| 23214 | MAT 1:1 | ये़सु ख्रिस्ते़न् अब्राहामरे़ कुस्साः हे़क्क्याङ् दाउद हाङ्ङिल्ले़ कुस्साः वये़रो॥ कङ्ग खुने़ॽ कुधाःक्हाॽरे़ खुनिॽ मिङ्स्रारो– |
| 23215 | MAT 1:2 | अब्राहामरे़ कुस्साः इसहाक वये़, इसहाकरे़ कुस्साः याकुब वये़, याकुबरे़ कुस्साःहाॽ यहुदा हे़क्क्याङ् खुने़ॽ कुम्भुॽ कुन्साॽसि मे़वये़रो॥ |
| 23216 | MAT 1:3 | हे़क्क्याङ् यहुदाःल्ले़ कुस्साःहाॽ पेरेज नु जिराह वये़त्छि (खे़ङ्हाॽरे़ खुन्छिॽ माःल्ले़ कुमिङ् तामार वये़), फारे़सरे़ कुस्साः हे़स्रोन वये़, हे़स्रोनरे़ कुस्साः आराम वये़रो॥ |
| 23217 | MAT 1:4 | हे़क्क्याङ् आरामरे़ कुस्साः अम्मिनादाब वये़, अम्मिनादाबरे़ कुस्साः नहसोन वये़, नहसोनरे़ कुस्साः सल्मोन वये़रो॥ |
| 23218 | MAT 1:5 | हे़क्क्याङ् सल्मोनरे़ कुस्साः बोअज वये़ (बोअजरे़ कुम्मारे़ कुमिङ् राहाब वये़), बोअजरे़ कुस्साः ओबेद वये़ (खे़ल्ले़ कुम्मारे़ कुमिङ् रुथ वये़), ओबेदरे़ कुस्साः यिसै वये़॥ |
| 23219 | MAT 1:6 | हे़क्क्याङ् यिसैरे़ कुस्साः दाउद हाङ्ङिन्वये़॥ दाउद हाङ्ङिल्ले़ कुस्साः सोलोमन वये़ (सोलोमनरे़ कुम्मा बेत्सेबाःन् उरियाहरे़ कुमेःत् वये़रो॥) |
| 23220 | MAT 1:7 | हे़क्क्याङ् सोलोमनरे़ कुस्साः रहोबाम वये़, रहोबामरे़ कुस्साः अबिया वये़, अबियारे़ कुस्साः आसा वये़रो॥ |
| 23221 | MAT 1:8 | हे़क्क्याङ् आसारे़ कुस्साः यहोसापात वये़, यहोसापातरे़ कुस्साः यहोराम वये़, यहोरामरे़ कुस्साः उज्जियाह वये़रो॥ |
| 23222 | MAT 1:9 | हे़क्क्याङ् उज्जियाहरे़ कुस्साः योताम वये़, योतामरे़ कुस्साः आहाज वये़, आहाजरे़ कुस्साः हिजकिया वये़रो॥ |
| 23223 | MAT 1:10 | हे़क्क्याङ् हिजकियारे़ कुस्साः मनस्से वये़, मनस्सेरे़ कुस्साः अम्मोन वये़, अम्मोनरे़ कुस्साः योसियाह वये़रो॥ |
| 23224 | MAT 1:11 | हे़क्क्याङ् योसियाहरे़ कुस्साःहाॽ यकोनियास नु कुन्साॽसि मे़वये़रो (खे़ङ्हाॽग इस्राइलिहाॽ बे़बिलोन लाजेॽओ मे़दे़म्सु मे़देॽरुसिआङ् मे़गत्तुसिबा ये़म्मो सामे़वाःन्छिङ्ङाङ्मे़वये़रो)॥ |
| 23225 | MAT 1:12 | बे़बिलोःन्नो मे़देॽरुसिआङ् याङ्सि यकोनियासरे़ कुस्साः सालतिएल वये़, हे़क्क्याङ् सालतिएलरे़ कुस्साः यरुबाबेल वये़रो॥ |
| 23226 | MAT 1:13 | हे़क्क्याङ् यरुबाबे़लरे़ कुस्साः अबिउद वये़, अबिउदरे़ कुस्साः एलियाकिम वये़, एलियाकिमरे़ कुस्साः आजोर वये़रो॥ |
| 23227 | MAT 1:14 | हे़क्क्याङ् आजोररे़ कुस्साः सादोक वये़, सादोकरे़ कुस्साः आखिम वये़, आखिमरे़ कुस्साः एलिउद वये़रो॥ |
| 23228 | MAT 1:15 | हे़क्क्याङ् एलिउदरे़ कुस्साः एलाजार वये़, एलाजाररे़ कुस्साः मत्तान वये़, मत्तानरे़ कुस्साः याकुब वये़रो॥ |
| 23229 | MAT 1:16 | हे़क्क्याङ् याकुबरे़ कुस्साः युसुफ वये़॥ युसुफे़न् मरियमरे़ कुये़म्बाॽ वये़, हे़क्क्याङ् हाबा कन् मरियम्मिन्लाम् निङ्वाॽफुमाङ्ङिल्ले़ सेःन्दुबा ख्रिस्त मे़प्मनाबा ये़सुःन् सावाःन्छिङ्लो॥ |
| 23230 | MAT 1:17 | अक्खेलॽरिक् अब्राहामलाम् दाउद हाङ् थारिक् थिक्-लि (१४) थाःक् मे़वये़, हे़क्क्याङ् दाउद हाङ्लाम् बे़बिलोन लाजेॽओ मे़दे़म्सु मे़देॽरुसिआङ् मे़गत्तुसिबा ये़म् थारिक् थिक्-लि (१४) थाःक् मे़वये़, हे़क्क्याङ् बे़बिलोःन्नो पुङ्लाधाबा मे़जोगुसिआङ् मे़देॽरुसिबा ये़म्माङ्धो निङ्वाॽफुमाङ्ङिल्ले़ सेःन्दुबा ख्रिस्ते़न्सावाःन्छिङ्बा ये़म् थारिक् थिक्-लि (१४) थाःक् मे़वये़रो॥ |
| 23231 | MAT 1:18 | आल्ल ये़सु ख्रिस्तरे़ कुसावाःन्छिङ्मान् अक्खेलॽरिक् पोःक्खे़रो–कुम्मा मरियमरे़ कुमेःक्खिम् पोःङ्मा पाःन्निन् युसुफे़न्नु पुॽरे़आङ् वये़, कर खुन्छिॽ मेःक्खिम् पोःङ्मानुःल्ले़ तगिए खुने़ॽ सेसेमाङ्ङिल्ले़ कुमुक्साम्लाम् मे़न्छुक्मा पोःक्खे़रो॥ |
| 23232 | MAT 1:19 | खुने़ॽनु कुमेःक्खिम् पाःन् के़बुॽबा युसुफे़ङ्ग साम्योनिबा मना वये़बाल्ले़ चोगुल्ले़ कुजाःत्थि मे़बेःक्ने़न्ल फाॽआङ् खे़ल्ले़ स्वाःत्ताङ् नाॽमा निङ्वाॽ चोगुरो॥ |
| 23234 | MAT 1:21 | खुने़ॽ ये़म्बित्छाॽसाःधिक् कत्तुॽ, हे़क्क्याङ् खे़ल्ले़ कुमिङ्ङिन् ये़सु वाःत्ते़ॽओ, थेआङ्भे़ल्ले़ खे़ल्ले़ कुमनाहाॽ खुनिॽ लायोलाम् ताङ्से़ःप्तुसिॽरो॥” |
| 23236 | MAT 1:23 | “सिसादिङ् मे़न्छियाॽइन् मे़न्छुक्मा पोःङ्ङाङ् ये़म्बित्छाॽसाःधिक् कत्तुॽ, हे़क्क्याङ् खे़न् इम्मानुएल मे़मे़त्तुॽरो॥ ‘इम्मानुएल’ फाॽइङ्ग ‘निङ्वाॽफुमाङ्ङिन् आनिॽनु वाॽ’ पोःङ्लो॥” |
| 23237 | MAT 1:24 | आल्ल युसुफे़न् से़प्माङ्मोलाम् सोरे़आङ् यहवे दाङ्बाल्ले़ कुमाङ्लाइङ्बाल्ले़ मे़त्तुबा कुइसिःक्के मरियम्मिन् मेःक्खिम् मे़त्तु, हे़क्क्याङ् कुहिम्मो तारुरो॥ |
| 23238 | MAT 1:25 | कर मरियम्मिन् मे़न्छुक्मा वये़र थारिक् खुन्छिॽ सोरिक् मे़इप्से़त्छिन्लो॥ याङ्सि मरियम्मिल्ले़ साः कत्तुआङ् युसुफरे़ खे़न् अङे़ःक्वाःन् ये़सु मिङ् वाःत्तुरो॥ |
| 23239 | MAT 2:1 | आल्ल ये़सुःन् यहुदिया थुम्मोबा बे़थलेहे़म पाङ्जुम्मो सावाःन्छिङ्बा ये़म्मो हे़रोद हाङ्ङिल्ले़ खे़प्मो हाङ् चोगुर वये़रो॥ ये़सुःन् सावाःन्छिङ्ङाङ् नाम्गे़न् पिसाङ्बा लाजेॽलाम् सिक्कुम्निबा खागे़इक्पाहाॽ यरुसले़म्मो मे़द्ये़, हे़क्क्याङ् |
| 23240 | MAT 2:2 | अक्खेलॽरिक् पाःन् सेःन्मे़दोसु, “यहुदिहाॽरे़ खुनिॽ हाङ् के़बोःङ्बाआङ् सागे़वाःन्छिङ्बान् आत्तो वाॽबे? आनिगे़ नाम्गे़न् पिसाङ् कुसावाःन्छिङ्माल्ले़न् मिक्सेःन् के़बिबा खेःम्सिक्किन् निःसुम्बे़आङ् खुने़ॽ कुसेवा चोःक्से़ त्ये़ॽइगे़बारो॥” |
| 23241 | MAT 2:3 | हे़रोद हाङ्ङिल्ले़ कन् पाःन्निन् खे़प्सुआङ् कुनिङ्वाॽबाल्ले़ साॽरिक् ये़ःक्खु, हे़क्केलॽरिक्के खुने़ॽनुए यरुसले़म्मोबा के़रे़क् मनाहाॽआङ् खुनिॽ निङ्वाॽबाल्ले़ साॽरिक् ये़ःक्खुसिरो॥ |
| 23243 | MAT 2:5 | खे़ङ्हाॽरे़ नोगप् मे़बिरु, “यहुदिया थुम्मोबा बे़थलेहे़म्मो खुने़ॽ सावाःन्छिङ्मा के़बोःङ्बा वाॽरो॥ थेआङ्भे़ल्ले़ माङ्निङ्वाॽपाःन् के़बाःप्पाल्ले़ अक्खेलॽरिक् साप्तुआङ् पत्– |
| 23245 | MAT 2:7 | हे़रोद हाङ्ङिल्ले़ खे़न् सिक्कुम्निबा खागे़इक्पाहाॽ स्वाःत्ताङ् उःत्तुसि हे़क्क्याङ् खे़ङ्हाॽलाम् खेःम्सिक्पान् थाःम्सिङ्बा कुजे़क् ये़म्मिन् निङ्वाॽ खोःसु॥ |
| 23246 | MAT 2:8 | हे़क्क्याङ् खे़ङ्हाॽ अक्खे मे़त्तुसिर बे़थलेहे़म्मो पाङ्घुदेःसुसि, “पेगे़म्मे़ॽआङ् अङे़ःक्वाःन् कोःत्ते़म्मे़ॽ॥ खे़न् अङे़ःक्वाःन् के़घोःसुम्ने़ फाॽग्र फे़रे़म्मे़ॽआङ् इङ्गाॽ आमे़त्ते़म्मे़ॽओ॥ इङ्गाॽआङ् खुने़ॽ सेवा मे़त्तुङ्लो॥” |
| 23247 | MAT 2:9 | हे़रोद हाङ्ङिल्ले़ पाःत्तुबा पाःन्निन् मे़घे़प्सुआङ् खे़ङ्हाॽ मे़धासिङ्लो॥ हे़क्क्याङ् खे़ङ्हाॽरे़ खे़न् खेःम्सिक्पान् याम्मो मे़निःसु हे़क्क्याङ् खुनिॽ तगि तगि पेआङ् अङे़ःक्वा वये़बा हिम्कुदोःप्मा के़रे़आङ् फन्छिङ्लो॥ |
| 23248 | MAT 2:10 | खे़ङ्हाॽरे़ खे़न् खेःम्सिक्पान् याम्मो मे़निःसुआङ् साॽरिक् मे़सःत्ते़॥ |
| 23249 | MAT 2:11 | हिम् सिगाङ् मे़लाःस्से़ल्ले़ अङे़ःक्वाःन् नु कुम्मा मरियम्मिन् मे़निःसुसिरो॥ खे़ङ्हाॽरे़ साम्बोःन्नाङ् अङे़ःक्वाःन् सेवा मे़मे़त्तु, हे़क्क्याङ् सुःक्वाःन्मे़भाःक्खुआङ् साम्म्याङ्, थिक् परिक्पा इमे़ल्लुङ्बा साङ्सिङ् नु कुनाम् के़नुॽबा मुर्रहाॽ मे़दोःन्दु मे़बिरुरो॥ |
| 23250 | MAT 2:12 | हे़क्क्याङ् से़प्माङ्मो माङ्लाइङ्बाल्ले़ खे़ङ्हाॽ हे़रोद हाङ्ङिल्लो मे़नुःक्खे़म् मे़बेगे़म्मिन्ने़ॽओ लॽरिक् साम्दिङ् पिरुसिबाल्ले़ खे़ङ्हाॽ वेॽलाम् आबाङे लाजेॽओ मे़नुःक्खे़ मे़बेरो॥ |
| 23251 | MAT 2:13 | खे़न् सिक्कुम्निबा खागे़इक्पाहाॽ मे़बे हे़क्क्याङ् यहवे दाङ्बाल्ले़ कुमाङ्लाइङ्बाधिक् युसुफरे़ कुसे़प्माङ्मो थाःन्छिङ्ङाङ् अक्खे मे़त्तु, “पोगे़ॽआङ् अङे़ःक्वाःन् नु कुम्माःन् तेॽरे़से़ॽआङ् मिस्र लाजेॽओ खे़त्छिङ् पेगे़ॽ, हे़क्क्याङ् इङ्गाॽ मे़म्मे़त्ते थारिक् खे़ने़ॽ खे़प्मोए वये़ॽओ, थेआङ्भे़ल्ले़ हे़रोद हाङ्ङिल्ले़ अङे़ःक्वाःन् से़प्मा फाॽआङ् कोःत्तुर वाॽरो॥” |
| 23252 | MAT 2:14 | बा खे़न् से़न्दिक्सा युसुफरे़ अङे़ःक्वाःन् नु कुम्माःन् तेॽरुसिआङ् मिस्रओ खे़त्छिङ् पेरो॥ |
| 23254 | MAT 2:16 | आल्ल हे़रोद हाङ्ङिल्ले़ सिक्कुम्निबा खागे़इक्पाहाॽरे़ हे़क्केलॽरिक् खुने़ॽ इङ्मे़ले़क्तुआङ् वेॽ लाम् मे़बेबा निङ्वाॽ खोःसुआङ् साॽरिक् कुसिक् पोगे़रो॥ खे़ल्ले़ चोगुल्ले़ थक्सुबाहाॽ पाङ्घुसिआङ् बे़थलेहे़म नु खे़न् खिरिबा तङ्बे ने़त्छिआङ् योबा ये़म्बित्छाॽ अङे़ःक्वा साःहाॽ के़रे़क् से़प्पाङ्घुसिरो॥ थेआङ्भे़ल्ले़ खे़न् सिक्कुम्निबा खागे़इक्पाहाॽलाम् खेःम्सिक्पान् तङ्बे ने़त्छिआङ्धो तगि थाःम्सिङ्बा निङ्वाॽ खोःसुआङ् वये़रो॥ |
| 23255 | MAT 2:17 | खे़ङ्ग यर्मिया माङ्निङ्वाॽपाःन् के़बाःप्पाल्ले़ अक्खेलॽरिक् उन्छेःन् पाःत्तुबा माङ्निङ्वाॽपाःन्निन् के़रे़बारो– |
| 23260 | MAT 2:22 | कर हे़रोद हाङ्ङिन् स्ये़आङ् खुने़ॽ कुले़क्वा कुस्साः अर्खिलाउसरे़ यहुदिया थुम्मो हाङ् चोगुर वाॽ के़लॽबान् युसुफरे़ निङ्वाॽ खोःसुआङ् खुने़ॽ खे़प्मो पेःक्मा किःसे़॥ हे़क्क्याङ् माङ्लाइङ्बाल्ले़ याम्मो से़प्माङ्मो साम्दिङ् पिरुबाल्ले़ चोगुल्ले़ खुने़ॽ गालिल थुम्मो पेआङ् |
| 23262 | MAT 3:1 | खे़न् ये़म्मो बप्तिस्मा के़बिबा युहुन्ना मे़प्मनाबा मनाःन् यहुदिया थुम्मोबा एःक्सादे़न्नो अक्खेलॽरिक् इङ्भन् चोगुर त्ये़, |
| 23264 | MAT 3:3 | खुने़ॽ कुयाःम्बेओ माङ्निङ्वाॽपाःन् के़बाःप्पा यसैयाःल्ले़ अक्खेलॽरिक् पाःत्तुआङ् वाॽरो, “खुने़ॽ एःक्सादे़न्नो अक्खेलॽरिक् के़अःक्पा इक्लारो, ‘दाङ्बाल्ले़ कुमाराम्मिन् यारिप् चोगे़म्मे़ॽआङ् कुलाम्हाॽ तोःन्दोःन्चोगे़म्मे़ॽ!’” |
| 23265 | MAT 3:4 | आल्ल युहुन्नाःल्ले़ उमेरे़ कुमुरिक्लाम् थाक्मनाबा तेःत्तिन् चाक्खुआङ् से़होबा फॽइ युप्सुरो॥ खुने़ॽ कुजामाङ्ग निःङ्घुःक्वा नु ताम्भुङ् सक्वाघु वये़रो॥ |
| 23266 | MAT 3:5 | यरुसले़म ये़क्यक्लाम् नु यहुदिया थुम् हे़क्क्याङ् यर्दन यङ्घङ् खिरिबा के़रे़क् थुम्हाॽओलाम् मनाहाॽ कुदुम्से़ |
| 23267 | MAT 3:6 | मे़द्ये़आङ् इङ्गाॽ लायोबाआरो मे़बाःत्तुर यर्दन यङ्घङ्ङो खुने़ॽलाम् बप्तिस्मा मे़बोःक्खे़रो॥ |
| 23268 | MAT 3:7 | कर यरिक् फरिसिहाॽ नु सदुकिहाॽ बप्तिस्मा पोःङ्से़ खुने़ॽओ मे़द्ये़र मे़बत्छे़बा निःसुसिआङ् अक्खे मे़त्तुसिर फे़ःक्तुसि, “असेःक्सासे, खिनिॽ कन् के़दाःबार के़बप्पा निङ्वाॽफुमाङ्ङिल्ले़ कुघुम्दिङ्लाम् खे़त्छिङ्ङे़म्मे़ॽ फाॽआङ् हाःत्ले़ के़मे़त्तिबे? |
| 23271 | MAT 3:10 | आल्लोसा निङ्वाॽफुमाङ्ङिल्ले़ कुघासे़न्निल्ले़ तःन्दिङ्ग सिङ्बुङ्मो खा चुक्मा इःत्ते़आङ् वाॽ॥ नुःबा सिङ्सेॽ मे़न्धोःक्मनाबा सिङ्बुङ्हाॽ के़रे़क् ताङ्माआङ् मिओ लाप्फुमा पोःङ्लो॥ |
| 23272 | MAT 3:11 | लायोलाम् के़हिन्दिआङ् इङ्गाॽग च्वाःत्तिल्ले़ बप्तिस्मा पिनिङ्लो, कर आएगाङ् के़दाःबे़ङ्ग इङ्गाॽनुःल्ले़आङ् मुक्साम्साबा चोःक्लो॥ खुने़ॽ कुलाङ्सुःप्हाॽ इङ्गाॽ योःक् कुइसिःक् पङ्माआङ् मे़लाॽआन्लो॥ खुने़ॽ सेसेमाङ् नु मिःल्ले़ बप्तिस्मा के़बिरिॽरो॥ |
| 23273 | MAT 3:12 | कुभॽएःत्तिल्ले़ सिःन् आःम्मा फाॽआङ् खुने़ॽ यारिप् वाॽ, हे़क्क्याङ् खुने़ॽ तुगुर सुप्सुआङ्सिःन् चाधोःक्लाओ चिक्खुॽ हे़क्क्याङ् कुहक्हाॽ आप्फाल्ले़आङ् मे़न्छिःमनाबा मिओ हाःन्दुदेःसुॽरो॥” |
| 23274 | MAT 3:13 | खे़न् ये़म्मो ये़सुःन् गालिल थुम्मोलाम् यर्दन यङ्घङ्ङो बप्तिस्मा पोःङ्से़ युहुन्नारो त्ये़रो, |
| 23275 | MAT 3:14 | कर युहुन्नारे़ अत्तुर खुने़ॽ अक्खे मे़त्तु, “इङ्गाॽने़ खे़ने़ॽनु बप्तिस्मा पोःङ्मा के़बोःङ्बा, आक्खेलॽरिक् खे़ने़ॽ इङ्गाॽओ के़द्ये़बाबे?” |
| 23276 | MAT 3:15 | ये़सुरे़ नोगप् पिरु, “आल्लोरे़ लागि अक्खेए पोःङ्लरो, अक्खेलॽरिक् निङ्वाॽफुमाङ्ङिल्ले़ के़रे़क् निङ्वाॽ चोगुबा पाःन्निन् के़त्लरो॥” हे़क्क्याङ् युहुन्नाःन् ते़न्दे़आङ् खुने़ॽ बप्तिस्मा पिरुरो॥ |
| 23277 | MAT 3:16 | ये़सुःन् बप्तिस्मा पोःक्खे़आङ् च्वाःत्तोलाम् लाःक्कात् लःन्दे़नुमे़ःन्ने ताङ्साक्पे़न्हरे़आङ् निङ्वाॽफुमाङ्ङिल्ले़ कुसेसेमाङ्ङिन् पुत्तुःक्के हे़क्के खुने़ॽ कुसम्दाङ् ये़ःर पत्छे़बा निःसुरो॥ |
| 23278 | MAT 3:17 | हे़क्क्याङ् साङ्ग्राम्पेदाङ्लाम् अक्खेलॽरिक् इक्लाधिक् त्ये़, “कन् आमिःम् आस्साःरो, इङ्गाॽ खुने़ॽनु साॽरिक् सःत्ताङ्ङाङ् वाॽआरो॥” |
| 23279 | MAT 4:1 | हे़क्क्याङ् सेसेमाङ्ङिल्ले़ ये़सुःन् माफे़न्साम्लाम् कुनिङ्वाॽ साॽसे़ एःक्सादे़न्नो तेॽरुरो॥ |
| 23281 | MAT 4:3 | हे़क्क्याङ् माफे़न्साम्मिन् खे़प्मो त्ये़आङ् खुने़ॽ अक्खे मे़त्तुर कुनिङ्वाॽ साॽरु, “खे़ने़ॽ निङ्वाॽफुसाःने़ फाॽग्र कन् लुङ्हाॽ खरे़ःङ् पोःक्खे़ॽ फाॽआङ् मे़त्ते़ॽ॥” |
| 23282 | MAT 4:4 | कर ये़सुरे़ नोगप् पिरु, “हे़क्के मे़जोःक्कान्, थेआङ्भे़ल्ले़ साम्योसाप्लाओ मोसारे़ अक्खेलॽरिक् साप्तुआङ् पत्, ‘मे़न्छाम् याप्मिःङ्ग कुजाःल्ले़रक् मे़हिङ्ने़न्, कर निङ्वाॽफुमाङ्ङिल्ले़ पाःत्तुबा के़रे़क् पाःन्निल्ले़ हिङ्॥’” |
| 23283 | MAT 4:5 | हे़क्क्याङ् माफे़न्साम्मिल्ले़ खुने़ॽ यरुसले़म्मो तेॽरुआङ् माङ्हिम्मोबा के़रे़क्नुःल्ले़ केःम्बा चम्जम्बा ते़न्नो ये़प्सुआङ् मे़त्तु |
| 23284 | MAT 4:6 | “खे़ने़ॽ से़क्खाए निङ्वाॽफुसाःने़ फाॽग्र पिन्दे़ थ्ये़ॽ, थेआङ्भे़ल्ले़ साम्योसाप्लाओ अक्खेलॽरिक् साप्ते़आङ् पत्, ‘निङ्वाॽफुमाङ्ङिल्ले़ कुमाङ्लाइङ्बाहाॽ खे़ने़ॽ के़लागि इङ्जाःङ् पिरुसिआङ् खे़ने़ॽ थाःङ्धाःङ्ङे खुनिॽ हुक्को के़म्दाःक्काङ् के़लाङ्ङिन् लुङ्ङो मे़धाम्सिङ्ङिन्लो॥’” |
| 23285 | MAT 4:7 | ये़सुरे़ नोगप् पिरु, “कर साम्योसाप्लाओ याम्मो अक्खेलॽरिक्काङ् साप्ते़आङ् पत्, ‘दाङ्बा के़निङ्वाॽफुमाङ्ङिल्ले़ कुनिङ्वाॽ मे़साॽरे़न्ने़ॽ॥’” |
| 23286 | MAT 4:8 | हे़क्क्याङ् माफे़न्साम्मिल्ले़ खुने़ॽ साॽरिक् चम्जम्बा कोःक्माओ तेॽरुआङ् इक्सादिङ् खाम्बेःक्मोबा के़रे़क् हाङ्जुम्हाॽ हे़क्क्याङ् खे़प्मोबा पयम्यम्बा नु नुःब्नुःबा पाःन्हाॽ ओसेःन्धाक्तुआङ् |
| 23288 | MAT 4:10 | ये़सुरे़ खे़न् मे़त्तु, “सैताने, कप्मोलाम् पेगे़ॽ, थेआङ्भे़ल्ले़ साम्योसाप्लाओ अक्खेलॽरिक् साप्ते़आङ् पत्, ‘खे़ने़ॽ दाङ्बा के़निङ्वाॽफुमाङ्ङिन्लक् सेवा मे़त्ते़ॽ हे़क्क्याङ् खुने़ॽइन्लक् कुसेवा चोगे़ॽओ॥’” |
| 23289 | MAT 4:11 | हे़क्क्याङ् माफे़न्साम्मिल्ले़ ये़सुःन् ले़रुधआङ्माङ्लाइङ्बाहाॽ मे़द्ये़ हे़क्क्याङ् खुने़ॽ कम्ब्राङ् मे़मे़त्तु॥ |
| 23291 | MAT 4:13 | खुने़ॽ नासरत पाङ्जुम्मिन् ले़रुआङ् कपर्नहुम पाङ्जुम्मो वाॽसे़ पेरो॥ खे़ङ्ग गालिल वरक्किल्ले़ कुबेसाङ् नाप्तालि नु जबुलुन थुम्मो ने़रो॥ |
| 23293 | MAT 4:15 | “यर्दन यङ्घङ्ङिल्ले़ नाधाःम्बिबा गालिल वरक्किल्ले़ कुबेसाङ्बा नाप्तालि नु जबुलुन के़युङ्बा याप्मिसे, गालिल थुम्मो के़वाॽबा थिम्मे़न्दङ् सुवाङ्से, |
| 23296 | MAT 4:18 | थिक् ये़न् ये़सुःन् गालिल वरक्किल्ले़ कुयाओ लाङ्घेगे़र वये़ल्ले़ पत्रुस मे़प्मनाबा सिमोने़न् नु कुन्साॽ आन्द्रियासे़न् निःसुसि॥ खे़ङ्हाॽ वरक्को योःङ् ले़प्ते़त्छुर यागे़त्छि, थेआङ्भे़ल्ले़ खे़ङ्हाॽ योःङ् के़ले़प्पा वये़त्छिरो॥ |
| 23298 | MAT 4:20 | खिमो खे़ङ्हाॽरे़ खुन्छिॽ योःङ्ङिन् ने़स्से़त्छु थ्ये़से़त्छुआङ् खुने़ॽनु पेसि॥ |
| 23299 | MAT 4:21 | खे़प्मोलाम् मिसाक् नानाक् पेःल्ले़ ये़सुरे़ जब्दियारे़ कुस्साः याकुब नु खे़ल्ले़ कुन्साॽ युहुन्नाःन् निःसुसि॥ खे़ङ्हाॽ खुन्छिॽ पाःन्नु खःङ्बेओ योःङ् ले़म्दे़त्छुर यागे़त्छि॥ ये़सुरे़ खे़ङ्हाॽ उःत्तुसिनुमे़ःन्ने |
| 23300 | MAT 4:22 | खःङ्बेन् नु खुन्छिॽ पाःन् ले़रे़त्छु थ्ये़से़त्छुआङ् ये़सुःन्नु पेसिरो॥ |
| 23301 | MAT 4:23 | ये़सुरे़ यहुदि चुम्लुङ्हिम्हाॽओ निसाम् हुॽरुसिर निङ्वाॽफुहाङ्जुम्मिल्ले़ कुयाःम्बेओ सुनाइङ् से़ःसु, हे़क्क्याङ् के़रे़क् परिक्ले़न् तुक्मा यॽमालाम् के़दुक्पाहाॽ वेःन्दुसिर गालिल थुम्मो खाराक् ताक्कन्दे़रो॥ |
| 23302 | MAT 4:24 | ये़सुरे़ कुयाःम्बेओ इङ्घङ्ङिन् सिरिया लाजेॽ खाराक् से़ःरे़, हे़क्क्याङ् यरिक् परिक्ले़न् तुक्माल्ले़ तरुसिबा मनाहाॽ, के़दुक्पाहाॽ, फे़न्साम्मिल्ले़ याङ्घुसिबाहाॽ, हे़क्क्याङ् थप्मा के़मःबाहाॽ नु के़दुक्पा के़यॽबाहाॽ खुने़ॽओ मे़दारुसिआङ् खे़ङ्हाॽ के़रे़क् नुसुसिरो॥ |
| 23303 | MAT 4:25 | हे़क्क्याङ् गालिल थुम्, थिबोःङ् पाङ्जुम्मिल्ले़न्थुम्, यरुसले़म, यहुदिया नु यर्दन यङ्घङ् नाधाःम्बिबा थुम्मोलाम् के़दाःबा यरिक् मनाहाॽरे़ खुने़ॽ मे़दिम्दुरो॥ |
| 23304 | MAT 5:1 | आल्ल ये़सुरे़ यरिक् मनाहाॽ निःसुसिआङ् कोःक्माओ थाःङ् पेआङ् युङ्सिङ्, हे़क्क्याङ् कुहुॽसाम्बाहाॽआङ् खे़त्थो मे़बेआङ् कुघिरि मे़युङ्सिङ्॥ |
| 23305 | MAT 5:2 | हे़क्क्याङ् खुने़ॽ अक्खेलॽरिक् खे़ङ्हाॽ हुॽमा हेःक्तुसि– |
| 23308 | MAT 5:5 | चुङ्जिगे़न् नःम्नःम्बा मनाहाॽ मुॽइसाबासिरो, थेआङ्भे़ल्ले़ इक्सादिङ् खाम्बेःक्मान् खे़ङ्हाॽरे़न्नेरो॥ |
| 23309 | MAT 5:6 | हे़क्क्याङ् साम्योनिबा याःम्बक् चोःक्माओ स्याङ्मे़न्दाङ् के़बप्पाहाॽ मुॽइसाबासिरो, थेआङ्भे़ल्ले़ निङ्वाॽफुमाङ्ङिल्ले़ कुनिङ्वाॽ हे़क्के चोःक्मा खे़ङ्हाॽ फाॽरुसिॽरो॥ |
| 23316 | MAT 5:13 | खिनिॽग इक्सादिङ् खाम्बेःक्माओबा युम्निङ्लो, कर युम्मिल्ले़ कुलिम्मे़न् माःबेःक्ने़ फाॽग्र याम्मो के़लिम्बा चोःक्मा सुक्मे़दे़त्ने़न्लो॥ खे़ल्ले़ कुयाःम्बक् थेआङ् होःप्लो, कर खे़ङ्ग लाप्फुमा पोःङ्ङाङ् मनाहाॽरे़ मे़दोॽरुरो॥ |
| 23317 | MAT 5:14 | खिनिॽग इक्सादिङ् खाम्बेःक्मोबा ओःत्तिनिङ्लो॥ कोःक्माओबा ये़क्यक्किन् थेःल्ले़आङ् इःप्मा मे़सुक्तुन्॥ |
| 23319 | MAT 5:16 | हे़क्केलॽरिक् सेमिःन् ओःप्पा हे़क्केए खिनिॽ के़जोगुम्बा सुयाःम्बक्हाॽ मनाहाॽ ओसेःन्धाक्ते़म्सिम्मे़ॽओ, हे़क्क्याङ् साङ्ग्राम्पेदाङ्बा खिनिॽ निङ्वाॽफुपाःल्ले़ कुनारा मे़भोःसुॽरो॥ |
| 23320 | MAT 5:17 | इङ्गाॽ निङ्वाॽफुमाङ्ङिल्ले़ मोसाःन् पिरुबा साम्योथिम्मिन् नु माङ्निङ्वाॽपाःन् के़बाःप्पाहाॽरे़ मे़बाःत्तुबा पाःन्निन् कुसुम् मे़न्दम्नाबा चोःक्से़ त्याङ्बा फाॽआङ् मे़इःत्ते़म्मिन्ने़ॽओ॥ इङ्गाॽग कुसुम्मे़न्दम्नाबा चोःक्से़ मे़ःन्, कर खे़ङ्हाॽ कुलिङ्धो के़त्छे़ने़ त्याङ्बारो॥ |
| 23321 | MAT 5:18 | से़क्खाए इङ्गाॽ मे़त्निङ्, इक्सादिङ् खाम्बेःक्मान् नु ताङ्साक्पे़न्माःमा पेःक्मानुःल्ले़ तगि साम्योथिम्मो के़बप्पा के़रे़क् पाःन्निन् मे़ङ्गे़त्ते थारिक् खे़प्मोबा के़रे़क्नुःल्ले़ चुक्सा पाःन्धिक्काङ् मे़माःने़न्लो॥ |
| 23323 | MAT 5:20 | कर खे़प्से़म्मे़ॽओ, फरिसिहाॽ हे़क्क्याङ्साम्योथिम्साम्बाहाॽनुःल्ले़आङ् निङ्वाॽफुमाङ्ङिल्ले़ कुइङ्जाःङ्हाॽ खिनिॽ नुःरिक्काङ् के़न्इःत्तुम्मिन् के़न्नाःत्तुम्मिन्ने़ फाॽग्र से़क्खासाङ् खिनिॽ साङ्ग्राम्पेदाङ्बा हाङ्जुम्मो के़न्लासिन्लो॥” |
| 23324 | MAT 5:21 | आल्ल, “उन्छेःन् मोसारे़ कुसाम्यो इङ्जाःङ्ङिल्ले़ अक्खे पाःत्तुबान् खिनिॽ के़घे़प्सुम्माङ् के़वयिॽ, ‘मना मे़से़रे़न्ने़ॽओ, थेआङ्भे़ल्ले़ मना के़से़प्पाल्ले़ खुम्दिङ् खोःसुॽरो,’ |
| 23325 | MAT 5:22 | कर इङ्गाॽ मे़त्निङ्, हाःत् कुन्साॽइन्नु कुयाःक् ले़ॽ, खे़ल्ले़ खुम्दिङ् खोःसुॽरो॥ याम्मो हाःत्ले़ कुन्साॽइन् ‘अदङ्’ मे़त्तुॽ, खे़ङ्ग के़रे़क्नुःल्ले़ यम्बा यहुदि खासे़न्लोःम्बाहाॽरे़ खुनिॽ तगि मे़ये़प्सुॽ, कर हाःत्ले़ कुन्साॽइन् साक्मुरा मे़त्तुॽ, खे़ङ्ग खे़मायङ्सङ्ङोबा मिओ पेःक्मा सुक्लो॥ |
| 23326 | MAT 5:23 | हे़क्केःल्ले़ खे़ने़ॽ माङ्हिम्मोबा ले़त्तिङ्तोःम्मादे़न्नो ले़त्तिङ्ङिन् तोःम्मानुःल्ले़ तगि खे़ने़ॽनु के़न्देःङ्बाल्ले़ कुनिङ्वाॽ तुगे़आङ् वाॽबा के़निङ्वाॽ सुम्मो ताने़ फाॽग्र |
| 23327 | MAT 5:24 | के़ले़त्तिङ्ङिन् ले़त्तिङ्तोःम्मादे़न्निल्ले़ कुबेसाङ् ने़स्से़ थ्ये़ॽआङ् के़रे़क्नुःल्ले़ तगि के़न्देःङ्बाल्लो पेगे़ॽआङ् नादङ् चोगे़त्छे़ॽओ॥ हे़क्क्याङ्लक् त्ये़ॽआङ् के़ले़त्तिङ्ङिन् तोःन्दे़ॽओ॥ |
| 23328 | MAT 5:25 | आप्तिक् के़गुःप्पाल्ले़ खे़ने़ॽ खासे़न्दे़न्नो तेॽमानुःल्ले़ तगि खुने़ॽनु नादङ् चोगे़ॽओ, मे़ःन्ने़ फाॽग्र खे़ने़ॽ खासे़न्लोःम्बाल्लो के़देॽआङ् खासे़न्लोःम्बाल्ले़ तिलिङ्गाहाॽरो हुक्के़सुप्, हे़क्क्याङ् खे़ङ्हाॽरे़ पुङ्लाहिम्मो के़म्साक्लो॥ |
| 23330 | MAT 5:27 | आल्ल, “खिनिॽ मोसारे़ कुसाम्यो इङ्जाःङ्ङिल्ले़ अक्खे पाःत्तुबा के़घे़प्सुम्माङ् के़वयि, ‘खे़ने़ॽ चाराम्मा याःम्बक् मे़जोगे़न्ने़ॽओ’ |
| 23331 | MAT 5:28 | कर इङ्गाॽ मे़त्निङ् आत्तिल्ले़ फे़न् निङ्वाॽ इःत्तुर मे़न्छुमाॽइन् ओमे़त्तुॽ, खे़ल्ले़ग तगिए खे़न् मे़न्छुमाॽइन्नु कुनिङ्वाॽबो चाराम्मा याःम्बक् चोगुदेःसुरो॥ |
| 23332 | MAT 5:29 | खे़ने़ॽ चुप्साङ् के़मिक्किल्ले़ लायो चोःक्मा के़बाङ्ने़ फाॽग्र लःत्ते़ॽआङ् लाप्फुःसे़ॽओ॥ के़रे़क् नासिङ्गे़न् थक्किन् खे़मायङ्सङ्ङो लाप्फुमानुःल्ले़ मिक्थिक् मे़ःन्ने वाॽमाए नुःबारो॥ |
| 23333 | MAT 5:30 | हे़क्क्याङ् चुप्साङ् हुक्किल्ले़ लायो चोःक्मा के़बाङ्ने़ फाॽग्र खे़न्नाङ् खक्ते़ॽआङ् लाप्फुःसे़ॽओ॥ के़रे़क् नासिङ्गे़न् थक्किन् खे़मायङ्सङ्ङो लाप्फुमानुःल्ले़ हुक्थिक् मे़ःन्ने वाॽमाए नुःबारो॥” |
| 23335 | MAT 5:32 | कर इङ्गाॽ खिनिॽ मे़त्निङ्, हाःत्ले़ वेॽहाॽनु चाराम्मा याःम्बक् मे़न्जोःक्के के़वाॽमा मेलिङ्गे़न् कुमेःत्तिन् नाॽरुॽ खे़ल्ले़ खे़न् कुमेःत्तिन् चाराम्मा याःम्बक् के़जोःक्मा चोगुॽरो॥ हे़क्क्याङ् आत्तिल्ले़ खे़न् मे़न्छुमाॽइन्नु मेःक्खिम् चोगुॽ खे़ल्ले़आङ् चाराम्मा याःम्बक् चोगुॽरो॥” |
| 23336 | MAT 5:33 | “याम्मो खिनिॽ मोसारे़ कुसाम्यो इङ्जाःङ्ङिल्ले़ अक्खे पाःत्तुबा के़घे़प्सुम्माङ् के़वयिॽ, ‘खिनिॽ के़जोगुम्बा माङ्हे़क्किन्मे़भेःन्दे़म्मे़न्ने़ॽ, कर यहवे दाङ्बान्नु के़जोगुम्बा माङ्हे़क्किन्के़गे़त्तुम्लए पोःङ्लो॥’ |
| 23337 | MAT 5:34 | कर इङ्गाॽ खिनिॽ मे़त्निङ्, आप्फाल्ले़आङ् माङ्मे़हे़क्कासिम्मे़न्ने़ॽ॥ हे़क्केलॽरिक् साङ्ग्राम्पेदाङ्ङिल्ले़ कुमिङ्ङोआङ् मे़ःन्, थेआङ्भे़ल्ले़ खे़ङ्ग निङ्वाॽफुमाङ् युक्नारो॥ |
| 23338 | MAT 5:35 | हे़क्क्याङ् इक्सादिङ् खाम्बेःक्माल्ले़ कुमिङ्ङोआङ् माङ्मे़हे़क्कासिम्मे़न्ने़ॽओ, थेआङ्भे़ल्ले़ खे़ङ्ग खुने़ॽ कुलाङ् तोॽभेःत्लो॥ हे़क्केलॽरिक्के यरुसले़म्मिल्ले़ कुमिङ्ङोआङ् माङ्मे़हे़क्कासिम्मे़न्ने़ॽ, थेआङ्भे़ल्ले़ खे़ङ्ग पयम् यम्बा हाङ्ङिल्ले़ कुये़क्यक्लो॥ |
| 23339 | MAT 5:36 | हे़क्केलॽरिक्के खिनिॽ थे़गेःक्पाल्ले़न् माङ्मे़हे़क्कासिम्मे़न्ने़ॽ, थेआङ्भे़ल्ले़ खिनिॽ थे़गेःक्इधिक्काङ् फःगे़लॽबा इग्र माक्के़लॽबा चोःक्मा के़न्छुक्तुम्मिल्लो॥ |
| 23340 | MAT 5:37 | खिनिॽ पाःन्निङ्ग ‘ओ’ ने़ फाॽग्र ‘ओ’ पाःत्ते़म्मे़ॽ, ‘मे़ःन्’ ने़ फाॽग्र ‘मे़ःन्’ पाःत्ते़म्मे़ॽ॥ खे़न्नाङ्धोबाङ्ग माफे़न्साम्लाम् के़दाःबारो॥” |
| 23341 | MAT 5:38 | “मोसारे़ कुसाम्यो इङ्जाःङ्ङिल्ले़ ‘मिक्किल्ले़ कुले़क्वा मिक्, हे़क्क्याङ् हाबोॽबाल्ले़ कुले़क्वा हाबोॽबा’ लॽरिक् पाःत्तुबान् के़घे़प्सुम्माङ् के़वयिॽ, |
| 23342 | MAT 5:39 | कर इङ्गाॽ खिनिॽ मे़त्निङ्, मनाहाॽरे़ ताप्फे़ःल्लिक् के़म्मे़त्तिल्ले़ खे़ङ्हाॽ ताप्फे़ःल्लिक् मे़मे़त्ते़म्सिम्मे़न्ने़ॽ॥ आत्तिल्ले़ चुप्साङ् ले़प्माङ्बा के़ने़दे़ङ्बान् के़ले़ङ् के़बिॽ, खे़न् वेॽस्मान्नाङ् तोःन्दे़ पिरे़ॽ॥ |
| 23343 | MAT 5:40 | हे़क्क्याङ् आत्तिल्ले़ के़जाङ्मा तेःत्तिन् नाप्मारे़ लागि खासे़न्दे़न्नो के़देॽ, खे़न् के़घाम्मा के़लोमाहाॽआङ् पिरे़देःसे़ॽओ॥ |
| 23344 | MAT 5:41 | थक्सुबाल्ले़ खे़ने़ॽ के़न्दे़न्ने़न्छाङ् किलोमितर थिक् थारिक् कुगक्किन् कुःप्मा तेॽमा के़गोःत्ने़ फाॽग्र खे़न्नु किलोमितर ने़त्छि थारिक् पेगे़ॽओ॥ |
| 23346 | MAT 5:43 | “मोसारे़ कुसाम्यो इङ्जाःङ्ङिल्ले़ के़बाङ्भेॽसाबाहाॽ लुङ्माॽ तुक्ते़से़ॽआङ् के़निङ्मिहाॽ चिःत्ते़से़ॽ लॽरिक् पाःत्तुबा के़घे़प्सुम्माङ् के़वयिॽ, |