24975	LUK 1:13	Lakini malaika ywa Nnu'ngu' ngammakia, “Wa Zakalia we, kaneuyogope, mwanjaa gonnu'bite Nnu'ngu' akuyu'wine, nnyumbogo Elisabeti alu'a kupapya mwana nnalu'me, na lina lyake wantine Yoani.
24979	LUK 1:17	Alu'a kunnongolya Bwana, ku'no kalongoyelwa na makakala ga Loo Mpeleteu kati nnondoli ywa Nnu'ngu' Elia. Alu'a kwaawana akina tati' na bana babe, na kwigalambwa myoyo ya kimbu'ku'su' babe na malango kati mwabapanga bandu ba Nnu'ngu', bu'kapo ammi'ki wiso Bwana bandu bake.”
24980	LUK 1:18	Zakalia ngammakia aywo malaika, “Kikowe saku' sakilu'a nipanga nenga niu'bi'li likowe li'? Nenga na nnyumbo wangu' twaboti tugoime.”
24981	LUK 1:19	Malaika ngannyangwa, “Nenga na Gabulieli, na malaika ywaniyi'ma nnu'ngi' ya Nnu'ngu', nitumilwe nikubakie Abali Inannoga.
24982	LUK 1:20	Pi'kania, mwanjaa ukana u'bi'lya makowe ganikubakia ulu'a galambuka panga wa bubu, walongelali mpaka gano ganikubakie gatimi.”
24987	LUK 1:25	“Ago ngagaanipangi Nnu'ngu', anibi'ki kiya na kunibu'ki'ya oni yo kotoka beleka yanaabile nayo, paminyo ga bandu.”
24990	LUK 1:28	Malaika ngannyendelya na kummakia, “Uyumukage wenga wauyaliwite na Nnu'ngu', Nnu'ngu' abile pamope na wenga.”
24992	LUK 1:30	Malaika ngammakia, “Malia, kaneuyogope, nnyino Nnu'ngu' akupendile.
24995	LUK 1:33	Kwa nyo, alu'a tawala lukolo lwa Yakobi milele na ukulungwa wake wayomokali.”
24996	LUK 1:34	Malia ngannyangwa, “Ago kagapitya kwaku', nanenga nantangali nnalu'me?”
24997	LUK 1:35	Malaika ngannyangwa, “Alu'a kuulukya Loo Mpeleteu, na uweso wa Nnu'ngu' Nku'lu' walu'a kwisilya kati kiwili. Kwa nyo, mwana ywaabelekwa alu'a kemelwa Mpeleteu mwana wa Nnu'ngu'.
24999	LUK 1:37	Kwa nyo, makowe goti apanga Nnu'ngu'.”
25000	LUK 1:38	Malia aabaite, “Nenga na mundu wa Nnu'ngu', nipangilwe kati mwobaike.” Wayomwi yangwa nyo, yu'lu' malaika ngabu'ka.
25004	LUK 1:42	Ngalongela kwa lilobe liku'lu', “Uteyaliwa pi'ta alwawa boti, na ywolu'a kumpapa kwa ndumbo yobilenayo, ayaliwite.
25007	LUK 1:45	Nantali wenga wauu'bi'li panga galu' gaakubakie Nnu'ngu' galu'a pitya.”
25008	LUK 1:46	Malia ngabaya, “Mwoyo wangu' unnumba Nnu'ngu',
25017	LUK 1:55	Kati mwaalagi api'ndo bitu, Bulaimu na lubelekwo lwake mpaka mwiso wa bwu'mi.”
25022	LUK 1:60	Mau' bake ngabakana, ngababaya, “Nyinyo lili, mbala akemelwe Yoani.”
25023	LUK 1:61	Ngabammakia, “Mboni ntu'pu' mundu ywakemelwa lina lyo mulukolo lwinu?.”
25025	LUK 1:63	Nembe aalu'bite kibao so andika, aandike nnyanya, “Yoani nga lina lyake.” Boti baatisangala.
25028	LUK 1:66	Boti babaagayu'wine makowe go, baatigania mumyoyo yabe ku'no kababaya, “Mwana yu' alu'a panga mundu gani?” Maana, makakala ga Bwana gabile pamope nakwe.
25030	LUK 1:68	“Akwi'yi'lwe Bwana Nnu'ngu' wa Isilaili! Mwanjaa aatikwaisilya na kwakombwa bandu bake.
25041	LUK 1:79	Na kwamulikya boti babatama mulubi'ndu' na kiwili sa kiwo, alongoye nganjo yitu mundi'la ya amani.”
25052	LUK 2:10	Malaika ngaabakia, “Kanemuyogope! Ninnetyangite Abali Inannoga, yo napusika muno, yailu'a kwapata bandu boti.
25054	LUK 2:12	Na wu'no, walu'a panga mwanju kasinu panga, mukankwemba mwana kilekeleke banng'walike ngu'bo ya kyana, banng'onjike mukili'lyo sa ng'ombe.”
25056	LUK 2:14	“Utukupu kwa Nnu'ngu' kunani, na amani padunia kwa bandu baapenda ywembe.”
25057	LUK 2:15	Bu'ka pabaabu'i abo malaika buyangania kunani, asungi ngababakiana, “Tuyende nswaa mpaka ku Betelehemu tukalibone likowe li', lyatubakie Bwana.”
25065	LUK 2:23	Mu Salya ya Bwana Nnu'ngu' iandikilwe, “Kila mwana mmele nnalu'me abaulilwe kwa Bwana.”
25071	LUK 2:29	“Nambi'yambi' Bwana utimisike malagano gako, unnyi'ki'ti'ye ntumisi wako ayende kwa amani.
25074	LUK 2:32	Bweya wawaalu'a kwamulikya bandu ba panja, na utukupu kwa bandu bako Isilaili.”
25076	LUK 2:34	Simioni aatekwayalya, ammakie Malia mau' bake, “Mwana yu', alu'a panga kitumbu, so oba no kosopolelwa kwa bandu baingi mu Isilaili. Nembe alu'a panga kati mwanju wo kanilwa na bandu,
25077	LUK 2:35	li'nga gabagania bandu baingi kwo iya, gaumukulwe. Na wenga wamwene, lwu'ngu' lwalubile kati lipanga linola, lwalu'a kuoma pamwoyo wako.”
25090	LUK 2:48	Abelei bake, pabaamweni, baatisangala. Malia mau' bake, ngabannaluya, “Wamwana wangu', mwanjaa namani utupangite nyo, tati' bako na nenga, twendekupala, malango gatuobike.”
25091	LUK 2:49	Ywembe ngayangwa, “Mwanjaa namani munipalage? Mwatangikeli panga, nipalilwa tama munyumba ya tati' bangu'?”
25098	LUK 3:4	Ngamo iandikilwe mukitabu sa nnondoli wa Nnu'ngu' Isaya, “Lilobe lya mundu akema kulubele, mumpetuli Bwana ndi'la yake, mugolwe simbasimba yake.
25100	LUK 3:6	Na bandu boti baalu'a kuubona ukosopoli wauleta Nnu'ngu'.”
25101	LUK 3:7	Bai, Yoani aabakiage bandu baingi babaaisile li'nga aabatise kabaya, “Mwenga mwa lukolo lwa nng'ambo, nyai ywanking'indile mwitile nyongo yayaisa?
25102	LUK 3:8	Mulaye kwa itendo yinu panga, mummuyangani Nnu'ngu' kwo kana, buyangania sambi. Kanemutumbwe kwipuna, ‘Twenga twa bana ba Bulaimu’. Nimmakianga kakape panga, Nnu'ngu' akombwa kugagalambwa maliwe gamugabona, gapange bana ba Bulaimu.
25103	LUK 3:9	Bai, libago libi'kilwe paliina lya nkongo kwa nyo, kila nkongo wangali pambika itunda inannoga, waalu'a pi'ngu'lwa no sonjelwa mwoto.”
25104	LUK 3:10	Kipi'nga sa bandu ngabalaluya, “Tupange buli?”
25105	LUK 3:11	Aayangwi, “Ywabile na ngu'bo ibi'li', ampei mwene buula, na ywabile na kilyo, apange nyinyonyo.”
25106	LUK 3:12	Nabembe alonga koli ngabaisa li'nga babatisilwe ngabannaluya, “Mwalimu, tupange buli?”
25107	LUK 3:13	Nembe ngayangwa, “Kanemwabonele bandu kwa, kwaalonga koli pi'ta yi'lu' yaibi'kilwe na silikali.”
25108	LUK 3:14	Nabembe asikali ngabannaluya, “Natwenga tupange buli?” Nembe ngayangwa, “Kanemupokonywe kikowe sa mundu ywoywoti kwa makakala, wala kunsitakya mundu kwa likosa lya kunku'pi'ki'a. Inni'ngane mikwiso yamuli'pi'lwa.”
25110	LUK 3:16	Apo, Yoani ngaabakia boti, “Nenga nimmatisanga kwa masi', nsu'gu' yangu' aisa mwene uweso kulikoni nenga, aywo nenga nipwaikali ata undwana kamba ya ilatu yake. Ywembe alu'a kummatisanga kwa Loo Mpeleteu na kwa mwoto.
25111	LUK 3:17	Ywembe aabile na kyelo mumaboko gake, so pepekeya ilalyo akaimati muliku'ngwa paligu'lu, na mayu'ngu'lu'lu' akagatiniye kumwoto wangali imika.”
25116	LUK 3:22	Na apo, ngapaulukilwa na Loo Mpeleteu, ywabile na uyi'me wa ngunda. Lilobe lyayu'wanike bu'ka kunani, “Wenga nga wamwana wangu', wanikupendile, ninogelilwe na wenga.”
25135	LUK 4:3	Apo Ibilisi ngammakia, “Wenga manautei wamwana wa Nnu'ngu' ulibakie liwe li' lipange likati.”
25136	LUK 4:4	Yesu ngannyangwa, “Iandikilwe, ‘Mundu alamali kwa likati bai, ila kwa kila liyi'gi'yo lyalibu'ka kwa Nnu'ngu'.’”
25138	LUK 4:6	“Naakupeya uweso wa kulungwa yoti yi', kwa mwanjaa, ayi' yoti nitepeyelwa na mana nipendile kumpeya mundu nendakombwa.
25139	LUK 4:7	Bai, mana wanikilikitya, ayi' yoti yapanga mali yako wenga.”
25140	LUK 4:8	Yesu ngannyangwa, “Iandikilwe, ‘Unkilikiti Bwana Nnu'ngu' wako, na kuntumikia ywembe bai.’”
25141	LUK 4:9	Ibilisi ngampu'twa mpaka ku Yelusalemu, kunani ya Nyumba ya Nnu'ngu' ngammakia, “Manaitei wenga nga wamwana wa Nnu'ngu', witu'mbu'ye pai',
25142	LUK 4:10	kwa mwanjaa iandikilwe, ‘Aabakia malaika bake bakuli'ndi'le,’
25143	LUK 4:11	na kai', ‘Baakupu'twa mumoko gabe, li'nga wakene ku'bala magu'lu' gako muliwe.’”
25144	LUK 4:12	Lakini Yesu ngannyangwa, “Iandikilwe, ‘Keneumpaye Bwana Nnu'ngu' wako.’”
25150	LUK 4:18	“Loo wa Bwana ai panani yangu', aniyi'mike mwene li'nga naleti aki'ba Abali Inannoga. Anitumike naatangasili atabilwe yu'gu'li'lwa kwabe na kimbulibuli bapate lola kai' anitumike nakombwe bababonelwa,
25151	LUK 4:19	no tangasa mwaka wa Bwana woyaliwa bandu ngu'ngu' yake.”
25153	LUK 4:21	Naywembe ngaabakia, “Liyi'gi'yo lyamuliyu'wine, li'no litimile.”
25154	LUK 4:22	Boti baatinapusika, munomuno baatisangala, kwa makowe manogau, gaagalongei. Ngabalaluyana, “Ayu' ka ngamwana wa Yusupu?”
25155	LUK 4:23	Nembe ngaabakia “Nitangite mulu'anibakia nnongelo gu', ‘Wa nng'anga witepwe wamwene.’ Kai' mwabaya, ‘Goti gatugayu'wine ugapangite ku'lu' ku Kapalanaumu, ugapange kai' pano pakilambo sako.’”
25156	LUK 4:24	Ngapayendelya baya, “Nnondoli atanganikwali pakilambo sake.
25159	LUK 4:27	Kai' ku Isilaili nsimu wa Elisha kwaabile na bene matana baingi. Ata nyo, ntu'pu' nywapeleteyilwe ila Naamani mwenekaya wa ku Silia.”
25166	LUK 4:34	“Ubile na ki'li' na twenga, wenga wa Yesu wa ku Nasaleti? Buli uisi kutulangamisa? Nikutangite wenga wanyai. Wenga nga wa Mpeleteu mwene makakala ga Nnu'ngu'!”
25167	LUK 4:35	Yesu ngankalipya aywo moka kabaya, “Ndu'ti! Ummu'ke mundu yu'!” Bai, aywo moka ngantu'ya pai' yu'lu' mundu na kummu'ka wangali kunsulu ata pasene.
25168	LUK 4:36	Bandu boti ngabasangala, ngababakiana, “Ali' likowe lyayambi' mwanjaa kwa uweso na makakala ammakia moka bu'ka naywembe endabu'ka!”
25173	LUK 4:41	Moka gaatikwabu'ka bandu baingi, ngagapanga ndu'ti kagabaya, “Wenga nga wa Mwana wa Nnu'ngu'!” Lakini Yesu nga gakalipya wala aagayi'ki'tiyeli longela, kwa mwanjaa, gaatangite panga ywembe nga Kilisitu ywabayilwe.
25175	LUK 4:43	Lakini Yesu ngaabakia, “Nipalikwa kwaalya Abali Inannoga ya Ukulungwa wa Nnu'ngu' mumili'ma yi'ngi', kwa mwanjaa, nitumilwe kwa go.”
25180	LUK 5:4	Payomwi yi'gana ngammakia Simoni, “Uendelese ngalaba mpaka papayendekiye, na mukatumbukiye mbi'li'li' yinu li'nga mulobe omba.”
25181	LUK 5:5	Simoni ngannyangwa, “Mpi'ndo, tutikeleka kilo soti loba lakini tupatikeli kili'be, ila mwanjaa ulongei wenga niyenda tumbukia.”
25184	LUK 5:8	Simoni Petili paagabweni go, ngakilikita nnu'ngi' ya Yesu na kummakia, “Bwana, ubu'ke nnu'ngi' yangu', kwa mwanjaa nenga namwene sambi.”
25186	LUK 5:10	Yakobi na Yoani, bana ba Zebedayo, baai alobi aine Simoni. Yesu ngammakia Simoni, “Kaneuyogope, bu'ka nambi'yambi' ulu'a loba bandu.”
25188	LUK 5:12	Yesu paabile pakilambo simo sa nni'ma wo, ngakwembana na mundu mwene matana yi'ga yoti. Mundu ywo ngagonja ukukama na kunnu'ba Yesu, “Bwana mana upendile, wendakombwa kunipeleteya.”
25189	LUK 5:13	Yesu, ngagoloya luboko, ngankunywa no baya, “Mbala, upeleteke!” Popopo matana gake ngagammu'ka.
25190	LUK 5:14	Yesu ngammakia, “Kaneummakie mundu ywoywoti, ila uyende ukailaye kwa mpi'ndo wa dini, na ukapiye salaka kwo peleteka kwako kati mwaabaite Musa no panga kakape upeletike.”
25196	LUK 5:20	Yesu paabweni bai na imani ngu'lu', ngammakia aywo mundu, “Mbwiga, masambi gako usamilwe.”
25197	LUK 5:21	Balimu ba Salya na Mafalisayo ngabailaluya, “Ayu' nyai ywalongela mayi'gi'yo ga kupulu? Ntu'pu' mundu ywakombwa samya sambi, ila Nnu'ngu' kisake!”
25198	LUK 5:22	Yesu wakwipwi gabagania ngaalaluya, “Mugania ki'li' mumyoyo yinu?
25199	LUK 5:23	Lyaku' lyalibile liyu'yu'u muno baya, ‘Usamilwe sambi,’ au baya, ‘Yi'ma uyende’?
25200	LUK 5:24	Bai, mbala mutange panga Mwana wa Mundu abile na amuli yo samya bandu sambi padunia.” Apo ngammakia yu'lu' mundu ywatombolwike, “Nikubakia, uyi'me utole masela gako uyende kasako.”
25202	LUK 5:26	Boti batisangala no gania ngabankwi'ya Nnu'ngu' kababaya, “Tugabweni makowe gayambi' li'no.”
25203	LUK 5:27	Bu'ka pa go, Yesu aapitike panja, ngammona nnonga koli yumo ywakemelwage Lawi, atami palyengo lyake. Yesu ngammakia, “Uniki'ngame.”
25206	LUK 5:30	Mafalisayo na balimu ba Salya, baaku'ku'li'ki banamasi' bake kababaya, “Kwa ki'li' mulya no nywa pamope na alonga koli na bene sambi?”
25207	LUK 5:31	Yesu ngaayangwa, “Akoti bampalali nng'anga, babampala nng'anga balu' bababile atamwe.
25208	LUK 5:32	Niisili kwakema bandu anogau ila bene sambi li'nga bammuyangani Nnu'ngu'.”
25209	LUK 5:33	Bandu bi'ngi' ngabammakia, “Banamasi' ba Yoani Ywabatisage bakoyage punga no lu'ba, ata apwasi ba Mafalisayo bapanga nyinyonyo. Lakini banamasi' bako bendalya no nywa.”
25210	LUK 5:34	Yesu ngayangwa, “Balu' babakokilwe kulisengele bapalikwa punga ku'no mwene lisengele babile nakwe pamope? Lili!
25211	LUK 5:35	Lakini nsimu walu'a isa, wobu'yi'lwa mwene lisengele kasabe, na nsimu wo, ngabaalu'a punga.”
25212	LUK 5:36	Yesu ngaabakia lukongo lu'no, “Bandu bapapwali kibamba sa ngu'bo yayambi' na kukibi'ka mungu'bo ngonaa. Mana bapangite nyo, ngu'bo yo yanogelyali. Kai', yapanga bapapwi ngu'bo yayambi'.
25215	LUK 5:39	Ntu'pu' mundu ywaminyikia nywa kinywo sa njabibu yayambi' bu'ka ponywa kinywo sa njabibu ngona maana ibayilwa yi'lu' ngona nga inannoga muno.”
25217	LUK 6:2	Mafalisayo baingi ngabaalaluya, “Mboni mupanga makowe gagakanilwa na Salya Lisu'ba lya Sabato ya Ayahudi?”
25218	LUK 6:3	Yesu ngaayangwa, “Munasomali mwaapangite Daudi na aine pabaabile na njala?
25219	LUK 6:4	Ywembe aayingi mu Nyumba ya Nnu'ngu', no tola galu' makati gagabi'kilwe nnu'ngi' ya Nnu'ngu', lya na kwapeya aine. Yatekanilwa mundu lya makati galu' ila api'ndo ba dini bai.”
25220	LUK 6:5	Apo ngaabakia, “Mwana wa Mundu nga Bwana wa Sabato.”
25223	LUK 6:8	Lakini Yesu aatangite mwabaganiage, ngammakia yu'lu' mwene luboko lutomboloka, “Kakatuka uyi'me pakatikati yabe.” Ngayenda no yi'ma.
25224	LUK 6:9	Yesu ngaabakia, “Ninnaluya mwenga, lisu'ba lya Sabato ya Ayahudi, nantali panga makowe manogau au ganannyata, tepwa au bulaga?”
25225	LUK 6:10	Paaloi boti bababile palu' ngammakia yu'lu' mundu, “Goloya luboko lwako.” Naywembe papangite nnyo, luboko lwake lwapangite lukoti kai'.
25235	LUK 6:20	Yesu ngaagalambukya banamasi' bake ngabaya, “Nantali mwenga mwamile mwaki'ba, kwa mwanjaa Ukulungwa wa Nnu'ngu' winu.
25237	LUK 6:22	“Nantali mwenga mwamusukilwa na bandu, mwamubaulwa, mwamui'mbu'lwa, no linyatia lina linu kwa mwanjaa ya Mwana wa Mundu.
25241	LUK 6:26	Mwakibona mwenga mwamulumbilwa na bandu boti kwa mwanjaa api'ndo babe baapangi alondoli ba ubu'su' nyinyonyo.”
25242	LUK 6:27	“Lakini nimmakianga mwenga mwamunipi'kania, mwapende andumu binu, na mwapangi manogau babansukwanga.
25247	LUK 6:32	“Mana mwaalu'a kwapenda babampendile mwenga mwalu'a pata upo yaku'? Ntu'pu' kwa mwanjaa ata bene sambi baapenda babaapendile.
25252	LUK 6:37	“Kanemwasenwe bi'ngi' namwenga Nnu'ngu' ansenwali, kanemwabi'ki bi'ngi' lukoolo, namwenga Nnu'ngu' ammi'kyangali lukoolo, mwasami bi'ngi' na mwenga Nnu'ngu' ansamya.
25253	LUK 6:38	Mwapei bandu ili'be yabapala na mwenga Nnu'ngu' ampeya, mwapokya kili'ngo satwi'la no indilya, tikyatikya ika no yitanika. Kwa mwanjaa kili'ngo sososo samwaali'ngya, nga samwaali'ngi'lwa na Nnu'ngu'.”
25254	LUK 6:39	Ngaabakia lukongo, “Mbulibuli endakombwa kunnongoya ndi'la mbulibuli nnyine? Lili, boti abi'li' balu'a tumbukya mulyi'mbwa.
25257	LUK 6:42	Au ukombwa buli kummakia nnyino, ‘Nnyangu', nileka nikubu'ye kielenje sakibile muliyo lyako’, na wamwene lubile lubago muliyo lyako? Wammu'su'bu'su', ulubu'ye wi'ti' lubago lwa muliyo lyako, ngaummu'ye nyino.
25258	LUK 6:43	“Nkongo unannoga upambikali itunda inannyata wala nkongo unannyata upambikali itunda inannoga.
25261	LUK 6:46	“Kwa mwanjaa buli munikema ‘Bwana, Bwana,’ ku'no kamukana panga ganimmakianga?
25264	LUK 6:49	Lakini ywoywoti ywagayu'wa makowe gangu' kakotoka kugapanga, aywo alandana na mundu ywasengite nyumba pangali i'mbi'ya. Pawisi nkukulo ayo nyumba ngaiyiluka no sengwanika.”
25268	LUK 7:4	Pabaikite kwa Yesu, baatikumpembelelya kababaya, “Ili'ngani mundu yu' umpangi likowe li'.
25269	LUK 7:5	Kwa kitumbu ywembe aatikuupenda muno nni'ma witu na ngaywatusengile yi'lu' nyumba ya kunnu'ba Nnu'ngu'.”
25270	LUK 7:6	Bai, kabayenda, baalongwaniye na Yesu. Pabaabile kabaegelya panyumba ya yu'lu' mpi'ndo ywa yesi, yu'lu' mpi'ndo ngatuma mambwigalye, bakammakie Yesu, “Bwana, kanewisuluye muno, kwa mwanjaa nenga ili'nganili wenga yingya munyumba yangu'.
25272	LUK 7:8	Nanenga nibi pai' ya utawala nyonyonyo, na nibile na banayesi pai' yangu'. Nimmakia yumo, ‘Yenda,’ ywembe endayenda, nimmakia ywi'ngi' ‘Isa!’ nembe endaisa, na mpangakasi wangu' ‘Panga kikowe si'!’ nembe endapanga.”
25273	LUK 7:9	Yesu payu'wine go, aatisangala, aakigalambuki si'lu' kipi'nga sa bandu sakimmi'ngi'yage, ngabaya, “Nammonali mundu mwene imani ngu'lu' kati yi' ata ku'lu' Isilaili!”
25277	LUK 7:13	Bwana Yesu paamweni mau' ywo, aammi'kikiya, ngammakia, “Kaneuli'le.”
25278	LUK 7:14	Bu'kapo, ngayenda kugakunywa galu' masela na balu' babaapu'twile baatiyi'ma, ngabaya, “Wamunsembe, Nikuamulisa uyumuke!”
25280	LUK 7:16	Bandu boti, baatiyogopa na kunnumba Nnu'ngu' kababaya, “Nnondoli nku'lu' ywa Nnu'ngu' apitile mulukolo lwitu. Nnu'ngu' aisi kwakombwa bandu bake.”
25283	LUK 7:19	aatumike kwa Bwana, bakannaluye, “Wenga nga yu'lu' ywaisa, au tunni'nde ywi'ngi'?”
25284	LUK 7:20	Balu' banamasi' pabaaikite kwa Yesu, baatikummakia, “Yoani Ywabatisage atutumike kasako tukulaluye, ‘Wenga wa yu'lu' ywaisa, au tunni'nde ywi'ngi'?’”
25286	LUK 7:22	Bai Yesu ngayangwa, “Muyende mukammakie Yoani galu' gamugabweni kwa minyo ginu na kugayu'wa. Atu'lu'ka minyo bendalola, itewe bendayenda, bene matana bendapeleteyelwa, kingemakutu bendayu'wa, mitwi yendayu'ka, na aki'ba baalilwa Abali Inannoga.
25287	LUK 7:23	Nantali mundu yu'lu' ywakotwike ba na kyukala na nenga.”
25288	LUK 7:24	Apo pababu'i balu' baatumike Yoani, Yesu aatumbwi kulibakia lipi'nga lya bandu abali ya Yoani, “Mwayi'i linga namani ku'lu' kulupu'ngu'ti'? Buli, mupalage kugabona mambu'ngi'li'i kagapu'ngi'la na nsunga?
25291	LUK 7:27	Ayu' Yoani ngaywabayilwa mu Maandiko Mapeleteu, ‘Lola, nenga nintuma mpangakasi wangu' akulongoli, aywo alu'a kupetulya ndi'la yako.’”
25292	LUK 7:28	Yesu aayomwi kwo baya, “Nimmakia, kati ya bandu boti babatami panni'ma, ntu'pu' ywabile nku'lu' muno kumpi'ta Yoani Ywabatisage. Ata nyo, yu'lu' ywabile nsene muno mu Ukulungwa wa Nnu'ngu' nga nku'lu' kulikoni ywembe.”
25295	LUK 7:31	Yesu ngaalaluya, “Bandu ba mmelekwo wu', nalandaniye na ki'li' gani? Bandu ba uyi'me gani?
25296	LUK 7:32	Landana kwabe kati bana babatamaga palisoko, kababakiana kipi'nga simo na si'ngi', ‘Tumwonekiye ngoma, namwenga mwinikeli! Tunnyi'mbi myambo ya ili'lo lakini muli'ili!’
25297	LUK 7:33	“Kwa mwanjaa Yoani aatiisa, nembe endage punga na anywageli wi'mbi', namwenga mwabaite, ‘Ayingililwe na moka!’
25298	LUK 7:34	Nembe Mwana wa Mundu aisi kaalya no nywa, na mwenga mubaya, ‘Munninge ayu' mundu mila no lobya, mbwiga wa alonga koli na bene sambi!’
25299	LUK 7:35	Ata nyo, ikima ya Nnu'ngu' ikong'ondile panga inannoga kwa balu' boti babaiyi'ki'tya.”
25303	LUK 7:39	Yu'lu' Mfalisayo ywankokite Yesu paagabweni go, awasike pamwoyo wake, “Kenda mundu yu' akapanga nnondoli wa Nnu'ngu', alu'e tanga panga, ayu' nnwawa ywankunywa mwene sambi.”
25304	LUK 7:40	Yesu ngammakia ywo Mfalisayo, “Simoni, nibile na kikowe sa kukubakia.” Nembe Simoni ngammakia, “Nendakupi'kania Mwalimu, baya.” Yesu ngaabaya,
25305	LUK 7:41	“Bandu abi'li' bankopite mundu mbanje, yumo aakopite linali mya tano, na ywi'ngi' amusini.
25306	LUK 7:42	Wabasindwi li'pa maleni gabe, aywo mundu aatikwasamya boti abi'li'. Tumbwe, ywaku' kati ya bo bandu abi'li' ywalu'a kumpenda muno yu'lu' bwana?”
25307	LUK 7:43	Simoni aatiyangwa, “Apo, niibona ywasamilwe leni liku'lu', ngaywaalu'a kumpenda muno yu'lu' bwana.” Yesu ngammakia, “Kakape.”
25308	LUK 7:44	Kai' nganng'alambukya yu'lu' nnwawa na kummakia Simoni, “Wendakummona ayu' nnwawa? Nenga paniyingi pano panyumba yako, unipeili masi' go uluwa mumagu'lu' gangu', lakini nnwawa yu' anigu'lwi' magu'lu' gangu' kwa moli gake na kuniponwa kwa nywili yake.
25311	LUK 7:47	Kwa nyo nendakubakia, asamilwe masambi gake maingi kwa mwanjaa alayite unogau wake nku'lu'. Ywasamilwe kisene apenda pasene,”
25312	LUK 7:48	Bai, Yesu ngammakia yu'lu' nnwawa, “Usamilwe masambi gako.”
25313	LUK 7:49	Apo nga balu' bababi pamope nakwe pamesa, ngabalaluyana, “Ayu' mundu gani, ywakombwa samya sambi?”
25314	LUK 7:50	Nembe Yesu ngammakia yu'lu' nnwawa, “Imani yako ikukosopolile, uyende kwa amani.”
25319	LUK 8:5	“Mpandi aayi'i misa mbeyu yake, paamisage mbeyu yo, yi'ngi' yaatu'mbu'ki mundi'la, yali'batilwe na api'ta ndi'la no sonyolwa na iyuni.
25322	LUK 8:8	Yi'ngi' yatu'mbu'ki muukando unannoga, yabalike, no pambika mbeyu mya kwa kila lupeyu lumo.” Payomwi longela go, ngau'bu'ya lilobe, kabaya, “Mwene makutu go yu'wa, na ayu'we!”
25323	LUK 8:9	Banamasi' bake Yesu ngabannaluya, “Lukongo lu' lulombolya namani?”
25324	LUK 8:10	Nembe ngayangwa, “Mwenga muyaliwite tanga iyo ya Ukulungwa wa Nnu'ngu', lakini abo bi'ngi' lili, ila abo babakiyilwa kwa ngongo li'nga batange panga, galu' gagaandikilwe mulilagano lya kwai'mbu' gendatimya, ‘Mana kabalola, kanebakibone sabakilolase, na mana kabayu'wa, kanebatange sabakiyu'wase.’
25325	LUK 8:11	“Bai, kikomekeyo sa lukongo lu'no nga si'no, mbeyu yaibayilwa pano nga liyi'gi'yo lya Nnu'ngu'.
25330	LUK 8:16	“Bandu bakoyali lumuli na kuluwi'ki'lya mulilebe, au mmu'ngu'. Lakini balubi'ka patu'ndu'bau li'nga bandu balole bweya.
25332	LUK 8:18	Kwa nyo, mwili'ndi'le kwa go gamugayu'wa kwa mwanjaa, ywabile na kili'be, alu'a yongeyelwa lakini, ywangali kili'be, ata si'lu' kisene sabile naso satolelwa.”
25334	LUK 8:20	Yesu aapeyilwe abali, “Mau' bako na akina nnunabo bai panja, bapala kukubona.”
25335	LUK 8:21	Lakini Yesu aabakie bandu boti, “Mau' na akina nnunangu', balu' babapi'kania lilobe lya Nnu'ngu' na kulikamwa.”
25336	LUK 8:22	Lisu'ba limo Yesu na banamasi' bake bau'bwike mu ngalaba na ngaabakia, “Tuloke litanda tuyende mpaka kwiyi'.” Bai, ngabatumbwa mwanja.
25338	LUK 8:24	Balu' banamasi' bannyendeli Yesu na kunnyumuya kababaya, “Mpi'ndo, mpi'ndo! Twenda waa!” Yesu ngayumuka na kwikalipya nsunga nkali' no yu'gayu'ga kwa masi' nayembe ngaiyi'ma no tama liki.
25339	LUK 8:25	Bu'kapo ngaabakia, “U'bi'lya kwinu kubi kwaku'?” Lakini bembe baatisangala no yogopa ku'no kababakiana, “Ayu' nga mundu gani, ywakalipya nsunga no yu'gayu'ga kwa masi' nayembe yendakunnyu'wa?”
25342	LUK 8:28	Pamweni Yesu, aitu'yike pai' nnu'ngi' yake, no kemelya kwa lilobe liku'lu' kabaya, “Wenga wa Yesu wa Mwana wa Nnu'ngu' Nku'lu', ubile na kitumbu gani na nenga? Nendakulu'ba, sondesonde kaneunilumiye!”
25344	LUK 8:30	Bai, Yesu ngannaluya, “Lina lyako wa nyai?” Ywembe ngayangwa, “Lina lyangu' ‘Twabanambone,’” kwa mwanjaa ganiyingi moka maingi.
25353	LUK 8:39	“Ubuyangani kasako, ukabaye makowe goti gaakupangi Nnu'ngu'.” Bai, yu'lu' mundu ngayenda kasake kapi'ta ku'no kaala kila pandu mukilambo si'lu' makowe goti gapangilwe na Yesu.
25359	LUK 8:45	Yesu ngalaluya, “Aywo nyai ywanikunywile?” Boti ngababaya panga, ntu'pu' mundu ywakukunywile. Nembe Petili ngabaya, “Mpi'ndo, kipi'nga sa bandu kitekuti'li'ta no kukutwi'li'lya.”
25360	LUK 8:46	Lakini Yesu ngabaya, “Kubi na mundu ywanikunywile, mwanjaa nigabweni makakala kaganibu'ka.”
25362	LUK 8:48	Yesu ammakie panga, “Biti, kwo u'bi'lya kwako uponi, uyende kwa amani.”
25363	LUK 8:49	Paabile balo kalongela, Yailo aaletilwe abali bu'ka kaya, “Mwi'nja wako awile, sakunsulukia muno Mwalimu saku'.”
25364	LUK 8:50	Yesu pagayu'wine go, ngammakia Yailo, “Kaneuyogope, we wu'bi'li bai alu'a tepulwa.”
25366	LUK 8:52	Bandu boti baabile kabali'la no lombola mwakipitike kiwo sake. Yesu ngaabakia, “kanemuli'le, mwana atigonja bai, anawaali!”
25368	LUK 8:54	Lakini Yesu ankamwi luboko na kummakia, “We mwana, yumuka!”
25373	LUK 9:3	Aalagi, “Pamuyabwa mwanja kanemupu'twe kikowe sosoti, kanemupu'twe lukongoso wala nsaku, wala masulupu, wala mbanje wala kanemwapu'twe ata likoti lyo bi'kiya.
25375	LUK 9:5	Bandu mana bakani kunkemya, mubu'ke pakilambo so no paapata ata litikwili lyalinamati mumagu'lu' ginu. Awo wapanga kati mwanju wa lukilo lwabe.”
25377	LUK 9:7	Kwa nyo ntawala Helode aapatike abali ya makowe goti gagaapangike aatangiteli mwanjaa babayage, “Yoani Ywabatisage ayu'kite bu'ka kuuwi'li!”
25379	LUK 9:9	Lakini Helode ngagania, “Yoani natikumwi'sa, tumbwe aywo nyai ywaniyu'wa makowe gake?” Apalage kummona mundu ywo.
25382	LUK 9:12	Lisu'ba palyatumbwi pilya, bannyendeli balu' ku'mi na abi'li' bammakie, “Walage bandu bayende kumisengo na kumigunda ya papipi, bakapate kilyo na muugonjo, kwa mwanjaa pano patubile, palupu'ngu'ti'.”
25383	LUK 9:13	Lakini Yesu ngaabakia, “Mwapei mwenga kilyo.” Bannyangwi, “Twenga ntu'pu' kili'be sosoti, twigali na makati matano na omba abi'li'. Kwaali', tuyende twabene, tukaapi'mi kilyo bandu boti!”
25384	LUK 9:14	Palu', kwai na annalu'me kati maelupu matano. Bai, Yesu ngaabakia banamasi' bake, “Mwabakie bandu batame muipi'nga ya mitumbi amusini amusini.”
25388	LUK 9:18	Lisu'ba limo Yesu aabile kisake kaalu'ba, na banamasi' bake babile papipi nakwe. Bai, ngaalaluya, “Bandu banibaya nenga na nyai?”
25389	LUK 9:19	Nabembe ngabannyangwa, “Bi'ngi' babaya panga wenga wa Yoani Ywabatisage, bi'ngi' Elia, bi'ngi' yumo kati ya alondoli ba Nnu'ngu' ba kwai'mbu' balu' babayu'kite.”
25390	LUK 9:20	Apo ngalaluya, “Na mwenga buli, munibaya nenga na nyai?” Petili ngayangwa, “Wenga nga wa Kilisitu ywa Nnu'ngu' Nkulungwa ywabayilwe.”
25392	LUK 9:22	ngayendelya baya, “Mwana wa Mundu apalikwa apate ngu'su'mbu' yansima no kanilwa na api'ndo, api'ndo ba dini, na balimu ba Salya no bulagilwa. Lakini lisu'ba lyenetatu bu'ka kiwo sake, alu'a yu'ka.”
25393	LUK 9:23	Payomwi po, ngaabakia bandu boti, “Mundu ywoywoti mana kapala panga mwanamasi' ywangu', aikane mwene, aupu'twe nsalaba wake kila lisu'ba, na anibi'ngi'ye.
25397	LUK 9:27	Nimmakianga kakape panga, kubi na bi'ngi' papanopano baapanga banawaali wangali kuubona Ukulungwa wa Nnu'ngu'.”
25403	LUK 9:33	Bai, bandu bo abi'li' pabaabile kababu'ka, Petili aammakie Yesu, “Mpi'ndo, yanogeleli twenga tukatama pano! Bai, tusenge isewe itatu, simo sako, simo sa Musa na si'ngi' sa Elia.” Kwo baya nyo kakape, aakitangiteli salongelage.
25405	LUK 9:35	Lilobe lyayu'wanike bu'ka kulyunde, “Ayu' nga Mwanawangu' ywaninsawile, mumpi'kani ywembe.”
25408	LUK 9:38	Apo, mundu yumo mukipi'nga si'lu', ngakatuya lilobe aabaite, “Mwalimu, nendakulu'ba sonde li'li'li' unninguli mwanawangu'. Mwanawangu' we yu'yu' bai!
25410	LUK 9:40	Naalu'bite banamasi' bako bakammi'nge, lakini baakombwili.”
25411	LUK 9:41	Yesu ngabaya, “Mwenga mwa lubelekwo lwangayu'wa mwamukana kumwu'bi'lya Nnu'ngu'! Nilu'a tama na mwenga na kunkomeya, mpaka pakubawi?” Payomwi kwalaluya lyo, ngammakia aywo mundu, “Unnete mwana wako pano.”
25414	LUK 9:44	“Muyu'we masikilo mugayu'we makowe gano. Mwana wa Mundu ayenda songelwa, no yingya mumaboko ga bandu.”
25418	LUK 9:48	Ngaabakia, “Mundu ywoywoti ywampokya mwana nsene yu' kwa lina lyangu' anipokya nenga, na ywoywoti ywanipokya nenga ampokya ywanitumike. Kwa mwanjaa, yu'lu' ywabile nsene kuliko boti pakati yinu, ywembe nga nku'lu' kulikoni boti.”
25419	LUK 9:49	Yoani ngalongela, “Mpi'ndo, tumweni mundu yumo kabi'nga moka kwa lina lyako, natwenga twapayite kunkanikiya mwanjaa, ywembe aabileli mukipi'nga situ.”
25420	LUK 9:50	Lakini Yesu ngammakia, “Kanemunkanikiye, yu'lu' ywakotoka taukana na mwenga ai kummalyo yinu.”
25424	LUK 9:54	Bai, banamasi' bake Yoani na Yakobi pabagabweni go, ngababaya, “Bwana, upala twamulise mwoto uuluke bu'ka kunani waalangamise?”
25427	LUK 9:57	Pabaabile mumwanja, mundu yumo aammakie Yesu, “Nalu'a kuki'ngama kwokwoti kwawayenda.”
25428	LUK 9:58	Yesu ngaabaya, “Ibweya babile na mapango gabe go tama, na iyuni iyumba yabe, lakini Mwana wa Mundu ywembe ntu'pu' poogonjo.”
25429	LUK 9:59	Wayomwi po, aammakie mundu ywi'ngi', “Uniki'ngame.” Lakini mundu ywo ngayangwa, “Bwana, uniyi'ki'ti'ye wi'ti' nikasike tati' bangu'.”
25430	LUK 9:60	Yesu ngayangwa, “Waleke babawile basikane bene na bene, lakini wenga uyende ukaale makowe ga Ukulungwa wa Nnu'ngu'.”
25431	LUK 9:61	Na mundu ywi'ngi' aatikummakia, “Bwana, naalu'a kubi'ngi'ya lakini uniyi'ki'ti'ye wi'ti' nikaalage bandu ba kasangu',”
25432	LUK 9:62	Yesu ngammakia, “Ywoywoti ywakamwa lingumbo, na kaatumbwa li'ma ku'no kaalinga nsu'gu', aywo apwaikali kwa Ukulungwa wa Nnu'ngu'.”
25434	LUK 10:2	Aatikwabakia, “Mauno gatwi'la, lakini auni bali'nganali. Kwa nyo, munnu'be Bwana mwene nng'unda alete auni munng'unda wake.
25437	LUK 10:5	Na kila nsengo wamulu'a yingya mwatumbwe kwapanga abali kamwabakia, ‘Amani ibe pansengo wu'no.’
25441	LUK 10:9	Mwatepwe atamwe bababile kwo, mwabakie bandu, ‘Ukulungwa wa Nnu'ngu' umwegelile mwenga.’
25443	LUK 10:11	‘Ata lyu'ku'mbi' lya kilambo sinu lyalunamati mumagu'lu' gitu, twendapaapata kwo kana kwinu. Lakini mutange panga Ukulungwa wa Nnu'ngu' wegelile.’
25445	LUK 10:13	“Wakibona wenga wa Kolazini! Wakibona wenga wa Betisaida! Keende mangelongelo gagapangike kasinu, gakapangika ku'lu' Tilo na Sidoni, sai'no bawati mabunia bu'ka palipite no tama muligu, kababuyangania kwa Nnu'ngu' wabe.
25447	LUK 10:15	Na wenga wa Kapalanaumu buli! Ulu'a kwikatuya mpaka kunani? Ulu'a tu'mbu'yi'lwa mpaka kumambi'.”
25448	LUK 10:16	Aayendeli baya, “Ywampi'kania mwenga, anipi'kania nenga na yu'lu' ywakana kumpokya mwenga, akana kunipokya nenga. Na ywoywoti ywakana kunipokya, akana kumpokya yu'lu' ywanitumike.”
25449	LUK 10:17	Bu'kapo balu' sabini na abi'li', ngabaki'li'bu'ka ku'no kabanapusika, “Bwana, ata moka gendatuyu'wa kwa lina lyako.”
25450	LUK 10:18	Yesu ngaabakia, “Namweni Ibilisi katu'mbu'ka bu'ka kunani kati njai.
25452	LUK 10:20	Lakini kanemunapusike mwanjaa moka gendakunnyu'wa ila, munapusike kwa mwanjaa maina ginu gaandikilwe kunani.”