22602	JON 1:2	“Lamuka uyende ku m'zinda ukulu wa Niniva ukaupalizire thangwe ine-pano ndabzibva kale bza kuipa bzawo.”
22603	JON 1:3	Ndipo Jona adalamuka aciyenda kuTalisisi kuthawa Mbuya. Iye adapolika ku Jopa, kumweko adakaona xitima ya m’madzi yomwe ikhafuna kuyenda ku Talisisi. Adagula thikiti acipakira kuti ayende ku Talisisiko, Mbuya aciona na maso yawo.
22604	JON 1:4	Ndipo Mulungu adatumiza conzi cikulu kwene-kwene, madzi ya nyanza yadabvunduka yacicita mawimbi makulu. Ndipo xitimayo ikhadasala pang'ono kulobzika.
22605	JON 1:5	Wakubvukuta xitimayo adabva mantha, aciyamba kukuwa m’bodzi na m’bodzi acimbakumbira thandizo kuna mulungu wace. Ndipo iwo adayamba kuthusa mitolo m’madzi kuti xitimayo ilule. Tsono Jona adabuluka pantsi pa xitimayo acikagona tulo.
22606	JON 1:6	Ndipo m'kulu wa xitima adyenda kukam'bvunza Jona kuti: “Ungoneranyi muno? Lamuka, ukumbire mulungu wako! Pinango iye angatibvere ntsisi kuti tisaye kufa.
22607	JON 1:7	Iwo adapangana wentse kuti: “Mbatibwereni tione mbani wabweresa tsokali. Iwo adacita tenepoyo acifufudza ndipo adaphata Jona.
22608	JON 1:8	Pamwepo adam'bvunza kuti: “Tiwuze tsapanopa kuti thangwe lanyi taona tsokali. Uli kucitanyi muno? Ndiwe wa kuponi? Ndiwe wa m'tundu wanyi?
22609	JON 1:9	Ndipo Jona adatawira aciti: “Ndine mu Ebereu, nimbapemba Mulungu Mbuya wa kudzulu, omwe adalenga madzi ya nyanza na pantsi.”
22610	JON 1:10	Ndipo wanthuwo adabva mantha kwene-kwene acim'bvunza pomwe kuti: “Wacitiranyi bzimwebzi? Thangwe iwo akhadziwa kale kuti iye akhathawa Mbuya, omwe akhadamutuma.
22611	JON 1:11	Pamwepo, iwo adamubvunza aciti: “Tsono unfuna kuti tikucitenyi ife-pano kuti madzi ya nyanzaya yaderekhe?” Thangwe madzi ya nyanzayo yakhambabvunduka yacimbadzala pomwe.
22612	JON 1:12	Ndipo Jona adawatawira aciti: “Nditembeni mundithuse m’madzi ya nyanzaya, ndipo iyo ya n’derekha. Nakuti ine nin'dziwa kuti conzici cabwera na thangwe langu”.
22614	JON 1:14	ndipo pamwepo adayamba kupemba na kukuwa aciti: “Nandi Mbuya! Tiri kukumbirambo kuti muleke kutipha na thangwe la munthuyu. Lekani kutipasa mulandu na thangwe la infa yace, nakuti imwepo Mbuya mwacita bzomwe imwe mwatonga.”
22615	JON 1:15	Iwo adam'temba Jona, acimuthusa m'madzi, kucokera pamwepo ndipo mandziyo yadaderekha.
22616	JON 1:16	Iwo adabva mantha kwene-kwene na Mbuya, ndipo acimuikhira ntsembe, acikhala pomwe na cikhulupiro.
22617	JON 2:1	Ndipo Mbuya adatumiza cintsomba cikulu kwene-kwene, kuti cimumeze Jonayo, iye adakhala ntsiku zitatu m’mimba mwacenemo.
22619	JON 2:3	aciti: “Pa kubonera kwangu, ine ndidapemba kuna Mbuya, ndipo iye adanditawira, m'kati mwa cidindi ndidakuwa ndipo mudandibva fala langu.
22620	JON 2:4	Imwepo mudandithusa panyanza, mphanvu ya madzi icindimiza, mawimbi mang'ono na makulu yacipita na padzulu pangu”.
22621	JON 2:5	Ine ndidalewa kuti: “Ndathusidwa imwe muciona , na tenepo nin'dzaiona pomwe nyumba yanu ya kucena.”
22622	JON 2:6	Madzi yadandimiza ya cifuna kundipha, m’dima udandigwanankhira, na mabonga yacindiyanga mum'solo.
22623	JON 2:7	Ine-pano ndidabuluka pantsi pakuzika pa kuyambira mapiri, mphinga za m’suwo wa infa zidandifungira pa nthawe zentse. Tsono imwepo Mbuya Mulungu mundandipulumusa moyo wangu pa infa.
22624	JON 2:8	Pomwe ndikhatsindira moyo, ine ndidakukumbukani imwepo Mbuya. Ndidakupemberani, ndipo mafala yanguyo yadafika m’nyumba mwanu mwa kucena.
22625	JON 2:9	Wale omwe ambapemba bzifanikiso bza kusaya basa, ambaphonya cilungamo canu.
22626	JON 2:10	Tsono ine nin'dzakupasani ntsembe na kukomedwa kwangu; ndicidzandendemeza cikhulupiriso cangu. Nakuti cipulumuso cimbacokera kuna Mbuya.
22627	JON 2:11	Ndipo Mbuya adaciwuza cinstombaco, kuti cimubzukule kunja Jona.
22629	JON 3:2	“Lamuka uyende ku m'zinda ukulu wa Niniva ukaupalizire mafala yomwe ndakuwuzaya.”
22630	JON 3:3	Ndipo iye adayenda ku Ninivako, ninga momwe adamuwuzira Mbuya. Tsono Niniva ukhali m'zinda ukulu omwe ukhana m'thantho wa ntsiku zitatu kuti auyambuke na minyendo.
22631	JON 3:4	Pomwe Jona adapita mum'zindamo, adafamba ntsiku yentse acimbapaliza acimbalewa kuti: “M'kati mwa ntsiku makumi manai, Niniva in'pfudzidwa.”
22632	JON 3:5	Wanthu wentse wa m'Ninivamo, akulu na wana adabvuma Mulungu. Iwo adapangana kuti abzimane kudya, acibvala mausakala kuyambira nkulu mpaka mwana.
22633	JON 3:6	Pomwe mambo wa ku Niniva adaibva nkhani imweyo, adalekeza basa lace la umambo, acikabvalambo mausakala, na kukabvunvulikambo pa dotha.
22634	JON 3:7	Iye adadziwisa wanthu wentse wa mu m'zindamo mu dzina lace, na la nthena zace Kuti: “Palibe munthu m’bodzi yekha omwe anidya, ayai kumwa cinthu; kudyesa na kumwesa bzifuwo, zingakhale ng'ombe ayai mbuzi.
22635	JON 3:8	Tsono wanthu na bzifuwo kubodzi an'dzabvala mausakala acipemba na mphanvu kuna Mulungu, acileka kucita bza kuipa bzawo, na kuleka pomwe kuphana wokha-wokha.
22637	JON 3:10	Thangwe Mulungu adaona, kuti iwo aleka kucita bza kuipa bzawo, aciwabvera ntsisi, acileka kucita bzomwe akhadakumbuka kuti awacitebzo. Ndipo iye alibe kubzicita.
22638	JON 4:1	Tsono Jona alibe kukomedwa nabzo bzimwebzo, ndipo iye adakalipa.
22639	JON 4:2	Iye adapemba kuna Mbuya aciti: “Nandi Mbuya! Kodi n'psimwebzi lini bzomwe ndikhadalewa kale, pomwe ndikhali kumui?” Ndipopo ine ndikhadathabza, ndicithawa ndicikuyenda ku Talisisi. Nakuti ine-pano ndikhadziwa kale kuti iwepo ndiwe Mulungu wa kudeka m'tima, wa nsisi kwene-kwene, wa kufewa m'tima na wa kupirira pomwe, omwe umbalekerera bza kuipa.
22640	JON 4:3	Tsapano, ndiri kukumbirani Mbuya kuti mundiphe. Bziri bwino kuti ine-pano ndife kuposa kukhala na moyo.”
22642	JON 4:5	Ndipo iye adacoka mu m'zindamo aciyenda kukakhala kumabva dzuwa, ndipo kumweko adakonza cikumbi acikhala m'mwemo kuti adzaone n'ciani cingadadzacitika mu m'zindamo.
22643	JON 4:6	Mbuya adameresa m'tanga, uciyanga pa ntsodzi pa cikumbi ca Jona, kuti umucitire m'thunzi, umupepese ukali bwace. Pamwepo Jona adakondwa kwene-kwene, thangwe la m'tangayo.
22644	JON 4:7	Tsono mwangwana yanzace, Mulungu adatumiza cikonye cicikafukuta m'tagayo, iwo uciwumiratu.
22645	JON 4:8	Pomwe kudacena, Mulungu adacita dzuwa kwene-kwene, licimutentha Jona mum'solo mpaka iye acigwa cikomo. Ndipo iye adafunisisa kufa na m'tima wace wentse, acilewa kuti: “Bziri bwino kuti ine-pano ndife kuposa kukhala tenepano uno!”
22646	JON 4:9	Pamwepo Mulungu adamubvunza Jona kuti: “Kodi iwepo uli kukalipa na thangwe la m'tangayu?” Jona adatawira aciti: “Bziri bwino inde kukalipako, kuti ndife.”
22647	JON 4:10	Tsono Mbuya adalewa kuti: “Iwepo wabvera ntsisi m'tanga, omwe ulibe kuwubonerera na kuwukuza. Iwo udamera ntsiku ibodzi, mangwana yanzace uciwumiratu.
22648	JON 4:11	Niniva ni m'zinda ukulu kwene-kwene. Una wanthu bzulu dzana na makumi mawiri, omwe an'dziwa lini kuti boko la didi na la dzere ndiponi, na bzifuwo bzizinji pomwe. Ningaleke tani kuwubvera ntsisi?”
24285	MRK 1:1	Kuyamba kwa Mafala Yabwino yakulewa bza Jezu Krixtu, Mwana wa Mulungu.
24286	MRK 1:2	Ninga mpolofiti Isaya adanemba kuti:“Mulungu adati, Ndin'dzatuma mtumiki wangu kutsogolo kwako, kuti akakondze njira yomwe iwe udzapitembo.
24287	MRK 1:3	Fala la munthu wakukuwa mthengo ali kulewa kuti, ‘Kondzani njira yakudzapitira Mbuya, thamulani miseu yomwe adzapitembo.’”
24288	MRK 1:4	N'cadidi adawoneka Juwau M'batizi kuthengo acilalika, “Sandulikani mtima, mubatizidwe. Mulungu an'dzakulekererani bzakuipa bzanu.”
24289	MRK 1:5	Akhabwera kwa iye wanthu wakucokera kumbali zentse za Judeya na Jerusalemu. Iwo akhazimbula bzakuipa bzawo, Juwau akhawabatiza mumkulo wa Jorodau.
24290	MRK 1:6	Iye akhabvala khanda la nchefu, akhamanga mciuno na mceka. Cakudya cace cikhali mabombo na uci bwa mthengo.
24291	MRK 1:7	Akhalalika aciti: “Pambuyo pangu pakubwera winango wamphambvu kuposa ine. Wakuti ine ndine wakusaya kufunika ngakhale kukotama kutsudzula thambo za xangu zace.
24292	MRK 1:8	Ine ndakubatizani na madzi, tsono Iye an'dzakubatizani na Mzimu Wakucena.”
24293	MRK 1:9	Ntsiku zimwezo Jezu adabwera kucokera kuNazalee, mui ubodzi wa Galileya, acibatiziwa na Juwau mumkulo wa Jorodau.
24294	MRK 1:10	Pakucoka mmadzimo, adawona kudzulu kwakufunguka, ndipo Mzimu Wakucena udabuluka kwa Iye ninga nkhangaiwa.
24295	MRK 1:11	Kudzulu kudabveka mafala yakuti: “Iwe ndiwe Mwana wangu wa pamtima. Nimbakomedwa nawe kwakukulu.”
24296	MRK 1:12	Nthawe imweyo Mzimu Wakucena udapitisa Jezu mthengo.
24297	MRK 1:13	Adakhala kumweko ntsiku makumi manai. Sathani adamuyeza. Bzikhalipombo bzirombo bza mthengo. Tsono anjo zikhamutumikira.
24298	MRK 1:14	Ataikhidwa kaidi Juwau, Jezu adayenda kuGalileya acilalika Mafala yabwino yakulewa bza Mulungu.
24299	MRK 1:15	Adati: “Nthawe yakwana. Bwafika Ufumu bwa Mulungu. Sandulikani mtima. Khulupirirani Mafala Yabwino.”
24300	MRK 1:16	Pakuyenda mmphephete mwa thawale la Galileya, Jezu adawona wanthu awiri, Sirimau na m'bale wace Andereya, akhatheya bwazi mmadzi, thangwe akhali akhongwe.
24301	MRK 1:17	Adawauza Jezu: “Imwe munditewere, ndikusanduseni akhongwe wa wanthu.”
24302	MRK 1:18	Adasiyeratu mabwaziyo ndipo adamutewera.
24303	MRK 1:19	Atafamba pang'ono, adawona Tiyagu na Juwau, wana wa Zebedeu, omwe akhali mmwadiya kukondza mabwazi.
24304	MRK 1:20	Jezu adawacemera, ndipo adasiya baba wawo Zebedeu mmwadiya pabodzi na anyabasa wace, acitewera.
24305	MRK 1:21	Adayenda wentse kuKafernau. Yatafika ntsiku ya malinkhuma, Jezu adayenda mnyumba ya mapembero, acipfundzisa.
24306	MRK 1:22	Wentse adadabwa na bzakupfundzisa bzace thangwe akhapfundzisa na utongi, akhasiyana ninga amisiri wa Mtemo.
24307	MRK 1:23	Nthawe pang'ono adawoneka mnyumba ya mapemberomo munthu wakuphatidwa na mzimu wakuipa. Adalewa na kukuwa aciti:
24308	MRK 1:24	“Tina ciani na Imwe, Jezu wa Nazalee? Kodi mwabwera kudzatidzonga? Ndakudziwani kuti ndimwe Wakucena wa Mulungu.”
24309	MRK 1:25	Ndipo Jezu adalamulira mzimu wakuipayo, aciti, “Khala zii, coka mwa munthuyu.”
24310	MRK 1:26	Pamwepo mzimu wakuipa ule udamutekenyesa munthuyo kwakukulu ucikuwa kwene-kwene, ndipo udacoka.
24311	MRK 1:27	Wentse wale adadabwa kwakukulu acimbabvundzana, “Kodi bzimwebzi n'ciani? Cakupfundzisa cipsa cimweci! Ambaitonga mizimu yakuipa na mphambvu, ndipo idamubvera.”
24312	MRK 1:28	Mwakamkulumize, mbiri yace idamwazika mbali zentse za Galileya.
24313	MRK 1:29	Pambuyo pace Jezu adacoka kunyumba ya mapembero kule, adayenda kunyumba ya Sirimau na Andereya pabodzi na Tiyagu na Juwau .
24314	MRK 1:30	Mibzala wa Sirimau akhadagona kwakufesuka, pamwepo wanthu adawuza Jezu bza matendayo.
24315	MRK 1:31	Jezu adayenda aciwaphata boko aciwamusa, ndipo maferu yadamala. Na tenepo mai ule adawaphikira cakudya.
24316	MRK 1:32	Maulo, latamira dzuwa, adawabweresa wentse wanthu kwa Jezu wakuduwala na wakuphatidwa na mizimu yakuipa.
24317	MRK 1:33	Wentse wa mumzindamu adagwezekana pamsuwo.
24318	MRK 1:34	Jezu adalimbisa azinji omwe akhabonera na matenda yakusiyana-siyana, acicosa mizimu yakuipa, aciiletsa kulewa-lewa thangwe idamuzindikira.
24319	MRK 1:35	Macibese-bese kukhanati kucena, Jezu adamuka aciyenda kuthengo. Kumweko adakapembera.
24320	MRK 1:36	Sirimau na andzace adamunyang'ana mbali zentse.
24321	MRK 1:37	Atamugumana adamuuza kuti: “Wanthu wentse ali kukunyang'anani.”
24322	MRK 1:38	Tsono Iye adatawira kuti: “Mbatiyendeni tipite kumidzi inango pafupi na pam'pano, ndikalalike mafala kumweko. Thangwe ndibzo ndidabwerera.”
24323	MRK 1:39	Ndipo adayenda acilalika mnyumba zentse za mapembero kuGalileya kwentseko acicosa mizimu yakuipa.
24324	MRK 1:40	Munthu winango wa mapere adabwera kwa Jezu. Adagodama acimudandaulira: “Mucifuna, mungakwanise kundilimbisa.”
24325	MRK 1:41	Jezu adamubvera ntsisi. Adatambalisa boko lace acimukhuya acilewa, “Cadidi, ndafuna, ulimbe!”
24326	MRK 1:42	Panthawe ibodzi-bodziyo mapere yace yadamala, acicenesewa.
24328	MRK 1:44	kuti, “Uleke kuwuza ali-yentse bzimwebzi, tsono uyende ukabziwonese kwa azibaba wantsembe*, ukapereke ntsembe yomwe adalamula Mozeji ikakhale mboni kuti walimbadi.”
24329	MRK 1:45	Adandocoka pamwepo, munthuyo adayamba kumbazimbula bzentse na kumwaza nkhani. Na tenepo bzikhafunika lini kuti Jezu awoneke padeca mmizinda mwentse tsono akhakhala kuthengo. Ndipo wanthu akhambayenda kwa Iye kucokera mbuto na mbuto.
24330	MRK 2:1	Patapita ntsiku pang'ono, Jezu adabwera pomwe kuKafernau. Bzidabveka kuti ali kunyumba.
24331	MRK 2:2	Azinji adagumana mnyumbamo. Ndipo angakhale na pamsuwo pakhalibe mbuto yakupitira. Jezu, pakulewa mafala ya Mulungu.
24332	MRK 2:3	Wanthu anai adanyamula bundukutu aciyenda naye.
24333	MRK 2:4	Alibe kufika pafupi na Jezu thangwe ra mthithi wa wanthu. Adakwira pantsodzi ya nyumba, acinyasula ntsodziyo kulinganiza pakhana Jezu. Ndipo adamubulusa bundukutu ule pamacira.
24334	MRK 2:5	Pakuwona cikhulupiriro cawo, Jezu adawuza bundukutuyo kuti, “Mwana wangu, bzakuipa bzako bzalekereredwa.”
24335	MRK 2:6	Tsono pamwepo wakhadakhalambo amisiri wa Mtemo wa Mozeji. Iwo adayamba kubzibvundza mumtima mwawo kuti,
24339	MRK 2:10	Tsono kuti mudziwe Mwana-wa-Munthu ali nayo mphambvu pantsi pano yakulekerera bzakuipa, wonani.” Ndipo adauza bundukutuyo,
24340	MRK 2:11	“Iwe, muka, tenga macira yako, uyende kumui.”
24341	MRK 2:12	Pamaso pawentse, munthu ule adamuka, acitenga macira yace acicoka. Wanthu wentse adadabwa kwene-kwene, acipasa mbiri Mulungu acimbalewa, “Cipo bzimwebzi tikanati kubziwona.”
24342	MRK 2:13	Jezu adayenda pomwe kugombe. Wanthu azinji adafika kumweko, ndipo Iye adawapfundzisa.
24343	MRK 2:14	Pakufamba Jezu, adawona Levi, mwana wa Alifeu, akhadakhala pambuto ya basa la msonkho. Adamuuza aciti, “Iwe, unditewere.” Ndipo adamuka acimutewera.
24344	MRK 2:15	Pomwe Jezu akhadya mnyumba mwa Levi, pakhana wanthu azinji wakupimisa msonkho na wanthu wakuphonya. Akhadya na Jezuyo pabodzi na wakupfundzira wace. Thangwe akhalipo azinji wa iwo omwe akhatewera iye.
24346	MRK 2:17	Jezu adabva bzimwebzo adawatawira kuti, “Wanthu omwe mbakulimba an'nyangana lini mulapi. Wakuduwala ndiye an'nyangana mulapi! Ine ndiribe kubwera kudzacemera wanthu wakulungama, tsono ndabwera kudzacemera wakuphonya.”
24347	MRK 2:18	Tsapano wakupfundzira wa Juwau M'batizi na Afaliseyu akhabzimana kudya. Wanthu adabwera kwa Jezu acimbabvundza aciti, “Wakupfundzira wa Juwau na wakupfundzira wa Afaliseyu ambabzimana kudya. Thangwe ranyi wakupfundzira wanu ambabzimana lini?”