1	GEN 1:1	Mugamugau sibuna, Urana tongtongia sabaluna xaung titi.
2	GEN 1:2	Titia babung te, xola mana axamang tela. Labiana kaukau miawa ubuna, saing Urana Aningonoa tangaxa etuaʼm tek ubuna.
3	GEN 1:3	Baing Urana harua ba, “Lulianoa sok,” baing luliana sok.
4	GEN 1:4	Urana bagu ba luliana xai. Baing hata luliana xaung labiana.
5	GEN 1:5	Urana uxu luliana ba, “Xaidap,” saing uxu labiana ba, “Yambong.” Tauna, yambonga ila sup, buraragina sok—xaidap taininauba.
6	GEN 1:6	Baing Urana harua ba, “Ganangana sok lia mana langa bu hata langdi.”
7	GEN 1:7	Baing Urana tongtongia ganangana saing hata lang hawama xaung lang etuama. Sok bila ba.
8	GEN 1:8	Urana uxu ganangana ba, “Sabaluna.” Tauna, yambonga ila sup, buraragina sok—xaidap luwauba.
9	GEN 1:9	Baing Urana harua ba, “Langa wa hawa sabalunia gugunia mana long taininau bu long mamasana sok.” Baing sok bila ba.
10	GEN 1:10	Urana uxu long mamasana ba, “Titi,” saing uxu lang guguniangama ba, “Tek.” Baing Urana bagu saing yaha mana.
11	GEN 1:11	Baing Urana harua ba, “Titia libu axamang xangxana disok: angingadi xaung xuyadingdi, xaung xaidi xaung maradingdi, taining tainina disu mana xadingdi.” Baing sok bila ba.
12	GEN 1:12	Titia libu axamang xangxana disok: anginga xaung xuyadingdi, xaung xaidi maradingdi, taining tainina disu mana xadingdi. Baing Urana bagu ba xai.
14	GEN 1:14	Baing Urana harua ba, “Luliandi disok sabalunia bu dahata xaidap xaung yambong. Namuxidingdi bing dahatanga nianigesakdi xaung xaidapdi xaung nianidi.
16	GEN 1:16	Baing Urana tongtongia luliang sabanga luwa, luliang sapsambagiak wasa mana xaidaba xaung luliang kaxukana wasa mana yambonga. Tongtongia hatungdi xauna.
17	GEN 1:17	Baing Urana tadi sabalunia bu disaxaxanga titia,
18	GEN 1:18	duwasa mana xaidaba xaung yambonga, xaung bu dahata luliana xaung labiana. Baing Urana bagu ba xai.
20	GEN 1:20	Baing Urana harua ba, “Tega baxagi mana asaxa walingam xangxana. Mangdi disok doti makisi sabalunia etuaʼm titia.”
21	GEN 1:21	Binabu Urana xap masok asaxa tekkam sabangadi xaung asaxa tekkam xangxang teladi dibaxagi mana tega, disu mana xadingdi, xaung mang xangxana, disu mana xadingdi. Baing Urana bagu ba xai.
22	GEN 1:22	Baing Urana sina guxama nadi. Harua ba, “Axapsaxi asok xumana saing abaxagi mana tega. Mangdi xauna disok xumana titia.”
24	GEN 1:24	Baing Urana harua ba, “Asaxa xangxana disok titia, disu mana xadingdi: morudi, asaxadi dahaxa mua titia, xaung abungindi, disu mana xadingdi.” Baing sok bila ba.
25	GEN 1:25	Urana tongtongia asaxa abunginadi disu mana xadingdi, xaung asaxa longgalo dahaxa mua titia, disu mana xadingdi. Baing Urana bagu ba xai.
26	GEN 1:26	Baing Urana harua ba, “Tatongtongia lipudi disok bila kira sibura li. Bing duwa etua mana song tekkamdi xaung mang sabalunamdi, etua mana morudi xaung titi longgalo xaung axamang longgalo dahaxa mua titia.”
27	GEN 1:27	Binabu Urana tongtongia lipudi disok bila ing sibuna, maxuna, tongtongiadi disok bila ina, tongtongiadi lup haing.
28	GEN 1:28	Baing Urana sina guxama nadi. Harua ba, “Axapsaxi asok xumana. Abaxagi mana titia saing awa etua mana. Awa etua mana song tekkamdi xaung mang sabalunamdi xaung asaxa longgalo dahaxa mua titia.”
29	GEN 1:29	Baing Urana harua ba, “Bagu ngasina anginga xuyanam longgalo duwa titia nang xaung xai maranam longgalo nang. Bagula duwa angiaimdi.
31	GEN 1:31	Urana bagu axamang longgalo tongtongiadi, saing xai sibuna. Tauna, yambonga ila sup, buraragina sok—xaidap tuwa tuwauba.
32	GEN 2:1	Baing ina naga, Urana tongtongia sabaluna xaung titi masup, xaung axamang longgalo duwa maluxu manadi.
33	GEN 2:2	Xaidap 7 Urana bagu oxatandi tuxudi ba disup, baing yagua mana xaidapka 7 mana oxatandi.
34	GEN 2:3	Binabu Urana sina guxama mana xaidapka 7, mogu maina, namua na xaidapka yagua mana oxatang longgalo tuxudi bungina tongtongia axamandi.
35	GEN 2:4	Naxuyanga li baxanga bungina sabaluna xaung titi disok, bungina Toxoratamona Urana tongtongia titia xaung sabaluna.
36	GEN 2:5	Muga bing xai xaung tatubang disok teguyu, namua na Toxoratamona Urana sina kuya mari titia teguyu saing lipu tela wa teguyu bu tuxu oxatua titia.
38	GEN 2:7	Baing Toxoratamona Urana tongtongia lipua mana titi gagabinoa. Yubua yang walingama maluxu yungxang gininginia, saing lipua sok lipu walingama.
39	GEN 2:8	Baing Toxoratamona Urana tongtongia umanga tela sanga karagia, mana long tela yanoa Iden. La ba ta lipua tongtongia ba.
40	GEN 2:9	Baing Toxoratamona Urana libu xai xangxana disok titia, bagungadinga (da)xai sibuna xaung daxai mana xangingua. Maluxu mana umanga baguba xai luwa duwa: xaiya sina walinga xaung xaiya sina xabianga mana xai xaung diana.
46	GEN 2:15	Toxoratamona Urana xap lipua saing ta umangia Iden bu tuxu oxatua titia saing wasa mana.
47	GEN 2:16	Baing Toxoratamona Urana bili lipua ba, “Ung sanga ba oxong xai marang longgalo umangia li,
49	GEN 2:18	Baing Toxoratamona Urana harua ba, “Xai te mana lipua ing ganina wa. Bagula ngatongtongia rianoa bu sok haulinganoa.”
50	GEN 2:19	Muga Toxoratamona Urana xap titia saing tongtongia asaxa xaung mang xangxana masup. Tauna, xapdi ma rangua lipua bu lungu yaya baru bagula uxudi. Baing baru yanta lipua uxudi bing ding yadingdi.
52	GEN 2:21	Binabu Toxoratamona Urana libu lipua kinu hadali. Kinuyu, baing xap rubing tela saing usiti yabanoa muli sanggia.
53	GEN 2:22	Baing Toxoratamona Urana tongtongia haing tela mana rubina xap sangua luba, saing xap ma rangua lipua.
54	GEN 2:23	Baing lipua harua ba, “Ina naga! Alaing riagu sibuna. Tuanoa tuaguamdi, xaung sangganoa sanggaguama. Bagula ngauxu ba, ‘Haing’, namua na Urana xap sangua Lup.”
57	GEN 3:1	Moxa kubolung murakkama dali asaxa abunging longgalo Toxoratamona Urana tongtongiadi. Ma rangua hainga saing xusunga ba, “Maxuna Urana biliangtang ba, ‘Labu axang xai marang longga duwa umangiau tai’?”
59	GEN 3:3	ning Urana harua ba, ‘Labu axang xai marandi mana xaiya li liwe umangiau tai, saing labu aringgu tai, nam tang gamati.’ ”
61	GEN 3:5	Urana harua bila ba namua na xabia ba bungina axang maranoa bagula tang maxaimdi daxaxa ding, saing bagula axabia xai xaung diana, bila Urana xabia.”
64	GEN 3:8	Bungbung, longa xaringa, baing luba haininoa tang dilungu Toxoratamona Urana haxa umangia, baing dihisa mana Toxoratamona Urana liwe mana xai umangamdi.
65	GEN 3:9	Ne Toxoratamona Urana wagi mana luba ba, “Uwa bi?”
69	GEN 3:13	Saking Toxoratamona Urana xusunga hainga ba, “Uraxata ulibu bila ba?” Hainga harua ba, “Moxua tuxu murak manga, saing ngaxang.”
70	GEN 3:14	Binabu Toxoratamona Urana harua na moxua ba, “Ulibu bila ba, binabu “Mauxanganoa xapkung ganim liwe mana moru longgalo xaung asaxa abunging longgalo! Bagula uhaxa gamomia saing bagula oxong gagap mana xaidap longgalo walingamia.
73	GEN 3:17	Baing harua na lupka ba, “Ulungu hainima saing oxong xai marana ngabiliung mana ba, ‘Labu oxonggu tai.’ “Mana namua ulibu bila ba, mauxanganoa xap titia, bagula umakasa sibuna mana oxop angingua mana bu oxong, mana xaidap longgalo walingamia.
77	GEN 3:21	Baing Toxoratamona Urana tongtongia imang asaxa sangganamdi na Adam haininoa tang saing sausaudi.
78	GEN 3:22	Baing Toxoratamona Urana harua ba, “Bagu luba sok bila kiria tela, namua na xabia xai xaung diana. Ne xai te nabu raria rimana saing kiri xai marandi mana xaiya sina walinga. Nam xang bu wa bungingbunginalo.”
79	GEN 3:23	Binabu Toxoratamona Urana suka luba tang mala sangua Umanga Iden, ba ki titia Urana tongtongia mana ba.
80	GEN 3:24	Suka luba mala masup, baing ta kerubimdi Umanga Iden sanga karagia, xaung ta waxang sabanga yap manandi bilikbiliga mana ba xukxugia sanga long longgalo bu soxauti daxangua ila mana xaiya sina walingua.
90	GEN 4:10	Binabu Toxoratamona harua ba, “Uraxata bila ba? Ulungu! Kixingima sibinoa wa titia ba wagi manga.
105	GEN 4:25	Adam kinu muli rangua haininoa, baing hayau gara lup tela. Harua ba, “Urana sina gara tela muli nanga ba xap Ebal yabanoa, namua na Ken ung mati.” Binabu uxu ba Set.
107	GEN 5:1	Adam bakbagindi bila li. Bungina Urana tongtongia lipudi, tongtongiadi disok bila ina.
109	GEN 5:3	Adam nianindi 130, baing xapsaxi gara lup tela sok bila ing sibuna—maxuna sok bila ina. Uxu ba Set.
128	GEN 5:22	Inok haxa rangua Urana 300 niani muli kimuya mana xapsaxi Metusela, saing xapsaxi gara teladi muli, lupdi xaung haingdi.
130	GEN 5:24	Inok haxa rangua Urana, ning Urana xap mala, binabu lipudi dibagu muli te.
140	GEN 6:2	Adi duwa bila Urana dibagu ba lipudi nanuhangidingdi gumangiding sibuna. Baing daxap baruamtadi sanga mana murungadingdi, saing diyaudi.
142	GEN 6:4	Nepildi duwa titia mana bungina baguba xaung kimuya xauna. Mana bungina baguba, adi duwa bila Urana dikinu rangua lipudi nanuhangidingdi, saing dahayau garadi. Lipuadi ba mugauamdi haringiding sibuna haungingia, saing ramramoding sabanga(di).
147	GEN 6:9	Noa naxuyanganoa bing bila li. Noa lipu maringina. Liwe mana lipudi mana bungina baguba, xola mana kubolu diana. Noa haxa rangua Urana.
149	GEN 6:11	Ne lipu titiamdi didoa sibuna Urana maxania, saing titia baxagi mana lipudi kuboluding dudunamdi.
150	GEN 6:12	Urana bagu lipu titiamdi, saing bagu didoa sibuna, namua na ding longgalo kuboludingdi didoa buk.
151	GEN 6:13	Binabu Urana harua na Noa ba, “Ngahau hatumingagua ba ngasahi lipu longgalo, namua na dilibu titia baxagi mana kuboluding dudunamdi. Maxuna bagula ngahanggalangiadi xaung titi(a).”
152	GEN 6:14	“Utongtongia waga sabanga tela mana xaiya goper. Utongtongia numa lundi maluxu mana, saing usami xasu tagangama lunia xaung ubunia.
153	GEN 6:15	Utongtongia bila li: Maxaxayanganoa bing 135 mita, tubunganoa bing 22 mita, xaung maxaxayanganoa mahaing bing 13 mita.
154	GEN 6:16	Utongtongia uronganoa mana, ne uyunga ganangana wa hawa mana laing rubunganoa bila mita hataina. Utongtongia xalua waga rubinia, saing utongtongia saxuming tuwa maluxu mana—hawama, liama, xaung etuama.
155	GEN 6:17	“Ulungu to. Bagula nga ngaxap silinga sabanga masok titia bu hanggalangia axamang walingam longgalo hawa sabalunia, axamang yagangam longgalo. Axamang longgalo duwa titia bagula dimati.
160	GEN 6:22	Noa libu bila ba. Libu axamang longgalo Urana tabina ba.
161	GEN 7:1	Baing Toxoratamona harua na Noa ba, “Uluxu wagia, ung xaung bakbagim longgalo, namua na ngabagung ganim umaring liwe mana lipu titiam longgalo.
163	GEN 7:3	Bila balau mana mang xadingdi, oxop moning 7 xaung hagaxag 7. Ulibu bila ba bu garadingdi disok xumana titia kimuya.
169	GEN 7:9	luwa luwa mana monindi xaung hagaxandi, ding dahaing wagia mala rangua Noa, bila Urana tabina Noa ba.
176	GEN 7:16	Asaxadi diluxu bing monindi xaung hagaxandi mana asaxa walingam longgalo, bila Urana tabina Noa ba. Dahaing masup, baing ina naga, Toxoratamona riba waga xaluxinoa.
183	GEN 7:23	Urana sisia axamang walingam longgalo sangua titia—lipudi xaung asaxadi xaung asaxadi dahaxa mua titia xaung mang sabalunamdi. Ding longgalo disup sibuna. Noa ing ganina wa, gabu adi duwa rangua wagia ba.
185	GEN 8:1	Ne Urana hatumia Noa muli xaung asaxa abungindi xaung morudi duwa rangua wagia. Baing libu yanga yubua titia, saing langa xaya xaya mari.
199	GEN 8:15	Baing Urana harua na Noa ba,
200	GEN 8:16	“Uri mala sangua wagua, ung gugabu hainima xaung garamdi digabu hainidingdi.
207	GEN 9:1	Baing Urana sina guxama na Noa xaung garandi, harua ba, “Axapsaxi asok xumana, saing abaxagi mana titia.
212	GEN 9:6	“Lipu gaxarea ung lipu tela mati, ing sibuna bagula mati lipudi rimadingia, namua na Urana tongtongia lipudi disok bila ing sibuna.”
214	GEN 9:8	Baing Urana harua na Noa gabu garandi ba,
218	GEN 9:12	Baing Urana harua ba, “La li mogunga mana haruangua ngahau liwe makira xaung liwe mana axamang walingam longgalo duwa ranguang. Haruanga li bagula wa rangua lipu longgalo dima kimu mang.
222	GEN 9:16	Bunging bungina moxa babuna wa mugabia, bagula ngabagu saing ngahatumia muli haruanga bungingbunginaloama ngahau liwe mana Urana xaung asaxa walingam longgalo duwa titia.”
223	GEN 9:17	Baing Urana harua na Noa ba, “Alali mogungua mana haruangua ngahau liwe manga xaung asaxa walingam longgalo duwa titia.”
232	GEN 9:26	Baing harua xauna ba, “Taiti Toxoratamona yanoa, Siem Urana inia! Kenan bagula wa lipu oxata olanggam mana Siem.
233	GEN 9:27	Ngaxusunga Urana ba libu Yapet titinoa tubu, xaung ba libu bakbagindi dirung xai rangua Siem bakbagindi, xaung ba Kenan wa lipu oxata olanggam mana.”
258	GEN 10:23	Aram garang lupdi bing: Us, Hul, Geter xaung Mas.
262	GEN 10:27	Hadoram, Usal, Dikla,
295	GEN 11:28	Bungina Tera wauyu, Haran mati yabania Ur, mana Kaldia titidinga.
298	GEN 11:31	Tera xap garanoa Ebram, longanoa Sarai (Ebram haininoa), xaung garang ranggina Lot (Haran garanoa), saing gabudi diyunga long sabangga Ur wa Kaldia titidingia, saing dibo ba dila titia Kenan. Ne dila daxanga lia disok mana longga Haran, saing dirung la ba.
300	GEN 12:1	Tauna, Toxoratamona harua na Ebram ba, “Usauya titima, bakbagimdi xaung tibum sibindi, saing ula mana titi tela bagula ngahatanga naung.
310	GEN 12:11	Dila disok Isip raguna dibo ba diluxu, baing Ebram harua na haininoa Sarai ba, “Ulungu to. Ngaxabia ba ung haing gumanging sibuna.
312	GEN 12:13	Ubaladi ba ung hamungagua, bu dilibu xai manga namua na muruding maung, saing mana namua ba walingagua bagula sup te.”
317	GEN 12:18	Binabu Pero wagi Ebram ma saing harua ba, “Uria baru manga? Baruta ubaxanga maringina nanga te? Hainima baing!