23214	MAT 1:1	Un mato Jesucristohuunoa tsain shara tapimai. Ahuun shunifoan aton anufo un mato yoiqui tau huai. Ahuun shuni David yafi Abraham.
23215	MAT 1:2	Abraham facu Isaac ini. Isaac facu Jacob ini. Jacob facu Judá yafi ahuun yorafo ini.
23216	MAT 1:3	Judápan facu Fares yafi Zara ini. Aton ahuari Tamar ini. Fares facu Esrom ini. Esrom facu Aram ini.
23217	MAT 1:4	Aram facu Aminadab ini. Aminadab facu Naasón ini. Naasón facu Salmón ini.
23218	MAT 1:5	Salmón facu Booz ini. Ahuun ahuari Rahab ini. Boozpan facu Obed ini. Ahuun ahuari Rut. Obed facu Isaí ini.
23219	MAT 1:6	Isaí facu David ini. Nan David Israelifoan aton niaifocoin ipaoni. David facu Salomón ini. Salomón ahuafin Uriaspan ahuin ipaoniquin.
23220	MAT 1:7	Salomón facu Roboam ini. Roboam facu Abías ini. Abías facu Asa ini.
23221	MAT 1:8	Asa facu Josafat ini. Josafat facu Joram ini. Joram facu Uzías ini.
23222	MAT 1:9	Uzías facu Jotam ini. Jotam facu Acaz ini. Acaz facu Ezequías ini.
23223	MAT 1:10	Ezequías facu Manasés ini. Manasés facu Amón ini. Amón facu Josías ini.
23224	MAT 1:11	Josías facu Jeconías yafi ahuun yorafo ini. Nantianri Babilonia anoa niaifoan ahuun ranushumuafo nichini Israelifo rutushon atirifi ahuun mai ano ihuushonafoanno ahuun oinmatifo huanon.
23225	MAT 1:12	Chipofin Babilonia anoashu futsafori cainni. Jeconías facu Salatiel ini. Salatiel facu Zorobabel ini.
23226	MAT 1:13	Zorobabel facu Abiud ini. Abiud facu Eliaquim ini. Eliaquim facu Azor ini.
23227	MAT 1:14	Azor facu Sadoc ini. Sadoc facu Aquim ini. Aquim facu Eliud ini.
23228	MAT 1:15	Eliud facu Eleazar ini. Eleazar facu Matán ini. Matán facu Jacob ini.
23229	MAT 1:16	Jacob facu José ini. José ahuin María nan Jesús ahua ini. Jesús Upa Diosin catonni nocon Numamisi inon. Nan non Cristoran huamisi.
23230	MAT 1:17	Abraham ahuun funafo catorce ahuun unutani David ini. David ahuun funafori catorce ahuun unutani Babilonia anoshon ato achinifo ato mai ano inonfo. Nanfoan ahuun funafori catorce ahuun unutani Cristo cainni.
23231	MAT 1:18	Jesucristo cainfin iscaniquin. José María yoini, —Non fiananon, —ishon. Ascafia fiananfotaima María man facu nanua ini. José ayamafian Diosin Yoshin Sharapan nanumana.
23232	MAT 1:19	Ascashon José Dios tanasharacoinshon ahuun chain ahuin rafini huacasmaquin yorafoan ointaifi yoicasmani.
23233	MAT 1:20	Nanscara ahuun nomuranshon shinanfiaino ahuun namapan Diosin ahuun oinmatinin afu nai muran imisi aqui oshon yoiquin isca huani, —José minfin David funaquin. Ascacun shinanchacaquima María fihuu. Nan facu nanuafin Diosin Yoshin Sharapan nanumanaquin.
23234	MAT 1:21	Ascan nan caianofin anuqui Jesusran min huashquicain. Nantonmain ahuun yorafo chaca soashofain ato numashquiamaiton, —ishon yoini.
23235	MAT 1:22	Diosinhuunshon inon pacoai yoimisifoan cununifo cuscan man aaquin.
23236	MAT 1:23	Nanfoan cunuquin isca huani, “Nicapon. Ainfo funuoma tsoa afu iyamafiamisi facu nanushquin. Caianno furonanfacu iishquin. Ahuun anufin Emanuel (Onicoinnin tsainman Diosin nofu icaran) ishquiquin,” ishon Dioshuunshon inon pacoai yoimisi cununi.
23237	MAT 1:24	Ascaino José moinacahuatan nan Diosin oinmatinin afu nai muran imisi yoia cuscan María fiini.
23238	MAT 1:25	Fiifiashocai afu ipaonima furun caiyain chain. Ascashu furun caincun José anuqui Jesusran huani.
23239	MAT 2:1	Ascano Herodes niaifoaitian Jesús Belén anoashu cainni. Nan Belén Judea muran ini. Nantianri fishifohuunoa tapicoianfo fari oaiquirinoashu fucani Jerusalén ano noconifo.
23240	MAT 2:2	Ascano nococashon ato yocanifo, —Raniashumun a facu caianquin Judiofoan aton niaifo ishquiai. Non fishi oianhuunshon non tapia facu caincun. Man nonfin ahuun fishi fari oai aria oianquin. Ascacufin non aqui unimai oaquin. Min nocon niaiforan ishon oinpai non oaran, —ishon ato yocanifo.
23241	MAT 2:3	Ascaifoan nicai Herodes ahuun ointi fucashriscatani. Jerusalén anoa yoraforifi Herodes icai cuscan arifi muunifo.
23242	MAT 2:4	Ascacun ahuun yorafohuunshon Diosin cufimisifoan niaifofo yafi Moisés cununi cuscan tapimamisifo Herodes ato yoimaquin isca huani, —Uqui fucahuun, —ishon ato yoimanano aqui fuaifoan ato yocaquin —¿Raniashumun Cristo cainshquiquin? —ishon Herodes ato yocani.
23243	MAT 2:5	Ascaiton cumacaquin, —Belén Judea murannoashu cainshquin, —nannori Diosinhuushon inon pacoai yoimisifoan cunuquin isca huani.
23244	MAT 2:6	“Belén anoafoan ua nicasharacahuun. Maton mai Judea muran. Maton pushu ichapayamafiano nannoashu niaifo uhuapacoin cainshquin. Uhuun yora Israelifoan aton cushumisi iishquiran,” icashu cununi.
23245	MAT 2:7	Ascacun Herodes a fishifohuunoa tapicoianfo tsoa yoitama tsain ato fomaquin isca huani, —Fucahuun. Un matofu tsainon, —ishon ato yoimani. Ascano nocotoshiaifoan ato yocaquin, —¿Ahuutianmun man fishi oinquin tau huaquin? —ishon ato yocaiton. Tapimanifo ahuutianmain oinqui tau huafoquin.
23246	MAT 2:8	Ascashon aton yoini, —Belén ano focashon facu funatacahuun. Fuchicashon nasofuratan ua yoi fuushcaquin. Urifi un ahuun noicanon, —ishon Herodes ato yoini.
23247	MAT 2:9	Ascano niaifoan ato yonoa cuscan nicatan fishifohuunoa tapicoianfo fonifo. Focaquin oianfo fishi fari oaiquirinoashu oaiton oincani unimacoinnifo. Ascatan muufocaquin oianfo facu raca manaon nituni.
23249	MAT 2:11	Ascaiton oincani pushu muran iquifainshon facu yafi ahua María fuchinifo. Ascashon ratoconun mai chachishon facu yoinifo isca huaquin, —Minfin fasi sharashtacoinquin. Min nocon Ifo, —ishon yoinifo. Ascacatan aton mao fupucashon ahuara chicoin inancoinnifo. Oro inanfain ahuun ininti shara inanfain ininti sharacapa futsa ahuun anu mirra nanri inannifo.
23250	MAT 2:12	Ascashu nanno oshayoafoan aton namapan Diosin ato yoiquin isca huani, —Afanan Herodes ari foyamacahuun. Fai futsan mato mai ari fotacahuun, —ishon Diosin ato yoini. Ascacucai Jerusalén ano fonifoma.
23251	MAT 2:13	Man fishihuunoa tapicoianfo atomaquinoashu foafono Diospan oinmatinin afu nai muran imisi José ahuun namapan yoiquin isca huani, —Funinaca huahuun. Nan facu yafi ahua Egipto ano iyoriscatahuun. Ascashu nanri iyohuu nan un mia afanan yoiaitian. Nan Herodes facu funaiqui rutushquin, —ishon Diospan oinmatinin José yoini.
23252	MAT 2:14	Asca huaino moinacahuatan facu ahua futan yamu Egipto ano ichoquinifo.
23253	MAT 2:15	Ascashu nanno iyopaonifo nan Herodes naitian. Ascacun Diosihuunshon inonpacoai yoimisiton cunushoni isca huaquin, “Unfin uhuun facu Egipto anoa afanan yoimanicain,” ishon yoini cuscacoin man aaquin.
23254	MAT 2:16	Ascano fishihuunoa tapicoianfo fai futsan foafo nicai, —Ua paraforan, —icashu Herodes fasi sinacoinni. Nan fishifohuunoa tapicoianfoan yoiafo man fari rafu caano fishi oinquin tau huafo. Ascacun Herodes ranushumuafo yononi, —Belén anoafo yafi a chaima icafoan aton furonanfacufo fari rafu yafo non yomumishti rutuqui cuyotacahuun, —ishon ato yononi.
23255	MAT 2:17	Ascano “Ato nicafo Ramá anoashu uaicani aton facuhuunoashu uaiyanan shorarascaifoan nicacaquin. Aton ointi main huamapaicaquin, ‘Uaiyamacahuun,’ ato huafiainfono aton facu manocani unupainifomaran,” ishon Jeremías Diosihuunshon inonpacoai yoishomisiton cununi cuscacoin man aaqui.
23258	MAT 2:20	—Moinacahuahuu. Facu yafi ahua afanan Israelifo muran ato nasoquishquin. A facu rutupaimisifo man naafoquin, —huani.
23259	MAT 2:21	Ascaino moinacahuatan José ahua yafi furun Israeli mai ano afanan ato iyoni.
23260	MAT 2:22	Caaquin nica Herodes man naano ahuun facu Arquelao Judea murannoa niaifo nicai José musuni. Ascaiton Diosin oinmati afu nai muran imisiton afanan ahuun namapan yoini, —Judea muran caquima futsanori catahuun, —huani. Ascano Judea muran catama Galilea anori fonifo.
23261	MAT 2:23	Ascashu Nazaret pushurasi muran fonifo. Diosihuunshon inon pacoai yoimisiton nannori cunuquin isca huani, “Cristofin Nazarenon ishquiquin,” ishon cununi.
23262	MAT 3:1	Ascatan man fari ichapa finoanno nan Juan yorafo unu muran iquimamisi tsoa istaipama Judea ano cani.
23263	MAT 3:2	Ascano nannoshon ato yoiquin isca huani, —Nantifi yorafoan ua nicacahuun. Maton chaca shatucoincashon Diosin tsain nicacoincahuun. Samamashta Diosin mato yonoshqui oiquin, —ishon Juanpan oi ashcafinin ato yoini.
23264	MAT 3:3	Nan Isaías Diosihuunshon inon pacoai cuscan yoimisi ipaoni. Nanton Juanhuunoa yoini isca huaquin, “Tsoan istaipamashon Diosin yonoa cuscan oi ashcafinin yoiquin isca huanonpacoin, ‘Nocon Ifo nocoqui ooshquin. Ascacun itisharacahuun. Maton chaca shatucoincahuun,’ ” ishon Isaías Juanhuunoa cununi.
23265	MAT 3:4	Ascano camello inapan ahuun rani sahuuti huashon Juanpan sahuua ini. Ascashon yoina fichin aqui nanushumuni. Ascatan ocutsuru pifain afuchi fona ayani.
23266	MAT 3:5	Ascano Jerusalén anoafo yafi unu Jordán ano icafo non Judea muran icafori ahuun tsain nicapaicani aqui funifo.
23267	MAT 3:6	Ascashon aton chaca shatupaicaquin yoiaifoan Juanpan unu Jordán muran ato iquimapacuni afanan ipaoni cuscan huatama ismanonfo.
23268	MAT 3:7	Ascaino Fariseofo yafi Saduceofo Juanqui funifo yorafo ato unu muran iquimanaiton oin fucani. Nanfori Israelifo ini. Ascaiton oinquin Juanpan ato yoini isca huaquin, —Manfin rono paupaton facu cuscaracoinfoquin. Icoinra huayamaifoan Diosin atoqui sinaquin ato omitsiscapanonfo. Ascan manfin omitsiscapanacafo muran focasmafiaqui maton chaca man shatupaima.
23269	MAT 3:8	Ascacun chaca shatucoincashon Diosin mato yoia cuscan nicacoincahuun. Man ipaoni cuscari afanan ayamacahuun. Man ascaiton yorafoan ointirofo man afanan chaca huapaitama Dios fusti man tanasharaiton.
23270	MAT 3:9	Ascashon maton nomuran shinanquin isca huayamacahuun, “Nonfin Abraham funafo non ahuun caiforiquin. Diosin Abraham yoiyotiani cuscan nocorifi ashotiro. Ascan Diosin noco onaintimashquimaran,” ishon anori shinanyamacahuun. Diosin onihuapaiquifin na unu cusumunnoa toquirifo Abraham ahuun funafo oni huatiroquin.
23271	MAT 3:10	Fana fimi sharayamaiton ifoan ahuun tapo nantifi ruratinin shatuquin cuyoshon chi muran potatiro coi futsunon. Nanscarifiai natianri Diosin man itishara chaca shatutama man isharayamacaiyaiton mato omitsiscamapacushquin.
23272	MAT 3:11	Ascacun un mato unu muran iquimapacua maton chaca shatucoinshon natian Diosin tanasharashon man ismanon. Ascafia futsa matoqui chipo oi. Naantofin ua fasi finoncoianquin. Ahuamamishti huatiro. Nantorifi ahuun Yoshin Shara mato ya rafumapacunaca. Ascano ahuunshon maton nomuran man shinansharanon. Matofu rafuano nantifi ahuara chacafo ahuunshon shatuashu a cuscara shara man inon. Ascan uncai a cuscarama. Un ahuara shara huahuu rafanancai un ahuun oinmatima. Ascatama uhuun ramapaiyamainoricai un ahuun oinmati icuanama.
23273	MAT 3:12	Ascano naantorifi chipo a icoinra huafo yafi a nicacasmaifo ato pashcanan huaashquin. Nan icoinra huafosi a icari ato ihuicoinshquin afu isharapacushanonfo. Ascan nan nicacasmamisifo chi urumanhuan muran ato potai anoashu omitsiscai unupacunacafomaran, —ishon Juanpan nan Fariseofo yafi Saduceofo yoini.
23274	MAT 3:13	Ascaino Jesús Galilea anoashu unu Jordán ano cani. Nan Juanpan ato unu muran iquimana nanno cani naanrifi iquimanon.
23276	MAT 3:15	Jesús cumani, —Upa Diosin noco yonoa cuscan fusti nantifi non aca shara itiro. Ascan natian ua iquimahuu, —huaiton. —Ascan min ua yoiai cuscan un mia unu muran iquimairan, —ishon Juanpan yoini.
23277	MAT 3:16	Asca huatan Jesús unu muran iquimana cainna cahuan mapuinifoanni. Ascatapaiyaino Dios ica ariashu nai fupuini. Nai fupuicaino Diospan Yoshin Shara ruhui cuscara Jesusqui fotopacu cahuani.
23278	MAT 3:17	Ascano nanno niafoan nai murannoa Upa Diosin ahuun oi nicanifo yoiquin isca huaiton, —Nan uhuun Facu un catoan. Un fasi ahuun noi. Un fasi aqui unimacoinran, —ishon Apa Diosin yoini.
23279	MAT 4:1	Ascano Jesús Diosin Yoshin Sharapan tsoa istaipama ano iyoni. Nannoshon nan yoshin chaca Satanás cuarenta oshatan chaca huamapaifafainni.
23280	MAT 4:2	Nan cuarenta oshatan piqui tununi. Ascashu fasi fonaincoinni.
23281	MAT 4:3	Ascaino nan yora chaca huamapaimisi aqui nocoshon yoini isca huaquin, —Min Diospan facumainquin na toquirifo misi onihuahuu, —ishon Satanás yoiaiton.
23282	MAT 4:4	Jesús cumani, —Noncai misi fustihuunoashu ipatiroma. Diosin tsain fusti non yopacoin. Nan noco yoia cuscan fustihuunoashu non isharatiroquin, —huaiton.
23283	MAT 4:5	Nicaquin Satanás Jesús Jerusalén pushurasi shara Diosin ahuun yorafofu imisi ano iyoni. Nan Israelifoan aton Diosfu tsainti pushu pumancaya cuyacoin iyoshon yoiquin,
23284	MAT 4:6	—Minmain Diospan facuquin nuriashu pacucaintahuun. Diosin tsain mihuunoa cununi isca huaquin, “Diosifin ahuun oinmatifo afu nai muran icafo yonoiquin min pacuaiton mia cushunonfo. Min tauri toquirifoquin rutunonma mia achinonfo,” nannorifi Diosin tsain mihuunoa cununiquin, —ishon Satanás yoiaiton.
23285	MAT 4:7	Afanan Jesús cumani, —Ascafia Diospan tsain cununiri isca huaquin, Ahuara musunicoin huaquin shinanyamacahuun uatsi Diosin cushuiquin ishon. Ascacun asca huayamahuu ishon cununiran, —Jesús huani.
23286	MAT 4:8	Ascaiton afanan Satanás Jesús machi cuyamamaquin iyoshon nan manifoti sharashtacoin oinmani.
23287	MAT 4:9	Ascashon yoini, —Oinpon Mian ratoconun mai chachishon ua yoiquin, “Minfin uhuun Ifoquin,” mian huaitofin nan na maitio un mia inantiroquin, —ishon yoiaiton.
23288	MAT 4:10	Afanan Jesús cumaqui, —Diospan tsain cununiri “Nan nocon Ifo Diosin fustifin non ratoconun mai chachishotiroquin. Nan fustimain nocon Ifocun,” ishon cununi. Ascan umaquinoashu cariscatahuun Satanás, —ishon Jesús yoini.
23289	MAT 4:11	Asca huaino Satanás Jesusmaquinoashu caino Diosin ahuun oinmatifo afu nai muran icafo aqui fotonifo pimashcaquin.
23290	MAT 4:12	Ascashu nan Juan ranushumuafoan cunu muran iquimanafo nicatan Jesús Galilea ano nasoni.
23291	MAT 4:13	Nan Nazaret anoashu pushconi. Nannoashu Capernaum ano cani atofu iyoicai. Nan Galilea ian cusumunri Capernaum ini. Nannori mani rafutan ato mai Zabulonfo yafi Neftalifo icafo.
23292	MAT 4:14	Jesús nanno inon pacoai cuscan nan Isaías inon pacoai yoimisiton ahuunoa cunuquin isca huani, “Zabulonfo yafi Neftalifo Galilea ian ano icafo. Nanno aton mai. Unu Jordán ocuma futsa. Nannori Dios icoinra huamafo atofu icafo. Ascashu nanfo faquish muran ica shinantsafo. Ascafia samamashta oianfo shafariscatani cafiscashqui. Nanscarifiai numamisimaisi omitsiscapanacafo muran focuanafo. Ascacun Cristo atoqui nocorisca ato numashquiran,” icashu atohuunoa cununi.
23295	MAT 4:17	Nannoshon Jesús ato yosiquin tau huaquin isca huani, —Nocon Ifo Diosin matoqui samamashta nocoyoi. Ascacun maton chaca shatucahuun. Chaca huatamarocon Diosin tsain nicacoincahuun, —ishon Jesús ato yoini.
23296	MAT 4:18	Ascano ato yoitan Jesús ianmanhuan cusumun cani. Caquin Simón chipocu Andrés futan nushutinin nushuaifoan ato ointoshini. Nan Simón ahuun anu futsa Pedro. Nan rafutafin nushumisicoin inifoquin.
23297	MAT 4:19	Ascaiton ato yoiquin, —Ufu fucahuun. Manfin nushumisicoinquin. Man shiman ichaparasi nushutinin fia cuscan natian man uqui yora ichapa ihuushqui un aton Ifo inon, —ishon Jesús ato yoini.
23298	MAT 4:20	Ascaino nushuti huafaicani afu fonifo.
23299	MAT 4:21	Ascashu chaimashta catan Zebedeo facu rafuri fuchini. Nan rafuri nanu rafu Santiago yafi Juan. Nan rafutan apa futan shasho naquishon nushuti icushaifoan atori yoini, —Ufu fucahuun, —ato huaino.
23300	MAT 4:22	Samamashta apa shasho naqui nichifainifocani afu fonifo.
23301	MAT 4:23	Ascatan afu foafoanno nantishon Galilea ano cahuancacaiquin. Judiofoan ichananti pushu muranshon Jesús ato Apa Diosin tsain shara yoiquin isca huafoanfafaini, —Itisharacahuun. Upa Diosin mato iquishquin oiran, —ishon ato yoifoafafaini. Ascashon pau futsa futsatapafoan icaifoan ato caya huamani.
23302	MAT 4:24	Ascaiton Siria mai anoafoanri ahuunoa nicacashon isinincaifo aqui ihuunifo ato cayahuamapacunon. Ascashon isipaunun icaiton caya huamafain yoshin chaca atomaquinoa potafain nisofori caya huamafain yoratisho charishi futsuari caya huamapaoni. Nantifi ato caya huamapacuni.
23303	MAT 4:25	Ascaiton yorafoan mufainifo. Atirifi Galilea anoashu fuaino atirifi Decápolis anoashu fuaino atirifi Jerusalén anoashu fuaino atirifi Judea anoashu fuaino atirifiri unu Jordán oquirinoashu fucatan Jesús mufainifo.
23304	MAT 5:1	Yorahuanrasi aqui fuaifoan oin Jesús mapufaintan machi pochinin tsaoni. Nanno tsaoano ahuunshon tapiafo a shinain caiton noco yosiquin isca huani.
23306	MAT 5:3	—Tsoa futsan aton nomuran shinanquin isca huai, “Uficai un isharatiroma. Un Dios yopacoinran,” icaiton Diosin ato unimamashquin. Ascashu uhuun Upa Diosin niaifo ano afu ipatirofoquin.
23307	MAT 5:4	Ascan tsoara futsa uaiquin omitsiscafiashu chipo unimatiro. Diosin atohuun ramapaiquin aton ointi main huamatiro.
23308	MAT 5:5	Cacapaimisi itamarocon futsa ahua huamisima. Mato ahuun nomuran shinanquin isca huai, “Ufi apaiyai cuscan atama Diosin ua amapaiyai cuscan fusti un atiroran,” ishon shinanfafainaiton Diosin ato unimamatiro. Nan cuscarafo Diosin yoiyotiani cuscan ato inanshquin. Diosin icano arifi afu inonfo. Ascashu nantifi ahuunari atonari iishquin.
23309	MAT 5:6	Ascan nan ratoranfo Diosifu ipaiquin ahuun tsain tapipaiquin finaifo a cuscara shara iishcaquin. Nan cuscarafoan fuchipaiyaifo cuscan Dios ato imatiro a cuscara shara inonfo.
23310	MAT 5:7	Ascan nan futsafohuun ramapaiquin ato shara huaiton Diosin man tapia. Ascacun nanrifi ahuun ramapaiqui a shara huashopacunaca arifi unimanon.
23311	MAT 5:8	Ascan nan Dios fusti tanasharashu ahuun nomuran shinansharamisi. Nan cuscarafoan chipo Dios ointirofo. Ascaiton Diosin ato ointi unimamashquin.
23312	MAT 5:9	Ascan tsoan nan noicasmatanainfoan ato raunan huaino afanan rau huantananfo. Nan cuscarafo Diosin yoiquin, isca huaqui, “Min uhuun facuran,” ishon ato yoiaino fasi unimacoinshcani.
23313	MAT 5:10	Tsoa Diosin yonoa cuscan aiton futsafoan omitsisca huafiainfoan tunua. Nan cuscarafo Diosin ato unimamashquin. Ascashon nan Diosin niaifo icariafo nanfori atona iishquin.
23314	MAT 5:11	Ascan futsafoan uhuunshon mato roaquin omitsiscamafain matohuunoa chani futsa futsatapafo yoifiaifoanno shinanchacayamacahuun. Mato omitsisca huaifo cuscan mato shunifori nan Diosin tsain yoimisifo omitsisca huapaonifo. Ascan man uhuunoashu omitsiscafiashu Upa Diosiqui man nocoaitian fasi sharacoin mato imashquin man afu ipashanon. Ascacun unimacahuun.
23316	MAT 5:13	Ascan manfin nan nuno mai anoa sao cuscaraquin. Nami saomua shara payocotiroma. Nanscarifiai yora chacafo muran ishon marifi man ato shinanmasharatiro chaca huanonfoma. Ascan nami saomuamacai shara itiroma. Paismacoin itiro. Ascafia afanan nami shara iyamainoricai saori shara itiroma. Afanancai ahuashta itiroma. Nanscara non potatiro puamanonfo. Nanscarifiai afanan man ua tanasharayamainocai matohuunshon tsoan ato chaca shatutiroma isharashquin. Man ua tanasharayamashu man funocointiro.
23317	MAT 5:14	Ascafia manfin nan manifoti ato chasha cuscaraquin. Machi cuya mamaquinoa pushurasi fasi chaicushon shafacafi ointirofo. Onucai atiroma. Nanscarifi aquin man ua tanasharaino mato oinquin matohuunshon ua icoinra huatirofo shafacafi iishcaquin.
23318	MAT 5:15	Nanscarifi aquin tsoancai faquishiano oinpaifiaquin lamparina tapa camaqui otashon cutipan fupomisima. Ascatamarocon otashon tapa camaqui huatiro shafacafi tsaocun pushu muran iquicaquin oinsharanonfo.
23319	MAT 5:16	Ascacun nantifi yorafo shara huacoincahuun. Man ato shara huai cuscan oinquin shinantirofo isca huaquin, “Diospan yorafoan fasi noco shara huafafaincani. Apa Diosin ato yosisharamisi. Asca aton Upa Dios fasi sharacoinran,” ishon shinantirofo. Anori shinancaquin maton Upa Dios nai muran ica yoitirofo isca huaquin, “¡Aicho! Upa Diosin tsoa futsacai mia cuscara sharama. Min nantifi finoncoianran,” ishon yoishquicani. Afanan yoitiro isca huaquin, “Dioshuunshon noco shara huashomisifo. Ascan aton Dios sharacoinran,” ishon yoishquicani.
23320	MAT 5:17	Isca huaquin man shinan raca, “Moisés Diosin yononi cuscan cunushoni yafi Diosin tsain yoimisi futsafoan cununi cuscari nanfo Jesús noco nicamapaima. Nanfo noco potamapairan,” ishon raca man shinan. Anori shinanyamacahuun. Uncai Moisés yafi Diosin tsain yoimisi futsafoan cununi cuscan potapaiquimarocon man cununifo cuscan un huamashquin un oa.
23321	MAT 5:18	Un mato shafacafi yoi. Diospan tsain cunushoni cuscan nannorifi Diosin yonoi. Ato yonoquin cunushopaoni cuscan nan fustishtacai funopacunacama. Nai yafi maitio cuyoyamainon nanscasi apanaca ahuun tsainri inonpacoai cununshoni cuscan nantifi fustishtacai cuyopacunacama aqui tau huani cuscan.