11	GEN 1:11	Boe ma, Manetualain kokolak seluk bali, nae, “Madak lain, musi namoli sesele-ngganggalik. Musi hambu sesele-ngganggalik mana maboak, kadeꞌek, ma, mana madoo momodok. Ela sesele-ngganggali kala esa-esako, kalua buna-boan, tungga esa-esak numban.” Ana kokolak basa leo ndia, boe ma basa sesele-ngganggali kala, dadi.
63	GEN 3:7	Dua sala laꞌa basa boe ma bei fo ala bubuluk, ala lakahola holi-holik. Huu ndia de ala nato akidook, fo ala babaa neu sila makaholan.
107	GEN 5:1	Lelek Manetualain nakadadaꞌdik hataholi, Ana tao sala mataon leo Ndia matao hehelin. Ana nakadadadik touk ma inak, de Ana foi sala, nade “hataholi”, ma Ana fee sala babaꞌe-babatik. Hataholi sososak, naden Adam. Ia ia, Adam numbu-sadu nala:
162	GEN 7:2	Neme basa banda mata-mata kala sila, fo bole ei miꞌan, ma mini fee Au, na, o muni pasan hitu-hituk neni ofak ndia dalek neu. Neme basa mbuik mata-mata kala, muni pasa hitu-hituk boe. Tehuu neme banda feꞌe kala mai, na, muni kada pasan esa-esak. No leondiak, na, banda la, ma mbui kala sila, dadik bini, fo hambu sala taa-taa.
206	GEN 8:22	Mete ma daebafok ia bei nai ia, na, basa fai-fai la laꞌok lakandoo, tungga ndia heti-heun. Fo ndia: fai sele-nggalin ma fai ketu-kolun, fai makasufun ma fai hanan, fai hanan ma fai oefaan, leledok ma leꞌodaek.”
333	GEN 13:14	Faik fo Lot no Abram ala kofeꞌe, boe ma LAMATUAK nafaꞌda Abram, nae, “Abram! Hena o suli sudik ndule basa mamanak, fo neme o mambadeik ndia mai. Mete neulalau dea-matak, kii-konak.
344	GEN 14:7	Basa de, ala fali tungga dala feꞌek losa En Mispat, (fo hatematak ia, nade Kades). Basa ndia, boe ma ala tao lakalulutu hataholi Amalek nusan, ma hataholi Amori mana leo nai nusa Haseson-Tamar.
363	GEN 15:2	Tehuu Abram nae, “Eeh, Manetualain. Mae Lamatuak fee au noꞌuk boe oo, sosoan taa. Huu au anang taa, fo ana fee au numbu-saꞌduk. De, hambu pusaka noꞌuk, fo tao neu hata? Mae leobee boe oo au atang, Eliasar neme Damsik mai, ana hambu basa sala.”
407	GEN 17:9	Tehuu o, ma o numbu-sadu mala boe oo, musi toꞌu mahele heheluk ia, no dale katema-tuak. Basa tou kala, musi ala sunat.
418	GEN 17:20	Au boe oo amanene hata fo o moke fee Ismael. Huu ndia, de Au boe oo feen babaꞌe-babatik, ma Au tao amanoꞌu ndia numbu-saꞌdu nala. Neu ko, hambu mane leo sanahulu dua leme ndia numbu-saꞌdu nala mai. Ma neu ko ndia numbu-saꞌdu nala ala dadik nusak nananita-nalelak.
486	GEN 19:28	Boe ma, ana suli dae neu neni Sodom ma Gomora, ma basa bafak ndia. Ana mete, tehuu sudi nai bee mesan, haꞌi masuk bubuak-bubuak, hene neni lalai neu. Ma haꞌi naꞌa basa-basan.
555	GEN 22:7	boe ma Isak noke aman, nae, “Ama aa!” Aman nataa, nae, “Hata, Isak?” Isak natane nae, “Ama aa. Ita sangga tao tunu-hotuk. Nai ia hambu ai, ma haꞌi. Tehuu biꞌilombo ana fo ata paken dadik neu tunu-hotuk ndia, nai bee?”
557	GEN 22:9	Ledoeik ala losa mamanak fo Manetualain nafadak ndia, boe ma Abraham nakatotodok batu, fo tao mei mamana tunu-hotuk. Basa de, ana heti ai nanaꞌa haꞌi leu mei batu ndia lain. Boe ma, ana mbaꞌa anan, de ana nakalelengga kana neu ai nanaꞌa haꞌi lain.
564	GEN 22:16	“LAMATUAK mesa kana nafada nae: ‘Au soo ua Au nade heheling, leoiak: ‘O mahehele so, fo fee o ana kisam ndia neu Au, fo daꞌdik tunu-hotuk. Huu ndia, de
578	GEN 23:6	“Leoiak, Ama! Doo-doo basa ia, ai tao ama, leo ai aman fo ai fee hadak tebe-tebe. De, kada ama hele aom leo, dae bee ndia neulaun ana seli, fo nandaa no ama hihiin. Kada ai simbo kana no malole, tehuu taa hambu mana taa nau.”
593	GEN 24:1	Abraham teun naluk losa namalasi nalan seli. Ma LAMATUAK nanea neulalaun, boe ma Ana feen nasoda no soda-molek.
594	GEN 24:2	Abraham kahataholi namahehelen esa, fo ana nakaneni basa ndia hata-heton. Laꞌi esa, Abraham noke nalan, de nae, “Mamanene matalolole! Au oke o soo mate munik MANETUALAIN naden. Fo ndia Manetualain mana tao lalai ma daebafok. Mae, o taa bole haꞌi inanak neme hataholi Kanaꞌan asa mai, fo makasasao kana neu au anang Isak.
627	GEN 24:35	LAMATUAK fee babaꞌe-babatik makadotok neu au malanggang, losa ana namasuꞌi atu-atu. Lamatuak feen lilo-mbilas-lilo-fulak, ata touk ma inak, ma banda makadotok, fo ndia: sapi, banda onta, banda keledei, ma biꞌiae-biꞌilombo.
651	GEN 24:59	Boe ma, ala mboꞌi Ribka, ma ndia ata inan mana makaneni ndia neme kadiꞌi anan mai, de leu lo Abraham ata nala. Boe ma, ala kokolak fee Ribka babaꞌe-babatik, lae, “Ribka! Ai mamahena Manetualain Ana fee o bonggi mala makadotok, fo o numbu-sadu mala dei fo ala dadik lifu-lifuk. Ma ai mamahena boe, fo o numbu-sadu mala senggi musu la!”
670	GEN 25:11	Abraham mate boe ma, Manetualain fee babaꞌe-babatik neu Isak, losa nasoda no mole-dame. Faik ndia, Isak ana leo dekak no oe matak, nade Beer Lahai Roi.
693	GEN 25:34	Basa de Yakob sode feen fufue nana nasuk ndia, ma loti, de Esau naꞌa-ninu. Basa boe ma, ana foꞌa laꞌo. No leondiak, Esau fee hiak heni, ndia hak kaꞌan.
696	GEN 26:3	Mete ma o leo tataak nai mamanak ndia, na, dei fo Au sama-sama ua o, ma fee o babaꞌe-babatik mata-matak. Dei fo Au tao o numbu-sadu mala, boe lamanoꞌu, sama leo nduuk malai lalai. Ma Au fee o, ma o numbu-sadu mala, basa dae babaꞌek ia no nusan. Neme o numbu-sadu mala mai, dei fo basa hataholi nusa kala malai daebafok, ala hambu babaꞌe-babatik. No leondiak, Au tao atetu Au hehelung neu o amam, Abraham.
705	GEN 26:12	Faik ndia, Isak sele-nggali nai nusak ndia boe. De ana hambu falik buna-boan laꞌi natun esa, huu LAMATUAK abaꞌe-babatik.
706	GEN 26:13	Ndia suꞌin ana boe tamba nakandoo, losa ana namasuꞌi atu-atu.
717	GEN 26:24	Leꞌodaen ndia, boe ma LAMATUAK natudu Mataon neu ndia, de Ana kokolak nae, “Isak! Au ia, o amam Abraham Manetualain. De, o boso bii, huu Au anea o. Dei fo Au fee o babaꞌa-babatik. Ma o numbu-sadu mala, dei fo ala boe lamanoꞌu. Au tao leoiak, huu Au hehelung neu o amam.”
724	GEN 26:31	Foꞌa fafain boe ma, ala lasook. Basa de Isak mboꞌi sala, ma ala laꞌo lo mole-dame.
732	GEN 27:4	Basa na, muu tunu-nasu malan malada-malada, tungga au hihiing, fo munin mai au. Dei fo au uꞌa basa, na, bei fo au fee o babaꞌe-babatik. Mete ma au fee basa babaꞌe-babatik na, ela au mate boe oo, malole ndia.”
756	GEN 27:28	Ela Manetualain nakonda dinis neme lalai mai, fo ana tao o osi mala, dadik dae mamina! Ela Ana fee o hade makadotok, ma anggol boak henu-henuk.
757	GEN 27:29	Hataholi nusa kala ala dadik neu o atam, Ma leo-leo la lakatele fee hadak neu o. O palenda basa o tolanoo mala, ma ala sendek lunggulangga nala, lai o matam. See ana sumba-soo o, na, sila boe oo ala hambu sumba-sook. Ma see fee o babaꞌe-babatik, na, sila boe oo ala hambu babaꞌe-babatik.
761	GEN 27:33	Boe ma, Isak mulai dele, de natane, nae, “Mete ma leondiak, na, isinaak ndia, see neni fee au mbaa ndia, de au uꞌa so? Basa de au feen babaꞌe-babatik. De taa bisa feꞌa heni babaꞌe-babatik ndia so bali.”
764	GEN 27:36	Boe ma, Esau kokolak bali nae, “Ana kedi nala au laꞌi dua ndia so. Sososan ana kedi nala, au hak kaꞌang. De hatematak ia, ana kedi bali nala, au babaꞌe-babating. Huu ndia, de nade ‘Yakob’ (fo ndandaan nae, ‘toꞌu ei tinggadean’, ma ndandaan feꞌen nae, ‘mana masapepekok’). Tehuu, ama bei kababaꞌe-babatik seluk, fo fee au, do?”
765	GEN 27:37	Isak nataa, nae, “Au soꞌu alan ana dadik neu o malanggan. Ma basa ndia tolanoo nala, ala dadik ndia ata nala so. Au feen hade makadotok, ma anggol oek henu-henuk. De, ana nggo ei! Hatematak ia, bei hambu babaꞌe-babatik hata bali, fo fee o?”
769	GEN 27:41	Esau namanasa Yakob nalan seli, huu ndia fadin namoa nala ndia babaꞌe-babatin. Tehuu, ana duduꞌa nae, “Taa dook so bali, tehuu ama mate. De, kaꞌda mahani. Dei fo basa bebeꞌen, na, au tao isan!”
788	GEN 28:14	Dei fo o numbu-sdu mala noꞌun leo afu ia. Ma dei fo ala latanggenggelak leni sudi bee leu, nai basa mamanak lalaꞌen. Neme o numbu-saꞌdu mala mai, dei fo hataholi nusak noꞌu kala lai daebafok, ala hambu babaꞌe-babatik.
828	GEN 29:32	Boe ma, Lea nailu, de ana bonggi ana tou-anak esa. Ana foin nade, Ruben (fo ndandaan, ‘nita au toꞌa-taang’), huu ana nae, “Memak LAMATUAK nita au toꞌa-taang. Huu ndia, de hatematak ia, au saong nau mbali au boe.”
848	GEN 30:17	Boe ma, Manetualain namanene Lea huhule-haladoin. Huu ndia de nailu, boe ma ana bonggi ana tou-ana kaliman.
853	GEN 30:22	Boe ma, Manetualain nasaneꞌda Rahel, de Ana namanene ndia huhule-haladoin. Huu ndia, Ana soi ndia ana manan.
860	GEN 30:29	Yakob nataa, nae, “Toꞌo mita aom so, au tao ue-leꞌdis tingga-tingga. Huu ndia, de toꞌo banda nala, boe lamanoꞌu lakandoo.
861	GEN 30:30	Faik fo au bei taa mai ndia, toꞌo hata nala taa noꞌuk nalan seli. Tehuu, hatematak ia, toꞌo kamasuꞌik so. Manetualain fee babaꞌe-babatik neu toꞌo, huu au ue-leding. Hatematak ia fain losa so, fo au sangga tao ue-leꞌdis fee au sao-ana nggala.”
862	GEN 30:31	Laban natane, nae, “De au musi bae leo beek neu o?” Yakob nataa, nae, “Toꞌo boso fee au hata-hata. Dei fo au akaboi akandoo toꞌo banda nala, sadi au bisa tao dedeꞌak esa.
863	GEN 30:32	Makamboꞌik au, fo faik ia boe oo, au uni toꞌo banda nala uu, fo hele ala biꞌiae-biꞌilombo. Mana taa kokotok, ma taa kekeꞌa kala, na, toꞌo enan. Tehuu kokotok ma kekeꞌa kala, na, ela au hambu sala. Ma au haꞌi ala biꞌilombo nggeok boe. Ela basa sila baen neu au sosotang.
868	GEN 30:37	Basa ndia, boe ma Yakob tati nala ai ndanak neme ai matak telu mai, de ana lufa loun tao kekela-kekelak.
874	GEN 30:43	Boe ma Yakob dadik namasuꞌi atu-atu. Ndia biꞌiae nala, biꞌilombo nala, banda onta nala, banda keledei nala, ma ata nala, noꞌun seli.
881	GEN 31:7	Tehuu mae leondia boe oo, ana nambue kedi nala au taa-taa. Ana nggati au sesebang losa lai sanahulu. Mae leondiak boe oo, Manetualain nanea nahele au.
916	GEN 31:42	Uak Manetualain, fo baꞌi Abraham no ama Isak lakaluku-lakatele neun, Ana nanea au. Mete ma, taa, na, neu ko toꞌo husi heni au ua lima louk so. Tehuu Manetualain taa nakambombokek matan neu au totoꞌang, ma Ndia nita basa au ue-leꞌding. Huu ndia de leꞌodaek, Ana mai nasaneneꞌdak toꞌo.”
939	GEN 32:11	Au taa andaa simbok Manetualain sususen, ma Manetualain dale kateman neu au. Makahulun, faik fo au lena lee Yarden ia, kada au uni teteꞌe-aik. Tehuu hatematak ia, au fali maing uni hataholi ma banda bubuak dua.
974	GEN 33:13	Tehuu Yakob nataa, nae, “Bosok, kaꞌa! Kaꞌa mita matam, kakana kala bei kadiꞌik de tala bisa laꞌok lai-lai. Ma banda manabonggi beu kala, noꞌuk boe. Mete ma ita takaseti sala laꞌo lai-lai, na kada nai faik esa dalen, mate basa sala.
981	GEN 33:20	Nai ndia, ana nakatotodok batu tao mei tunu-hotuk. Boe ma, ana foi mamanak ndia, nade El-Elohe-Israꞌel, fo ndandaan nae, ‘Manetualain ndia, na, Israꞌel Manetualain’.
986	GEN 34:5	Yakob namanene hambu hataholi ana sao nakaseti ndia ana inanan, tehuu kada ana nee-nee, ma taa tao hata-hata. Huu faik ndia, ndia ana touana nala, lanea banda lai mok. De, ana nahani losa basa sala fali dei.
1019	GEN 35:7	Nai ndia, Yakob nambadedei mei batu tunu-hotuk. Boe ma, ana foi mamanak ndia nade El Betel, (fo ndandaan nae, ‘Manetualain Betel’), huu makahulun Manetualain natudu Mataon neu Yakob neme ndia, neu faik fo nalai neme kaꞌan mai.
1021	GEN 35:9	Faik fo Yakob fali neme Padan Aram mai, Manetualain natudu Mataon bali, ma Ana feen babaꞌe-babatik.
1089	GEN 37:5	Leꞌodaek esa, Yusuf nalameꞌi. Boe ma ana tui mein ndia neu kaꞌa nala nae, “Wei! Ei mamanene dei! Au alameꞌi ae ita basa-nggata mbaꞌa hade-gandum nai osi dale. Boe ma au hadeng nambadeik lido-lido. Tehuu ei hade mala lambadeik eꞌo, de kauk au enang.” Kaꞌa nala lamanene leondia, boe ma ala boe lamanasan bali.
1109	GEN 37:25	Basa boe ma ala fali leu laꞌa. Ala bei laꞌa-laꞌa, tehuu nggengge neuk, ala lita hataholi bubuak esa mai. Hataholi bubua kala sila banda onta nala, fua leni bua danggan, leo ai daa kaboo menik, bumbu-fani, ma akidoo mata-matak. Naa te, bubuak ndia hataholi Ismael asa leme nggolo Gilead mai, fo ala sangga leni dook leu nai Masir.
1129	GEN 38:9	Onan bubuluk hadak ndia so. Tehuu ana taa nau fee kaꞌan Er numbu-saꞌduk. De mete ma ana sunggu no Tamar, na nakalalambu heni ndia binin, fo ela Tamar boso bonggi.
1138	GEN 38:18	Boe ma, Yahuda natane bali nae, “Au fee o bua namahehelek hata?” Tamar nataa nae, “Ama ela cap fo mana londa-londak ndia, ma ndia talin ndia Ama lesuhaꞌin ndia. Ma ela teteꞌe-aik ndia boe.” Yahuda namanene leondia, boe ma ana fee bua sala sila neu ndia. De, dua sala sunggu sama-sama. Basa ndia, boe ma Tamar fali. Ana oꞌdu heni ndia baloꞌa malolen ndia, ma ndia lafanan ndia, de ana pake seluk ndia baloꞌa papake ina falun. Naa te, Tamar nailu so.
1145	GEN 38:25	Boe ma, leu hela lo Tamar mai, tehuu ana kalua heni cap no teteꞌe-aik. De nadenu ala leu lafaꞌda ndia aliaman lae, “Ama, tulun palisak bua sala ia dei. Hataholi maena cap ma teteꞌaik ia, ana tao nailu au.”
1155	GEN 39:5	Huu Yusuf leo nai ndia, de Manetualain fee ndia malanggan, fo hataholi Masir ndia babaꞌe-babatik. Ndia uma isi nala, ndia pusaka nala, ndia osin, ma ndia ue-leꞌdin, basan dadi no malole.
1158	GEN 39:8	Tehuu Yusuf taa nau. De nataa nae, “Boso leondiak, Ina! Huu au malanggang Potifar, fee au koasa fo au akaneni basa ndia ue-ledin.
1159	GEN 39:9	Nai uma ia, taa hambu hataholi so bali fo ana toꞌu koasa lena heni au. Huu malanggan fee au akaneni basa-basan. Kada ina, na, taa. Talobee fo au bisa tao manggalauk leoiak! Ndia laꞌban Manetualain hihiin!”
1161	GEN 39:11	Boe ma laꞌi esa, de Yusuf maso neni uma dale neu, fo sangga ana susuli ndia ue-leꞌdin. Faik ndia, taa hambu hataholi feꞌek nai uma.
1164	GEN 39:14	boe ma ana nanggou hataholi mana tao ue-ledi sala, de nafaꞌda nae, “Wei! Ei mai dei! Isinaak, tou Ibrani ndia, ana maso neni au kamang dale neu. Ana sangga tao manggalauk neu au, tehuu au eki tingga-tingga. Ia, ana laꞌo ela ndia badun, de nalai deak neu. Au saong ia, neni hataholi hada manggalauk ia, fo kada ana tao nakamamaek ita!”
1188	GEN 40:15	Huu tungga teteꞌben, ala haꞌi lakasetik au uma hataholi Ibrani nggolon mai. Nai ia boe oo, au taa tao manggalauk hata-hata. Naa te ala tao au uni bui ia dalek uu, nonook leo au ia hataholi manggalauk.”
1208	GEN 41:12	Nai bui ndia dalek, hambu hataholi Ibrani esa bei muli-soluk. Malangga bui soꞌun ana daꞌdik malangga mana makaneni nai bui ndia. Ai tui ai meꞌin neu ndia. Boe ma nafada meꞌis sila ndandaan.
1212	GEN 41:16	Boe ma Yusuf nataa nae, “Ama manek. Au boe oo taa bubuluk hata-hata. Kada Manetualain mesa kana bisa nafada no teteben meꞌis ndia ndandaan. Neu ko Ana nau nafada ama dedeꞌa neulauk.”
1271	GEN 42:18	Neu faik katelun, boe ma Yusuf kokolak no sala leme bui dale, nae, “Au ia, hataholi esa, mana bii Manetualain. Ma au tungga Ndia hihiin-nanaun taa-taa. De, suek ei bisa masoda, na, au sangga mboꞌi ei, tehuu no heheluk esa.
1278	GEN 42:25	Basa ndia, boe ma Yusuf palenda ndia pegawe nala, fo ladai hade neu kaꞌa nala karo nala, ma ladai falik esa-esako doin neu karo nala bafan. Ndia boe oo nadenu fee sala lepa-nggee. Boe ma, pegawe la sila, ala tao tungga Yusuf palendan.
1284	GEN 42:31	Tehuu ai mataa mae, ‘Taa! Ai ia kada hataholi ndoos, fo, taa mana memete-mamakuk.
1330	GEN 44:5	Talobee, de ei dale mala leoiak de bisa mamanaꞌo mini malanggan moo lilo fulan? Ei taa bubuluk, do? Ndia taa kaꞌda moo nininuk! Ana pake mook ndia fo ana sangga bubuluk hataholi la ua-nalen. Mook ndia, ndolu ndia! Ei tataom ia, memak manggalaun ana seli!”
1365	GEN 45:6	Hatematak ia, fai ndoen bei fo ana laꞌok teuk dua ia. Bei ela teuk lima bali. Neu faik ndia, hataholi la tala foi dae, tala sele-nggali, ma tala hambu buna-boak hata-hata.
1368	GEN 45:9	Hatematak ia, fali lai-lai leo, fo mafaꞌda au kokolang ia neu ama, mae leoia: ‘Ama anan Yusuf ndia, bei kasodak! Ana dadik hataholi inahuuk nai nusa Masir so. Ndia boe oo, noke ama neni Masir neu lai-lai.
1374	GEN 45:15	Ndia boe oo, ana holu nala kaꞌa nala, de ana idu esa-esa. Basa ndia, bei fo ala mulai lakokola lon.
1377	GEN 45:18	Boe ma madenu sala loo aman ma basa bobonggi nala, fo huꞌa mai leo. Dei fo au fee sala dae neulauk manai lain seli nai Masir, fo ala bisa lasoda lai ele, ma laꞌa dae ndia buna-boan.
1481	GEN 49:7	De hatematak ia, au sumba-soo ei daa saꞌem ndia, huu ana seli susudik! Ma ei nasam fo taa no kasian fa boe. Dei fo ei musi lemba aom ei manggalaun ndia. Dei fo Manetualain mbia ei numbu-sadu mala kii-konak. Boe ma, ala leo latanggelak lai sudi bee, nai dae Israꞌel.
1508	GEN 50:1	Boe ma, Yusuf holu nala aman, de namatani nakaleleu. Boe ma, ana idun bali-bali.
1518	GEN 50:11	Leꞌdoeik hataholi Kanaꞌan malai ndia kala lita ala dale hedi leondiak, boe ma ala kokolak lae, “Wei! Ei mita dei. Hataholi Masir asa tatao bebeꞌen dale heꞌdin ana seli bali! Ala lamatani losa leondiak.” Huu ndia, de ala foi mamanak ndia, nade Abel-Misraim. Ndia ndandaan, nae, ‘hataholi Masir asa dale hedin’.
23214	MAT 1:1	Susulak ia, tui laꞌeneu Yesus Karistus, fo Hataholi ndia, Manetualain helu mema kana, neme makahulun mai so, fo sangga haituan mai. Ndia ndia, baꞌi Abraham ma mane Dauk numbu-sadun. Mulai neme baꞌi Abraham losa mane Dauk, hambu dope sanahulu haa. Susula nadek bei-baꞌi nala, leoiak: Abraham bonggi Isak, Isak bonggi Yakob, Yakob bonggi Yahuda no ndia kaꞌa fadi nala,
23233	MAT 1:20	Boe ma, ledoeik ana bei duduꞌa neu-mai, leꞌodaek esa ana nalameꞌi. Nai meꞌis ndia dalek, nita Manetualain atan neme nusa-sodak mai nafadan, nae, “Wei Yusuf! O ia, mane Dauk numbu-sadun. O boso makandaa sao mala Maria. Huu, kakanak manai ndia tein dalek ndia, Lamatuak Dulan tataon ndia.
23270	MAT 3:9	Boso maehetuk ei sodak so, huu ei ia, baꞌi Abraham numbu-sadun. Mamahele au! Huu Manetualain bisa tao nala batu la ia, dadik neu baꞌi Abraham numbu-sadun.
23276	MAT 3:15	Tehuu Yesus nataa nae, “Taa hata-hata. Huu, soaneu hatematak ia, na, ela kaꞌa ndia salani Au. No leondiak na, ita tungga Manetualain hihii-nanaun.” Namanene leondiak, boe ma Yohanis nataa nae, “Kada neme Lamatuak mai.” De ana salani Yesus.
23279	MAT 4:1	Basa ndia, boe ma Manetualain Dulan noo Yesus neni mamana nes neu, fo suek nitu la malanggan fufudi-oꞌodon.
23315	MAT 5:12	Mae leondiak, tehuu ei musi kada tao mamahoko ei dale mala, huu Manetualain sadia bala fee ei babaꞌe mala makadotok nai nusa-sodak. Tehuu masanenedak bou! Taa kada ei mesa nggei hambu doidosok leondiak, huu lele uluk ele, hataholi la tao manggalauk leondiak neu Manetualain mana kokola nala.
23358	MAT 6:7	Mete ma ei hule-haladoi, na boso kokolak maꞌeok miu-mai. Huu, hataholi taa mana malelak Manetualain boe, bisa ala hule-haladoi leondiak. Ala duduꞌa lae, Manetualain nahiik namanene sila huhule-haladoi manalu ndia.
23361	MAT 6:10	Ela Ama dadik Manek neu basa hataholi la! Ela basa hataholi la tao tungga Ama palendan nai daebafok ia, sama leo Ama atan nala tao tungga Ama palenda nai nusa-sodak.
23371	MAT 6:20	Tehuu malolenak ei tao ues mbilu mbuse fo makaduduluk hata makadotok nai nusa-sodak. Huu nai ndia, fufuk no besi-teik taa bisa tao lakalulutun. Ma naꞌo boe oo, taa bisa mai ofe fo koꞌo nenin.
23408	MAT 7:23	Mae ala lambue kokoe Au leondiak boe oo, tehuu dei fo Au afada sala, ae, ‘Ei ia, see? Au taa alelak ei, huu ei taa masoda tungga Lamatuak hihii-nanaun. De, malai heok ia leo!’ ”
23425	MAT 8:11	Mamanene baa! Huu dei fo hataholi deak noꞌuk sama leo hataholi Roma ia, fo leme ledo sasadun dulu mai, ma neme ledo tetesan neu, fo langgatuuk laꞌa feta noꞌu lo baꞌi Abraham, baꞌi Isak, ma baꞌi Yakob nai Manetualain uman nai nusa-sodak.
23447	MAT 8:33	Lita leondiak, boe ma mana manea bafi la lalai fali leni nggolok leu, de ala tui basa-basan.
23454	MAT 9:6	Mete ma ana foꞌa tutik, dei fo ei mita buti, mae, Au ia Hataholi Isi-isik. Huu Au aena hak fee ambon neu hataholi salan.” Boe ma Yesus palenda hataholi luꞌuk ndia, nae, “Foꞌa leo! Luꞌa mala o mamana ndondolom, fo fali leo!”
23496	MAT 10:10	lepa-nggee, baloꞌa seluaok, tabu-eik, do teteꞌe-aik. Huu hataholi musi fee hataholi mana tao ues, hata fo nandaa, suek ala bisa lasoda.
23499	MAT 10:13	Mete ma hataholi lai uma ndia simbok ei no malole, na, ei moke fo Lamatuak fee babaꞌe-babatik neu sala. Tehuu mete ma ala taa simbok ei, na, Lamatuak boe oo, taa fee sala babaꞌe-babatik.
23503	MAT 10:17	Tehuu mata neuk baa! Huu dei fo hataholi tao doidoso ei sama leo busa kiki nakamate biꞌilombo. Dei fo ala hela leni ei maso mini mamana tao dedeꞌa anggama miu. Ma neu ko ala filo ei nai sila uma huhule-haladoin.
23509	MAT 10:23	Mete ma hataholi tao doidoso ei nai kota esa, na, foꞌa fo malai mini kota feꞌek esa miu. Tetebes ndia! Au ia, Hataholi Isi-isik. Dei fo ei bei taa laꞌok mateꞌe ndule basa kota la lai Israel, tehuu Au fali maing so.
23557	MAT 11:29	Mete ma ei simbo Au nanonoling, fo laꞌok noꞌu mia Au, na, ita ia, sama leo sapi luku dua, fo hela noꞌu luku esa. Huu Au ia, daleng malole, ma Au ia, daleng kadiꞌi-taidaek. Mete ma ei tungga Au, na, ei matea masa fali.
23559	MAT 12:1	Laꞌi esa, laꞌeneu hataholi Yahudi la fai hahae tao ues, boe ma Yesus no ana mana tungga nala laꞌok lesik hataholi osin dale. Ndia ana mana tungga nala ndoe, huu ndia de ala ketu lala hade-gandum mbulen de laꞌa laꞌo-laꞌo.
23563	MAT 12:5	Huu nai ndia nana sulak laꞌeneu malangga anggama la mana ono-lau nai uma huhule-haladoik, laꞌeneu fai hahae tao ues. Tehuu sila taa hambu salak hata-hata.
23566	MAT 12:8	Huu Au ia, Hataholi Isi-isik. Au aena hak, fo aketu ae, hataholi bole tao hata neu fai hahae tao ues.”
23627	MAT 13:19	Bini mana tuda lai dalak lain ndia, na, ndia hataholi mana mamanene Dedeꞌa-kokolak laꞌeneu Manetualain palendan, tehuu taa nalelak tebe-tebe. Boe ma nitu la malanggan mai de namoa neni Dedeꞌa-kokolak ndia, neme hataholi dalen mai.
23631	MAT 13:23	Tehuu bini mana tuda nai dae isik, sama leo hataholi pasak ndia ndiꞌidoon, fo simbok Dedeꞌa-kokolak ndia, ma tungga Lamatuak hihii-nanaun. Basa na, kada ana tao dedeꞌa malole, sama leo bini mana maboak ndia. Hambu mana maboa laꞌi telu hulu, hambu laꞌi nee hulu, ma hambu losa laꞌi natun esa.”
23651	MAT 13:43	Tehuu hataholi mana masoda ndoos tungga Manetualain hihii-nanaun, neu ko ala leo lakandondoo henin lo sila Ama Manen nai nusa-sodak. Nai ndia, ala lasaꞌa manggaledok sama leo ledo. Hataholi mana nau nalelak Au, na, pasak ndiꞌidok neulalau baa!”
23689	MAT 14:23	Ledoeik basa sala fali so, boe ma Yesus ndaꞌe neni letek esa lain neu, fo hule-haladoi. Losa leꞌodae, tehuu Ana bei mesa kana nai ndia.