7	GEN 1:7	Yan ininang te Timanem se elet diyà te wayeg diatas te tanà aw wayeg kidoen te tanà. Neinang iyan.
14	GEN 1:14	Minikagi se Timanem, “Megkedoen menge somenang doton te langit amon doen elet te aldaw aw delem. Yan se pengilala te menge bolan, menge aldaw, aw menge omay.
15	GEN 1:15	Yan heman se somenang doton te langit amon melowa se tanà.” Neinang iyan.
17	GEN 1:17	Yan se insawol te Timanem doton te langit amon melowa se tanà.
18	GEN 1:18	Yan se egsenang te aldaw aw delem, amon doen elet diyà te kelowahan aw kengitngitan. Kinità te Timanem te mèpiya iyan.
21	GEN 1:21	Yan ininang te Timanem se kedita te menenanap te dagat, aw kedita te kinemoloan eg-ogpà doton te wayeg aw dagat, aw kedita te kinemoloan te manok. Kinità te Timanem te mèpiya iyan.
27	GEN 1:27	Yan ininang te Timanem se otaw iling kandin. Ininang se otaw iling te Timanem. Ininang dan meama aw bayi.
32	GEN 2:1	Yan nepenga se peg-inang te Timanem te kedakel te langit, aw keneyonan, aw awop niyan.
34	GEN 2:3	Ininang din melangkaw aw egpenimeneman se ikepito te aldaw. Yan se aldaw te peg-ogpà din, so nepenga den se peg-inang din.
35	GEN 2:4	Yan se indan tepad te peg-inang te langit aw keneyonan. Peg-inang te Timanem te keneyonan aw langit,
45	GEN 2:14	Tigris se ngadan te iketelo te wayeg, aw minokit iyan lenged te eglibtakan te tanà iningedanan Asirya. Yofritis se ngadan te ikeepat te wayeg.
49	GEN 2:18	Minikagi heman se Timanem, “Kenà mèpiya aw sebad olò se otaw. Yan meg-inang a te doma din meketepad kandin amon doen megtelaban kandin.”
50	GEN 2:19	Yan inibing te Timanem se kedita te ayam-ayam, menenanap, aw manok ininang din lekat te tanà. Inibing din se kedita niyan doton te otaw amon ingedanan din iyan. Pengkey eden se in-ingadan din kenyan, yan se ngadan niyan.
55	GEN 2:24	Yan se doun te tomanan se meama te amay aw inay din, aw megsebad diyà te esawa din. Se didowa dan meinang sebad.
62	GEN 3:6	Penga niyan, kimità se bayi te mèpiya kànen se pongo te kayo sìyan, aw mèpiya se bawa niyan, aw mig-aneng-aneng sikandin te mèpiya aw megkebiyasa sikandin. Yan se doun te inabat din se pongo niyan aw kinaen din iyan. Doen heman imbegay din diyà te esawa din, aw kinaen din heman iyan.
63	GEN 3:7	Pegpengaen dan kenyan, migkebiyasa dan aw netegahan dan te migpetabeg-tabeg dan. Yan tinebil dan se dawen te kayo igira amon doen isampeng te sinelowan dan.
79	GEN 3:23	Yan impekesayo te Timanem se otaw lekat te kekeyowan te Eden, aw impeobong din sikandin te tanà linekatan din.
85	GEN 4:5	Meneng wedà keluba se Timanem ki Cain aw sìyan imbegay din. Yan ontò neopal si Cain aw timàmod.
104	GEN 4:24	Aw mekepito pa se kedaet te pelumun domateng diyà te otaw mengimatay ki Cain, Yan mekekepitowan teg pito pa se kedaet te pelumun domateng diyà te otaw mengimatay peden kanak.”
144	GEN 6:6	Yan miglama-lama sikandin tepad te peg-inang din te otaw aw tepad te pegpeogpà din kandan dini te tanà. Ontò nepuluk se pedowan din,
151	GEN 6:13	Minikagi se Timanem diyà ki Noe, “Tod ko, igelaen ko den se kedita te otaw, so nelegeb den se kebelad te tanà te medaet eg-inangen dan. Yan ontò ko dan bàtan sipat te kedita dini lanto te tanà.
152	GEN 6:14	Yan peg-inang ka den te arka te mèpiya kemolò te kayo amon doen sekayan nikaw. Peg-inang ka te menge tambì doton te arka, aw pemolit ka kenyan doton didalem aw doton te lowà.
181	GEN 7:21	Yan nelemes se kedita diyà te lanto te tanà, pengkey manok, ayam-ayam, menenanap, aw otaw.
199	GEN 8:15	Yan minikagi se Timanem diyà ki Noe,
202	GEN 8:18	Yan limowà si Noe lekat te arka sipat te esawa din, menge batà din, aw menge esawa dan.
219	GEN 9:13	Isawol ko den se binengonan kidoen te labon. Yan se pengilala tepad te pakang ko diyà te otaw eg-ogpà dini lanto te tanà.
223	GEN 9:17	Yan se pengilala tepad te pakang ko diyà te kedita eg-ogpà dini lanto te tanà.”
240	GEN 10:5	Sikandan se menge kemonaan te kedita te otaw eg-ogpà medapag te dagat aw doton te menge polò. Yan se menge bowad-bowad i Japet. Mig-ogpà se tegsebad-sebad pongan doton te kandan ogpeanan, aw doen heman kagi te tegsebad-sebad pongan.
255	GEN 10:20	Yan se menge bowad-bowad i Ham. Mig-ogpà se tegsebad-sebad pongan dan doton te kandan ogpeanan, aw doen heman kagi te tegsebad-sebad pongan.
266	GEN 10:31	Yan se menge bowad-bowad i Sem. Mig-ogpà se tegsebad-sebad pongan dan doton te kandan ogpeanan, aw doen heman kagi te tegsebad-sebad pongan.
270	GEN 11:3	Migpeikegihay dan, “Ayas kaw den. Loteken tadon den se pasak aw delapen tadon iyan lamig megkagsen, amon doen inangen tadon balay.” Yan linotek dan se pasak inangen dan bato, aw inimon dan se apog ibolit kenyan amon meg-inang dan te balay.
275	GEN 11:8	Yan tandà te peg-inang te Timanem kenyan, migbilit-bilit se kedita dan doton te kebelad te keneyonan, aw yan limengà dan te peg-inang dan te lonsod sìyan.
303	GEN 12:4	Yan timolò si Abram te punù te Timanem, aw nesayo sikandin tinekingan i Lot. Kepitowan teg lima se omay i Abram te pegkesayo din lekat te Haran.
306	GEN 12:7	Migpekità se Timanem diyà ki Abram, aw minikagi sikandin, “Seini se ogpeanan ibegay ko diyà te menge bowad-bowad nikaw.” Yan mig-inang si Abram te sonoganan te ayam-ayam ibegay diyà te Timanem migpekità diyà kandin.
311	GEN 12:12	Yan aw komità se menge tege Ehipto kamno, meg-aneng-aneng dan te teleesawa ki, aw yan mengimatay dan kanak amon egawen ka dan.
312	GEN 12:13	Yan ikagi ka kandan te telekedowa ki amon eked a dan imetayi, meneng segmanen a dan beling so etebay ta.”
315	GEN 12:16	Mèpiya se imbegay te selotan diyà ki Abram so etebay din si Sarai. Yan binegayan sikandin te medita karniro, kambing, baka, asno, allang, aw kamilo.
317	GEN 12:18	Yan impeangay te selotan si Abram, aw minikagi sikandin, “Medaet se ininang no diyà kanak, so wedà a no indani te teleesawa kaw.
323	GEN 13:4	Yan heman se tapay din ininangan te sonoganan te ayam-ayam. Todà sikandin migsimba te Timanem kidoen.
325	GEN 13:6	Yan kenà botong se tanà loyawan te kedita te ayam-ayam te didowa dan aw megsebad dan, so pelaban medita se ayam-ayam dan.
326	GEN 13:7	Yan se doun te migbolaw se menge telediyaga i Abram aw menge telediyaga i Lot. (Doen heman menge tege Canaan aw tege Perisi mig-ogpà pa kidoen.)
327	GEN 13:8	Yan minikagi si Abram diyà ki Lot, “Eked a keibeg aw megbolaw ki aw megbolaw heman se menge telediyaga ta, so anak ko sikona.
328	GEN 13:9	Yan mèpiya aw megpeteniyay ki den. Na, pegpeatap-atap ka den te kebelad te tanà seini. Aw pemellien no se tanà lenged te bibang, malin a doton te tanà lenged te kowanan. Aw pemellien no se tanà lenged te kowanan, malin a doton te tanà lenged te bibang.”
330	GEN 13:11	Yan pinemallì i Lot se kebelad te tanà medapag te wayeg te Jordan, aw minalin sikandin lenged te eglibtakan. Yan se pegpeteniyay te didowa dan.
379	GEN 15:18	Te delem sìyan, migpakang se Timanem diyà ki Abram, kagi din, “Ibegay ko diyà te menge bowad-bowad nikaw se kebelad te tanà seini. Lekat te wayeg doton te Ehipto taman te dakel wayeg te Yofritis, yan se tanà ibegay ko diyà kandan.
384	GEN 16:2	Yan minikagi si Sarai diyà ki Abram, “Wedad batà imbegay te Timanem diyà kanak. Yan mèpiya aw lomayok ka den diyà te allang ko amon doen pa peden batà ko pineokit kandin.” Timandù si Abram diyà te inikagi i Sarai,
387	GEN 16:5	Yan minikagi si Sarai diyà ki Abram, “Sikona se linekatan te salà neinang den diyà kanak. Sikona se binegayan ko ki Agar, aw yan miglaman sikandin, aw yan se doun te eglindoan a din. Netaga-taga se Timanem te doen salà no diyà kanak.”
396	GEN 16:14	Yan se doun te iningedanan se selep sìyan Beer Lahai Roi (kelebadan niyan, selep te Timanem doen pedowan egpengità kanak). Kidoen pa songkani se selep sìyan doton te tengà-tengà te lonsod te Cades aw Bered.
437	GEN 18:12	Yan se doun te nebebayat si Sara diyà te kandin pegkeotawun, aw mig-aneng-aneng sikandin, “Meneng ontò a den lokes, aw ontò den temoay se esawa ko. Menonen se pegdateng te keluba sìyan diyà kanak?”
446	GEN 18:21	Yan domoton a den amon ketegahan ko aw benal se dinineg ko, aw kenà.”
472	GEN 19:14	Yan nesayo si Lot aw dimoton sikandin te salà te dowa batà din bayi, aw minikagi sikandin, “Ayas kaw den kesayo lekat dini, so pegbàtan den te Timanem se lonsod seini.” Meneng eden dan aw kebawol din iyan.
494	GEN 19:36	Yan miglaman se didowa batà i Lot pineokit kandin.
498	GEN 20:2	minikagi si Abraham diyà te menge tege Gerara te etebay din se esawa din si Sara. Yan se doun te impeangay si Sara te selotan te Gerara si Abimelec amon inangen din esawa din.
504	GEN 20:8	Pegkeiselem niyan, limapos si Abimelec migtipon te kedita te opisyal din, aw mig-indan sikandin diyà kandan tepad te kedita neinang. Yan ontò dan migpeso.
512	GEN 20:16	Minikagi heman sikandin diyà ki Sara, “Sebad melalan se kwarta plata imbegay ko den diyà te kedowa nikaw. Yan se pengilala amon metaga-taga se kedita te sakop no te wedad salà ko diyà kamno, aw ontò ka den neosayan.”
533	GEN 21:19	Penga niyan, impekità te Timanem se sokian diyà ki Agar. Yan dimoton sikandin, aw inipenò din se sesalok, aw impeinem din se batà din.
537	GEN 21:23	Yan ibeg ko megsapà ka den diyà te Timanem te eked ka palos peg-akal kanak, menge batà ko, aw menge bowad-bowad ko. Gayed mèpiya se ininang ko diyà kamno, aw yan pegpakang ka den te gayed mèpiya se inangen no diyà kanak aw menge doma otaw eg-ogpà dini te tanà inogpaan nikaw.”
538	GEN 21:24	Minikagi si Abraham, “Yan se ipakang ko den diyà kamno.”
545	GEN 21:31	Yan se doun te iningedanan se ogpeanan sìyan Berseba (kelebadan niyan, sokian te pakang), so migpepekangay dan kidoen.
566	GEN 22:18	Tebangan ko se kedita te otaw te keneyonan pineokit te bowad-bowad nikaw. Yan se inangen ko, so timolò ka te impunù ko kamno.”
571	GEN 22:23	(Si Betuel se amay i Rebecca.) Yan se ngadan te walo batà i Nahor timebaw diyà ki Melca nayi i Abraham.
592	GEN 23:20	Yan se indan tepad te pegpenig-apò i Abraham te tanà aw ilib ininang din lebenganan tapay tinig-apò te tege Heti.
619	GEN 24:27	Minikagi sikandin, “Iduyun se Timanem egseligan te amo ko, so keseligan sikandin, aw tinoman din se pakang din diyà te amo ko. Yan inelladan a din amon mekepantek a doton te balay te menge kedomaan te amo ko.”
632	GEN 24:40	“Timaba sikandin, ‘Doen anghil ipetaking kamno te Timanem gayed ko egtoloen, amon metoman se tod nikaw doton. Yan mekeabat ka te bayi pengognanen te batà ko doton te menge kedomaan ko, sìyan menge bowad-bowad te amay ko.
638	GEN 24:46	“Ayas din insawol se tibod tiniang din, aw minikagi sikandin, ‘Inem ka den, aw somalok a heman te wayeg inemen te menge kamilo nikaw.’ “Yan mininem a, aw impeinem din heman se menge kamilo ko.
659	GEN 24:67	Inibing i Isaac si Rebecca doton didalem te tolda tapay inogpaan te inay din si Sara. Pinengognan din si Rebecca, aw ontò dakel se pedowan i Isaac diyà kandin. Yan nesinalay si Isaac tepad te pegkematay te inay din.
669	GEN 25:10	Yan se tanà tapay bineyadan i Abraham diyà te menge tege Heti. Yan se linebengan dan ki Abraham sipat te esawa din si Sara.
675	GEN 25:16	Yan se menge batà i Ismael, aw neinang dan datò te sempolò teg dowa pongan. Yan heman se in-ingadan te menge lonsod aw ogpeanan dan.
689	GEN 25:30	Minikagi sikandin diyà ki Jacob, “Begayi a den te melalag sabaw sìyan, so ontò a binallos.” (Yan se doun te doen doma ngadan i Esau si Edom, kelebadan niyan, melalag.)
692	GEN 25:33	Minikagi si Jacob, “Eked a pemegay kamno singed aw onà ka megsapà.” Yan migsapà si Esau te ibegay din diyà ki Jacob se ontong ibegay te amay dan diyà te penganay batà din.
693	GEN 25:34	Penga niyan, nemegay si Jacob diyà ki Esau te pan aw sabaw te temboway melalag. Kimaen si Esau aw mininem. Penga niyan, nesayo sikandin. Yan mig-aneng-aneng sikandin te wedad elagà te ontong ibegay te amay din diyà te penganay batà din.
695	GEN 26:2	Yan se dinotonan din, so tapay migpekità se Timanem diyà ki Isaac, aw migpunù sikandin, “Ikà egdoton te Ehipto. Peg-ogpà ka doton te tanà tedoan ko kamno.
699	GEN 26:6	Yan mig-ogpà si Isaac doton te Gerara.
702	GEN 26:9	Yan impeangay din si Isaac, aw minikagi sikandin, “Esawa no kedì sikandin. Nengà lay minikagi ka te telekedowa kaw?” Timaba sikandin, “So mig-aneng-aneng a te imetayan a aw mikagi a te esawa ko sikandin.”
708	GEN 26:15	Yan se doun te binonbonan dan se kedita te sokian tapay binengbangan te menge sineligan te amay din si Abraham te wedà pa sikandin kematay.
710	GEN 26:17	Yan nesayo si Isaac, aw minalin doton te baog te Gerara, aw mig-ogpà sikandin kidoen.
713	GEN 26:20	Meneng migpedindilay se menge telediyaga tege Gerara aw menge telediyaga i Isaac, aw minikagi se menge tege Gerara, “Kenami se wayeg sìyan.” Yan se doun te iningedanan i Isaac se sokian sìyan Esek (kelebadan niyan, dindil), so migpedindilay dan kidoen.
720	GEN 26:27	Minikagi si Isaac, “Kedengan neopal kaw diyà kanak, aw impekesayo a niyo. Yan nengà lay dimini kaw den kanak?”
721	GEN 26:28	Timaba dan, “Dimini kay so netegahan day den te gayed ka egtebangan te Timanem. Yan mig-aneng-aneng kay te mèpiya aw megpesepaay kidon. Ibeg day megpakang ka diyà kenami
742	GEN 27:14	Yan inangay i Jacob se menge kambing aw in-ated din iyan doton te inay din. Mig-elomo sikandin te kànen mèpiya se nanam iling te egkeibegan i Isaac.
751	GEN 27:23	Wedà din kilelai si Jacob so bolbolen se bebenayen din iling te bebenayen i Esau. Yan se doun te timetoo si Isaac migpeketagad te pegtawal-tawal din tepad kandin.
775	GEN 28:1	Yan impeangay i Isaac si Jacob, aw migtawal-tawal sikandin amon mèpiya se ibegay te Timanem diyà kandin. Penga niyan, migpunù sikandin diyà ki Jacob, “Ikà egpengognan te bayi dini tege Canaan.
818	GEN 29:22	Yan migpeinang si Laban te dakel kànen, aw impetanod din se kedita te otaw mig-ogpà kidoen.
824	GEN 29:28	Yan se ininang i Jacob. Penga te sebad simana te peipid sìyan, imbegay heman i Laban se batà din si Raquel diyà ki Jacob amon meinang heman esawa din.
829	GEN 29:33	Todà sikandin miglaman, aw tinebawan heman sikandin te batà meama. Minikagi sikandin, “Binegayan a heman te Timanem te batà seini, so dinineg din te deitek se pedowan te esawa ko diyà kanak.” Yan iningedanan din se batà din ki Simeon (kelebadan niyan, egdineg).
830	GEN 29:34	Todà miglaman si Lea, aw tinebawan heman sikandin te batà meama. Penga niyan, minikagi sikandin, “Kedekelan a den besi te pedowan te esawa ko, so tinebawan a den te telo batà din meama.” Yan iningedanan din se batà din ki Levi (kelebadan niyan, kedekelan).
831	GEN 29:35	Todà miglaman si Lea, aw tinebawan heman sikandin te batà meama. Penga niyan, minikagi sikandin, “Iduyun ko den se Timanem.” Yan iningedanan din se batà din ki Juda (kelebadan niyan, pegduyun). Penga niyan, wedà den sikandin todà pegbatà.
834	GEN 30:3	Minikagi si Raquel, “Ibegay ko diyà kamno se allang ko si Bilha. Layok ka den diyà kandin amon doen peden batà tomebaw diyà kandin pegbetaen ko. Yan doen peden menge batà ko pineokit kandin.”
835	GEN 30:4	Yan imbegay i Raquel se allang din si Bilha diyà ki Jacob amon inangen din esawa din. Pegpeleyokay dan,
837	GEN 30:6	Penga niyan, minikagi si Raquel, “Impelangkaw a den te Timanem. Nenenalan sikandin te pinemoyò ko, aw binegayan a din te batà meama.” Yan se doun te iningedanan din se batà din ki Dan (kelebadan niyan, impelangkaw).
839	GEN 30:8	Minikagi si Raquel, “Kedengan dinaeg a te kakay ko, meneng songkani dinaeg ko heman sikandin.” Yan iningedanan din se batà din ki Neftali (kelebadan niyan, bolaw).
842	GEN 30:11	Minikagi si Lea, “Neidowan a te Timanem!” Yan iningedanan din se batà din ki Gad (kelebadan niyan, neidowan).
844	GEN 30:13	Minikagi si Lea, “Ontò neluba se pedowan ko! Mikagi se menge doma bayi te ontò a neluba.” Yan iningedanan din se batà din ki Aser (kelebadan niyan, keluba).
847	GEN 30:16	Peg-olì i Jacob lekat te pawà te meapon, simongon si Lea kandin, aw minikagi sikandin, “Keilangan lomayok ka diyà kanak kwani delem, so netelaan te batà ta se menge mandragora, aw yan se imbayad ko kamno diyà ki Raquel.” Yan se doun te si Lea se lineyokan i Jacob te delem sìyan.
849	GEN 30:18	Minikagi si Lea, “Mèpiya se ontong imbegay te Timanem diyà kanak, so imbegay ko se allang ko diyà ki Jacob.” Yan iningedanan din se batà din ki Isacar (kelebadan niyan, ontong).
851	GEN 30:20	Minikagi si Lea, “Ontò meelagà se imbegay te Timanem diyà kanak. Na, segmanen a den besi te esawa ko, so enem den se batà din meama timebaw diyà kanak.” Yan iningedanan din se batà din ki Sabulon (kelebadan niyan, sagman).
878	GEN 31:4	Yan intogon i Jacob si Raquel aw si Lea te megkità dan kandin doton te tanà tinonggoan din te menge ayam-ayam.
890	GEN 31:16	Inabat te Timanem se kedakel te keyemanan te amay day, aw kenitadon den iyan sipat te menge batà tadon. Yan keilangan tomolò ka te kedita te impunù te Timanem diyà kamno.”
895	GEN 31:21	Inibing i Jacob se kedakel te kedònan din aw kimadas sikandin. Minatas dan te wayeg te Yofritis, aw migpesalo dan doton te bontod te Galaad.
897	GEN 31:23	Yan impetaking din se menge kedomaan din, aw mig-alaw dan kandin. Penga te pito se aldaw, nekesaeb dan kandin doton te bontod te Galaad.