23233	MAT 1:20	A mwerin ah lemehda me, Sohnloang in Koaunno men pwokkoang ih nehn ah oarmoan pwehng ih, “Joseph nihn David, joah mijik in oaloa Mary wiahkihla pahioamw, pwa dahkij ih lijaiankihda jang Ngen Joarwi.
23234	MAT 1:21	Ih pirin noaisikihdi jermwein men, koawoa en kioang oadoa Jesus, pwa Ih pirin doaroahla Nah armaj jang nehn diparaihok.”
23236	MAT 1:23	“Meipwonno pirin lijaianda, noaisikihdi jermwein men, ma irai pirin kioang oadoa Emmanuel,” (woahwoahki “Koahs pwilpwili kisai”).
23240	MAT 2:2	kalkalelpoak wija ma jeri siksikko noaisikdi mine, nahmwarkihn mihn Jew kan. Irai pwa, “Kamai kapangda Ah ujuhwo palimese in loannge ioar kamai indoahng pwongi Ih.”
23242	MAT 2:4	Ih panginpene Jamwrou laplappok apel jounpadahk in kojonneddok, ih kalelpoak iparai “Ia wija Messiah pirin noaisikdi?”
23243	MAT 2:5	Irai japoang pwa, “Nehn Bethlehem nehn wein Judea, pwa ioar mehwa joukohppo insingehdi:
23244	MAT 2:6	‘Koawoa, Bethlehem, nehn wein Judah, jaudi koawoa, keiou siksik nehn pwungen koaun in Judah kan, pwa jang ipoamw emen koaun pirin indoa ma pirin kahlwa noai armaj in Israel kan.’”
23246	MAT 2:8	ih kadarla irai Bethlehem pwehng irai, “Alwe rapahki mwehu jeriho. Ma kamwai kapangda Ih, kamwai pakairkihdohng ngoahi, pwa ngoahi en pel pwili alwe pwongi Ih.”
23251	MAT 2:13	Nehn irai ne inla, sohnloang in Koaunno men pwokkoang Joseph nehn ah oarmoan. Sohnloanngo pwehng ih, “Pwohrda oaloa jerihen pwilihki inahu kaukihdihla ara Egypt. Mine oaroh ngoahi kapwa pwehng koawoa, ngehd kamwai en japahldo, pwa Herod raprapahki jerihen pwa ih en kojukdi.”
23253	MAT 2:15	mine o oaroh lel en Herod mehdi. Me ne kapwaihahda dahkij ma Koaunno ne pwa jang ipen joukohppo, “Ngoahi pangin noai jermweinno jang Egypt.”
23256	MAT 2:18	“Ngilloau indoa joang nehn Ramah, ngilen joang koalik, Rachel ma joangjoangjoangki nah jerihok, johpwa nimen injenmwahula, pwa jerihok ne mehdi.”
23258	MAT 2:20	“Pwohrda,” Sohnloanngo pwehng ih, “oaloa jerihen apel inahn kamwai japahlla Israel, pwa irai ma jongjong in kojukdi jerihen ne mehdi.”
23261	MAT 2:23	Peneineiho inla koaujoanla nehn kahnihmw oau adanki Nazareth. Me ne pel pwoaida dahkij ma joukohppok ne kohpda: “Ih pirin wiahla mihn Nazareth.”
23263	MAT 3:2	ih pwa, “Kamwai koluhla pwa Wein nehnloannge ne koaroando.”
23264	MAT 3:3	John ioar woalwa ma joukohppa Isaiah pwa: “Ngilloau ma kin poangpoangpoang nehn japwsoahn: ‘Kamwai koaunopda alin Koaunno, kamwai kainenehla Ah al kan ma Ih pirin alu loaloa!’”
23268	MAT 3:7	A nehn a kapang dirin Pharisee apel Sadducee allaluhdo ipoa pwa en poapdaij, ih pwehng irai, “Kamwai sinekpwi, inje pwehng kamwai pwa kamwai kak pisjang koaloklok in Koahs ma nimenoar lel kamwai?
23273	MAT 3:12	Ih kol nah poahkko, onopdahng pwa en kasohrohrihpijoang liporrohn wihd kan jang in kilinnok. Ih pirin nekidla wah kan nehn johkohu, a okojla kilinnok nehn oaiho ma johkak kunla.”
23275	MAT 3:14	A John jong en kauhdi, pwehng Ih, “Ngoahi anahne koawoa en poapdaiji ngoahi, a koawoa ken indoa ipoai?”
23276	MAT 3:15	Jesus japoang, “Joah kauhdi, pwa ioar koajoandi wa me, pwa ioar ma koanoahng kisa kapwaihahda kupwur en Koahs.” John ken pwungkihla.
23278	MAT 3:17	Ngilloau jang nehnloannge pwa, “Me ioar noai jermwein kajampwalwa, ma Ngoahi keiou ipwilki.”
23281	MAT 4:3	John Kajongjonngo indoa pwehng Ih, “Ma koawoa nihn Koahs, pwehng sakai pwiai en wiahla pilahwa.”
23282	MAT 4:4	Jesus japoang, “Ne insingdi nehn puk joarwi: ‘Jaudi pilahwahr doari armaj kak mourki pwa lalkan ohroj ma kin indoa jang ipen Koahs.’”
23284	MAT 4:6	pwehng Ih, “Ma koawoa nihn Koahs, lujdihwe pwa ne insingdi nehn Puk Joarwi: ‘Ih pirin ruwoj nah sohnloanngok doahr koawoa, irai pirin kolkihda koawoa poahrai pwa ehmmwen kan en joah ohla pohn sakai.’”
23285	MAT 4:7	Jesus japoang ih, “Ne pel insingdi: ‘Joah kajongjongi Koaunno oamw Koahs.’”
23287	MAT 4:9	Jehsen pwehng Jesus, “Mehpwiai ohroj ngoahi pirin kioang koawoa, ma koawoa rukdi pwongi ngoahi.”
23288	MAT 4:10	Jesus pwehng ih, “Alwe jang Ngoahi, Jehsen! Pwa ne pel insingdi, ‘Pwongi Koaunno oamw Koahs, papah Ih kalahpwuk.’”
23293	MAT 4:15	“Nehn wein Zebulun apel Naphtali, ipen jeddo, oaloap Pillap Jordan, nehn Galilee wija ma mihn likin dir mine!
23294	MAT 4:16	Armaj ma mine nehn ros pirin kapang maram koalik oau. Araihok ma mine nehn japw ros apel mehdi, marammo pirin dakarda.”
23295	MAT 4:17	Jang anjoauwo inla Jesus sapda padahk, “Wikjang dipamwai kan, pwa Wein nehnloannge ne koaroando.”
23297	MAT 4:19	Jesus pwehng ara, “Kamwa indoa pwilihla Ngoahi, a Ngoahi pirin wiahkihla kamwa sohnloakjidi armaj.”
23302	MAT 4:24	Rongin Ih lel wija ohroj nehn Syria, armaj kan wahdohng Ih ohroj ma johmwehuki joangjoangoan johmwehu, irai kan ma anki moadoak koalik, irai kan ma ngen jaus dilloang loaloa, pel irai kan ma anki epilepsi apel mwoasor — Ih kemwehuwihla ohroj.
23303	MAT 4:25	Pokon koalik pwilihla Ih wija ma Ih inla — armaj jang Galilee, jang Decapolis, jang Jerusalem, jang ohroj Judea, apel jang palimese in Pillap Jordan.
23306	MAT 5:3	“Meid pai irai kan ma anahne ngen, pwa arai pirin johjohki Wein nehnloannge.
23314	MAT 5:11	“Meid pai kamwai ma armaj lahlahwe, apel koalkoa kamwai, apel karaunihki kamwai joang likamw apel japwung ohroj pwa Ngoahi.
23315	MAT 5:12	Kamwai injenmwahu apel malau pwa kijakij koalik joujouwi kamwai nehnloannge, pwa ioar pel joangwahr irai wiahng joukohppok mwohn kamwai.”
23316	MAT 5:13	“Kamwai ioar jed in jampah. A ma nimen jeddo johla nime, joh mehkij kak en wiawihoang pwa en pwuroahng minehda nime. Johla kaspoan jeddo, ioarroar en kerpwihekla pwa armaj kan en alu puwoa.
23317	MAT 5:14	“Kamwai ioar maram in jampah. Kahnihmw oau ma mine pohn dol oau johkak oakkoakla.
23319	MAT 5:16	En pel doahr amwai maram en janjalda mwohn armaj, pwa irai en kapang amwai wihwia mwehu kan apel kapngahki Jamamwai nehnloannge.”
23320	MAT 5:17	“Joah lemleme pwa ngoahi indoahng koauwehla Kojonned in Moses ke pel padahk in Joukohppok; Ngoahi joah indoahng koauwehla arai padahk kan, a Ngoahi indoahng kapwaihahda.
23323	MAT 5:20	Ngoahi pwehng kamwai, ma amwai wihwia mwehu joah mwehu jang en jounpadahk in Kojonned apel Pharisee‑ok kamwai uhdahn johkak dilda nehn Wein nehnloannge.”
23324	MAT 5:21	“Kamwai ne rong padahkkok ma mihn mehjjok oaloa, ‘Joah kojukdi armaj; emen ma kojukdi armaj pirin lelloang kadeik.’
23325	MAT 5:22	A Ngoahi pwehng kamwai: emen ma lioas oang riah pirin lelloang kadeik. Pel oau, emen ma pwehng riahu, ‘Pweipwei men koawoa,’ pirin pel wijikla mwohn Mwoalen Koapwung. A emen ma pwa, ‘Koawoa Iahk!’ ih kak lel oang nehn keper in oaiho nehn ehl.
23328	MAT 5:25	“Ma mine emen pirin wahlahng koawoa nen mwoalen koapwung, pispis koajoanehdi nehn pwungamwa mwohn ah wahla koawoa ipen jounkoapwung kan, doar koawoa ken wijikla nehn kalpwuhj.
23329	MAT 5:26	Ngoahi pwehng koawoa in mehlel, koawoa johkak pisla oaroh ngehd koawoa en dupukla pwaipwanid ohroj.”
23330	MAT 5:27	“Kamwai ne rong padahk paso, ‘Joah kamwahl.’
23333	MAT 5:30	A ma loap kidal kahrehng koawoa en wia dihp, poaloahjang kerpwihla. Mwehuwoang koawoa en luhjjang ekij in palwoaroamwen jang palwoaroamwen ohroj en kerpwihekla nehn ehl.”
23334	MAT 5:31	“Kamwai ne kidal da kojonneddo pwa, ‘Emen ma mweijang pahioahu en kioang ih kijinlikoau in kamweid.’
23335	MAT 5:32	A Ngoahi pwehng kamwai, ma woalmen mweijang pahioa, jang in kahrpoahioau likin kamwahl, ih ne kahrehioang liho nehn kamwahl, a ma emen woal painkihda liho, ih ne mine nehn dipen kamwahl.”
23336	MAT 5:33	“Kamwai ne rong da ma ne pweiekkoang mihn mehjjok. ‘Joah koauwehla oamw kahula, a kolkol oamw inoau oang Koaunno.’
23340	MAT 5:37	Amwai sikesik en kin mine in ‘Eh’ ke ‘Joah’; a ma daulihla a kin sapjang ipen me juweddo.”
23341	MAT 5:38	“Kamwai ne pel rong pwa. ‘Pwoaroan maj oau dupukki pwoaroan maj oau, a ngihpas dupukki ngihpas.’
23345	MAT 5:42	Ma emen poaki koawoa mehkij koawoa mweidoahng, ma emen poaki koawoa mehkij pwa ih en kajpahlihdo mwuhr pel mweidoahng.”
23346	MAT 5:43	“Kamwai ne pel rong Ih ne pwa, ‘Ipwilki mihn ipoamw a lioassoang oamw imwinsihsi.’
23351	MAT 5:48	Kamwai en unjek doahroar Jamamwaiho nehnloannge ma unjek.”
23352	MAT 6:1	“Kanaihoahng kamwai en joah wia pwa amwai wihwia mwehu kan en janjal mwohn armaj pwa irai en kapang kamwai. Ma kamwai wia me, nen joh amwai pwaij jang Jamamwaiho nehnloannge.
23353	MAT 6:2	“Doari, nehn amwai pirin kijkijoa emen ma anahne, joah kalohkihjili doahr mwalaun kan kin wia nehn jinakoke kan pel nehn al kan pwa armaj en kapnga. Ngoahi pwehng kamwai in mehlel, irai ne oaloa dupkoan irai doadoahk ohroj.
23355	MAT 6:4	pwa oamw kijakij en wiawi in rir. Doar oamw Pahpa, ma kin kapang mehkan ma kin wiawi in rir, pirin dupuk koawoa.”
23356	MAT 6:5	“Nehn amwai kin kapkap, joah wia doahr mwalaun, pwa irai kin perenki kapkap, uhda nehn jinakoke kan apel nehn koaimw in al kan pwa armaj en kapang. Ngoahi pwehng kamwai in mehlel, irai ne oaloa dupkoaraiwa pwon.
23358	MAT 6:7	“A nehn amwai kapkap, joah pwurur doahr armaj rosros kan, pwa irai kin lemleme pwa arai kohs kan nen rong irai pwa dir irai lallok.
23360	MAT 6:9	Doar me, ioar doahr oamw pirin kapkap: ‘Jamamai nehnloannge, oadoammwen en joarwi,
23364	MAT 6:13	joah kahlwahng kamai nehn jongjong, kapisla kamai jang ipen ih ma naunahu. [Oamw mwei ioarroar Mweiwa, ma sihkei apel ling allaluhla. Amen.]’
23365	MAT 6:14	“Pwa ma kamwai mahkoahng irai kan ma wia naunahng kamwai, Jamamwai nehnloannge pirin pel mahkoahng kamwai.
23366	MAT 6:15	A ma kamwai johpwa mahkoahng arai japwung kan, Jamamwai nehnloannge pel jehpirin mahkoahng kamwai.”
23367	MAT 6:16	“Nehn amwai kin kaijihjol, kamwai joah wia mwomw doahroar mwalaunnok kin wia, pwa irai kawikla mwomwoarai en kajalehda pwa irai kaijihjol. Ngoahi pwehng kamwai in mehlel, irai ne oaloa dupkoarai.
23369	MAT 6:18	pwa en joah janjal oang armaj pwa koawoa kaijihjol, a oang oar Joamoamw, ma kisai johkak kapang, a joamoamw, ma kin kapang mehkan ma wiawi in rir, pirin dupuk koawoa.”
23370	MAT 6:19	“Joah nekidpene oang pein koawoa oamw pai kan nehn jampah, wija woahd a mer johkak koauwehla, pel jounpirap kan kak dilda pirapoahla.
23372	MAT 6:21	Pwa wija oamw pai kan mine, ioar mohngiongimmwen pel mine.”
23373	MAT 6:22	“Maj ioar lahm in palwar. Ma pwoaroan mijoammwen kan mwehu, palwoaroamwen nen dirin maram.
23374	MAT 6:23	A ma pwoaroan mijoammwen kan nauna, palwoaroamwen nen pel ros. Doar ma marammo nehn koawoa ros, ia woahr koalikin rossoauwe!”
23375	MAT 6:24	“Joh emen kak papah koaun roahmen. Ih kakkoar lioassoang emen a ipwilki emen, ke ih nen poadidi oang emen a mwamwahlki emen. Koawoa johkak papah Koahs apel mwani.
23376	MAT 6:25	“Ioar Ngoahi pwehngki kamwai, joah pwunodki amwai mour, da kamwai pirin kang ke nim; ke oang palwoaroamwaikan, da kamwai pirin likkoauki. Mour joah kajampwal jang mwinge? Ke palwar joah kajampwal jang likkoau?
23379	MAT 6:28	“Mihnda kamwai pwunodki likkoau? Kamwai kapang kiepw in nehn japw kan, nehn irai kin koapkoapda; irai johkin doadoahk ke wiahda arai likkoau.
23382	MAT 6:31	Doari, joah pwunod, pwa, ‘Da kamain kang? Ke da kamain nim? Ke da kamain kol?’
23385	MAT 6:34	Doari, joah pwunodki lakapw, pwa lakapw kapwa pwen pwunodki pein ih. Johpwa anahne kapsahng apwal kan ma oauwoau rehn kan kin wahdo.”
23386	MAT 7:1	“Joah kadeik armaj kan, pwa doar Koahs kadeikda kamwai.
23389	MAT 7:4	Ia mwomwen oamw en kak pwehng rioammwen, ‘Menlau, mweidoahng ngoahi en kihjang dipoar siksik kij nehn mijoammwen,’ ma anjoauwohr pwilein suhkoahioau mine nehn mijoammwen?
23391	MAT 7:6	“Joah kioang doahk mehkij ma Joarwi; pwadoar ih pwurdo koahdi kamwai; kamwai joah kerpwihla nihmwai sakai kajampwal kan oang pij kan, pwa ioarroar irai nen wia siakpijoang.”
23392	MAT 7:7	“Poaki a kamwai pirin oaloa; Rapahki a kamwai pirin diar; lesles a wanihmmwo pirin risdahng kamwai.
23397	MAT 7:12	“Wiahng epwi da ma kamwai nimen irai en wiahng kamwai, pwa me oaroahpene Kojonned apel padahk in Joukohp kan.”
23398	MAT 7:13	“Dilda nehn wanihmw Soahsiksik. Pwa wanihmmwo inlahng ehl pwen sahlaplap pel allo pwen koalik apel moangoai a armaj dir alu loaloa.
23399	MAT 7:14	A wanihmmwo inlahng mour pwen soahsiksik, allo pwen apwal doar armaj jipid diarda.”
23400	MAT 7:15	“Kamwai mwajahni mwehu joukohp likamw kan. Irai indoa ipamwai in mwomwen jihpw, a loaloarai doahr wolf ingkelpwi.
23405	MAT 7:20	Ioar, jang in wah kan kamwai nen kidalki joukohp likamw kan.”
23406	MAT 7:21	“Jaudi ohroj ma panginki Ngoahi, ‘Koaun, Koaun’ pirin dilda nehn Wein nehnloannge, a araihokkoar ma kin kapwaihahda injenen Joamoaiho ma mine nehnloannge.
23407	MAT 7:22	Rehnin kadeikko armaj dir pirin pwehng Ngoahi, ‘Koaun, Koaun, jaudi kamai ma kin wia kokohp in oadoammwen, pel in oadoammwen kamai kin kaujjang ngen jaus pel wia joangoan manman dir?’
23408	MAT 7:23	A Ngoahi pirin pwehng irai, ‘Ngoahi jehjoa kamwai. Alwe jang ipoai, kamwai armaj nauna!’”
23409	MAT 7:24	“Doari emen ma kin rong oai padahk kan a wia, ih doahroar woal loalkoanngo ma kouda umwahu pohn sakai.
23411	MAT 7:26	“A emen ma rong Oai padahk kan a johpwa wia doahr woal pweipweiho ma kouda umwahu pohn pik.
23412	MAT 7:27	Wuddo mwoardi, lapakehda, enngo pohk ummwo, ummwo kipla ripoadpoaddi.”
23416	MAT 8:2	Woalmen johmwehu lepa indoa ipen Jesus, poadpwomwla pwehng Ih, “Maing, ma koawoa nimen, koawoa kak kamwkelehda ngoahi.”
23417	MAT 8:3	Jesus kailla poah pukkoang woallo, “Ngoahi nimen,” Ih pwehng ih, “Ken mwakelkelda!” Anjoauwohr woallo mwehula jang ah lepa.
23418	MAT 8:4	Jesus pwehng woallo, “Kapang! Pwa koawoa en johpwa pwehng emen. Inla kajalehng jamwrou a koawoa wia oamw meiroang joanngo ma Moses koajoanehdi, en wia oamw mihn kadehde oang irai.”
23420	MAT 8:6	“Maing,” ih pwehng Ih, “noai lidu men mine in ummwo, mwoasorla apel inenin weiroak.”
23421	MAT 8:7	Jesus pwehng woallo, “Ngoahi pirin inla kemwehuwihla ih.”
23422	MAT 8:8	Koaun in jounpeiho pwehng Jesus, “Maing, ngoahi joah warroang Koawoa en indoa nehn umwoaiho. Pwen lalloar, ah noai liduhwo ne mwehula.
23423	MAT 8:9	Pwa ngoahi pel anki manman pohn jounpei kan pehn ngoahi. Ngoahi kin pwehng emen, ‘inla,’ ih inla; a oang emen, ‘indoa,’ ih indoa. Ngoahi pwehng noai liduhwo, ‘Wia me,’ ih wia.”
23424	MAT 8:10	Nehn en Jesus rong me, Ih pel pwuriamweikihla pwehng irai ma pwilpwili ih, “Ngoahi pwehng kamwai in mehlel, Ngoahi kahjik diar emen nehn Israel ma anki joangoan pwojon koalik doahr me.
23426	MAT 8:12	A sohn Weiho pirin kerpwihekla likin, oang nehn rosso, wija ma irai pirin joang apel keikeikeisakai.”
23427	MAT 8:13	Doari Jesus pwehng koaun in jounpeiho, “alwe in umwoammwo, da ma koawoa kamehlele en wiawi.” Nah liduhwo mwehula Anjoauwohr.
23428	MAT 8:14	Anjoauwo Jesus lel nehn umwen Peter‑o, Ih kidalda pwa inen pahien Peter‑o johmwehu karkar.
23431	MAT 8:17	Me en kapwaihahda da me joukohp Isaiah pwa: “Ih oaloahda asai jasihkei kan pel wahda asai johmwehu kan.”
23433	MAT 8:19	Jounpadahk in kojonneddo men indoa ipoa pwehng Ih, “Jounpadahk, ngoahi en pwili koawoa wija ohroj koawoa inla.”
23434	MAT 8:20	Jesus japoang, “Fox mine arai lipw, mahnsang kan mine arai paj, a Nihn‑Armaj joh wija Ih en koammoaldi.”
23435	MAT 8:21	Emen sohnpadahk pel pwehng Ih, “Maing, mweidoahng ngoahi en inla jaripdi oai pahpahu mijkoalkoal, a ngoahi indoa pwilihla Koawoa.”
23436	MAT 8:22	A Jesus pwehng ih, “Pwili Ngoahi, a mweidoahng mehdi kan en jaripdi pein arai mehdi.”
23439	MAT 8:25	Sohnpadahkkok inla panginda Ih pwehng Ih, “Maing, doaroahla kisai! Kisain ken mehdi!”
23440	MAT 8:26	Ih japoang, “Siksik amwai pwojon, Amwda kamwai ke majpwehk.” Ih uhda ruwoje enngok apel nohk en uhdi, anjoauwohr melmello ken molundi.
23441	MAT 8:27	Sohnpadahkkok pwuriamweila, idoak nehn pwungarai, “Armaj dahmen me? Ma eng apel no kin peikkoang!”
23443	MAT 8:29	Anjoauwohr ara wering Jesus pwehng Ih, “Koawoa Nihn Koahs, da koawoa nimen wiahng kama? Koawoa indoahng koalkoa kama mwohn anjoauwo?”
23445	MAT 8:31	Ngen jaussok poaki Jesus, “Ma koawoa pirin kajroahla kama, kadarla kama nehn pijjok.”
23446	MAT 8:32	“Inla!” Jesus pwehng ara. Doar ara ken inla dilloang nehn pijjok, nehn anjoauwohr pijjok kijoudihla duhla nehn lehu.
23450	MAT 9:2	Woalpwi wahdohng Ih woal mwoasor men mine pohn rohp oau. Anjoauwo ma Jesus kapang arai pwojon, Ih pwehng woal mwoasorro, “Koapwoarpwoar, noai jeri! Dipoamw kan ne lapwda.”
23451	MAT 9:3	A epwi Jounpadahk in kojonneddok ma mine o lemlemehki pwa “Woal mene lahlahwe.”
23452	MAT 9:4	Jesus kidal arai lamlam, doar Ih ken pwa, “Amwda kamwai ke lamlam nauna nehn mohngiongimwai kan?
23453	MAT 9:5	Ia minno moangoai, Ngoahi en pwa, ‘Dipoamw kan ne lapwda,’ ke, ‘Uhda alu’?
23454	MAT 9:6	A Ngoahi en kamehlele oang kamwai en kidal pwa Nihn‑Armaj anki manmanin mahkoahng dihp pohn jampah.” Ih pwehng woal mwoasorro, “Uhda, oaloa kioammwen koawoa inla nehn umwoammwo.”
23457	MAT 9:9	En Jesus injang o nehn Ah allaluhla, Ih kapangda woal men, adanki Matthew, jounrik daksis, ma onnonohn nehn ah oahpisso. Jesus pwehng ih, “Pwilihla Ngoahi.” Doar ih ken uhda pwilihla Ih.
23458	MAT 9:10	Nehn en Jesus mwingmwinge nehn umwen Matthew‑o, jounrik daksis apel armaj dipan dir indoa pel mwinge pwili Ih apel nah sohnpadahkkok.
23459	MAT 9:11	Pharisee pwi kapang me pwehng nah sohnpadahkkok, “Amwda amwai Jounpadahkken ke pwili jounrik daksis pel armaj dipan kan mwinge?”
23460	MAT 9:12	Nehn Ah rongda me, Jesus pwa, “Jaudi armaj sihkei ioar anahne jounwini, a armaj johmwehu.
23461	MAT 9:13	Inla woahwoahkihda woahwoahn mehkije jang nehn Puk Joarwi: ‘Ngoahi mwehuki kadek, jaudi meiroangin mahn.’ Ngoahi joah indoahng pangin armaj pwung, a armaj dipan kan.”
23462	MAT 9:14	Doar nihn John jounpoapdaij sohnpadahkkok indoa idoak oang Jesus, “Amwda kamai apel Pharisee‑ok kin dod amai kaijihjol a nihmw sohnpadahk kan ken johkin kaijihjol?”
23463	MAT 9:15	Jesus japoang, “Imdoahr nihn woallo ma pirin koapwoapwoaud sohnkaparrok en injinjuwed ma ih minmine iparai? A oau anjoau ma pirin indoa ma woal kamwohddo pirin wijik jang irai; doari, ioar anjoauwo irai pirin kaijihjol.
23464	MAT 9:16	“Joh armaj kin doahng dipwin likkoau kapw kij in likkoau dehn oau, pwa dipwin likkoau kappwo nen pworpene doapwdoapwjang in likkoau merinngo, nehn kakoalikihla soahroakko.
23465	MAT 9:17	Joh armaj kin widekihoang wain kapw nehn dohn wain dehn. Pwa dohn wainno nen pwokpijoang, wainno widekla, dohn wainno ohla. Wain kapw en widekihoang nehn dohn wain kapw, a kapwa nekdekla.”
23466	MAT 9:18	Nehn Ah pwahpwahpwa me, koaunin mihn Jew men indoa poadpwomwla mwohn Jesus pwehng Ih, “Noai jerpeinno kapwehsen mehdi. A indoa kioang poahmmwen puwoa, pwa ih en mourda.”
23469	MAT 9:21	Liho pwehng pein ih, “Ma ngoahi pwen kodurroar Ah likkoauwo, ngoahi nen mwehula.”
23470	MAT 9:22	Jesus jipwoalla pwehng ih, “Koapwoarpwoar, Noai jerpein, oamw pwojon ne kasihkeida koawoa.” Liho mwehula anjoauwohr.
23472	MAT 9:24	Ih pwehng irai, “Kamwai dilla, jerpeinne johpwa mehdi, a ih moair.” A irai uruhrki Ih.
23475	MAT 9:27	Jesus daudauluhlla jang wijahu, woal majkun roahmen kaujla Ih, poangpoang, “Mahkoahng kama, nihn David!”
23476	MAT 9:28	Nehn Ah ne dilda nehn umw, woal majkunnok indoa Ipoa, a Ih peidek oang ara, “Kamwa kamehlele pwa Ngoahi kak kemwehuwihla kamwa? “Eh, Koaun,” ira japoang.
23477	MAT 9:29	Doar Ih jair mijara pwa, “Me en wiawi jang in amwa pwojon;”
23478	MAT 9:30	ira pwuroahng kapangda wija. Jesus pwehng ira, “Kapang pwa johpwa emen en kidal mehkije.”
23481	MAT 9:33	Anjoauwo ma ngen jausso diljang ipoa, woal loahsoanngo lallalda. Pokonno inenin pwuriamwei pwa, “Kahjikkoar mehkij doahre wiawi nehn Israel.”
23482	MAT 9:34	A Pharisee‑ok pwa, “Koaunin ngen jaus kan ma kioang Jesus manman in kajroahjang ngen jaus.”
23485	MAT 9:37	Doar Ih pwehng Nah sohnpadahkkok, “Roakke koalik a sohn doadoahk jipid.
23486	MAT 9:38	Poaki koaun in roakke en kadardo sohn doadoahk dir pwa en doadoahk nehn mwoaswello.”
23491	MAT 10:5	Sohnpadahk eijek roahmenno Jesus kadarla kioang irai kaweid pwiai: “Johpwa inla nehn pwungen mihn likin kan ke inla nehn koaujoan in mihn Samaria kan.
23497	MAT 10:11	“Nehn amwai dilda nehn oau koaujoan ke koujapw, rapahkihda armaj men ma nimen kamwain mine nehn umwahn oaroh kamwai pwur.
23502	MAT 10:16	“Kamwai Rongmwehu Ngoahi kadarwe kamwai doahroar jihppwi nehn pwungen wolf. Kamai uhdahn pirin kanaihoahng kamwai doahroar sinek kan apel maid doahroar mwurei kan.
23507	MAT 10:21	“Armaj pirin pangla riarai kan pwa en mehdi, pahpa kan pirin pangla nihrai jerihkan; Jerihkan pirin uhwoangda arai pahpa kan pwa irai en kojkojdi.
23509	MAT 10:23	A ma kamwai koaloklok nehn oau koaujoan, kaulahng nehn oau koaujoan. Ngoahi pwehng kamwai in mehlel, kamwai nen johpwa koarjoahla koaujoan in Israel kan mwohn Nihn‑Armaj pirin pwurdo.
23510	MAT 10:24	“Joh sohnpadahk men laplap jang ah jounpadahk: joh lidu men laplap jang ah koaun.
23512	MAT 10:26	“Kamwai en joah mijik armaj. Me ohroj ma kin oakkoakla, uhdahn pirin janjalda, ke me rir ohroj pirin janjalda.
23518	MAT 10:32	“Emen ma pohneje Ngoahi mwohn armaj, Ngoahi pel pirin pohneje ih mwohn Joamoaiho nehnloannge.
23520	MAT 10:34	“Johpwa lemleme pwa Ngoahi indoahng wahdo meleilei pohn jampah. Ngoahi joah indoahng wahdo meleilei, a kodlaij.
23523	MAT 10:37	“Emen ma ipwilki jamah ke inah koalik jang ah ipwilki Ngoahi johpwa warroang Ngoahi; emen ma ipwilki nah jermwein ke jerpein koalik ah ipwilki Ngoahi johpwa warroang Ngoahi;
23526	MAT 10:40	“Emen ma kajamwo kamwai kin kajamwo Ngoahi, a emen ma kajamwo Ngoahi kin kajamwo ih ma kadardo Ngoahi.
23528	MAT 10:42	Ngoahi pwehng kamwai in mehlel, ma emen kioang mwoak in pil mwolou oau oang pwilihoai siksik pwiai, ih nen uhdahn oaloa dupkoa.”
23531	MAT 11:3	“Koawoa oar ma John jounpoapdaij ma pirin indoa, ke kamain pel kajkajik emen sohrohr?”
23532	MAT 11:4	Jesus japoang, “Pwurla pwehng John da kamwai rong apel kapang:
23533	MAT 11:5	‘Majkun kan kapangda wija, mwoasor kan alu, irai kan ma anki lepa mwehula, pongpong kan rongda wija, mehdi kan mourda, Rongmwehu ne pel padahk oang armaj joamwoahmwoa kan.’
23534	MAT 11:6	Meid pai armajjok me johpwa peikajalki Ngoahi.”
23535	MAT 11:7	Anjoauwo ma nihn John sohnpadahkkok pwurpwurla, Jesus sapda siksikoahng pokonno doahr John: “Da kamwai inlahki nehn japwsoahn ipen John pwa kamwain kapang? Alek pas jahkkihla enngo?
23538	MAT 11:10	John ioar ma puk joarwi pwa: ‘Koahs pwa, Ngoahi pirin kadarwe Noai jounpakairro mwohn koawoa, ma pirin koaunopda allo mwohn koawoa.’
23544	MAT 11:16	“Da Ngoahi kak karjahkihoang armaj en rehn pwiai? Irai doahroar jerihkan mwindi nehn market kan poangpoanglahng epwi:
23545	MAT 11:17	‘Kamai koajoang oang kamwai, a kamwai johpwa kahlek; kamai koaul ki koaul en mehdi, a kamwai johpwa joang!’
23546	MAT 11:18	John indoa, ih kaijihjol apel joah nim wain, a armaj ohroj pwa, ‘ih dirkihla ngen jaus.’
23547	MAT 11:19	Anjoauwo ma Nihn‑Armaj indoa, Ih mwinge apel nimnim, armaj ohroj pwa, ‘kapang woal menen! Ih mijen mwinge apel sohn nim jakau men, Ih pirienki jounrik daksissok apel armaj jekenkennok!’ En Koahs loalkoang kadehdehda ah wihwia pwung kan.”
23549	MAT 11:21	Ih pwehng irai, “Inenin naunahng koawoa, Chorazin! Pel naunahng koawoa, Bethsaida! Pwa manmannok ma ne wiawihoang kamwai, wiawihoang Tyre pel Sidon, irai ne likkoaukihda likkoauwin injinjuwed pel kamwroahdihoang moalkoahr pohrai, pwa en kajalehda irai ne koluhla apel wikla.
23552	MAT 11:24	Ah koawoa en kidal pwa rehnin kadeikko, Koahs nen kajalehda Ah kalahngan oang Sodom koalik jang oang koawoa!”
23553	MAT 11:25	Anjoauwo Jesus pwa, “Ngoahi kapnga koawoa, joamoai, Koaun in nehnloannge apel jampah! Ngoahi kapnga ki koawoa, oamw kajalehng irai joaloalkoanngok mehkan ma koawoa oakihjang iraihok ma koahiok apel loalkoang in jampah.
23555	MAT 11:27	“Me ohroj ne mweimweioang Ngoahi jang ipen Joamoaiho. Johpwa emen kidal Nahu likin Jamahu, pel johpwa emen kidal Jamahu likin Nahu pwilihki araihok ma Nahu pilda pwa Ih en kajalehng irai Ih.
23556	MAT 11:28	“Kamwai ohroj indoa ipoai kamwai ma ne koakoahkla apel soausoaukihla amwai wijik kan, Ngoahi en kakoammoalihla kamwai.
23558	MAT 11:30	Pwa Oai mihn wijikke ma Ngoahi pirin kioang kamwai, moangoai apel marahra.”
23560	MAT 12:2	Anjoauwo Pharisee‑ok kapang irai, irai pwehng Jesus, “Kapang! Nihmw sohnpadahkkok wia me ma uhwoang kojonned in Sabbath.”
23561	MAT 12:3	Ih japoang, “Kamwai johkin wadek da David wia anjoauwo ma ih apel pwilihoahk mwakohkohla?
23562	MAT 12:4	Ih dilda nehn Umwen Koahs, pwilihoahk kangla pilahwa joarwiho — ma uhwoang kojonned irai en wia, pwa jamwrouwok oar kin kang.
23563	MAT 12:5	Ke kamwai kahjik wadek nehn kojonned en Moses‑ok ma pwa Sabbath ohroj jamwrouwok nehn Umw Joarwi koauwehla kojonned in rehn joarwi a irai johpwa dipanki?
23565	MAT 12:7	Puk Joarwi pwa, ‘Kadek mwehujang meiroang in mahn.’ Ma kamwai woahwoahki lal kamwai nen johpwa koauwe armaj joh dipoa.
23566	MAT 12:8	Pwa Nihn‑Armaj ioar Koaun in Sabbath.”
23568	MAT 12:10	woal men ma mwoasor oaloap poah mine o. Armajpwi pel mine o ma jongjong en kadipoahki Jesus Ah japwung. Irai idoak oang Ih, “Johpwa uhwoang asai kojonned Koawoa en kemwehuwihla armaj johmwehu Sabbath?”
23569	MAT 12:11	Ih pwehng irai, “Ma emen in kamwai nainki jihpw men a ih kipdihoang nehn lipw oau Sabbath, kamwai joah nen pwoakda ih jang nehn lippwo?
23570	MAT 12:12	Ia woahr kajampwalin armaj men jang jihpw men! Doari mwehu en wia me mwehu Sabbath.”
23571	MAT 12:13	Doar Ih pwehng woal mwoasor poahu, “Kailwe poahmmwen.” Doar ih kailla poah doari ken mwehula dauluhl, doahrla loap mwehuwo.
23572	MAT 12:14	A Pharisee‑ok ken injang o pilahnehda irai en kojukdi Jesus.
23576	MAT 12:18	“Noai liduhwa, ma Ngoahi ne pilda. Ih ioar Ngoahi ipwilki, apel perenki, ngoahi pirin kihdahng Ngenihoa puwoa, Ih pirin kalohkihda kadeik oang wei kan.
23579	MAT 12:21	Sohn wei ohroj pirin koapwoarpwoarkihla oadoa.”
23581	MAT 12:23	Pokonno pwuriamweikihla, “Audi Ih ma kijehn kadaudok en David wa me?”
23582	MAT 12:24	A anjoauwo me Pharisee‑ok rongda me, irai pwa, “Kamwai johpwa pwuriamweiki Ah kak kauj jang ngen jaus. Ih kihjang ah manman ipen Beelzebul, koaunin ngen jaus.”
23583	MAT 12:25	Jesus ne kidal da arai lemleme, ioar Ih pwehngkihoang irai, “Wei oau ma uhpene apel peipene nen pwungarai jehpirin mour woaroai. Kahnihmw oau ke peneinei oau ma sowoa kan pel uhpene nehn pwungarai nen uhdahn mwoarpijoang.”
23587	MAT 12:29	“Joh emen kak koauwehla umwen woal sihkei men pwa en pirapoa ah koapwoa kan ma ih johpwa koldi piroahpene woal sihkeiho. Ioar wioapoawahr doari ih kak pirapoa ah koapwoa kan.
23588	MAT 12:30	“Emen ma johkin pwili Ngoahi, kin uhwoang Ngoahi, a ma johkin jeuweje Ngoahi rikpene, kin kamwroahpijoang.
23589	MAT 12:31	Me ioar kahrpoahwa Ngoahi pwehng kamwai, Dihp ke lahlahwe ohroj kak mahkla — a lahlahwe Ngen Joarwi ioar johkak mahkla.
23590	MAT 12:32	Emen ma lahlahwe Nihn‑Armaj, kak mahkla, a lahlahwe Ngen Joarwi pwanah johkak mahkla — apkas ke pel allaluhla.
23591	MAT 12:33	“Ma kamwai poadokdi suhkoa mwehu pas, a wah pirin mwehu. Ma kamwai poadokdi suhkoa nauna pas, wah pirin nauna. Pwa kamwai pirin kidal suhkoa kan ki wahrai kan.
23594	MAT 12:36	“Doari, kamwai en kidal pwa nehn Rehnin Kadeikko armaj ohroj uhdahn pirin pwukoahki arai lallal mwahl ohroj.
23595	MAT 12:37	Pein amwai sikesik kan ma pirin kadeikda kamwai ma kamwai mwakelkel ke dipan.”
23596	MAT 12:38	Jounpadahk in Kojonned apel Pharisee pwi indoa ipen Jesus pwehng Ih, “Jounpadahk, kamai nimen Koawoa en kajalehng kamai oau manmanno.”
23597	MAT 12:39	Jesus japoang, “Ia woahr nauna apel rosros in armaj in anjoau kije! Kamwai poaki manman oau jang Ipoai a manman wahr Ngoahi nen kioang kamwai ioar manman in joukohp Jonah.
23598	MAT 12:40	Pel doahr en Jonah minmine nehn kapehdin mwumw koalikko rehn jiluh pel pwong jiluh, ioar doahr, Nihn‑Armaj, pirin mine pehn jampah rehn jiluh pel pwong jiluh.
23601	MAT 12:43	“Nehn en ngen jaus men kin diljang nehn armaj men, ih kin allaluhjili nehn japwsoahn, rapahki wijahn koammoal a nehn ah johkin diar.
23602	MAT 12:44	Doar ih ken pwehng pein ih, ‘Ngoahi en pirin pwurlahng nehn umwoaiho.’ Doar ih pwurla diarda pwa umwahu ne soahnda, mwakelkel, apel joan.
23603	MAT 12:45	Doar ngen jausso pel pwurla rapahkihda pel ngen jaus ijimen ma nauna jang ih, irai ohroj dilda koaujoanla wijahu. A doari armajjo a kapwa nauna jang mijkoalkoal. Ioar joangoan mour wa me nen wiawi oang armaj nauna in rehn pwiai.”
23605	MAT 12:47	Armaj men pwehng Ih, “Inoammwo apel rioammwok minmine likinno, irai nimen lal oang Koawoa.”
23606	MAT 12:48	Jesus japoang, “Inje inoai? Inje rioai kan?”
23607	MAT 12:49	Doar Ih doklahng nah sohnpadahkkok Ih pwa, “Irai pwiai ioar inoai apel rioaikoa.
23608	MAT 12:50	Emen ma kin wia injenen Joamoaiho nehnloannge ioar rioai woal, rioai li apel inoai.”
23611	MAT 13:3	Ih doadoahkki karajraj pwa en pwehng irai me dihrdir. “Armaj men mine ma inlahng kamwroa ah liporrohk.
23617	MAT 13:9	“Armaj men ma mine sioa mihn rongrong, a ih en rong.”