Yet yel Comam bey tuꞌ, ay cawan̈ ebnaj mach chu yilni oc tzujno yinta Comam. Chi-xin-awito ebnaj tet Comam hacaꞌ tiꞌ: —Mamin, iscꞌahol jichmam David, tzꞌayojab hacꞌul jin̈an̈, ẍi ebnaj.
23476	MAT 9:28	Hayet yapni Comam yul n̈a, yocpaxto ebnaj yul n̈a yinta Comam, yalni Comam tet ebnaj: —¿Chimheyayto yul heyanma tato chu wakꞌni hajlojan hesat? ẍi Comam. Istakꞌwi ebnaj tet Comam: —Hoꞌ Mamin, chijaytojan̈ yul janmahan̈, ẍi ebnaj.
23477	MAT 9:29	Yanico Comam iskꞌab yin̈ isbakꞌsat ebnaj, yalni Comam tet ebnaj: —Yubojab hacaꞌ cheyoche yuto maxeyaco heyanma win̈an, ẍi Comam tet ebnaj.
23478	MAT 9:30	Hac tuꞌ xin yu ishajlo isbakꞌsat ebnaj, yalnicano Comam tet ebnaj: —Tinan̈ xin, machi mac tet cheyalicꞌo huneꞌ tiꞌ, ẍi Comam.
23481	MAT 9:33	Hayet ischejnilo Comam ischejab naj matzwalil yin̈ naj, yichico naj istzoteli. Wal anma ilni huneꞌ tuꞌ xin caw cꞌaycanocan̈ iscꞌul. Yalni anma hacaꞌ tiꞌ: —Maẍto hunelo chijil yuni yul con̈ob Israel hacaꞌ huneꞌ tiꞌ, ẍi anma.
23482	MAT 9:34	Wal ebnaj fariseo xin yal ebnaj hacaꞌ tiꞌ: —Huneꞌ naj tiꞌ chílo naj ischejab naj matzwalil yin̈ anma yu yip naj matzwalil, ẍi ebnaj yin̈ Comam.
23485	MAT 9:37	Yuxin yal Comam tet ebnaj iscuywom: —Huntekꞌan anma tiꞌ lahan hacaꞌ ixim trigo lan̈an iskꞌanbiloj. Caw hantan̈e munil, yajaꞌ haywan̈n̈e ebnaj munlawom.
23491	MAT 10:5	Haꞌ ebnaj cablahon̈wan̈ tiꞌ ischejto Comam Jesús, yalni Comam ischejbanil ebnaj hacaꞌ tiꞌ: —Mach chexecꞌ yulaj iscon̈ob anma mach Israeloj, yebpaxo xin mach chexecꞌ yulajla con̈ob ay yul ismajul Samaria.
23498	MAT 10:12	Yet chexapni bey teꞌ n̈a bay chexcancano tuꞌ, cheyal tet anma tuꞌ hacaꞌ tiꞌ: “Ayojab akꞌancꞌulal texol,” quexchi.
23502	MAT 10:16	Yalnipaxo Comam Jesús tet ebnaj iscuywom tuꞌ: —Chexinchejtojan xol anma hacaꞌ noꞌ meꞌ chito xol noꞌ oj. Yuxin helan cheyute heba hacaꞌ noꞌ laba, yajaꞌ huncuentan̈e cheyute hecꞌul hacaꞌ noꞌ cuwis.
23511	MAT 10:25	Yajaꞌ tato ay hunu naj chicuywi tuꞌ chiapni yitzꞌatil iswiꞌ hacaꞌ naj cuywawom tuꞌ, caw cꞌul huneꞌ tuꞌ, yeb xin tato ay hunu naj chejab chiapni islahann̈e isba yeb ispatrón, cꞌulpaxo huneꞌ tuꞌ. Ta chinhallaxan Beelzebú, naj yahawil yin̈ ebnaj ischejab naj matzwalil, hajexxampaxoj, ¿tzet mach hallaxo teyin̈? ẍi Comam Jesús.
23512	MAT 10:26	Yalnipaxo Comam Jesús: —Mach chexxiw tet anma, yuto machi hunu tzet ye tuꞌ ewan mach chiel yen̈el, yeb xin machi hunu tzet chihallax yin̈ ewantajil mach chiabchaloj.
23518	MAT 10:32	Yalnipaxo Comam Jesús: —Haꞌ mac mach chitxꞌixwi yalni yin̈ sat anma tato wetxahan yehi, haquintuꞌan mach chintxꞌixwihan walnihan tet Inmaman ay yul satcan̈ tato wetan yehi.
23520	MAT 10:34	Yalnipaxo Comam Jesús: —Tajca chetxumu tato hulnajinan yu wanicojan akꞌancꞌulal xol anma yul sat yiban̈kꞌinal tiꞌ, machoj, walxinto yu yakꞌlencan̈ howal win̈an.
23526	MAT 10:40	Yalnipaxo Comam Jesús: —Haꞌ mac chexchahni, haninan chinischahan, haꞌ mac chinchahnihan chischah Mac an̈eintijan.
23531	MAT 11:3	iskꞌambeno tet Comam: —¿Ham hach tiꞌ Cristo echmabil yul juhan̈, mato chijechmahan̈ yul hunuxa naj? ẍi ebnaj.
23532	MAT 11:4	Istakꞌwi Comam: —As halwe tet naj Juan tuꞌ yin̈ sunil tzet maxeyabe yeb yin̈ tzet maxeyila.
23534	MAT 11:6	¡Sakꞌal yet mac mach chicabcon yanma win̈an! quexchi, ẍi Comam tet ebnaj.
23535	MAT 11:7	Hayet lahwi ispaxto ebnaj xin, yichico Comam yalni tet anma yin̈ tzet yelapno ye naj Juan, yalni Comam hacaꞌ tiꞌ: —Nawetij tzet quexbey heyilaꞌ bey txꞌotxꞌ desierto, ¿tom haꞌ huneꞌ teꞌ ah chꞌecꞌ kꞌelah yu jakꞌekꞌ?
23536	MAT 11:8	¿Mato hunu naj caw nanxa yoc xil iskꞌap ayco quexbey heyilaꞌ? ¡Machoj! Yuto ebnaj caw nanxa islow yehico xil iskꞌap yuln̈e yatut ebnaj rey ay ebnaj.
23537	MAT 11:9	¿Mac quexbey heyilaꞌ? Wal xin huneꞌ ischejab Comam Dios quexbey heyilaꞌ. Yin̈ caw yeli huneꞌ ischejab Comam Dios quexbey heyilaꞌ tuꞌ caw ecꞌbalto yelapno ye ismunil naj sata ebnaj ischejab Comam Dios ecꞌlena yet payat.
23545	MAT 11:17	“Naban̈e jeta cobahan̈ jokꞌtzenan̈ teꞌ suꞌ, yuto mach quexcan̈alwi. Naban̈e jacojan̈ bit caw biscꞌulal yoqui, yuto mach quexokꞌpaxoj,” ẍi niẍte unin tuꞌ.
23547	MAT 11:19	Haxa Hanin Akꞌbilintijan texol yu Comam Dios, chinwaꞌan yeb anma yuxin chihallax win̈an hacaꞌ tiꞌ: “Wal naj Jesús tiꞌ waꞌon̈eticꞌa chu naj yeb ucꞌu vinon̈eticꞌa chu naj, yamigo isba naj yeb ebnaj txꞌoj chiswatxꞌe yeb ebnaj ikꞌomilo tohlabal chꞌen chito bey Roma,” ẍi anma win̈an. Yajaꞌ wal anma ayco ishelanil Comam Dios yin̈ haban isyenilo isba yin̈ tzettaj iscꞌulal chi-la-iswatxꞌe, ẍi Comam.
23549	MAT 11:21	—Hex ay yul con̈ob Corazín cꞌanchꞌanex, yeb hex ay yul con̈ob Betsaida, cꞌanchꞌanexpaxoj, yuto ta yul con̈ob Tiro yeb con̈ob Sidón yelax huntekꞌan cꞌaybalcꞌule chiyelax texol tiꞌ, payxam isbejcano anma iswatxꞌen istxꞌojal, yamahto anma tan̈ yin̈ iswiꞌ, yeb yamico anma xil iskꞌap chiyenilo biscꞌulal.
23553	MAT 11:25	Hayet huneꞌ tiempohal tuꞌ txahli Comam Jesús, yalni Comam: —Mamin, yahawil satcan̈ yeb txꞌo txꞌotxꞌ, chiwakꞌan yuchꞌandios tawet yuto haweba huntekꞌan tiꞌ tet ebnaj ay ishelanil yeb tet ebnaj ay iscuyu yul sat anma, hawakꞌni yohtan̈elo anma matzet yohtaj.
23555	MAT 11:27	Lahwi tuꞌ yalni Comam tet anma: —Sunil tzet ye tuꞌ ayco yul inkꞌaban yu Inmaman. Machi hunu mac ohtan̈einan hanin Cꞌahole intiꞌan, cachann̈e Inmaman ohtan̈einan. Machi hunu mac ohtan̈e Inmaman, cachann̈e haninan quiniscꞌaholtiꞌan wohtajan, cat wakꞌnihan Inmamtuꞌan yohtan̈elo tet mac bay chiwochehan.
23560	MAT 12:2	Hayet yilni ebnaj fariseo huneꞌ tuꞌ, yalni ebnaj tet Comam: —Ilcꞌanab tzet chu ebnaj hacuywom tilah, lan̈an yinilo ebnaj iswiꞌ ixim trigo iscꞌuxuꞌ. Yajaꞌ xin caw txahul comunla yin̈ istzꞌayical xewilal, ẍi ebnaj.
23561	MAT 12:3	Istakꞌwi Comam tet ebnaj: —¿Tom maẍto cheyil yul Yum Comam Dios yin̈ tzet yakꞌle naj rey David yet caw chin̈ohcha naj yeb ebnaj tzujan yintaj?
23563	MAT 12:5	¿Tom maẍto cheyilpaxo yin̈ isley naj Moisés yin̈ tzet yu ebnaj sacerdote ay yul yatut Comam Dios? Ebnaj sacerdote tuꞌ mach chixew ebnaj yin̈ tzꞌayic xewilal, yajaꞌ mach chaco ebnaj ismul yul sat Comam Dios yin̈ huneꞌ tuꞌ.
23565	MAT 12:7	Tzettam sakꞌal tato chitxumchalo heyu bay chal yul Yum Comam Dios hacaꞌ tiꞌ: “Haꞌ huneꞌ chiwochehan tato chitzꞌay hecꞌul yin̈ heyet anmahil, maẍn̈etaj hen̈usni no nokꞌ yin̈ xahanbalil wetan,” ẍiayoj. Ta chetxum huneꞌ tiꞌ mach chimcheyala tato ay ismul ebnaj, wal xin mach ismul ebnaj yin̈ huneꞌ tiꞌ.
23568	MAT 12:10	haꞌ tuꞌ xin ayicto huneꞌ naj camnajilo huneꞌ iskꞌab. Yun̈e yoc ebnaj fariseo akꞌocꞌule yin̈ Comam, yuxin iskꞌambe ebnaj tet Comam: —¿Chimyu jakꞌni cawxo hunu anma yaꞌay yin̈ istzꞌayical xewilal? ẍi ebnaj tet Comam.
23569	MAT 12:11	Istakꞌwi Comam tet ebnaj: —Kꞌinalo ta ay hunujex chitohcꞌay hunu hemeꞌ yul hunu cꞌuh yin̈ istzꞌayical xewilal, ¿mataxca mach chexto heyikꞌahti noꞌ?
23571	MAT 12:13	Lahwi tuꞌ yalni Comam tet naj camnajilo huneꞌ iskꞌab tuꞌ: —Toholban̈elto hakꞌab, ẍi Comam. Hayet istoholban̈enilto naj iskꞌab tuꞌ, iswatxꞌicanilo.
23581	MAT 12:23	Sunil anma ilni huneꞌ tuꞌ caw cꞌayilo iscꞌul, yalni hacaꞌ tiꞌ: —¿Ham naj tiꞌ, titna yin̈ yuninal naj rey David echmabil yul ju? ẍi anma.
23582	MAT 12:24	Yajaꞌ hayet yaben ebnaj fariseo yalni anma huneꞌ tuꞌ, yalni ebnaj: —Huneꞌ naj tiꞌ chilo naj ischejab naj matzwalil yin̈ anma, yaj yu ayco yip naj Beelzebú, naj yahawil ebnaj ischejab naj matzwalil yin̈ naj, ẍi ebnaj.
23583	MAT 12:25	Wal Comam yohtaxa tzet chiecꞌ yin̈ isnabal ebnaj, yuxin yal Comam: —Kꞌinalo ta chispoh isba anma yul hunu niman con̈ob, huneꞌ con̈ob tuꞌ yin̈ an̈emi chipax yip. Maca ta hunu con̈ob maca hunu n̈ahil anma chispoh isba cat yanico howal yin̈ hunun, caw yin̈ an̈emi chitan̈iloj.
23584	MAT 12:26	Hac tuꞌ ye naj matzwalil, ta chaco naj howal yin̈ yet matzwalilal, yin̈ticꞌa naj chaco howal. ¿Tzet xin chu yikꞌni yip naj yin̈ hacaꞌ tuꞌ?
23585	MAT 12:27	Hex tiꞌ cheyala tato yu naj yahawil ebnaj matzwalil yuxin chiwilojan ischejab naj matzwalil yin̈ anma. Ta hac tuꞌ, ¿mac xin chiakꞌni yip ebnaj tzujan yin̈ hecuybanil yet chinilo ebnaj ischejab naj matzwalil yin̈ anma? Yuxin haꞌ ebnaj tuꞌ chiyenilo teyet tato mach cꞌulo tzet cheyal win̈an.
23591	MAT 12:33	Yalnipaxo Comam Jesús: —Kꞌinalo hunu te teꞌ cꞌul, cꞌul sat teꞌ chakꞌa, wal teꞌ machiswalil, mach cꞌulo sat teꞌ chakꞌa. Yuxin yin̈ sat te teꞌ chicotxumu tzet teꞌal teꞌ.
23592	MAT 12:34	Hex tiꞌ lahanex yeb noꞌ laba, caw txꞌojex. ¿Tzet chu heyalni tzotiꞌ cꞌul tato txꞌoj ayayto yul heyanma? Wal xin haꞌ tzet ayayto yul heyanma haꞌ chal hetiꞌ.
23596	MAT 12:38	Yet hunel tuꞌ, ay huntekꞌan ebnaj cuywawom yin̈ isley naj Moisés yeb ebnaj fariseo halni tet Comam: —Mam cuywawom chijochehan̈ chaye hunu cꞌaybalcꞌule jilaꞌan̈, ẍi ebnaj.
23597	MAT 12:39	Istakꞌwi Comam tet ebnaj: —Hex ayex yul huneꞌ tiempohal tiꞌ caw txꞌojexcanoj, caw man̈cꞌomex tet Comam Dios. Chekꞌan cꞌaybalcꞌule heyilaꞌ, huneꞌ chiyenilo ishelanil yip Comam Dios. Yajaꞌ huneꞌn̈e cꞌaybalcꞌule chiakꞌlax heyilaꞌ, haꞌ ton huneꞌ hacaꞌ tzet yakꞌle huneꞌ ischejab Comam Dios yet payat chiyij Jonás, haꞌ chiakꞌlax heyilaꞌ.
23601	MAT 12:43	Yalnipaxo Comam Jesús: —Kꞌinalo ta ay hunu ischejab naj matzwalil chiel yul yanma hunu anma. Lahwi yel naj tuꞌ cat isto naj bey txꞌotxꞌ desierto issayaꞌ bay chixewi, yajaꞌ mach chiilcha bay chixew naj tuꞌ yu.
23602	MAT 12:44	Lahwi tuꞌ cat yecꞌ yin̈ isnabal naj hacaꞌ tiꞌ: “Etzan̈em cꞌul inmeltzohan bayticꞌa ayinan,” ẍi naj. Haxa yet chiapni naj xin cat yilni naj yanma huneꞌ naj tuꞌ hacaꞌ hunu n̈a machi yahaw, caw cꞌul yecan̈ kꞌalem yul.
23605	MAT 12:47	Yuxin yal huneꞌ naj tet Comam: —Mamin, aycꞌo hamiꞌ yeb ebnaj hawuẍta istin̈a, choche ebnaj tzotelo tawet yalni, ẍi naj.
23606	MAT 12:48	Yajaꞌ takꞌwi Comam tet naj: —¿Mac xin inmiꞌan yeb wuẍtatuꞌan hawalni? ẍi Comam.
23607	MAT 12:49	Lahwi tuꞌ isyenito Comam tet ebnaj iscuywom, yalni Comam: —Haꞌ huntekꞌan anma tiꞌ haꞌ hacaꞌ inmiꞌan yeb hacaꞌ wuẍtajan.
23611	MAT 13:3	Caw txꞌiꞌal yechel yaco Comam yet iscuyni Comam anma tuꞌ, yichico Comam yalni hacaꞌ tiꞌ: —Yet hunel ay huneꞌ naj to txiho trigo.
23618	MAT 13:10	Lahwi tuꞌ ishitzico ebnaj iscuywom Comam Jesús iscꞌatan̈, iskꞌamben ebnaj: —Mamin, ¿tzet yin̈ yuxin yet chacuyni anma yecheln̈e chawakꞌbaln̈e tet? ẍi ebnaj.
23619	MAT 13:11	Istakꞌwi Comam: —Teyetn̈e chakꞌ Comam Dios heyohtan̈elo huntekꞌan tzet ye tuꞌ ewan yehi, yun̈e hetxumni yin̈ tzet chu heyoc yul iskꞌab Comam Dios. Walpaxo tet huntekꞌanxa anma xin mach chꞌakꞌlax yohtan̈eloj.
23626	MAT 13:18	Yalni Comam Jesús: —Tinan̈ xin chiwalan teyet yin̈ tzet chal yelapno naj txihom trigo.
23632	MAT 13:24	Yalnipaxo Comam Jesús huneꞌ yechel hacaꞌ tiꞌ: —Hayet chioc Comam Dios yahawilo anma, lahan hacaꞌ chakꞌle hunu naj chitxihni ixim hin̈at trigo caw cꞌul sat istxꞌotxꞌ.
23635	MAT 13:27	Hayet yilni ebnaj munlawom huneꞌ tuꞌ, isto ebnaj yalno tet naj yahaw munil hacaꞌ ti: “Mamin, caw cꞌul ixim hin̈at trigo cachbey hatxihayoj, yajaꞌ ¿tzet yin̈ xin caw ay teꞌ chꞌim ahilo xol ixim?” ẍi ebnaj.
23636	MAT 13:28	Istakꞌwi naj: “Ham hunu mac ayco ishowal win̈an txihnayo yin̈atil teꞌ chꞌim xol ixim,” ẍi naj. Iskꞌambenpaxo ebnaj ismunlawom naj tuꞌ: “Ta chisje hacꞌul chon̈tohan̈ cohocꞌocan̈an̈ teꞌ chꞌim tuꞌ xol ixim,” ẍi ebnaj.
23637	MAT 13:29	Yalni naj: “Machoj, yuto ta chehocꞌcan̈ teꞌ ham hun ixim trigo chehocꞌcan̈ yinta teꞌ.
23638	MAT 13:30	Wal xin chꞌibojabna teꞌ xol ixim, hatojab yet chiapni istempohal bay chicꞌuplaxcan̈ ixim cat yah teꞌ, cat walnihan tet ebnaj inmunlawoman tato chiscꞌupcan̈ ebnaj teꞌ xol ixim cat iscꞌalnayo ebnaj teꞌ yin̈ hunun yachan, lahwi tuꞌ cat isn̈uslaxto teꞌ. Wal ixim trigo tuꞌ xin chicꞌubalaxto ixim yul incꞌun̈ahan,” ẍi naj yahaw munil tuꞌ, ẍi Comam.
23639	MAT 13:31	Yanipaxico Comam Jesús yin̈atil teꞌ mostaza yechelo yet iscuywahi, yalni Comam hacaꞌ tiꞌ: —Chiwalpaxojan teyet yin̈ tzet chu ischꞌib isbisil anma chioc yul iskꞌab Comam Dios, lahan hacaꞌ nichꞌan yin̈atil teꞌ mostaza chistzꞌun hunu naj sat istxꞌotxꞌ.
23641	MAT 13:33	Yanipaxico Comam Jesús yan̈al ixim pan yechelo yet iscuywa tet anma, yalni Comam tet anma tuꞌ: —Chiwalpaxojan teyet yin̈ tzet chu ischꞌib isbisil anma chaco isba yul iskꞌab Comam Dios. Lahan hacaꞌ nichꞌan yan̈al ixim pan chaco hunu ix ix xol oxeb mal ixim harina. Haxa yet chissomni ix ixim cat issipcꞌa ixim yu nichꞌan yan̈al chioqui, ẍi Comam.
23645	MAT 13:37	Yalni Comam tet ebnaj xin: —Naj txihom trigo yechel yeco naj win̈an, Hanin Akꞌbilintijan texol yu Comam Dios.
23652	MAT 13:44	Yalnipaxo Comam Jesús: —Anma chꞌoc yul iskꞌab Comam Dios, lahan yeb huneꞌ kꞌalomal caw ay istohol mujbil yul txꞌo txꞌotxꞌ chiilcha yu huneꞌ naj, lahwi tuꞌ cat ismujnipaxo naj. Caw xin chitzala naj yin̈ huneꞌ kꞌalomal tuꞌ cat isto naj istxon̈noto sunil tzet aya yun̈e islokꞌni naj huneꞌ txꞌotxꞌ bay mujan huneꞌ kꞌalomal tuꞌ, ẍi Comam.
23653	MAT 13:45	Yalnipaxo Comam Jesús: —Haꞌ anma chꞌoc yul iskꞌab Comam Dios, lahan hacaꞌ hunu naj txon̈wom chiecꞌ sayno huntekꞌan chꞌen chꞌen caw ay istohol chiyij perla.
23655	MAT 13:47	Yalnipaxo Comam Jesús: —Chiwalpaxojan teyet, haꞌ anma chioc yul iskꞌab Comam Dios, lahan yeb huneꞌ txꞌan̈ hacꞌ ikꞌomati cay chayto huntekꞌan ebnaj xol ha haꞌ. Yet chibejlaxayto txꞌan̈ xol haꞌ caw txꞌiꞌal noꞌ cay chioc yul txꞌan̈.
23659	MAT 13:51	Lahwi tuꞌ iskꞌamben Comam Jesús tet ebnaj iscuywom hacaꞌ tiꞌ: —¿Chimhetxum sunil huntekꞌan yechel chiwaltiꞌan? ẍi Comam. Istakꞌwi ebnaj: —Hoꞌ Mamin, ẍi ebnaj.
23660	MAT 13:52	Yalni Comam xin: —Haꞌ chalilo huneꞌ tiꞌ, ta ay hunu naj cuywawom yin̈ ley chicuywa yin̈ tzet chu yoc anma yul iskꞌab Comam Dios, lahan hacaꞌ hunu naj mame yohta yocnico huntekꞌan tzet ye tuꞌ acꞌ yu yeb huntekꞌan tzet ye tuꞌ xilxa cꞌuwan yul iscꞌuwanbal, ẍi Comam.
23662	MAT 13:54	Yet yapni Comam yul iscon̈ob, iscuyni Comam anma yul iscapilla ebnaj Israel. Hayet yaben anma istzotel Comam, caw cꞌayilo iscꞌul, yuxin yal anma hacaꞌ tiꞌ: —¿Bay chitit ishelanil huneꞌ naj tiꞌ, yeb bay chitit iscan̈il ye naj iswatxꞌen huntekꞌan cꞌaybalcꞌule tiꞌ?
23664	MAT 13:56	Yebpaxo xin ebix yanab naj, coxol tiꞌ ay ebix. ¿Baytaxca xin chitit ishelanil naj tiꞌ? ẍi ebnaj yin̈ Comam.
23665	MAT 13:57	Yuxin machi cam iscꞌul anma yaben tzet chal Comam. Yalni Comam tet anma tuꞌ: —Sunil bay xahan chiillax ischejab Comam Dios yu anma, yajaꞌ wal yul iscon̈ob yeb yul yatut chiyahlaxi, ẍi Comam.
23668	MAT 14:2	Yuxin yal naj tet ebnaj chimunla yinta tuꞌ: —Huneꞌ naj chibina tuꞌ, ham naj Juan anican̈ haꞌ iswiꞌ anma itzitzbican̈, yuxin ay yip naj iswatxꞌen huntekꞌan cꞌaybalcꞌule tuꞌ, ẍi naj.
23670	MAT 14:4	Caw xin txꞌiꞌal el yal naj Juan tuꞌ tet naj Herodes hacaꞌ tiꞌ: —Mach cꞌulo hawikꞌni yixal hawuẍtaj, ẍi naj.
23674	MAT 14:8	Yalni ismiꞌ ix tet tato chiskꞌan ix iswiꞌ naj Juan; yuxin yal ix tet naj Herodes tuꞌ: —Haꞌ iswiꞌ naj Juan anican̈ haꞌ iswiꞌ anma chawakꞌ wetan yul hunu plato, ẍi ix tet naj.
23681	MAT 14:15	Haxa yet lan̈anxa iskꞌejbayo xin, ishitzico ebnaj iscuywom Comam iscꞌatan̈, yalni ebnaj tet Comam: —Mamin, makꞌejbi lah yebpaxo xin machi teꞌ n̈a bey tiꞌ, yuxin cꞌulmi hachejnito anma tiꞌ yulaj wayan̈bal cocawilal tiꞌ islokꞌo tzet chislo, ẍi ebnaj.
23682	MAT 14:16	Yalni Comam tet ebnaj: —Mach yilalo chipaxto anma tiꞌ, akꞌwe tzet chislo, ẍi Comam.
23683	MAT 14:17	Istakꞌwi ebnaj tet Comam: —Mamin, caw han̈cꞌan̈e howeb ixim pan yeb cacꞌon̈ cay coxol tiꞌ, ẍi ebnaj tet Comam.
23684	MAT 14:18	Yalni Comam: —Iweti ixim yeb noꞌ cay tuꞌ bey tiꞌ, ẍi Comam.
23692	MAT 14:26	Hayet yilni ebnaj isbelwi Comam yiban̈ haꞌ isxiwcan̈ ebnaj, yah yaw ebnaj yu xiwquilal, yalni ebnaj: —¡Huneꞌ tiꞌ ispixan camom! ẍi ebnaj.
23693	MAT 14:27	Yalnican̈ Comam: —Mach chexxiwi, haninan, ẍi Comam.
23694	MAT 14:28	Yalni naj Pedro tet Comam: —Mamin, ta hach huneꞌ tuꞌ, hala ta chinbelwihan yiban̈ ha haꞌ tiꞌ cat wapnihan bay ayach tuꞌ, ẍi naj.
23695	MAT 14:29	Yalni Comam tet naj xin: —Cꞌulticꞌa, titan̈, ẍi Comam. Hayet yaben naj Pedro huneꞌ tuꞌ, yel naj yul teꞌ barco, isto naj iscꞌatan̈ Comam, yichico naj isbel yiban̈ haꞌ.
23696	MAT 14:30	Yajaꞌ yet yilni naj isbili haꞌ tuꞌ yu jakꞌekꞌ isxiwcan̈ naj, yichico naj isto xol haꞌ, yah yaw naj tet Comam yin̈ caw ip: —Mamin, colinan, ẍi naj.
23697	MAT 14:31	Yin̈ an̈e xin oc tzabno Comam yin̈ iskꞌab naj, yalni Comam tet naj: —Hach tiꞌ caw mach ayoco hawanma win̈an. ¿Tzet yin̈ xin macabconcan̈ hacꞌul? ẍi Comam.
23699	MAT 14:33	Wal sunil ebnaj ayicto yul teꞌ barco tuꞌ xin ay jahno ebnaj sata Comam, yalni ebnaj hacaꞌ tiꞌ: —¡Yin̈ caw yeli hach tiꞌ Iscꞌahol Comam Dios hawehi! ẍi ebnaj tet Comam.
23704	MAT 15:2	—¿Tzet yin̈ xin mach chisyije hacuywom tiꞌ huntekꞌan chejbanile yet ebnaj jichmam? Yuto ebnaj hacuywom tiꞌ mach chistxꞌah ebnaj iskꞌab yet chiwaꞌ ebnaj, ẍi ebnaj tet Comam.
23705	MAT 15:3	Istakꞌwi Comam tet ebnaj: —Haquexpax tuꞌ, ¿tzet yin̈ xin cheman̈cꞌo ischejbanil Comam Dios cheyijento ischejbanil anma?
23706	MAT 15:4	Yuto chal yul Yum Comam hacaꞌ tiꞌ: “Ayojab yelapno hamam, hamiꞌ yul hasat. Mac chitzꞌactiꞌn̈en ismam maca ismiꞌ yilal iscami,” ẍiayoj.
23707	MAT 15:5	Yajaꞌ hex tiꞌ cheyala tato mach yilalo iscolwa anma yin̈ ismam maca ismiꞌ ta chiyal hacaꞌ tiꞌ: “Mam, mach chu incolwahan tawin̈ yuto haꞌ tzet ayintiꞌan yetxa Comam Dios ye wuhan,” ta ẍi.
23712	MAT 15:10	Lahwi tuꞌ yawtenti Comam anma iscꞌatan̈, yalni Comam tet anma tuꞌ: —Abewej cat hetxumni yin̈ tzet chiwaltiꞌan.
23714	MAT 15:12	Ishitzico ebnaj iscuywom Comam iscꞌatan̈, yalni ebnaj: —Mamin, ¿mamxatxumu tato yet maxawalni huneꞌ tiꞌ machíwacan̈ iscꞌul ebnaj fariseo? ẍi ebnaj.
23715	MAT 15:13	Istakꞌwi Comam: —Sunil te teꞌ maẍtaj Inmaman ay yul satcan̈ tzꞌunn̈e chihocꞌlaxcan̈.
23717	MAT 15:15	Yalni naj Pedro tet Comam hacaꞌ tiꞌ: —Mamin, hal jetan̈ tzet chalilo huneꞌ maxawal tet ebnaj fariseo tuꞌ, ẍi naj.
23718	MAT 15:16	Istakꞌwi Comam: —¿Tom haꞌ hunex machi maxetxumpaxo yin̈ tzet mawaltuꞌan?
23719	MAT 15:17	¿Tom mach heyohtajoj ta sunil tzet chiocto yul istiꞌ anma yul iscꞌul chiapni, chilahwi tuꞌ xin cat yel yin̈?
23724	MAT 15:22	Bey tuꞌ ay huneꞌ ix ix ah Cananea, mach Israeloj. Apni ix yilaꞌ Comam Jesús, yalni ix yin̈ caw ip: —Mamin, hach yuninal iscꞌahol naj David, tzꞌayojab hacꞌul win̈an. Ay huneꞌ nichꞌan wuninan caw chietalax yu ischejab naj matzwalil, caw xin chiecꞌyaꞌ yanma ix yu naj, ẍi ix tet Comam.
23725	MAT 15:23	Yajaꞌ xin machi takꞌwi Comam tet ix, yuxin hitzico ebnaj iscuywom Comam tuꞌ iscꞌatan̈, yalni ebnaj: —Mamin, hal tet ix paxojabto ix haxinwal chisbej ix yel yaw jin̈, ẍi ebnaj tet Comam.
23726	MAT 15:24	Istakꞌwi Comam: —Tetn̈e anma Israel chejbilintijan yu Comam Dios, yuto lahan anma tuꞌ hacaꞌ noꞌ meꞌ cꞌaynatoj, ẍi Comam tet ebnaj.
23727	MAT 15:25	Yajaꞌ hitzico ix, yay jahno ix sata Comam, yalni ix: —Mamin, colwahan̈ nino win̈an, ẍi ix.
23728	MAT 15:26	Yalni Comam tet ix: —Mach cꞌulo ta chꞌilaxilo tzet chislo ebnaj uninale cat yakꞌlax tet metx txꞌiꞌ, ẍi Comam.
23729	MAT 15:27	Yalnipaxo ix: —Hoꞌ Mamin yeli, yajaꞌ metx txꞌiꞌ tuꞌ chi-ticꞌa-yican̈ metx iskꞌal istiꞌ ebnaj uninale chiaycꞌay yalan̈ meẍa yet chiwaꞌ ebnaj, ẍi ix tet Comam.
23730	MAT 15:28	Lahwi tuꞌ xin, yalni Comam tet ix: —Miyay, caw ayco hawanma yin̈ Comam Dios, yuxin yubojab hacaꞌ choche hacꞌul, ẍi Comam. Yin̈n̈ena tuꞌ xin iscawxican̈ nichꞌan yunin ix tuꞌ.
23734	MAT 15:32	Lahwi tuꞌ, yawtenti Comam ebnaj iscuywom iscꞌatan̈, yalni Comam tet ebnaj: —Caw chitzꞌay incꞌulan yin̈ huntekꞌan anma tiꞌ yuto isyoxebxa tzꞌayic yehicꞌo incꞌatan̈an, matxa xin tzet chislo. Mach chisje incꞌulan inchejatojan yatut yuto tato mach chiwaꞌi, chalotaxca ispaxilo yip yulaj beh, ẍi Comam.
23735	MAT 15:33	Yalni ebnaj iscuywom Comam tet: —Mamin, caw txꞌiꞌal anma lah, ¿baytuꞌwal xin chon̈tohan̈ jikꞌatijan̈ tzet chislo anma tiꞌ? Yuto bay ayon̈ tiꞌ machi teꞌ n̈a, ẍi ebnaj.