23214	MAT 1:1	Iri a risan a kabotaro tagun numugu ra o Iesu Karisito i wanpat tagun det. O Iesu, a nutun o Dewid, o Dewid a nutun o Abaram.
23215	MAT 1:2	O Abaram o taman o Aisak, O Aisak o taman o Jekop, ma o Jekop o taman o Juda ma a kum tistisino.
23216	MAT 1:3	O Juda o taman o Peres der nam o Sera, ra a nander o Tamar. O Peres o taman o Esrom, o Esrom o taman o Ram,
23218	MAT 1:5	o Salmon o taman o Boas, ma o nano a risano o Reap. O Boas o taman o Obed, ma o nano a risano o Rut. O Obed o taman o Jesi,
23219	MAT 1:6	ma o Jesi o taman o Dewid, i ra a king. O Dewid o taman o Solomon, ma o nano a ino ra i nolin pas nam o Uria.
23224	MAT 1:11	o Josaia i ulabo o Jekonia tomo nama kum tistisino. Numur tano, a taro Babilon det dat pas a taro Israel utong o Babilon sur det in kis na karabus.
23229	MAT 1:16	o Jekop o taman o Josep, i ra i nolin nam o Maria. O Maria i usus o Iesu, ra di watungi o Karisito, i ra o God i tulu ru i.
23230	MAT 1:17	A kum taun taro turpasi tagun o Abaram tuk un o Dewid i elar nama noino ma a wat det, ma tagun o Dewid tuk una inawan na karabus tong o Babilon, a noino ma a wat kai det, ma tagun a inawan na karabus tong o Babilon tuk un o Karisito, a noino ma a wat na taun taro kai.
23231	MAT 1:18	Di usus pas o Iesu Karisito lenri: O nano, o Maria, di sa ubek bat tari sur in nolin nam o Josep, ikut numugu tan anunder a nolin o Maria i sa tasmani lena i tianan tan a Tokodos na Nion.
23232	MAT 1:19	O Josep ra di sa ubek bat tar o Maria toromi, i a tene tokodos, ma ke nemi sur in ban umaimai o Maria umatan a taro. Ra i nuki lena in kutus eno ru anunder a liliman tagun a nolin.
23233	MAT 1:20	Ra i nuknuk utmakai una utna ri, a ensel anun a Labino i wanpat toromi una ririon ra i watungi lena, “Josep, a nutun o Dewid, gong u wur nuknuk un o Maria, un ben pasi kut sur anum a ino. Uni a nat ra i tianan pasi, i wanpat tagun a Tokodos na Nion.
23237	MAT 1:24	Ra o Josep i tuangun, i muri lenutra a ensel anun a Labino i sa inanos tari nami, ra i ben pas o Maria sur anun a ino.
23238	MAT 1:25	Ikut ka der inep tomo pas tuk ra o Maria i usus pas a nat na musano. Ma o Josep i pasor a risano nam o Iesu.
23239	MAT 2:1	Di usus o Iesu una tamon Betliem tiro una papor Judia, una kilalo ra o Erod i king. Numur a ramano kum tene mananos tagun a kum nangnang det wan tagitiro una nubual ra in matanas i pusu pat iai, ra det wanpat sapat o Jerusalem.
23241	MAT 2:3	Ra o king Erod i longoro i, i talara a nuknukino ma a nuknukin a taro Jerusalem rop kai.
23242	MAT 2:4	Numur i ben tomo rop pas a kum lamlabino tene etabor torom o God ma a kum tene ususer tagun a Warkurai. Ra i ting det lena, “A Karisito ra o God in tulu ru i, din ususi awai?”
23245	MAT 2:7	Numur o Erod i itula eno pas a kum tene mananos tagun a kum nangnang sur in talapor pas tandet lena, nangisin mulus ra in nangnang i wanpat.
23246	MAT 2:8	I tulu ru det utong o Betliem nama wasiso lenri, “Mot nan ma mot in sisio wakak sur a natlik. Ra mot sa sio pasi, mot in inanos iau, sur iau bulung an nan ma an lotu toromi.”
23247	MAT 2:9	Det sa longoro tar a king ra det wan. Det tama melet pas in nangnang ra det sa tama tari una nubual ra in matanas i pusu pat iai. I mugu nanan det tuk ra i tur sapat una nubual ra a natlik kura iai.
23248	MAT 2:10	Ra det tama in nangnang ra, det taramo a labino gasgas.
23249	MAT 2:11	Det ruk una rumu, ra det tama pas a natlik, ma o nano, o Maria. Det kis butkeke ra det lotu torom a natlik. Numur det papos pas anundet a kum bek ma det tabori nama kum etabor ri: a gol, a paura di tuni ra a misino i sangnain wakak ra di watungi nama insens, ma a torok nin nanai sangsangnain kai ra di watungi nama mira.
23250	MAT 2:12	O God i sa utumarong tar det una ririon, sur gong det milet taru sur o Erod. Ra det milet sur anundet a tamon una se kisapi mukut.
23251	MAT 2:13	Ra det sa wan taru, a ensel anun a Labino i wanpat torom o Josep una ririon ra i watungi lena, “Un katutur, un ben pas derano, ma motul in kalabor eno utong o Ijip. Ma motul in kis tong iai, tuk una bung ra an inanos melet ui, uni o Erod in sisio sur a natlik sur in um doko i.”
23252	MAT 2:14	Ra i katutur, i ben pas derano una mirum, ma detul wan utong o Ijip.
23253	MAT 2:15	Detul kis tiro iai tuk ra o Erod i mat. Una nundetul a kinkinis tiro, di pam sot pas a wasiso anun a Labino, ra a poropet i sa wasiso mugu taru uni lenri, “A kabo pas o nutunglik tagitong o Ijip.”
23254	MAT 2:16	Ra o Erod i tama i lena a kum tene mananos tagun a kum nangnang det sa toro tari, i kankan doko ra i itula sur din um doko rop ru a kum nat musano tong o Betliem ma una kum tamon kai ra det kis milau. I pitar a warkurai sur din um doko det ra aru kilalo anundet, ma det kai ra ke ru kilalo utmakai anundet, uni a kum tene mananos det sa inanos tari una kilalo anun a natlik.
23257	MAT 2:19	O Erod i sa mat, ra a ensel anun a Labino i wanpat torom o Josep una ririon tiro o Ijip.
23259	MAT 2:21	Numur i katutur, i ben pas derano, ra detul wan utong o Israel.
23260	MAT 2:22	Ikut i longoro i lena, o Akelaus i keles o tamano o Erod, sur i bulung in king tong una papor Judia, ra o Josep i ngara sur in nan utong o Judia. Ra detul wan mukut utong una papor Galili, uni o God i turbat tar o Josep una ririon, sur gong detul wan utong una papor Judia.
23261	MAT 2:23	Ra detul wan ma detul kis una tamon a risano o Nasaret. Una anundetul a kinkinis tiro, di pam sot pas a wasiso anun a kum poropet lena, “Din watungi lena i a te Nasaret.”
23265	MAT 3:4	O Jon i ser emar namin namalu di pami nama iwu na kamel, ma i ser ker wati namin pino bulumakau. I ser wan a kum ko ma a polono tatos.
23266	MAT 3:5	A taro tagisapat o Jerusalem, ma tagun a kum tamon rop una papor Judia, ma tagun a kum tamon ra det kis milau a danim Jodan, det wan toromi.
23267	MAT 3:6	Det watung puaso anundet a kum sakino petutna, ra i baptaiso det una danim Jodan.
23268	MAT 3:7	O Jon i tama a susut na Parisi tomo nama kum Sadusi det wan sur in baptaiso det, ra i watungi tandet lena, “Ai, mot a kum nutnutun a kum sui! Osi ra i inanos mot sur mot in kalabor eno gusun a warkurai na minabalu anun o God, ra in nanpat? Iau awu.
23269	MAT 3:8	Mot in pam a kum utna ra in upuaso i lena, mot sa nukpukus.
23270	MAT 3:9	Ma gong mot nuki lena, o God ken warkurai mot uni mot a kabotaro anun o Abaram. A inanos mot lena, o God in pet lari sur in pam pat pas a kabotaro anun o Abaram tagun a kum watat ri.
23271	MAT 3:10	Di sa ubek tar a nawu nisan a kum kibino duwai, ma a kum duwai rop ra ka det wu lako wakak na windet, din tau ru det, ma din woro tar det una sungun.
23272	MAT 3:11	Iau, a baptaiso mot nama danim sur in upuaso i lena mot sa nukpukus. Ikut o naro ra in mur tang a dekdekino i labo taun a dekdeking. Ka elar sur an los anun aru su, uni a natino doko tano. In baptaiso mot nama Tokodos na Nion ma a sungun.
23273	MAT 3:12	I pam pas anun a pok nam aru lamano sur in lakro susuaro a pino wit gusun a wino wit. Numur in ubek tomo anun a wino wit una nun a rumu na wit, ikut in tun ru a kum pinino una sungun ra ke ser mat.”
23274	MAT 3:13	O Iesu i wan tagitong una papor Galili utiro una danim Jodan torom o Jon sur in baptaiso i.
23276	MAT 3:15	Ra o Iesu i balu i lena, “Un baptaiso iau kut. I wakak ra un pami, sur dar in pam sot pas asau rop ra i tokodos umatan o God.” Ra o Jon i mulaot kut tano.
23277	MAT 3:16	Ra i baptaiso tari. Uniutra o Iesu i saur gusun a danim, ra a langit i papos, ma i tama a Nion o God i wan pirso elar namin natabun ma i kis taru netes uni.
23279	MAT 4:1	Numur a Tokodos na Nion i ben o Iesu usa una nubual kalako taro uni, sur o Satan in lari.
23280	MAT 4:2	Ra i sa wewel pas a wat na noino bung na mirum ma a wat na noino bung na waspi, numur i murak.
23283	MAT 4:5	Numur o Satan i ben pasi usapat o Jerusalem, a tamon anun o God, ra i utur tari sapat netes sakit una rumu na etabor.
23284	MAT 4:6	Ma i watungi tano lena, “Ra ui a Nutun o God, un sirok pirso, uni di sa tumus tari una Buk Tabu lena, ‘In watungi torom anun a kum ensel sur det in tamtamabat ui. Det in pam pas ui nama kum lamandet, sur gong u tuka a kikim un tu wat.’”
23286	MAT 4:8	O Satan i ben melet pasi usapat netes una labino tangai, ra i ese tar a kum tamon rop una rakrakon bual tomo nama kum minamarin det rop kai tano.
23289	MAT 4:11	Numur o Satan i wan pas gusuni, ra a kum ensel det wanpat toromi, ma det waruti.
23290	MAT 4:12	O Iesu i longoro i lena, di sa uruk tar o Jon una karabus, ra i milet melet utong una papor Galili.
23293	MAT 4:15	“A piso anun a kabotaro Sebulon ma a piso anun a kabotaro Naptali, milau a kisapi ra i wan unago utasi, una papor danim Jodan utong, der kis una papor Galili, ra a taro ra awu sur a taro Juda det kis iai.
23296	MAT 4:18	Ara bung o Iesu i usal una usalin ina du tasi Galili, ra i tama pas o Saimon, di watungi kai nam o Pita, ma o tisino o Endru. Der woro a uben sa utasi, uni der aru tene woro uben.
23298	MAT 4:20	Uniutra, der katutur pas gusun anunder a kum uben, ma der muri.
23299	MAT 4:21	Ra i wan tagitiro, i tama pas o Jems dersino nam o Jon, aru nutnutun o Sebedi. Detul tamano kis taru una pot ma detul mabon anundetul a kum uben. Ra o Iesu i kabo der.
23300	MAT 4:22	Uniutra, der katutur pas ma der wan gusun a pot ma a tamander, ra der mur o Iesu.
23301	MAT 4:23	O Iesu i wan tuptupukus una papor Galili rop, ma i ususer a taro una nundet a kum rumu na lotu. I warawai nama Wakak na Wasiso una matanitu anun o God. Ma i ulangolango pas a taro gusun a kum wur ngas na misait rop.
23302	MAT 4:24	Ma a wasiso un o Iesu i wan sarara una papor Siria rop. Ra det ben rop pas a taro ra a kum wur ngas na misait i ban laulau det, a taro ra a dekdek na ngunungut i ban laulau det, ma det ra a kum laulau na nion kura un det, det kai ra det ser mat lalang ma det ra a pinpinin det i mat. Ra o Iesu i ulangolango pas det rop.
23303	MAT 4:25	Ma a labino kunur na taro taginin una papor Galili ma tagitiro una papor Dekapolis, ma tagisapat o Jerusalem, ma tagun a papor Judia ma tagitong una ara papor danim Jodan det mur o Iesu.
23304	MAT 5:1	O Iesu i tama pas a kunur na taro, ra i wan toto una tangai, ma i kis. Anun a taro na ususer det wan toromi.
23306	MAT 5:3	“Det ra det tasmani lena det sibo una niondet, det dan, uni anundet a matanitu tagisapat una langit.
23307	MAT 5:4	Det ra det domos nama tupunuk, det dan, uni o God in umarom det.
23308	MAT 5:5	Det ra det unatino pas det, det dan, uni det in los pas a rakrakon bual sur anundet.
23309	MAT 5:6	Det ra det murak ma det muruk sur a tokodos na petutna, det dan, uni numur det in masur.
23310	MAT 5:7	Det ra a kum tene marmaris, det dan, uni o God in maris det kai.
23311	MAT 5:8	Det ra a nuknukin det katu dur uni, det dan, uni det in tama o God.
23312	MAT 5:9	Det ra det ser umalmal a taro, det dan, uni o God in watung det a kum nutnutunu.
23313	MAT 5:10	Det ra di ban laulau det uni det mur a tokodos na petutna, det dan, uni anundet a matanitu tagisapat una langit.
23314	MAT 5:11	“Mot dan ra di watung laulau mot, ma di ban laulau mot, ma di watung a kum torotoro na wasiso un mot lena mot pam a kum sakino petutna, uni mot tagun iau.
23315	MAT 5:12	Mot in gas, uni i labo sakit anumot a ikul sapat una langit. Uni di sa ban laulau mugu tar a kum poropet ra det laun numugu tamot, lenkutkai ra di pami un mot.
23316	MAT 5:13	“Mot a sol tagun a rakrakon bual. Ikut, ra a makasmanino i sa rop, din umakasman meleti mo pepetlai? Katu utna mo i gas uni. Din woro pirso ru i unago utamon, ma a taro det in papapas mukut netes uni.
23317	MAT 5:14	“Mot a talapor tagun a rakrakon bual. Tu tamon ra i kis netes una tangai, ken parau lar pas.
23318	MAT 5:15	Katutaio in ungangon tar tu lam ma in wop bat tari nama paket. Awu! Din ubek tari ut netes una nun a turtur, sur in talapor torom det rop ra det kis una rumu.
23319	MAT 5:16	Lenkutkai ra, anumot a talapor in sisio umatan a taro, sur det in tama anumot a kum wakak na pinapam, ma det in watung ulabo pas a Tamamot ra i kis sapat una langit.
23320	MAT 5:17	“Gong mot nuki lena a wanpat sur an rakon ru a kum Warkurai anun o Moses ma a kum etowo anun a kum poropet, awu. Ka wanpat sur an rakon ru det, a wanpat sur an pam sot pas det.
23321	MAT 5:18	A inanos mot nama lingmulus, katu nat na tumtumus lik o tu ukinalong lik tagun a kum Warkurai ri in rop, tuk ra a bakut ma a rakrakon bual der in rop. A kum Warkurai det in kis ut, tuk ra din pam sot pas det.
23322	MAT 5:19	Osi ra in lakai tu nat na warkurai tagun a kum Warkurai ri, ma in ususer raro a taro sur det kai det in lakai i, din watungi lena, i natino doko una matanitu sapat una langit. Ikut osi ra in mur a kum Warkurai ri, ma in ususer a taro uni, din watungi lena, i labo una matanitu sapat una langit.
23323	MAT 5:20	Lenra, a watungi tamot, ra anumot a tokodos na petutna ken wakak taun a tokodos na petutna anun a kum tene ususer tagun a Warkurai ma a kum Parisi, mot in lagano ruk una matanitu sapat una langit.
23324	MAT 5:21	“Mot sa longoro tari ra numugu di sa watung tari tan a taro lena, ‘Gong u um doko taio. Osi ra in um doko taio din warkurai i.’
23325	MAT 5:22	Ikut iau, a watungi tamot lena, osi ra in kankan torom tu tisino, din warkurai i, ma osi ra in watungi un tu tisino lena, ‘Katin lorim,’ din warkurai i umatan a taro na kiwung. Ma osi ra in watungi un tu musano lena, ‘A longlong ui,’ kutiro a warkurai toromi, ra din woro i una labino sungun.
23327	MAT 5:24	un ubek tar anum a etabor tiro nisan a kabulu na tuntun etabor. Un nan munung, ma mur in emarom mugu pas nam o tisim. Numur un milet melet, ma un pitari maragom anum a etabor.
23328	MAT 5:25	“Ra taio in ubek tar ui una warkurai, mur in emarom mugu ra mur wan nanan utmakai una kisapi, sako in pitar tar ui torom a tene warkurai. Ra a tene warkurai in pitar ui torom a tene tamtamabat ra in uruk ru ui una karabus.
23329	MAT 5:26	A inanos ui nama lingmulus, kon pirso lar pas tuk ut ra un pitar rop ru a ururop na toia ina num a kunukul.
23331	MAT 5:28	Ikut iau, a watungi tamot lena, ra tu musano in tama tar tu ino ma a nuknukino i laulau toromi, una nuknukino, i sa pam tar a sakino petutna tomo nama ino ra.
23332	MAT 5:29	Ra in nosot na matam in ben raro ui, liok ru i, ma un woro gisen ru i. In wakak ra ara du pinim kut din woro ru i, sur gong di woro a pinim rop una labino sungun.
23333	MAT 5:30	Ra a sot na lamam in ben raro ui sur a sakino, un kutus ru i, ma un woro gisen ru i. In wakak ra ara du pinim kut din woro ru i, sur gong di woro a pinim rop una labino sungun.
23335	MAT 5:32	Ikut iau, a watungi tamot lena, ra a ino ke pam a sakino nam tu musano, ma anun a musano i lu oros ru i kut, ma a ino i nolin melet, i pam a sakino. Ikut anun a musano, i kibino una sakino ra. Ra tu musano in nolin nam tu ino ra anun a musano i lu ru i, i kai i sa pam tar a sakino, uni a ino ra, i nolin ut.
23336	MAT 5:33	“Mot sa longoro tari kai ra numugu di sa watung tari tan a taro lena, ‘Gong u liliman torotoro. A utna ra u sa liliman taru uni torom a Labino, un pam soti ut.’
23337	MAT 5:34	Ikut iau, a watungi tamot lena, gong mot udekdek a liliman nam tu ngas na wasiso kai. Gong mot liliman nama langit, uni a langit, a kiskis na king anun o God.
23338	MAT 5:35	Gong mot liliman nama rakrakon bual, uni a rakrakon bual a nubual ra i ubek aru kikino uni. Gong mot liliman nam o Jerusalem, uni o Jerusalem a tamon anun a labino King.
23339	MAT 5:36	Gong u liliman namin lorim, uni kon pam pukus lar pas tin iwu na lorim sur in kabang, o in mirum.
23340	MAT 5:37	Mot in watungi kut lena ‘ma’ o ‘awu’. Uni, ra mot in watung tu ngas na wasiso melet, i ra i wanpat mukut tan a Tene Sakino.
23341	MAT 5:38	“Mot sa longoro tari ra di sa watung tari lena, ‘Ra taio in liok ru tin matan taio, din balu i toromi, din liok ru i kai tin matano. Ra taio in tubul pak ru tin lokon taio, din balu i toromi, din tubul pak ru i kai tin lokono.’
23342	MAT 5:39	Ikut iau, a watungi tamot lena, gong mot balu a sakino anun taio ra i pami torom mot. Ra taio in pasor tar a papor sot na wam, un pukus ara papor bulung toromi.
23343	MAT 5:40	Ra taio i nemi sur in dat tar ui una warkurai ma din pitar a warkurai tam sur un pitar anum a siot tano, un pitar tari kai anum a saket.
23344	MAT 5:41	Ra taio i ungongos pas ui, sur mur in nan tomo, sur tu tamon ra i milau kut, un nan tomo nami sur a tamon ra i kis bakbak lilik.
23345	MAT 5:42	Un tabor taio ra i saring ui. Ma ra taio in saring ui sur in los pasi munung tu utna gusun ui, un pitari kut munung tano.
23347	MAT 5:44	Ikut iau, a watungi tamot lena, mot in nem anumot a kum ebar, ma mot in wararing sur det ra det ban laulau mot.
23348	MAT 5:45	Ra mot in pami lenra in ese i lena mot a kum nutnutun a Tamamot, ra i kis sapat una langit. Uni i pitar tar a suan sur in talapor una kum tene sakino ma a kum wakak na taro kai, ma i pitar tar a bato torom a kum tene tokodos ma torom det kai ra ka det tokodos.
23349	MAT 5:46	Ra mot nem det kut ra det nem mot, asau mo anumot a ikul? A kum tene los takis, ra ka det lason una marmaris det kai det ser pami lenra.
23350	MAT 5:47	Ra mot gas pas a kum paspasa mot kut, mot in wakak pepetlai taun ara taro? A taro kai ra ka det nurnur, det ser gas pas a kum paspasan det kut.
23352	MAT 6:1	“Mot in tumarong mot sur gong mot pam anumot a wakak na pinapam umatan a taro kut, sur det in tama i ma det in watung ulabo pas mot. Ra mot pami lenra, katu ikul anumot tan a Tamamot ra i kis sapat una langit.