Wildebeest analysis examples for:   kjn-kjn   y    February 11, 2023 at 18:53    Script wb_pprint_html.py   by Ulf Hermjakob

24330  MRK 2:1  Errk ilimbam elkel il uwam, Capernaum-g elkel il. Ilimb edn elben errbel, “Abm angg elkel il, unggul orchen-g in il.” Ilimb abm elgor orrnjel edn, errk urrgarr edn kungar ew andand igag inann igunm edn, erray adnim errnenn edn. Il ednangan ingin udnam elbenm il ednangan. Ilimb edn abm errab adel, abm udnbar ilg, adoriy algnganm edn. Anganjab ulgal adenn edn, abm elgoriy errk urrgarr. Ilimb edn kungar adnim artirr. Ilimb edn errkw adnim iyarr algal ingun abm alkalg errnerrnennamag. Ilimb edn urunnd alnggan ambarr edn ingun uk ador ilg abm udnbar itiy. Ilimb il ednangan anen ewal abm edn ingun ondonganm errgel il ingun abm udnbarag. “Elngkelngg! Ay inun ugngal arrk anggunyan inin udnam ambarr.” Abm edn abm scribes edn ininann adnduriy aliyan errbenn edn abmban, “Abm il galanggannd aneg errg? Aba orrm il, abm ibangarr alkarnj errk anggunyan udnam ambarr! Abm onggom il odnnd ewerrnyel ambaniyerr orrnjen ingun ibangarr alkalg!” Abm il ednangan an uw aliyanm abm edn anen adnduriy allyan errbenn edn abmban. Errgel il ednangan: “Abm urr aneg adnduriy allyan errb abmban? Abm ilimb ay arrin errgeg ingun abm udnbarag? Galanggannd, ‘Errk anggunyan inin ugngal an udnam ambarr ay.’ Ilimb ay galanggannd errgeg ay ingun, ‘Artil inang! Agarr adamb atal inin, puy igul!’ ingun kawun egnggal arrfinag ilimb onggol antenn oyol ambengan ay.” Orren idumbag abm elgoriy elkarr il, ilimb kawun egnggal arrfirr il ingin. Itodam ilimb idnnan ewann errbel il ijam akarrkarrel, olbong awiy arrmel ingin. Ilimb ingun Jesusorol ukirr. “Abm angg adun anen anbarel, abmal adun onggol uw arrfirr. Orol angg ambey ay.” Ilimb il aykel, errnel il, errgel il abm elgorag itom: “Kawun aden annul arrfirr?” Ilimb abm omoriy ingin errgel ingun, “Abm elgor angg ayin ew inang igigunam? Abm aneg ampayin inang, ‘abm anennd ambarr inun, annul uw arrfiyenn inun?’” Ilimb il el anggan anggannd igurr il, abm ewannag il, abm annul arrfirr ingun. Ilimb il aba errmerriy itom aliyan errbel, idnnan oyol ambel il, igurr il ingun, ilimb ognggegamennd errmbel il ingun ugngg ewag. Irrchirrchil il ugnggann, ilimb il ingin ingin elberr il. Jesus errgel il ingun, “Onpor! Puy igul inang. Abm ugngal inang an. Abm ay inun idnnan etetal ambarr, abm inang adun anen aliyanm abm idnnan iyaliyamag.”
24468  MRK 5:35  Ilimb abm adnjiy onongg adenn alol il uw ilg. Kungar errk abm adnjiyam itolng ingin adel il. “Abm alkal itom int algngan inang inun.”
24508  MRK 6:32  Olbonnd igurr edn, elor, errk abm aremamag, abm elgoriy ewal edn igunam ednangan, abm edn elemag ednangan, ilimb edn ognggogngg idnjirr ognggam idannag. Inchim elgoram itomiy edadelag idnjirr edn. Ilimb anen il olbonngand artirr, abm elgor ewal, ilimb il arrmirr il ednangan abm omoriy aremag. Ilimb ingin udnam elbenm il ednangan. Ugng anan alnggarr, ilimb edn abm omoriy ingin igurr edn ingun, errgel ingun: “Errk angg abm aremarr ambungan, errk ulbun an elkel. Karrey ela ednangan. Ak igun edn egng afanag, egng ijanag awiy edn.” Ilimb il ednangan errgel, “Egng onggom ar uw urr ednangan egng ijanag.” “Egng anganj onggom! Ilimb $200 ayin uwag anndan egng afanag anndan, ilimb abm elgorag angg uwannag awiy, egng ijanag?” “Egng ilimb arrinjag urr algnganm? Egng ecb ayin ewann al!” Egng ewannam itom, ilimb elkel edn ingun, “Egng scone onggom erraberrab, uy angg ujir.” Ilimb ednangan abm alkarnj elberr ategerregarr injanganj ukanantamennd inann igun edn. Ilimb afarr il egng uy errbaniy, ilimb el adniy errk angar ewann errnel il, ilimb egng itom iyarrwiyarr il ednangan ilimb ub ubmarr il, abm omoriy ingin undamag uwal il, abmag uwann igunag edn ednangan. Ijarr edn, edor ambel edn. Ilimb abm omoriy ingin undamarr egng entental uy elgay errbaniy ogngon ambarr. Abmbin errabiy ewidnndannd amb. Abm elgor idnnannd ijarr edn egng itom, abm arrkannd 5,000.
24521  MRK 6:45  Agagwin il ednangan abm alkarnj elberr abm omoriy ingin, “Urr olbonnd ogngg igul, og abmb, anb awandag, Bethsaida-g igul.” Ilimb abm erray errkig err elarr il ednangan. Ilimb il ednangan abm omoriy ingin ugnggirr, alkal abm ibangarr ingun undamag errgennag il ognggegamennd errmbennag igurr il adniy olwon-g. Errk anen ulbun ambel, uk olbon abm omoriy ingin undamarr og ifimennd errnenn ambarr, ilimb abm alkal elor errk anbamennd errnenn il. Ilimb ewal il ednangan orrfoyerr ikinm ambanm ednangan, ilimb anngal arem ambel edn, uk olbon ignggigngginam. Ilimb errk ugngugngal egnggenniyerr, adel il ednangan, il abm alkal, odnyol adnim igunm il. Abm idnnan il ednangan udarrw iguyenn, ilimb abm omoriy ingun undamarr ewal edn ingun, odnyornj igigunam, ilimb ambel edn ar oroleb igunm il, ilimb alkarr edn, ugnggann edn. Ilimb errgel il ednangan, “Ar ugnggay urr! Abm urr ar ekelekey adun? Abm onggom ay igigun.” Ilimb artirr il ednangan olbon-g adniy, itodam ilimb orrfoy edndelag arrmel. Ilimb edn abm omoriy ingin orol alnggebalnggel, ilimb edn abm alkarnj egng errab itod anen abm elgor edor ambarr il. Abm edn ingun anganj aliyanm, adndur odong ambenn edn.
24529  MRK 6:53  Ilimb edn anen orrog alnggarr, ilimb edn uk olbon adniy elebag ignggirr, errk ukal Gennesaret. Ilimb olbonngand anen artirr edn, abm alkalg ingun abm elgor elemag ambel edn. Ilimb edn idnjirr eremperemp udnal, abm adnjilg elgeniy olon agarr ilg algnganm ingun abm alkalg, anen aliyanm edn errk unggulg igunamag. Ilimb il anen adenn, abm adnjilg err kungar andand ojojenm edn errk umbuchiy awiy. Ilimb edn ingun abm adnjilg errgenn, “Anndan inun kawun egnggal inin ak arrfin, idnnan oyol ambennag anndan.” Ilimb edn arrfinam anen oyol ambenn amb edn.
24826  MRK 14:3  Errk ukal Bethany tod udnal il abm alkal. Inchimiy ingin undamarr Simon-ang udnann il. Simon ijam arrmel il, ijam ukal leprosy. Jesus egng ilgag ijanm ul, ilimb abm aber adel ulangan, uk olom alaminjinjal owol udnam udnam algngarr il ulangan. Uk olom alaminjinjal ukal nard algngarr il, uk ilbmb money amayerr afanam il. Ew erarr il, egamennd ontagirr il ingun. Edn errayennd ininannam edn, errgenn amban errbel edn ingun. “Aneg arr ambarr il ononggiy? Ambul angg money atat afayenn itomiy ambul, uk olom alaminjinjal itolg $300 afayenn ambul. Ilimb abmbangandag ednangan, money ew aremag ednangan, ambul uwayenn ednangan.” Ilimb edn elberr edn ingun, abm aber itom. Adnant alwur oyel edn ingun. Jesus errgel il ednangan, “Ugnggil urr! enenolg elben errb urr! Abm anengand alwur artartin urr? Udnam ambarr il adun. Edn money aremarr igigun edn, urranganjerr titod amb igigun edn. Eladnarrang igigun edn. Urr money ilg urr, urr uwag ednangan, money aremag uw urr ednangan! Ay onggod aremag inag. Ay angg err uw igungan ay. Abm aber onggom angg adel il, uk olom alaminjinjal owel udnam ilg adenn ambarr il adun, uwal il adun. Abm ugngal arrcharr ambengan ay, uk olom alaminjinjal ogngg ontagirr il adun, abm owel udnam artin ay. Abm ay idnnan elben urrangan ay; abm elgoriy iyannd ingin onggom aliyangan edn, edn iyannd aliyangan edn ingun abm aber angg, errk ednang undamam aliyangan edn. Udnam afarr il adun.” Ilimb Judas Iscariot il abm omoriy Jesus-ing ingang igurr ednangan il, Priests atatag igurr ednangan il. Errgel il, “Iyannd arrfingan ay ingun Jesus, ilimb uwangan ay urrangan. Puy urr atuwil!” Priests atat edn aliyarr edn ingun Judas, ilimb ekelekel edn ingun, money adndurag ikirr edn ingun. Ilimb eliyarrwiyanm il ingun.
24835  MRK 14:12  Errk egngenniy ilimb egng arronggom ijanm edn. Inn arrirr edn, inn sheep amboch arrirr edn, inn arronggoraag. Ilimb abm omoriy ingin errgel edn ingun: “Abm arrin igug anndan, egng arronggom arrchenag?” Ilimb abm ujir elarr il. Errgel il ulangan, “Kungar elgor it ugnggarr errn. Puy ubal ugnggar. Abm algam ononggab itom ewangan ubal, og algngalgnganam ewangan ubal. Orren arrkarrkil ubal ingun. Inchim ononggabiy elkengan il. Itolg elkal ubal, abm ukirringg ukil ubal ingun. Galanggannd errg ubal ingun: ‘Jesus il elarr alinnan il, abm alinn ampayinag inun alinn, errk ayin anndangan? Errk abm inannag anndan, errk ebmbebmbolrnj, inndod egng ijanag anndan?’ Ilimb errk adniy eleg ambangan.”
24845  MRK 14:22  Edn egng ijijanm edn, egng damper afarr Jesus il, ibangarr alkalg ampayirr il: “Angg ayin iyarrwiyal anndangan.” Ilimb egng itom ubmarrubmarr il, abm omoriy ingin undamag uwal il ednangan. Errgel il ednangan, “Angg afal urr, idnnan aden onggom.” Ilimb egng orch afarr il, onderr ibangarrag uw errgel il, uwal il ednangan. Abm elgoriy amb ijarr edn. Errgel ednangan, “Olbong angg aden. Abm elgorag ontagin ay urrangan, ulfinam. Olbong aden ilgag ambey ambung abm elgor anggiy ibangarr alkalg. Idnnan elben ay urrangan, egng orch onggod ar uw ijangan ay, ilimb errk alkalng undamarr adniyerr onderr uw ijan alongan ay.”
24849  MRK 14:26  Ilimb odnjen hymn errgel edn. Olwon-g igurr edn adniy, olwon ukal Olives. Errk ukuy odn-genm edn adniy, uk ar olbmbannd odn-gen. Jesus errgel il ednangan, “Ay iyannd urraden ambangan urrangan. Urr elor amb ugnggingan adun urr. Edn anamokom olfernj ar alnggur iyanm edn adun. Galanggannd errgenn edn adun: ‘Alkarnj abm angg olon adenn ambanag il ambungan. Abm itom il urrangan ar sheep atuwinag il urrangan. Ilimb ibangarr alkarnj odnndorag abm arringan ingun. Abm arsheep arrngal ambengan urr.’ Ay idnyur ambennag ay ilimb. Ibangarr alkarnj arrmangannd artinag adun il, ilimb ifanny elkengan ay, Galilee itolg adengan ay ogngg, orren.”