23232	MAT 1:19	Kỹ José tóg mẽg mũ sir, kỹ tóg ti mỹ e tĩ. Ũn jykre kuryj vẽ mỹr, hã kỹ tóg fi mỹ'a han sór tũ nĩ. Kỹ tóg fi pin kỹ fi mỹ: “kỹ inh hỹn ã tỹ prũg ke tũ nĩ ha,” he sór mũ sir.
23233	MAT 1:20	Ti tỹ ver fi tovãnh to jykrén kỹ Topẽ tỹ jẽnẽ jafã tóg ti mỹ vẽnh ven mũ sir, ti vẽnh péti kỹ. Kỹ tóg ti mỹ: “José,” he mũ. “Tỹ ã Davi krẽ'krẽ ag kã ũ nĩ,” he tóg. “Maria fi to jykrén kónãn tũg nĩ. Fi tovãnh sór tũg nĩ. Ũ tũ pijé', Topẽ kuprĩg tỹ fi mỹ gĩr han ja vẽ.
23234	MAT 1:21	Gré ti nỹnh mũ, ha vem nĩ. Kỹ ti mỹ: Jesus, hem nĩ. Ãjag krenkren han jé tóg ke mũ, ãjag tỹ Topẽ vĩ mranh mũ ra,” he tóg.
23236	MAT 1:23	“ũn mén ja tũ fi vỹ kufy nĩnh mũ. Fi tỹ ti ve kỹ ag tóg ti to: Emanuel, henh ke mũ,” he ja nĩ. Emanuel to ken hã vẽ, hã vỹ: Topẽ vỹ ẽg ki rĩr há han ke mũ, he mũ.
23237	MAT 1:24	Kỹ tóg rĩr mũ sir, ti vẽnh péti kar kỹ. kỹ tóg fi mỹ: “ã ki sóg rĩr ke mũ,” he mũ. Ti tỹ Topẽ tỹ jẽnẽ jafã vĩ to jykrén kỹ tóg, ti mỹ ki krov nĩ sir, ti tỹ fi tỹ prũg ke ti.
23240	MAT 2:2	Ag tỹ Jerusalém tá junjun kỹ ag tóg sir: “ũ tỹ ũri mur mũ tag vỹ tỹ Israel ag pã'i mág nĩnh ke mũ,” he mũ. “Ti kri ẽg krĩg vé, ẽg tỹ ẽg jamã tá nỹtĩn kỹ. Ẽg tỹ ti mỹ nén ũ há gé kãmũ vẽ,” he ag tóg.
23242	MAT 2:4	Kỹ tóg Topẽ tũ to pã'i ag jé prẽr kỹ ag mỹ: “Cristo nẽji hẽ tá mur ke mũ?“ he mũ.
23243	MAT 2:5	Kỹ ag tóg ti mỹ: “Belém tá ke nẽji, ga tỹ Judéia tá,” he mũ. “Topẽ vĩ tó tĩ ũ vỹ vãsỹ ti to tag rán ja nĩgtĩ, ha mẽ:
23244	MAT 2:6	“Sĩ ti nĩ, ẽmã tỹ Belém ti, ga tỹ Judéia tá. Ti sĩ nĩ ra tóg ẽmã mág kar kãfór nĩ, pã'i mág ẽn tỹ tá mur ke tugrĩn. Tỹ tóg ẽg povo kri pã'i mág jẽnh ke mũ,” he ja tóg nĩ,” he ag tóg.
23245	MAT 2:7	Kỹ Herodes tóg vẽnh péju kỹ fóg ẽn ag mỹ: “kurã tỹ hẽ ri ke kã ãjag krĩg ẽn ve vén?“ he mũ. Kỹ ag tóg ti mỹ tó mũ.
23246	MAT 2:8	Kỹ tóg Belém ra ag jẽgnẽg mũ sir. “Vẽnh kar ki ti jẽmẽm nĩ. Ãjag tỹ ti ve kỹ inh mỹ tónh kãmũm nĩ. Kỹ sóg ti venh tĩg ke mũ gé, sỹ ti mỹ nén ũ há nĩm jé,” he tóg.
23249	MAT 2:11	Tá ag tóg ũn sĩ vég mũ, ti mỹnh fi ke gé. Kỹ ag tóg ti krẽm grĩnhgrĩnh ke mũ, ti mỹ: “tỹ ã Topẽ kósin nĩ,” he jé. Kỹ ag tóg ti mỹ ag tũ ti vin mũ sir, ouro ti, ka jẽnjo tỹ incenso ti ke gé, kar kỹ ka tỹ mirra jẽnjo ke gé.
23250	MAT 2:12	Hã ra Topẽ tóg, ag vẽnh péti ki ag mỹ: “Herodes mỹ tó tũg nĩ,” he mũ sir. Hã kỹ ag tóg ẽpry ũ jagma mũ kỹ ag jamã ra vỹnvỹn ke mũ sir, rã jur ja ra.
23251	MAT 2:13	Ag mũ kar kỹ José tóg kejẽn Topẽ tỹ jẽnẽ jafã vég mũ, ti vẽnh péti kỹ. Kỹ tóg ti mỹ: “ũn sĩ va tĩg, ga tỹ Egito ra, ti mỹnh fi mré. Herodes vỹ ti tén sór mũ. Kejẽn sóg ã mỹ: ha vỹn ké, henh ke mũ. Egito tá inh vĩ jãvãnh nĩ,” he tóg.
23253	MAT 2:15	Herodes tỹ kejẽn ter kỹ tóg tá vỹn ke mũ. Hã ra ti tĩg ja tag vỹ rán kỹ nĩ gé, hã vỹ: “ga tỹ Egito ra sóg vẽnh vĩ jẽnẽ, inh kósin tỹ tá vỹn ke jé,” he mũ.
23254	MAT 2:16	Hã ra Herodes tóg fagrĩnh mỹ fóg ẽn ag jãvãnh ja nĩ. Vãhã tóg: “ag tỹ inh mỹ tó tũg hỹn,” he mũ. Kỹ ti fe tóg gỹm ke mũ sir. Kỹ tóg ti porisa ag mỹ: “Belém ra gĩr ag kãgtén mũjẽg, ũn kri prỹg tỹ 2 anos tá krỹg tũ ẽn ag tãvĩ,” he mũ. Ag mỹ tóg 2 anos tó, fóg ag tỹ ti mỹ: “1 ano kãfór ti nĩ ha, ẽg tỹ ti kri krĩg ve ja ti,” hen kỹ.
23256	MAT 2:18	“ẽmã tỹ Ramá tá ẽg tóg vẽnh kygfỹ mẽnh mũ, vẽsỹrénh mág ke gé. Raquel fi krẽ ag vỹ tũ' he kãn, hã kỹ fi tóg vẽsỹrénh mũ,” he ja tóg nĩ.
23258	MAT 2:20	Kỹ tóg ti mỹ: “ũn sĩ va tĩg, ti mỹnh fi mré, ga tỹ Israel ra. Ũ tỹ ti tén sór mũ ẽn vỹ hur ter,” he mũ.
23260	MAT 2:22	Tá junjun kỹ fag tóg pã'i mág tãg jiji jẽmẽg mũ. Hã ra tóg tỹ Arquelau nĩ. Herodes kósin vẽ. Ti panh ri kén tóg tỹ pã'i mág nĩ, ga tỹ Judéia tá. Kỹ tóg ti kamẽg mũ. Kỹ Topẽ tóg ti vẽnh péti kỹ ti mỹ: “ga tỹ Judéia tá nĩ mãn sór tũg,” he mũ. Kỹ tóg ga tỹ Galiléia ra tĩ mũ sir.
23261	MAT 2:23	Kỹ tóg ẽmã tỹ Nazaré tá ẽmãn mũ. Hã ra tóg rán kỹ nĩ gé: “ti to ag tóg: Nazaré tá ke vẽ, henh ke mũ,” he ja tóg nĩ, Jesus to.
23263	MAT 3:2	“Ãjag jykre pãno tovãnh nĩ, Topẽ tỹ tỹ ãjag pã'i nĩ jé,” he tóg.
23264	MAT 3:3	Hã ra Isaías tóg tag rán ja nĩ: “ẽmã tũ ja tá tóg jẽnh ke mũ, ga kórég tá. Tá tóg ag mỹ jamã há ra: ”ẽg Senhor kãtĩg ke jo vẽnh jãnhkrigkrig nĩ,” henh ke mũ. “Ẽpry kurég ãjag tóg tĩ, ãjag pã'i mág jun ken kỹ. Kỹ tag ri ke han nĩ. Ãjag jykre pãno tugvãnh nĩ,” he jé tóg ke mũ,” he ja tóg nĩ, Isaías ti. Ti tỹ João mur to hã ti kãmén jan hã vẽ.
23267	MAT 3:6	Ti tỹ ag mỹ: “ãjag jykre pãno tovãnh nĩ,” hen kỹ ũ ag tóg: “Topẽ vĩ mranh ja sóg nĩgtĩ,” he mũ. Ẽn ag kygpég tóg mũ sir, goj tỹ Jordão ki.
23268	MAT 3:7	Kỹ pã'i tỹ Fariseu ag vỹ ti tá junjun mũ gé sir, pã'i tỹ Saduceu ag ke gé. Ón kỹ ag tóg ti to kãmũ mũ, ti tỹ ag kygpe jé. Kỹ tóg ag jyvẽn tar han mũ sir. “Pỹn ri ke ãjag nỹtĩ, ãjag jykre pãno nỹtĩn kỹ,” he tóg ag mỹ. “Ũ nỹ ãjag mỹ: Topẽ vỹ ãjag to jũnh ke tũ nĩ, he tĩ'?
23270	MAT 3:9	Hã ra ãjag tóg jagnẽ mỹ: “Abraão vỹ tỹ ẽg jógjóg ve nĩ. Kỹ Topẽ vỹ ẽg to jũnh ke tũ nĩ,” he tĩ. Ke tũ vẽ hã ra. Ãjag jykre kórég ẽn to ãjag tóg jagtar ke mũ, ha vem nĩ. Topẽ vỹ pó tag tỹ Abraão krẽ'krẽ hynhan ki kanhró nĩ, ti tỹ Abraão krẽ'krẽ ũ ve sór kỹ.
23271	MAT 3:10	Ẽg tỹ ka tóg gỹn kỹ tỹ pĩ han ri ke tóg nĩ. Ãjag tỹ vẽjykre há han sór tũ nỹtĩn kỹ Topẽ tóg, pĩ ki ãjag vãm ke mũ,” he tóg.
23272	MAT 3:11	Kỹ tóg vẽnh kar mỹ: “goj hã tỹ sóg ãjag kygpég tĩ, ãjag tỹ ãjag jykre pãno tovãnh kỹ,” he mũ. “Cristo tóg inh nón kãtĩg ke mũ. Kỹ ti hã tóg Topẽ kuprĩg tỹ ãjag jagrẽ han ke mũ. Kỹ tóg tỹ pĩ ve nĩ. Ti tỹ ãjag kygpenh ken hã vẽ. Inh kãfór ti nĩ, jãvo sóg tỹ ti krẽm ke pẽ nĩ,” he tóg.
23273	MAT 3:12	“Ti kãtĩg vỹ ẽg tỹ rãgró rẽn ri ke nĩ. Ti rẽn kar kỹ ẽg tóg ti fár pũn tĩ. Ti kanẽ hã vin han ẽg tóg tĩ. Cristo kãtĩg kỹ tóg ge nĩnh mũ. Ti to há nỹtĩ ag mỹ tóg: “ha kãmũ jẽg,” henh ke mũ. Kỹ tóg ti to há tũ ag vãm ke mũ, pĩ ki, hã ra tóg nhyn kenh ke tũ pẽ nĩ,” he tóg, João ti.
23274	MAT 3:13	Ẽn kã kejẽn Jesus tóg João tá jun mũ gé sir, goj tỹ Jordão tá. Ga tỹ Galiléia tá tóg kãtĩ mũ. Kỹ tóg João mỹ: “ha inh kypé,” he mũ sir.
23275	MAT 3:14	Hã ra tóg João mỹ e tĩ, kỹ tóg ti mỹ: “ã hã tỹ inh kypenh ke vẽ vẽ,” he mũ. “Inh mỹ tóg e tĩ, ã tỹ inh mỹ: ha inh kypé, hen kỹ,” he tóg mũ.
23276	MAT 3:15	Hã ra Jesus tóg ti mỹ: “hỹ,” he mũ. “Hã ra tóg isỹ Topẽ tỹ nén tó mũ han kãn há tĩ,” he tóg. Kỹ tóg vãhã ti kypég mũ sir.
23278	MAT 3:17	Kỹ vẽnh vĩ tóg mẽ há tĩ, kanhkã tá, kỹ tóg: “inh kósin pir vẽgtĩ,” he mũ. “Inh fe pẽ vẽgtĩ,” he tóg.
23279	MAT 4:1	Kỹ Topẽ kuprĩg vỹ Jesus mỹ: “ẽmã tũ ja ra tĩg,” he mũ. Kỹ tóg tĩ mũ. Ti tỹ ẽmã tũ ja tá nĩn kỹ Japo vỹ, ti tỹ ti jóg vĩ mranh han sór mũ, hã ra tóg ke jãvãnh nĩ.
23281	MAT 4:3	Kỹ Japo tóg, ti to kãtĩ mũ sir, ũ tỹ ẽg tỹ Topẽ vĩ mranh han sór tĩ ẽn ti. Kỹ tóg ti mỹ: “Topẽ kósin vỹ tỹ ã nĩ,” he mũ. “Hã kỹ pó tag tỹ ẽmĩ han, ã tỹ ko jé,” he tóg ti mỹ.
23282	MAT 4:4	Kỹ tóg ti mỹ: “hã ra tag tóg rán kỹ nĩ, ha mẽ,” he mũ. “Ẽg pijé ẽmĩ tãvĩ jamẽn kỹ rĩnrĩr mũgtĩ'. Topẽ vĩ hã jamẽn kỹ ẽg tóg rĩnrĩr mũgtĩ, he tóg, Topẽ vĩ tỹ rán kỹ nĩ ki. Kỹ tóg isỹ ti vĩ mranh jãvãnh tĩ, ẽmĩ to,” he tóg.
23284	MAT 4:6	Kỹ tóg ti mỹ: “ã hã ne tóg tỹ Topẽ kósin nĩ',” he mũ. “Kỹ kema ki hũm,” he tóg. “Topẽ vĩ ki tag tóg rán kỹ nĩ, hã vỹ: “ti tỹ jẽgnẽ jafã ag mỹ tóg tónh mũ, kỹ ag tóg ã jy nĩgãn ke mũ,” he mũ. “Kỹ ã tóg rỹj ke tũ nĩ. Ã pẽn vỹ rỹj ke tũ nĩ,” he tóg.
23285	MAT 4:7	Kỹ tóg ti mỹ: “hỹ. Kỹ tag vỹ rán kỹ nĩ gé, ha mẽ,” he mũ. “Topẽ mỹ: “ã mỹ ã tỹ nén tó ja ẽn han mũ vỹ?” he tũg nĩ, ti to é he tũg nĩ,” he tóg mũ gé. Hã kỹ sóg ti tỹ inh mỹ nén to: “han ra,” he mũ ẽn hã han tĩ, hã kỹ sóg hũm ke tũ nĩ,” he tóg.
23287	MAT 4:9	Kỹ tóg ti mỹ: “isũ vẽ, tag kar ti,” he mũ. “Hã ra sóg, ã mỹ tovãnh kãn sór mũ, ã tỹ ã jakrĩ tỹ grĩnh ken kỹ, inh krẽm, inh mỹ: Topẽ vỹ tỹ ã nĩ, he jé,” he tóg.
23288	MAT 4:10	Kỹ tóg ti mỹ: “ha tĩg, Satanás,” he mũ. “Ẽg pã'i tỹ Topẽ hã krẽm ẽg tóg ẽg jakrĩ tỹ grĩnh ke tĩ, ti hã to ẽg tóg: “Topẽ vẽ,” he tĩ, hã kỹ tóg rán kỹ nĩ, Topẽ vĩ tỹ rán kỹ nĩ ki,” he tóg.
23293	MAT 4:15	“Zebulom ag jamã tá ti nĩnh mũ, Naftali ag jamã tá, goj nig mág tá, goj tỹ Jordão mã tá. Fóg ag jamã tá ti nĩnh mũ, Israel tũ ag jamã tá, ũ tỹ Topẽ ki kagtĩg ag jamã tá, goj nig mág tỹ Galiléia fyr ki.
23294	MAT 4:16	Tá ag tóg Topẽ ki kagtĩg nỹtĩ, hã kỹ tóg tá ag kri kuty ri ke nĩ. Ti tỹ tá jun kỹ tóg ag kri kurã ẽn ri ke nĩ. Ag kãgter ke vẽ vẽ, hã ra tóg ag kanhrãn mũ, ag krenkren jé,” he tóg, Topẽ vĩ rán ki.
23295	MAT 4:17	Ga ẽn tá nĩ kỹ tóg, ag mỹ Topẽ vĩ tó mũ, kỹ tóg ag mỹ: “ãjag jykre pãno tovãnh ra,” he mũ, “ãjag tỹ ũri ũ tỹ kanhkã tá nĩ ẽn tỹ tỹ ẽg pã'i nĩ ve jé,” he tóg, Jesus ti.
23297	MAT 4:19	Kỹ Jesus tóg ag mỹ: “inh mré kãmũjẽg,” he mũ. “Pirã kugmĩ há ãjag nỹtĩ. Ãjag kanhrãn jé sóg ke mũ, ãjag tỹ ẽprã ke ag tỹ inh ki ge han jé,” he tóg.
23299	MAT 4:21	Kỹ ag tóg mũ mũ, goj fyr jagma. Ag mũ sĩ han mũ ra tóg, ũn régre ũ ag ve mãn mũ gé, hã vỹ: Tiago mré ti jãvy tỹ João he mũ. Zebedeu krẽ ag vẽ. Canoa kã ki ag nỹtĩ, kur tỹ pirã kugmĩ jafã ki ag tóg han nỹtĩ nĩ. Ag panh vỹ, ag mré nĩ nĩ. Kỹ Jesus tóg, ag mỹ: “inh mré kãmũjẽg,” he mũ.
23306	MAT 5:3	“Topẽ vỹ ãjag ve há han mũ, ãjag tỹ: “kórég inh nĩ,” hen kỹ. “Sỹ Topẽ kuprĩg tỹ jagrẽn kỹ nĩ tũ nĩ ra sóg tỹ, ũn kórég nĩnh mũ vẽ,” hem nĩ. Kỹ ãjag tóg, ti tỹ tỹ ẽg pã'i nĩ venh ke mũ, kanhkã tá,” he tóg.
23307	MAT 5:4	“Topẽ vỹ ãjag ve há han mũ, ãjag fỹn kỹ. Kỹ tóg ãjag fỹ ẽn tỹ tũ' henh ke mũ,” he tóg.
23308	MAT 5:5	“Topẽ vỹ ãjag ve há han mũ, ãjag tỹ vẽnh kar mỹ komẽr hã vĩn kỹ. Kỹ ãjag tóg ga kar kri tỹ pã'i nỹtĩnh ke mũ,” he tóg.
23309	MAT 5:6	“Topẽ vỹ ãjag ve há han mũ, ãjag tỹ vẽjykre kuryj ve sór nỹtĩn kỹ, ti tỹ ãjag mỹ ãjag kókĩr ri ke nĩn kỹ. Kỹ ãjag tóg venh ke mũ,” he tóg.
23310	MAT 5:7	“Topẽ vỹ ãjag ve há han mũ, ãjag tỹ jagnẽ jagãgtãn kỹ. Kỹ Topẽ vỹ ãjag jagãgtãn ke mũ gé,” he tóg.
23311	MAT 5:8	“Topẽ vỹ ãjag ve há han mũ, ãjag jãnhkri nỹtĩn kỹ. Kỹ ãjag tóg Topẽ venh mũ,” he tóg.
23312	MAT 5:9	“Topẽ vỹ ãjag ve há han mũ, ãjag tỹ jagnẽ krĩ tỹ kãnhvy' hen kỹ. Kỹ Topẽ tóg ãjag to: “inh krẽ ag vẽ,” henh ke mũ,” he tóg.
23313	MAT 5:10	“Topẽ vỹ ãjag ve há han mũ, ag tỹ vẽjykre kuryj to ãjag vóg kónãn mũ ra. Kỹ ãjag tóg kanhkã tá jun ke mũ,” he tóg.
23314	MAT 5:11	“Topẽ vỹ ãjag ve há han mũ, ag tỹ isugrĩn ãjag mỹ vĩ kónãn mũ ra, ag tỹ ãjag vóg kónãn mũ ra. Ag tỹ ón kỹ ãjag to vĩ vĩ he kỹ tóg há tĩ, ag tỹ ón kỹ: “jykre pãno ag nỹtĩ,” he mũ ra.
23315	MAT 5:12	Mỹ sér nỹtĩm nĩ, krĩ kuprã nỹtĩm nĩ. Kanhkã tá ãjag tóg nén há kar venh ke mũ, vẽnh kato. Ge ja ag tóg nĩgtĩ gé vãsỹ, Topẽ vĩ tó tĩ ag mỹ, ãjag jo ke ag mỹ. Ag ri kén ãjag tóg tag venh ke mũ,” he tóg, Jesus ti.
23316	MAT 5:13	“Sa ri ke ãjag nỹtĩ, ãjag tỹ ga kri mũn kỹ. Sa kãhór nĩn kỹ ẽg tóg tỹ sa há han mãn ki kagtĩg nỹtĩ. Kórég ti nĩgtĩ, ti kãhór nĩn kỹ. Kỹ ẽg tóg ti vãm tĩ sir, kỹ tóg tũ' he tĩ sir,” he tóg, Jesus ti.
23317	MAT 5:14	“Ga kri mũn kỹ ãjag tóg, jẽngrẽ ri ke nỹtĩ, ãjag tỹ vẽjykre há han kỹ, ag tỹ ãjag ki Topẽ jykre há ve jé. Ẽmã mág tỹ pãnónh kri nỹn kỹ tóg kuvar há tá ve há nĩgtĩ. Ti pijé vẽnh péju kỹ nỹ'.
23319	MAT 5:16	Gem nĩ, néj gru ri ke nỹtĩm nĩ. Topẽ jykre han nĩ, vẽnh kar tỹ ãjag jykre há ve jé. Kỹ ag tóg, Topẽ mỹ vĩ há han ke mũ, ẽg jóg tỹ kanhkã tá nĩ ẽn mỹ,” he tóg, Jesus ti.
23320	MAT 5:17	“Ãjag hỹn iso: “Moisés tỹ ẽg mỹ nén tó ja ẽn tỹ tóg, tũ' he sór mũ',” he mũ. “Hã tũ vẽ. Sỹ ki króm kãn sór vẽ,” he tóg.
23321	MAT 5:18	“Topẽ vỹ, ti jykre ẽn tỹ tũ' henh ke tũ nĩ, ga tỹ ver tũ' he tũ nĩn kỹ. Sỹ ki króm kãn ke vẽ, kỹ tóg ki krov kãn kỹ nỹnh mũ, mỹr, ha mẽ,” he tóg.
23322	MAT 5:19	“Kỹ ãjag tỹ ti vĩ pir tỹ tũ' hen kỹ tóg kórég nĩ. Vẽnh kar krẽm ke vỹ tỹ ãjag nỹtĩnh mũ, gen kỹ. Ãjag tỹ hã ra han kãn kỹ ãjag tóg tỹ, ũn mág nỹtĩnh mũ,” he tóg.
23323	MAT 5:20	“Fariseu ag ri ke nỹtĩ sór tũg nĩ. Ón kỹ ag tóg Topẽ vĩ ki króm sór tĩ, hã ra ag tóg, ki króm há han tũ nĩgtĩ. Ag jykre pijé kuryj nỹ'. Ãjag tỹ kanhkã ve sór nỹtĩn kỹ vẽjykre kuryj han nĩ,” he tóg, Jesus ti.
23324	MAT 5:21	“Topẽ tỹ vãsỹ ẽg jo ke ag jyvẽn mẽ ãjag huri, hã vỹ: “ũ tén tũg nĩ,” he mũ. “Ã tỹ ũ tén kỹ ag tóg, ã senh ke mũ, ã tỹ ti mré ter jé,” he ja tóg nĩ, Topẽ vĩ tỹ rán kỹ nĩ ki.
23325	MAT 5:22	Sỹ ũri ãjag jyvẽn hã vẽ, ha mẽ. Ã tỹ ã régre to ã fe tỹ gỹm ke kỹ tóg ã tỹ ti tén ri ke nĩ, fi ke gé. Ag tỹ tag to ã se kỹ tóg inh mỹ há tĩnh mũ. Kỹ ã régre mỹ féfén tũg nĩ gé. Jãvo ã tóg, nũgme ki kutẽnh ke mũ, pĩ ẽn ki,” he tóg.
23326	MAT 5:23	“Ã tỹ Topẽ ĩn krẽm ti mỹ nén ũ pũn sór kỹ, vẽso jykrén vén nĩ. “Inh mỹ ũ to jũ tũ nĩ vỹ? Ũ mỹ iso jykrén kónãn tũ nĩ vỹ?” hem nĩ.
23327	MAT 5:24	Ã tỹ ũ to jũ nĩn kỹ ti venh tĩg nĩ ver. Ti mỹ: “inh mỹ vẽnh pãte fón nĩ,” hem nĩ ver, fi mỹ ke gé. Kar kỹ hã Topẽ mỹ nén ũ pũn nĩ sir,” he tóg.
23328	MAT 5:25	“Kejẽn ã tóg, ã mré ke ũ mỹ név jẽ, ã mré ke ũ fi mỹ ke gé. Kỹ fi tóg pã'i ag mỹ ã kãmén tĩg ke mũ. Fi tỹ tónh tĩg ke ẽn jo fi mré vĩm nĩ, ti mré ke gé. “Kajãm jé sóg ke mũ,” hem nĩ. Ke tũ nĩ mũ ra pã'i vỹ, ã jykre pãno venh ke mũ, kỹ tóg ti porisa mỹ: “ti se ra,” henh ke mũ.
23329	MAT 5:26	Ha mẽ, tá ã kãnhmar kãkutẽ mãn ke tũ nĩ. Ã tỹ kajãm kãn kar kỹ hã ã tóg, tá kãkutẽ mãn mũ sir, hẽn ri ke mũn,” he tóg, Jesus ti.
23330	MAT 5:27	“Topẽ tỹ vãsỹ ẽg jo ke ag jyvẽn ũ tag mẽ ãjag huri, ke gé, hã vỹ: “ã prũ tũ fi mré nỹ tũg nĩ,” he mũ.
23333	MAT 5:30	Ã tỹ ã nĩgé tỹ nén ũ kórég han kỹ ã nĩgnó kym nĩ gé, ã tỹ ke mãn tũ nĩ jé. Ã nĩgnó pir nĩn kỹ tóg, jagy tĩ vẽ. Ã tỹ hã ra nũgme ki kutẽ kỹ tóg, jagy kãfór nĩ sir, kỹ tag hã kamẽg nĩ,” he tóg, Jesus ti.
23334	MAT 5:31	“Topẽ tỹ vãsỹ ẽg jo ke ag jyvẽn ũ hã vỹ nỹ gé, hã vỹ: “ã tỹ ã prũ fi fón sór nĩn kỹ tóg há tũ nỹ,” he mũ. “Ã tỹ ge ra fi fón sór nĩn kỹ fi mỹ vẽnh rán kỹ nĩm nĩ, fi tỹ vẽnh rá ma tĩg jé,” he ja tóg nĩ.
23335	MAT 5:32	Sỹ ũri ãjag jyvẽn hã vẽ, ha mẽ: ãjag prũ fón tũg nĩ. Ã tỹ fi fón kỹ fi tỹ ũ tỹ mén mãn kỹ fi tóg, ã tugrĩn Topẽ vĩ mranh mũ sir, ã tỹ tỹ fi mén pẽ ra. Fi tỹ ã jãvo vẽsóg ki ũ mré nỹ ja nĩn kỹ tóg, há sĩ nỹ, ã tỹ fi mỹ: ha tĩg, hen kỹ. Kỹ fi mén tỹ fi fón kỹ fi tỹ prũg sór tũg nĩ gé. Ã prũ tũ fi vẽ, fi mén tỹ fi fón ja nĩn kỹ,” he tóg, Jesus ti.
23336	MAT 5:33	“Vãsỹ Topẽ tỹ ẽg jo ke ag jyvẽn ũ tag mẽ ãjag tóg huri ke gé, hã vỹ: “jagnẽ mỹ ón tũg nĩ,” he mũ. “Ã tỹ ũ mỹ: Topẽ vỹ ki kanhró nĩ, hen kỹ ti mỹ ón sór tũg nĩ. Ki hã tóm nĩ gé, ã tỹ Topẽ mỹ: tag hã han jé sóg ke mũ, hen kỹ. Ón kỹ vĩ tũg nĩ,” he ja tóg nĩ.
23337	MAT 5:34	Sỹ ũri ãjag jyvẽn hã vẽ, ha mẽ: Ón kỹ “Topẽ vỹ ki kanhró nĩ,” he sór tũg nĩ. Ón kỹ “ũ tỹ kanhkã tá nĩ ẽn vỹ, ki kanhró nĩ,” he sór tũg nĩ gé. Topẽ nĩgja vẽ, kanhkã tá, kỹ ón kỹ tag tó sór tũg nĩ.
23338	MAT 5:35	Kỹ ón kỹ: “ũ tỹ tỹ ga kri ke ẽn vỹ, ki kanhró nĩ,” he tũg nĩ gé. Topẽ tũ vẽ, ga ti. Kỹ ón kỹ: “ũ tỹ Jerusalém tá ke ag ki rĩr tĩ ẽn vỹ, ki kanhró nĩ,” he tũg nĩ gé. Ẽg pã'i mág tũ vẽ mỹr, Jerusalém ti.
23339	MAT 5:36	Kỹ ón kỹ: “ũ tỹ inh krĩ han mũ ẽn vỹ ki kanhró nĩ,” he tũg nĩ gé. Ã tỹ ã gãnh kuprig sór mũ ra ã tóg, ã tỹ nén tỹ ã gãnh kuprig ke mũ ẽn ki kagtĩg nĩ. Ã tỹ ã gãnh sán sór mũ ra ã tóg, ã tỹ nén tỹ sán ke mũ ẽn ki kagtĩg nĩ gé.
23340	MAT 5:37	Ki hã tóm nĩ, jagnẽ mỹ, ón sór tũg nĩ. Ũ tỹ ã mỹ ki hã tó kỹ: hỹ, hem nĩ. Ti tỹ ki hã ke tũ nĩ kỹ: vó, hem nĩ gé. Ã tỹ han ke nĩn kỹ: he, hem nĩ. Ã tỹ han ke tũ nĩ kỹ: nejé, hem nĩ. Ã tỹ ón sór kỹ ã tóg Nén-Kórég jykre hã han ke mũ,” he tóg, Jesus ti.
23341	MAT 5:38	“Topẽ tỹ vãsỹ ẽg jo ke ag jyvẽn ũ tag mẽ ãjag huri, hã vỹ: “ũ tỹ ã kanẽ pir ki tãnh kỹ vẽnh kato ti kanẽ pir ũ hã ki tãnh nĩ gé,” he ja tóg nĩ. “Ũ tỹ ã jã pir ki tãnh kỹ mranh kỹ vẽnh kato ti jã pir hã ki tãnh kỹ mranh nĩ gé. Pãtén tũg nĩ,” he ja tóg nĩ, Topẽ ti.
23344	MAT 5:41	Ti tỹ ã mỹ: “mũ nỹ, tag tá, kakó ja tá inh fón jé,” hen kỹ ti mré tĩg nĩ, kỹ ti mỹ: “kór há tá inh ã fón tĩg mũ ha,” hem nĩ.
23345	MAT 5:42	Ti tỹ ã mỹ nén ũ to: “inh mỹ nĩm,” hen kỹ ti mỹ nĩm nĩ, fi mỹ ke gé. Ũ tỹ ã mỹ: “inh mỹ prestar hem nĩ,” hen kỹ ti mỹ, fi mỹ: nejé, he tũg nĩ,” he tóg, Jesus ti.
23346	MAT 5:43	“Topẽ tỹ vãsỹ ẽg jo ke ag jyvẽn ũ mẽ ãjag huri, hã vỹ: ã mré ke ag to há nĩm nĩ, kỹ ũ tỹ ã kato vãsãnsãn mũ ag to jũ nĩm nĩ gé, he mũ.
23348	MAT 5:45	Kỹ ãjag tóg tỹ Topẽ krẽ nỹtĩ, ãjag tỹ ẽg jóg tỹ kanhkã tá nĩ ẽn ri ke han kỹ. Ti hã ne tóg rã han', ti tỹ vẽnh kar kri jẽngrẽg kỹ san jé, ũn jykre kuryj ag kri, ũn jykre pãno ag kri ke gé, fag kri ke gé. Ta han ti ke gé, ti tỹ vẽnh kar há han jé, ũn jykre kuryj ag, ũn jykre pãno ag ke gé, fag ke gé. Ver tóg vẽnh kar to há nĩ, Topẽ ti,” he tóg.
23349	MAT 5:46	“Ãjag mré ke ũ ag tóg, ãjag to há nỹtĩ. Ãjag tỹ tag ag hã to há nỹtĩn kỹ, fag hã to há nỹtĩn kỹ tóg, tỹ nén ũ tũ nĩ ver. Ũn jykre kórég ag vỹ ge nỹtĩgtĩ gé, governo mỹ jãnkamy mãg tĩ ag. Ũ tỹ ag to há nỹtĩ ẽn ag hã to ag tóg, há nỹtĩgtĩ, vẽnh kato. Há ti nĩ, hã ra tóg tỹ nén ũ tũ nĩ ver.
23350	MAT 5:47	Kỹ ãjag tỹ ãjag mré ke ag hã mỹ: “ã mỹ há?” hen kỹ tóg tỹ, nén ũ tũ nĩ gé ver. Ũ tỹ Topẽ vĩ ki kagtĩg ag vỹ, ge nỹtĩgtĩ gé. Ag mré ke ag hã mỹ ag tóg: “ã mỹ há?” he tĩ gé, hã ra tóg tỹ nén ũ tũ nĩ ver.
23351	MAT 5:48	Hã kỹ vẽnh kar to vẽjykre kuryj han kỹ nỹtĩm nĩ, ũ tỹ ãjag kato vãsãnsãn mũ ag mré hã, fag mré hã. Ẽg jóg tỹ kanhkã tá nĩ ẽn ri ke han nĩ. Ti hã ne tóg, vẽnh kar to vẽjykre kuryj han kỹ nĩ nĩ'. Ti ri ke han nĩ,” he tóg, Jesus ti.
23352	MAT 6:1	“Kỹ ãjag tỹ Topẽ jykre han sór kỹ ũ tỹ vẽjykre pãno han mũ ag jykre ri ke han tũg nĩ. Ón kỹ ag tóg, vẽnh kar rĩnve Topẽ jykre han sór tĩ, vẽnh kar tỹ ag ve jé. Kar kỹ ag tóg hã ra, hã tũ han tĩ sir, fag ke gé. Kỹ ag ri ke han tũg nĩ, ke tũ nĩ mũ ra ẽg jóg tỹ kanhkã tá nĩ ẽn vỹ tóg, ãjag mỹ ti kaja ven ke tũ nĩ,” he tóg.
23353	MAT 6:2	“Hã kỹ ãjag tỹ ũn jagtar ag jagãgtãn kỹ ũ mỹ: ag jagãgtãn inh tĩ, he tũg nĩ. Ũ tỹ vẽjykre régre han mũ ag jykre ri ke han tũg nĩ. Vẽnh kar mỹ ag tóg: ag jagãgtãn inh tĩ, fag ke gé, he tĩ. Ag ganho hã vẽ, kỹ ag tóg kanhkã tá ganho ũ ve mãn ke tũ nĩ ha, he tóg.
23354	MAT 6:3	“Ag ri ke han tũg nĩ. Ũ mỹ tó tũg nĩ, ãjag tỹ ũ jagãgtãn kỹ, ãjag mré ke fag mỹ tó tũg nĩ gé.
23355	MAT 6:4	Kỹ ãjag tỹ ag jagãgtãn kỹ ẽg jóg tỹ kanhkã tá nĩ ẽn tóg, ãjag vég mũ sir, kỹ tóg ãjag mỹ nĩm ke mũ sir, ãjag ganho ti. Ẽg tỹ vẽnh vatánh tá nén han mũ ẽn ve kãn tóg tĩ, Topẽ ti,” he tóg, Jesus ti.
23356	MAT 6:5	“Kỹ ãjag tỹ Topẽ mré vẽmén kỹ ũ tỹ vẽjykre régre han mũ ẽn jykre ri ke han tũg nĩ gé. Ag tỹ ón kỹ Topẽ mré vĩ kỹ ag tóg, igreja krẽm jẽgjẽ kỹ nỹtĩ, ke tũ nĩ kỹ ĩn krẽm. Kỹ vẽnh kar vỹ ón kỹ ag to vĩ há han mũ sir, fag to ke gé. Kanhkã tá tóg ganho ũ ve mãn ke tũ nĩ ha. Ãjag mỹ sóg ki hã tó mũ, ha mẽ.
23357	MAT 6:6	Ag jãvo ãjag tỹ Topẽ mré vẽmén kỹ ãjag ĩn kã ra gem nĩ. Kỹ jãnkã nĩfénh nĩ. Kỹ tá Topẽ mré vĩm nĩ sir, ẽg jóg mré, ẽg tỹ ũn vég tũ ẽn mré. Kỹ tóg kanhkã tá ãjag mỹ nĩm ke mũ, ãjag ganho ti. Ẽg tỹ vẽnh kar vatánh tá nén han mũ ẽn vég tóg tĩ mỹr, Topẽ ti,” he tóg, Jesus ti.
23358	MAT 6:7	“Ãjag tỹ ti mré vẽmén kỹ fagrĩnh mỹ ti mré vẽmén mág han tũg nĩ. Ũ tỹ Topẽ vĩ ki kagtĩg ag ri ke han tũg nĩ. Ag jãnjãn kỹ ag tóg ón kỹ vĩ jagy han tĩ. “Ẽg tỹ vĩ jagy han kỹ ti hỹn ẽg vĩ mẽnh mũ,” he ag tóg tĩ, ón kỹ, fag ke gé.
23359	MAT 6:8	Ag ri ke han tũg nĩ. Ẽg jóg vỹ nén kar ki kanhró nĩ. Ãjag tỹ ti mỹ tó tũ ra tóg ki kanhró nĩ,” he tóg.
23360	MAT 6:9	“Ãjag tỹ Topẽ mré vĩ kỹ tag tóm nĩ, ha mẽ: “Ẽg jóg mág, kanhkã tá ã tóg nĩ nĩ. Ã jiji tó ẽg tóg tĩ, kỹ vẽnh kar jé ã tỹ tỹ ũn mág nĩ vé.
23364	MAT 6:13	Kỹ ẽg tỹ ã vĩ mranh sór kỹ ẽg kren han nĩ, ẽg tỹ mranh tũ nĩ jé. Nén-Kórég jo ẽg vem nĩ. Ã hã ne tóg tar nĩ'. Ã hã ne tóg mág nĩ inhhã'. Ã jykre tóg tũ' henh ke tũ nĩ,” hem nĩ, Topẽ mỹ,” he tóg.
23365	MAT 6:14	“Hỹ, ge ti nĩ,” he tóg. “Ũ tỹ ãjag to jũ kỹ ti mỹ vẽnh pãte fón nĩ. Ũ tỹ ãjag mỹ vĩ kónãn kỹ ti mỹ vẽnh pãte fón nĩ gé. Ãjag tỹ gen kỹ ẽg jóg vỹ ãjag mỹ vẽnh pãte fón ke mũ gé.
23366	MAT 6:15	Ãjag tỹ tag han tũ nĩn kỹ ẽg jóg tóg, ãjag mỹ vẽnh pãte fón ke tũ nĩ gé, ãjag tỹ ti vĩ mranh ja ti,” he tóg, Jesus ti.
23367	MAT 6:16	“Kejẽn ãjag tóg vãkrég tĩ. Jẽg tũ ãjag nĩ, Topẽ mỹ há nỹtĩ jé. Kỹ fe ũ nỹtĩ tũg nĩ. Vãkre ki ũ tỹ vẽjykre régre han mũ ag jykre ri ke han tũg nĩ. Ag tỹ ón kỹ vãkre kỹ ag tóg, fe ũ nỹtĩgtĩ sir, vẽnh kar tỹ ag vãkre ve jé. Ag ganho hã vẽ. Kanhkã tá ag tóg, ganho ũ venh ke tũ nĩ ha. Ãjag mỹ sóg ki hã tó mũ, ha mẽ.
23369	MAT 6:18	Hã kỹ ag tóg vég tũ nĩ, ãjag vãkrég mũ ti. Ẽg jóg hã ne vég mũ inhhã', ẽg tỹ ũn vég tũ ẽn hã vỹ vég mũ. Kỹ tóg kanhkã tá ãjag mỹ ãjag ganho nĩm ke mũ. Ẽg tỹ vẽnh kar vatánh tá nén han mũ vég tóg tĩ, Topẽ ti,” he tóg, Jesus ti.
23370	MAT 6:19	“Ga kri mũn kỹ rikon ke to vãsãn sór tũg nĩ. Ga vỹ ãjag tỹ nén kar konh ke mũ. Kỹ ãjag jãnkamy vỹ vẽso jãgfanh ke mũ gé sir. Kỹ ag tóg pigju kỹ ma mũnh ke mũ gé sir, ãjag tỹ nén ti, ti e nĩn kỹ.
23372	MAT 6:21	Ãjag tỹ ga kri tỹ nén ũ mág nỹtĩn kỹ ãjag tóg, ga kri mũ mág sór mũ. Ãjag tỹ hã ra kanhkã tỹ tỹ nén ũ mág nỹtĩ sór kỹ ãjag tóg, kanhkã ra mũ sór mũ, kỹ tag hã ne há nĩ',” he tóg, Jesus ti.
23373	MAT 6:22	“Ẽg kanẽ tỹ ẽg tóg vég tĩ. Kỹ tóg ẽg mỹ kurã nĩ, ẽg kanẽ há nĩn kỹ.
23374	MAT 6:23	Ti kórég nĩn kỹ tóg, ẽg mỹ kuty tĩnh mũ. kỹ kuty tag vỹ kuty kar kãfór nĩ. Ge ti nĩ, ẽg jykre kórég nĩn kỹ. Ẽg kanẽ kórég ri ke ti nĩ,” he tóg, Jesus ti.
23375	MAT 6:24	“Ã jagrẽ régre nĩn kỹ tóg vẽnh mỹ tĩ. Ã tỹ Topẽ hã tỹ jagrẽ nĩn kỹ jãnkamy tãn ẽn tỹ jagrẽ nĩ sór tũg nĩ. Ã tỹ jãnkamy e ve sór kỹ ti hã vỹ tỹ ã jagrẽ nĩnh mũ. Kỹ ã tóg Topẽ tỹ ẽg mỹ nén tó mũ ẽn to jykrén há han ke tũ nĩ. Hã kỹ ã tỹ Topẽ to há nĩn kỹ ga kri riko nĩ sór tũg nĩ. Topẽ kã jatun jé ã tóg ke mũ, ha vem nĩ,” he tóg.
23376	MAT 6:25	“Hã kỹ sóg ãjag mỹ tó mũ. Ãjag tỹ nén ve sór mũ to krĩ kufy han tũg nĩ. “Inh hỹn ũri ne konh mũ', inh hỹn ne tunh mũ'?” he tũg nĩ. Topẽ tỹ ẽg han ja vẽ mỹr, ẽg tỹ ga kri mũ jé. Hã kỹ tóg ẽg mỹ ẽg tỹ konh ke mũ ven tĩ gé sir, ẽg kur ti ke gé.
23382	MAT 6:31	Krĩ kufy han tũg nĩ. “Inh hỹn ne konh mũ'? Inh hỹn ne kron mũ'? Inh hỹn ne tunh mũ'?“ he tũg nĩ.
23385	MAT 6:34	Hã kỹ ãjag tỹ vaj kỹ nén ve sór mũ to krĩ kufy han tũg nĩ. Vaj kỹ ãjag tóg venh ke mũ, kỹ ãjag tóg to jykrén ke mũ sir. Ũri ãjag tỹ nén vég mũ hã to jykrén nĩ,” he tóg, Jesus ti.
23386	MAT 7:1	“Ã régre to vĩ kónãn tũg nĩ, ti jykre kórég ra. Kỹ Topẽ vỹ ã to vĩ kónãn ke tũ nĩ gé.
23389	MAT 7:4	Kỹ ã hã ne tóg ã régre mỹ, fi mỹ: “ã jykre kórég kurynh jé sóg ke mũ,” he tĩ', ã tỹ ã jykre pãno ẽn kurynh jãvãnh ra'.
23390	MAT 7:5	Ke tũg nĩ. Ke tũ nĩ mũ ra ã tóg jykre régre nĩ. Kỹ ã jykre kurynh vén nĩ. Kar kỹ ã tóg sir ã régre jykre kurynh há han ke mũ,” he tóg.
23391	MAT 7:6	“Hã ra kasor jykre ri ke ag mỹ Topẽ jykre sĩnvĩ ẽn tó tũg nĩ. Porko jykre ri ke ẽn ag mỹ ke gé, fag mỹ ke gé. Jykre kavéj ag nỹtĩ, hã kỹ ag tóg, Topẽ jykre to é henh ke mũ. Tỹ tũ' he sór ag tóg tĩ, ti sãn kỹ, kar kỹ ag tóg sir, ã to jũ sór mũ gé, ha vem nĩ, ã tỹ ag mỹ Topẽ jykre sĩnvĩ tó ja hã ra,” he tóg, Jesus ti.
23392	MAT 7:7	“Topẽ mỹ nén kar to vĩm nĩ, kỹ tóg ãjag mỹ han ke mũ. Ãjag tỹ ti mỹ nén ũ to vĩ mũ ẽn jãvãnh nĩ, kỹ ãjag tóg venh ke mũ. Ti mré vĩ kỹ ẽg tỹ ti jãnkã tỹ tórón tórón ke ẽn ri ke han nĩ. Kỹ tóg ãjag mỹ nón ri ke han mũ sir, ti tỹ ãjag mỹ ãjag tỹ nén to vĩ mũ ẽn han kỹ.
23393	MAT 7:8	Hỹ, hã vẽ. Ãjag tỹ ti mỹ nén ũ to vĩn kỹ tóg, ãjag mỹ han mũ sir. Ãjag tỹ jãvãnh kỹ ãjag tóg, venh ke mũ sir,” he tóg.
23394	MAT 7:9	“Kejẽn ãjag kósin tóg: “isỹ ẽmĩ konh há tóg tĩ,” he mũ. Kỹ ãjag pijé, ti mỹ pó nĩm ke mũ'.
23395	MAT 7:10	Ti tỹ ãjag mỹ: “isỹ pirã konh há tóg tĩ,” hen kỹ ãjag pijé ti mỹ pỹn nĩm ke mũ'.
23396	MAT 7:11	Jykre pãno ãjag nỹtĩ. Ge ra ãjag tóg ãjag krẽ mỹ nén ũ há vin tĩ. Ge ti nĩ gé, ãjag tỹ Topẽ mỹ nén ũ to vĩn kỹ. Nén ũ há tãvĩ hã vin jé tóg ke mũ. Hã ra tóg ãjag kãfór han tĩ, ẽg jóg tỹ kanhkã tá nĩ ẽn ti,” he tóg, Jesus ti.
23397	MAT 7:12	“Ãjag tỹ ũ to: “ti tỹ inh mỹ tag han ra tóg há tĩ vẽ,” hen kỹ inhhã ti mỹ han nĩ, fi mỹ ke gé. Moisés tỹ ẽg jyvẽn hã vẽ, Topẽ vĩ tó tĩ ag tỹ ẽg jyvẽn hã vẽ,” he tóg, Jesus ti.
23398	MAT 7:13	“Ũ tỹ inh ki rã mũ vỹ, jãnkã sĩ fĩn rãm sór ri ke nĩ. Fĩn rãm jé ẽg tóg, vãsãn tĩ. Jãnkã mág vỹ nĩ gé. Fĩn rãm há ti nĩ, ti mág nĩn kỹ. Hã kỹ ũ tỹ hẽn ri ke ag vỹ fĩn rãm tĩ. Hã ra ũ tỹ fĩn rãm mũ ẽn ag vỹ, kãgter pẽ han ke mũ, nũgme ki vár kỹ.
23399	MAT 7:14	Ag jãvo jãnkã sĩ ẽn fĩn rãm sórm nĩ, ãjag tỹ rĩr krỹg ja tũ ve jé. Ti sĩ nĩn kỹ tóg fĩn rãm jagy nĩ, hã kỹ ũn pipir ag hã vỹ jãnkã sĩ fĩn rãm ke mũ,” he tóg, Jesus ti.
23400	MAT 7:15	“Ón kỹ Topẽ vĩ tó tĩ ẽn ag vĩ kri nĩm tũg nĩ. Há nỹtĩ ve ag tóg nĩ, hã ra ag tóg, ãjag kókén sór nỹtĩ. Ãjag kókén sór to ag tóg, mĩg jũ ẽn ri ke nỹtĩ, mỹr, ha mẽ.
23405	MAT 7:20	Ge ag nỹtĩ, ón kỹ Topẽ vĩ tó tĩ ag. Ag tỹ Topẽ vĩ mranh mũ ra ag tóg, ón kỹ Topẽ vĩ tó tĩ. Ag tỹ nén han mũ ki ẽg tóg, ag jykre kórég vég mũ, fag ke gé“ he tóg, Jesus ti.
23406	MAT 7:21	“Vẽnh kar tóg iso: “pã'i vẽ, pã'i vẽ,” he tĩ. Hã ra ũ ag tóg, Topẽ tỹ nén tó mũ ẽn han tũ nĩgtĩ. Hã kỹ ag tóg, Topẽ tỹ tỹ ẽg pã'i mág nĩ venh ke tũ nĩ. Ũ tỹ inh jóg vĩ han mũ ẽn ag hã vỹ, Topẽ tỹ tỹ ẽg pã'i mág nĩ venh ke mũ, fag ke gé.
23407	MAT 7:22	Kurã tỹ ẽgno kã, isỹ vẽnh kar jykre tugnỹm ke kurã ẽn kã ag tóg, inh mỹ: “Senhor, Senhor, ã jykre tó ẽg mỹr,” henh ke mũ. “Ã jykre hã ki ẽkrén kỹ ẽg tóg, ẽg tỹ nén han vãnh han ja nĩgtĩ mỹr. Ã jykre hã tỹ ẽg tóg, vẽjagrẽ kórég pan mỹr,” he jé ag tóg ke mũ, inh mỹ.
23408	MAT 7:23	Hã ra sóg ag mỹ: ãjag pijé tỹ, inh mré ke nỹtĩ', henh ke mũ. Ãjag ki kagtĩg sóg nĩ mỹr. Ha mũ jẽg. Jykre kórég ãjag tóg nỹtĩ, he jé sóg ke mũ, ũ tỹ inh panh vĩ han jãvãnh ẽn ag mỹ, fag mỹ ke gé,” he tóg, Jesus ti.
23409	MAT 7:24	“Ha mẽ, inh vĩ mẽg ãjag tóg nỹtĩ,” he tóg. “Ãjag tỹ inh vĩ ki króm kỹ ãjag tóg sir tỹ, ũn jykre há ri ke nỹtĩ. Ðn han ken kỹ tóg, to jykrén mũ. To jykrén há han kỹ tóg, ga kũm kỹ pãró kri ĩn nũna ka fẽg mũ sir.
23412	MAT 7:27	Kejẽn ta tóg kutẽ mũ, kỹ goj vỹ var mũ sir. Kóho jũ vỹ kãtĩ mũ gé, ĩn to, kỹ ĩn tóg vom ke tére kỹ kutẽ mũ sir. Mráj kãn tóg mũ sir, ĩn ti. Ge ti nĩ, ãjag tỹ inh vĩ kri fig tũ nĩn kỹ,” he tóg, Jesus ti.
23416	MAT 8:2	Kỹ vãhã ũ tóg ti tá jun mũ. Vẽnh kaga kren vãnh han kỹ tóg nĩ, vẽnh kaga tỹ lepra he mũ ẽn. Kỹ tóg ti krẽm grĩnh ke kỹ ti mỹ: “Senhor,” he mũ. “Ã mỹ isỹ há' he sór tũ'? Ã hã tóg isỹ há henh ke mũ, ã tỹ isỹ há' he sór kỹ,” he tóg ti mỹ.
23417	MAT 8:3	Kỹ Jesus tóg ti mỹ: “he,” he mũ. “Há' he ja há ã tóg nĩ,” he tóg ti mỹ. Kỹ tóg ti kaga kren vãnh ẽn tỹ há' he mũ vẽsỹmér. Jãnhkri' he tóg mũ, ti fár ti.
23418	MAT 8:4	Kỹ Jesus tóg ti mỹ: “ker ũ mỹ tó hẽ',” he mũ. “Ha tĩg. Topẽ tũ ki rĩr tĩ hã mỹ tóm nĩ. Kỹ Topẽ mỹ Moisés tỹ vãsỹ ẽg mỹ nén tó ja ẽn nĩm nĩ. Hã tugrĩn vẽnh kar vỹ ã tỹ há' he mũ tag ki kanhrãn mũ,” he tóg ti mỹ. Kỹ tóg tĩ mũ sir.
23420	MAT 8:6	Kỹ tóg ti mỹ: “Senhor,” he mũ. “Inh camarada tóg nỹ nĩ, inh ĩn tá. Kãnhgrĩn kãn kỹ tóg nỹ, hã ra tóg kaga jagy nỹ gé,” he tóg.
23421	MAT 8:7	Kỹ tóg ti mỹ: “kỹ inh hỹn ã mré ti venh tĩg mũ ha, sỹ ã mỹ ti tỹ há' he jé,” he mũ.
23422	MAT 8:8	Hã ra tóg: “ã mỹn hỹn jagy nĩ, ã tỹ inh ĩn kã ki sãn ke ti, isỹ tỹ fóg nĩn kỹ,” he mũ. “Ã vĩ pir ki tóg há' henh mũ. Ã vĩ hã tỹ ã tóg ti tỹ há' henh ke mũ,” he tóg.
23423	MAT 8:9	“Ha vé, tỹ sóg pã'i krẽm ke nĩ gé, kỹ soldado ag tóg tỹ inh krẽm ke nỹtĩ gé. Hã kỹ sóg pã'i jykre ki kanhró nĩ. Isỹ soldado ũ mỹ: kutĩg, hen kỹ tóg tĩ mũ. Sỹ ti mỹ: kunĩg, hen kỹ tóg kãtĩ mũ gé. Isỹ inh camarada mỹ: tag han ra, hen kỹ tóg han tĩ. Inh vĩ tỹ sóg ag jẽgnẽg tĩ. Ã vĩ hã tỹ ã tóg ti tỹ há' henh ke mũ,” he tóg.
23424	MAT 8:10	Kỹ tóg ti mỹ e tĩ. Kỹ tóg ti mré mũ ag mỹ: “ha mẽ, Israel ag vỹ ti ri ke tũ nỹtĩ,” he mũ. “Ki kanhró tóg nĩ mỹr, kỹ tóg inh ki rã kỹ jẽ. Ge ve ja tũ sóg nĩ,” he tóg.
23425	MAT 8:11	“Ha vé, ũ tỹ hẽn ri ke ag vỹ kãmũnh ke mũ, rã jur ja tá, rã pur ja tá ke gé. Abraão mré ag tóg ũ tỹ kanhkã tá nĩ ẽn tỹ tỹ ẽg pã'i nĩ venh ke mũ, Isaque mré, Jacó mré ke gé. Topẽ tóg ag ki rĩr ke mũ.
23426	MAT 8:12	Ag jãvo Israel krẽ'krẽ ag tóg, kuty ki vár ke mũ. Ag tỹ ũ tỹ kanhkã tá nĩ ẽn tỹ tỹ ẽg pã'i nĩ venh ke vẽ vẽ, hã ra ag tóg venh ke tũ nĩ. Kỹ ag tóg vẽsỹrénh ke mũ, ag jã tỹ ag tóg gángán kenh mũ, vẽso jũn kỹ, fag ke gé,” he tóg, Jesus ti.
23427	MAT 8:13	Kỹ tóg capitão mỹ: “Inh ki rã kỹ ã tóg jẽ nĩ,” he mũ. “Hã kỹ ã tóg venh ke mũ sir. Ã camarada tỹ inh hur há' hé,” he tóg. Kỹ tóg tĩ mũ sir. Jesus tỹ ti mỹ tó mũ ẽn hã kã tóg há' he ja nĩ.
23431	MAT 8:17	Hã ra tag tóg rán kỹ nĩ gé. Vãsỹ Topẽ vĩ tó tĩ tỹ Isaías vỹ tag rán ja nĩ, ha mẽ: “ẽg kaga nỹtĩn kỹ tóg ẽg tỹ há' há' he tĩ, ti tỹ ẽg jagfy jagtar tugrĩn,” he ja tóg nĩ.
23432	MAT 8:18	Kejẽn ag tóg, Jesus pénĩn e nỹtĩ, fag ke gé, hã kỹ tóg ti mré mũ tĩ ag mỹ: “mũ jé ha,” he mũ. “Goj kafã ũ ra ẽg tóg mũnh mũ,” he tóg.
23433	MAT 8:19	Ag mũnh ke to hã Topẽ vĩ to ẽg kanhrãn tĩ ũ tóg, ti mré vĩnh kãtĩ mũ. “Senhor,” he tóg. “Sỹ ã mré tĩg há tóg tĩ. Ã tỹ hẽ ra tĩg kỹ sóg, ã mré tĩg mũ,” he tóg.
23434	MAT 8:20	Hã ra Jesus tóg ti mỹ: “hã ra tóg jagy tĩ,” he mũ. “Ðn tũ sóg nĩ. Mĩg vỹ kré nỹgtĩ. Sẽsĩ vỹ jagfe nỹgtĩ gé. Ag jãvo isỹ hẽ tá nũr ke tóg tũ tĩ. Tỹ sóg ẽprã ke fi kósin nĩ,” he tóg.
23435	MAT 8:21	Kỹ Jesus mré tĩ ũ tóg ti mỹ: “ã mré sóg tĩ sór mũ, hã ra sóg ver inh panh ter kỹ ga ki ti fón sór mũ,” he mũ gé.
23436	MAT 8:22	Kỹ tóg ti mỹ: “vó,” he mũ. “Ti kénh tĩ tũg,” he tóg. “Inh mré kãtĩg. Inh ki ge tũ ag vỹ ã panh kej han mũnh mũ,” he tóg.
23439	MAT 8:25	Kỹ ag tóg ti rĩn kỹ ti mỹ: “Senhor, ẽg krenkren han nĩ, ẽg kãgter ha mẽ tóg tĩ,” he mũ.
23440	MAT 8:26	Kỹ tóg ag mỹ: “ãjag tỹ nejé mũmẽgmẽg nẽ? Ãjag mỹ inh ki ge há han tũ'?“ he mũ. Kỹ tóg nĩ mũ sir, jẽgnẽ kỹ tóg goj mỹ vĩ mũ, kóho mỹ. Kỹ tóg tũ' he mũ sir. Katy' he tóg mũ, katy tãvĩ tóg tĩ mỹr, ha mẽ.
23441	MAT 8:27	Kỹ tóg vẽnh kar mỹ e tĩ gé. “Ti jykre tóg ẽg mỹ e tĩ,” he ag tóg mũ. “Kóho tóg ti vĩ han mũ, goj ti ke gé,” he ag tóg, fag ke gé.
23443	MAT 8:29	Jesus kato ag tóg kãmũ mũ. Ti ve kỹ ag tóg prẽnprẽr mũ sir, ha mẽ. “!..Ã hỹn ẽg tỹ hẽ ri kenh mũ, Topẽ kósin'..!“ he ag tóg mũ. “!..Ã mỹ ẽg vóg kónãn sór mũ ha, ẽg kurã to hã..!“ he ag tóg.
23445	MAT 8:31	Kỹ Nén-Kórég ag tóg Jesus mỹ: “ã tỹ ẽg pan kỹ tóg ã tỹ porko to ẽg jẽgnẽnh há tĩ,” he mũ.
23446	MAT 8:32	Kỹ tóg ag mỹ: “he,” he mũ. Kỹ ag tóg porko ag ki ge mũ, Nén-Kórég ag. Kỹ vãhã porko ag tóg, rán ki re kãn mũ sir, goj nig mág ki ag tóg vár mũ. Nãgnãr kãn ag tóg mũ sir, tũ' he ag tóg mũ sir, mỹr, ha mẽ.
23450	MAT 9:2	Ti tỹ ti jamã tá jun kỹ ag tóg vãhã, ti mỹ ũn kãnhgrĩ vyn kỹ junjun mũ. Kỹmỹ kri tóg nỹ nĩ. Kỹ Jesus tóg, ag tỹ ti ki ge kỹ nỹtĩ vég mũ sir. Hã kỹ tóg ũn kãnhgrĩ ẽn mỹ: “inh kósin',” he mũ. “Ã fe tỹ há' hé. Ã tỹ Topẽ vĩ mranh ja ẽn tỹ tũ' hen hã vẽ ha,” he tóg.
23451	MAT 9:3	Hã ra Topẽ vĩ to ẽg kanhrãn tĩ ag vỹ tá nỹtĩ gé. Ti vĩ mẽ kỹ ag tóg: “Topẽ to vĩ kónãn tóg mũ mỹr. Vẽsỹ tóg Topẽ han mũ mỹr,” he mũ. Kỹ ti jykre tóg ag mỹ tỹ ũ nỹ.
23452	MAT 9:4	Hã ra Jesus tóg, ag tỹ nén to jykrén mũ ki kanhró nĩ. Kỹ tóg ag mỹ: “ãjag ne tóg iso jykrén kónãn mũ',” he mũ.
23453	MAT 9:5	“Ũ tĩg vãnh tag mỹ sóg: ã tỹ Topẽ vĩ mranh ja tỹ tũ' hen vẽ ha,” he mũ. “Sỹ ti mỹ: nĩ ra, tĩg ra, henh ke vẽ gé. Hã ran mỹ ãjag mỹ vẽnh mỹ?” he tóg.
23454	MAT 9:6	“Isỹ ãjag mỹ inh jykre ven sór vẽ. Tỹ sóg ẽprã ke fi kósin nĩ. Tá sóg krỹg ke mũ, Topẽ vĩ mranh tỹ vẽnh pãte fón ke tá. Hã kỹ sóg ũn kãnhgrĩ mỹ: nĩ ra, jẽg ra, ã kur gé tĩg, ã ĩn ra, he mũ,” he tóg.
23457	MAT 9:9	Kỹ Jesus tóg ti jamã tá kã kutẽ kỹ tĩ mũ sir. Kỹ tóg Mateus vég mũ. Governo mỹ tóg jãnkamy mãg tĩ, imposto kaja ti, kỹ tóg ti rãnhrãj han nĩ nĩ. Kỹ tóg ti mỹ: “inh mré kãtĩg,” he mũ. Kỹ tóg jẽgnẽ kỹ ti mré tĩ mũ sir.
23459	MAT 9:11	Kỹ pã'i ag tóg vég mũ. Kỹ ag tóg ti mré mũ tĩ ag mỹ: “ãjag pã'i ne tóg ũn jykre pãno ag mré jẽg mũ',” he mũ.
23460	MAT 9:12	Hã ra Jesus tóg mẽg mũ. Kỹ tóg ag mỹ: “ũn kagyga tũ ag vỹ médico venh mũ tũ nĩgtĩ,” he mũ. “Hã ra ũn kagyga ag hã vỹ ti venh mũ tĩ,” he tóg.
23461	MAT 9:13	“Ha vé, Topẽ vĩ tag to jykrén, ha mẽ. “Ãjag tỹ jagnẽ jagãgtãn kỹ tóg, inh mỹ há tĩ inhhã. Ãjag tỹ inh mỹ nén ũ pũn kãfór tóg nĩ,” he tóg. Hã kỹ jagnẽ jagãgtãn nĩ, jagnẽ to vĩ tũg nĩ,” he tóg. “Inh pijé, ũ tỹ vẽjykre kuryj han mũ ag mỹ: ãjag jykre tovãnh nĩ, he sór tĩ'. Ũ tỹ Topẽ vĩ mranh tĩ ẽn ag hã mỹ sóg: ãjag jykre kórég tovãnh nĩ, he sór tĩ,” he tóg, Jesus ti.
23462	MAT 9:14	Kỹ João Batista mré mũ tĩ ag tóg, Jesus tá junjun kỹ ti mỹ: “ẽg hã ne tóg vãkrég tĩ', Fariseu mré ke ag ke gé. Ẽg jãvo ã mré mũ tĩ ag tóg vãkrég tũ nĩgtĩ. Hẽ ri ken kỹ?“ he ag tóg.
23463	MAT 9:15	Kỹ tóg ag mỹ: “hỹ,” he mũ. “Vẽnh kyprũg venh kãmũ mũ ag pijé vãkrég tĩ',” he tóg. “Fénhta vẽ mỹr, kỹ ũn prũg mũ ẽn mré ke ag tóg ti venh kãmũ tĩ. Hã ra sóg, ũn prũg mũ ẽn ri ke nĩ, hã kỹ tóg inh mré mũ tĩ ag mỹ sér tĩ ver,” he tóg. “Vãhã tóg jun, inh kurã ti, ag tỹ inh pére mũnh ke ti. Ẽn kã hã ag tóg vãkrenh ke mũ,” he tóg.
23464	MAT 9:16	“Ẽg pijé kur tãg tỹ kur si jar kã nĩm tĩ'. Ke tũ nĩ mũ ra tóg jagnẽ ki par tũ nĩnh mũ. Kỹ tóg kórég nĩ sir,” he tóg. Ti tỹ ti jykre tãg tón hã vẽ.
23465	MAT 9:17	Kỹ tóg ag mỹ: “kỹ vinho vỹ ge nĩgtĩ gé,” he mũ gé. “Ẽg pijé uva me kajãg mũ tỹ nén ũ fár tỹ sako há si ki kujẽg tĩ'. Ke tũ nĩ mũ ra tóg, kunãnh kỹ jaran kenh mũ. Kỹ vinho ẽn tóg tũ' henh mũ, sako ke gé. Vinho kajãg mũ tỹ nén ũ fár tãg ki kujẽn ke vẽ mỹr',” he tóg. Ti tỹ ti jykre tãg tón hã vẽ gé.
23466	MAT 9:18	Ti tỹ ver ag mré vẽmén nĩ ra pã'i ũ tóg, ti tá jun mũ, ha mẽ. Ti krẽm grĩnh ke kỹ tóg ti mỹ: “inh kósin fi vỹ krónh ke nỹ ha. Ã nĩgé tỹ fi mẽnh kãtĩg, kỹ fi fe tóg mrin kenh ke mũ, ha vem nĩ,” he mũ.
23469	MAT 9:21	Ẽn fi vỹ: “sỹ ti kur mẽ kỹ inh hỹn hẽn ri ke mũn há' henh mũ,” he mũ, to jykrén kỹ. Kỹ fi tóg ti kur tóv mẽg mũ sir.
23470	MAT 9:22	Hã ra Jesus tóg vĩrĩn ke kỹ fi vég mũ. Kỹ tóg fi mỹ: “inh kósin',” he mũ. “Kamẽg tũg nĩ. Ã tỹ inh ki rã kỹ ã tóg há' henh ke mũ,” he tóg. Kỹ fi tóg há' he mũ sir vẽsỹmér, ha mẽ.
23472	MAT 9:24	Kỹ Jesus tóg fag mỹ: “ha mũjẽg,” he mũ. “ter tũ fi nĩ. Nũr fi nỹ nĩ,” he tóg. Hã ra fag tóg ti nyg mũ.
23475	MAT 9:27	Kỹ Jesus tóg ĩn ẽn tá kãkutẽ mũ sir. Hã ra ũn kyvó régre ag tóg, ti nón mũ mũ. Kỹ ag tóg ti jé prẽr kỹ ti mỹ: “!..Davi krẽ'krẽ'..! !..Ẽg jagãgtãn ra..!“ he mũ, prẽnprẽr kỹ.
23476	MAT 9:28	Kỹ Jesus tóg ĩn ũ kã ra rã mũ sir. Kỹ ũn kyvó ẽn ag tóg ti nón ge mũ gé sir. Kỹ tóg ag mỹ: “inh mỹ ãjag tỹ há' henh mũ'?“ he mũ. Kỹ ag tóg ti mỹ: “hỹ,” he mũ.
23477	MAT 9:29	Kỹ tóg ag kanẽ mẽgmẽg mũ sir, ti nĩgé tỹ. Kỹ tóg ag mỹ: “ãjag tỹ inh ki ge kỹ nỹtĩn kỹ ãjag tóg há' henh mũ,” he mũ.
23478	MAT 9:30	Kỹ ag kanẽ tóg há' he mũ sir. Ẽvãnh há' he ag tóg mũ sir. Kỹ tóg ag mỹ vĩ tar han kỹ: “ker ũ mỹ tó hẽ',” he mũ.
23481	MAT 9:33	Kỹ Jesus tóg, ti jagrẽ kórég kutẽm mũ sir. Kỹ tóg vĩ há' he mũ sir. Kỹ tóg vẽnh kar mỹ e tĩ. “Ge ve ja tũ ẽg tóg nỹtĩ, ẽg povo kar kãmĩ,” he ag tóg mũ.
23482	MAT 9:34	Hã ra pã'i ag tóg mẽg mũ. Kỹ ag tóg ón kỹ Jesus to vĩ kónãn mũ. “Vẽjagrẽ kórég pan há tóg nĩgtĩ. Hã ra tóg vẽjagrẽ kórég ag pã'i jykre tỹ ag pan tĩ, ti tỹ tỹ Japo mré ke nĩn kỹ,” he ag tóg, ón kỹ.
23485	MAT 9:37	Kỹ tóg ti mré mũ tĩ ag mỹ: “sỹ ag ve kỹ sóg ẽg jakré mĩ ẽkrég tĩ,” he mũ. “Ti éhé nỹn kỹ ẽg tóg kejẽn kre kãn tũ nĩgtĩ, ẽg pir nỹtĩn kỹ. Ge ti nĩgtĩ. Ũn e ag tóg inh ki ge sór mũ, hã ra ũ tỹ ag mỹ tónh ke tóg tũ tĩ,” he tóg.
23486	MAT 9:38	“Hã kỹ Topẽ mré vĩ, ti tỹ ũ jẽgnẽ jé, ag tỹ ag mỹ ti vĩ tó jé,” he tóg, Jesus ti, ti mré mũ tĩ ag mỹ.
23491	MAT 10:5	Ũ tỹ 12 ẽn ag jẽgnẽg tóg mũ sir, Jesus ti, ag tỹ vẽnh kar mỹ Topẽ vĩ kãmén jé. Kỹ tóg ag mỹ: “ver fóg ag mỹ inh kãmén mũ tũg nĩ, kanhgág ag mỹ kãmén tũg nĩ gé ver,” he mũ. “Kỹ Samaria tá ke ag jamã ki ge tũg nĩ gé,” he tóg.
23492	MAT 10:6	“Israel ag tãvĩ mỹ tóm nĩ ver. Topẽ mỹ ag tóg tỹ carneiro vãgfor mũ ri ke nỹtĩ, kỹ ag hã mỹ tóm nĩ ver,” he tóg.
23493	MAT 10:7	“Ũ tỹ kanhkã tá nĩ ẽn tỹ tỹ ẽg pã'i nĩnh ke vẽ, ũri,” hem nĩ, ag mỹ.
23494	MAT 10:8	Ũn kaga ag tỹ há' hem nĩ. Ũn kãgter mũ ag rĩnrĩn mãn nĩ gé. Ũn kaga kren vãnh ẽn kren han nĩ. Vẽjagrẽ kórég pan nĩ gé. Ãjag mỹ sóg ge ra inh jykre nĩm mũ, hã kỹ ag mỹ: “inh mỹ kajãm,” he tũg nĩ.
23496	MAT 10:10	Kỹ sako ma mũ tũg nĩ gé, bolsa ẽn. Kur tỹ vẽnh kri rĩnh tũg nĩ, pẽn né ũ gé mũ tũg nĩ gé, pẽn to ró ẽn. Kỹ vãtó va mũ tũg nĩ gé, kãtó ti. Inh rãnhrãj han ãjag tóg mũ. Kỹ ag tóg to ãjag jẽn ke mũ, vẽnh kato, ha vem nĩ,” he tóg.
23497	MAT 10:11	“Kỹ ãjag tóg kejẽn, ẽmã ũ tá junjun ke mũ. Tá ũn jykre há jãvãnh nĩ. Kỹ ẽn ĩn ra gem nĩ. Ẽn ĩn krẽm ãjag tỹ kurã ki kã panh ke mũ ẽn tá krỹg nĩ.
23498	MAT 10:12	Kỹ ĩn ẽn krẽm nỹtĩ fag mỹ: “Topẽ jé ãjag ki rĩr há han, kỹ ãjag jé krĩ kuprã nỹtĩ nĩ,” hem nĩ.
23500	MAT 10:14	Kejẽn ũ tóg ãjag mỹ: “kãge jẽg ra” henh ke tũ nĩ, ẽmã ũ tá. Kỹ tá kãpam nĩ, ag tỹ ãjag vĩ mẽ jãvãnh nỹtĩn kỹ. Tá kãpa kỹ ãjag pẽn hã kykũnh nĩ. Kỹ ag tóg Topẽ tỹ ag to kórég nĩ ki kanhrãn mũ.
23501	MAT 10:15	Ha mẽ, ki hã sóg tó mũ. Kurã tỹ ẽgno kã, isỹ vẽnh kar jykre tugnỹm ke kurã ẽn kã ag tóg, jagtar nỹtĩnh mũ sir, ag tỹ ãjag vĩ mẽ jãvãnh nỹtĩn kỹ. Ẽmã tỹ Sodoma mré ẽmã tỹ Gomorra tá ke ag tóg jykre pãno nỹtĩ ja nĩgtĩ. Kỹ ag tóg jagtar nỹtĩnh ke mũ gé. Hã ra ũn tỹ ãjag vĩ jẽmẽ jãvãnh ẽn ag tóg ag jagtar kãfór han ke mũ mỹr, ha vem nĩ,” he tóg.
23502	MAT 10:16	“Carneiro vỹ, vẽnh jy nĩgãn ki kagtĩg nỹtĩ, mĩg tỹ ag mãn sór mũ ra. Ri ke ãjag nỹtĩ, hã ra sóg ãjag jẽgnẽnh mũ, ũ tỹ tỹ mĩg ri ke ag to, hã ra Topẽ hã vỹ ãjag jy nĩgãn ke mũ sir. Hã kỹ vẽnh ki rĩr há han nĩ. Pỹn jykre ri ke han nĩ. Vãjig tóg tĩ, kỹ ẽg tóg kãnhmar ti tỹ hẽ ri ke tũ nĩgtĩ. Kỹ sórãg jykre ri ke han nĩ gé. Jũ vãnh pẽ ti nĩ, nén ũ vẽnh mỹ han tũ ti nĩgtĩ.
23506	MAT 10:20	Hã kỹ ãjag tỹ tó tũ vẽ sir. Ẽg jóg kuprĩg tỹ ãjag mỹ tón hã vẽ,” he tóg.
23507	MAT 10:21	“Ũ ag tóg, ag mré pafa mũ fag kãmén ke mũ, pã'i ag mỹ, ag tỹ fag kãgtén jé. Kỹ ũ ag tóg ag krẽ kãmén ke mũ gé. Kỹ ũ ag tóg ag han mũ fag kãmén ke mũ gé, pã'i ag mỹ, ag tỹ fag kãgtén jé, mỹr, ha mẽ.
23508	MAT 10:22	Vẽnh kar vỹ ãjag to jũ kỹ ãjag vóg kónãn sór nỹtĩ, isugrĩn. Hã ra ũ tỹ isovãnh tũ ẽn ag hã vỹ, krenkren ke mũ, kurã tỹ ẽgno ẽn kã,” he tóg.
23509	MAT 10:23	“Ag tỹ ẽmã ũ tá ãjag vóg kónãn kỹ ẽmã ũ ra pétẽm nĩ. Ki hã sóg tó mũ, ha mẽ. Israel ag jamã fĩn rãm kãn ke tũ ãjag tóg nĩ, kurã ẽn kã. Sĩ ti nĩ, ag tỹ ãjag vóg kónãn ke kurã ẽn ti. Kãtĩg jé sóg ke mũ, ag tỹ gen kỹ ãjag vóg mũ ra. Tỹ sóg ẽprã ke fi kósin nĩ, mỹr, ha mẽ.
23511	MAT 10:25	Ũn vẽnh kanhrãn mũ tỹ ũ tỹ ti kanhrãn mũ ri ke nĩn kỹ tóg há tĩ. Ũn camarada tỹ ti patrão ri ke nĩn kỹ tóg há tĩ gé. Iso ag tóg: Belzebu, he ja nĩgtĩ, inh kato vãsãnsãn mũ ag, hã vỹ: Japo, he mũ. Tỹ sóg ũ tỹ ãjag kanhrãn mũ ri ke nĩ, ãjag patrão ri ke. Ag tỹ iso: Japo, hen kỹ ag tóg ãjag to vĩ kónãn mũ gé, ha vem nĩ, ãjag tỹ inh jykre hã han ti kỹ,” he tóg, Jesus ti.
23512	MAT 10:26	“Ge ra ag kamẽg tũg nĩ, pã'i ag. Ẽg tỹ vẽnh péju kỹ nén han mũ tóg vẽnh ven kãn ke mũ. Ẽg tỹ vẽnh kar vatánh tá nén to jykrén mũ tóg vẽnh ven kãn ke mũ gé.
23517	MAT 10:31	Hã kỹ pã'i ag kamẽg tũg nĩ. Sẽsĩ kãfór ãjag tóg nỹtĩ, Topẽ mỹ. Ãjag kã mĩ ũn pir tóg sẽsĩ e kãfór nĩ, ti mỹ,” he tóg, Jesus ti.
23518	MAT 10:32	“Hã kỹ inh kãmén nĩ, ẽprã ke ag mỹ. Ag kamẽg tũg nĩ. Kỹ sóg inh jóg tỹ kanhkã tá nĩ ẽn mỹ ãjag kãmén ke mũ gé, kurã ẽn kã.
23519	MAT 10:33	Ãjag tỹ hã ra inh kãmén tũ nĩn kỹ sóg inh jóg tỹ kanhkã tá nĩ ẽn mỹ ãjag kãmén ke tũ nĩ gé, kurã ẽn kã, ãjag tỹ iso: “ti ki kagtĩg sóg nĩ, hen kỹ,” he tóg, Jesus ti.
23520	MAT 10:34	“Ãjag hỹn iso: vẽnh kar tỹ jagnẽ to há han jé tóg ke mũ, he tĩ. Hã tũ vẽ. Ũ tỹ hẽn ri ke tỹ jagnẽ to jũ han jé sóg ke mũ, ha vem nĩ.
23525	MAT 10:39	Ãjag tỹ iser ri ke han sór tũ nĩn kỹ ãjag tóg nũgme ki vár ke mũ, ãjag tỹ ãjag jykre tovãnh sór tũ nĩn kỹ. Ãjag tỹ isugrĩn kãgter sór kỹ ãjag tóg rĩr krỹg ja tũ ẽn venh ke mũ, ãjag tỹ ãjag jykre tovãnh kỹ,” he tóg, Jesus ti.
23526	MAT 10:40	“Ũ tỹ ãjag mỹ: he, hen kỹ tóg inh mỹ: he, he mũ gé, kỹ tóg inh ki rã mũ sir. Ti tỹ inh ki rã kỹ tóg, ũ tỹ inh jẽnẽg mũ ẽn ki rã mũ gé sir, hã vỹ: Topẽ, he mũ.
23527	MAT 10:41	Ũ tóg Topẽ vĩ tó tĩ ag mỹ: “ha kãrã,” he tĩ, ag tỹ Topẽ vĩ tó tĩ tugrĩn. Ti tỹ ag mỹ vĩ há han kỹ tóg, Topẽ mỹ há tĩ sir. Kỹ tóg kejẽn ti mỹ nén ũ há tónh ke mũ, Topẽ ti. Ũ tóg ũn jykre kuryj ag mỹ: “ha kãrã,” he tĩ gé, ag jykre kuryj nỹtĩ tugrĩn. Ẽn mỹ tóg nén ũ há tónh ke mũ gé, Topẽ ti.
23528	MAT 10:42	Ũ tóg kejẽn ũn sĩ mỹ nén ũ nĩm tĩ, goj hẽn ri ke mũn. Ũn sĩ tỹ inh ki rã kỹ nĩ tugrĩn tóg, ti mỹ nén ũ nĩm tĩ. Ẽn mỹ tóg nén ũ há tónh ke mũ gé, Topẽ ti. Nén ũ há ve jé tóg ke mũ mỹr,” he tóg, Jesus ti.
23531	MAT 11:3	Kỹ tóg Jesus mỹ: “ã hã mỹ'?“ he mũ. “Ẽg tỹ ũn jãvãnh mũ mỹ tỹ ã nĩ'? Topẽ tỹ ũn jẽnẽg mũ hã mỹ tỹ ã nĩ'? Ẽg mỹ ũ jãvãnh mãn ke tũ nĩ ha', ã pãte'?“ he tóg.
23532	MAT 11:4	Kỹ tóg ag mỹ: “ha João mỹ ãjag tỹ nén vég mũ tag ti tó, ha mẽ,” he mũ.
23533	MAT 11:5	“Tag han inh tĩ, ha mẽ: ũn kyvó ag vỹ, isugrĩn ẽvãnh há nỹtĩ. Ũn kãnhgrĩ ag vỹ mũ há nỹtĩ, ũ tỹ vẽnh kaga kren vãnh han mũ ẽn ag krenkren han inh tĩ. Ũn kutu ag vỹ ẽmẽ há nỹtĩ ha, ũn kãgter mũ ag vỹ rĩnrĩr mãn kỹ nỹtĩ. Ũn jagtar ag vỹ Topẽ vĩ mẽg tĩ, ũ tỹ kanhkã tá nĩ ẽn tỹ tỹ ẽg pã'i nĩnh ke to.