70	GEN 3:14	Penga niyan, minikagi se Timanem diyà te memokan, “Ipelumun ka tandà te medaet ininang no seini. Diyà te kedita te menge ayam-ayam aw menenanap, olò sikona se ipelumun iling kani. Lekat seini, keilangan domelog se getek nikaw diyà te tanà, aw gayed ka komaen te kepong-kepong te tanà taman te pegkematay nikaw.
91	GEN 4:11	Lekat seini, ipelumun ko sikona. Eked den kepakay aw meg-obong ka te tanà, so tanà se inegseban te dipanog te kedowa no te pegpengimatay no kandin.
98	GEN 4:18	Si Enok se amay i Irad. Si Irad se amay i Mehujael. Si Mehujael se amay i Metusael. Si Metusael se amay i Lamek.
99	GEN 4:19	Migdoway si Lamek. Si Ada se ngadan te sebad esawa din, aw si Sela se doma.
103	GEN 4:23	Minikagi si Lamek diyà te didowa esawa din, “Ada aw Sela, penenalan kaw den diyà kanak. E menge esawa ko, seini se kagi ko diyà kenyo. Mekebatog a den mengimatay te otaw menigbas kanak. Pengkey pa telaki se megpeeleg kanak, mengimatay a kandin.
131	GEN 5:25	Peg-apet te sebad gatos kewelowan teg pito se omay i Matusalem, timebaw se batà din meama si Lamek.
134	GEN 5:28	Peg-apet te sebad gatos kewelowan teg dowa se omay i Lamek, doen batà din meama timebaw.
136	GEN 5:30	Penga te pegtebaw i Noe, lima gatos kesyaman teg lima se omay minokit te wedà pa kematay si Lamek. Dalem niyan, doen pa menge doma batà din timebaw.
137	GEN 5:31	Pito gatos kepitowan teg pito se omay i Lamek te pegkematay din.
141	GEN 6:3	Penga niyan, minikagi se Timanem, “Eked ko pekeleyati se pedowan ko diyà te menge otaw te wedad temanan, so otaw dan olò. Lekat seini, taman olò te sebad gatos kelowan se omay se tegsebad-sebad otaw.”
155	GEN 6:17	“Linepen ko se tanà te wayeg amon megelà se kedita doen pedowan. Matay se kedita dini lanto te tanà.
200	GEN 8:16	“Lowà ka den lekat te arka sipat te esawa nikaw, menge batà nikaw, aw menge esawa dan.
203	GEN 8:19	Limowà heman se menge ayam-ayam, menenanap, aw manok te tegsebad-sebad kemolò niyan.
208	GEN 9:2	Lekat seini, melemitan kenyo se kedita te menenanap, manok, aw ikan. Inangen ko sikiyo olo te kedita niyan.
246	GEN 10:11	Lekat kidoen, dimoton sikandin te Asirya, aw mig-inang sikandin te menge lonsod te Niniba, Rehobot-Ir, Cala,
248	GEN 10:13	Si Ehipto se kemonaan te kedita te otaw mig-ogpà doton te Lud, Anam, Laab, Neftu,
254	GEN 10:19	lamig nesakop dan se kebelad te tanà lekat te lonsod te Sidon taman te lonsod te Gerara medapag te Gasa, aw nesakop heman se menge lonsod te Sodoma, Gomora, Adma, aw Seboim medapag te Lasa.
257	GEN 10:22	Se menge batà i Sem, yan si Elam, si Asur, si Arfacsad, si Lud, aw si Aram, aw yan heman se ngadan te menge bowad-bowad dan.
270	GEN 11:3	Migpeikegihay dan, “Ayas kaw den. Loteken tadon den se pasak aw delapen tadon iyan lamig megkagsen, amon doen inangen tadon balay.” Yan linotek dan se pasak inangen dan bato, aw inimon dan se apog ibolit kenyan amon meg-inang dan te balay.
294	GEN 11:27	Seini se ngadan te menge bowad-bowad i Tera. Si Tera se amay i Abram, si Nahor, aw si Haran. Si Haran se amay i Lot.
298	GEN 11:31	Impetaking i Tera se batà din si Abram, aw ogangan din si Sarai esawa i Abram, aw apò din si Lot batà i Haran. Nesayo dan lekat te lonsod te Ur doton te Caldea, aw migpesalo dan doton te Canaan. Meneng pegdateng dan doton te Haran, mig-ogpà dan kidoen.
303	GEN 12:4	Yan timolò si Abram te punù te Timanem, aw nesayo sikandin tinekingan i Lot. Kepitowan teg lima se omay i Abram te pegkesayo din lekat te Haran.
304	GEN 12:5	Impetaking i Abram se esawa din si Sarai, aw anak din si Lot, aw inibing din se kedakel te kedònan aw kedita te allang neabat din doton te Haran, aw nesayo dan pesalo doton te Canaan. Pegdateng dan doton te Canaan,
307	GEN 12:8	Penga niyan, dimeleg sikandin pesalo doton te menge bontod lenged te eglibtakan te lonsod te Betel. Mig-ogpà sikandin diyà te tengà-tengà te lonsod te Betel aw Ai. Lenged te egsellepan se lonsod te Betel, aw lenged te eglibtakan se lonsod te Ai. Mig-inang heman sikandin te sonoganan te ayam-ayam kidoen, aw migsimba sikandin te Timanem.
320	GEN 13:1	Nesayo si Abram lekat te Ehipto aw limikò sikandin doton te Negeb sakop te Canaan sipat te esawa din aw kedakel te kedònan din. Timaking heman si Lot kandin.
324	GEN 13:5	Nayan, timaking heman si Lot ki Abram, aw doen heman menge pamilya din, aw sineligan din, aw menge karniro, kambing, aw baka din.
326	GEN 13:7	Yan se doun te migbolaw se menge telediyaga i Abram aw menge telediyaga i Lot. (Doen heman menge tege Canaan aw tege Perisi mig-ogpà pa kidoen.)
327	GEN 13:8	Yan minikagi si Abram diyà ki Lot, “Eked a keibeg aw megbolaw ki aw megbolaw heman se menge telediyaga ta, so anak ko sikona.
329	GEN 13:10	Migpeatap-atap si Lot, aw kinità din te mèpiya se kebelad te tanà medapag te wayeg te Jordan taman te lonsod te Soar, so dakel se wayeg kidoen iling te kekeyowan intanem te Timanem, aw iling te Ehipto. (Neinang iyan te wedà pa bàti te Timanem se lonsod te Sodoma aw Gomora kidoen medapag te wayeg te Jordan.)
330	GEN 13:11	Yan pinemallì i Lot se kebelad te tanà medapag te wayeg te Jordan, aw minalin sikandin lenged te eglibtakan. Yan se pegpeteniyay te didowa dan.
331	GEN 13:12	Mig-ogpà pa si Abram doton te Canaan, meneng minalin si Lot doton te menge lonsod kidoen medapag te wayeg te Jordan, aw mig-ogpà sikandin medapag te lonsod te Sodoma.
333	GEN 13:14	Penga te pegkesayo i Lot, minikagi se Timanem diyà ki Abram, “Pegpeatap-atap ka den doton te kebelad te tanà pengkey kenan se kitaen nikaw.
335	GEN 13:16	Inangen ko medita se bowad-bowad nikaw igsà eked dan kebilang. Labi pa mola se pegbilang te menge napò te tanà.
340	GEN 14:3	Migsebad se lima selotan sìyan, aw netipon se kedita te sondalo dan doton medapag te baog te Sidim neinang den songkani Lanaw te Asin.
346	GEN 14:9	te menge sondalo te epat selotan kidoen, si Cadorlahomor selotan te Elam, si Tadal selotan te Goyim, si Amrafel selotan te Sinar, aw si Arioc selotan te Elasar. Lima se selotan migbolaw te epat selotan.
349	GEN 14:12	Dinakep dan heman se anak i Abram si Lot, aw inagaw dan se kedònan din, so mig-ogpà sikandin doton te Sodoma.
353	GEN 14:16	Neabat i Abram se kedakel te kedònan neagaw dan. Impelowà din heman se anak din si Lot, aw in-olì din diyà ki Lot se kedakel te kedònan neagaw lekat kandin. Impelowà din heman se kedita te bayi aw menge doma otaw nedakep.
366	GEN 15:5	Inibing te Timanem si Abram doton te lowà te balay, aw minikagi sikandin, “Lengag ka den doton te langit. Pegbilang ka te menge bitoen aw mebatog nikaw. Iling kenyan se kedita te menge bowad-bowad nikaw.”
379	GEN 15:18	Te delem sìyan, migpakang se Timanem diyà ki Abram, kagi din, “Ibegay ko diyà te menge bowad-bowad nikaw se kebelad te tanà seini. Lekat te wayeg doton te Ehipto taman te dakel wayeg te Yofritis, yan se tanà ibegay ko diyà kandan.
396	GEN 16:14	Yan se doun te iningedanan se selep sìyan Beer Lahai Roi (kelebadan niyan, selep te Timanem doen pedowan egpengità kanak). Kidoen pa songkani se selep sìyan doton te tengà-tengà te lonsod te Cades aw Bered.
401	GEN 17:3	Limongken si Abram lamig minapet se olo din diyà te tanà, aw minikagi heman se Timanem,
403	GEN 17:5	Lekat seini, eked ka den ingedani ki Abram (kelebadan niyan, melangkaw amay), meneng ingedanan ka den ki Abraham (kelebadan niyan, amay te medita pongan), so inangen ko sikona kemonaan te medita pongan.
413	GEN 17:15	Minikagi se Timanem diyà ki Abraham, “Lekat seini, eked den kepakay aw si Sarai se ngadan te esawa nikaw. Keilangan ingedanan no sikandin ki Sara (kelebadan niyan, batà bayi te selotan).
415	GEN 17:17	Limongken si Abraham lamig minapet se olo din diyà te tanà. Nebebayat sikandin, so mig-aneng-aneng sikandin, “Pengkey sebad gatos se omay ko, meneng doen kedì batà ko tomebaw. Pengkey kesyaman se omay i Sara, meneng tebawan kedì sikandin te batà.”
427	GEN 18:2	Pegtengteng din kidoen te lowà, kinità din se telo otaw timindeg medapag kidoen. Pegkità din kandan, ayas sikandin simongon kandan. Limongken sikandin lamig minapet se olo din diyà te tanà amon megsagman kandan.
459	GEN 19:1	Sìyan didowa memanit nekeonà, yan se anghil. Pegkemeapon, dimateng dan doton te Sodoma. Kidoen si Lot nenenoo medapag te lelebangan diyà te melangkaw kotà nekelibed te lonsod sìyan. Pegkità din kandan, timindeg sikandin aw simongon kandan. Limongken sikandin lamig minapet se olo din diyà te tanà,
461	GEN 19:3	Meneng gayed dan pig-ibing i Lot lamig timaking dan kandin doton te balay din. Impeinang i Lot se pan aw menge doma mèpiya kànen, aw kimaen dan.
463	GEN 19:5	Timawal dan diyà ki Lot, kagi dan, “Kenan lay se didowa meama dimateng gina dini kamno te meapon? Pelowai dan diyà kenami amon lomayok kay diyà kandan.”
464	GEN 19:6	Limowà si Lot te balay din aw tinakep din se lelebangan.
467	GEN 19:9	Meneng minikagi dan, “Ikà egsagda kenami. Pengkey kenà ka tege dini, meneng mikagi ka peden diyà kenami aw eden se mepakay day inangen. Aw aneng-aneng no medaet se inangen day diyà kandan, labi pa medaet se inangen day diyà kamno.” Sinegseg dan si Lot, aw migpedapag dan diyà te tetakep amon bàtan dan iyan.
468	GEN 19:10	Meneng inowang te didowa anghil se tetakep, aw ginakgak dan si Lot doton didalem te balay, aw tinakep dan se lelebangan.
470	GEN 19:12	Minikagi se didowa anghil diyà ki Lot, “Aw doen menge kedomaan no dini, menge batà nikaw, ogangan nikaw, aw menge doma sakop nikaw mig-ogpà dini te lonsod seini, petekingi dan, aw kesayo kaw den,
472	GEN 19:14	Yan nesayo si Lot aw dimoton sikandin te salà te dowa batà din bayi, aw minikagi sikandin, “Ayas kaw den kesayo lekat dini, so pegbàtan den te Timanem se lonsod seini.” Meneng eden dan aw kebawol din iyan.
473	GEN 19:15	Pegkeiselem niyan, ginallat te anghil si Lot, kagi dan, “Kegaen ka den. Petekingi den se esawa no aw dowa batà no laga, aw kadas kaw den amon eked kaw kesàbi te pegbaet te Timanem te lonsod seini.”
474	GEN 19:16	Meneng gayed pa sikandin mig-alà-alà. Penga niyan, so neidowan dan te Timanem, minawid se didowa anghil te belad i Lot aw belad te esawa din, aw didowa batà dan, aw inibing dan doton te lowà te lonsod.
476	GEN 19:18	Meneng minikagi si Lot, “Sir, eked a.
480	GEN 19:22	Meneng kegaen kaw den kadas, so wedad meinang ko singed aw domateng kaw doton.” Iningedanan se lonsod sìyan Soar (kelebadan niyan, deitek), so minikagi si Lot te deitek iyan.
481	GEN 19:23	Pegdateng i Lot doton te Soar, limibtak den se aldaw.
484	GEN 19:26	Meneng limingì se esawa i Lot te lonsod tinenanan dan, aw yan nebaloy sikandin asin.
487	GEN 19:29	Meneng pegbaet te Timanem te menge lonsod kidoen te baog sìyan inogpaan i Lot, mig-aneng-aneng se Timanem tepad ki Abraham, aw yan impelowà din si Lot amon eked sikandin kegelà sipat te menge doma otaw.
488	GEN 19:30	Nayan, so nelemitan si Lot meg-ogpà doton te Soar, minalin sikandin sipat te didowa batà din bayi doton te bontod, aw mig-ogpà dan doton te ilib.
491	GEN 19:33	Pegkedelem niyan, linasing dan se amay dan, aw limayok se kakay diyà kandin. Meneng wedà peg-aneng-aneng si Lot kenyan, so ontò sikandin nelasing.
494	GEN 19:36	Yan miglaman se didowa batà i Lot pineokit kandin.
608	GEN 24:16	Laga pa si Rebecca, aw ontò mèpiya se bawa din. Wedà palos sikandin leyoki te meama. Dimoton sikandin te sokian, aw simalok, aw limikò sikandin.
621	GEN 24:29	Doen kedowa meama i Rebecca ngadan din si Laban. Pegkità i Laban te aritis aw taklay te etebay din, aw pegdineg din te kagi te etebay din tepad te inikagi te otaw dimateng, ayas sikandin simongon kandin doton te sokian. Pegdateng i Laban doton te sokian, kidoen pa se sineligan i Abraham sipat te menge kamilo din.
623	GEN 24:31	Minikagi si Laban, “Mèpiya se imbegay te Timanem diyà kamno. Taking ka den kanak doton te balay ko. Ikà eg-ogpà dini, so doen tambì impetagad ko den kamno, aw doen heman kelokob te menge kamilo nikaw.”
625	GEN 24:33	Peglamak dan te kànen, minikagi se sineligan, “Eked a kaen singed aw meg-indan a kenyo tepad te tod ko dini.” Minikagi si Laban, “Indani kay den.”
640	GEN 24:48	Limongken a aw migsimba a diyà te Timanem. Induyun ko se Timanem egseligan te amo ko si Abraham, so inelladan a din amon mekepantek a dini mengabat te apò bayi te kedowa te amo ko pengognanen te batà din meama.
642	GEN 24:50	Minikagi si Laban aw si Betuel, “Impetaga-taga den te Timanem se ibeg din. Eked day iyan todai.
654	GEN 24:62	Nayan, mig-ogpà si Isaac doton te Negeb. Kaling sikandin minolì lekat te kebigtilan te Beer Lahai Roi.
662	GEN 25:3	Si Jocsan se amay i Seba aw si Dedan. Se menge bowad-bowad i Dedan, yan se neinang menge pongan te Asur, Letus, aw Leum.
670	GEN 25:11	Penga te pegkematay i Abraham, mèpiya se imbegay te Timanem diyà te batà din si Isaac, aw mig-ogpà sikandin doton medapag te Beer Lahai Roi.
679	GEN 25:20	Kepatan se omay i Isaac te pegpengognan din ki Rebecca batà i Betuel tege Aramea te Mesopotamya. Si Rebecca se etebay i Laban tege Aramea heman.
771	GEN 27:43	Na Atò, tolò ka den kanak. Kadas ka den, aw doton ka te meama ko si Laban kidoen te Haran.
772	GEN 27:44	Làno-làno ka peg-ogpà doton lamig megkewedad se keopal te kedowa nikaw.
776	GEN 28:2	Doton ka den beling te Mesopotamya kidoen te balay te apò no si Betuel. Mèpiya aw pengognanen no se batà te emayen no si Laban.
779	GEN 28:5	Penga niyan, impekesayo i Isaac si Jacob, aw dimoton sikandin te Mesopotamya taman ki Laban batà i Betuel tege Aramea. Si Laban se meama i Rebecca, aw emayen sikandin i Jacob aw si Esau.
793	GEN 28:19	Iningedanan din se tanà sìyan Betel (kelebadan niyan, balay te Timanem). Meneng iningedanan Luz se lonsod kidoen kedengan.
800	GEN 29:4	Mig-insà si Jacob te menge telediyaga, “Elew, kenan kaw lay lekat?” Timaba dan, “Lekat kay te Haran.”
801	GEN 29:5	Mig-insà si Jacob, “Kinilala niyo lay si Laban apò i Nahor?” Timaba dan, “Ee. Kinilala day sikandin.”
806	GEN 29:10	Pegkità i Jacob ki Raquel nengibing te menge karniro te emayen din si Laban, dimoton sikandin te balon, aw nengelid sikandin te bato insampeng kenyan, aw simalok sikandin te wayeg inemen te karniro te emayen din.
809	GEN 29:13	Pegketaga-taga i Laban te dimateng se anak din si Jacob, ayas sikandin simongon kandin. Kinelesan sikandin i Laban, aw inedekan din, aw inibing din doton te balay din. Pegdateng dan kidoen, mig-indan si Jacob diyà kandin tepad te kedita neinang diyà kandin.
810	GEN 29:14	Penga niyan, minikagi si Laban, “Ontò ka anak ko.” Penga niyan, mig-ogpà si Jacob kidoen te sebad se bolan.
811	GEN 29:15	Nayan, minikagi si Laban diyà ki Jacob, “Pengkey anak ko sikona, meneng eked kepakay aw megterbaho ka diyà kanak aw wedad itandan ko kamno. Na, ikegihi a aw eden se itandan ko kamno.”
812	GEN 29:16	Dowa se batà laga i Laban. Si Lea se kakay, aw si Raquel se adi din.
813	GEN 29:17	Mèpiya tengtengen se mata i Lea, meneng ontò beling mèpiya se bawa i Raquel egtengtengen.
815	GEN 29:19	Minikagi si Laban, “Mèpiya aw sikona se ipepengognan ko diyà kandin, so sikona se labi mèpiya diyà te menge doma otaw mengognan peden kandin. Na, pegterbaho ka den diyà kanak.”
817	GEN 29:21	Penga niyan, minikagi si Jacob diyà ki Laban, “Netagkas den se pito se omay. Peipidi den se batà no diyà kanak.”
818	GEN 29:22	Yan migpeinang si Laban te dakel kànen, aw impetanod din se kedita te otaw mig-ogpà kidoen.
819	GEN 29:23	Meneng pegkedelem niyan, si Lea beling se impeipid i Laban diyà ki Jacob, aw yan se lineyokan i Jacob.
820	GEN 29:24	Imbegay i Laban se allang din bayi si Zilfa diyà ki Lea amon megtelaban kandin.
821	GEN 29:25	Pegkeiselem niyan, kinità i Jacob te si Lea se impeipid i Laban diyà kandin, aw yan mig-insà sikandin diyà ki Laban, “Nengà lay mig-inang ka te medaet diyà kanak? Si Raquel se impakang no diyà kanak tepad te terbaho ko. Nengà lay mig-akal ka kanak?”