12	GEN 1:12	Timobò se medita kemolò te tinemunun doen benì, aw medita kemolò te kayo doen pongo. Kinità te Timanem te mèpiya iyan.
29	GEN 1:29	Minikagi heman se Timanem, “Ibegay ko diyà kenyo se kedita te tinemunun doen benì dini te tanà aw kedita te kayo doen pongo amon doen kànen niyo.
41	GEN 2:10	Doen heman wayeg kidoen te Eden gayed eg-elem te tanà te kekeyowan. Doton dibabà te Eden, migsoway-soway se wayeg sìyan, aw neinang iyan olo te epat dakel wayeg.
48	GEN 2:17	meneng ikà egpengaen te pongo te kayo egpemegay te kebiyasa tepad te mèpiya aw medaet. So aw komaen ka kenyan, ontò ka matay te aldaw sìyan.”
62	GEN 3:6	Penga niyan, kimità se bayi te mèpiya kànen se pongo te kayo sìyan, aw mèpiya se bawa niyan, aw mig-aneng-aneng sikandin te mèpiya aw megkebiyasa sikandin. Yan se doun te inabat din se pongo niyan aw kinaen din iyan. Doen heman imbegay din diyà te esawa din, aw kinaen din heman iyan.
64	GEN 3:8	Te kelikit te meapon, minipanaw se Timanem kidoen te kekeyowan. Meneng te aldaw sìyan, pegdineg dan te tegodtod te peg-ipanaw din, mineles dan doton te menge kayo.
73	GEN 3:17	Minikagi se Timanem diyà te meama, “Nenenalan ka diyà te esawa nikaw, aw kimaen ka te pongo te kayo impunù ko kamno. Tandà te salà no sìyan, inangen ko heman medaet se tanà. Keilangan gayed ka megterbaho taman te pegkematay nikaw, amon botong se kànen nikaw.
75	GEN 3:19	Keilangan gayed ka megterbaho lamig peg-etingan ka amon doen tomilles kidoen te tanà lamig molì ka doton te tanà, so yan se linekatan nikaw. Ininang ka lekat te tanà, aw todà ka heman meinang tanà.”
84	GEN 4:4	Meneng si Abel se nemallì te penganay nati te menge karniro din, aw iniyaw din iyan, aw inibing din se melambò onod niyan amon ibegay din iyan diyà te Timanem. Neluba se Timanem ki Abel aw sìyan imbegay din.
85	GEN 4:5	Meneng wedà keluba se Timanem ki Cain aw sìyan imbegay din. Yan ontò neopal si Cain aw timàmod.
106	GEN 4:26	Doen batà meama timebaw diyà te esawa i Set, aw iningedanan din se batà din ki Enos. Nayan, lekat te aldaw sìyan, migtebò se menge otaw migsimba aw migtawal-tawal diyà te Timanem.
142	GEN 6:4	Dalem te aldaw sìyan te pegpengognan te menge sakop te Timanem diyà te menge bayi aw pegbatà dan, aw pengkey pa te pegkepenga niyan, doen menge telandig iningedanan Nefilim. Ontò dan nedengeg gebii, so dakel se nebatog dan.
152	GEN 6:14	Yan peg-inang ka den te arka te mèpiya kemolò te kayo amon doen sekayan nikaw. Peg-inang ka te menge tambì doton te arka, aw pemolit ka kenyan doton didalem aw doton te lowà.
171	GEN 7:11	Peg-apet te enem gatos se omay i Noe, te pitsa sempolò teg pito te ikedowa te bolan te omay sìyan, neowang se kedita te selep doton didalem te dagat, aw neowang heman se kedita te linekatan te odan doton te langit.
197	GEN 8:13	Nayan, peg-apet te enem gatos aw sebad se omay i Noe, te pitsa ono te tagnà bolan te omay sìyan, minuyud se wayeg diyà te tanà. Inabat i Noe se atep te arka amon megpeatap-atap. Kinità din te tabag migkepangkag se tanà.
225	GEN 9:19	Se ditelo batà i Noe sìyan, yan se menge kemonaan te kedita te otaw eg-ogpà dini te keneyonan.
229	GEN 9:23	Penga niyan, nengabat si Sem aw si Japet te penenaktun itaklub kandin. Inewidan dan se taklub diyà te getan dan, aw minipanaw dan te getan te peg-awop dan diyà te tambì din, aw tinekluban dan sikandin. Wedà dan lingì amon eked dan kitai se lawa te amay dan migpetabeg-tabeg.
275	GEN 11:8	Yan tandà te peg-inang te Timanem kenyan, migbilit-bilit se kedita dan doton te kebelad te keneyonan, aw yan limengà dan te peg-inang dan te lonsod sìyan.
276	GEN 11:9	Iningedanan se lonsod sìyan Babel (kelebadan niyan, migkebulung), so ininang te Timanem medita kemolò se kagi te otaw kidoen, aw lekat kidoen binilit-bilit te Timanem se kedita dan doton te kebelad te keneyonan.
295	GEN 11:28	Te wedà pa kematay si Tera, nematay se batà din si Haran doton te Ur, sìyan lonsod inogpaan din doton te Caldea.
321	GEN 13:2	Ontò meyaman si Abram, so medita se karniro din, kambing, aw baka, aw dakel heman se selapì aw bolawan din.
330	GEN 13:11	Yan pinemallì i Lot se kebelad te tanà medapag te wayeg te Jordan, aw minalin sikandin lenged te eglibtakan. Yan se pegpeteniyay te didowa dan.
338	GEN 14:1	Nayan, si Amrafel se selotan doton te Sinar, si Arioc se selotan doton te Elasar, si Cadorlahomor se selotan doton te Elam, aw si Tadal se selotan doton te Goyim. Dalem te pegkeselotan dan, migsebad se epat dan migbolaw diyà te doma lima selotan seini, si Bara selotan te Sodoma, si Birsa selotan te Gomora, si Sinab selotan te Adma, si Semeber selotan te Seboyim, aw sìyan selotan te Bela doma ngadan niyan Soar.
340	GEN 14:3	Migsebad se lima selotan sìyan, aw netipon se kedita te sondalo dan doton medapag te baog te Sidim neinang den songkani Lanaw te Asin.
341	GEN 14:4	Tapay sinakop i Cadorlahomor se lima selotan sìyan dalem te sempolò teg dowa se omay. Meneng pegdateng te ikesempolò teg telo te omay, minato dan kandin.
347	GEN 14:10	Medita se baog-baog kidoen doen koliko te aspalto ontò melemiket. Pegkedaeg te selotan te Sodoma aw selotan te Gomora, kimadas se menge sondalo dan, aw doen nepolotan kandan kidoen te menge baog-baog sìyan, aw kimadas se menge doma sondalo doton te menge bontod.
351	GEN 14:14	Pegketaga-taga i Abram te nedakep se anak din, tinipon din se kedita te sineligan din biyasa eglegamit te kekamang, telo gatos sempolò teg walo se kedita dan, aw mig-alaw dan te epat selotan sìyan taman te lonsod te Dan.
353	GEN 14:16	Neabat i Abram se kedakel te kedònan neagaw dan. Impelowà din heman se anak din si Lot, aw in-olì din diyà ki Lot se kedakel te kedònan neagaw lekat kandin. Impelowà din heman se kedita te bayi aw menge doma otaw nedakep.
354	GEN 14:17	Peg-olì i Abram lekat te pegdaeg din ki Cadorlahomor aw menge doma selotan, simongon se selotan te Sodoma kandin doton te Baog te Sabec (iningedanan heman iyan Baog te Selotan).
356	GEN 14:19	Migtawal-tawal sikandin amon mèpiya se ibegay te Timanem diyà ki Abram. Minikagi sikandin, “Mèpiya se ibegay diyà kamno lekat te Timanem Melangkaw, sìyan mig-inang te langit aw keneyonan.
358	GEN 14:21	Minikagi se selotan te Sodoma diyà ki Abram, “Kamno den se kedakel te kedònan day neabat no lekat te epat selotan mig-agaw kenyan lekat kenami. Olò menge sakop ko se iolì no diyà kanak.”
359	GEN 14:22	Meneng minikagi si Abram diyà te selotan te Sodoma, “Megsapà a den diyà te Timanem Melangkaw, sìyan mig-inang te langit aw keneyonan.
377	GEN 15:16	Penga te peg-ogpà te menge bowad-bowad no doton te doma ogpeanan taman te ikeepat kebelikwat se pamilya megpetondogay, molì dan dini, so gayed dogangan te menge otaw Amori se peg-inang dan te salà igsà keilangan ipelumun ko dan.”
378	GEN 15:17	Pegsallep te aldaw sìyan aw pegkengitngit, tigkan kinità i Abram se iling te depolan minebel aw gansà limegdeg. Minokit iyan diyà te tengà-tengà te lawa te ayam-ayam binekas din.
379	GEN 15:18	Te delem sìyan, migpakang se Timanem diyà ki Abram, kagi din, “Ibegay ko diyà te menge bowad-bowad nikaw se kebelad te tanà seini. Lekat te wayeg doton te Ehipto taman te dakel wayeg te Yofritis, yan se tanà ibegay ko diyà kandan.
391	GEN 16:9	Minikagi se anghil, “Olì ka den doton kandin, aw tolò ka kandin.”
396	GEN 16:14	Yan se doun te iningedanan se selep sìyan Beer Lahai Roi (kelebadan niyan, selep te Timanem doen pedowan egpengità kanak). Kidoen pa songkani se selep sìyan doton te tengà-tengà te lonsod te Cades aw Bered.
409	GEN 17:11	Keilangan megpetolì ka, so yan se pengilala tepad te pakang ko kamno.
411	GEN 17:13	Keilangan tolien se kedita te meama, so pineokit te pengilala sìyan kidoen te lawa niyo, ketegahan niyo te wedad temanan te pakang ko kenyo.
415	GEN 17:17	Limongken si Abraham lamig minapet se olo din diyà te tanà. Nebebayat sikandin, so mig-aneng-aneng sikandin, “Pengkey sebad gatos se omay ko, meneng doen kedì batà ko tomebaw. Pengkey kesyaman se omay i Sara, meneng tebawan kedì sikandin te batà.”
417	GEN 17:19	Meneng minikagi se Timanem, “Esawa no si Sara se tebawan te batà no meama, aw ingedanan no se batà no sìyan ki Isaac (kelebadan niyan, nebebayat). Sikandin aw menge bowad-bowad din se ketomanan te pakang ko te wedad temanan.
421	GEN 17:23	Dalem te aldaw sìyan, timolò si Abraham te Timanem, aw nenolì sikandin te batà din si Ismael, aw kedita te doma sakop din meama, sipat te kedita te allang din, pengkey timebaw kidoen kandin, aw pengkey bineyadan din diyà te doma otaw.
422	GEN 17:24	Kesyaman teg siyam se omay i Abraham te pegpetolì din,
424	GEN 17:26	Dalem te aldaw sìyan, tinolì se didowa dan,
432	GEN 18:7	Penga niyan, kimagnan si Abraham doton te menge ayam-ayam din, aw pinemallì din se ontò mèpiya nati te baka. Imbegay din iyan diyà te sebad sineligan din amon iyawen din iyan aw ilegaen te eked kenamay.
437	GEN 18:12	Yan se doun te nebebayat si Sara diyà te kandin pegkeotawun, aw mig-aneng-aneng sikandin, “Meneng ontò a den lokes, aw ontò den temoay se esawa ko. Menonen se pegdateng te keluba sìyan diyà kanak?”
444	GEN 18:19	Pinemallì ko sikandin amon megtoladà sikandin te menge batà din aw menge bowad-bowad din te keilangan tomolò dan kanak, aw keilangan meg-inang dan te metòlid. Aw yan se inangen dan, tomanen ko se kedita te impakang ko diyà kandin.”
458	GEN 18:33	Penga te pegpebelaw-belaway te Pengolo aw si Abraham, nesayo se Pengolo, aw minolì si Abraham.
459	GEN 19:1	Sìyan didowa memanit nekeonà, yan se anghil. Pegkemeapon, dimateng dan doton te Sodoma. Kidoen si Lot nenenoo medapag te lelebangan diyà te melangkaw kotà nekelibed te lonsod sìyan. Pegkità din kandan, timindeg sikandin aw simongon kandan. Limongken sikandin lamig minapet se olo din diyà te tanà,
465	GEN 19:7	Minikagi sikandin, “Menge sigalak ko, eked iyan kepakay. Ikà niyo eg-inang te medaet sìyan.
466	GEN 19:8	Meneng doen beling dowa batà ko laga wedà pa palos leyoki. Ipelowà ko den dan, aw mepakay kaw meg-inang diyà kandan te pengkey eden se ibeg niyo. Meneng ikà niyo egpeeleg te didowa meama sìyan, so migmemanit dan diyà kanak, aw yan keilangan ipaten ko dan.”
480	GEN 19:22	Meneng kegaen kaw den kadas, so wedad meinang ko singed aw domateng kaw doton.” Iningedanan se lonsod sìyan Soar (kelebadan niyan, deitek), so minikagi si Lot te deitek iyan.
483	GEN 19:25	Pineokit kenyan, nebàtan se dowa lonsod sìyan aw kedita te doma ogpeanan kidoen te baog sìyan. Negelà se kedita te otaw mig-ogpà kidoen, aw nebàtan se kedita te tinemunun kidoen.
484	GEN 19:26	Meneng limingì se esawa i Lot te lonsod tinenanan dan, aw yan nebaloy sikandin asin.
486	GEN 19:28	Migpeatap-atap sikandin doton te Sodoma aw Gomora, aw doton te kebelad te baog sìyan, aw kinità din se ebel minolbo lekat te tanà, iling te ebel te dakel pogon.
487	GEN 19:29	Meneng pegbaet te Timanem te menge lonsod kidoen te baog sìyan inogpaan i Lot, mig-aneng-aneng se Timanem tepad ki Abraham, aw yan impelowà din si Lot amon eked sikandin kegelà sipat te menge doma otaw.
499	GEN 20:3	Meneng migpekità se Timanem diyà ki Abimelec pineokit te tegeinep, aw minikagi sikandin, “Matay ka den tandà te pegpengabat no te bayi sìyan, so tapay doen esawa din.”
510	GEN 20:14	Penga niyan, in-olì i Abimelec si Sara diyà ki Abraham. Doen heman imbegay din diyà kandin, menge karniro, baka, aw allang.
513	GEN 20:17	Penga niyan, migtawal-tawal si Abraham diyà te Timanem, aw pinegolì te Timanem si Abimelec, aw esawa din, aw menge allang din bayi amon todà dan megbatà.
514	GEN 20:18	Pinegolì dan te Timanem, so doen tapay ininang din diyà kandan amon eked dan peglaman tandà te pegpengabat i Abimelec te esawa i Abraham si Sara.
518	GEN 21:4	Pegdateng te ikewalo te aldaw lekat te pegtebaw i Isaac, tinolì sikandin i Abraham iling te impunù te Timanem kandin.
524	GEN 21:10	minikagi sikandin diyà ki Abraham, “Pekeseyowi se allang sìyan sipat te batà din, so eked kepakay aw kebegayan se batà te allang te ketengà te keyemanan nikaw aw matay ka, so keilangan ibegay se kedakel niyan diyà te batà ko si Isaac.”
534	GEN 21:20	Mèpiya se imbegay te Timanem diyà te telaki sìyan. Pegtilles din, mig-ogpà sikandin doton te kebigtilan, aw ontò sikandin metomawan egpemanà.
545	GEN 21:31	Yan se doun te iningedanan se ogpeanan sìyan Berseba (kelebadan niyan, sokian te pakang), so migpepekangay dan kidoen.
546	GEN 21:32	Penga te pegpepekangay dan kidoen te Berseba, minolì si Abimelec aw si Picol doton te tanà te menge tege Filisti.
562	GEN 22:14	Penga niyan, iningedanan i Abraham se bontod sìyan “Timanem se Egpemegay.” Pengkey songkani, doen eg-ikegiyen seini, “Doton te bontod te Timanem, Timanem se egpemegay.”
567	GEN 22:19	Penga niyan, limikò si Abraham aw si Isaac doton te didowa sineligan, aw minolì dan doton te Berseba, aw mig-ogpà dan kidoen.
578	GEN 23:6	“Sir, penenalan ka den kenami. Netegahan day te dakel ka otaw pinemallì te Timanem. Mepakay diyà kenami aw ilebeng no se esawa no dini te ontò mèpiya lebenganan day. Pengkey eden lebengi se pemellien nikaw, meluba se tig-apò memegay kenyan diyà kamno amon doen lebengan no kandin.”
582	GEN 23:10	Kidoen heman si Efron doma te menge tege Heti netipon kidoen te lelebangan te lonsod sìyan, aw dinineg te kedita dan se intaba din diyà ki Abraham,
583	GEN 23:11	“Sir, penenalan ka den kanak. Tiblug ko ibowang diyà kamno se kedakel te pawà ko sìyan sipat te ilib kidoen. Dalem te pegbantay te kedita te doma ko, ibowang ko den iyan diyà kamno amon lebengan no te esawa nikaw.”
585	GEN 23:13	aw minikagi sikandin diyà ki Efron dinineg te kedita dan, “Penenalan ka den te kagi ko seini. Beyadan ko den se pawà no sìyan te kedakel te elagà niyan. Kinewai se ibayad ko, amon doen lebengan ko te esawa ko.”
587	GEN 23:15	“Sir, penenalan ka den kanak. Epat gatos te kwarta selapì se elagà niyan, meneng eked ko iyan pebeyadi kamno so sigalak ki. Tiblug ka den peglebeng te esawa no kidoen.”
588	GEN 23:16	Timandù si Abraham tepad te elagà inikagi i Efron dinineg te kedita te otaw netipon, aw yan pinisar din se epat gatos kwarta selapì, iling te pegpisar te menge tindiro, aw imbegay din iyan diyà ki Efron.
589	GEN 23:17	Pineokit kenyan, nenig-apò si Abraham te tanà i Efron doton te Macpela medapag te lonsod te Mamre. Bineyadan din se tanà sìyan sipat te ilib kidoen, aw kedita te kayo nesakop te tanà sìyan.
590	GEN 23:18	Neinang si Abraham tig-apò te tanà sìyan dalem te pegbantay te kedita te tege Heti netipon kidoen te lelebangan te lonsod sìyan.
594	GEN 24:2	Minikagi si Abraham diyà te pengolo te menge sineligan din, sìyan egpengibing te kedakel te kedònan din, “Soli se belad nikaw diyà te salad te bobon ko amon ketegahan ko te tomanen no se ipunù ko kamno seini.
597	GEN 24:5	Meneng mig-insà se sineligan, “Megmeno a aw eked keibeg se bayi tomaking kanak aw molì a dini? Ibingen ko lay se batà no doton te tanà tinikedowan nikaw?”
606	GEN 24:14	Mikagi a kwani diyà te sebad bayi, ‘Peinemi a bag diyà te tibod nikaw.’ Aw tomaba sikandin, ‘Inem ka, aw somalok a heman te wayeg inemen te menge kamilo nikaw,’ mèpiya aw sikandin se bayi pinemallì no pengognanen i Isaac. Aw meinang iyan, ketegahan ko te netoman den se pakang no diyà te amo ko.”
620	GEN 24:28	Kimagnan se bayi minolì, aw mig-indan sikandin diyà te inay din aw menge kedomaan din tepad kenyan.
623	GEN 24:31	Minikagi si Laban, “Mèpiya se imbegay te Timanem diyà kamno. Taking ka den kanak doton te balay ko. Ikà eg-ogpà dini, so doen tambì impetagad ko den kamno, aw doen heman kelokob te menge kamilo nikaw.”
627	GEN 24:35	Ontò mèpiya se imbegay te Timanem diyà te amo ko, aw migkeyaman den sikandin. Binegayan sikandin te Timanem te medita karniro, kambing, baka, selapì, bolawan, allang, kamilo, aw asno.
628	GEN 24:36	Doen batà din meama timebaw diyà te esawa din si Sara te pegkelokes din. Batà din sìyan se binegayan i Abraham te kedakel te keyemanan din.
630	GEN 24:38	Meneng keilangan lomikò ka doton te menge kedomaan ko, sìyan menge bowad-bowad te amay ko, aw pemellii se bayi doton kandan amon doen pengognanen te batà ko.’
631	GEN 24:39	“Penga niyan, mig-insà a kandin, ‘Megmeno a aw eked keibeg se bayi tomaking kanak aw molì a?’
632	GEN 24:40	“Timaba sikandin, ‘Doen anghil ipetaking kamno te Timanem gayed ko egtoloen, amon metoman se tod nikaw doton. Yan mekeabat ka te bayi pengognanen te batà ko doton te menge kedomaan ko, sìyan menge bowad-bowad te amay ko.
633	GEN 24:41	Meneng aw domoton ka te menge kedomaan ko aw eked dan penenalan kamno, aw temengan dan se bayi, yan wedad keilangan te pegtoman no te pakang no sìyan.’
636	GEN 24:44	aw tomaba sikandin, “Inem ka, aw somalok a heman te wayeg inemen te menge kamilo nikaw,” mèpiya aw sikandin se bayi pinemallì no Timanem, amon doen pengognanen te batà te amo ko.’
644	GEN 24:52	Pegdineg te sineligan i Abraham te inikagi dan sìyan, limongken sikandin aw induyun din se Timanem.
645	GEN 24:53	Penga niyan, inokal din se menge bowang, menge penenaktun, aw selapì aw bolawan, aw imbegay din iyan diyà ki Rebecca. Doen heman menge meelagà imbowang din diyà te kedowa din aw inay din.
646	GEN 24:54	Penga niyan, kimaen sikandin sipat te menge doma otaw timaking kandin, aw minidegà dan kidoen. Pegkeiselem niyan, minikagi se sineligan, “Ibeg ko, mesayo kay den amon molì a doton te amo ko.”
648	GEN 24:56	Meneng minikagi sikandin, “Ikà niyo eg-anggà kenami, so tinoman den te Timanem se tod ko dini. Ibeg ko, mesayo kay den amon molì a doton te amo ko.”
654	GEN 24:62	Nayan, mig-ogpà si Isaac doton te Negeb. Kaling sikandin minolì lekat te kebigtilan te Beer Lahai Roi.
689	GEN 25:30	Minikagi sikandin diyà ki Jacob, “Begayi a den te melalag sabaw sìyan, so ontò a binallos.” (Yan se doun te doen doma ngadan i Esau si Edom, kelebadan niyan, melalag.)
702	GEN 26:9	Yan impeangay din si Isaac, aw minikagi sikandin, “Esawa no kedì sikandin. Nengà lay minikagi ka te telekedowa kaw?” Timaba sikandin, “So mig-aneng-aneng a te imetayan a aw mikagi a te esawa ko sikandin.”
705	GEN 26:12	Te omay sìyan, nenanem si Isaac kidoen, aw minongo iyan te ginatos. Dakel se ginani din so mèpiya se imbegay te Timanem diyà kandin.