24963	LUK 1:1	Ni-nawoj map ab si tatchua g Jiosh: Ab apsh kaiham ihda s-kehg haꞌichu ahga ab amjed g Jiosh alidag mach ab s-wohochud. Kunt am wo haꞌichu m-oꞌohani ab amjed mapt hekaj wo s-ap s-mahchk. Hegam mash am neid o am t-ahgid ab amjed. Kut muꞌi am s-ap oꞌoha hegai mo haschu am t-ahgid. Nt ahni am si i hoa wehs ihda k hekaj am wo m-oꞌohanid k am baꞌich haꞌichu wo m-ahgi ab amjed.
24967	LUK 1:5	Amjed atsh ab i shohshonwua ihda mash eda g Herodbad am d kownal Judea chekshani ch ed am ha dahm g Tutuligo hemajkam. Sh am hema d ha-pahlig ch hab chehgig Zacaria. Sh g wehmaj kihkam hab chehgig Elisabed. Idam ash ab d amjedkamaj hegai mash d ha-shohshonbad g papal ch hab chehgig Aaron. Kush g Zacaria ab hema d amjedkam mash hab chehgig Abia.
24968	LUK 1:6	Kush idam Zacaria ch Elisabed am si oid g s-apꞌekam ch s-ap am hab junihim wehs hegai mo g Jiosh ab ha chehani g Tutuligo.
24970	LUK 1:8	Kutsh hema tash am i e ai matsh g Abiabad amjedkam am hab wo juh g e-chikpan geꞌe cheopi ch ed.
24971	LUK 1:9	Kumtsh am i kei g Zacaria matsh am wo ha mehmhei g s-ap uhw kuhbhondakud. Tsh am i wah cheopi ch ed.
24973	LUK 1:11	Tsh am cheopi ch ed hema i e chehgi g anghil Zacaria tahgio k ash ab kehk s-apkojed abai mash ab kuhbhoni g s-ap uhw kuhbhondakud.
24974	LUK 1:12	Tsh am i nei g Zacaria k si e todsid k si s-ehbeni ihda.
24975	LUK 1:13	Kush wabshaba hab kaij g anghil, “Pi g am shaꞌi e todsid, Zacaria. Jiosh at kah g m-hoꞌigeꞌidahuna. T g m-wehm kihkam wo wa hema madt. T d wo cheojk. Kupt hab wo chehch John.
24976	LUK 1:14	Jiosh at ab a wo si has elidad. Kut pi koi wo mahsi. T g Jiosh ab wo mah g Hekia S-apꞌekam Gewkdag. Kupt heg hekaj wo si s-hehgigk. T g muꞌi hemajkam hab waꞌap wo si s-hehgigk mat hekid wo mahsi. Kut ihda em-aliga pi hekid wo ihꞌed hegai mo s-nawmdag.
24979	LUK 1:17	T koi in hu wo i wuhsh g Jiosh si Kehsha jewed dahm. T g em-aliga ia wehpeg wo ahgachugad mat in wo i wuhsh. T g Hekia S-apꞌekam Gewkdag ab wo mah g gewkdag heg wehhejed hab masma mo wa ab mahkch g Elijabad. Kut hab wo ha juh g hemajkam mat ab wo si pihk e elidad ha hekaj g e-aꞌaliga k hegam hab wo ha juh mo d pi apꞌekam mat ab wo kaihamad g ha-amichudadag hegam mo d s-apꞌekam. Neh, bat masma am wo i ha apꞌech g hemajkam heg wehhejed jiwhiadaj g Jiosh si Kehsha.” Neh, bash kaij hegai anghil.
24980	LUK 1:18	Kush g Zacaria hab kaij, “Nt has hig masma wo si s-ap s-mahchk machs wo hema bei g ali natt pi kekelt?”
24981	LUK 1:19	Sh hab kaij g anghil ab wui, “Dani Jiosh chikpandam, Gabriel. Kut ab ni-cheha mant ia wo m-ahgi ihda si s-hehgig haꞌichu ahgaj.
24982	LUK 1:20	Kupt eda pi ab hu ni-wohoch. T heg hekaj hab wo m-juh mapt pi wo shaꞌi e nako maps wo ha neokad iaꞌi amjed am hugkam mat hab wo e juh ihda mani m-ahgid.” Neh, bash kaij hegai anghil.
24984	LUK 1:22	Tsh am hu hebai ab hahawa i wuhshani k chum neo am ha wui k wabsh pi shaꞌi e nako. Sh am ha hekaj wabsh i amich g hemajkam matki ab haꞌichu e chehgi wui no pi ab wabsh i ha magwuid g e-nowikaj ch pi ab hu has shaꞌi kaij.
24985	LUK 1:23	Tsh am wabsh i chum huhug g tash mat heꞌes tash am hab wo juh g e-chikpan. Tsh gam uhpam hih e-kih wui.
24986	LUK 1:24	Kush amai i mia amjed matsh woꞌiwua g ali. Kush am wabsh s-ap e tahtk ch am e ehstokch g Elisabed e-kih ed hetasp mashad hab kaijhim, “Chum ani hekid si ni-elid mani pi ha mahmadt. Kutki wabshaba id hab ni-juni g Jiosh k hekaj gam hu hab i juh g si ni-edadag am hemajkam ha-nena ed.”
24990	LUK 1:28	Kutsh koi e ai matsh wo e hohont. Tsh am jiwia hegai anghil Mary wui k hab kaij, “Si g s-hehgigk Mary. Jiosh at ab i s-m-hoꞌigeꞌid k am wo i m-wehmt.”
24992	LUK 1:30	Sh hab ep kaij g anghil, “Pi g am shaꞌi e todsid, Mary. Ab at i m-mah g Jiosh g hoꞌigeꞌidadag.
24993	LUK 1:31	Kut am wabsh wo e nahto g ali m-eda k wo mahsi k d wo cheojk. Kupt hab wo chehch Jesus.
24994	LUK 1:32	Kut d wo si s-has haꞌichuk no pi d alidaj g Jiosh. T g Jiosh am wo i kei mat d wo kownalk am kehkud ed g e-shohshonbad David.
24995	LUK 1:33	Kut chum hekid d wo ha-kownaligk g Jiosh hemajkamga. Pi at hekid wo huhug g kownaltaligaj.” Neh, bash kaij g anghil.
24997	LUK 1:35	Sh g anghil ab wui hab kaij, “Jiosh at ab wo cheha g Hekia S-apꞌekam Gewkdag. T heg hab wo juh g Jiosh gewkdagkaj. Mt heg hekaj wo s-mahchk mat d wo si hekia s-apꞌekam alik ch d wo Jiosh alidagk.
24998	LUK 1:36	“Neh, s-mahch ap mat heki hu okst g m-hajuni Elisabed k pi ha mahmadt. Kut eda g Jiosh ab s-hoꞌigeꞌel. Kut g cheoj ali wo bei. K d chuhdp mashad hemu mat am woꞌiwua g ali.
24999	LUK 1:37	Kupt id amjed wo s-mahchk mat wo e nako g Jiosh mat am hab wo juh hegai mo haschu hab e ahgahim.” Neh, bash kaij g anghil.
25000	LUK 1:38	Kush hab hahawa kaij g Mary, “Neh, dani piongaj g Jiosh. K am wa s-apꞌe mat am hab wo juh g e-tatchui ab ni-ab” Tsh gam hahawa hih g anghil ab amjed.
25001	LUK 1:39	Tsh ab ha hekaj i e nako g Mary mat am wo chehgim g Elisabed. Sh hegam Elisabed ch Zacaria am kih mash am hema kihhim kaꞌakwulk ch ed am Judea chekshani ch ed. Tsh am jiwia Mary ha-kih am k ab ha-ihm.
25003	LUK 1:41	Tsh am i kah g Elisabed k ab taht matsh g madaj am si al i banimme eda. Tsh g Hekia S-apꞌekam Gewdag ab si i mah g gewdag.
25004	LUK 1:42	Kush hekaj si s-hehgigam hab kaij ab wui g Mary, “Neh, ab atki si i s-m-hoꞌigeꞌel g Jiosh baꞌiwechkim mo chum hedai uwi. Kutki wo mahsi m-amjed hegai mash ab mahks g si geꞌe s-apꞌekam.
25005	LUK 1:43	Kuptki d wo jeꞌejk hegai mat d wo ge t-kownalig. Kuni si s-ap ni-tahtk mapt iaꞌi ni-chehgim.
25006	LUK 1:44	Neh, am at si i banimme g ni-mad mant am i m-kah mapt ab ni-ihm. K heg hekaj am ni-chehgid g Jiosh mo ab si s-m-hoꞌigeꞌid.
25007	LUK 1:45	Woho at hab wo e juh hegai mo ab m-chehgid g Jiosh. K d si geꞌe hoꞌigeꞌidalig mapt ab i s-wohoch.” Neh, bash kaij g Elisabed.
25009	LUK 1:47	ch si s-ap ni-tahtk mo d ni-doꞌibiakam.
25010	LUK 1:48	Dani wabsh shoꞌigkam. Kut eda ab si has i ni-elid k si geꞌe haꞌichu ab hab ni-juni g si geꞌe e-gewkdagkaj. T Hab iꞌajed chum hekid hab wo chei g hemajkam imhab aꞌahidag oidam mat ab si i s-ni-hoꞌigeꞌel g Jiosh. Do si hekia s-apꞌekam g Jiosh
25013	LUK 1:51	T am wo chehgi g si geꞌe e-gewkdag k wo has gewito hegam mo si e hahaschud
25014	LUK 1:52	k wo ha wohppoꞌi g kokownal g ha-gewdag k g s-kakais s-ha-kaisdag gam hu hab wo i juh k wabshaba g shoꞌigkam ab has wo i ha elid k heg ab wo i ha mah mo haschu i s-kehgaj ha wehhejed.
25016	LUK 1:54	Neh, bash wa am ha ahgid g t-shohshonbad ged hu i Abraham amjed matsh id am hab wo e juh. Ab o i t-wehmt g Jiosh ahchim mach ab d ha-amjedkam k ab wehs t-wui si pihk e elid iꞌajed chum hekid.”
25020	LUK 1:58	Sh g hajunij ch hugidaj an kihkam si s-hehgig wehmaj am i kaiok matsh g Jiosh ab si i s-hoꞌigeꞌel.
25021	LUK 1:59	Kush am d i gigiꞌik tash g ali. Kumtsh wo pahl hikuch mo d ha-himdag. Tsh am e chehm g hemajkam k hab wo chum chehch Zacaria am oidk g ohgaj.
25022	LUK 1:60	Kush wabshaba hab kaij g jeꞌej, “Pi atsh g e-ohg oidk wo chehgigk ch wabshaba hab wo chehgigk John.”
25023	LUK 1:61	Sh hab kaij hegam, “Pi o hedai hab shaꞌi chehgig g m-hajuni,”
25026	LUK 1:64	Kutsh am waꞌi hekaj s-ap neok k ab si ihm g Jiosh ch ab si hoꞌigeꞌid.
25027	LUK 1:65	Tsh wehsijj ab si has el g Jiosh hegam mo an ha wehgaj kih. Tsh gan hu aꞌai s-e mai am Judea chekshani ch ed mat has i e juh.
25028	LUK 1:66	Ab ash si s-hoꞌigeꞌid g Jiosh ihda ali. Kush wehsijj hegam mash am kah am si i oidahim ch hab kaij, “Kus has mahs wo haꞌichuk ihda ali?”
25029	LUK 1:67	Kutsh g Hekia S-apꞌekam Gewkdag g si geꞌe gewkdag ab i mah g Zacaria. Tsh heg am si s-hewelim neok k gam hu baꞌich ah mat haschu has wo e juh hab kaijch:
25030	LUK 1:68	“Ab ant wo si i hehgchul g s-apꞌekam t-kownalig Jiosh. E o nahtokch mat wo t-doꞌibia ahchim mach d hemajkamgaj
25031	LUK 1:69	ch atsh hekaj am hema wo i maskogi mat d wo t-doꞌibiakamk. Heg at ab d wo kownal Davidbad amjedkamk ch wo uꞌukch g si geꞌe gewkdag.
25032	LUK 1:70	Kekelibad Jiosh haꞌichu i tashogiddam o heki hu am ahgachug matsh g Jiosh wo t-doꞌibia ab ha amjed g t-obga ch hegam mo s-t-kehꞌid.
25034	LUK 1:72	Ab at wo i s-t-hoꞌigeꞌel g Jiosh mash wa hab masma ha ahgid g t-shohshon.
25035	LUK 1:73	Bash si kaij ab Abrahambad wui mat wo t-doꞌibia ab ha amjed g t-obga. Tt hab pi hedai wo ehbidad ch ab si s-ap wo ihmad g Jiosh.
25037	LUK 1:75	ch wo s-apꞌek am nenaj ed ch am hab wo junihid g s-apꞌekam chum hekid.
25038	LUK 1:76	Ihda ni-sulijga at d wo Jiosh haꞌichu i tashogiddamk ch wo ha ahgi g Jiosh hemajkamga mat g Jiosh ab wo s-ha hoꞌigeꞌid k gam hu hab wo i juh g pi ap ha-chuꞌijig k wo ha doꞌibia ab amjed g s-koꞌok ha-namkidadag. Kut heg hekaj wo e nahtokchid mat g doꞌibiakam am wo i e maskogi. Id at am wo i wuhsh Jiosh t amjed k ab wo t-mah g amichudadag.
25041	LUK 1:79	hab masma mo g tash ab i chechshshaj ch ab t-mamka g tonlig. Ab ach wa hihim t-namkidadag wui mat g Jiosh gam hu hab wo i t-juh heg hekaj pi ap t-chuꞌijig. Kut wabshaba g t-doꞌibiakam ab wo i t-chehgi matt has masma am wo i t-apꞌech Jiosh wui.” Neh bash kaij g Zacaria.
25042	LUK 1:80	Kutsh si s-gegokim i geꞌeda g ali am e tashogid mo am Jiosh tatchui oidch him. Kush am hebai d i himdam, tsh gm hu i e gawulkai tohono jewed ch ed k am haꞌichugkahim ch ab ai mat am i e maskogi Tutuligo ha wui.
25081	LUK 2:39	Neh, kutsh wehs am hab juh hegai mo an oꞌohanas chehanig ch ed k gam hu hahawa uhpam hihi Galilee chekshani wui k am dada e-kih am Nazareth kihhim t am.
25082	LUK 2:40	Kutsh ab si s-gegokim i geꞌelhi g ali k wabsh shaꞌi haꞌichu s-amichud. Sh g Jiosh pihk elidadag am si e tashogid wehhejed.
25083	LUK 2:41	Wehs ahid ab ash am e wushshad Jerusalem t am matsh wa ha doꞌibia g Jiosh g ha-shohshon ab ha amjed g Egypt t am hemajkam. Kush g Jesus jehj chum hekid am hihhim.
25084	LUK 2:42	Kush am d i gamai gohk aꞌahidag g Jesus. Tsh am i e ai hegai ha-doꞌibiadag wuhshda. Tsh am ep hihi bekch g Jesus k am haꞌichugkahim mo heꞌes i tash am hab e wua.
25086	LUK 2:44	nash pi hab elid mash an wa hebai ha wehmaj g hihimdam mash am muꞌi e wehm hihim. Kush hekaj hemako tash waꞌi chihpia k an chum gahghi ha oidk g e-hajuni ch e-nanꞌaipijju.
25088	LUK 2:46	Kush am d i waik tash. Tsh ged hu hahawa cheh geꞌe cheopi ch ed. Kush am dak ch ab ha kaiham g s-chu aꞌamichuddam ch ab si haꞌichu ha kakke mash am aꞌaga g Jiosh oꞌohana.
25089	LUK 2:47	Sh idam ab epai haꞌichu kakke. Kush si s-e mamachim neok ch si s-ap ab uhpam i nodgid g haꞌichu ha-kakkei. Sh wehsijj hegam mash kah ab wabsh i hahaꞌadka si has i e tahtk.
25090	LUK 2:48	Neh, tsh g Joseph ch Mary hab waꞌap si has i e taht am chehgiok. Sh g jeꞌej hab kaij, “Ni-sulijga, shahchu apt ahgk hab t-juh? Shelkam att nonda g m-ohg wehm pi m-edgidk.”
25091	LUK 2:49	Kush hab kaij ab ha wui, “Chum am wa s-mahch mant hemho wa am wo haꞌichugk ni-ohg Jiosh kih ed.”
25094	LUK 2:52	Neh, kutsh ab si s-gegokam i geꞌehogatahi g Jesus k baꞌich i edagi g amichudadag k ash am si oid g Jiosh chehanig. Kush ab si s-hoꞌigeꞌid g Jiosh. Sh g hemajkam ab si has elid.
26114	JHN 1:1	Gd hu i si wehpeg ash d doakam hegai mach hab aꞌaga Jiosh Neꞌoki. Id ash d Jiosh ch am wehmaj g e-ohg Jiosh.
26118	JHN 1:5	K wabshaba g hemajkam pi e nakog hejel mas wo s-amich mo haschu chum ha tashogid.
26119	JHN 1:6	Am ad hema i kei g Jiosh g oꞌodham mat wo t-mihshmad. D id hab chehgig John.
26120	JHN 1:7	D g mihshmdaj hab chuꞌig matsh in wo i wuhsh jewed dahm hegai mo ab t-mahkch g t-doakag. K hab d elidaj g Jiosh mat wehs hemajkam wo kah ihda haꞌichu ahga k ab wo hiwgad hegai mat in i wuhsh.
26122	JHN 1:9	Id o d wohokam tonlig ch am tonlidch g wehs hemajkam ha-chegitoidag.
26123	JHN 1:10	Pegih, d ia haꞌichug g Jiosh Neꞌoki jewed e-nahtoi dahm. D wabshaba hemajkam nahtoij pi amichud.
26124	JHN 1:11	Ia adki mahsi k d t-wehm oꞌodham. D eda muꞌijj g Tutuligo pi amichud ch pi ab hu hiwig.
26125	JHN 1:12	Kuchd wabshaba haꞌijj ab i s-wohoch mo d Jiosh si Kehsha k ab hiwig. Kud heg hekaj ab t-mah g apꞌedag matt d haha wo aꞌaligajk g Jiosh.
26126	JHN 1:13	Pi ach heg wabsh hekaj d Jiosh aꞌaliga matt in mamsi o heg wabsh hekaj mo g t-jehj ab s-wohochud g Jiosh o heg wabsh hekaj mach hab t-elid machs d aꞌaligaj. Jiosh at hab t-juh mach d hahawa aꞌaligaj.
26127	JHN 1:14	Hegai mo d Jiosh Neꞌoki ad e wepogi g hemajkam k woho t-wepo chuꞌig ch ia t-shahgid d doakam. D g John an aꞌaga k si s-kaidam hab kaij, “Id o d hegai mani hab ahg ch am em-ahgid mat ab hema wabsh ni-oidk wo i e maskogid k eda woho d si s-has haꞌichu nash pi chum hekid an haꞌichug.” Neh, bo kaij g John. Kuchd heg amjed s-mahch g Jesus Christ ch am hahawa s-mai moki d Jiosh alidag ch si s-hemajima ch heg waꞌi ahg wohokam ch woho ab si s-t-hoꞌigeꞌid.
26131	JHN 1:18	Pi oki hekid hedai shaꞌi e-wuhpuikaj neid g Jiosh. K wabshaba g alidaj am wehmaj d hemako ch ab t-wui mahsko wua.
26155	JHN 1:42	D g Andrew am hahawa uꞌapa Jesus wui. T ab si shel i nei g Jesus k hab kaij, “S-mahch ahni map d Simon ch d alidaj hegai mo hab chehgig Jonas. Iꞌajed apt hab wo chehgigk Peter.” (Id o hab d ahga ‘Hodai.’)
26156	JHN 1:43	Am baꞌich d i tash, d hab i e ah g Jesus mat gam hu wo hih Galilee chekshani wui. K eda an oimmed hegai mo hab chehgig Philip ch am d kihkam Bethsaida t am. (Ahchim g Andrew ch Peter ha wehm ach am hab waꞌap d kihkam Bethsaida t am.) Jesus ad am cheh g Philip k hab kaij ab wui, “Ab g i ni-oid k wo ni-wehmajk.”
26159	JHN 1:46	D ab wabsh ge i nen k hab kaij, “Ih, nat hig woho haꞌichu s-apꞌekam wo i wuhsh ab Nazareth t amjed?” D g Philip hab kaij, “Pegih, k ab wo i him k hejel e-wuhpuikaj wo nei.”
26161	JHN 1:48	D g Nathanael hab kaij, “P has masma s-ni-mahch?” D hab kaij g Jesus, “M ani wabsh tonlid ch m-neid map am da suhna wecho mat eda koi m-cheh g Philip.”
26162	JHN 1:49	D hab kaij g Nathanael, “Ih, neh, kupki d Jiosh alidag ch d t-kownalig ahchim Tutuligo hemajkam.”
26163	JHN 1:50	D hab kaij g Jesus, “Ab ap ni-hiwig nani pi am wabsh tonlid ch m-neid. Nt wo si shel m-ahgi mapt baꞌich i s-ta neidamam haꞌichu wo nei imhab i baꞌich.
26164	JHN 1:51	Dani Jiosh si Kehsha ch am wo kuhpiꞌo g dahm kahchim am em-wehhejed. Kumt wo nei mat am wui wo i chehchsh g anghil ab ni-amjed k ab ni-wui ep wo i huhud.”
26166	JHN 2:2	Kumd ahchim ab i t-wai. Chd am hihi g Jesus wehm k am haꞌichug. Kumd am hahawa hab juh g gegosig.
26167	JHN 2:3	D wabshaba am i huh g nawait. D g Jesus jeꞌe ab wui hab kaij, “Huh at g ha-nawait.”
26168	JHN 2:4	D hab kaij g Jesus, “Pi o ab hu haꞌichu ni-him heg amjed. Pi at koi chum e ai mant am wo i ni-maskogi.”
26169	JHN 2:5	D wabshaba g jeꞌej hab ha ahg g pion, “Am g hab wo juhni matp haschu wo i em-ahgi mamt am hab wo juh.”
26170	JHN 2:6	K eda d t-himdag ahchim Tutuligo mach muꞌi haꞌichu has masma wapkon. D g hohodai hahaꞌa chuhdp am dadha mamt ab wo chum waꞌig k am hab wo junihid g t-himdag. D idam hahaꞌa hemako am hu i waikko wehst-mahm walohn shuhdagi am wo e toa.
26172	JHN 2:8	D hab hahawa ep ha ahg, “Am g wo wassibi k wo mah hegai mo nuhkud g e-hohontam piast.” D wa woho hab e juh k am i wassibi k ged hu ha mah.
26173	JHN 2:9	D ab jeh mo d si s-kehg nawait k eda pi mahch mas hebai waꞌi. Hegam o hi wa s-mahch pion mat hebai waꞌi.
26174	JHN 2:10	D am i cheh g ha-hohntam am i jehk g nawait k hab kaij ab wui, “Shaꞌi s-ap ab kahk ihda nawait. Haꞌi at an hi wo wa i ha wassibi g s-kehg nawait ga hu i wehpeg k wabsh g pi kehg nawait wo ha wassibi im hu i oidch. Kuptki eda ahpi im hu i oidch g si s-kehg nawait ha wassibi.”
26175	JHN 2:11	Neh, k id d si wehpeg s-hasig haꞌichu hab junij g Jesus. D am mahsko wua g e-gewkdag. Kuchd ab si s-wohochud mo woho d Jiosh si Kehsha.
26176	JHN 2:12	D am hahawa hab i e ah g Jesus matt am wo hihi Capernaum kihhim wui. D g jeꞌej ch wepngaj ep t-oi. Ch am haꞌichugkahim heꞌekia tash.
26595	JHN 11:3	Kudki idam uꞌuwigaj am hema cheha mad am wo him k wo ahgi g Jesus, “S-apꞌekam t-kownalig, si m-nawoj at mumku.”
26596	JHN 11:4	D am i kah g ha-ahga g Jesus k am t-ahgid, “Lazarus ash mumku. K wabshaba pi hab d ahga mat gam hu hab wo i e juh. Nt wo doꞌibia mamt hekaj ab wo ihm g Jiosh. T g Jiosh heg hekaj ab epai wo ni-ihm.”
26599	JHN 11:7	D hab kaij ab t-wui, “M att hig ep wo uhpam hihi Judea chekshani wui.”
26600	JHN 11:8	Kuchd ahchim chum pi hohhoꞌid ch hab kaij ab wui, “T-mashchamdam, pi o koi d shaꞌi tash mo wa am chum s-m-maꞌichkwuimk g hemajkam. Ttp eda am ep wo hihi!”
26601	JHN 11:9	D hab kaij g Jesus, “T am wabsh s-ap wo himad g oꞌodham tash ch ed ch wabshaba wo e huchwua s-chuhugam k ed. Pegih, pi at has wo e juh mo eda ni-apꞌechudch g Jiosh mant hab wo junihid g chikpanaj.”
26603	JHN 11:11	D hab ep kaij g Jesus, “Koi at g t-nawoj Lazarus. Nt wabshaba am wo uhpam him k wo wuha.”
26604	JHN 11:12	Kuchd hab kaij, “Kohsig o s-kehgaj wehhejed. T wo wa hejel apꞌet.”
26607	JHN 11:15	Ni wabshaba wabsh s-ap ni-tahtk mani pi am hu wehmaj namt pi haha wo nei mant has wo ni-juh k ab baꞌich wo i s-ni-wohoch. Tt oi wo hihim k wo nei.”
26608	JHN 11:16	D ihda Thomas mam hab aꞌaga Kuadi hab kaij ab t-wui, “Pegih, ttp wo oi g t-mashchamdam k wehmaj wo t-koꞌij.”