23233	MAT 1:20	Ti tỹ ver fi tovãnh to jykrén kỹ Topẽ tỹ jẽnẽ jafã tóg ti mỹ vẽnh ven mũ sir, ti vẽnh péti kỹ. Kỹ tóg ti mỹ: “José,” he mũ. “Tỹ ã Davi krẽ'krẽ ag kã ũ nĩ,” he tóg. “Maria fi to jykrén kónãn tũg nĩ. Fi tovãnh sór tũg nĩ. Ũ tũ pijé', Topẽ kuprĩg tỹ fi mỹ gĩr han ja vẽ.
23348	MAT 5:45	Kỹ ãjag tóg tỹ Topẽ krẽ nỹtĩ, ãjag tỹ ẽg jóg tỹ kanhkã tá nĩ ẽn ri ke han kỹ. Ti hã ne tóg rã han', ti tỹ vẽnh kar kri jẽngrẽg kỹ san jé, ũn jykre kuryj ag kri, ũn jykre pãno ag kri ke gé, fag kri ke gé. Ta han ti ke gé, ti tỹ vẽnh kar há han jé, ũn jykre kuryj ag, ũn jykre pãno ag ke gé, fag ke gé. Ver tóg vẽnh kar to há nĩ, Topẽ ti,” he tóg.
23369	MAT 6:18	Hã kỹ ag tóg vég tũ nĩ, ãjag vãkrég mũ ti. Ẽg jóg hã ne vég mũ inhhã', ẽg tỹ ũn vég tũ ẽn hã vỹ vég mũ. Kỹ tóg kanhkã tá ãjag mỹ ãjag ganho nĩm ke mũ. Ẽg tỹ vẽnh kar vatánh tá nén han mũ vég tóg tĩ, Topẽ ti,” he tóg, Jesus ti.
23371	MAT 6:20	Ãjag tỹ inhhã kanhkã tá tũ mág pẽ nỹtĩn kỹ tóg hã ra ãjag mỹ há tĩnh mũ. Tá ti pijé tỹ ga nĩ', ãjag tũ ti, tá ti pijé vẽso jãgfanh mũ'. Tá ag pijé péju kỹ ma mũnh mũ'. Hã kỹ tá ãjag tũ vin han sórm nĩ.
23376	MAT 6:25	“Hã kỹ sóg ãjag mỹ tó mũ. Ãjag tỹ nén ve sór mũ to krĩ kufy han tũg nĩ. “Inh hỹn ũri ne konh mũ', inh hỹn ne tunh mũ'?” he tũg nĩ. Topẽ tỹ ẽg han ja vẽ mỹr, ẽg tỹ ga kri mũ jé. Hã kỹ tóg ẽg mỹ ẽg tỹ konh ke mũ ven tĩ gé sir, ẽg kur ti ke gé.
23377	MAT 6:26	Sẽsĩ to jykrén nĩ. Ag mỹ ẽkrãn tĩ? Vó. Ag mỹ pãjó krẽm vin tĩ? Vó. Ge ra ẽg jóg tỹ kanhkã tá nĩ ẽn tóg ag ki rĩr nĩ nĩ. Ãjag mỹ jẽsĩ kãfór tũ nỹtĩ', Topẽ mỹ'? Vó, sẽsĩ kãfór ãjag tóg nỹtĩ.
23389	MAT 7:4	Kỹ ã hã ne tóg ã régre mỹ, fi mỹ: “ã jykre kórég kurynh jé sóg ke mũ,” he tĩ', ã tỹ ã jykre pãno ẽn kurynh jãvãnh ra'.
23408	MAT 7:23	Hã ra sóg ag mỹ: ãjag pijé tỹ, inh mré ke nỹtĩ', henh ke mũ. Ãjag ki kagtĩg sóg nĩ mỹr. Ha mũ jẽg. Jykre kórég ãjag tóg nỹtĩ, he jé sóg ke mũ, ũ tỹ inh panh vĩ han jãvãnh ẽn ag mỹ, fag mỹ ke gé,” he tóg, Jesus ti.
23462	MAT 9:14	Kỹ João Batista mré mũ tĩ ag tóg, Jesus tá junjun kỹ ti mỹ: “ẽg hã ne tóg vãkrég tĩ', Fariseu mré ke ag ke gé. Ẽg jãvo ã mré mũ tĩ ag tóg vãkrég tũ nĩgtĩ. Hẽ ri ken kỹ?“ he ag tóg.
23505	MAT 10:19	Pã'i ag tỹ ãjag jé ke kỹ to jykrén tũg nĩ, ãjag tỹ ag mỹ nén tónh ke mũ to. Topẽ kuprĩg hã ne, ãjag krĩn ke mũ', kỹ ãjag tóg ti tỹ ãjag mỹ nén tó mũ ẽn hã tónh ke mũ, óra ẽn kã.
23531	MAT 11:3	Kỹ tóg Jesus mỹ: “ã hã mỹ'?“ he mũ. “Ẽg tỹ ũn jãvãnh mũ mỹ tỹ ã nĩ'? Topẽ tỹ ũn jẽnẽg mũ hã mỹ tỹ ã nĩ'? Ẽg mỹ ũ jãvãnh mãn ke tũ nĩ ha', ã pãte'?“ he tóg.
23547	MAT 11:19	Ti jãvo sóg vãkrég tũ nĩgtĩ. Jẽg sóg tĩ, kron sóg tĩ gé. Kỹ ãjag tóg iso: “ti hã ne jẽg tĩ', ti hã ne kron tĩ', ti hã ne governo mỹ jãnkamy mãg tĩ ag to há nĩgtĩ', ti hã ne Topẽ vĩ mranh tĩ ag hã to há nĩgtĩ',” he tĩ sir, ẽprã ke fi kósin to. Kỹ João jykre tóg, ãjag mỹ kórég nỹ, ti vãkre to. Jãvo inh jykre tóg ãjag mỹ kórég nỹ gé, inh vãkrég tũ to. Hã ra ẽg tóg ẽg tỹ ũ jykre tugnỹm kỹ ti jykre há ẽn ki kanhró nĩ sir,” he tóg, Jesus ti.
23555	MAT 11:27	Kỹ tóg ag mỹ: “inh jóg tóg, inh mỹ tovãnh kãn, ti tỹ nén han mũ kar ẽn ti,” he mũ. “Kỹ ũ pijé ti kósin ki kanhró nĩ'. Inh jóg hã ne inh ki kanhró nĩ'. Kỹ ũ pijé inh jóg ki kanhró nĩ gé'. Inh hã ne ti ki kanhró nĩ', isỹ tỹ ti kósin nĩn kỹ. Hã ra sóg ãjag mỹ ti kãmén jé kãtĩ mũ, sỹ ũn kuprẽg mũ ag mỹ, fag mỹ ke gé“ he tóg.
23560	MAT 12:2	Kỹ pã'i ag tóg ag vég mũ. Kỹ ag tóg Jesus mỹ: “ha vé, ã mré mũ tĩ ag ne tóg, ag tỹ nén han ke tũ han mũ ha', vẽnhkán ke kurã ki'. Vẽnh rãnhrãj vẽ mỹr,” he mũ.
23578	MAT 12:20	Ẽprã ke ag tỹ inh vĩ mranh kỹ ag tóg vãn tóg tỹ kamkam ke ẽn ri ke nỹtĩ. Hã ra ti pijé ag tỹ kamkam ke kãn ke mũ', isỹ ũ to: inh fe, he mũ ẽn ti. Néj gru tỹ nhyn ke sór ẽn ri ke ag nỹtĩ gé. Ti pijé ag tỹ nhyn kenh ke mũ'. Ag mỹ tóg vĩ há han ke mũ. Tag kar kỹ sóg kejẽn vẽnh kar jykre tugnỹm ke mũ.
23585	MAT 12:27	“Belzebu tỹ tóg Nén-Kórég ag pan tĩ,” he ãjag tóg tĩ iso. Jãvo ãjag mré ke ag hỹn vẽjykre tỹ ne tỹ vẽjagrẽ kórég pan tĩ? Ag mỹ Nén-Kórég ag jykre tỹ ag pan tĩ gé', Topẽ jykre tỹ, vó? Topẽ jykre tỹ ag tóg ag pan tĩ. Ãjag tỹ tag to jykrén kỹ ãjag tóg inh jykre há ẽn ki kanhrãn ke mũ vẽ,” he tóg.
23620	MAT 13:12	Hã kỹ tóg ge nĩ. Ũ tỹ nén ũ to jykrén há han kỹ tóg ũ to jykrén mãn', ũ to jykrén mãn' he tĩ. Komẽr hã tóg to jykrén kãn ke mũ. Ũ tỹ nén ũ to jykrén tũ nĩn kỹ tóg ti mỹ tũ tĩ, ti tỹ to jykrén sĩ han mũ ra.
23625	MAT 13:17	Ha mẽ, vãsỹ ke tỹ hẽn ri ke ag vỹ, inh ve sór e ja nĩgtĩ, ãjag tỹ ũri vég mũ tag ti. Hã ra ag tóg inh kãtĩg ke jo kãgter kãn. Topẽ vĩ tó tĩ ag vẽ. Jykre kuryj ja ag nỹtĩ. Ge ra ag tóg inh ve ja tũ nĩgtĩ. Ãjag hã ne inh vĩ mẽg mũ', inhhã',” he tóg, Jesus ti, ti mré mũ tĩ ag mỹ.
23697	MAT 14:31	Kỹ Jesus tóg vẽsỹmér ti kãgmĩg mũ. Kỹ tóg ti mỹ: “inh ki rã há han tũ ã tóg nĩ, vỹ,” he mũ. “Ã hã ne tóg: inh mỹ tá jun mũ vỹ? he mũ', hã kỹ ã tóg ki pun ke kren mũ,” he tóg.
23714	MAT 15:12	Kỹ ti mré mũ tĩ ag tóg ti to kãmũ kỹ ti mỹ: “ha mẽ,” he mũ. “Pã'i ag vỹ ã to jũ nỹtĩ, ã tỹ ag mỹ: vẽjẽn pijé ẽg kavénh tĩ', hen kỹ,” he ag tóg ti mỹ.
23715	MAT 15:13	Kỹ tóg ag mỹ: “ẽg jóg mág tỹ nén krãn ja tũ ẽn vãm kãn kỹ nĩnh ke vẽ, ẽg jóg tỹ kanhkã tá nĩ tỹ nén krãn ja tũ ẽn ti,” he mũ. “Ag pijé tỹ Topẽ krẽ nỹtĩ', pã'i ẽn ag, hã kỹ tóg ag vãm ke mũ,” he tóg.
23758	MAT 16:17	Kỹ Jesus tóg ti mỹ: “Simão', João kósin',” he mũ. “Ẽprã ke tỹ ã mỹ tó pijé', inh jóg tỹ kanhkã tá nĩ ẽn tỹ ã mỹ tó vẽ. Hã kỹ tóg ã ve há han mũ, Topẽ ti,” he tóg.
23773	MAT 17:4	Kỹ Pedro tóg Jesus mỹ: “Senhor,” he mũ. “Tag ki tóg sér tĩ,” he tóg. “Ẽg mỹ pãjó tãgtũ han mũ', ã mỹ', Moisés mỹ', Elias mỹ ke gé'?“ he tóg.
23774	MAT 17:5	Pedro tỹ ver vẽmén jẽ ra kanhkã góg kókov tóg ag kri rũm ke mũ. Kỹ vãhã vẽnh vĩ tóg mẽ há tĩ', kanhkã góg ẽn kã tá, kỹ tóg: “inh kósin pir hã vẽ,” he mũ. “Ti vĩ jẽmẽ ra,” he tóg, Topẽ ti.
23778	MAT 17:9	Kỹ ag tóg pãnónh tá kãre mũ sir. Ag mũn kỹ Jesus tóg ag mỹ: “ker ũ mỹ tó hẽ', ãjag tỹ ũri nén vég mũ tag ti. Isỹ iser ja tá vỹn ke kar hã kãmén nĩ,” he mũ.
23794	MAT 17:25	Kỹ tóg ag mỹ: “vó, kajãm ti tĩ,” he mũ. Kỹ tóg ti ĩn tá jun mũ sir. Ti tỹ ver nén ũ tó tũ ra Jesus tóg ti mỹ: “Simão', pã'i ag mỹ ã mỹ: “ha imposto kajãm,” he ja tũ nĩ?“ he mũ. “Tag to jykrén, ha mẽ. Ẽprã pã'i ag mỹ ag krẽ mỹ: “kajãm nĩ,” he tĩ', ag mré ke tũ ag mỹ, vó'?“ he tóg.
23810	MAT 18:14	Hã kỹ tóg Topẽ mỹ kórég nĩ, ũn sĩ pir vãfor kỹ, ti kren tũ nĩn kỹ, gĩr sĩ pir mỹr. Topẽ pijé tag to há nĩ', inh jóg tỹ kanhkã tá nĩ ẽn ti,” he tóg, Jesus ti.
23892	MAT 20:31	Kỹ ag tóg ag to jũgjũ mũ, ti nón mũ ũ ag. “Mẽ kã nỹtĩ,” he ag tóg mũ. Hã ra ag tóg prẽr mãn', prẽr mãn' he mũ, jamã há ra. “!..Senhor, Davi krẽ'krẽ', ẽg jagãgtãn ra..!“ he ag tóg mũ.
23911	MAT 21:16	Hã kỹ ag tóg ti mỹ: “ã mỹ ag prẽnprẽr mẽg tũ'?“ he mũ. Kỹ tóg ag mỹ: “hã ra Topẽ vĩ rá to jykrén nĩ,” he mũ. “Ũn kãsir ag vỹ iso vĩ há han tĩ. Ũn pafa tĩ ag vỹ inh mỹ vĩ há han tĩ. Ã hã ne tag han', ũn kãsir ag tỹ inh mỹ vĩ há han jé, he tóg, Topẽ vĩ tỹ rán kỹ nĩ ki,” he tóg, Jesus ti.
23920	MAT 21:25	“João vỹ ag kygpég tĩ ja nĩgtĩ. Kỹ ti mỹ kanhkã tá vẽjykre han ja nĩgtĩ', ẽprã vẽjykre vó? Ũ nỹ ti jẽnẽ?“ he tóg. Kỹ ag tóg ti vĩ to jykrén mũ jagnẽ mré. “Ẽg tỹ ti mỹ: Topẽ tỹ ti jẽnẽ ja vẽ, hen kỹ tóg ẽg mỹ: kỹ ãjag tỹ ne jé ti vĩ kri fig tũ nĩ nẽ? henh ke mũ.
23953	MAT 22:12	Kỹ tóg ti mỹ: “isỹ ã mỹ fénhta to kur nĩm mũ ra ã tóg tu tũ nĩ, vỹ,” he mũ. “Ã hã ne tóg ã kur pẽ tu sór mũ', inh fénhta ki',” he tóg. Hã ra tóg vĩ tũ nĩ sir.
23958	MAT 22:17	Hã kỹ ẽg mỹ ã tỹ nén to jykrén mũ tóm nĩ. Mỹ há nỹ', ẽg tỹ governo mỹ imposto kajãm jé'? Ẽg mỹ hỹn ti mỹ nĩm mũ', vó mỹ vó?“ he ag tóg mũ.
23970	MAT 22:29	Hã ra Jesus tóg: “kygnẽ ãjag huri,” he mũ. “Ãjag pijé Topẽ vĩ tỹ rán kỹ nĩ ki kanhró nỹtĩ', ãjag pijé Topẽ jykre ki kanhró nỹtĩ'.
24002	MAT 23:15	“Ón kỹ Topẽ vĩ to ẽg kanhrãn tĩ',” he tóg. “Fariseu',” he tóg. “Jykre régre ãjag nỹtĩ. Topẽ vỹ ãjag ve kónãn,” he tóg. “Ãjag ne tóg kuvar há ra mũ tĩ', ga mĩ, goj mĩ ke gé, ãjag tỹ ũ tỹ Israel ag jykre han sór mũ ũ jãvãnh jé. Ãjag tỹ ũ ven kỹ ãjag tóg ti tỹ Japo krẽ han mũ sir, ti tỹ ón kỹ Topẽ vĩ mẽ jé, ãjag ri ke, ti tỹ ãjag mré nũgme ki kutẽ jé. Kỹ ti jykre pãno vỹ ãjag jykre pãno kãfór nỹ sir,” he tóg, Jesus ti.
24020	MAT 23:33	“Pỹn ri ke ãjag nỹtĩ, mĩg ri ke ãjag nỹtĩ. Ãjag pijé nũgme ki vár tũ nĩnh mũ', inferno ki'.
24062	MAT 24:36	“Hã ra ũ pijé, isỹ kurã ki kãtĩg mãn ke mũ ki kanhró nĩ', óra ki ke gé'. Topẽ tỹ jẽgnẽ jafã ag pijé ki kanhró nỹtĩ'. Inh pijé ki kanhró nĩ gé'. Ẽg jóg mág hã vỹ ti pin kỹ ki kanhró nĩ', kurã kã nén kutẽnh ke mũ ẽn ki.
24088	MAT 25:11	Hã ra ũ fag tóg vãhã tá junjun mũ gé sir, kỹ fag tóg ti mỹ: “Senhor', Senhor', ẽg jy nón,” he mũ sir.
24120	MAT 25:43	Isỹ ãjag ĩn tá jun mũ ra ãjag pijé, inh mỹ: kãrã ra, he ja nĩgtĩ'. Isỹ kur tũ ra ãjag pijé, inh mỹ ũ vin'. Inh kaga nỹ ra, ise kỹ jẽ ra ãjag pijé, inh venh mũ' he ja nĩgtĩ', he jé sóg ke mũ,” he tóg.
24121	MAT 25:44	“Kỹ ag tóg inh mỹ: “ẽg hẽ ri ke kã ã kókĩr vé, ã kron há ti? Ã hẽ ri ke kã ẽg ĩn tá jun'? Ẽg hẽ ri ke kã ã kur tũ vé', ã kaga ti', ã se ti'? Ki kagtĩg ẽg nỹtĩ,” henh ke mũ gé.
24156	MAT 26:33	Kỹ Pedro tóg ti mỹ: “inh pijé, ã ré kỹ tĩg mũ', ag kar tỹ ã ré kỹ mũ mũ ra,” he mũ.
24178	MAT 26:55	Ẽn kã tóg porisa ag mỹ: “ãjag ne tóg, rógro génh kỹ kãmũ mũ', ka kykyv mré', ise jé',” he mũ. “Inh pijé tỹ bandido nĩ'. Kurã kar ki sóg ãjag mré jẽ ja nĩgtĩ, Topẽ ĩn krẽm. Vẽnh kar kanhrãn sóg jẽ ja nĩgtĩ, hã ra ãjag tóg tá ise ja tũ nĩ vẽ mỹr.
24186	MAT 26:63	Hã ra Jesus tóg nén ũ tó tũ nĩ. Kỹ pã'i mág tóg ti mỹ: “Topẽ vỹ rĩr nĩ,” he mũ. “Ti rĩnve sóg ã ki jẽmẽg mũ. Ã mỹ tỹ Cristo nĩ', ã mỹ tỹ Topẽ kósin nĩ'? Ha ẽg mỹ tó,” he tóg, pã'i mág ti.
24202	MAT 27:4	Kỹ tóg ag mỹ: “ti kórég han inh,” he mũ. “Ti pijé, nén ũ kórég han ja nĩgtĩ', hã kỹ tóg vẽnh mỹ nĩ, ti tỹ inh vĩ to ter kỹ,” he tóg.
24203	MAT 27:5	Hã ra ag tóg ti mỹ: “ẽg tũ pijé', ã tũ hã nẽ',” he mũ. Kỹ tóg jãnkamy ẽn vãm mũ sir, Topẽ ĩn krẽm, kar kỹ tóg hẽn ra tĩ mũ sir. Tá tóg ti nunh kã vẽnh jãján mũ, kỹ tóg ter mũ sir.
24238	MAT 27:40	“Ã mỹ Topẽ ĩn kókén kar kỹ kurã tãgtũ ki ũ han mãn sór mũ'?“ he ag tóg mũ. “Vẽnh kren han ra kema', krunh to kãtére, ã tỹ tỹ Topẽ kósin nĩn kỹ,” he ag tóg ti mỹ.
24240	MAT 27:42	“ũ ag krenkren han tóg, hã ra tóg vẽnh hã kren han ki kagtĩg nĩ,” he mũ. “Ẽg pã'i mág jé krunh to kãtére kema', ẽg tỹ ve jé, ẽg tỹ ti ki ge jé,” he ag tóg.
24273	MAT 28:9	Fag mũ ra Jesus tóg, fag kato tẽ mũ', kỹ tóg fag mỹ: “mỹ sér nỹtĩm nĩ,” he mũ. Vãhã fag tóg, ti to grẽn ke mũ sir. Ti pẽn kãgmĩg fag tóg mũ, kỹ fag tóg, ti krẽm mũg ke mũ gé.
24354	MRK 2:25	Kỹ tóg ag mỹ: “vó,” he mũ. “Davi tỹ nén han mũ to jykrén nĩ. Ti kókĩr nĩn kỹ tóg ti tỹ nén han ke tũ han gé, ti mré mũ tĩ ag mré, hã ra Topẽ pijé ti to jũ mũ', ha mẽ.
24361	MRK 3:4	Kỹ tóg ag kar mỹ: “vẽnhkán ke kurã ki ẽg hỹn ne han mũ', ẽg tỹ Topẽ vĩ ki króm jé'? Ẽg mỹ hỹn nén ũ há han mũ'? Ẽg tỹ ũ tũ kókén kỹn mỹ kórég tũ nĩnh mũ'? Ẽg mỹ ũ kren han mũ hỹn'? Ẽg tỹ ũ tén kỹn mỹ há nĩnh mũ hỹn'?“ he tóg. Hã ra ag tóg ti mỹ vĩ tũ nĩ sir.
24405	MRK 4:13	Kỹ tóg ag mỹ: “ãjag tỹ to jykrén tũ tóg tĩ', sỹ ãjag mỹ nén fy kãmén kỹ,” he mũ. “Kỹ ãjag mỹ ũ to jykrén há nỹtĩnh mũ', sỹ kar kỹ ãjag mỹ nén ũ kãmén mãn kỹ?“ he tóg.
24413	MRK 4:21	Kỹ tóg ag mỹ: “ẽg pijé néj grug kỹ kẽj krẽm fẽg tĩ', ẽg pijé kỹmỹ krẽm fẽg tĩ',” he mũ. “Ti fẽg jafã kri ẽg tóg fẽg tĩ, ti tỹ ẽg mỹ jẽngrẽ han jé.
24443	MRK 5:10	Kỹ tóg to vĩ', to vĩ', he mũ, ti tỹ ẽmã ẽn ki ti kutẽm tũ nĩ jé.
24483	MRK 6:7	Kỹ tóg ũ tỹ 12 (ke) ag jé prẽr mũ. Kỹ tóg ag jẽgnẽg mũ, ũn régre tĩn', ũn régre tĩn' he tóg. Ag mỹ tóg vẽjykre nĩm mũ, ag tỹ vẽjagrẽ kórég pan jé.
24512	MRK 6:36	“Ã tỹ ag mỹ ha mũjẽg', hen kỹ tóg há tĩ vẽ. Kỹ ag tóg ẽmã kar mĩ mũnh mũ, vẽjẽn jãvãnh jé,” he ag tóg
24516	MRK 6:40	Kỹ ag tóg vẽnhmãn kỹ nĩ', vẽnhmãn kỹ nĩ' he mũ. Ũ vỹ tóg 100 (ke) nĩ' he mũ, jo ũ tóg 50 (ke) nĩ' he mũ, ag vẽnhmãn ũ.
24541	MRK 7:9	“Ãjag hã vỹ Topẽ vĩ mranh tĩ', ãjag tỹ ãjag jykre si han kỹ,” he tóg. “Hã ra tóg ãjag mỹ há nỹ.
24558	MRK 7:26	Hã ra fi tóg Grego vĩ hã tó tĩ. Ga tỹ Siro-Fenícia tá ke fi vẽ. Ti mỹ fi tóg to vĩ mãn', to vĩ mãn' he mũ.
24568	MRK 7:36	Kỹ tóg ag tỹ tó kamẽg mũ, hã ra ag tóg tugtó kãn mũ, ti tỹ: “ker tó hẽ', ker tó hẽ',” he mũ ra.
24627	MRK 9:20	Ti jagrẽ kórég tỹ Jesus ve kỹ tóg kyrũ kã vyryn ke mãn mũ gé. Kỹ tóg kutẽ mãn mũ gé sir. Vĩrĩn', vĩrĩn' he tóg mũ. Jãrãn tóg mũ gé sir.
24632	MRK 9:25	Hã ra tóg ũ tỹ hẽn ri ke fag vẽnhmãn vég mũ, kỹ tóg ti jagrẽ kórég to jũ mũ. “Vẽjagrẽ vĩ vãnh', vẽjagrẽ kutu', kãkutẽ ra, ti ki rã mãn tũg,” he tóg.
24705	MRK 10:48	Hã ra ag tóg ti to jũgjũ kỹ “mẽ kã nĩ nĩ,” he mũ. Hã ra tóg prẽr mãn', prẽr mãn', he mũ. “!..Davi krẽ'krẽ'..!“ he tóg. “!..Ijagãgtãn ra..!“ he tóg.
24756	MRK 12:14	Ag tỹ ti tá junjun kỹ ag tóg ón kỹ ti mỹ: “Senhor, ã jykre kuryj nĩ ki kanhró ẽg nỹtĩ,” he mũ. “Vẽjykre pir hã han ã tóg tĩ, vẽnh kar mỹ. Hã kỹ ã tóg Topẽ japry to ẽg kanhrãn há han tĩ. Mỹ há nỹ', ẽg tỹ governo mỹ jãnkamy nĩm ke ti', imposto kajãm ke ti'?
24757	MRK 12:15	Ẽg mỹ hỹn nĩm mũ', vó mỹ vó?“ he ag tóg. Hã ra Jesus tóg ag jykre régre nỹtĩn ki kanhró nĩ. Kỹ tóg ag mỹ: “ãjag ne tóg ón kỹ inh ki jẽmẽ sór mũ',” he mũ. “Inh mỹ jãnkamy jun, sỹ ve jé,” he tóg.
24818	MRK 13:32	“Hã ra ũ pijé isỹ kurã kã kãtĩg mãn ke mũ ki kanhró nĩ', óra ki ke gé'. Topẽ tỹ jẽgnẽ jafã ag pijé ki kanhró nỹtĩ'. Inh pijé ki kanhró nĩ gé', isỹ tỹ Topẽ kósin ra. Ẽg jóg mág hã vỹ ti pin kỹ ki kanhró nĩ, kurã kã nén kutẽnh ke mũ ẽn ki.
24821	MRK 13:35	Hã kỹ sóg ãjag mỹ: “ãjag kanẽ nĩm nĩ,” he mũ gé. Ãjag pijé ti jun ke ki kanhró nỹtĩ', Hẽn ri ke mũn tóg kutyg ke ra jun mũ, hẽn ri ke mũn tóg kuty kuju ki jun mũ, hẽn ri ke mũn tóg galo kyr mũ ra jun mũ, hẽn ri ke mũn tóg kusãg ki jun mũ.
24859	MRK 14:36	Kỹ tóg: “Aba', panh', nén kar han ki kanhró ã tóg nĩ. Kỹ tóg inh mỹ ã tỹ inh jagtar ke tag tỹ tũ' henh há tóg tĩ vẽ. Hã ra isỹ ã mỹ nén to vĩ mũ tag han tũg nĩ, ã tỹ nén han ke mũ ẽn hã han nĩ,” he mũ.
24871	MRK 14:48	Hã ra Jesus tóg ag mỹ: “ãjag ne tóg rógro génh kỹ kãmũ mũ', ka kykyv génh kỹ ke gé'. Inh pijé tỹ bandido nĩ'.
24879	MRK 14:56	Ũ tỹ hẽn ri ke ag tóg ón kỹ Jesus jykre kórég tó mũ, hã ra tóg ag mỹ ki krov tũ pẽ nĩ sir, ag tỹ vẽjykre ũ tó', vẽjykre ũ tó' he mũ ra.
24909	MRK 15:14	Kỹ tóg ag mỹ: “hẽ ri ken kỹ? Ti kórég tỹ ne han ti?“ he mũ. Hã ra ag tóg prẽr mãn', prẽr mãn' he mũ sir. “!..Krunh to ti sã..!“ he ag tóg, prẽnprẽr kỹ.
24927	MRK 15:32	“Cristo jé krunh to kãtére kema', Judeu ag pã'i ti, ẽg tỹ ve jé, ẽg tỹ ti vĩ kri nĩm jé,” he ag tóg. Kỹ ti kóm krunh to nỹtĩ ẽn ag tóg, ti nyg mũ gé.
24945	MRK 16:3	Kỹ fag tóg jagnẽ mỹ: “ũ nỹ hỹn ẽg mỹ ti kej ti nón mũ', tá', pó tỹ nĩfe ẽn ti'?“ he mũ.
24950	MRK 16:8	Kỹ fag tóg ti kej tá fũrũrũn kãpa mũ. Pétẽ fag tóg mũ mũ sir, fag mỹ e tĩn kỹ, fag tỹ jũrũn ke kỹ. Fag pijé ũ mỹ nén ũ tó mũ mỹr', fag kanẽ jur kỹ.
25005	LUK 1:43	Inh Senhor mỹnh fi hã ne tóg inh venh kãtĩ mũ', kỹ tóg inh mỹ sér pẽ tĩ',” he fi tóg.
25007	LUK 1:45	Ã hã ne tóg Topẽ vĩ kri fi', ti tỹ ã mỹ vẽnh vĩ jẽnẽn kỹ. Hã kỹ tóg ã ve há han. Kỹ ã tóg venh ke mũ, ti tỹ ã mỹ nén tó ja ti,” he fi tóg, Isabel fi, Maria fi mỹ.
25010	LUK 1:48	Inh ki tóg ẽvãnh mỹr. Tỹ sóg ti mỹ rãnhrãj tĩ fi nĩ. Inh pijé tỹ ũn mág fi nĩ', hã ra tóg inh ki ẽvãnh. Kỹ vẽnh kar tóg iso: Topẽ vỹ fi ve há han, henh ke mũ.
25011	LUK 1:49	Topẽ hã ne inh mỹ ẽg tỹ nén ve vãnh han', ti tar nĩn kỹ, hã kỹ tóg inh mỹ ti tỹ nén tó ja tag han. Jykre kuryj ti nĩ, Topẽ ti, kỹ ti jiji tóg ẽg mỹ mẽ há tĩ.
25061	LUK 2:19	Kỹ Maria fi tóg to jykrén mũ gé sir. Fi pijé kã jatun mũ', to jykrén tãvĩ han fi tóg nĩ nĩ.
25062	LUK 2:20	Kỹ ag tóg sir ag mẽg to vỹnvỹn ke mũ gé. Topẽ mỹ ag tóg vĩ há han mũ. “Ti hã ne tóg ẽg mỹ ti tỹ jẽgnẽ jafã ag tỹ vẽnh vĩ jẽnẽ ja nĩ', hã kỹ ẽg tóg vé,” he ag tóg mũ sir.
25106	LUK 3:12	Kỹ ũ tỹ governo mỹ imposto kaja mãg tĩ ag vỹ João to kãmũ mũ gé. Kỹ ag tóg ti mỹ: “ẽg kanhrãn tĩ', ẽg hỹn hẽ ri kenh mũ?” he mũ gé.
25181	LUK 5:5	Kỹ tóg ti mỹ: “kuty tag kã ẽg tóg rede tỹ ki fón', ki fón' he ja nĩgtĩ vẽ. Hã ra ẽg tóg nén ũ kãgmĩ ja tũ nĩ. Hã ra sóg ã vĩ tugrĩn ki fón mãn ke mũ ha,” he mũ.
25212	LUK 5:36	Kỹ tóg fag mỹ: “inh jykre tãg vỹ, ge nỹnh mũ, ha mẽ,” he mũ. “Ẽg pijé, ẽg kur tãg kókég tĩ', ẽg tỹ ẽg kur si jar kã nĩm jé. Ẽg tỹ jagnẽ mré ki sigse kỹ tóg ki par tũ nĩnh mũ,” he tóg.
25217	LUK 6:2	Hã ra Fariseu ũ ag tóg ag vég mũ. Ag mỹ vẽnh rãnhrãj vẽ, ag tỹ trigo rynhranh mũ ẽn ti. Hã kỹ ag tóg ag mỹ: “ãjag ne tóg nén han ke tũ han mũ nĩ', vẽnhkán ke kurã ki',” he mũ.
25224	LUK 6:9	Kỹ tóg ag mỹ: “sỹ ãjag ki jẽmẽnh ke,” he mũ. “Vẽnhkán ke kurã ki ẽg hỹn ne han mũ', ẽg tỹ Topẽ vĩ ki króm jé? Ẽg mỹ hỹn nén ũ há han mũ'? Ẽg mỹ hỹn nén ũ kórég han mũ'? Ẽg mỹ ũ kren han mũ hỹn'? Ẽg tỹ ũ tén kỹn mỹ há nĩnh mũ hỹn'?” he tóg. Hã ra ag tóg ti mỹ nén ũ tó tũ nĩ.
25250	LUK 6:35	Ag jãvo ũ tỹ ãjag kato vãsãnsãn mũ ag to há nỹtĩm nĩ, ha mẽ. Vẽnh kar mỹ prestar hem nĩ, ag tỹ ãjag mỹ ãjag tũ nĩm tũ hã ra. Kỹ ãjag tóg kanhkã tá venh ke mũ, ãjag tỹ ũri nén han mũ tag ri ke ti. Hã ki ãjag tóg tỹ Topẽ krẽ nỹtĩ, ãjag tỹ ti ri ke han kỹ. Ti hã ne vẽnh kar mỹ vĩ há han kãn tĩ ver', ũn jykre kórég kar ag mré hã.
25257	LUK 6:42	Kỹ ãjag tóg ti mỹ: “sỹ ã mỹ ã jykre kórég kurynh há tóg tĩ,” he tĩ', ãjag tỹ ãjag jykre pãno tãvĩ ẽn kurynh jãvãnh hã ra. Ke tũg ra. Ke tũ nĩ mũ ra ãjag tóg jykre régre nỹtĩ. Ãjag jykre kurynh vén nĩ, kar ãjag tóg ãjag régre ag jykre kurynh há han mũ,” he tóg.
25259	LUK 6:44	Ẽg tỹ ti kanẽ ve kỹ ẽg tóg: ũn kanẽ ko há ja vẽ, henh ke mũ. Ke tũ nĩn kỹ ẽg tóg: ũn kanẽ ko vãnh ja vẽ, henh ke mũ. Sónh to ẽg tóg, pẽnva vég tũ nĩgtĩ mỹr', kar ẽg tóg, vãnh tỹ jóhó to uva vég tũ nĩgtĩ gé.
25261	LUK 6:46	“Ãjag ne tóg inh mỹ: Senhor', he tĩ'. Hã ra ãjag tóg isỹ ãjag mỹ nén tó mũ ẽn han vãnh nỹtĩgtĩ. Kỹ tóg vẽnh mỹ nỹ.
25273	LUK 7:9	Kỹ tóg ti mỹ e tĩ. Kỹ tóg ag mỹ: “Israel ũ pijé ti ri ke nĩ', ti tỹ tỹ fóg hã ra',” he mũ. “Ki kanhró tóg nĩ mỹr, kỹ tóg inh ki rã kỹ jẽ. Ge ve ja tũ sóg nĩ. Há' he kỹ ti nĩ ha, ti mỹ rãnhrãj tĩ ti,” he tóg.
25283	LUK 7:19	Kỹ tóg ti mỹ e tĩ. Kỹ tóg ti to: “Topẽ tỹ ũn jẽnẽg mũn hã mỹ vỹ?” he mũ. Hã kỹ tóg ti mré mũ tĩ régre ag jẽgnẽg mũ, ag tỹ Jesus mỹ: “ã hã mỹ'?” he jé.“ Ẽg mỹ ũ jãvãnh mãn ke tũ nĩ ha', ã pãte?” he sór ag tóg mũ.
25284	LUK 7:20	Kỹ ag tóg ti mỹ: “João Batista vỹ ẽg jẽgnẽ, ẽg tỹ ã ki jẽmẽ jé,” he mũ. “Ã hã mỹ'? he tóg. Ẽg mỹ ũ jãvãnh mãn ke tũ nĩ ha', ã pãte? he tóg, João ti,” he ag tóg mũ.
25310	LUK 7:46	Ã pijé inh gãnh tãg ja nĩ', ã jãvo fi tóg inh pẽn tãg.
25313	LUK 7:49	Kỹ ti mré jẽg mũ ag tóg jagnẽ mỹ: ”ti mỹ ẽg tỹ Topẽ vĩ mranh tỹ vẽnh pãte fón ke mũ vỹ?” he mũ. “Topẽ hã ne vẽnh pãte fón há nĩ', hã kỹ tóg ẽg mỹ vẽnh mỹ tĩ,” he ag tóg.
25329	LUK 8:15	Kar ga há ki krãn kỹ nỹtĩ ag vỹ, ge nỹtĩgtĩ gé. Jẽmẽg ag tóg tĩ. Kỹ ag tóg, ag fe tỹ ti ki rã mũ sir, ag tỹ ti vĩ ki króm jé. Kỹ ag tóg, kanẽn há han mũ sir. Komẽr hã ag tóg, kanẽn há han', han', he mũ, ag tỹ nén ũ jagy vég mũ ra,” he tóg.
25332	LUK 8:18	“Hã kỹ jẽmẽ há han nĩ. Ũ tỹ to jykrén há han kỹ tóg, ũ to jykrén mãn', ũ to jykrén mãn', henh ke mũ. Ũ tỹ inh vĩ to jykrén há han tũ nĩn kỹ tóg ti mỹ tũ' he kãn ke mũ, ti tỹ nén ũ to jykrén mũ kar ẽn mré hã,” he tóg.
25338	LUK 8:24	Kỹ ag tóg ti rĩn mũ sir. “Senhor', Senhor', ẽg mỹ tóg ẽg kãgter ha mẽ tĩ,” he ag tóg. Kỹ tóg rĩr mũ sir. Kỹ tóg kóho mỹ vĩ mũ, goj mỹ ke gé. Kỹ tóg krỹg' he mũ sir, kóho ti. Katy' he tóg mũ sir.
25362	LUK 8:48	Kỹ tóg fi mỹ vĩ há han kỹ: “inh kósin', ã tỹ inh ki rã kỹ ã tóg há' hé. Ha tĩg, jatun mỹ,” he mũ.
25413	LUK 9:43	Kỹ tóg vẽnh kar mỹ e tãvĩ tĩ.“Topẽ ne tóg tỹ ũn mág pẽ nĩ', ti jykre tóg há tãvĩ nĩ,” he ag tóg mũ sir. Kỹ tóg ti mré mũ tĩ ag mỹ:
25433	LUK 10:1	Kỹ Jesus tóg ũ tỹ 70 (ke) ag vin mũ gé sir, ag tỹ ti jo mũ jé. Ũn régre tĩn', ũn régre tĩn' he tóg. Ag mỹ tóg: “ẽmã kar mĩ Topẽ vĩ kãmén mũjẽg,” he mũ. Ag nón tóg ra tĩg sór mũ gé.
25474	LUK 10:42	Nén pir hã ne há nĩ', hã vỹ: inh vĩ, he mũ. Maria fi vỹ inh vĩ hã jẽmẽ sór mũ. Kỹ sóg fi mỹ: “ha nén ũ han,” he sór tũ nĩ. Nén ũ há kuprẽg fi tóg, fi tỹ inh vĩ jẽmẽ sór kỹ,” he tóg.
25482	LUK 11:8	Hã ra tóg sir to vĩ mãn', to vĩ mãn' he mũ. Hã kỹ tóg nĩ kỹ ti mỹ nĩm mũ sir. Ti régre vẽ. Ge ra tóg ti mỹ nĩm ke tũ nĩ vẽ. Hã ra tóg ti tỹ ti mỹ to vĩ mãn', to vĩ mãn' he tugrĩn ti mỹ nĩm mũ sir,” he tóg.