24287	MRK 1:3	Homou lau iyuw imin lok sehir tam pwi, ihpa, ‘Adahnan salan Lapan ki‑in. Atatilen salan kile huyen.’”
24288	MRK 1:4	Ile pe ndramat odo tokai ise munen ti Jon odo Baptais. Jon imin lok sehir ndre akan poi ke porah iyin eriy, pe isohou puko‑on ile ta sa lau ihpa, “Tawene taduu ke‑eu odo punou mo‑on pe atsa otpo baptais, kile pe Lapan kolon ke‑eu odo to‑ir taduu.”
24289	MRK 1:5	Ile pe sa lau sulo‑on odo Yerusalem pe lok se yi odo Yuda, hala pe haltahrung Jon. Su henen to‑ir ta su ile moleu pe Jon itou baptais ile ta su odo wo Yordan.
24291	MRK 1:7	Iy ipe ile ta sa lau ihpah, “Ndramat homou ndre we kise omur todo ti ise puli‑i lakopwi. Yu ti undranon Iy pwi. Yu undranon kukaluluhu pe kuruwyon esuke‑en su Tadan pwi.
24293	MRK 1:9	Kalmene‑en kurti pe Yesus iyus taon Nasaret, odo Galili Distrik, pe ile ndrongon Jon. Pe Jon inuhen Iy odo wo Yordan.
24294	MRK 1:10	Idu ke ndre Yesus ise eleng odo lon wo ti, Iy indre‑et ile eleng, pe iltuwe parar iseket idu kopwi. Pe Lapan Mulwen iyuh ise pule‑en ihpa ndre pal.
24295	MRK 1:11	Kuruwen pohoi iyus lom parar iseket ti ipe ihpa, “Ou ti Nedu. Yu wasu‑u Ou lakopwi. Yu uhposon Ou.”
24297	MRK 1:13	Yesus imin lok erti rang ndre hangoh ndroda su ka‑an puyep. Pe Satan ile pe ituhne ipe kihnan Iy pe Iy kindretahrung nolou ta Lapan pwi. Pe su engel henehnuwii Iy.
24298	MRK 1:14	Sa kah hendrundrotowe Jon odo Baptais pe hokuni iy inna kou. Idu ndruwen erti, Yesus ile Galili Distrik pe ipehre Nolwo‑on Lapan.
24299	MRK 1:15	Iy ipe ihpa, “Losengin indrihir. Mundrun ndre Lapan we kile king odo lokpoi ti indrisa. Ada‑as punou mo‑on ha‑au pe otpo bilip kile Nolwo‑on Lapan.”
24301	MRK 1:17	Pe Yesus ipe ile ta horu ihpa, “Arsa oru‑us Yu, pe Yu we kutuhnon oruu kile takun ndramat.”
24302	MRK 1:18	Ile pe horu herpiyen kupwen ta horu into ndre poi pe horu‑us Yesus.
24304	MRK 1:20	Yesus madan ihtek ta horu ti pe iyuwen horu lakopwi. Horu herpiyen tama’ horu ndrodan ndre su lewen marai honto ndre ndrol, pe horu‑us Yesus.
24305	MRK 1:21	Su hala taon Kaperneam, pe idu Sabat, eri Yesus ile lon omwen surok ta su Yuda pe ipehre nolwo‑on Lapan ile ta sa lau.
24307	MRK 1:23	Sa hehretek ti orngon homou sinel imin pule‑en ti idehel idu pule‑en Yesus ihpa,
24310	MRK 1:26	Pe sinel kuti iruhyon orngon kuti ile puko‑on, inum pe idehel ile mo‑on pe indreh iyeu.
24311	MRK 1:27	Sa lau ndre sulo‑on hehretek pe poho’ sa idohoh idu kopwi. Homou ihndremte homou ihpa, “Homosa kutih? Iy itou tatuhne pe punou ile handrai yi. Iy isohou Nolwo‑on Lapan ihpa ndre ndramat tadan pawa. Pe inlou ta sa sinel pe su hohrung Iy!”
24312	MRK 1:28	Ile pe Yesus rangan ihnding sowin kopwi odo lon Galili Distrik ndre mandra‑an.
24313	MRK 1:29	Yesus ise kiu odo omwen surok pe illa ile um ta Saimon horu Andru. Sa lau se ho‑us yi, ndrodan ndre Jems pe Jon.
24315	MRK 1:31	Iy illa ile hun osohon Saimon, indrotowe lumwen, pe isori iy imin eleng. Osohon Saimon ile huyen, pe itou song ile ta su pe su hoyo‑on.
24317	MRK 1:33	Sa lau ndre sulo‑on odo taon Kaperneam ti hala pe hodo malal odo um ta Saimon horu Andru.
24321	MRK 1:37	Su hetureh Tadan pe hapa ihpa, “Sa lau ndre sulo‑on hempondrih Ou.”
24322	MRK 1:38	Odoke Iy ipe ile ta su ihpa, “Tidu titla lok se yi ndre he‑en mukehe odo ketih, pe Yu kulpehre Nolwo‑on Lapan. Yu use ti odo paninye nolou ta Lapan ile lok ndre sulo‑on.”
24323	MRK 1:39	Ile pe Iy ile lok ndre sulo‑on odo lon distrik Galili pe ipehre Nolwo‑on Lapan odo lon omwen surok sim pe sim, pe iyesilpinen su sinel ha‑au odo ta sa ndramat.
24324	MRK 1:40	Orngon homou tadan sik lepra ile, pe pandrulku‑un ndre rukei ile poi idu madan Yesus, pe iy ideng ipe ihpa, “Uh Ou ereh, eri ahnan yu kuhir huyen odo madan Lapan.”
24325	MRK 1:41	Yesus madan ile tadan pe ikarndrum iy lakopwi. Iy itlon lumwen ile pe itkuni orngon kuti, pe ipe ihpa, “Yu wasu‑u. Ou ala huyem.”
24327	MRK 1:43	Yesus sowin kopwi ipe ile tadan iyeu, odoke ipe nolou puko‑on ile tadan ihpa,
24329	MRK 1:45	Odoke orngon ti ile lok ndre sulo‑on odo Galili pe inen sane kuti ile ta sa lau. Ile pe Yesus indranon kindrila lon sih taon pwi, odosa sa ndre sulo‑on hempondrih ke Iy. Iy immin ke lok ndre ndramat hondruto eriy pwi ti, odoke sa lau odo hokor pe hokor halla ndrongon Iy.
24331	MRK 2:2	Lau hohndur hala yi ndre ndrongon Iy, ile pe um ndre Iy imin eriy ti ihndrepit ta sa lau. Lonu‑um pe kiu ndrodan ti hepe lok ke porah indrisou pwi, pe Yesus impehre Nolwo‑on Lapan ile ta sa.
24333	MRK 2:4	Lok indrehndrepit pe su handranon hana mukehe ta Yesus pwi, ile pe su hosori orngon kuti ile mbrungiy pe hosomukihi ngereu ise eriy. Ngereu ti ise ke ndre pule‑en Yesus. Inum pe su hosokombrute‑en osukei ile lokowon orngon kuti pe heduwe iy ile pwoi melsen, ile purmadan Yesus.
24334	MRK 2:5	Yesus iltuwei ihpa ndre bilip ta su ti mandra‑an, ile pe Iy ipe ile tan orngon kakukuw ihpa, “Nedu, Yu undra‑as to-ir tadam handra‑au.”
24336	MRK 2:7	“Ei! Iy ti ipe Iy ti sa pe inolou mo‑on ile ta Lapan tih? Homou lau kindranon kindra‑as to-ir ta homou lau pwi. Homou ke Lapan kenon kipu ertih!”
24338	MRK 2:9	Iy kehe mangsan ewehen lakopwi? Yu kupwe ‘to‑ir tadam handra‑au’ ndre pwi Yu kupwe ‘atlang, okuni lokowum pe alla’?
24339	MRK 2:10	Yu we kulilngan kile ta oduu ihpa ndre Nedun Ndramat ti tadan pawa odo as to‑ir ta sa ndramat odo lokpoi.” Ile pe Iy ipe ile tan orngon kakukuw ti ihpa,
24341	MRK 2:12	Orngon ti itlang, ikuni lokowon, pe illa iyeu iyus mada’ sa lau ndre sulo‑on. Sa ndre sulo‑on hehretek pe hemesi‑iy, pe hesori rangan Lapan ile eleng. Pe sa hapa ihpa, “Odu hepe etsenendre‑et hangka‑an ihpa kuti pwi uu ndre mahkele.”
24342	MRK 2:13	Yesus ile yi ndre ngerin ndras odo Galili. Sa lau sulo‑on hala ndrongon Iy, pe Iy innen Nolwo‑on Lapan ile ta su.
24344	MRK 2:15	Ndruwen erti pe Yesus ile ilyo‑on song ile um ta Livai. Su se ndramat odo takun takis pe sa ndramat se mo‑osa, hala yi pe hana‑an song hodo ke hondroh ndroda Yesus pe su lewen.
24345	MRK 2:16	Su tisa odo Lo (su ti Paraseo) heltuwe Yesus ina‑an song ndroda sa lau mo‑osa pe su lau odo takun takis, ile pe su hehndremte su disaipel Tadan ihpa, “Ihpa kehe pe Iy ina‑an song ndroda sa lau kurtih?”
24346	MRK 2:17	Yesus ihrungi su pe ipe ile ta su ihpa, “Sa lau hendrimat sik pwi ti hesereh tan ndrokta pwi, tapake sa ndre ta sa sik ti herreh tan ndrokta. Yu use ti odo yuw sa lau huye’ sa ti pwi. Yu use ti usuyuw sa lau mo‑osa.”
24347	MRK 2:18	Petsih ti su lau honu‑us Jon Baptais, pe su lau ndre honohtot Lo ta Moses, eri holuhuw yo‑on song. Ile pe sa lau se hala hu Yesus pe hehndremte Iy, “Su lewen Jon pe su lau mandra‑ane odo Lo ta Moses ti heneluhuw yo‑on song, pe ihpa kehe pe su lewim ti hesempo erti pwi tih?”
24348	MRK 2:19	Yesus ipe ihpa, “Ihpa kehe? Oduu waso‑o’ oduu atpa sa kowson ndramat ndre iyesou mahkele kopwi ti hoyo‑on song kolwii, idu iy mapwi imin ndroda su tih? Pwi tih! Idu iy mapwi imin, eri su kowson ti we hensinip ana’ su odo yo‑on song pwi.
24349	MRK 2:20	Odoke rang ti we kise, pe sa lau mo‑osa we hekuni iy ke‑eu odo ngo’ su lewen. Iy ndre kah kindra‑au ti pe su ka we holuhuw song.”
24350	MRK 2:21	“Homou indresokopti sehir kolau wuhou ile mundren siot ndruken iseket ti pwi, odosa, uh sa we hesingen, eri palan kolau wuhou kuti we kikuw kile lehyen pe kire‑e siot kile mandra‑an lakopwi.
24351	MRK 2:22	Pe homou isentehen wain morowin ile lon keltun meme ndruken pwi. Pwi ti we wain kire‑e keltun meme kurti, pe wain ndrodan ndre keltun meme we herehmo‑on. Ile pe sa hentehen wain morowin ti illa ke lon kalatun meme wuhou.”
24352	MRK 2:23	Idu rang sei Sabat eri Yesus illa iyus lon katen wit. Su lau Tadan ti ho‑us Iy yi, pe hentakun sengin wit pe hana‑an.
24353	MRK 2:24	Ile pe su Paraseo hapa ile ta Yesus hahpa, “Hei, Lo ta tidu ti indresinip ana’ tidu odo yo‑on song odo langah ta sa lau ti pwi, odoke Lo ti ipe tidu we titndrepo erti kidu Sabat pwi.”
24354	MRK 2:25	Yesus isomwi su ihpa, “Oduu ti hepe edempo rit pohtidi‑iy tan Devit iyin buk tam Profet Samuel ti ndre pwi? Idu mundrun ndre Abiatar ti hetpris, Devit pe su lewen hamat song pe hala lon omwen Lapan, pe hani bret odo ofa illa ta Lapan. Bret erti immin purmadan Lapan, pe sa lau ke porah we hendreyo‑on pwi. Sa pris kopwi we heyo‑on. Odoke Devit iyo‑on, pe itou se ile ana’ su lewen yi. Oduu edempo ridim nolou kuti ndre pwi?”
24360	MRK 3:3	Ile pe Yesus ipe ile tan orngon ndre lumwen mo‑on ti ihpa, “Odo eleng pe esuto munen.”
24361	MRK 3:4	Pe Yesus ihndremte su ihpa, “Lo tatidu ti ipe we tidu titpo sa kidu Sabat? Lo ipe tidu we titpo sane huyen or sane mo‑on? Tidu tidehnuwii ndramat kimet kolwii, or tidu tidahnan ndramat kimet?” Odoke homou indripa hangka‑an pwi.
24362	MRK 3:5	Yesus indre‑et ile ta su pe lon ndrinen inei, odoke ikarundrum su, odosa su hapa we ha‑au hemin ke ndre tawene ta su munen tih. Pe Iy ipe ile tan orngon kuti ihpa, “Otlon lumwem.” Orngon ti itlon lumwen pe lumwen ile huyen ndresale.
24363	MRK 3:6	Ile pe su Paraseo hatlang pe ha‑au hala kiu. Su ndresale kopwi hala ndroda su lau ta Herot pe helpunou odo we hapwi Yesus kimet.
24364	MRK 3:7	Yesus ndroda su disaipel Tadan ha‑au hala Ndras Galili pe sa lau sulo‑on hodo ndruwen. Kaunan sane ndre Yesus impo ti ihtot lon lok odo Galili Distrik, Judea Distrik,
24365	MRK 3:8	odo taon Yerusalem, odo Idumea Distrik ndroda lok odo wo Yordan hodoh, pe odo taon Tair pe taon Saidon. Ile pe sa lau sulo‑on odo lok erti hasa ndrongon Iy.
24366	MRK 3:9	Ile pe Yesus ipe ile ta su disaipel Tadan ihpa, “Sa lau pohpou pohpou hansa. Etpondrih sih ndrol ki‑in, kihne sa hoportai hasa mukehe pe horotawe Yu. Pe uh sa hapa heseporoh Yu, eri Yu we kundreh kile ndrol pe kule mahun odo ta sa.”
24367	MRK 3:10	Yesus indrahnan sik ta sa lau sulo‑on munen kah, ile pe sa sik ti hentandrusuwi hapa hala mukehe pe hetkuni Iy, kile pe sik ta sa ha‑au.
24368	MRK 3:11	Su sinel ti yi, into su heneltuwe Yesus, eri pandrulku‑u’ su illa poi pe hoyuw ihpa, “Ou ti Nedun Lapan!”
24369	MRK 3:12	Odoke Yesus ineyahat ana’ su ile puko‑on, ipe su hapahran Iy ti si eri kolwii.
24370	MRK 3:13	Yesus inek kuh ile malal, pe iyuwen su lau ndre Iy waso‑on su tih. Su hala ndrongon Iy,
24371	MRK 3:14	pe Iy ihlite su sungoh-pe-rumuu. Su ti we honto ndrodan Iy, pe Iy we kinehtakalan su hompo maryan Lapan. Pe Iy ipe ile ta su ihpah, “Yu ukuni oduu we otto ndroda Yu. Yu we kuhtakalan oduu atlapehre Nolwo‑on Lapan.
24372	MRK 3:15	Pe oduu we taduu puko‑on odo as sinel.”
24376	MRK 3:19	pe Yudas Iskariot, iy ndramat ndre iduwe Yesus ile lumwe’ sa lau mo‑osa.
24377	MRK 3:20	Yesus ile yi ndre um ndre iy immin eriy tih. Pe sa lau sulo‑on yi hala haltahrung Iy, ile pe Iy ndroda su disaipel Tadan handranon hendreyo‑on song pwi.
24378	MRK 3:21	Su murwon Yesus hehrungi sane Yesus impo kuti, pe su hala hapa haltakun Iy, odo sa sulo‑on hapa Iy ti ngungong idu Tadan.
24379	MRK 3:22	Sa sape ndramat se odo Lo ho‑us Yerusalem hala pwoi, pe hapa ihpa, “Belsebul imin pule‑en. Iy ina‑as sa sinel ti ile puko‑on tam Belsebul, mandra‑an ta su sinel.”
24380	MRK 3:23	Ile pe Yesus iyuwen su hala mukehe pe ipe ile palan nolou ihpa, “Ihpa kehe pe Satan we ki‑es Satan?
24381	MRK 3:24	Uh sih kantri kitlangan iy kile kantri ruweh, pe sih kipu pahun kile pule‑en sih, eri kantri erti we kitpar.
24382	MRK 3:25	Pe uh su lewen lonu‑um sim hetlangan su hala rimir pe hopo pahun kile ke ndre pule‑e’ su, eri lewen lon um erti we hatpar.
24383	MRK 3:26	Pe uh Satan kipu pahun kile ke ndre pule‑e’ su lewen, eri puko‑on tadan we kinum, pe iy we kinum ndresale.”
24384	MRK 3:27	“Homou lau kindranon kinna lon omwen homou ndramat puko‑on pe kikun sane kile reh tadan ti pwi. Iy we kihndrusi lau puko‑on erti kile osukei oh, kile pe iy ka we kenon kikun sane odo lon um ta lau puko‑on kutih.”
24385	MRK 3:28	“Yu kupwe ndre ndrokene kile taduu. Lapan we ki‑es to‑ir ndre sulo‑on ndre sa ndramat hompo. Pe nolou mo‑on ndre sa ndramat hampa ile pule‑en Lapan, eri Lapan we ki‑es ke‑eu,
24386	MRK 3:29	odoke iy si ndramat ndre kipe nolou mo‑on kile ta Lapan Mulwen, eri Lapan we kindra‑as to‑ir tadan erti pwi. To‑ir erti we kindrimin pe kindrimin.”
24387	MRK 3:30	Yesus ipahran nolou kurti, odosa su sape ndramat odo Lo hapa sinel imin pule‑en.
24389	MRK 3:32	Lau sulo‑on hemin pwoi hosokaltan Yesus, pe su hapa ile Tadan ihpa, “Yesus, tinem pe tintom su holto kiu pe hapa Ou ala.”
24391	MRK 3:34	Inum pe Iy madan ile ta sa lau ndre hemin pwoi hosokaltan Iy ti pe ipe ihpah, “Su he‑en poi he‑en ti nino pe tinto.
24392	MRK 3:35	Iy si ndre kimpo sane kile reh ta Lapan, eri iy ti tinto pe timsu‑u pe nino.”
24394	MRK 4:2	Pe Yesus isohou sulo‑on ile ke palan nolou odo tatuhne su ile sane sulo‑on. Iy ipe ile ta su ihpa,
24396	MRK 4:4	Iy ineroti hoso lompurlumwen pe impiyi ile sehir pe sehir. Pedun wit se ti hadaketi hala sal, pe nenka‑an hala pe hanii.
24397	MRK 4:5	Se ti hadaketi hala pule‑en pat. Poi odo pule‑en pat ti menihin, ile pe wit erti hombruu sowin kopwi.
24400	MRK 4:8	Odoke wit se ti horor hala pule‑en poi huyen. Su hombruu, hernge hala mandra‑an pe hotou sengi’ su. Se ti mbrwe’ su inehndre tulngeh ea hoso hombrung, se onngoh, pe se sangat.”
24402	MRK 4:10	Sa lau sulo‑on kah handra‑au. Ile pe su lau ndre honto ndroda Yesus ti, pe su aposel Tadan ndre sungoh-pe-rumuu, hehndremte Iy ile mining tam palan nolou ndre Iy indripa kah ile ta sa lau tih.
24404	MRK 4:12	Kile pe: “‘Su we hehreh pe hehreh odoke we hendrepondriti pwi, su we hehrung pe hehrung yi, odoke su we hendrehtuno su pwi. Odo uh su hopondritii pe hehtuno su, eri kihne su ha‑au odo sal mo‑on pe Lapan ki‑es to‑ir ta su ha‑au.’”
24405	MRK 4:13	Inum pe Yesus ipe ile ta su ihpa, “Oduu ti tuno’ oduu mining odo palan nolou yu upwe ti pwi? Orkom! Oduu we edehtuno oduu mining odo palan nolou ndre sulo‑on ti kihpa kehe?
24408	MRK 4:16	Lau se eri hahpa ndre wit ndre horor ile pule‑en pat. Su hekuni nolou ti sowin kopwi pe hehposon.
24409	MRK 4:17	Odoke nolou erti indrimin ndrine’ su pwi pe su ha‑amelyen sohi kopwi. Ile pe idu sa lau hapa hahyan Nolou ta Lapan pe hotou pede‑en pe hopo mo‑on ile ta su, eri bilip ta su intaketi sowin kopwi.
24410	MRK 4:18	Sa lau se ti hahpa ndre wit ndre hadaketi hala lon osukei pudon. Su lau erti hehrungi Nolwo‑on Lapan
24411	MRK 4:19	odoke su hantewene hudut ile sane odo lokpoi. Su ede’ su inehnduk ile moni pe henendringis handrai pe handrai. Sane erti hosorohe Nolwo‑on Lapan, pe indrempo sengin pwi.
24416	MRK 4:24	Iy ipe yi ihpa, “Atawene kehii kile nolou kutih. Punou sa ou opo kile pule‑e’ si ndramat kihpa kehe eri Lapan we kipu kihpa ke ndre eriy kile puli‑im. Pe Lapan we kitou hepe lakopwi, kihluwen iy ndre ou opo ile ta sa ndramat.
24417	MRK 4:25	Iy si ndramat ndre tadan sane, eri Lapan we kihngahang iy lakopwi. Pe iy si ndre tadan sane pwi, eri Lapan we kikuni ndre sulo‑on ndre hodo ngon iy ti ke‑eu.”
24423	MRK 4:31	Kapman ta Lapan ti ihpa ndre mbrwen kei he‑ei sa hana‑an, rangan mastet. Mbrwen mastet ti indrahpa ndre mbrwen kei se ti pwi. Mbrwen ti lehyen lehyen lakopwi. Pe sa hentohon illa lo langah.
24424	MRK 4:32	Sa ndre hendretohon kah ti pe iy inerenge, pe inehluwen kei ndre sulo‑on odo langah. Ndrandran ti halla mandra‑ane, pe lon ndrandran ti wo‑on. Ile pe nenka‑an halla henemandro pe hentumwe emwe’ su honto eriy.”
24425	MRK 4:33	Yesus ipehre Nolwo‑on Lapan ti ile palan nolou se sulo‑on yi. Iy impahelos sane illa homosa ndre sa lau tuno’ sa, pe we hanon hokuni mining odo eriy tih.
24426	MRK 4:34	Nolou ndre sulo‑on ndre Iy ipehre ile ta sa lau, eri illa ke palan nolou. Odoke ndre omur ti su disaipel Tadan kopwi honto ndrodan Iy, pe Iy impahran mining odo palan nolou kuti hala ta su.
24428	MRK 4:36	Ile pe su hondroh ile ndrol ndre Yesus imin lon ti pe hokuni Iy ile hodoh. Sa lau ndre sulo‑on ti honto, tapake ndrol se ho‑us su hala hodoh.
24429	MRK 4:37	Langat mandra‑an inguh pe ihnan payau hala mandra‑an, ile pe wo inehturu ile lon ndrol, pe ndrol ipe kiruh.
24430	MRK 4:38	Yesus ti iduwe palan imin ndralulum pe inemetir imin ku‑in ndrol. Su disaipel hala hesohrungi Iy pe hapa ihpa, “Tisa, emin eleng! Ndrol ke iruh pe tidu kihne kah titmat. Ou karmadam kopwi ile sa?”
24431	MRK 4:39	Yesus imin eleng pe ihrurute ana’ yor ihpa, “Onum!” pe ipe ile tam payau ihpa, “Otto kopwi!” Ile pe yor imet pe pule‑en ndras iyeweh.
24433	MRK 4:41	Odoke su honoh ile mo‑on. Homou madan ile ta homou pe hapa ihpa, “Iy ndramat sa kurtih? Yor pe payau ti hentahrung nolou Tadan yi!”
24435	MRK 5:2	Yesus indreh ile pwoi odo ndrol, pe orngon homou ihtot ile hun Iy. Orngon kuti sinel imin pule‑en, pe ine‑en lon ngat odo matmat. Sa lau henehndruhus iy tahit. Sa henehndruhus iy ile sen ti tahit yi.
24437	MRK 5:4	Sa henehndrusi iy illa sen odoke iy isomondrihi sen, pe inti‑i haen odo ndriken. Puko‑on tadan ti ilsou lakopwi, pe homou lau kindranon kindrundrotowe iy pwi.
24438	MRK 5:5	Meseren pe lukumwen sei ihpa ke sei, iy inelila ine‑en lom matmat pe inehtot odo padangkuh, pe inesangar pe inemendrele mundren illa pat.