23214	MAT 1:1	Jesus Cristo jógjóg ve ag rán hã vẽ. Jesus Cristo vỹ tỹ Davi krẽ'krẽ nĩ, kỹ Davi vỹ tỹ Abraão krẽ'krẽ nĩ.
23215	MAT 1:2	Abraão vỹ Isaque han. Kỹ Isaque vỹ Jacó han. Kỹ Jacó vỹ Judá han, ti mré ke ag ke gé.
23216	MAT 1:3	Kỹ Judá vỹ Peres han. Zera ti kegé, ti prũ tỹ Tamar fi ki. Kỹ Peres vỹ Esrom han. Kỹ Esrom vỹ Arão han.
23217	MAT 1:4	Kỹ Arão vỹ Aminadabe han. Kỹ Aminadabe vỹ Nasom han. Kỹ Nasom vỹ Salmom han.
23218	MAT 1:5	Kỹ Salmom vỹ Boaz han, ti prũ tỹ Raabe fi ki. Kỹ Boaz vỹ Obede han, ti prũ tỹ Rute fi ki. Kỹ Obede vỹ Jessé han.
23219	MAT 1:6	Kỹ Jessé vỹ pã'i mág tỹ Davi ẽn han. Kỹ pã'i mág tỹ Davi vỹ Salomão han, ti prũ tỹ tỹ Urias prũ ja ẽn fi ki.
23220	MAT 1:7	Kỹ Salomão vỹ Roboão han. Kỹ Roboão vỹ Abias han. Kỹ Abias vỹ Asa han.
23221	MAT 1:8	Kỹ Asa vỹ Josafá han. Kỹ Josafá vỹ Jorão han. Kỹ Jorão vỹ Uzias han.
23222	MAT 1:9	Kỹ Uzias vỹ Jotão han. Kỹ Jotão vỹ Acaz han. Kỹ Acaz vỹ Ezequias han.
23223	MAT 1:10	Kỹ Ezequias vỹ Manassés han. Kỹ Manassés vỹ Amom han. Kỹ Amom vỹ Josias han.
23224	MAT 1:11	Kỹ Josias vỹ Jeconias han, ti jãvy ag ke gé. Israel ag tỹ ẽmã tỹ Babilônia ra sigse kỹ mũ mũ ẽn kã tóg ag hynhan.
23225	MAT 1:12	Ag tỹ ẽmã ẽn tá vỹnvỹn ke kar kỹ Jeconias vỹ Salatiel han. Kỹ Salatiel vỹ Zorobabel han.
23226	MAT 1:13	Kỹ Zorobabel vỹ Abiúde han. Kỹ Abiúde vỹ Eliaquim han. Kỹ Eliaquim vỹ Azor han.
23227	MAT 1:14	Kỹ Azor vỹ Sadoque han. Kỹ Sadoque vỹ Aquim han. Kỹ Aquim vỹ Eliúde han.
23228	MAT 1:15	Kỹ Eliúde vỹ Eleazar han. Kỹ Eleazar vỹ Matã han. Kỹ Matã vỹ Jacó han.
23229	MAT 1:16	Kỹ Jacó hã vỹ José han, Maria fi mén ẽn ti. Maria ẽn fi ki Jesus tóg mur ja nĩ, hã vỹ: Cristo, he mũ.
23230	MAT 1:17	Abraão krẽ'krẽ ag tóg 14 (ke) nỹtĩ, Davi mré nĩgkrén kỹ. Kỹ Davi krẽ'krẽ ag tóg 14 (ke) nỹtĩ gé, ag tỹ ag nĩgkrén kỹ, ag tỹ ẽmã tỹ Babilônia ra ag tatĩ mũ mũ ẽn kã. Ag tỹ tá vỹnvỹn ke ẽn kar kỹ ag krẽ'krẽ vỹ 14 (ke) nỹtĩ gé, Cristo mré nĩgkrén kỹ. Cristo jógjóg ve ag hã vẽ.
23231	MAT 1:18	Jesus Cristo mur vỹ ge nĩ, ha mẽ. Ti mỹnh fi vỹ tỹ José prũnh ke fi nĩ. Hã ra fag tóg ver jagnẽ mré nỹ ja tũ nĩgtĩ. Ẽn kã Topẽ kuprĩg tóg fi mỹ gĩr han, hã kỹ fi tóg kufy nĩ ha, fi tỹ ũ mré nỹ tũ ra.
23232	MAT 1:19	Kỹ José tóg mẽg mũ sir, kỹ tóg ti mỹ e tĩ. Ũn jykre kuryj vẽ mỹr, hã kỹ tóg fi mỹ'a han sór tũ nĩ. Kỹ tóg fi pin kỹ fi mỹ: “kỹ inh hỹn ã tỹ prũg ke tũ nĩ ha,” he sór mũ sir.
23233	MAT 1:20	Ti tỹ ver fi tovãnh to jykrén kỹ Topẽ tỹ jẽnẽ jafã tóg ti mỹ vẽnh ven mũ sir, ti vẽnh péti kỹ. Kỹ tóg ti mỹ: “José,” he mũ. “Tỹ ã Davi krẽ'krẽ ag kã ũ nĩ,” he tóg. “Maria fi to jykrén kónãn tũg nĩ. Fi tovãnh sór tũg nĩ. Ũ tũ pijé', Topẽ kuprĩg tỹ fi mỹ gĩr han ja vẽ.
23234	MAT 1:21	Gré ti nỹnh mũ, ha vem nĩ. Kỹ ti mỹ: Jesus, hem nĩ. Ãjag krenkren han jé tóg ke mũ, ãjag tỹ Topẽ vĩ mranh mũ ra,” he tóg.
23235	MAT 1:22	Hã ra Topẽ tóg vãsỹ ti vĩ tó tĩ ũ mỹ:
23236	MAT 1:23	“ũn mén ja tũ fi vỹ kufy nĩnh mũ. Fi tỹ ti ve kỹ ag tóg ti to: Emanuel, henh ke mũ,” he ja nĩ. Emanuel to ken hã vẽ, hã vỹ: Topẽ vỹ ẽg ki rĩr há han ke mũ, he mũ.
23237	MAT 1:24	Kỹ tóg rĩr mũ sir, ti vẽnh péti kar kỹ. kỹ tóg fi mỹ: “ã ki sóg rĩr ke mũ,” he mũ. Ti tỹ Topẽ tỹ jẽnẽ jafã vĩ to jykrén kỹ tóg, ti mỹ ki krov nĩ sir, ti tỹ fi tỹ prũg ke ti.
23238	MAT 1:25	Hã ra tóg ver fi mré nỹ tũ nĩgtĩ. Kejẽn fi tóg fi kósin vég mũ. Kỹ tóg ti jijin kỹ ti mỹ: Jesus, he mũ. Tag pãte tóg vãhã fi mré nỹ mũ sir.
23239	MAT 2:1	Fi tỹ Jesus ve ẽn kã fag tóg ẽmã tỹ Belém tá nỹtĩ, ga tỹ Judéia tá. Ẽn kã Herodes vỹ tỹ pã'i mág nĩ. Kỹ kejẽn ũ ag tóg kuvar há tá kãmũ mũ, rã jur ja tá. Ũn estudo mág ag vẽ, krĩg to ag tóg estudar he mág han tĩ.
23240	MAT 2:2	Ag tỹ Jerusalém tá junjun kỹ ag tóg sir: “ũ tỹ ũri mur mũ tag vỹ tỹ Israel ag pã'i mág nĩnh ke mũ,” he mũ. “Ti kri ẽg krĩg vé, ẽg tỹ ẽg jamã tá nỹtĩn kỹ. Ẽg tỹ ti mỹ nén ũ há gé kãmũ vẽ,” he ag tóg.
23241	MAT 2:3	Pã'i tỹ Herodes tỹ ag vĩ tag mẽ kỹ tóg ti mỹ e tĩ, kỹ tóg krĩ kufy nĩ sir.
23242	MAT 2:4	Kỹ tóg Topẽ tũ to pã'i ag jé prẽr kỹ ag mỹ: “Cristo nẽji hẽ tá mur ke mũ?“ he mũ.
23243	MAT 2:5	Kỹ ag tóg ti mỹ: “Belém tá ke nẽji, ga tỹ Judéia tá,” he mũ. “Topẽ vĩ tó tĩ ũ vỹ vãsỹ ti to tag rán ja nĩgtĩ, ha mẽ:
23244	MAT 2:6	“Sĩ ti nĩ, ẽmã tỹ Belém ti, ga tỹ Judéia tá. Ti sĩ nĩ ra tóg ẽmã mág kar kãfór nĩ, pã'i mág ẽn tỹ tá mur ke tugrĩn. Tỹ tóg ẽg povo kri pã'i mág jẽnh ke mũ,” he ja tóg nĩ,” he ag tóg.
23245	MAT 2:7	Kỹ Herodes tóg vẽnh péju kỹ fóg ẽn ag mỹ: “kurã tỹ hẽ ri ke kã ãjag krĩg ẽn ve vén?“ he mũ. Kỹ ag tóg ti mỹ tó mũ.
23246	MAT 2:8	Kỹ tóg Belém ra ag jẽgnẽg mũ sir. “Vẽnh kar ki ti jẽmẽm nĩ. Ãjag tỹ ti ve kỹ inh mỹ tónh kãmũm nĩ. Kỹ sóg ti venh tĩg ke mũ gé, sỹ ti mỹ nén ũ há nĩm jé,” he tóg.
23247	MAT 2:9	Ag mũ ra ag tóg krĩg ẽn ve mãn mũ gé sir. Ag jo tóg tĩ nĩ. Ag tỹ tá junjun kỹ krĩg ẽn tóg ũn sĩ nĩgja ẽn kri sa nĩ sir. Kỹ ag fe tóg mrin ke mũ sir.
23249	MAT 2:11	Tá ag tóg ũn sĩ vég mũ, ti mỹnh fi ke gé. Kỹ ag tóg ti krẽm grĩnhgrĩnh ke mũ, ti mỹ: “tỹ ã Topẽ kósin nĩ,” he jé. Kỹ ag tóg ti mỹ ag tũ ti vin mũ sir, ouro ti, ka jẽnjo tỹ incenso ti ke gé, kar kỹ ka tỹ mirra jẽnjo ke gé.
23250	MAT 2:12	Hã ra Topẽ tóg, ag vẽnh péti ki ag mỹ: “Herodes mỹ tó tũg nĩ,” he mũ sir. Hã kỹ ag tóg ẽpry ũ jagma mũ kỹ ag jamã ra vỹnvỹn ke mũ sir, rã jur ja ra.
23251	MAT 2:13	Ag mũ kar kỹ José tóg kejẽn Topẽ tỹ jẽnẽ jafã vég mũ, ti vẽnh péti kỹ. Kỹ tóg ti mỹ: “ũn sĩ va tĩg, ga tỹ Egito ra, ti mỹnh fi mré. Herodes vỹ ti tén sór mũ. Kejẽn sóg ã mỹ: ha vỹn ké, henh ke mũ. Egito tá inh vĩ jãvãnh nĩ,” he tóg.
23252	MAT 2:14	Kỹ tóg kuty ẽn hã kã fag tatĩn tĩ mũ sir, vẽnh péju jé.
23253	MAT 2:15	Herodes tỹ kejẽn ter kỹ tóg tá vỹn ke mũ. Hã ra ti tĩg ja tag vỹ rán kỹ nĩ gé, hã vỹ: “ga tỹ Egito ra sóg vẽnh vĩ jẽnẽ, inh kósin tỹ tá vỹn ke jé,” he mũ.
23254	MAT 2:16	Hã ra Herodes tóg fagrĩnh mỹ fóg ẽn ag jãvãnh ja nĩ. Vãhã tóg: “ag tỹ inh mỹ tó tũg hỹn,” he mũ. Kỹ ti fe tóg gỹm ke mũ sir. Kỹ tóg ti porisa ag mỹ: “Belém ra gĩr ag kãgtén mũjẽg, ũn kri prỹg tỹ 2 anos tá krỹg tũ ẽn ag tãvĩ,” he mũ. Ag mỹ tóg 2 anos tó, fóg ag tỹ ti mỹ: “1 ano kãfór ti nĩ ha, ẽg tỹ ti kri krĩg ve ja ti,” hen kỹ.
23255	MAT 2:17	Hã ra tag tóg rán kỹ nĩ gé. Vãsỹ Topẽ vĩ tó tĩ tỹ Jeremias tóg tag rán ja nĩ, ha mẽ:
23256	MAT 2:18	“ẽmã tỹ Ramá tá ẽg tóg vẽnh kygfỹ mẽnh mũ, vẽsỹrénh mág ke gé. Raquel fi krẽ ag vỹ tũ' he kãn, hã kỹ fi tóg vẽsỹrénh mũ,” he ja tóg nĩ.
23257	MAT 2:19	Kejẽn Herodes ẽn vỹ ter mũ sir. Kỹ Topẽ tỹ jẽnẽ jafã vỹ José mỹ vẽnh ven mũ, ti vẽnh péti ki.
23258	MAT 2:20	Kỹ tóg ti mỹ: “ũn sĩ va tĩg, ti mỹnh fi mré, ga tỹ Israel ra. Ũ tỹ ti tén sór mũ ẽn vỹ hur ter,” he mũ.
23259	MAT 2:21	Kỹ fag tóg mũ mũ sir, ũn sĩ ti ke gé.
23260	MAT 2:22	Tá junjun kỹ fag tóg pã'i mág tãg jiji jẽmẽg mũ. Hã ra tóg tỹ Arquelau nĩ. Herodes kósin vẽ. Ti panh ri kén tóg tỹ pã'i mág nĩ, ga tỹ Judéia tá. Kỹ tóg ti kamẽg mũ. Kỹ Topẽ tóg ti vẽnh péti kỹ ti mỹ: “ga tỹ Judéia tá nĩ mãn sór tũg,” he mũ. Kỹ tóg ga tỹ Galiléia ra tĩ mũ sir.
23261	MAT 2:23	Kỹ tóg ẽmã tỹ Nazaré tá ẽmãn mũ. Hã ra tóg rán kỹ nĩ gé: “ti to ag tóg: Nazaré tá ke vẽ, henh ke mũ,” he ja tóg nĩ, Jesus to.
23262	MAT 3:1	Kejẽn João Batista tóg ẽmã tũ ja ra tĩ mũ, ga tỹ Judéia tá ga kórég ẽn ra. Tá jẽ kỹ tóg ag jyvẽn mũ sir.
23263	MAT 3:2	“Ãjag jykre pãno tovãnh nĩ, Topẽ tỹ tỹ ãjag pã'i nĩ jé,” he tóg.
23264	MAT 3:3	Hã ra Isaías tóg tag rán ja nĩ: “ẽmã tũ ja tá tóg jẽnh ke mũ, ga kórég tá. Tá tóg ag mỹ jamã há ra: ”ẽg Senhor kãtĩg ke jo vẽnh jãnhkrigkrig nĩ,” henh ke mũ. “Ẽpry kurég ãjag tóg tĩ, ãjag pã'i mág jun ken kỹ. Kỹ tag ri ke han nĩ. Ãjag jykre pãno tugvãnh nĩ,” he jé tóg ke mũ,” he ja tóg nĩ, Isaías ti. Ti tỹ João mur to hã ti kãmén jan hã vẽ.
23265	MAT 3:4	João ẽn kur tóg tỹ kãvãru pãnĩ sór kyki tỹ há nĩ. Kỹ tóg nén ũ fár hã tỹ vẽsógfĩg tĩ gé. Ópã hã ko ti tĩ, mỹg mré.
23266	MAT 3:5	Kỹ Jerusalém tá ke ag tóg ti tá junjun mũ sir, ga tỹ Judéia tá ke ag ke gé, goj tỹ Jordão tá ke kar ag ke gé.
23267	MAT 3:6	Ti tỹ ag mỹ: “ãjag jykre pãno tovãnh nĩ,” hen kỹ ũ ag tóg: “Topẽ vĩ mranh ja sóg nĩgtĩ,” he mũ. Ẽn ag kygpég tóg mũ sir, goj tỹ Jordão ki.
23268	MAT 3:7	Kỹ pã'i tỹ Fariseu ag vỹ ti tá junjun mũ gé sir, pã'i tỹ Saduceu ag ke gé. Ón kỹ ag tóg ti to kãmũ mũ, ti tỹ ag kygpe jé. Kỹ tóg ag jyvẽn tar han mũ sir. “Pỹn ri ke ãjag nỹtĩ, ãjag jykre pãno nỹtĩn kỹ,” he tóg ag mỹ. “Ũ nỹ ãjag mỹ: Topẽ vỹ ãjag to jũnh ke tũ nĩ, he tĩ'?
23269	MAT 3:8	Ãjag jykre pãno tovãnh nĩ, ti tỹ ãjag to jũ tũ nĩ jé. Vẽjykre há han nĩ, ẽg tỹ ãjag jykre tãg hã ve jé.
23270	MAT 3:9	Hã ra ãjag tóg jagnẽ mỹ: “Abraão vỹ tỹ ẽg jógjóg ve nĩ. Kỹ Topẽ vỹ ẽg to jũnh ke tũ nĩ,” he tĩ. Ke tũ vẽ hã ra. Ãjag jykre kórég ẽn to ãjag tóg jagtar ke mũ, ha vem nĩ. Topẽ vỹ pó tag tỹ Abraão krẽ'krẽ hynhan ki kanhró nĩ, ti tỹ Abraão krẽ'krẽ ũ ve sór kỹ.
23271	MAT 3:10	Ẽg tỹ ka tóg gỹn kỹ tỹ pĩ han ri ke tóg nĩ. Ãjag tỹ vẽjykre há han sór tũ nỹtĩn kỹ Topẽ tóg, pĩ ki ãjag vãm ke mũ,” he tóg.
23272	MAT 3:11	Kỹ tóg vẽnh kar mỹ: “goj hã tỹ sóg ãjag kygpég tĩ, ãjag tỹ ãjag jykre pãno tovãnh kỹ,” he mũ. “Cristo tóg inh nón kãtĩg ke mũ. Kỹ ti hã tóg Topẽ kuprĩg tỹ ãjag jagrẽ han ke mũ. Kỹ tóg tỹ pĩ ve nĩ. Ti tỹ ãjag kygpenh ken hã vẽ. Inh kãfór ti nĩ, jãvo sóg tỹ ti krẽm ke pẽ nĩ,” he tóg.
23273	MAT 3:12	“Ti kãtĩg vỹ ẽg tỹ rãgró rẽn ri ke nĩ. Ti rẽn kar kỹ ẽg tóg ti fár pũn tĩ. Ti kanẽ hã vin han ẽg tóg tĩ. Cristo kãtĩg kỹ tóg ge nĩnh mũ. Ti to há nỹtĩ ag mỹ tóg: “ha kãmũ jẽg,” henh ke mũ. Kỹ tóg ti to há tũ ag vãm ke mũ, pĩ ki, hã ra tóg nhyn kenh ke tũ pẽ nĩ,” he tóg, João ti.
23274	MAT 3:13	Ẽn kã kejẽn Jesus tóg João tá jun mũ gé sir, goj tỹ Jordão tá. Ga tỹ Galiléia tá tóg kãtĩ mũ. Kỹ tóg João mỹ: “ha inh kypé,” he mũ sir.
23275	MAT 3:14	Hã ra tóg João mỹ e tĩ, kỹ tóg ti mỹ: “ã hã tỹ inh kypenh ke vẽ vẽ,” he mũ. “Inh mỹ tóg e tĩ, ã tỹ inh mỹ: ha inh kypé, hen kỹ,” he tóg mũ.
23276	MAT 3:15	Hã ra Jesus tóg ti mỹ: “hỹ,” he mũ. “Hã ra tóg isỹ Topẽ tỹ nén tó mũ han kãn há tĩ,” he tóg. Kỹ tóg vãhã ti kypég mũ sir.
23277	MAT 3:16	Ti tỹ Jesus kype kar kỹ ag tóg, goj kã tá kãpa mũ sir. Kỹ Jesus tóg, kanhkã ki ẽvãnh kỹ ti nor nĩ ẽn vég mũ, ha mẽ, kỹ tóg Topẽ kuprĩg kãtére ẽn vég mũ. Sórãg tẽ ri ke tóg nĩ, ti kãtére ti. Jesus kri tóg góm ke mũ.
23278	MAT 3:17	Kỹ vẽnh vĩ tóg mẽ há tĩ, kanhkã tá, kỹ tóg: “inh kósin pir vẽgtĩ,” he mũ. “Inh fe pẽ vẽgtĩ,” he tóg.
23279	MAT 4:1	Kỹ Topẽ kuprĩg vỹ Jesus mỹ: “ẽmã tũ ja ra tĩg,” he mũ. Kỹ tóg tĩ mũ. Ti tỹ ẽmã tũ ja tá nĩn kỹ Japo vỹ, ti tỹ ti jóg vĩ mranh han sór mũ, hã ra tóg ke jãvãnh nĩ.
23280	MAT 4:2	Kurã tỹ 40 han tóg, ẽmã tũ ja tá nĩ ki. Kỹ tóg jẽg tũ nĩ, kurã tỹ 40 ẽn ki, kuty mré hã. Kỹ tóg, vãhã kókĩr mũ sir, vẽjẽn tũ tĩn kỹ.
23281	MAT 4:3	Kỹ Japo tóg, ti to kãtĩ mũ sir, ũ tỹ ẽg tỹ Topẽ vĩ mranh han sór tĩ ẽn ti. Kỹ tóg ti mỹ: “Topẽ kósin vỹ tỹ ã nĩ,” he mũ. “Hã kỹ pó tag tỹ ẽmĩ han, ã tỹ ko jé,” he tóg ti mỹ.
23282	MAT 4:4	Kỹ tóg ti mỹ: “hã ra tag tóg rán kỹ nĩ, ha mẽ,” he mũ. “Ẽg pijé ẽmĩ tãvĩ jamẽn kỹ rĩnrĩr mũgtĩ'. Topẽ vĩ hã jamẽn kỹ ẽg tóg rĩnrĩr mũgtĩ, he tóg, Topẽ vĩ tỹ rán kỹ nĩ ki. Kỹ tóg isỹ ti vĩ mranh jãvãnh tĩ, ẽmĩ to,” he tóg.
23283	MAT 4:5	Kỹ Japo vỹ ti pére tĩ mũ, ẽmã mág tỹ Jerusalém ẽn ra. Kỹ ag tóg tá Topẽ ĩn kri nỹtĩ nĩ. Hã ra tóg tá kãgnó nĩ, Topẽ ĩn mã tá.
23284	MAT 4:6	Kỹ tóg ti mỹ: “ã hã ne tóg tỹ Topẽ kósin nĩ',” he mũ. “Kỹ kema ki hũm,” he tóg. “Topẽ vĩ ki tag tóg rán kỹ nĩ, hã vỹ: “ti tỹ jẽgnẽ jafã ag mỹ tóg tónh mũ, kỹ ag tóg ã jy nĩgãn ke mũ,” he mũ. “Kỹ ã tóg rỹj ke tũ nĩ. Ã pẽn vỹ rỹj ke tũ nĩ,” he tóg.
23285	MAT 4:7	Kỹ tóg ti mỹ: “hỹ. Kỹ tag vỹ rán kỹ nĩ gé, ha mẽ,” he mũ. “Topẽ mỹ: “ã mỹ ã tỹ nén tó ja ẽn han mũ vỹ?” he tũg nĩ, ti to é he tũg nĩ,” he tóg mũ gé. Hã kỹ sóg ti tỹ inh mỹ nén to: “han ra,” he mũ ẽn hã han tĩ, hã kỹ sóg hũm ke tũ nĩ,” he tóg.
23286	MAT 4:8	Kỹ Japo tóg, ti mré tĩg mãn mũ. Pãnónh téj ra ag tóg mũ mũ sir. Kỹ tóg, ti mỹ ga kar ven kãn mũ, ga kri mũ kar ag ke gé. Ti sĩnvĩ kar ẽn ven kãn tóg ti mỹ.
23287	MAT 4:9	Kỹ tóg ti mỹ: “isũ vẽ, tag kar ti,” he mũ. “Hã ra sóg, ã mỹ tovãnh kãn sór mũ, ã tỹ ã jakrĩ tỹ grĩnh ken kỹ, inh krẽm, inh mỹ: Topẽ vỹ tỹ ã nĩ, he jé,” he tóg.
23288	MAT 4:10	Kỹ tóg ti mỹ: “ha tĩg, Satanás,” he mũ. “Ẽg pã'i tỹ Topẽ hã krẽm ẽg tóg ẽg jakrĩ tỹ grĩnh ke tĩ, ti hã to ẽg tóg: “Topẽ vẽ,” he tĩ, hã kỹ tóg rán kỹ nĩ, Topẽ vĩ tỹ rán kỹ nĩ ki,” he tóg.
23289	MAT 4:11	Kỹ Japo vỹ tóg tĩ mũ sir, ti tovãnh kỹ. Kỹ Topẽ tỹ jẽgnẽ jafã ag tóg ti tá junjun mũ sir, Jesus ki rĩr jé. Ti jóg vĩ mranh ja tũ tóg nĩ.
23290	MAT 4:12	Kejẽn ag tóg João ség mũ sir, kỹ Jesus tóg mẽg mũ. Kỹ tóg ga tỹ Galiléia ra vỹn ke mãn mũ.
23291	MAT 4:13	Ẽmã tỹ Nazaré tá kãkutẽ kỹ tóg, ẽmã tỹ Cafarnaum ra tĩ mũ, tá nĩ jé, goj nig mág ẽn tá, Zebulom ag jamã tá, Naftali ag jamã tá.
23292	MAT 4:14	Hã ra tag tóg rán kỹ nĩ gé. Vãsỹ Topẽ vĩ tó tĩ tỹ Isaías tóg:
23293	MAT 4:15	“Zebulom ag jamã tá ti nĩnh mũ, Naftali ag jamã tá, goj nig mág tá, goj tỹ Jordão mã tá. Fóg ag jamã tá ti nĩnh mũ, Israel tũ ag jamã tá, ũ tỹ Topẽ ki kagtĩg ag jamã tá, goj nig mág tỹ Galiléia fyr ki.
23294	MAT 4:16	Tá ag tóg Topẽ ki kagtĩg nỹtĩ, hã kỹ tóg tá ag kri kuty ri ke nĩ. Ti tỹ tá jun kỹ tóg ag kri kurã ẽn ri ke nĩ. Ag kãgter ke vẽ vẽ, hã ra tóg ag kanhrãn mũ, ag krenkren jé,” he tóg, Topẽ vĩ rán ki.
23295	MAT 4:17	Ga ẽn tá nĩ kỹ tóg, ag mỹ Topẽ vĩ tó mũ, kỹ tóg ag mỹ: “ãjag jykre pãno tovãnh ra,” he mũ, “ãjag tỹ ũri ũ tỹ kanhkã tá nĩ ẽn tỹ tỹ ẽg pã'i nĩ ve jé,” he tóg, Jesus ti.
23296	MAT 4:18	Kỹ tóg kejẽn, goj nig mág tỹ Galiléia ẽn fyr jagma tĩ mũ. Kỹ tóg tá ũn régre ag vég mũ, hã vỹ: Simão Pedro mré ti jãvy tỹ André, he mũ. Kur tỹ pirã kugmĩ jafã tỹ ag tóg, goj kã ki fón mũ. Ag rãnhrãj hã vẽ.
23297	MAT 4:19	Kỹ Jesus tóg ag mỹ: “inh mré kãmũjẽg,” he mũ. “Pirã kugmĩ há ãjag nỹtĩ. Ãjag kanhrãn jé sóg ke mũ, ãjag tỹ ẽprã ke ag tỹ inh ki ge han jé,” he tóg.
23298	MAT 4:20	Kỹ ag tóg vẽsỹmér ti mré mũ mũ, ag tỹ nén tovãnh kỹ.
23299	MAT 4:21	Kỹ ag tóg mũ mũ, goj fyr jagma. Ag mũ sĩ han mũ ra tóg, ũn régre ũ ag ve mãn mũ gé, hã vỹ: Tiago mré ti jãvy tỹ João he mũ. Zebedeu krẽ ag vẽ. Canoa kã ki ag nỹtĩ, kur tỹ pirã kugmĩ jafã ki ag tóg han nỹtĩ nĩ. Ag panh vỹ, ag mré nĩ nĩ. Kỹ Jesus tóg, ag mỹ: “inh mré kãmũjẽg,” he mũ.
23300	MAT 4:22	Kỹ ag tóg vẽsỹmér, ag tỹ nén tovãnh kỹ ti to kãmũ mũ, canoa tovãnh kỹ, ag panh ti tovãnh kỹ ke gé. Jesus mré ag tóg mũ mũ.
23301	MAT 4:23	Kỹ Jesus tóg, ga tỹ Galiléia kar mĩ tĩ mũ sir, ag mré. Judeu ag vẽnh kanhrãn jafã krẽm tóg ag kanhrãn mũ. Ag mỹ tóg Topẽ vĩ sér tó mũ, ũ tỹ kanhkã tá nĩ ẽn tỹ tỹ ẽg pã'i nĩ tĩ. Ũn kagyga kar ag hynhan tóg, fag kar ke gé, gĩr kar ke gé.
23302	MAT 4:24	Hã kỹ ti kãme tóg vẽnh kar kri rũm mũ sir, ga tỹ Síria tá ke kar kri. Kỹ ag tóg sir ũn kagyga ag tatĩ kãmũ mũ, ti to, vẽnh kaga vẽnh mỹ han mũ ag mré hã, kỹ tóg ag tỹ há' he kãn mũ sir. Vẽjagrẽ kórég ag pan kãn tóg mũ gé. Ũ ter tĩ han tĩ ag tỹ tóg há' he mũ gé, ũn kãnhgrĩn kỹ nỹtĩ ag tỹ ke gé, fag kar tỹ ke gé.
23303	MAT 4:25	Hã kỹ ũn tỹ hẽn ri ke ag tóg, ti mré mũ mũ sir. Ũ ag tóg, ga tỹ Galiléia tá kãmũ mũ, kỹ ũ ag tóg, ẽmã tỹ Decápolis tá kãmũ mũ gé, Jerusalém tá ke gé, ga tỹ Judéia tá ke gé, goj tỹ Jordão mã tá ke gé.
23304	MAT 5:1	Ũn e ag tỹ Jesus venh kãmũ kỹ tóg, ag mré krĩ ra tãpry mũ. Tá tóg nĩ mũ, kỹ ti mré mũ tĩ ag tóg, ti mré nĩgnĩ mũ, ti rã hã.
23305	MAT 5:2	Kỹ tóg ag kanhrãn kỹ ag mỹ:
23306	MAT 5:3	“Topẽ vỹ ãjag ve há han mũ, ãjag tỹ: “kórég inh nĩ,” hen kỹ. “Sỹ Topẽ kuprĩg tỹ jagrẽn kỹ nĩ tũ nĩ ra sóg tỹ, ũn kórég nĩnh mũ vẽ,” hem nĩ. Kỹ ãjag tóg, ti tỹ tỹ ẽg pã'i nĩ venh ke mũ, kanhkã tá,” he tóg.
23307	MAT 5:4	“Topẽ vỹ ãjag ve há han mũ, ãjag fỹn kỹ. Kỹ tóg ãjag fỹ ẽn tỹ tũ' henh ke mũ,” he tóg.
23308	MAT 5:5	“Topẽ vỹ ãjag ve há han mũ, ãjag tỹ vẽnh kar mỹ komẽr hã vĩn kỹ. Kỹ ãjag tóg ga kar kri tỹ pã'i nỹtĩnh ke mũ,” he tóg.
23309	MAT 5:6	“Topẽ vỹ ãjag ve há han mũ, ãjag tỹ vẽjykre kuryj ve sór nỹtĩn kỹ, ti tỹ ãjag mỹ ãjag kókĩr ri ke nĩn kỹ. Kỹ ãjag tóg venh ke mũ,” he tóg.
23310	MAT 5:7	“Topẽ vỹ ãjag ve há han mũ, ãjag tỹ jagnẽ jagãgtãn kỹ. Kỹ Topẽ vỹ ãjag jagãgtãn ke mũ gé,” he tóg.
23311	MAT 5:8	“Topẽ vỹ ãjag ve há han mũ, ãjag jãnhkri nỹtĩn kỹ. Kỹ ãjag tóg Topẽ venh mũ,” he tóg.
23312	MAT 5:9	“Topẽ vỹ ãjag ve há han mũ, ãjag tỹ jagnẽ krĩ tỹ kãnhvy' hen kỹ. Kỹ Topẽ tóg ãjag to: “inh krẽ ag vẽ,” henh ke mũ,” he tóg.
23313	MAT 5:10	“Topẽ vỹ ãjag ve há han mũ, ag tỹ vẽjykre kuryj to ãjag vóg kónãn mũ ra. Kỹ ãjag tóg kanhkã tá jun ke mũ,” he tóg.
23314	MAT 5:11	“Topẽ vỹ ãjag ve há han mũ, ag tỹ isugrĩn ãjag mỹ vĩ kónãn mũ ra, ag tỹ ãjag vóg kónãn mũ ra. Ag tỹ ón kỹ ãjag to vĩ vĩ he kỹ tóg há tĩ, ag tỹ ón kỹ: “jykre pãno ag nỹtĩ,” he mũ ra.