1	GEN 1:1	Dameŋ fufuŋkenao Anutuzi sambâŋ â mâreŋ bâfuac‐jofawec.
2	GEN 1:2	Ehame mâreŋ e sisifucne â tacne fowec, â ʒâkâŋ ʒora duŋdapâczi foŋkewec, ehame opâ faicko Wofuŋte Mârozi teŋ hâmorâ rac warec ewec.
3	GEN 1:3	Eme Anutuzi ʒiŋuc muwec: “Tamaeoc!” Mume tamaewec.
4	GEN 1:4	Eme Anutuzi tatamac honeme biaŋkeme tatamac â dapâc bâtâc bacjofawec.
5	GEN 1:5	Ehuc tatamacte ʒâŋe ʒoaŋ â dapâcte ʒâŋe ŋafe mujactewec. Iŋuc eme hae ŋaferâ fureme ʒoaŋ 1 tarawec.
6	GEN 1:6	Tarame Anutuzi ʒiŋuc muwec: “Opâ ŋondeŋko aka sanaŋ moc fuaoc, ehuc izi opâ bâtâc bazejec.”
7	GEN 1:7	Iŋuc mume opâ ŋondeŋko aka sâko fuarâ izi opâ bârâwiŋneme tâcnerâ faic moc ewec â juwic moc ewec.
8	GEN 1:8	Iŋuc fuame Anutuzi aka irec ʒâŋe sawa muwec. Eme hae ŋaferâ fureme ʒoaŋ 2 tarawec.
9	GEN 1:9	Tarame Anutuzi ʒiŋuc muwec: “Sambâŋ rurumaŋnao opâ mockoa qâzuckepie kereŋnezi fua tâcneoc!” Mume iŋuc fuawec.
10	GEN 1:10	Eme Anutuzi kereŋne irec ʒâŋe mâreŋ muwec â opâ ʒâkâŋ sâko irec ʒâŋe hâwec muwec. Eme honeme biaŋkewec.
11	GEN 1:11	Eme Anutuzi muwec: “Mâreŋte faio wiac fofone i âkeʒurâ wefuoc! Nânâ monʒaŋ ʒariŋ wiac ukichec sasawa, â jâc wiac hândâŋ ukichec sasawa, iŋucne fuŋne fuŋne wefunʒepieŋ!” Mume iŋuc hâcne fuawec.
12	GEN 1:12	Mâreŋzi âke sueme nânâ monʒaŋ ʒariŋ wiac fuŋne fuŋne, ukic‐jeŋichec sasawa wefumbiŋ, â jâc fuŋne fuŋne fârihec â fârimaŋko ukic‐jeŋichec sasawa. Eme Anutuzi honeme biaŋkewec.
13	GEN 1:13	Iŋuc eme hae ŋaferâ fureme ʒoaŋ 3 tarawec.
14	GEN 1:14	Tarame Anutuzi ʒiŋuc muwec: “Sambâŋko ʒoctamac fua raniŋ. Jaŋe hâcne ʒoaŋ â ŋafe bâtâc bacjofanʒepieŋ, ehuc hoemaŋ â sâko ʒoaŋ, gie bapa â jara irec dameŋ mufua‐nârehuc doma ranʒepieŋ!
15	GEN 1:15	Ehuc sambâŋte ʒoctamac erâ mâreŋ âke tamaenʒepieŋ!” Mume iŋuc fuawec.
16	GEN 1:16	Anutuzi iŋuc ehuc ʒoctamac sâko jajahec bâfuac‐jofawec, kâcɋene moc e ʒoaŋko micne barâ juocte â kâkâcɋene moc e ŋafeo micne barâ juocte. Erâ wâc bâpiŋ mâmâc bâfuac‐jopawec.
17	GEN 1:17	Jaŋe mâreŋ âke tamaeniŋte â ŋafe ʒoaŋ soŋaŋ‐jofahuc dapâc â tatamac bâtâc bacjofaniŋte Anutuzi sambâŋko hâcne râec‐jopawec.
18	GEN 1:18	Eme Anutuzi honeme biaŋkewec.
19	GEN 1:19	Iŋuc eme hae ŋaferâ fureme ʒoaŋ 4 tarawec.
20	GEN 1:20	Tarame Anutuzi ʒiŋuc muwec: “Opâ jaŋere maŋko opâ qowi fuŋne fuŋnezi fuarâ fusucmapie qiriŋ sâko fuazejec â wipe jaŋe sawao furuc furuc qahuc junʒepieŋ!” Mume fuawec.
21	GEN 1:21	Anutuzi hâwec qowi sâko mako mecne â wiac jujune fuŋne fuŋne opâmaŋko qiriŋhec foŋgopieŋ, â wipe fakechec fuŋne fuŋne, iŋuc bâfuac‐joparâ honeme biaŋkewec.
22	GEN 1:22	Eme Anutuzi ʒiŋuc muhuc jambuŋ‐jopawec: “Ŋoŋe ukichec erâ sawe mâririackehuc opâ hâwec sâcke‐fârenʒepieŋ â wipe jaŋe mâreŋ faio sawenʒepieŋ!”
23	GEN 1:23	Iŋuc mume hae ŋaferâ fureme ʒoaŋ 5 tarawec.
24	GEN 1:24	Tarame Anutuzi ʒiŋuc muwec: “Mâreŋzi wiac jujune fuŋne fuŋne kiweckerâ rozejec, hae qowi â homa gisic â kâte qowi fuŋne fuŋne!” Mume iŋuc fuawec.
25	GEN 1:25	Anutuzi hae qowi fuŋne fuŋne â kâte qowi fuŋne fuŋne erâ homa gisic wiac fuŋne fuŋne iŋuc hâcne bâfuac‐joparâ honeme biaŋkewec.
26	GEN 1:26	Eme Anutuzi ʒiŋuc muwec: “Ajoc! Nâŋâc nâŋâcne hawarire sâcko ŋic bâfuac‐jopanaŋ! Jaŋe hâwec qowi â sawa wipe â hae qowi â kâte qowi sasawa erâ homa gisic wiac mâreŋko babarâ jueŋgopieŋ jaŋe ŋicwofuŋ ejarenʒepieŋ!”
27	GEN 1:27	Eme Anutu e hawari‐ticnere sâcko ŋic bâfuawec hâcne. Ŋic â ŋokac bâfuac‐jofawec.
28	GEN 1:28	Erâ jambuŋ‐jofahuc ʒiŋuc jasawec: “Ɋârichec ehuc fua sawec erâ mâreŋ ŋefusucmahuc ruckenʒepieŋ. Ehuc hâwec qowi â sawa wipe â mâreŋ qowi gisic wiac sasawa ŋicwofuŋ ejarenʒepieŋ!”
29	GEN 1:29	Anutuzi iŋuc murâ ʒiŋuc jasawec: “No monʒaŋ wiac ukic‐ticne tie raekac â jâcfâri nânâne ukic‐ticnehec ʒi râe‐ŋactekopac, izi nânâ‐ŋekic ezejec.
30	GEN 1:30	Â mâreŋ qowi â sawa wipe â homa gisic wiac nokafehec bâfuac‐jopakicne, jaŋere nânâ ine sopâc hofâ qinʒiŋ wiac râekopac.” Eme iŋuc fuawec hâcne.
31	GEN 1:31	Eme Anutuzi wiac bâfuawec i hone‐fâreme biaŋne jâmbâŋ ewec. Eme hae mocwâc ŋaferâ fureme ʒoaŋ 6 tarawec.
32	GEN 2:1	Iŋuc hâcne ehuc sambâŋ â mâreŋ jahe kikefuŋ guru sâkofâc‐jekic jaŋehec bâfuac‐jopa‐fârekicne.
33	GEN 2:2	Eme ʒoaŋ 7 ira Anutuzi gie‐ticne batara‐fârehuc gie wiac bawec irec ŋemanaocte hombaŋ ŋewec.
34	GEN 2:3	Iŋuc ehuc Anutuzi ʒoaŋ 7 hâcne jambuŋkehuc bâtiriwec, i wiac mocte mâcne, wiac sasawa bâfua tararâ ŋemanaocte hombaŋ ŋewec.
35	GEN 2:4	Kecʒi sambâŋ â mâreŋ kikefuŋfâc‐jekic jaŋehec bâfuac‐jopa wefukicne irec binaŋ. Wofuŋ Anutuzi sambâŋ â mâreŋ bâfuac‐jofawec dameŋ ira jâc me monʒaŋ wiac fuŋne fuŋne mâreŋko mi fua rawec,
36	GEN 2:5	i Wofuŋ Anuture micte hoezi moc mi hewecte, â gie hesarac ee ŋic mi bâfuac‐jopakicnere iŋuc hâcne fowec.
37	GEN 2:6	Dameŋ ira mâreŋ maŋnaonec rombâŋ sâkozi wefu fehuc waha mâreŋ bâgunuckewec.
38	GEN 2:7	Eme Wofuŋ Anutu e mâreŋzi ŋic moc basarickehuc sâkenao juju mâro ficneme hume ŋic e nokafe herâ ɋârewec.
39	GEN 2:8	Eme Wofuŋ Anutuzi ʒoaŋ wewefunaopec Edeŋko jufu gie moc sararâ ŋic bâfuawec e ira râewec.
40	GEN 2:9	Eme Wofuŋ Anutuzi mâreŋ ecneme e jâc hone aŋacnehec â fâri nânânehec biaŋne fuŋne fuŋne âke sueme wefuwec, jufu ʒâʒâŋiŋnao ine jujujâc â fuŋne mamana jâc jahe wefupic.
41	GEN 2:10	Opâ kâcɋene moc e ine Edeŋ jufu gieonec wefurâ bâbâgunuc gie baku gieonec waha fâuckeme sohocne 4 ewec.
42	GEN 2:11	Moc ʒâŋene Pisoŋ, izi Hawila mâreŋ orâŋke‐fârekac. Ira gol fokac.
43	GEN 2:12	Mâreŋ irec gol i furi sâko. Ira wâc Bedolac sâfâ â Soham qânâ fokopirec.
44	GEN 2:13	Opâ ombâŋne moc ʒâŋene Gihoŋ. Eki Kusu mâreŋ orâŋke‐fârekac.
45	GEN 2:14	Â ombâŋne moc ʒâŋene Tigirisi, eki Asiria mâreŋ ʒoaŋ wewefu‐ticnao hurakac. Â ombâŋne moc ʒâŋe‐ticne Eufrata.
46	GEN 2:15	Eme Wofuŋ Anutuzi ŋic rorâ Edeŋ jufu gie ira hone soŋaŋ ehuc giene baocte râewec.
47	GEN 2:16	Râerâ ŋic ʒiŋuc mupaŋkecnewec: “Jufu gieo jâc fârihec doma raŋgopieŋ i sâcne ro nâc efârecmu.
48	GEN 2:17	Fuŋne mamana jâc mocjaha ere fârine moc mi nâjâmbâŋkezemec! Sifu nâcmuo ine hâmo‐jâmbâŋkecmu.”
49	GEN 2:18	Eme Wofuŋ Anutuzi muwec: “Ŋic e buc jume mi biaŋkekac. Irec no ere sâc jaha âgo babafic‐ticne moc bâfuazepac!”
50	GEN 2:19	Wofuŋ Anutu e hae qowi â kâte qowi sasawa â sawa wipe sasawa mâreŋzi bacjoparâ ŋiczi ʒâŋe‐jeŋic weniŋuc muocmu i hone manac eocte ŋictao amec‐jopa fisiwec. Eme ŋiczi ʒâŋe‐jeŋic mufuahuc muocmu i foocte muwec.
51	GEN 2:20	Eme ŋic e hae qoqi â kâte qowi â sawa wipe sasawa jaŋere ʒâŋe mufârewec. E jahacne sâc âgo babafic‐ticne moc ine mi bâfuawec.
52	GEN 2:21	Irec Wofuŋ Anutuzi ŋic ecneme guŋsâko qâmâckeme fowec. Eme tambaraŋne moc unuckerâ fofotacne biuczi bâbâzickewec.
53	GEN 2:22	Erâ Wofuŋ Anutu e ŋicte tambaraŋ rowec izi ŋokac moc barâ ŋictao jowa rawec.
54	GEN 2:23	Jowa rame ŋiczi honerâ muwec: “Keʒi jâmbomac siec‐nane â biuc‐nane! E ŋickonec rokicnere ʒâŋene Ŋokac mucnezo.”
55	GEN 2:24	Irec hâcne ŋiczi neŋgoc mamac jahec‐ticne behec‐jofarâ ŋonâŋ‐ticnerao qohotame jahe maŋ sahac mocjaha erâ junicmu.
56	GEN 2:25	Ŋic ŋokac jahe mâmâc jaha biuctac juhuc mi mimiepic.
57	GEN 3:1	Wofuŋ Anutu e kâtere wiac jujune gâcne bâfuac‐jopawec jaŋere sâc jâuru‐fârehuc homare gibioczi fejâmbâŋkewec. Eme homa e ŋokac ʒiŋuc muhuc wiocnewec: “Jufuo jâc sasawa doma rakac irec fârine mi nânicte Anutuzi muwec me?”
58	GEN 3:2	Eme ŋokaczi homa âzâcnewec: “Nâhe jufuo jâcne jâcne doma rakac irec hândâŋne sâcne nanacte mana‐nâctekicne,
59	GEN 3:3	â jufu ʒâʒâŋiŋko jâc moc domakac irec hândâŋne ine Anutuzi mi nanacte, erâ wâc mi bâuanacte muwec, iŋuc erâ hâmozipecte.”
60	GEN 3:4	Eme homazi ŋokac âzâcnewec: “Aricne, ŋohe mi hâmonicmu.
61	GEN 3:5	Anutu e ʒiŋuc manakac: Ŋohe hândâŋ i nâpire ʒâŋe‐ŋekic tâcneme e jahacne iŋucne erâ biaŋne â sâqocne irec fuŋne mana taranicmu.”
62	GEN 3:6	Eme ŋokaczi jâc honerâ ʒiŋuc manawec: Jâchândâŋ i nânâne biaŋ â hawarine hone aŋac eene, erâ wâc mamana bâbâfua‐ticnehec muhuc maname biaŋkewec. Iŋuc eku hândâŋ i batararâ nâwec. Nâhuc ŋowene râcneme nâwec wâc.
63	GEN 3:7	Nâpire ʒâŋe‐jekic tâcnewec. Tâcneme biuctac jupic i hone tarapic. Irec qoŋgeŋ rehaczi siŋiŋ furâ jomapic.
64	GEN 3:8	Eme ʒoaŋ otewehuc hae urueme Wofuŋ Anutu e jufuo hata jume fânâŋ‐ticne manapic. Manarâ ŋic â ŋonâŋ‐ticne jahe Wofuŋ Anuture hâwic‐jofame jufuo jâc ŋondeŋko soŋkepic.
65	GEN 3:9	Ehame Wofuŋ Anutuzi ŋic wiracnerâ muwec: “Go wena?”
66	GEN 3:10	Eme muwec: “No jufuo hata jutec fânâŋge manarâ, biuctac jukopacte hâwicnume soŋkepac.”
67	GEN 3:11	Eki muwec: “Biuctac jukomec i mozi gazajec? Go jâchândâŋ mi nâcmurâ mupaŋke‐garepo i moc nâmec me?”
68	GEN 3:12	Ŋiczi muwec: “Ŋokac nohec juocte naremeŋ eki jâchândâŋne nareme napac.”
69	GEN 3:13	Eme Wofuŋ Anutuzi ŋokac âzâcnewec: “Go wemocte iŋuc emec?” Ŋokaczi muwec: “Homazi eatucnume napac.”
70	GEN 3:14	Eme Wofuŋ Anutuzi homa ʒiŋuc âzâcnewec: “Go iŋuc emecte ine hae qowi â kâte qowi jaŋeraonec go mocjaha sâwecgukopac. Go mâreŋko jucmu sâc bugezi foforâ juhuc gâc wândoc nâzemec.
71	GEN 3:15	Erâ go â ŋokac ŋoherao kikisâ sanaŋ râekopac, izi ɋâricge â ɋâric‐ticne jaherao wâc fozejec. Eme eki qizecge âtenʒaŋneocmu, goki ine kike kiririŋne kinʒaŋnecmu.”
72	GEN 3:16	Ŋokac ine ʒiŋuc âzâcnewec: “Kiwechec juhaŋtec ʒâic bocjaha bâfua‐garepemu, eme gozi kicgukuhame naru motec rocjopazemec. Ŋowegere aŋacguha eki bomboŋ egarezejec.”
73	GEN 3:17	Adam ine ʒiŋuc âzâcnewec: “Go ŋonâŋgere dâŋ reŋkehuc jâchândâŋ mi nâjâmbâŋkecmurâ mupaŋke‐garepo i nâmec, irec gore ehuc mâreŋ sâweckekopac! Go ʒâic gie sâko tatara tâmiric bahuc nânâge bâfuazemec.
74	GEN 3:18	Ehame hofâ qinʒiŋ wiaczi giegao kosa fuaha irecnec monʒaŋ wiac nâhuc juzemec!
75	GEN 3:19	Fofoŋac sâkohec nânâge nârahuc juku mâreŋkonec rocgukicnere mocwâc risie mâreŋko jaha huzemec! Gâc wândoczi gâc wândocko jaha risiezemec!”
76	GEN 3:20	Eme ŋic e ŋonâŋ‐ticnere ʒâŋe Ewa muwec, e mâreŋko ŋic sasawa fuambeŋ nâŋâcne neŋgoc fuŋfuŋ ewec hâcne.
77	GEN 3:21	Eme Wofuŋ Anutu e qowi sahaczi ŋaqi ɋâtârâ ŋic ŋokac hejacteme hume rojupic.
78	GEN 3:22	Wofuŋ Anutu e iŋuc erâ ʒiŋuc muwec: “Jei! Ŋic e biac nâŋâcne sâcko biaŋne â sâqocne irec fuŋne mamana ejec! E meticne sicnerâ jujujâcte hândâŋ rorâ nâhuc juju sanaŋ juzacte mi manacnezo.”
79	GEN 3:23	Wofuŋ Anutu e iŋuc murâ ŋic soreme Edeŋ jufuonec hurâ rawec, e mâreŋzi bakicnere hu mâreŋ sawanao e jahac gie he sarac eocte.
80	GEN 3:24	Wofuŋ Anutuzi ŋic ŋokac iŋuc jâpec‐jofame hurapic. Eme Edeŋ jufu gie ʒoaŋ wewefu‐ticnao bâbâricte ʒocbâruŋ âkendâŋnehuc kerubim jajahec jahe jujujâcte hata âte bâzickenicte soŋaŋ râec‐jofawec.
81	GEN 4:1	Eme ŋic e ŋonâŋ‐ticne Ewa ehec jume motec kiweckerâ Kaiŋ rowec. Rorâ ʒiŋuc muwec: “Anutuzi baficnume ŋokâ moc fua‐narekac.”
82	GEN 4:2	Eme ʒuhuckerâ ɋaticne Abe rowec. E sokarâ noniŋ â lama jaŋere hone soŋaŋ gie bawec. Kaiŋ e ine hesarac ŋic erâ juwec.
83	GEN 4:3	Eme jufeku Kaiŋzi gieonec nânâ wiac rorâ Wofuŋ taha bâzi rikecnewec.
84	GEN 4:4	Â Abe e iŋuc jaha lamafâcne mârâc fufua irecnec moc hezurâ wokemaŋne rorâ bâzi rikewec. Eme Wofuŋzi Abe jahacne â bâzi‐ticne hone biaŋkewec.
85	GEN 4:5	Kaiŋ â bâzi‐ticne ine hone takirewec. Iŋuc eme Kaiŋ e mâretec aarickeme ʒâŋe maine enduŋkewec.
86	GEN 4:6	Eme Wofuŋzi Kaiŋ âzâcnewec: “Wemocte aaricgume ʒâŋe maige enduŋkekomec?
87	GEN 4:7	Go biaŋne jutec mana‐garepe sâckeocmu. Biaŋne mi jucmuo ine sâqocnezi motâc râpeo soŋkerâ ruc bagareocmu. E gore hâcne ecnekac, go ine aka hecnezemec.”
88	GEN 4:8	Eme Kaiŋzi ɋaticne Abe âzâcne muwec: “Nâhâc gieo ranac.” Mume gieo ra jupic, ehuc Kaiŋzi fahare ɋaticne Abe qarâ qâhâmowec.
89	GEN 4:9	Eme Wofuŋzi Kaiŋ ʒiŋuc wiocnewec: “Ɋage Abe wena jukac?” Eki muwec: “Mi manakopac, no ɋananere soŋaŋ me?”
90	GEN 4:10	Eme Wofuŋzi muwec: “Go wemo wiac emec? Ɋagere soczi mâreŋko wira wâwâsic enareme manakopac.
91	GEN 4:11	Irec sâwec faigao fekac, ehuc mâreŋ, micne aŋkehuc ɋagere soc megaonec rorâ nâjec, mâreŋ izi jâpecgukac.
92	GEN 4:12	Hesarac gie batec mâreŋzi guec‐ticnere fârine sakare‐garezejec. Eme wise wise juhuc ra ju ware ju ezemec.”
93	GEN 4:13	Eme Kaiŋzi Wofuŋ âzâcnewec: “Okacne narekic i bâmâmâckekopac.
94	GEN 4:14	Go miŋecgac gie hesarac mâreŋkonec jâpecnukomec, irec ʒâŋesoŋ bagarerâ wise wise juhuc ra ju ware ju epemu, ehame ŋiczi bâfuacnurâ qâhâmocnuniŋmu.”
95	GEN 4:15	Eme Wofuŋzi muwec: “Iŋuc misac, moc e Kaiŋ qâhâmome okacne arec 7 irec sâc râcnezo.” Iŋuc murâ Kaiŋ sahacnao maqâreŋ moc râewec, moczi moc bâfuarâ qanʒipiŋte.
96	GEN 4:16	Eme Kaiŋ e Wofuŋte maionec rarâ mâreŋ moc ʒâŋene Nodi, Edeŋ ʒoaŋ wewefu‐ticnao, ira juwec.
97	GEN 4:17	Eme Kaiŋ e ŋonâŋ‐ticne ehec jume motec kiweckerâ Enoko rowec. Eme Kaiŋ e hae moc barâ ŋokâ‐ticnere wase bahuc ʒâŋene Enoko jaha muwec.
98	GEN 4:18	Enokore ŋokâ moc fuawec ʒâŋene Iradi, eme ere bifuŋko Mehujae fuawec, Mehujae ere bifuŋko Metusae fuawec, Metusae ere bifuŋko Lamec fuawec.
99	GEN 4:19	Lamec e ine ŋokac jajahec rocjofawec, moc ʒâŋene Ada, moc Zila.
100	GEN 4:20	Ada e motec kiweckerâ Jabali rowec, e qoruc bozeo juju fofo eere â bec bulimakao hone soŋaŋ giere fufuŋke ŋic.