1	GEN 1:1	Pakanemo Maimaituwa mala bi dobu i waitubudi.
2	GEN 1:2	Wala dolinemo dobu geḡa mote i laumaḡata mai niganana ta kitakitana bi boimatuwa taunaḡa. Bi Maimaituwa Aluwina topa dabanemo i waidagudagu.
3	GEN 1:3	Bi Maimaituwa i giuna gado, “Yana ku tubuḡa.” Bi yana i tubuḡa.
4	GEN 1:4	Maimaituwa i kita te i visu bi ḡome yana bi dudubala i dailidi.
5	GEN 1:5	Yana i wai isana laḡan bi boimatuwa i wai isana dudubala. I dudubala bi laḡan i sako, niga laḡan pakana i waitubu.
6	GEN 1:6	Bi Maimaituwa i giuna gado, “Sawasawa ku tubuḡa bi gauba noke galewemo bi nove dobumo kwa wabaḡavukidi.”
7	GEN 1:7	Kamaina bi Maimaituwa sawasawa i voiye te gauba dabana bi dibuna edi wabaḡavuka. Bi mainana i tubuḡa.
8	GEN 1:8	Maimaituwa wabaḡavuka i wai isana, galewa. I dudubala bi laḡan i sako, niga laḡan wailabuna.
9	GEN 1:9	Kamaina bi Maimaituwa i giuna gado, “Gauba galewa dibunemo ko nato gabu ḡemota bi dobu ḡasaḡasalina ya laumaḡata.” Bi mainana i tubuḡa.
10	GEN 1:10	Bi Maimaituwa doḡa ḡasaḡasalina i wai isana dobu bi gauba i wai waiḡemotina i wai isana nisa bi Maimaituwa i kita te i visu.
11	GEN 1:11	Bi kota Maimaituwa i giuna gado, “Doḡamo ḡawaḡawa, pesi poudimo bi banidimo dugedugedi bi kai votevotemi tabudi bi tabudi ko tubuḡa.” Bi mainana i tubuḡa.
12	GEN 1:12	Kamaina bi doḡamo ḡawaḡawa, pesi banidimo bi poudimo dugedugedi bi kai votevotedi kitedi tabudi bi tabudi a duga. Bi Maimaituwa i kita te i visu.
13	GEN 1:13	I dudubala bi laḡan i sako. Niga laḡan wai faionina.
14	GEN 1:14	Bi Maimaituwa i giuna gado, “Yanayana galewemo ko tubuḡa te laḡan bi dudubala ko dailidi. Bi sa noya te sauga, laḡan bi kwalabu ani luvedi.
15	GEN 1:15	Bi yanayana galewemo ko yana bi dobu ko laiyana.” Bi mainana i tubuḡa.
16	GEN 1:16	Maimaituwa yana nananakidi labu i voiyedi. Suwala laḡan yai badaye bi nawalai dudubala yai badaye bi kota kipola vaitedi i voiyedi.
17	GEN 1:17	Maimaituwa galewemo yana i wai dubudi, te dobu sa lai yana.
18	GEN 1:18	Tedi laḡan bi dudubala sa dailidi bi sai badayedi. Bi Maimaituwa i kita te i visu.
19	GEN 1:19	I dudubala bi laḡan i sako. Niga laḡan wai 4-na.
20	GEN 1:20	Bi Maimaituwa i giuna gado, “Mwali yawayawasanidi nisa koi wanavu bi mwanuwa sawasawa koi wanavu.”
21	GEN 1:21	Tana iyana nananakidi bi keikeilikidi bi mwali matabudi nisamo miyemiyedi kitedi tabudi bi tabudi bi mwanuwa poupou dabalalidi kitedi tabudi bi tabudi i voiyedi. Maimaituwa i kita te i visu.
22	GEN 1:22	Tana mwali matabudi nisamo miyemiyedi i kavisuvisudi bi i giuwedina gado, “Koi natuna dabalala te nisa koi wanavu bi mwanuwa dobumo ko pou dabalala bi dobu koi wanavu.”
23	GEN 1:23	I dudubala bi laḡan i sako bi niga laḡan wai 5-na.
24	GEN 1:24	Bi Maimaituwa i giuna gado, “Ḡamoḡamo yawayawasanimi tabumi bi tabumi, gunuwala ḡamoḡamomi, malamalaḡamimi bi ḡamoḡamo daledalemi dobumo ko tubuḡa.” Bi mai i tubuḡa.
25	GEN 1:25	Mba mainana gunuwala ḡamoḡamodi, malamalaḡamidi bi ḡamoḡamo daledaledi tabudi bi tabudi i voiyedi. Maimaituwa i kita te i visu.
26	GEN 1:26	Bi kota Maimaituwa i giuna gado, “Niganana lava ta voiyedi kitedi mai tada. Te tedi iyana, mwanuwa, ḡamoḡamo bi ḡamoḡamo daledaledi kitedi tabudi bi tabudi dobumo sai badaedi.”
27	GEN 1:27	Lava i voiyedi kitedi mai tana. Tedi oloto bi waivini a voiyedi.
28	GEN 1:28	Maimaituwa i kavisuvisudi bi i giuwedina gado, “Koi natunatuna bi dobu koi wanavu bi koi badaye. Iyana, mwanuwa bi mwali matabudi yawayawasanidi dobumo koi badaedi.”
29	GEN 1:29	Bi Maimaituwa i giuna gado, “Tagu kai votevotedi pesi bi kani e voiyedi aubaimi.
30	GEN 1:30	Mwali miyemiyedi matabudi, mwanuwa bi gunuwala ḡamoḡamodi tedi kediya ba kailugulugu bi kai votedi.” Bi mainana a tubuḡa.
31	GEN 1:31	Maimaituwa mwali matabudi i voiyedi bi i kitedi te a visu kauwa. I dudubala te laḡani i sako. Niga laḡani wai 6-na.
32	GEN 2:1	Niga mainana Maimaituwa galewa, dobu bi mwali matabudi i voiyedi.
33	GEN 2:2	Tana kaikana ena noya i wai kovi bi laḡan wai 7-nemo ḡome tana i waiyawasi.
34	GEN 2:3	Bi Maimaituwa laḡan wai 7-na, i kavisuvisu te laḡan laukaina bi i voiye te waiyawa bi ani vivila, banina tana mwali matabudi i wai kovidi bi mba laḡannemo i waiyawasi.
38	GEN 2:7	Bi Bada Maimaituwa doḡa i vai bi oloto i voiye. Maimaituwa yawasina yawayawasanina i suve nawe oloto isuna bwadanemo bi oloto i moito i miya.
39	GEN 2:8	Bi Bada Maimaituwa beubeu yawaninemo daibi i wadiwadina dobu Idenmo, ḡome oloto i voivoiyena i sako.
40	GEN 2:9	Bada Maimaituwa doḡamo kai visuvisudi tabudi bi tabudi i voiyedi te a duga bi banidi kitedi wainuwavaivaidi ani kani. Bi daibi modonemo kai labu: Yawasana kaina bi kota visu bi gebo sibena kaina.
46	GEN 2:15	Bada Maimaituwa oloto i vai bi daibimo i sako te ya labe bi ya noyae.
47	GEN 2:16	Bi Bada Maimaituwa oloto i giuwena gado, “Kai votevotedi ḡesaudi kwa kanidi.
48	GEN 2:17	Visu bi gebo sibena kaina daibi modonemo, mote kuma kani bi kuna kanina ba kwa peki.”
49	GEN 2:18	Bi Bada Maimaituwa i giuna gado, “Oloto mote i visu te taunaḡa ya miya. Tagu ena tausagu, yà voiye te ya sagu.”
50	GEN 2:19	Bi Bada Maimaituwa, ḡamoḡamo dobumo bi mwanuwa sawasawamo matabudi i voivoiyedina i natomedi oloto lisinemo te oloto yai isedi. Tana ḡamoḡamo bainewa i wai isana ba taunana isana.
51	GEN 2:20	Bi oloto mwali yawayawasanidi i wai isedi, mwanuwa sawasawamo bi ḡamoḡamo dobumo. Bi Adam mote bamo ena tausagu kauwa.
52	GEN 2:21	Kamaina bi Bada Maimaituwa, oloto i voiye te i kena i wai nuwayavuḡa. Bi Bada oloto giligilina gemota i kaikamaḡe bi tubuḡina i gudu munaḡe.
53	GEN 2:22	Bi Bada Maimaituwa, oloto giligilinemo waivini i voiye bi i natome oloto lisinemo.
54	GEN 2:23	Bi oloto i giuna gado, “Eee! Niga waivinina siliena ba tagu siliegu, bi tubuḡina ba tagu tubuḡigu. Tana yài isana waivini banina tana olotomo a voiye. Tana oloto giligilinemo Maimaituwa i voiye.”
55	GEN 2:24	Taunana aubaina oloto tamana bi tinana ya gosedi bi mwanena vaitena sa miya ḡemota, te tedi tubuḡa ḡemota ya tubuḡa.
56	GEN 2:25	Ḡome oloto mwanena vaitena ma kofekofedi bi mote ai tunimayaḡa.
57	GEN 3:1	Bada Maimaituwa gunuwala ḡamoḡamodi i voiyedi bi mododimo mwata ba ḡamoḡamo wai kaikaiyovuna. Mwata waivini i waitalayena gado, “Giukauwa te Maimaituwa i giuwemi te kai matabudi daibi modonemo mote koma kanidi?”
58	GEN 3:2	Bi waivini mwata ena giu i waimunena gado, “Kai ḡesaudi ba ka kanidi.
59	GEN 3:3	Bi kai daibi modonemo, Maimaituwa i giu te mote kama kani bi kama taukoni, male ka peki.”
60	GEN 3:4	Bi mwata waivini i giuwena gado, “Ei geḡa, mote koma peki.
61	GEN 3:5	Maimaituwa i sibe, te sauginemo bi ko kanina ba temi maibena Maimaituwa, visu bi gebo ko sibedi.”
62	GEN 3:6	Sauginemo waivini kai votana i kita te kani visuvisuna bi matanemo i wainuwa vaivai, kota i ḡoe te bai matabuna maso i sibe, taunana aubaina tana kai votana i vai te i kani. Bi kota mwanena diyanemo i vite te i kani.
63	GEN 3:7	Kai votana a kanikani tedi matedi i yana bi a sibe munaḡedi te kofekofedi. Taunana aubaina tedi kailugulugu a siyaudi bi tubuḡidi ai govegovedi.
64	GEN 3:8	Aubigamo oloto ma mwanena Bada Maimaituwa talelena a vaiye daibi noponaḡa i nawanawa. Kamaina bi kai nopodimo a kandavona.
66	GEN 3:10	Bi oloto Maimaituwa ena giu i waimunena gado, “Tam daibimo talelem e vaiye bi e naila. Banina tagu kofakofagu aubaina te e kandavona.”
68	GEN 3:12	Bi oloto i giuna gado, “Waivini kuna viteviteguna tana kai votana i vitegu te e kani.”
69	GEN 3:13	Kamaina bi Bada Maimaituwa waivini i waitalayena gado, “Bai aubaina niga mainana kuna voiye?” Bi waivini i giuna gado, “Mwata i kaiyovuḡegu te e kani.”
70	GEN 3:14	Bi Bada Maimaituwa mwata i giuwena gado, “Tam niga mainana kuna voiye aubaina. Ḡamoḡamo matabudi mododimo tam e pasilim. Te bwagammo kwa yoyo nawa, bi ḡobusa kwa kani laḡan matabuna.
71	GEN 3:15	Tagu yà voiyemi te tam mwata bi waivini modomimo wai kamedimedi ya kena laḡan matabuna. Bi kota mwata natunatum bi waivini natunatuna sai ka medimedi. Laḡan muliḡa waivini natuna olotona kaka tam kunum ya vaḡosaḡosa. Bi tam mwata oloto kaḡeiwakiduna kwa kalati.”
72	GEN 3:16	Bi Maimaituwa waivini i giuwena gado, “Tam em wainatuna sauginemo em yavi tagu yà kadidigi bi yavi vaitena kwa lau bewa. Tam kwa ḡoeḡoe te mwanem em waibada dibunemo ya miya. Bi geḡa te oloto ena waibada dibunemo tam kwa miya.”
73	GEN 3:17	Bi Adam i giuwena gado, “Tagu ei ḡakem te kai votana mote maso ku kani bi geḡa te mwanem kalinana kuna vaiye bi kai votana kuna kani. Taunana aubaina doḡa male ya gomala bi tam kwa noya gulata. Bi laḡan matabuna poyapoyam ya tosi kaka kani kwa banavi.
74	GEN 3:18	Doḡamo ḡawaḡawa waigedegedelidi sa duga bi kani sa lauwalowalo, tam male kamya kanigidava.
75	GEN 3:19	Tam kwa noya gulata bi poyapoyam ya tosi kaka doḡamo male mwali matabuna kwa banavi. Tam doḡamo e patim bi kwa noyanoyaena eete kwa munaḡana doḡamo.”
76	GEN 3:20	Adam mwanena i wai isana Iv banina tana lava matabudi dobumo tinedi.
77	GEN 3:21	Bi Bada Maimaituwa ḡamoḡamo kwapidimo gala i voiye, te Adam ma mwanena i wai kotedi.
78	GEN 3:22	Bada Maimaituwa i giuna gado, “Niga lavedi tedi mai tada, tedi visu bi gebo a sibe. Taunana aubaina mote tamai aninedi te yawasana kaina votana sima kani. Bamoda mainana sa voiyena ba sa miya nonoḡana.”
79	GEN 3:23	Kamaina bi Bada Maimaituwa Adam ma mwanena daibimo i kwavivaidi bi Adam i giuwe te doḡa ya noyae, banina tana doḡanemo i voiye.
80	GEN 3:24	Maimaituwa oloto i kwavai mulinemo, tana Iden daibinemo beubeu yawaninemo aneya kelubim i sako. Bi kepata vavavanina kwadikwadiyena i sako te yawasana kaina ya labe.
81	GEN 4:1	Adam ma mwanena tubuḡa ai ḡemoti, te Iv i bwaga bi i wai natuna te gomana olotona i bewa. Bi i giuna gado, “Bada ena sagumo gomana e bewa.” Bi i wai isana Kein.
82	GEN 4:2	Bi kota Iv i wai natuna munaḡa, te gomana olotona i bewa bi i wai isana Eibol. Laḡannemo a nanakana ba Eibol tauwaiḡamoḡamo bi Kein ba taubayau.
83	GEN 4:3	Laḡan ḡemota, Kein ena daibi kanidi i tavaitedi ena sewasewa Bada lisinemo.
84	GEN 4:4	Bi muliḡa Eibol ḡamoḡamo natuna tautuweḡina i vunu bi ena soisoi visuvisuna i tavaite Bada lisinemo. Bi Bada Eibol bi ena sewasewa i wai nuwavisuedi.
85	GEN 4:5	Bi Bada Kein ena sewasewa mote i wai nuwavisuedi, taunana aubaina Kein matana i ai kenakena bi nuwana i medi.
87	GEN 4:7	Bamoda visuvisu ku voiye, maso ba kunai nuwavisu. Banina tam gebo kuna voiye aubaina gebogebo diyammo ya yaveyavem. Tana ya ḡoeḡoena yai badaem bi tam kwa ḡailisi.”
88	GEN 4:8	Kein tasina Eibol i giuwena gado, “Ta nawa wapumo tai nawanawa.” Ḡome wapumo Kein i miya moito te tasina i laipeki.
90	GEN 4:10	Kamaina bi Bada i giuwena gado, “Bai aubaina kauwa wai nuwanainailina kuna voiye? Tinanatum kwasinina doḡamo ya ḡabaḡaba, lisigumo laubiwa aubaina.
91	GEN 4:11	Niganana taumḡa kuna pasili munaḡem te mote kuma bayau. Tasim kwasinina doḡa i vitale laḡannemo kuna wai peki.
92	GEN 4:12	Laḡannemo kwa bayauna ba kani mote ima laubani bi kwa velau yabayababa mote bamo em ani miya kauwa.”
105	GEN 4:25	Adam bi Iv kota tubuḡa ai ḡemoti munaḡe bi Iv i laubewa te gomana olotona i bewa. Bi Iv i giuna gado, “Kein Eibol i wai peki bi Bada gomana epaiyanina i vitegu.” Taunana aubaina i wai isana Seta.
106	GEN 4:26	Kamaina bi Seta i didiga bi i naḡi te mwanena i wai natuna te natuna olotona i bewa bi i wai isana Inos. Mba laḡannemo lava Bada lauduneyena ai tubu.
143	GEN 6:5	Bada i kita te lava edi gebogebo dobumo i didiga bi laḡan matabuna edi noḡota ba gebogebo a noḡonoḡotidi.
144	GEN 6:6	Tana i wai uvalana gado, “Niga lavedi bai aubaina e voiyedi.” Bi tana noponemo i wainuwaboya.
145	GEN 6:7	Kota i giuna gado, “Tagu mwali matabudi dobumo e voivoiyedina yà kagebogebodi. Bi ei uvala te bai aubaina e voiyedi.”
146	GEN 6:8	Bi Bada Nowa taunaḡa lisinemo i wai nuwavisu.
147	GEN 6:9	Nowa natunatuna oloolotodi faiona, isedi ba Sem, Ḡem bi Diyeifeti. Nowa tana lava didimanina laḡan matabuna, tana Maimaituwa vaitena a miyamiya nonoḡa.
149	GEN 6:11	Maimaituwa i kita te dobu matabuna pilipili i nawa yaḡosi.
150	GEN 6:12	Maimaituwa dobu i kita, te lava matabudi edi yawasana ba pilipilidimo a miyamiya.
151	GEN 6:13	Kamaina bi Maimaituwa Nowa i giuwena gado, “Lava edi pilipili i didiga gulata taunana aubaina, tedi bi mwali matabudi dobumo yà kagebogebodi.
152	GEN 6:14	“Tagu yà giugiuwem, te tam kai ḡaiḡainemo gula kwa voiye. Noponemo nakanaka kwa voiyedi bi nopona bi taulina ba patimo kwa pati.”
154	GEN 6:16	gula dabana kwa voiye, yato bi bilibili mododimo koiyavusa sa kena. Kota noponemo salamoda kwa voiyedi, dibunemo, modomo bi dabanemo. Bi mataeta gilligilinemo kwa sako.
155	GEN 6:17	Maimaituwa i giuna gado, “Tagu kabaita yà giukamaḡe dobumo, te mwali miyemiyedi matabudi yà kagebogebodi, mwali matabudi dobumo sa launeḡaneḡa.
156	GEN 6:18	Tagu egu waianina lisimmo yà voiye, tam, mwanem, natunatumi bi mwanemwanedi vaitedi gulamo ko valageta.
157	GEN 6:19	Bi tam ḡamoḡamo miyemiyedi labulabuḡa gulamo kwai geludi, tabudi bi tabudi, oloolotodi bi waiwaivinidi. Maibena mwanuwa sawasawaḡa lovolovodi bi ḡamoḡamo doḡaḡa nawenawedi bi daledaledi, vaitedi kwai geludi te mote sima peki.
159	GEN 6:21	Kota kani tabudi bi tabudi kwai geludi te temi bi ḡamoḡamo kemiya.”
160	GEN 6:22	Maimaituwa bai matabuna i giugiuwena Nowa i voiyedi.
161	GEN 7:1	Bada Nowa i giuwena gado, “Tam bi em vanuwa lavedi vaitedi gulamo ko valageta, tagu e kita te taumḡa dobumo lava didimanim.
162	GEN 7:2	Bi ḡamoḡamo visuvisudi oloolotodi bi waiwaivinidi iyevidi 7, bi kota ḡamoḡamo milemiledi oloolotodi bi waiwaivinidi kitedi tabudi bi tabudi kwai geludi.
163	GEN 7:3	Kota mwanuwa labulabuḡa, wapedi 7, kitedi tabudi bi tabudi kwai geludi. Niga kwa voiye te mwanuwa bi ḡamoḡamo yawayawasanidi, te muliḡa tedi sai natunatuna bi dobu sai wanavu.