23214	MAT 1:1	Jesus Cristo jógjóg ve ag rán hã vẽ. Jesus Cristo vỹ tỹ Davi krẽ'krẽ nĩ, kỹ Davi vỹ tỹ Abraão krẽ'krẽ nĩ.
23219	MAT 1:6	Kỹ Jessé vỹ pã'i mág tỹ Davi ẽn han. Kỹ pã'i mág tỹ Davi vỹ Salomão han, ti prũ tỹ tỹ Urias prũ ja ẽn fi ki.
23230	MAT 1:17	Abraão krẽ'krẽ ag tóg 14 (ke) nỹtĩ, Davi mré nĩgkrén kỹ. Kỹ Davi krẽ'krẽ ag tóg 14 (ke) nỹtĩ gé, ag tỹ ag nĩgkrén kỹ, ag tỹ ẽmã tỹ Babilônia ra ag tatĩ mũ mũ ẽn kã. Ag tỹ tá vỹnvỹn ke ẽn kar kỹ ag krẽ'krẽ vỹ 14 (ke) nỹtĩ gé, Cristo mré nĩgkrén kỹ. Cristo jógjóg ve ag hã vẽ.
23232	MAT 1:19	Kỹ José tóg mẽg mũ sir, kỹ tóg ti mỹ e tĩ. Ũn jykre kuryj vẽ mỹr, hã kỹ tóg fi mỹ'a han sór tũ nĩ. Kỹ tóg fi pin kỹ fi mỹ: “kỹ inh hỹn ã tỹ prũg ke tũ nĩ ha,” he sór mũ sir.
23233	MAT 1:20	Ti tỹ ver fi tovãnh to jykrén kỹ Topẽ tỹ jẽnẽ jafã tóg ti mỹ vẽnh ven mũ sir, ti vẽnh péti kỹ. Kỹ tóg ti mỹ: “José,” he mũ. “Tỹ ã Davi krẽ'krẽ ag kã ũ nĩ,” he tóg. “Maria fi to jykrén kónãn tũg nĩ. Fi tovãnh sór tũg nĩ. Ũ tũ pijé', Topẽ kuprĩg tỹ fi mỹ gĩr han ja vẽ.
23239	MAT 2:1	Fi tỹ Jesus ve ẽn kã fag tóg ẽmã tỹ Belém tá nỹtĩ, ga tỹ Judéia tá. Ẽn kã Herodes vỹ tỹ pã'i mág nĩ. Kỹ kejẽn ũ ag tóg kuvar há tá kãmũ mũ, rã jur ja tá. Ũn estudo mág ag vẽ, krĩg to ag tóg estudar he mág han tĩ.
23240	MAT 2:2	Ag tỹ Jerusalém tá junjun kỹ ag tóg sir: “ũ tỹ ũri mur mũ tag vỹ tỹ Israel ag pã'i mág nĩnh ke mũ,” he mũ. “Ti kri ẽg krĩg vé, ẽg tỹ ẽg jamã tá nỹtĩn kỹ. Ẽg tỹ ti mỹ nén ũ há gé kãmũ vẽ,” he ag tóg.
23241	MAT 2:3	Pã'i tỹ Herodes tỹ ag vĩ tag mẽ kỹ tóg ti mỹ e tĩ, kỹ tóg krĩ kufy nĩ sir.
23242	MAT 2:4	Kỹ tóg Topẽ tũ to pã'i ag jé prẽr kỹ ag mỹ: “Cristo nẽji hẽ tá mur ke mũ?“ he mũ.
23244	MAT 2:6	“Sĩ ti nĩ, ẽmã tỹ Belém ti, ga tỹ Judéia tá. Ti sĩ nĩ ra tóg ẽmã mág kar kãfór nĩ, pã'i mág ẽn tỹ tá mur ke tugrĩn. Tỹ tóg ẽg povo kri pã'i mág jẽnh ke mũ,” he ja tóg nĩ,” he ag tóg.
23260	MAT 2:22	Tá junjun kỹ fag tóg pã'i mág tãg jiji jẽmẽg mũ. Hã ra tóg tỹ Arquelau nĩ. Herodes kósin vẽ. Ti panh ri kén tóg tỹ pã'i mág nĩ, ga tỹ Judéia tá. Kỹ tóg ti kamẽg mũ. Kỹ Topẽ tóg ti vẽnh péti kỹ ti mỹ: “ga tỹ Judéia tá nĩ mãn sór tũg,” he mũ. Kỹ tóg ga tỹ Galiléia ra tĩ mũ sir.
23263	MAT 3:2	“Ãjag jykre pãno tovãnh nĩ, Topẽ tỹ tỹ ãjag pã'i nĩ jé,” he tóg.
23264	MAT 3:3	Hã ra Isaías tóg tag rán ja nĩ: “ẽmã tũ ja tá tóg jẽnh ke mũ, ga kórég tá. Tá tóg ag mỹ jamã há ra: ”ẽg Senhor kãtĩg ke jo vẽnh jãnhkrigkrig nĩ,” henh ke mũ. “Ẽpry kurég ãjag tóg tĩ, ãjag pã'i mág jun ken kỹ. Kỹ tag ri ke han nĩ. Ãjag jykre pãno tugvãnh nĩ,” he jé tóg ke mũ,” he ja tóg nĩ, Isaías ti. Ti tỹ João mur to hã ti kãmén jan hã vẽ.
23268	MAT 3:7	Kỹ pã'i tỹ Fariseu ag vỹ ti tá junjun mũ gé sir, pã'i tỹ Saduceu ag ke gé. Ón kỹ ag tóg ti to kãmũ mũ, ti tỹ ag kygpe jé. Kỹ tóg ag jyvẽn tar han mũ sir. “Pỹn ri ke ãjag nỹtĩ, ãjag jykre pãno nỹtĩn kỹ,” he tóg ag mỹ. “Ũ nỹ ãjag mỹ: Topẽ vỹ ãjag to jũnh ke tũ nĩ, he tĩ'?
23270	MAT 3:9	Hã ra ãjag tóg jagnẽ mỹ: “Abraão vỹ tỹ ẽg jógjóg ve nĩ. Kỹ Topẽ vỹ ẽg to jũnh ke tũ nĩ,” he tĩ. Ke tũ vẽ hã ra. Ãjag jykre kórég ẽn to ãjag tóg jagtar ke mũ, ha vem nĩ. Topẽ vỹ pó tag tỹ Abraão krẽ'krẽ hynhan ki kanhró nĩ, ti tỹ Abraão krẽ'krẽ ũ ve sór kỹ.
23288	MAT 4:10	Kỹ tóg ti mỹ: “ha tĩg, Satanás,” he mũ. “Ẽg pã'i tỹ Topẽ hã krẽm ẽg tóg ẽg jakrĩ tỹ grĩnh ke tĩ, ti hã to ẽg tóg: “Topẽ vẽ,” he tĩ, hã kỹ tóg rán kỹ nĩ, Topẽ vĩ tỹ rán kỹ nĩ ki,” he tóg.
23295	MAT 4:17	Ga ẽn tá nĩ kỹ tóg, ag mỹ Topẽ vĩ tó mũ, kỹ tóg ag mỹ: “ãjag jykre pãno tovãnh ra,” he mũ, “ãjag tỹ ũri ũ tỹ kanhkã tá nĩ ẽn tỹ tỹ ẽg pã'i nĩ ve jé,” he tóg, Jesus ti.
23301	MAT 4:23	Kỹ Jesus tóg, ga tỹ Galiléia kar mĩ tĩ mũ sir, ag mré. Judeu ag vẽnh kanhrãn jafã krẽm tóg ag kanhrãn mũ. Ag mỹ tóg Topẽ vĩ sér tó mũ, ũ tỹ kanhkã tá nĩ ẽn tỹ tỹ ẽg pã'i nĩ tĩ. Ũn kagyga kar ag hynhan tóg, fag kar ke gé, gĩr kar ke gé.
23306	MAT 5:3	“Topẽ vỹ ãjag ve há han mũ, ãjag tỹ: “kórég inh nĩ,” hen kỹ. “Sỹ Topẽ kuprĩg tỹ jagrẽn kỹ nĩ tũ nĩ ra sóg tỹ, ũn kórég nĩnh mũ vẽ,” hem nĩ. Kỹ ãjag tóg, ti tỹ tỹ ẽg pã'i nĩ venh ke mũ, kanhkã tá,” he tóg.
23308	MAT 5:5	“Topẽ vỹ ãjag ve há han mũ, ãjag tỹ vẽnh kar mỹ komẽr hã vĩn kỹ. Kỹ ãjag tóg ga kar kri tỹ pã'i nỹtĩnh ke mũ,” he tóg.
23328	MAT 5:25	“Kejẽn ã tóg, ã mré ke ũ mỹ név jẽ, ã mré ke ũ fi mỹ ke gé. Kỹ fi tóg pã'i ag mỹ ã kãmén tĩg ke mũ. Fi tỹ tónh tĩg ke ẽn jo fi mré vĩm nĩ, ti mré ke gé. “Kajãm jé sóg ke mũ,” hem nĩ. Ke tũ nĩ mũ ra pã'i vỹ, ã jykre pãno venh ke mũ, kỹ tóg ti porisa mỹ: “ti se ra,” henh ke mũ.
23331	MAT 5:28	Sỹ ũri ãjag jyvẽn hã vẽ, ha mẽ: ã tỹ ũn tỹtá ũ fi ki vẽ'ĩ kỹ tóg, ã tỹ fi mré nỹ sĩ han ẽn ri ke nĩ sir, ã tỹ fi ki vẽ'ĩ mũ ti. Ã tỹ ũn tỹtá ũ fi mré nũr sór kỹ tóg, ã tỹ fi mré nũr ri ke nĩ sir, ã tỹ fi to én mũ ti. Ke tũg nĩ.
23332	MAT 5:29	Ã tỹ nén ũ ki vẽ'ĩ tugrĩn Topẽ vĩ mranh kỹ ã kanẽ tỹ nám kem nĩ, ã tỹ ki vẽ'ĩ mãn tũ nĩ jé. Ã kyvó nĩn kỹ tóg, ã mỹ jagy tĩ vẽ. Ã tỹ hã ra nũgme ki kutẽ kỹ tóg, ti jagy kãfór nĩ. Kỹ tag hã ve sór tũg nĩ.
23338	MAT 5:35	Kỹ ón kỹ: “ũ tỹ tỹ ga kri ke ẽn vỹ, ki kanhró nĩ,” he tũg nĩ gé. Topẽ tũ vẽ, ga ti. Kỹ ón kỹ: “ũ tỹ Jerusalém tá ke ag ki rĩr tĩ ẽn vỹ, ki kanhró nĩ,” he tũg nĩ gé. Ẽg pã'i mág tũ vẽ mỹr, Jerusalém ti.
23361	MAT 6:10	Ẽg jé kãnhmar ã tỹ tỹ ẽg pã'i nĩ vé. Vẽnh kar jé ã tỹ nén to jykrén mũ ẽn han sór, ga tá ke kar, ag jé kanhkã tá ke kar ag ri ke han.
23380	MAT 6:29	Ge ra tóg sĩnvĩ nỹtĩ, ka fej ti, pã'i mág tỹ Salomão kur sĩnvĩ kãfór, ti tỹ ẽprã ke ag kur sĩnvĩ kãfór ja ra. Ki hã sóg tó mũ mỹr.
23384	MAT 6:33	Topẽ tỹ tỹ ẽg pã'i nĩ ẽn hã ve sórm nĩ. Kỹ tag hã to vãsãn nĩ. Ti jykre kuryj tag hã to jykrén mág nĩ. Kỹ tóg ãjag mỹ ãjag tỹ nén ve sór mág mũ ẽn vin ke mũ sir.
23406	MAT 7:21	“Vẽnh kar tóg iso: “pã'i vẽ, pã'i vẽ,” he tĩ. Hã ra ũ ag tóg, Topẽ tỹ nén tó mũ ẽn han tũ nĩgtĩ. Hã kỹ ag tóg, Topẽ tỹ tỹ ẽg pã'i mág nĩ venh ke tũ nĩ. Ũ tỹ inh jóg vĩ han mũ ẽn ag hã vỹ, Topẽ tỹ tỹ ẽg pã'i mág nĩ venh ke mũ, fag ke gé.
23414	MAT 7:29	Ti vĩ tóg vẽnh kar vĩ kãfór nĩ, Topẽ vĩ to ẽg kanhrãn tĩ ag vĩ kãfór ti nĩ, kỹ tóg pã'i vĩ kãfór pẽ nĩ gé, ti vĩ ti. Hã kỹ tóg ki hã tó mũ. Kỹ tóg ag mỹ e tĩ sir, fag mỹ ke gé.
23423	MAT 8:9	“Ha vé, tỹ sóg pã'i krẽm ke nĩ gé, kỹ soldado ag tóg tỹ inh krẽm ke nỹtĩ gé. Hã kỹ sóg pã'i jykre ki kanhró nĩ. Isỹ soldado ũ mỹ: kutĩg, hen kỹ tóg tĩ mũ. Sỹ ti mỹ: kunĩg, hen kỹ tóg kãtĩ mũ gé. Isỹ inh camarada mỹ: tag han ra, hen kỹ tóg han tĩ. Inh vĩ tỹ sóg ag jẽgnẽg tĩ. Ã vĩ hã tỹ ã tóg ti tỹ há' henh ke mũ,” he tóg.
23425	MAT 8:11	“Ha vé, ũ tỹ hẽn ri ke ag vỹ kãmũnh ke mũ, rã jur ja tá, rã pur ja tá ke gé. Abraão mré ag tóg ũ tỹ kanhkã tá nĩ ẽn tỹ tỹ ẽg pã'i nĩ venh ke mũ, Isaque mré, Jacó mré ke gé. Topẽ tóg ag ki rĩr ke mũ.
23426	MAT 8:12	Ag jãvo Israel krẽ'krẽ ag tóg, kuty ki vár ke mũ. Ag tỹ ũ tỹ kanhkã tá nĩ ẽn tỹ tỹ ẽg pã'i nĩ venh ke vẽ vẽ, hã ra ag tóg venh ke tũ nĩ. Kỹ ag tóg vẽsỹrénh ke mũ, ag jã tỹ ag tóg gángán kenh mũ, vẽso jũn kỹ, fag ke gé,” he tóg, Jesus ti.
23459	MAT 9:11	Kỹ pã'i ag tóg vég mũ. Kỹ ag tóg ti mré mũ tĩ ag mỹ: “ãjag pã'i ne tóg ũn jykre pãno ag mré jẽg mũ',” he mũ.
23466	MAT 9:18	Ti tỹ ver ag mré vẽmén nĩ ra pã'i ũ tóg, ti tá jun mũ, ha mẽ. Ti krẽm grĩnh ke kỹ tóg ti mỹ: “inh kósin fi vỹ krónh ke nỹ ha. Ã nĩgé tỹ fi mẽnh kãtĩg, kỹ fi fe tóg mrin kenh ke mũ, ha vem nĩ,” he mũ.
23471	MAT 9:23	Kỹ tóg tĩg mãn mũ. Kỹ ag tóg vãhã, pã'i ẽn ĩn tá junjun mũ sir. Hã ra tóg tá fór nĩ, ũn kygfỹ mũ fag, ũn vãkynkyn nỹtĩ ẽn ag ke gé, ti kósin fi ter kỹ.
23482	MAT 9:34	Hã ra pã'i ag tóg mẽg mũ. Kỹ ag tóg ón kỹ Jesus to vĩ kónãn mũ. “Vẽjagrẽ kórég pan há tóg nĩgtĩ. Hã ra tóg vẽjagrẽ kórég ag pã'i jykre tỹ ag pan tĩ, ti tỹ tỹ Japo mré ke nĩn kỹ,” he ag tóg, ón kỹ.
23483	MAT 9:35	Kỹ Jesus tóg ẽmã kar mĩ tĩ mũ, ẽmã kãsir mĩ ke gé. Vẽnh kanhrãn jafã krẽm tóg ag kanhrãn tĩ. Ag mỹ tóg ũ tỹ kanhkã tá nĩ ẽn tỹ tỹ ẽg pã'i nĩ ẽn kãmén tĩ. Kỹ tóg ũn kagyga ag hynhan tĩ gé sir.
23490	MAT 10:4	Simão ke gé, ag tỹ ũ to: Zelote, he mũ tag ti, kar kỹ Judas Iscariotes ke gé, ũ tỹ vẽnh kar vatánh tá pã'i ag mỹ Jesus fẽg mũ tag ti.
23493	MAT 10:7	“Ũ tỹ kanhkã tá nĩ ẽn tỹ tỹ ẽg pã'i nĩnh ke vẽ, ũri,” hem nĩ, ag mỹ.
23503	MAT 10:17	Ẽprã ke ag tóg, ãjag vóg kónãn ke mũ, isugrĩn. Ag pã'i ag mỹ ag tóg ãjag kãmén ke mũ, ag tỹ ãjag vóg kónãn jé. Ag vẽnh kanhrãn jafã krẽm ag tóg, ãjag mrãnmrãn ke mũ.
23504	MAT 10:18	Fóg tỹ pã'i mág mỹ ag tóg, ãjag ven ke mũ, pã'i mág ũ ag mỹ ke gé. Isugrĩn ãjag tóg, vẽnh jagtar tag venh ke mũ, ãjag tỹ ag mỹ inh vĩ ti tó jé, fóg ag kar mỹ, kanhgág ag kar mỹ ke gé.
23505	MAT 10:19	Pã'i ag tỹ ãjag jé ke kỹ to jykrén tũg nĩ, ãjag tỹ ag mỹ nén tónh ke mũ to. Topẽ kuprĩg hã ne, ãjag krĩn ke mũ', kỹ ãjag tóg ti tỹ ãjag mỹ nén tó mũ ẽn hã tónh ke mũ, óra ẽn kã.
23507	MAT 10:21	“Ũ ag tóg, ag mré pafa mũ fag kãmén ke mũ, pã'i ag mỹ, ag tỹ fag kãgtén jé. Kỹ ũ ag tóg ag krẽ kãmén ke mũ gé. Kỹ ũ ag tóg ag han mũ fag kãmén ke mũ gé, pã'i ag mỹ, ag tỹ fag kãgtén jé, mỹr, ha mẽ.
23512	MAT 10:26	“Ge ra ag kamẽg tũg nĩ, pã'i ag. Ẽg tỹ vẽnh péju kỹ nén han mũ tóg vẽnh ven kãn ke mũ. Ẽg tỹ vẽnh kar vatánh tá nén to jykrén mũ tóg vẽnh ven kãn ke mũ gé.
23514	MAT 10:28	Mũmẽg tũg nĩ, ag kamẽg tũg nĩ, pã'i ag. Ẽg tén há ag nỹtĩ, hã ra ag tóg nũgme ki ẽg fón ki kagtĩg nỹtĩ. Ũn pir hã kamẽg nĩ, hã vỹ: Topẽ, he mũ. Ti hã ne ẽg tén kar kỹ nũgme ki ẽg fón ki kanhró nĩ'. Kỹ ti hã kamẽg nĩ.
23517	MAT 10:31	Hã kỹ pã'i ag kamẽg tũg nĩ. Sẽsĩ kãfór ãjag tóg nỹtĩ, Topẽ mỹ. Ãjag kã mĩ ũn pir tóg sẽsĩ e kãfór nĩ, ti mỹ,” he tóg, Jesus ti.
23533	MAT 11:5	“Tag han inh tĩ, ha mẽ: ũn kyvó ag vỹ, isugrĩn ẽvãnh há nỹtĩ. Ũn kãnhgrĩ ag vỹ mũ há nỹtĩ, ũ tỹ vẽnh kaga kren vãnh han mũ ẽn ag krenkren han inh tĩ. Ũn kutu ag vỹ ẽmẽ há nỹtĩ ha, ũn kãgter mũ ag vỹ rĩnrĩr mãn kỹ nỹtĩ. Ũn jagtar ag vỹ Topẽ vĩ mẽg tĩ, ũ tỹ kanhkã tá nĩ ẽn tỹ tỹ ẽg pã'i nĩnh ke to.
23536	MAT 11:8	Kỹ ti jykre mỹ ãjag mỹ ũn kur sĩnvĩ ag jykre ri ke nĩ'? Vó, ũn kur sĩnvĩ ag vỹ, ẽmã mág tá nỹtĩgtĩ, pã'i ag ĩn krẽm.
23539	MAT 11:11	Ki hã sóg tó mũ, ha mẽ. Ẽprã ke ag kãfór kar ti nĩ, Topẽ vĩ tón ki. Ge ra ũ tỹ Topẽ tỹ tỹ ẽg pã'i nĩ vég mũ ag vỹ ti kãfór nỹtĩnh mũ, ag kãsir nỹtĩ ra,” he tóg.
23540	MAT 11:12	“Ti kãtĩg kar kỹ ũ ag tóg ag jykre tar tỹ ũ tỹ kanhkã tá nĩ ẽn tỹ tỹ ẽg pã'i nĩ han sór mũ, vẽsóg ki.
23541	MAT 11:13	Topẽ vĩ tó tĩ ag kar vỹ Topẽ tỹ tỹ ẽg pã'i nĩnh ke ẽn kãmén ja nĩgtĩ, Topẽ tỹ ẽg jyvẽn mũ ẽn ti. Kỹ João tóg tag tó ja nĩ gé, ag nón.
23560	MAT 12:2	Kỹ pã'i ag tóg ag vég mũ. Kỹ ag tóg Jesus mỹ: “ha vé, ã mré mũ tĩ ag ne tóg, ag tỹ nén han ke tũ han mũ ha', vẽnhkán ke kurã ki'. Vẽnh rãnhrãj vẽ mỹr,” he mũ.
23566	MAT 12:8	Hã ra sóg tỹ vẽnhkán ke kurã to pã'i nĩ. Tỹ sóg ẽprã ke fi kósin nĩ“ he tóg, Jesus ti.
23568	MAT 12:10	Hã ra ũ nĩgé tóg vỹ tá nĩ nĩ. Kỹ ag tóg ón kỹ Jesus mỹ: “mỹ há nỹ, ẽg tỹ vẽnhkán ke kurã ki ũ kygtãg ke tag ti?“ he mũ. Ag tỹ pã'i ag mỹ: “vẽnhkán ke kurã ki tóg Topẽ vĩ mranh tĩ, ti tỹ ũ kygtãg kỹ,” he sór vẽ.
23572	MAT 12:14	Kỹ pã'i ag tóg, jũgjũ kỹ pa mũ sir. “Ẽg hỹn hẽ ri kenh mũ, ẽg tỹ ti tén jé?“ he ag tóg mũ, Jesus to.
23581	MAT 12:23	Kỹ tóg vẽnh kar mỹ e tãvĩ tĩ. Kỹ ag tóg jagnẽ mỹ: “Davi krẽ'krẽ ẽn tũ mỹ'?“ he mũ sir, Jesus to. “Ũ tỹ vãsỹ rán kỹ nĩ ẽn tũ mỹ'?“ he ag tóg mũ. Ag mỹ tóg tỹ ti hã ve nĩ.
23582	MAT 12:24	Kỹ Pã'i ag tóg mẽg mũ sir, Jesus tỹ ti tỹ há' he ẽn ti. Hã kỹ ag tóg Jesus to: “jagrẽ kórég ti nĩ,” he mũ. “Nén-Kórég ag pã'i tỹ ti jagrẽ nĩ, Belzebu ẽn tỹ. Hã kỹ tóg Nén-Kórég ag pan tĩ,” he ag tóg mũ.
23586	MAT 12:28	“Topẽ kuprĩg jykre tỹ sóg Japo ag pan tĩ mỹr. Topẽ kuprĩg tỹ Japo ag pan kãn kỹ Topẽ tóg tỹ ẽg pã'i nĩ vẽ mỹr. Tag to jykrén nĩ,” he tóg, Jesus ti.
23590	MAT 12:32	Ãjag tỹ iso vĩ kónãn mũ ra tóg, ãjag mỹ vẽnh pãte fón sór mũ gé, ãjag tỹ ẽprã ke fi kósin to vĩ kónãn mũ ra. Ãjag tỹ Topẽ kuprĩg to vĩ kónãn kỹ tóg, ãjag mỹ vẽnh pãte fón mãn ke tũ nĩ. Ãjag tỹ ga kri mũn kỹ tóg, tag tỹ vẽnh pãte fón ke tũ nĩ, Topẽ ti, ãjag ter kar kỹ ke gé,” he tóg, Jesus ti, pã'i ag mỹ.
23600	MAT 12:42	Kỹ pã'i mág ẽn fi, ũ tỹ kuvar há tá kãtĩg ja ẽn fi vỹ ãjag mré nĩnh ke mũ gé, kurã tỹ ẽgno kã. Kỹ fi tóg ãjag mỹ vĩ kónãn ke mũ gé. Kuvar há tá fi tóg kãtĩg ja nĩgtĩ, vãsỹ, fi tỹ pã'i mág tỹ Salomão vĩ mẽ jé. Salomão kãfór vỹ tỹ inh nĩ, hã ra ãjag tóg inh vĩ jẽmẽ jãvãnh nỹtĩ,” he tóg, Jesus ti.
23619	MAT 13:11	Kỹ tóg ag mỹ: “ãjag hã ne, ũ tỹ kanhkã tá nĩ ẽn tỹ tỹ ẽg pã'i nĩ ẽn ki kanhró nỹtĩnh mũ',” he mũ. “Jãvo ũn e ẽn ag vỹ, ki kanhrãn kãn ke tũ nĩ.
23639	MAT 13:31	Kỹ tóg ag mỹ: “ũ tỹ kanhkã tá nĩ ẽn tỹ tỹ ẽg pã'i nĩ vỹ ge nĩnh mũ, ha mẽ,” he mũ gé. “Ka tỹ krén ri ke tóg nĩ. Ti krãn ẽg tóg tĩ.
23641	MAT 13:33	Kỹ tóg fag mỹ: “Topẽ tỹ tỹ ẽg pã'i nĩ vỹ ũn tỹtá fag tỹ ẽmĩ han ri ke nĩ,” he mũ gé. “Ẽmĩ han jé fag tóg, ẽmĩ jãgja jafã tỹ fermento ẽn tỹ farĩnh mré jãgjãg tĩ. Kỹ tóg tỹ són ke kãn tĩ,” he tóg.
23642	MAT 13:34	Nén tỹ hẽn ri ke kãmén tóg tĩ, Jesus ti, vẽnh kar mỹ. “Topẽ tỹ tỹ ẽg pã'i nĩnh ke vỹ tag ri ke nĩ,” he tãvĩ han tóg tĩ ag mỹ.
23651	MAT 13:43	Ag jãvo ũn jykre kuryj ag vỹ, hapẽ nỹtĩnh mũ, sĩnvĩ, kókov, rã gru ri ke, ag tỹ ag jóg tá nỹtĩn kỹ sir, ag tỹ ũ tỹ kanhkã tá nĩ ẽn tỹ tỹ ẽg pã'i nĩ ven kỹ. Ha mẽ há han,” he tóg, Jesus ti.
23652	MAT 13:44	“Kỹ ẽg tỹ kanhkã tá nĩ ẽn tỹ tỹ ẽg pã'i nĩ venh ke vỹ, tag ri ke nĩ gé, ha mẽ. Ũ tỹ ti patrão japỹ tá jãnkamy ne kunũnh kỹ péju mãn kỹ nĩm ẽn ri ke tóg nĩ. Ti péju mãn kar kỹ tóg, ti tỹ nén kar fón kãn mũ sir, ti kaja to ẽpỹ ẽn vyn jé sir. Ti tỹ ẽpỹ ẽn vyn kar kỹ jãnkamy ẽn vỹ tỹ, ti tũ nĩ sir,” he tóg. Ti tỹ ẽg tỹ ti ki rã há han ke kãmén hã vẽ.
23653	MAT 13:45	“Ẽg tỹ ũ tỹ kanhkã tá nĩ ẽn tỹ tỹ ẽg pã'i nĩ venh ke vỹ tag ri ke nĩ gé, ha mẽ,” he tóg mũ gé. “Negociante ũ tóg jãnka han jafã tỹ negociar he tĩ, pérola tỹ. Hã kỹ tóg ũn há kuprẽg tĩgtĩ.
23655	MAT 13:47	“Ẽg tỹ Topẽ tỹ tỹ ẽg pã'i nĩ venh ke kãme ũ vẽ gé, ha mẽ,” he tóg mũ gé. “Rede ri ke tóg nĩ, ẽg tỹ tỹ pirã kugmĩ jafã ẽn. Ti fón ẽg tóg tĩ, goj kã ki, ẽg tỹ pirã kugmĩ jé, kãkufár ke gé.
23667	MAT 14:1	Kỹ kejẽn pã'i mág tỹ Herodes vỹ mẽg mũ, Jesus kãme ti.
23703	MAT 15:1	Kỹ kejẽn pã'i ũ ag tóg Jerusalém tá junjun mũ, Jesus tá, Topẽ vĩ to ẽg kanhrãn tĩ ag mré hã. Jesus mỹ ag tóg:
23715	MAT 15:13	Kỹ tóg ag mỹ: “ẽg jóg mág tỹ nén krãn ja tũ ẽn vãm kãn kỹ nĩnh ke vẽ, ẽg jóg tỹ kanhkã tá nĩ tỹ nén krãn ja tũ ẽn ti,” he mũ. “Ag pijé tỹ Topẽ krẽ nỹtĩ', pã'i ẽn ag, hã kỹ tóg ag vãm ke mũ,” he tóg.
23742	MAT 16:1	Kỹ pã'i ũ ag tóg Jesus tá junjun mũ. Ag tỹ ón kỹ ti ki jẽmẽ sór vẽ, ag tỹ kar kỹ ti kato vĩ jé. Kỹ ag tóg ti mỹ milagre to vĩ mũ. Ag tỹ ti jykre to: “Topẽ jykre mỹ vỹ?“ he sór vẽ.
23762	MAT 16:21	Kỹ tóg komẽr hã ti mré mũ tĩ ag mỹ ti jagtar ke kãmén mũ. “Kãnhmar sóg Jerusalém ra tĩg mũ ha,” he tóg. “Tá sóg hã ra jagtar ke mũ. Kófa ag vỹ iso kórég nỹtĩnh mũ, ha vem nĩ, Topẽ tũ to pã'i ag, Topẽ vĩ to ẽg kanhrãn tĩ ag ke gé. Ag tỹ isén ke vẽ, hã ra sóg kurã tãgtũ ki rĩr mãn ke mũ,” he tóg, Jesus ti.
23769	MAT 16:28	Ha vé, ki hã sóg tó mũ. Ãjag kã mĩ ũ ag tóg Topẽ tỹ tỹ ẽg pã'i nĩ venh ke mũ, ag ter ke to hã, tag ki ẽg mré nỹtĩ ũ ag. Ẽprã ke fi kósin ẽn ve jé ag tóg ke mũ, ti tỹ tỹ pã'i nĩ ti. Inh hã vẽ,” he tóg, Jesus ti.
23794	MAT 17:25	Kỹ tóg ag mỹ: “vó, kajãm ti tĩ,” he mũ. Kỹ tóg ti ĩn tá jun mũ sir. Ti tỹ ver nén ũ tó tũ ra Jesus tóg ti mỹ: “Simão', pã'i ag mỹ ã mỹ: “ha imposto kajãm,” he ja tũ nĩ?“ he mũ. “Tag to jykrén, ha mẽ. Ẽprã pã'i ag mỹ ag krẽ mỹ: “kajãm nĩ,” he tĩ', ag mré ke tũ ag mỹ, vó'?“ he tóg.
23797	MAT 18:1	Kỹ Jesus mré mũ tĩ ag tóg ti mỹ: “kejẽn ẽg tóg Topẽ tỹ tỹ ẽg pã'i nĩ venh ke mũ. Ẽg tỹ ti ve kỹ ũ tỹ hẽ nỹ hỹn ẽg kãfór kar nĩnh mũ?“ he mũ.
23799	MAT 18:3	Kỹ tóg: “gĩr tag ri ke han nĩ, ãjag tỹ Topẽ tỹ tỹ ẽg pã'i nĩ ve sór kỹ. Ke tũ nĩ mũ ra ãjag tóg venh ke tũ nĩ. Hã kỹ ãjag jykre tovãnh nĩ, gĩr jykre han jé,” he mũ.
23800	MAT 18:4	“Gĩr pijé ũn sanh kãfór nĩ sór tĩ'. Hã kỹ jagnẽ kãfór nĩ sór tũg nĩ. Ũn sĩ vỹ tỹ inh nĩ, gĩr ri ke, hem nĩ, ãjag tỹ kar kỹ tỹ ũn mág nỹtĩ jé, Topẽ tỹ tỹ ẽg pã'i nĩn kỹ.
23805	MAT 18:9	“Ã tỹ nén ũ ki vẽ'ĩ kỹ Topẽ vĩ mranh kỹ ã kanẽ ũ nám nĩ, ã tỹ ke mãn tũ nĩ jé. Jagy ti nĩ, ã kyvó nĩ ti. Ã tỹ hã ra kanẽ régre ra nũgme ki kutẽ kỹ tóg jagy kãfór nĩ. Ã tỹ rĩr krỹg ja tũ ẽn ve kỹ tóg hã ra há tĩ,” he tóg, Jesus ti.
23819	MAT 18:23	“Ha vé, ũ tỹ kanhkã tá nĩ ẽn tỹ tỹ ẽg pã'i nĩnh ke vỹ tag ri ke nĩ, ha mẽ. Pã'i mág ri ke ti nĩ. Camarada e ti nĩ. Kỹ tóg kejẽn ag tũ ve sór mũ, ag tỹ ti mỹ név ti.
23834	MAT 19:3	Kỹ pã'i ag tóg ti tá junjun mũ gé sir. Ag tỹ ón kỹ ti vĩ mẽ sór vẽ, vẽnh prũ fón ke to. Kỹ ag tóg ti mỹ: “mỹ ẽg tỹ nén ũ ũ to ẽg prũ fag fón jé há nĩ'?“ he mũ.
23845	MAT 19:14	Hã ra Jesus tóg ag mỹ: “vĩ tũg nĩ, gĩr ag mỹ. Gĩr fag tỹ iso kãmũ kamẽg tũg nĩ,” he mũ. “Ũ tỹ ge hã vỹ ũ tỹ kanhkã tá nĩ ẽn tỹ tỹ pã'i nĩ ẽn krẽm nỹtĩ nĩ,” he tóg.
23854	MAT 19:23	Kỹ Jesus tóg ti mré mũ tĩ ag mỹ: “sỹ ke há vẽ. Jagy pẽ ti nĩ, ũn riko tỹ Topẽ tỹ tỹ ẽg pã'i nĩ venh ke ti,” he mũ.
23855	MAT 19:24	“Kãvãru pãnĩ sór vỹ préj nor fĩn kutẽ tũ nĩgtĩ mỹr. Ti tỹ fĩn kutẽ há nĩ ra tóg há tĩ vẽ, ũn riko tỹ Topẽ tỹ tỹ ẽg pã'i nĩ venh ke ti,” he tóg.
23861	MAT 19:30	“Jãvo tag ki ũn mág ũ ag kãsir nỹtĩnh ke vẽ, tá tére kỹ, kỹ tag ki ũn kãsir ũ ag tỹ tỹ ũn mág nỹtĩnh ke vẽ, tá tỹ pã'i nỹtĩnh ke vẽ,” he tóg, Jesus ti. Ti tỹ ag mỹ kanhkã jykre tó vẽ.
23862	MAT 20:1	Kỹ Jesus tóg ag mỹ: “Topẽ tỹ tỹ ẽg pã'i nĩ vỹ patrão tỹ ti camarada jãvãnh ri ke nĩ,” he mũ. “Kusã ki 6 horas ki tóg, ag jãvãnh tĩ mũ, ag tỹ ti jakré tỹ uva ki rĩr jé.
23879	MAT 20:18	“Ha vé,” he tóg. “Jerusalém ra ẽg tóg mũ mũ. Ẽprã ke fi kósin ẽn vỹ jagtar ke mũ. Inh hã vẽ. Topẽ tũ to pã'i ag tóg ag tỹ isỹ nén han sór mũ ẽn han ke mũ, Topẽ vĩ to ẽg kanhrãn tĩ ag ke gé. Ag tỹ iso: “ter jé tóg ke mũ,” henh ke vẽ.
23882	MAT 20:21	Kỹ tóg fi mỹ: “ã tỹ ne to vĩ sór nẽ?“ he mũ. Kỹ fi tóg: “kejẽn ã tóg tỹ pã'i mág nĩnh mũ, kỹ tóg inh krẽ tag ag tỹ ã rã hã nỹtĩnh há tĩ, ag tỹ ã mré tỹ pã'i mág nỹtĩ jé,” he mũ.
23884	MAT 20:23	Kỹ tóg: “hỹ, jagtar jé ãjag tóg ke mũ, inh ri kén,” he mũ. “Hã ra isũ tũ vẽ, sỹ ãjag tỹ pã'i han ke ti. Topẽ tỹ ũn mỹ: “ha ti rã hã nỹtĩ,” he mũ ẽn ag hã vỹ inh rã hã nỹtĩnh ke mũ,” he tóg, Jesus ti.
23886	MAT 20:25	Hã ra Jesus tóg ag jé prẽr kãn kỹ ag mỹ: “fóg ag pã'i ag jykre ki kanhró ãjag tóg nỹtĩ,” he mũ. “Vẽnh kar jẽgnẽg ag tóg tĩ mỹr, kỹ ag mág ag tóg vẽnh kar mỹ: “gem nĩ, ge tũg nĩ,” he tĩ, vĩ tar han kỹ.
23888	MAT 20:27	Ãjag mỹ tỹ pã'i nỹtĩ sór mũ'? Kỹ tỹ jagnẽ krẽm ke nỹtĩm nĩ, tỹ ũn kãsir nỹtĩm nĩ.
23900	MAT 21:5	“Sião tá ke fag mỹ: “ha vé, ãjag pã'i mág tóg ãjag ki jun ke mũ,” hem nĩ. Vẽnh kar to tóg fe há nĩ, jũ vãnh nĩn kỹ, ãjag Senhor ti. Burrica kri tóg nĩ nĩ, fi kósin kri, ẽg tu tĩ ẽn fi kósin kri mỹr,” he tóg, Topẽ vĩ tỹ rán kỹ nĩ ki.
23904	MAT 21:9	Kỹ ũ ag tóg ti jãmĩ mũ mũ, jo ũ ag tóg ti nón mũ mũ. Ẽn ag tóg prẽnprẽr mũ sir. “!..Viva, Davi krẽ'krẽ..!“ he ag tóg mũ. “!..Sér tóg tĩ, pã'i vỹ ẽg tá jun, ẽg Pã'i mág tỹ ti jẽnẽn kỹ..! !..Topẽ tá tóg kãtĩg, ũ tỹ kynhmỹ nĩ ẽn tá, viva..!“ he ag tóg, prẽnprẽr kỹ.
23910	MAT 21:15	Hã ra Topẽ tũ ki rĩr tĩ ag tóg tá nỹtĩ, Topẽ vĩ to ẽg kanhrãn tĩ ag ke gé. Ti tỹ ag tỹ há' he vég ag tóg mũ. Gĩr ag vĩ mẽg ag tóg mũ gé. Topẽ ĩn krẽm ag tóg nỹtĩ, gĩr ag, kỹ ag tóg Jesus mỹ prẽnprẽr mũ. “!..Viva, Davi krẽ'krẽ..!“ he ag tóg mũ, prẽnprẽr kỹ. Kỹ pã'i ag tóg ti to jũgjũ mũ.
23918	MAT 21:23	Kỹ tóg ẽmã tá jun kỹ Topẽ ĩn kã ra rã mãn mũ sir. Kỹ Topẽ tũ to pã'i ag vỹ ti to kãmũ mũ, kófa ag mré hã. Kỹ ag tóg ti mỹ: “ũ nỹ ã mỹ: tag han nĩ, hé? Ũ nỹ ã jẽnẽ?“ he mũ.
23921	MAT 21:26	Ẽg tỹ hã ra ti mỹ: ẽprã ke jykre ja vẽ, hen kỹ ẽg tóg vẽnh kar kato tẽ mũ sir. Vẽnh kar vỹ João to: Topẽ vĩ tó tĩ pẽ ja vẽ, he tĩ. Kỹ ẽg tóg ag kamẽg mũ, vẽnh e ẽn,” he ag tóg mũ, jagnẽ mỹ, pã'i ag.
23926	MAT 21:31	Kỹ ũ tỹ hẽ nỹ ti panh vĩ ki króm hỹn?“ he tóg. Kỹ ag tóg ti mỹ: “ũn sanh ti,” he mũ. Kỹ Jesus tóg “hỹ, hã vẽ,” he mũ. “Hã kỹ sóg ãjag mỹ ke mũ. Ũ tỹ governo mỹ jãnkamy mãg tĩ ũ ag vỹ Topẽ vĩ mranh, hã ra ag tóg to jykrén mãn kỹ ag jykre kórég tovãnh. Kỹ ũn mén tũ ũ fag vỹ fag jykre kórég tovãnh gé. Hã kỹ ag tóg Topẽ tỹ tỹ ẽg pã'i nĩ venh ke mũ, fag ke gé. Ti kósin sanh ri ke ag hã vẽ. Ag jãvo ãjag tóg kanhkã venh ke tũ nĩ, ãjag tỹ ón kỹ Topẽ mỹ: he, he mũ ra.
23938	MAT 21:43	“Hã kỹ sóg ãjag mỹ: ãjag tỹ Topẽ tỹ tỹ ẽg pã'i nĩ venh ke vẽ vẽ, hã ra ãjag tóg venh ke tũ nĩ,” he mũ. “Ũ ag hã vỹ venh ke mũ, povo ũ ag, ag tỹ inh vĩ kri fi kỹ,” he tóg.
23940	MAT 21:45	Kỹ pã'i ag tóg vãhã Jesus vĩ tag mẽ kỹ to jykrén mũ. “Ẽg hã to tóg: uva ki rĩr tĩ kórég ag, he ja nĩ,” he ag tóg mũ sir.
23942	MAT 22:1	Kỹ Jesus tóg ag mỹ: “Topẽ tỹ tỹ ẽg pã'i nĩ vỹ ge nĩ, ha mẽ,” he mãn mũ.