23233	MAT 1:20	Ra i nuknuk utmakai una utna ri, a ensel anun a Labino i wanpat toromi una ririon ra i watungi lena, “Josep, a nutun o Dewid, gong u wur nuknuk un o Maria, un ben pasi kut sur anum a ino. Uni a nat ra i tianan pasi, i wanpat tagun a Tokodos na Nion.
23234	MAT 1:21	In usus pas a nat na musano, ma un pasor a risano nam o Iesu, uni in ulaun pas anun a taro gusun anundet a kum sakino petutna.”
23236	MAT 1:23	“Tama i, a toraro ra ke inep tomo utmakai nam tu musano in tianan, ma in usus pas a nat na musano ra din watungi nam o Emanuel,” a kukuraino lena, “O God i kis tomo nam dat.”
23240	MAT 2:2	Ra det iting lena, “Awai i a nat ra di ususi, sur in king anun a taro Juda? Uni met tama anun in nangnang tiro una nubual ra in matanas i pusu pat iai, ra iri met wan urin sur met in lotu toromi.”
23242	MAT 2:4	Numur i ben tomo rop pas a kum lamlabino tene etabor torom o God ma a kum tene ususer tagun a Warkurai. Ra i ting det lena, “A Karisito ra o God in tulu ru i, din ususi awai?”
23243	MAT 2:5	Det balu i lena, “Tong o Betliem una papor Judia, uni a poropet i sa tumus tari lenri,
23244	MAT 2:6	‘Ma ui o Betliem una piso anun a kabotaro Juda, Ui ko natino bing tan a kum mugumugu anun a kabotaro Juda, Uni a mugumugu in nanpat tagun ui, ra in mugu anung a taro Israel elar nama tene tamtamabat anun a kum sipsip.’”
23246	MAT 2:8	I tulu ru det utong o Betliem nama wasiso lenri, “Mot nan ma mot in sisio wakak sur a natlik. Ra mot sa sio pasi, mot in inanos iau, sur iau bulung an nan ma an lotu toromi.”
23251	MAT 2:13	Ra det sa wan taru, a ensel anun a Labino i wanpat torom o Josep una ririon ra i watungi lena, “Un katutur, un ben pas derano, ma motul in kalabor eno utong o Ijip. Ma motul in kis tong iai, tuk una bung ra an inanos melet ui, uni o Erod in sisio sur a natlik sur in um doko i.”
23253	MAT 2:15	Detul kis tiro iai tuk ra o Erod i mat. Una nundetul a kinkinis tiro, di pam sot pas a wasiso anun a Labino, ra a poropet i sa wasiso mugu taru uni lenri, “A kabo pas o nutunglik tagitong o Ijip.”
23256	MAT 2:18	“Tong o Rama di longoro in nalngan ara, a tintinangis ma a ungugaia, O Rakel i domos a kum nutnutunu liklik, uni det sa mat rop, ma ka di umarip lar pasi.”
23258	MAT 2:20	Ma i watungi tano lena, “Un katutur, un ben pas derano, ma motul in nan utong o Israel, uni det ra det nem na um doko a natlik det sa mat.”
23261	MAT 2:23	Ra detul wan ma detul kis una tamon a risano o Nasaret. Una anundetul a kinkinis tiro, di pam sot pas a wasiso anun a kum poropet lena, “Din watungi lena i a te Nasaret.”
23263	MAT 3:2	ra i watungi lena, “Mot in nukpukus, uni a matanitu tagisapat una langit i sa milau.”
23264	MAT 3:3	O Jon ut, ra a poropet Aisaia i sa wasiso puaso mugu taru uni lena, “Una nubual kalako taro uni, in nalngan ara i kakabo lena, ‘Mot in waninar a kisapi anun a Labino, mot in pam kodos anun a kum kisapi.’”
23268	MAT 3:7	O Jon i tama a susut na Parisi tomo nama kum Sadusi det wan sur in baptaiso det, ra i watungi tandet lena, “Ai, mot a kum nutnutun a kum sui! Osi ra i inanos mot sur mot in kalabor eno gusun a warkurai na minabalu anun o God, ra in nanpat? Iau awu.
23273	MAT 3:12	I pam pas anun a pok nam aru lamano sur in lakro susuaro a pino wit gusun a wino wit. Numur in ubek tomo anun a wino wit una nun a rumu na wit, ikut in tun ru a kum pinino una sungun ra ke ser mat.”
23275	MAT 3:14	O Jon i nem na turbati, ra i watungi tano lena, “Ilai ra u wan torom iau sur an baptaiso ui? In wakak sur ui un baptaiso iau.”
23276	MAT 3:15	Ra o Iesu i balu i lena, “Un baptaiso iau kut. I wakak ra un pami, sur dar in pam sot pas asau rop ra i tokodos umatan o God.” Ra o Jon i mulaot kut tano.
23278	MAT 3:17	Numur in nalngan ara tagisapat una langit i watungi lena, “Iri a Nutunglik, a nat na wakak, a gas doko nami.”
23281	MAT 4:3	Ra a tene ululam i wanpat toromi, ma i watungi tano lena, “Ra ui a Nutun o God, un inanos a kum watat ri sur det in nanpat a beret.”
23282	MAT 4:4	O Iesu i balu i lena, “Di sa tumus tari una Buk Tabu lena, ‘A taro ka det ser laun nama utna na inangon kut, det ser laun nama kum wasiso rop ra i pirso gusun a wan o God.’”
23284	MAT 4:6	Ma i watungi tano lena, “Ra ui a Nutun o God, un sirok pirso, uni di sa tumus tari una Buk Tabu lena, ‘In watungi torom anun a kum ensel sur det in tamtamabat ui. Det in pam pas ui nama kum lamandet, sur gong u tuka a kikim un tu wat.’”
23285	MAT 4:7	O Iesu i balu i lena, “Di sa tumus tari kai una Buk Tabu lena, ‘Gong u lar a Labino anum a God.’”
23287	MAT 4:9	Ra i watungi tano lena, “Ra un kis butkeke ma un lotu torom iau, a kum utna rop ri an pitar tari tam.”
23288	MAT 4:10	O Iesu i watungi tano lena, “Satan, un nan gisen, uni di sa tumus tari una Buk Tabu lena, ‘Un lotu torom a Labino anum a God, ma un papam kut toromi.’”
23293	MAT 4:15	“A piso anun a kabotaro Sebulon ma a piso anun a kabotaro Naptali, milau a kisapi ra i wan unago utasi, una papor danim Jodan utong, der kis una papor Galili, ra a taro ra awu sur a taro Juda det kis iai.
23294	MAT 4:16	A taro ra det kis una dumirum det sa tama a labino talapor, ma det ra a dumirum na minat i pulus bat det, a talapor i sa wanpat torom det.”
23295	MAT 4:17	Turpasi una kilalo ra, o Iesu i warawai lena, “Mot in nukpukus, uni a matanitu tagisapat una langit i sa milau.”
23297	MAT 4:19	I watungi tander lena, “Mur in mur iau, sur an ususer mur sur mur aru tene ben taro.”
23306	MAT 5:3	“Det ra det tasmani lena det sibo una niondet, det dan, uni anundet a matanitu tagisapat una langit.
23314	MAT 5:11	“Mot dan ra di watung laulau mot, ma di ban laulau mot, ma di watung a kum torotoro na wasiso un mot lena mot pam a kum sakino petutna, uni mot tagun iau.
23316	MAT 5:13	“Mot a sol tagun a rakrakon bual. Ikut, ra a makasmanino i sa rop, din umakasman meleti mo pepetlai? Katu utna mo i gas uni. Din woro pirso ru i unago utamon, ma a taro det in papapas mukut netes uni.
23317	MAT 5:14	“Mot a talapor tagun a rakrakon bual. Tu tamon ra i kis netes una tangai, ken parau lar pas.
23320	MAT 5:17	“Gong mot nuki lena a wanpat sur an rakon ru a kum Warkurai anun o Moses ma a kum etowo anun a kum poropet, awu. Ka wanpat sur an rakon ru det, a wanpat sur an pam sot pas det.
23324	MAT 5:21	“Mot sa longoro tari ra numugu di sa watung tari tan a taro lena, ‘Gong u um doko taio. Osi ra in um doko taio din warkurai i.’
23325	MAT 5:22	Ikut iau, a watungi tamot lena, osi ra in kankan torom tu tisino, din warkurai i, ma osi ra in watungi un tu tisino lena, ‘Katin lorim,’ din warkurai i umatan a taro na kiwung. Ma osi ra in watungi un tu musano lena, ‘A longlong ui,’ kutiro a warkurai toromi, ra din woro i una labino sungun.
23326	MAT 5:23	“Ra un nan sur un pitar anum a etabor una kabulu na tuntun etabor, ma u nuk pas tu utna ra o tisim i takun ui uni,
23328	MAT 5:25	“Ra taio in ubek tar ui una warkurai, mur in emarom mugu ra mur wan nanan utmakai una kisapi, sako in pitar tar ui torom a tene warkurai. Ra a tene warkurai in pitar ui torom a tene tamtamabat ra in uruk ru ui una karabus.
23330	MAT 5:27	“Mot sa longoro tari ra di sa watung tari lena, ‘Gong u pam a sakino nam tu ino anun taio o nam tu musano anun taio.’
23334	MAT 5:31	“Di sa watung tari kai lena, ‘Osi ra i lakro ru anun a ino, in pitar tari kai a dono buk na kutus nolin tano.’
23336	MAT 5:33	“Mot sa longoro tari kai ra numugu di sa watung tari tan a taro lena, ‘Gong u liliman torotoro. A utna ra u sa liliman taru uni torom a Labino, un pam soti ut.’
23340	MAT 5:37	Mot in watungi kut lena ‘ma’ o ‘awu’. Uni, ra mot in watung tu ngas na wasiso melet, i ra i wanpat mukut tan a Tene Sakino.
23341	MAT 5:38	“Mot sa longoro tari ra di sa watung tari lena, ‘Ra taio in liok ru tin matan taio, din balu i toromi, din liok ru i kai tin matano. Ra taio in tubul pak ru tin lokon taio, din balu i toromi, din tubul pak ru i kai tin lokono.’
23346	MAT 5:43	“Mot sa longoro tari ra di sa watung tari lena, ‘Un nem o pasam, ma un nget anum a ebar.’
23351	MAT 5:48	I mo ra mot in tokodos mulus, elar nama Tamamot ra i kis sapat una langit, i tokodos mulus.”
23352	MAT 6:1	“Mot in tumarong mot sur gong mot pam anumot a wakak na pinapam umatan a taro kut, sur det in tama i ma det in watung ulabo pas mot. Ra mot pami lenra, katu ikul anumot tan a Tamamot ra i kis sapat una langit.
23356	MAT 6:5	“Ra mot in wararing, gong mot elar nama kum tene torotoro. Det nem doko i sur det in tur ma det in wararing una kum rumu na lotu, ma una kum nubual ra a taro det wanan tomo iai, sur a taro det in tama det ma det in watung ulabo pas det. A inanos mot nama lingmulus, ra a taro det ulabo pas det, i ut ra anundet a kudulano ikul.
23358	MAT 6:7	“Ra mot in wararing, gong anumot a wasiso i walos ma mot wasiso oros kut, elar nama kum niaring anun a taro ra det lotu torom a kum torotoro na god. Uni det nuki lena, din longoro det ra det watung a susut na wasiso.
23360	MAT 6:9	“Mot in wararing lenri, ‘Tamamet sapat netes una langit, i wakak ra din ru a risam.
23364	MAT 6:13	Gong u ben met una ululam. Un ulaun met gusun a Tene Sakino.’
23365	MAT 6:14	“Ra mot in dumano ru a kum sakino petutna ra a taro det pami un mot, a Tamamot, ra i kis sapat una langit, in unus ru anumot a kum sakino petutna kai.
23367	MAT 6:16	“Ra mot in wewel sur mot in wararing, gong mot tamtama na marmaris elar nama kum tene torotoro, uni det tamtama na marmaris sur a taro det in tama i lena det wewel. A inanos mot nama lingmulus, ra a taro det ulabo pas det lena det a kum tene lotu mulus, i ut ra anundet a kudulano ikul.
23370	MAT 6:19	“Gong mot ubek tomo a kum wakak na ululeng nin upiso, uni a koropos ma a moroto der in ban laulau ru det kut, ma a kum tene wolong kai det in rege pas anumot a kum rumu ma det in los a kum ututna.
23373	MAT 6:22	“Arin matandat der elar nama lam tagun a pinindat. Ra arin matam der wakak, a pinim rop in bukus nama talapor.
23375	MAT 6:24	“Katutaio in pet lar pasi sur in papam torom lako ru mugumugu. In nget ara pasander, ma in nem ara pasander, in nem doko ara, ma in rosumur gusun ara. Ka mot in papam lar pas torom o God ma torom a mani kai.
23376	MAT 6:25	“I mo ra a watungi tamot lena, gong mot nuknuk doko una numot a nilaun sur asau mot in nani, ma asau mot in inumi. Ma gong mot nuknuk doko una pinimot kai sur asau mot in emar nami. A nilaun i labo taun a utna na inangon, niko? Ma a pinindi kai i labo taun in namalu, niko?
23379	MAT 6:28	“Ilai ra mot nuknuk doko sur a malmalu? Mot in tama a kum purpur tagisa ubual, ra det lubung pepetlai. Ka det ser papam ma ka det ser pam malu.
23382	MAT 6:31	Gong mot nuknuk doko ma mot watungi lena, ‘Asau ra dat in nani?’, o ‘Asau ra dat in inumi?’, o ‘Asau ra dat in emar nami?’
23385	MAT 6:34	I mo ra gong mot nuknuk doko sur a bung markan, uni markan in nuknuk ut suri. A ninunuk sur ara bung taktakai i topasi ut a bung ra.”
23386	MAT 7:1	“Gong mot takun tar taio, sako o God in takun mot.
23389	MAT 7:4	Ra a nuduwai pi kura kut unin matam, un watung petlani torom o tisim lena, ‘An rakon ru a burbururup gusun in matam’?
23391	MAT 7:6	“Gong mot tabor a kum pap nama utna anun o God, sako det in tupukus ma det in karot ginogino mot. Ma gong mot woro anumot a dusaro tan a kum boro, sako det in pas ginogino i kut nama kum kikindet.
23392	MAT 7:7	“Mot in sasaring, ra din tabor mot, mot in sisio, ra mot in sio pasi, mot in pinpidik, ra din papos pas mot.
23394	MAT 7:9	“Osi na pasamot, ra o nutunulik in saringi sur tu beret, in tabori kut nama wat?
23398	MAT 7:13	“Mot in ruk una nat na matansako lik. Uni a matansako ma a kisapi ra i wan sur a iniru tukum, i perere ma i langolango, ma a susut na taro doko det ser ruk uni.
23400	MAT 7:15	“Mot in tumarong mot gusun a kum torotoro na poropet. Det ser wan torom mot nama wakak na magirandet elar nama kum sipsip, ikut tiro ubalandet, det nem na ban laulau mot elar nama kum ngalngalia na pap.
23406	MAT 7:21	“Det ra det watung iau, ‘Labino, Labino,’ awu sur det rop det in ruk una matanitu sapat una langit. Det sot kut, ra det ser mur a nemnem anun o Tita, ra i kis sapat una langit, det in ruk una nun a matanitu.
23407	MAT 7:22	Una bung na warkurai a susut na taro, det in watungi tang lena, ‘Labino, Labino, met wasiso na poropet nama risam, ma met lakro ru a kum laulau na nion kai nama risam, ma met pam a susut na utna na ukisin nama risam.’
23408	MAT 7:23	An balu det lena, ‘Ka tasman mot. Mot a kum tene sakino, mot in nan gisen gusun iau.’
23409	MAT 7:24	“I mo ra det rop ra det longoro anung a kum wasiso ri, ma det muri, det elar nama tene mananos, ra i pam tar anun a rumu netes una wat.
23412	MAT 7:27	A bato i puku, ra a lomom i wanpat, ma a wuwu i ragoti ra i um a rumu, ra i toropo, ma i terege mut.”
23416	MAT 8:2	Ara musano, i misait nama lepra, i wan toromi, i kis butkeke nisano, ma i watungi lena, “Labino, ra u nemi, i topas ui sur un ulangolango pas iau.”
23417	MAT 8:3	O Iesu i kodos a lamano, ma i pam a pinino, ra i watungi tano lena, “A nemi ut, un langolango.” Uniutra a lepra i rop gusuni.
23418	MAT 8:4	Ra o Iesu i watungi tano lena, “Gong u inanos tar taio nami. Un nan ma un ese mugu tar ui torom a tene etabor torom o God, ma un pitar a etabor torom o God elar nami ra o Moses i sa watung tari. Ra un pami lenra, a taro det in tasmani lena u sa langolango.”
23420	MAT 8:6	I watungi lena, “Labino, ara tultul anung kurong ut una rumu i inep, a pinino rop i mat, ma i taramo a dekdek na ngunungut doko.”
23421	MAT 8:7	O Iesu i watungi tano lena, “An nan ma an ulangolango pasi.”
23422	MAT 8:8	A mugumugu ra i balu i lena, “Labino, ka tokodos sur un ruk una nung a rumu. Un watung tu wasiso kut, ra anung a tultul in langolango.
23423	MAT 8:9	Uni iau a musano ra a ser mur a warkurai anundet ra det labo tang, ma di pitar tar a warkurai kai tang sur a taro na inaim. Ra an watungi tan taio lena, ‘Un nan,’ in nan kut. Ma torom taio kai lenri, ‘Un nan urin,’ in nan kut urin. Ma torom anung a tultul lena, ‘Un pam a utna ri,’ in pami kut.”
23424	MAT 8:10	O Iesu i longoro anun a wasiso, ra i kisin doko uni, ma i watungi torom a taro ra det muri lena, “A inanos mot nama lingmulus, ka tama tar tu te Israel ra anun a nurnur i labo elar nama musano ri.
23426	MAT 8:12	Ikut, a taro Israel ra numugu o God i pilok pas det sur det in kis una nun a matanitu, in lu pirso ru a susut tagun det utiro una dumirum. Ra det in tangtangis ma det in ungingit lokondet iai.”
23427	MAT 8:13	Ra o Iesu i watungi tan a mugumugu anun a kum tene inaim lena, “Un nan kut. Din pam a utna ut ra u nurnur suri.” Una du bung ut ra anun a tultul i langolango mut.
23431	MAT 8:17	A utna ri i wanpat sur din pam sot pas a kum wasiso, ra a poropet Aisaia i sa wasiso taru uni lenri, “I ut i los pas anundat a kum misait, ma i rakon ru anundat a kum ngunungut.”
23432	MAT 8:18	Ra o Iesu i tama a kunur na taro ra det tur talilis pasi, i watungi tan anun a kum nat na ususer lena, “Dat nan utong una ara papor tasi.”
23433	MAT 8:19	Ma ara tene ususer tagun a Warkurai i wan toromi, ra i watungi tano lena, “Tene Ususer, an mur ui una kum nubual rop ra un nan iai.”
23434	MAT 8:20	Ra o Iesu i watungi tano lena, “A kum lomlom na pap anundet a kum tung ut, ma a kum piko kai anundet a kum pios ut, ikut a Nutun a Musano katu rumu na ininep.”
23435	MAT 8:21	Ma ara musano kai, tagun anun a taro na ususer i watungi tano lena, “Labino, un mulaot ru iau munung sur an nan, an por ru tar o tita.”
23436	MAT 8:22	Ikut o Iesu i watungi tano, “Un mur iau, ma un madek ru a kum minat det in por anundet a kum minat.”
23439	MAT 8:25	ra det wan toromi, det wangun pasi, ma det inanosi lena, “Labino, un ulaun dat. Dat na iru.”
23440	MAT 8:26	Ma i watungi torom det lena, “Anumot a nurnur i natino doko. Sur asau ra mot ngara?” I katutur ra i turbat a wuwu ma a top, ra i mililo rop.
23441	MAT 8:27	Ra a kum nat na ususer det kisin uni, ma det watungi lena, “Osi na ngas na musano mulus ri? A wuwu ma a top der mur anun a wasiso!”
23443	MAT 8:29	Der woiwoi lena, “Nutun o God, asau ra u nem na pami un mir? Pepetlai, u wan urin sur un ukadik met? Ke sot utmakai a bung na warkurai.”
23445	MAT 8:31	Ra a kum laulau na nion det saring o Iesu lena, “Ra un lakro ru met, un tulu ruk tar met utiro una kum boro.”
23446	MAT 8:32	O Iesu i watungi tandet lena, “Mot wan!” Ra a kum laulau na nion det pirso gusun aru musano ra, ma det ruk taru una kum boro. A kum boro det kalabor pirso una palis sur a du tasi, ra det kongo rop.
23450	MAT 9:2	Ra a ramano kum musano det los pat ara musano toromi, a pinino i mat, ma i inep taru kut una lu. O Iesu i tama anundet a nurnur, ra i inanos a musano ra lena, “Nutunglik, gong u ngara, di sa unus ru anum a kum sakino petutna.”
23451	MAT 9:3	A ramano kum tene ususer tagun a Warkurai det wasiso etalai torom det ut lena, “A musano ri i watung laulau o God, uni i wasiso lar i o God.”
23452	MAT 9:4	Ma o Iesu i tasman a nuknukin det, ra i ting det lena, “Sur asau ra mot nuknuk laulau?
23453	MAT 9:5	Osi na wasiso ra ke ngangitin sur an watungi? Pepetlai, an watungi lena, ‘Di sa unus ru anum a kum sakino petutna,’ o, an lena, ‘Un katutur, ma un nan’?
23454	MAT 9:6	A wasiso ra an watungi, an watungi sur mot in tasmani lena, o God i pitar a warkurai torom a Nutun a Musano, sur in unus ru a kum sakino petutna nin upiso.” Ra i watungi torom a musano a pinino i mat lena, “Un katutur, un los anum a lu, ra un nan sur anum a rumu.”
23457	MAT 9:9	Ra o Iesu i wan nanan tagitiro iai, i tama pas ara musano, a risano o Matiu, i kis una rumu na los takis. O Iesu i inanosi lena, “Un mur iau.” Ra o Matiu i katutur ma i muri.
23459	MAT 9:11	Ra a kum Parisi det tama i, det ting anun a kum nat na ususer lena, “Sur asau ra anumot a tene ususer i wangon tomo nama kum tene los takis ma a kum tene sakino?”
23460	MAT 9:12	O Iesu i longoro i ra i watungi lena, “A dokta ke wanpat sur det ra det langolango. Awu! I wanpat sur det kut ra det misait.
23461	MAT 9:13	Mot in nan, ma mot in sisio sur a kukurai ina wasiso ri tagun a Buk Tabu, ‘A nem a marmaris, ma ka nem a etabor ra di ser tuni.’ Uni ka wanpat sur an kabo pas a kum tene tokodos, awu. A wanpat sur an kabo pas a kum tene sakino.”
23462	MAT 9:14	A kum nat na ususer anun o Jon det wan torom o Iesu, ra det tingi lena, “Sur asau ra met ma a kum Parisi met wewel, ikut anum a kum nat na ususer awu?”
23463	MAT 9:15	O Iesu i balu det lena, “A kum paspasan a musano ra i nolin matok, det in domos pepetlai, ra kura utmakai i tomo nam det? Ikut tu bung in nanpat, ra din ben ru i gusun det, ra det in wewel maragom.
23464	MAT 9:16	“Katutaio in mabon a du matok na malu tomo nama turaino ra i tararos, uni a du matok na malu in raros a turai na malu, ra in tararos bing.
23465	MAT 9:17	Kataio in titior a matok na wain utiro unin turai na koto ra di pami namin pino meme, sako in nokoto in tupurus ma in laulau, ra a wain in tilingis. Din titior a matok na wain ut utiro unin matok na koto na wain, sur der rop der in kis wakak.”
23466	MAT 9:18	Ra o Iesu i wasiso utmakai torom det, ara mugumugu i wan toromi, ra i kis butkeke sa numugu tano, ra i watungi lena, “A nutunglik a ino, unikutri i mat. Aiap, dar in nan ma un ubek a lamam sapat netes uni, sur in laun.”
23468	MAT 9:20	Ara ino ra i misait nama gap elar nama noino ma aru kilalo, i nuki lena, “Ra an tulani kut anun a saket, an langolango.” Ra i wan numur tan o Iesu, ma i tulan tar a sinisir ina saket anunu.
23470	MAT 9:22	O Iesu i tur tupukus ra i tama a ino ra, ra i watungi tano lena, “Nutunglik, gong u ngara, anum a nurnur i sa ulangolango pas ui.” Ra una du bung ut ra, a ino ra i langolango mut.
23472	MAT 9:24	I watungi tandet lena, “Mot in pirso saro i. A inolik ri awu sur i mat, i inep dumun kut.” Ra det urongon kut uni.
23475	MAT 9:27	O Iesu i wan tagitiro, ra aru musano, aru pulu, der muri, der kakabo sapat lena, “Nutun o Dewid, un maris mir.”
23476	MAT 9:28	Ra i ruk una rumu, aru pulu der wan toromi, ma i ting der lena, “Pepetlai, mur nurnur ut un iau sur an pam sot pas a utna ri?” Der balu i lena, “Ma, Labino.”
23477	MAT 9:29	Ra i pam arin matander ma i watungi lena, “Din pami torom mur, elar ut nama numur a nurnur.”
23478	MAT 9:30	Uniutra der tamtama. Ra o Iesu i sakbat dekdek tar der lena, “Gong mur inanos tar taio nami.”
23481	MAT 9:33	O Iesu i lakro ru a laulau na nion gusuni, ra a musano ra i wasiso maragom. Ma a kunur na taro det kisin, ra det watungi lena, “Telek ri di tama a utna lenri nin o Israel.”
23482	MAT 9:34	Ikut a kum Parisi det watungi lena, “I ser lakro ru a kum laulau na nion nama dekdekin a labino anun a kum laulau na nion.”
23485	MAT 9:37	Ra i watungi tan anun a kum nat na ususer lena, “A kinobot i sa makus, ma i sa labo doko, ikut kalako susut na tene pasong.
23486	MAT 9:38	I mo ra mot in saring a Labino, i ra a taman a kinobot, sur in tulu ru a kum tene pasong sur ana kinobot.”
23491	MAT 10:5	O Iesu i tulu ru a noino ma aru nat na ususer, ra i watungi tandet lena, “Gong mot wan torom a taro ra awu sur a taro Israel, ma gong mot wan una kum tamon anun a kum te Samaria.
23493	MAT 10:7	Ra mot nan, mot in warawai nanan lenri, ‘A matanitu tagisapat una langit i sa milau.’
23497	MAT 10:11	“Ra mot in nanpat una kum lamlabino tamon, ma a kum natnat na tamon, mot in sisio sur taio ra i wakak, ma mot in kis nisano tuk una bung ra mot in nan gusun a tamon ra.
23499	MAT 10:13	Ra a taro tagun a rumu ra det in gas pas mot, mot in ruk ma mot in watungi lena, ‘A malmal in kis torom mot.’ Ikut, ra ka det in gas pas mot, anumot a malmal, mot in los melet pasi.
23502	MAT 10:16	“Tama i, a tulu ru mot elar nama kum sipsip epotor tan a kum ngalngalia na pap. I mo ra mot in mananos wakak elar nama kum sui, sur gong taio i ben raro mot, ma mot in tokodos elar nama kum tabun, sur gong taio i takun mot.
23507	MAT 10:21	“Taio in mulaot ru tu tisino sur din um doko i, ma tu musano in mulaot ru tu nutunu sur din um doko i. Ma a kum nat det in tur na inaim torom a tamandet ma a nandet ma det in mulaot ru a tamandet ma a nandet sur din um doko der.
23510	MAT 10:24	“A nat na ususer ke labo taun anun a tene ususer, ma a tultul kai, ke labo taun anun a labino.
23512	MAT 10:26	“Gong mot ngaran a taro. A kum utna rop ra di rakup bat tari, numur in kis talapor, ma a kum utna rop ra i kis eno, numur in nanpat puaso.
23518	MAT 10:32	“Osi ra in watung puaso i umatan a taro lena, i tagun iau, iau kai an watung puaso i umatan o Tita ra i kis sapat una langit lena, i tagun iau.
23520	MAT 10:34	“Gong mot nuki lena a wanpat sur an pitar a malmal una rakrakon bual. Awu, ka wanpat sur an pitar a malmal, a wanpat namin totok na inaim.
23521	MAT 10:35	A wanpat sur a taro det in kis na inaim, kibino un iau. ‘A nat musano in nget o tamano, ma a nat na ino in nget o nano, ma a nolin na ino in nget o tubunu.
23522	MAT 10:36	Det tamano det in ebar etetalai tomo nam det.’
23523	MAT 10:37	“Osi ra i nem doko o tamano ma o nano, ikut anun a marmaris torom iau ke labo, ke topasi sur i anung a nat na ususer. In wakak ra anun a marmaris torom iau in labo taun anun a marmaris torom o tamano ma o nano. Ma osi ra i nem doko o nutunulik, a nat na musano o a ino, ikut anun a marmaris torom iau ke labo, ke topasi sur i anung a nat na ususer. In wakak ra anun a marmaris torom iau in labo taun anun a marmaris torom o nutunulik.
23526	MAT 10:40	“Osi ra in gas pas mot, i gas pas iau utkai, ma osi ra i gas pas iau, i gas pasi utkai o naro ra i tulu ru iau urin.
23528	MAT 10:42	Osi ra in tabor anung tu nat na ususer, ra ke sot umatan a taro, nam lakalik kotokoto na danim, uni i tasmani lena, i anung a nat na ususer, a inanos mot nama lingmulus, i kai in losi ut anun a ikul.”
23531	MAT 11:3	“Ui mo, ra di wasiso mugu taru un ui lena, un nanpat, o met in kis langlang utmakai sur taio?”
23532	MAT 11:4	Ra o Iesu i balu det lena, “Mot in milet melet, ma mot in inanos o Jon una sau ri mot sa longoro i ma mot sa tama tari:
23534	MAT 11:6	Osi ra i tama a kum utna ri a pami, ma anun a nurnur ke puku, i sa dan.”
23535	MAT 11:7	Ra a kum nat na ususer anun o Jon det wan, o Iesu i inanos a kunur na taro un o Jon lena, “Una bung ra mot wan una nubual kalako taro uni torom o Jon, asau ra mot tamtama suri? Kutiro in nere ra i erere una wuwu? Awu.
23538	MAT 11:10	Di sa tumtumus taru uni una Buk Tabu lena, ‘Tama i, iau an tulu ru anung a tene los wasiso sur in mugu tam, i ra in waninar anum a kisapi numugu tam.’
23540	MAT 11:12	“Turpasi una kilalo ra o Jon a Tene Baptaiso i turpas a warawai ma tuk uniri, a matanitu tagisapat una langit i dekdek sur in lubung, ma a dekdek na taro det dekdek doko nama inaim sur det in turbati.
23544	MAT 11:16	“An elaro a taro tagun uniri nama sau? Det elar nama kum nat liklik ra det kis una balano tamon ma det kakabo torom a kum paspasan det lena,
23545	MAT 11:17	‘Met wup tulal, ikut ka mot lagori, ma met kele a kelekele na tupunuk, ikut ka mot tangis.’
23546	MAT 11:18	O Jon i wanpat, ke wan tu wakak na utna ma ke inum a wain, ra det watungi uni lena, ‘A laulau na nion kura uni.’
23547	MAT 11:19	A Nutun a Musano i wanpat, i wangon ma i inum, ra det watungi uni lena, ‘Tama i, a musano ri a tene inangon ma a tene ininum, a pasan a kum tene los takis ma a kum tene sakino.’ Ikut a kum pinapam anun o God i upuaso i lena, anun a mananos i a mananos mulus.”
23549	MAT 11:21	I watungi lena, “In laulau torom mot a taro Korasin, ma in laulau kai torom mot a taro Betsaida. Ra gunuk di sa pam tar a kum utna na ukisin ri torom a taro Tair ma o Saidon, elar nami ra a sa pam tari torom mot, kanapi det in nukpukus lakit ma det in tobo, det in emar nama kum malu na tupunuk ma det in talus a pinindet nama kubus na sungun. Ikut mot, ka mot nukpukus.
23552	MAT 11:24	A watungi tamot lena, una bung na warkurai, a warkurai torom mot a taro Kapernaum in laulau doko taun a warkurai torom a taro Sodom.”
23553	MAT 11:25	Una du bung ra, o Iesu i watungi lena, “Tita, ui a Labino tagun a langit ma a rakrakon bual rop. A watung ulabo pas ui, uni u munu a kum utna ri tan a kum tene mananos ma det ra det tastasman, ma u upuaso i kut, torom det ra det elar nama kum nat liklik.
23555	MAT 11:27	“O Tita i sa pitar tar a kum utna rop torom iau. Katutaio i tasman o Nutunu, o Tamano kut i tasmani, ma kataio kai i tasman o Tamano, o Nutunu kut i tasmani, ma det kai ra o Nutunu i nemi sur in upuaso o Tamano torom det.
23556	MAT 11:28	“Mot rop ra pinimot i ngoro ma a kum mamaut i monong mot, mot in nan torom iau, sur an umana mot.
23558	MAT 11:30	Uni in nikip ri an pitari tamot ke ngangitin, ma a nilolosino ke maut.”
23560	MAT 12:2	Ra a kum Parisi det tama i, det watungi tano lena, “Tama i, anum a kum nat na ususer det pam a utna ri, ra ke tokodos elar nama warkurai tagun a Bung na Sabat.”
23561	MAT 12:3	O Iesu i balu det lena, “Pepetlai, ka mot luki utmakai asau ra o Dewid i pami? Det nama taro ra det wan tomo det murak,
23565	MAT 12:7	Di sa tumus tari una Buk Tabu lenri, ‘A nem a marmaris, ma ka nem a etabor ra di ser tuni.’ Ra gunuk mot sa tasman a kukurai ina wasiso ri, ka mot in takun det ra ka det raro.
23566	MAT 12:8	Uni a Nutun a Musano i a Labino tagun a Bung na Sabat.”
23568	MAT 12:10	Ara musano kura iai, a lamano i kong. Det sisio sur tu utna det in takun o Iesu nami, ra det tingi lena, “Pepetlai, i tokodos ut elar nam anundat a Warkurai sur din ulangolango pas taio una Bung na Sabat o awu?”
23569	MAT 12:11	Ma i balu det lena, “Ra taio tagun mot anunu tu sipsip in puku taru unin nutung una Bung na Sabat, pepetlai, ken pam ukai pasi, ma ken dat toto melet pasi?
23570	MAT 12:12	A musano i labo taun a sipsip. Lenra i tokodos sur din pam a wakakino una Bung na Sabat.”
23571	MAT 12:13	Ra i inanos a musano lena, “Kodos a lamam.” I kodosi, ra a lamano i tokodos melet, elar nam ara lamano ra i wakak.
23576	MAT 12:18	“Iri anung a tultul ra a sa pilok pasi, anung a nat na wakak, a gas doko nami. An uruk tar a Niong uni, ra in upuaso a warkurai ra i tokodos torom a taro tagun a kum gapman.
23579	MAT 12:21	A taro tagun a kum gapman det in nurnur una risano ma det in kis langlang sur in ulaun det.”
23581	MAT 12:23	Ra a taro rop det kisin, ma det iting lena, “Kutiro a Nutun o Dewid ut ri?”
23582	MAT 12:24	Ikut a kum Parisi det longoro i ra det watungi lena, “A musano ri, i ser lakro ru a kum laulau na nion nama dekdekin o Belsebul, a labino anun a kum laulau na nion.”
23583	MAT 12:25	O Iesu i sa tasman a nuknukin det, ra i watungi tandet lena, “Ra tu gapman det melet ut det in waim etalai, a gapman ra in rop kut. Ra tu tamon, o lako taro tagun tu rumu, det in waim etalai melet kut, ka det in kis tomo melet mo.
23587	MAT 12:29	“Kataio in pet lar pasi sur in ruk una rumu anun tu dekdek na musano, ma in los pas a kum utna tagitiro una nun a rumu, ra ken ker ukai mugu tari. Ra ut in ker ukai mugu tari, in los a kum utna maragom anun a musano ra.
23588	MAT 12:30	“O naro ra ka mir tar pasano mir ebar. Ma o naro ra ke warut iau u eben, i lu sarara ru a taro kut.
23591	MAT 12:33	“In wakak na duwai, i ser wu a wakak na wino, ma in laulau na duwai, i ser wu a laulau na wino. Din tama lele in nanai tagun a wino.
23595	MAT 12:37	Ra una bung ra, anum a wasiso ut in ulangolango pas ui, o in ban laulau ui.”
23596	MAT 12:38	Numur ara taro tagun a kum tene ususer tagun a Warkurai ma a kum Parisi det watungi tano lena, “Tene Ususer, un pam tu ukinalong sur met in tama i.”
23597	MAT 12:39	I balu det lena, “A taro tagun uniri, a sakino taro, anundet a nilaun i bakbak gusun o God. Det sasaring sur tu ukinalong, ikut ka din pam taio torom det. Din pam a ukinalong kut elar nami ra di sa pam tari un o Jona a poropet.
23601	MAT 12:43	“Ra tu laulau na nion in pirso pas gusun tu musano, in nan una kum nubual ra kalako danim iai, sur in mana, ikut ken sio pas tu nubual sur in mana uni.
23602	MAT 12:44	Ra in watungi lena, ‘An milet melet sur anung a rumu, ra a sa pirso pas gusuni.’ Ra in nanpat, in tama i ra i sa belbel, di sa surupu tari, ma di sa ukodos tari.
23603	MAT 12:45	Numur in nan ra in ben melet pas a wonom mawit na laulau na nion, ra det laulau sakit tano, ma det in ruk rop taru una rumu ra, ma det in kis uni. Ma a nilaun anun a musano ra in laulau sakit taun a nilaun ra numugu i utur ukai i. In lenkutkai ra torom a laulau na taro tagun uniri.”
23605	MAT 12:47	Ma ara i inanos o Iesu lena, “O nam ma a kum tistisim kunago det tur nago upiso. Det nem na wasiso tomo nam ui.”
23606	MAT 12:48	Ra i balu i lena, “Osi o nang, ma osi det a kum tistising?”
23607	MAT 12:49	Ra i kodos a lamano torom anun a taro na ususer ma i watungi lena, “Tama i, det ri o nang ma a kum tistising!
23608	MAT 12:50	Uni osi ra i ser mur a nemnem anun o Tita ra i kis sapat una langit, i ra o tising a musano, ma o tising a ino, ma o nang.”
23611	MAT 13:3	I wasiso torom det una susut na utna nama kum wasiso elelar. I watungi lena, “A tene minarut i wan sur in sapro a kum pitino wit.
23617	MAT 13:9	Osi ra arin talngano kura, i wakak sur in longoro nami.”
23618	MAT 13:10	Anun a kum nat na ususer det wan toromi ma det tingi lena, “Sur asau ra u ususer a taro nama kum wasiso elelar?”
23619	MAT 13:11	Ma i balu det lena, “O God i sa pitar tar a mananos tamot, sur mot in talapor una kum wasiso na pidik una matanitu tagisapat una langit. Ikut, ke pitari torom a taro rop.
23622	MAT 13:14	A wasiso na poropet anun o Aisaia i sa sot un det, ra i watungi lena, ‘Mot in longoro ma mot in longoro, ikut ka mot in longoro lele i, mot in tamtama ma mot in tamtama, ikut ka mot in tama lele i.
23623	MAT 13:15	Uni a balan a taro ri i dekdek, ma a taltalngan det i kutkut, ma a matmatan det i pulu. Ra gunuk det in tamtama lele nama matmatan det, ma det in longoro lele nama taltalngan det, ma det in tastasman nama nuknukin det, sako det in tupukus torom iau, ma iau ut, an ulaun pas det.’
23626	MAT 13:18	“Mot in longoro a kukurai ina wasiso elelar ina tene minarut.
23631	MAT 13:23	Ikut a kum pitino ra det lubung sapat una wakak na piso, det elar nam ara musano ra i longoro a wasiso, ma i mananos uni. In wu ara mar, o a wonom na noino, o a tulu noino wino.”
23632	MAT 13:24	O Iesu i watung ara wasiso elelar bulung torom det lena, “A matanitu tagisapat una langit i elar nama musano ra i sapro a kum wakak na pitino wit una nun a kinobot.
23635	MAT 13:27	A kum tultul anun a taman a kinobot det wan toromi, ma det watungi tano lena, ‘Labino, pepetlai, a kum wakak na pitino wit rop kut, ra u sapro tari una num a kinobot? Tagai kai a kum karapa?’
23636	MAT 13:28	I balu det lena, ‘A ebar i pam a petutna ra.’ Ra det tingi lena, ‘U nemi sur met in nan, ma met in gat rop ru det?’
23637	MAT 13:29	I turbat det lena, ‘Gong munung, sako mot in gat tomo ru i nama kum wit.
23638	MAT 13:30	Madek ru i, det in lubung tomo tuk una kalang na pasong. Una bung ra, an watungi tan a kum tene pasong lena: Mot in rakon mugu ru a kum karapa, mot in ker tomo tar a kum kimkibino sur din tun ru det una sungun. Ra numur mot in los tomo i bulung a kum wit una nung a rumu na ululeng.’”
23639	MAT 13:31	O Iesu i watung ara wasiso elelar bulung tandet lena, “A matanitu tagisapat una langit i elar namin pitino mastad, ra ara musano i los pasi, ma i marut tari una nun a kinobot.
23640	MAT 13:32	I natino taun a kum pitino duwai rop, ikut ra i lubung, i labo taun a kum duwai na inangon rop. Ma a kum piko det ser pam pios una kum kanokano.”
23641	MAT 13:33	O Iesu i watung ara wasiso elelar bulung tandet lena, “A matanitu tagisapat una langit i elar nama is, ra ara ino i rakon pasi, ma i pam tomo tari nama labino palawa, ra a palawa rop i mubus nami.”
23643	MAT 13:35	I watungi lenra sur din pam sot pas a wasiso anun a poropet lena, “An wasiso nama kum wasiso elelar, an watung a kum utna ra i kis eno, turpasi numugu utmakai, ra o God i ukis a rakrakon bual.”
23644	MAT 13:36	Numur o Iesu i wan gusun a kunur na taro, ra i ruk una rumu. Anun a kum nat na ususer det ruk toromi ma det inanosi lena, “Un palos a kukurai ina wasiso elelar ri tamet una karapa ra i lubung ubalan a kinobot.”
23645	MAT 13:37	I balu det lena, “O naro ra i sapro a kum pitino wit i a Nutun a Musano.
23652	MAT 13:44	“A matanitu tagisapat una langit i elar nama utna ra a matano i ka doko, ra di munu tari una kinobot. Ma ara musano i sio pasi ma i munu melet tari. Ra i wan nama gasgas, ma i siuru rop ru anun a kum utna, ra i kul pas a kinobot ra nami.
23653	MAT 13:45	“A matanitu tagisapat una langit i elar kai nam ara tene siuru, i sisio sur a kum wat kura ubalan a kabokabol, ra a matandet i ka.
23655	MAT 13:47	“A matanitu tagisapat una langit i elar kai nama uben, ra di woro tari sa utasi, ma a wur ngas na kiripo det iru taru uni.
23659	MAT 13:51	“Pepetlai, mot sa mananos una kum kukurai ina kum utna rop ri, o awu?” Anun a kum nat na ususer det balu i lena, “Ma! Met sa tasmani.”
23660	MAT 13:52	Ra o Iesu i watungi tandet lena, “I mo ra a kum tene ususer rop tagun a Warkurai, ra det sa ususer pas una matanitu tagisapat una langit, det elar nam ara musano ra i uleng a kum wakak na utna una nun a rumu. Ra i upirso a kum wakak na utna ra, gusun anun a rumu sur in papam nami, a ramano kum utna, a kum matokino, ma a ramano kai, a kum turaino.”