24866	MRK 14:43	Galanggannd Jesus uw errgennam, abm elgor itom edn olon igunag edn. Judas-an idndamag igunm edn olon. Abm omoriy abmbannd ingang Jesus-ang, abm itod amb elbenm il ingun Jesus. Priests amay edn, scribes edn, abm ukirrngg edn abm elgor awar it elarr edn ednangan. Ar uyulgng ilg elarr edn ednangan, ulgnggul errbaniy. Uwam adel ag edn, Judas ogngg abm elgorag errgel il ednangan, “Puy ambul! Ay iyannd uw iyarrwiyanag ay urrangan. Abm algam ononggab ew arrchangan ay ingun. Abm itom il! Arrfil urr ingun! Iyarrwiyaniy algngal urr ingun!” Judas-an olon adel il, algal amb igurr il ingun Jesus. Errgel il, “Master!” Ilimb ew arrcharr il ingun. Ilimb abm elgoriy atatan-g arrfirr edn ingun Jesus. Abm omoriy ononggab Jesus-ang ingang ar uyulgng ignggirr il, abm ononggab adndur ekarr il arurrf. Abm itom amb il Priest amayang. Jesus errgel ednangan, “Ar uyulgng ilg, aneg adel urr adun ulgnggul ilg awiy, abm arrfinag al adun urr? Abm ay alwur obmbay anganj ay! Abm ay itod amb inann ay, Temple-iy inann ay urranganjerr. Ar ogngg arrfinm adun urr?” Abm omoriy ingang undamarr ugnggirr edn ingun Jesus-ang. Ew orrchel edn.
24935	MRK 15:40	Abm onporramp ogngg anen igunm edn ingunjurr, errk Galilee itod, egng awiy arrchenm edn ingun, itod uw errnenn edn il adniy ikinm edn ingun, ewann edn. Mary Magdalene, Mary (amangarr abm elngkelnggang ukal James, Joseph ulang) Salome, abm onporramp erray errbaniy igurr edn olon ingunjerr Jerusalem-ag, ilimb ewal edn ingun ulfinam.
24937	MRK 15:42	Ilimb il abm alkal arrcharr ambel, “Errk preparation”, ilimb itodam sabbath atuwirr edn. Ilimb Joseph abm Arimathea-m igurr il Pilate-an ampeylnag ingun. Abm il ugnggannudnyay ilimb il angirranginiy igurr il. Abm il abm eg udnam, abm adnjiy councillor il, ibangarr alkalg idann il ingun errk udnam ambanag ingin. Errgel il ingun Pilate-an, “Inang abm umalangg ayin uwag inang adun itom, Jesus?” Ilimb il Pilate orol alnggebalnggel abm alkal il ugngal ulfirr. Ilimb il ingun abm arrchun amay udndarr, ampayirr il ingun, “Abm ayin ulfirr il?” “Iyang. Ulfirr.” Ilimb Pilate il abm umalangg uwal il ingun, Joseph-an. Joseph kalak arrfar algnganm il, ilimb il uk adoram alnggan ambarr il ingun adnim. Ilimb uwurrag ambarr edn ingun. Ugunbly errkew amay adndand errmber errk ew anggayerr ugnggirr edn ingun. Ilimb edn adndand amay ugnggirr edn errk ewamennd. Mary Magdalene, onongg il Mary (amangarr Joseph-ang) ewann ul ednangun abm ingun abm alkal ugngginam.
24943	MRK 16:1	Sabbath anen arrmel edn Mary Magdalene, Salome, Mary (amangarr James-ang) uk ilbmb algnganm edn ingun, idnnannd uninag ingun Jesus. Arrcharr ugng el artinamiy, ugunbag igunm edn awar. Awinnd errgann amban errbel edn, “Adndand abm annul ambungan err amug? Adndand amay idnnan il.” El ikirr edn adniy, errk ew anggay ewal edn, adndand ogngg amurr abm annulenn. Anen ulgal adel edn, ilimb abm elngkelngg ewal edn ininannam. Alagiy inann il kawun arrfar ilg. Ilimb onporramp edn orol alnggebalnggel. Abm elngkelngg itom errgel il ednangan, “Abm urr aneg ugnggay? Ay urrangan an uw aliyan, abm urr ingun Jesus agnggan. Odnndorag arrirr edn ingun, uk adoriy, abm ilimb il onggom anganj. Errk ayin ew urr ingin, abm anen ugnggirr edn ingun? Abm idnyur ambel il, artirr il onggodam. Puy elk urr, ingin ilg! Abm omoriy ingun undamag ingin elbel, Peter-an awiy. Aba il urrangan ogngg igungan errk ukal inndod onggomag, errk Galilee, ilimb urr orren igul. Itod ew urr ingun iyannd ogngg anen elbenm il urrangan.” Ugngganny artirr edn errk ewangand itomiy, idnjin artirr edn. Irrchirrchil edn. Ilimb edn ingin abm errayag anganj elberr, abm ugngganniyerr edn.