1	GEN 1:1	Dagudagunai God sapama ba dobu i wosei si tupuwa.
2	GEN 1:2	Kona maranai kega awaika kesana dobu ai i mamana. Dobu wai, niguniguna ba kwebuna ba baidibara boga i sowo potai. Ba God Kanumina boga i wakuwaku tawani.
3	GEN 1:3	Ba God i wona, “Yasegana ina mana.” Ba i ruyasegana.
4	GEN 1:4	Ba yasegana i kinani wai i nuwagaire ba God yasegana ba baidibara i buburanisi.
5	GEN 1:5	God yasegana i yorei kao ba baidibara i yorei pom. I pom ba mara i tom wai kao dagudaguna.
6	GEN 1:6	Kona murinai God i wona, “Parata okowa kaidamonai ba okowa babai basusi yai ina mana.”
7	GEN 1:7	Ba God okowa kaidamonai ba okowa babai i buburanisi. Ba basusi yai parata i terei ba nanakasike i tupuwa.
8	GEN 1:8	Ba parata i terei wai i yorei sapama. I pom ba mara i tom wai kao bairuwaina.
9	GEN 1:9	Ba i wona, “Okowa sapama gaburinai gawara kesanai sini kesanisi, ba gawara gasarina ina rerematara.” Ba nanakasike i tupuwa.
10	GEN 1:10	God gawara gasarina i yorei tano ba okowa si kesanisi wai i yorei nisa. Ba God i kinani wai i nuwagaire.
11	GEN 1:11	Ba God i wona, “Tano ai sinamona ba keyama sina rutiti. Sinamona ba kam ere pesisi ba keyama uwasi ere topesi pesisi nunusi yai dobu ai sina gae.” Ba nanakasike i tupuwa.
12	GEN 1:12	Damanina, tano ai sinamona ba keyama si rutiti, sinamona ba keyama ere pesisi, ba keyama uwasi ere topesi pesisi nunusi yai, dobu ai si rutiti si gae ba God i kinani wai i gaire.
13	GEN 1:13	I pom ba mara i tom wai kao bitonuina.
14	GEN 1:14	Ba yebo God i wona, “Yasegana sapamai sina mana kata kao ba pom sini buburanisi, ba mara kaikaposi, ba bodu ba kwamra, ba kao ba bodu ini matakirisi.
15	GEN 1:15	Ba yasegana sapamai dobu sina ruyaseganei.” Ba nanakasike i tupuwa.
16	GEN 1:16	God yasegana kaikaposi ruwamo i wosisi. Yasegana maragasina wai kao ba kaowai e rauyasegana, ba yasegana kega maragasina wai nawaravi, ba pomai e rauyasegana. Ba gwamegwame yabata i wosisi.
17	GEN 1:17	God yasegana sapamai i terisi kata sita ruyasegana ku dobu.
18	GEN 1:18	Kao ba pom siti badisi ba yasegana ba baidibara siti buburanisi. Ba God i kinani wai i gaire.
19	GEN 1:19	Ba i pom ba mara i tom wai, kona kao bai bataina.
20	GEN 1:20	Ba God i wona, “Aba payapaya yawayawasisi sina pesara okowa sini bonuwisi, ba manu sina robo sapama sini bonuwei.”
21	GEN 1:21	Kata God enaga kasi aba payapayaya kaikaposi damana, ba sawara yawayawasisi ba bobokwayosi ereonowasi, pesisi nunusi yai i wose. Ba okowa si bonuwei ba manu ereonowasi roborobosi pesisi nunusi yai i wose ba God i kinani wai i nuwagaire.
22	GEN 1:22	God i gairenisi ba i wona, “Koi tuwa pesara dobu koi bonuwei.”
23	GEN 1:23	I pom ba mara i tom wai, kona kao nima masiyana.
24	GEN 1:24	Ba God i wona, “Aba payapaya yawayawasisi dobu sini bonuwei ba meyaga aba payapayaya manamisi, ba garagara aba payapayayisi ba tano ai te botete wai ereonowasi pesisi nunusi yai.” Ba nanakasike i tupuwa.
25	GEN 1:25	Ba God garagara aba payapayaya pesisi nunusi yai i tupuvisi. Ba aba payapayaya manamisi ba tano ai te botete wai ereonowasi, pesisi nunusi yai i tupuvisi, ba i kinani wai i nuwagaire.
26	GEN 1:26	Damania ba God i wona, “Pipiya gubati ai tana wosei, kota rutainita. Kata enaga siyauwa, manu, ba aba payapayaya manamisi, ba garagara, aba payapayayisi, ba tano ai te botete wai, ereonowasi yabata sini badisi.”
27	GEN 1:27	Damanina ba God pipiya kona rutainina i wosei. Kona gubanai i wosei, Sebare ba wasike i wosisi.
28	GEN 1:28	God i gairenisi ba i wonisi, “Koi tuwa pesara dobu koni bonuwei ba koni taraparanei. Siyauwa nisai, ba manu kaidamo ai, ba aba payapaya ereonowasi tano ai te botete wai koni badisi ba kona pota kabitamnisi.”
29	GEN 1:29	Ba God i wona, “Keyama uwauwasi ereonowasi, ba keyama uwasi ere pesisi ereonowasi, niko dobu ai a bereberimi wai kami kam.
30	GEN 1:30	Ba aba payapayaya ereonowasi dobu ai te mamana wai, ba manu ereonowasi kaidamonai ba aba payapayaya dobu ai yawayawasisi te mamana wai kasi kam, sinamona matamatagisi a berisi.” Ba nanakasike i tupuwa.
31	GEN 1:31	God awaika ereonowana i tupuvisi ba i kinani wai i gaire saki. I pom, ba mara i tom wai, kona kao nima masiyana ba kesana.
32	GEN 2:1	Damanina ba God sapama ba dobu kamonai awaika ereonowana bubausi yai i wose roboisi.
33	GEN 2:2	God ana saibira i wosewosei wai i wose roboi. Ba kao nima masiyana ba ruwamo kamonai i yakam.
34	GEN 2:3	Ba kao kana bi nima masiyana ba ruwamo God i gaireni ba, kona wai kao kaobaisiyena basuna kona maranai ana saibira ereonowana i kakabi ba i yakam.
35	GEN 2:4	Nikona wai Bada God mekabage sapama ba dobu i wosisi wai, rurutuwina. Kona maranai Bada dobu ba sapama i wosei, wai keyama ba sinamona,
36	GEN 2:5	kega si rutiti. Basuna Bada God kusana kega i porai ku dobu. Ba kega kotoi i mamana ba tano ita bagibagiyei.
37	GEN 2:6	Ba okowa dobu ai si rubusira si gae ba tano tepana ereonowana i piyapiyai.
38	GEN 2:7	Ba Bada God sebare tano momokarinai i wosei, ba yasibe yawayawasina niu niponinai i baini, ba sebare i pipiya.
39	GEN 2:8	Ba Bada God Eden ku maramatana mena masawa i terei, ba sebare i wosei wai namai i terei.
40	GEN 2:9	Ba Bada God keyama bibisaka ereonowasi i wosisi tano ai si rutiti si gae, keyamisi uwasi wai, mata kirokirorosi ba gairesi. Ba yawasa keyamina ba kuira gairena ba goyona keyamina wai masawa basunai si bimsiri.
41	GEN 2:10	Ba okowa Eden kamonai i kasibau masawa binubanubaina kairavina, saba namai i ruragei wai kawana asi bata.
42	GEN 2:11	Okowa kawana kesana wai Pishon, Havila kupurina i verabauni, gold e mamana wai kupurina.
43	GEN 2:12	Ba kona kupurina kana gold wai i gaire saki ba bane puguna maragasina bedilin ba akima kaimasavina onyx wai yebo namai.
44	GEN 2:13	Ba okowa bairuwaina kana waba wai Gihon. Cush kupurina i verabauni.
45	GEN 2:14	Okowa bitonuina wai Tigris, ba i vera barabara ku maramatana mena ku Asshur. Ba okowa kawana kana bi bata wai, Euphrates.
46	GEN 2:15	Ba Bada God sebare i yauni ba Eden masawina kamonai i terei, bagibagina ba potaina kairavina.
48	GEN 2:17	Saba kuira gairena ba goyona keyamina uwana wata, kega kuna kani. Kuna kani wai, kuna rabobo.”
49	GEN 2:18	Ba Bada God i wona, “Kega i gaire ba, sebare ikesina ina mana, kana bibaita ana wosei kata, ina rupotai.”
50	GEN 2:19	Ba Bada God tano ai aba payapaya ereonowasi ba manu ereonowasi i wosisi wai i botuvisi Adam kurina, ba kesakesasike kasi waba ita bineisi. Ba aba payapayaya ereonowasi meo waba i berebereisi wai, damanina, nanakasike kasi waba.
51	GEN 2:20	Ba sebare aba payapayaya ereonowasi kasi waba i bine, aba payapayaya manamisi, manu kaidamonai ba garagara aba payapayayisi yabata. Saba Adam wai kega kana bibaita kabitam i panani.
52	GEN 2:21	Damanina Bada God sebare i wosei i kenouwapa i dauwa i rabobo ba i dudauwa maranai, gabagabanai sirikena i botaveyei, ba biyo ai gawarina i gudu potai.
53	GEN 2:22	Ba Bada God sebare sirikenai wasike i wosei ba i botuwei sebare kurina.
54	GEN 2:23	Damanina ba sebare i wona, “Niko sirike wai yauku mom sirikeku, ba biyo wai yauku mom biyoku, ana yorei wasike basuna kona sebare karinai i botu.”
55	GEN 2:24	Kona kairavina sebare tamana ba sinana ini sumarisi, ba kaowana yabata sini kapuisi ba sini biyo kesana.
56	GEN 2:25	Sebare kaowana yabata ere nimanimasi si mamana, saba kega si sinimaya.
57	GEN 3:1	Aba payapayaya ereonowasi Bada God i wosisi wai mota wata ana kuira i rakata saki. Ba wasike i wonei, “Bisuwona kata God i wona keyama ereonowasi masawa kamonai uwasi kega kona kam?”
59	GEN 3:3	saba God i wona kata, keyama masawa basunai damana e mamana wai uwana kega kana kani kona kana borubai. Kana kani ba kana borubai wai, kana rabobo.”
60	GEN 3:4	Saba mota wasike i wonei, “Kega kona rabobo.
61	GEN 3:5	God i kuiri kata kona kani wai, matami sina tamotatara God rutainina gairena ba goyona kona kuiri.”
62	GEN 3:6	Wasike keyama uwana i kitai wai gairena, ba mata kirokirorona kanina gairena, ba nuwasuya ba kuira yaunina kairavina i waina sakiyei, wai mutusi i yauna i kam ba yebo kaowana mutusi i berei i kam.
63	GEN 3:7	Ba asi ruwamo matasi si tamotatara, ba si kuira meyisi kata kosi ere nimanimasi wai koveya rurausi, si bobikapukapu ba kasi birupapara si wose.
64	GEN 3:8	Rabisi nubanai, sebare kaowana yabata, Bada God masawa kamonai i yewoyewo wai kae gugurina si nonori wai nagarina keyama kamosi yai si koba.
66	GEN 3:10	Ba i kaobeyei, “Masawa kamonai a nonorim ba a nagara wai a koba kairavina yauku ere nimanimaku.”
68	GEN 3:12	Saba sebare i wona, “Wasike ku beriku wai, kona keyama uwana i beriku a kani.”
69	GEN 3:13	Damanina Bada God wasike i toirubai i wona, “Awaika kairavina nikona ku wosei?” Ba wasike i wona, “Mota i kwarumiku wai a kani.”
70	GEN 3:14	Damanina Bada God mota i wonei, “Niko wose ku wosei wai kom a kaonawaim. Aba payapayaya manamisi ereonowasi kamosi yai, ba garagara aba payapayayisi ereonowasi kamosi yai! Kom siyami ai kuna botete ba momokara kuna kani am yawasa ereonowana kamonai.
71	GEN 3:15	Ba kom ba wasike basumi ai abiya ana terei, ba kom natum ba kona natuna; Ba kom gayamim ini utu gudai ba kom am pesi kae ketuna ina yowa.”
72	GEN 3:16	Ba wasike kurina i wona, “Am bituwa maranai am sini yara ana wosei ina rakata saki; ba sini yara kamonai kuni tuwa. Ba am waina saki kaowam, saba kona ini badim.”
73	GEN 3:17	Ba Adam kurina i wona, “Kaowam ku bosisirei ba keyama uwana a kaotunetuneim kega kuta kani, wai ku kani kona; Kairavina tano a kaonawai; siniyarai kuna saibira ba kuna kam am yawasa ereonowana kamonai.
74	GEN 3:18	Sinamona birugoragorasi tano ai sina rutiti kairavim ba kwapu kamsi kuna kam.
75	GEN 3:19	Ba poyapoyami ai kuna kam kam yepo kuna veramaga ku tano. Kairavina kom tano momokarinai ku botu ba yebo kuna veramaga ku momokara.”
76	GEN 3:20	Adam kaowana kana waba i yorei Eve, basuna kona wai pipiya ereonowasi sinasi.
77	GEN 3:21	Bada God Adam ba kaowana yabata kasi gara aba payapayaya kwapirisi yai i wose ba i kotisi.
78	GEN 3:22	Ba Bada God i wona, “Karaku sebare wai kota rutainita, gairena ba goyona i kuiri. Tani gesei, kata kega yarona ina kotoi ba yawasa keyamina uwana ina yauni ina kani, ba ina ma damana.”
79	GEN 3:23	Damanina Bada God Eden masawinai i pora taveyisi kata tano ai i wosisi wai sita bagibagi yei.
80	GEN 3:24	Sebare i porai i kasibau murinai, Eden masawina ku maramatana mena aneaneya kasi waba Cherubim i terisi. Ba seri rugweyagweyaurina i terei i bokadakadari ku naona ba ku murina mena yawasa keyamina ketana i msi potai.
81	GEN 4:1	Adam kaowana Eve yabata si dauwa, ba i manawa ba i tuwa wai Cain. Ba i wona, “Bada ana bibaitai ba sebare yai tuwei.”
82	GEN 4:2	Muri yai teina Abel i tuwei. Abel wai sheep i potapotaisi, ba Cain wai baobao bitana.
83	GEN 4:3	Ba mara kesana, Cain i bokasira i botu Bada kurina ita suwara.
84	GEN 4:4	Saba Abel ana sheep mutusi natunatusi iyarokosi ba budobudosi i botuvisi Bada kurina. Ba Bada Abel ana suwara i kinani wai, i nuwagaire.
85	GEN 4:5	Saba Cain ana suwara wai, Bada i sinikikiyei. Cain i yagisi saki wai naona i sugoyo popokasu kasuna wata i gegae.
87	GEN 4:7	Wose kuta wose kabitamni wai, ati nuwagaire, saba wose kega ku wose kabitamni wai, piragagoyo e potapotaim, ana waina ina kasibi goyonim saba, kom kuna getawani kega wai ina yaunim.”
88	GEN 4:8	Damanina Cain teina Abel i wonei, “Tana nae ku kwapu.” Ba namai kwapu kamonai teina Abel i kasibunui.
90	GEN 4:10	Ba Bada i wona, “Awaika kairavina niko wose ku wosei? Teim tarana wai tano ai e tutou kuriku saroba kairavina.
91	GEN 4:11	Karaku, a kaonawaim teim ku kasibunui ba tarana ku tano i sororo kairavina niko tano ini sinikikiyim.
92	GEN 4:12	Maranai tano ai kuna bagibagi wai kega kuna mariya. Bagunai wata kuna sini nubanuba saba, niko dobu ai kuni ketaketa ba kuna bubuwa neubuwa.”
93	GEN 4:13	Cain Bada i wonei, “Au saroba i rakata saki damina au yauna kabai.
94	GEN 4:14	Karaku niko kupurai ke bipora taveyiku ba kuna ma kupusiku ba niko dobu ai, ana bubuwa neubuwa kega ani yakam, ba kotoi wata ina pananiku wai ina kasibunuiku.”
95	GEN 4:15	Saba Bada kurina i wona, “Kega rubana; kotoi wata ina kasibunuim wai, kona ana saroba kega kom rutainim, kona ana saroba wai ina rakata saki, ana rakaraka asi 7 sina rabobo.” Ba Bada Cain i kao papari kata kotoi wata ita panani wai kega ita kasibunui.
96	GEN 4:16	Damanina Cain Bada i kasibau taveyei ba i nae ku Nod. Eden ku maramatana mena ba namai i mana.
97	GEN 4:17	Cain kaowana yabata si dauwa wai i manawa ba natusi Enoch i tupuwa. Kona maranai Cain meyaga kaikapona i bowabowai ba, meyagina kana waba i yorei Enoch natuna yabata si warigeya.
98	GEN 4:18	Enoch natuna wai Irad, ba Irad natuna wai Mehujael, ba Mehujael natuna wai Methushael, ba Methushael natuna wai Lamech.
99	GEN 4:19	Lamech bibaine ruwamo i rabaisi. Kesana kana waba Adah ba kesana wai Zillah.
100	GEN 4:20	Adah i tuwa wai Jabal ba kona guguba bowaina ba manina i dagui ba yebo aba payapaya potaisi i dagui.
101	GEN 4:21	Ba teina kana waba Jubal ba kona sawara gita rutainina kana waba harp biyakwarina, ba biwepururu i dagui.
102	GEN 4:22	Zillah yebo natuna sebare Tubal-Cain ba kona wai kirama i wosewose Ba Tubal-Cain nobuna wai Naamah.
103	GEN 4:23	Lamech kaokaowana ruwamo i wonisi i wona, “Adah ba Zillah koi tainabaenega kuriku; Lamech kaokaowana au sisiya ko nonori. Sebare kesana i purupurukaniku kairavina a kasibunui ba sebare yarakina i raviku wai a kasibunui.
104	GEN 4:24	Kotoi wata Cain ina kasibunui wai sarobina mara 7 rubana ina yauni. Ba kotoi yauku ina kasibunuiku wai, sarobina mara 77 rubana ina yauni.”
105	GEN 4:25	Adam kaowana yabata si dauwa mena, ba i tuwa wai sebare. Eve kana waba i yorei Seth. Ba i wona, “God natuku kesana yebo i beriku, Abel wasana i kausani kairavina Cain i kasibunui.”
106	GEN 4:26	Seth yebo natuna sebare i tupuwa ba kana waba i yorei Enosh. Kona maranai pipiya si dagui Bada kana wabai si bopepeta.