23216	MAT 1:3	Tsh g Judah an ha aꞌalidt g Perez ch Zerah heg ab mash d Tamar. Tsh g Perez an alidt g Hezron. Tsh g Hezron an alidt g Ram.
23222	MAT 1:9	Tsh g Uzziah an alidt g Jodam. Tsh g Jodam an alidt g Ahaz. Tsh g Ahaz an alidt g Hezekiah.
23223	MAT 1:10	Tsh g Hezekiah an alidt g Manassah. Tsh g Manassah an alidt g Amos. Tsh g Amos an alidt g Josiah.
23233	MAT 1:20	Sh am oidahim ihda g Joseph. Kutsh am haha wabsh ab wui i e chehgi g anghil am chehchkij ed k hab kaij, “Joseph map ab d Davidbad amjedkam, am g wabsh s‑ap e tahtk k wo bei g Mary mat d wo m‑wehm kihkamk. Hekia S‑apꞌekam Gewkdag at hab juh ihda ali mat g Mary wo bei.
23236	MAT 1:23	Hema g si s‑ap chehia at wo bei g cheoj ali pi koi ab hu i miabidk g cheoj. Kumt hab wo aꞌagad Manuel mo hab d ahga Jiosh o t‑Wehmaj.
23239	MAT 2:1	Jesus atsh am mahsi Bethlehem kihhim t am am Judea chekshani ch ed. Sh wenog am hema d kownal Judea ch ed ch hab chehgig Herod. Tsh ab haꞌi hihi siꞌal tahgio amjed mash s‑chu aꞌamichud ab huhuꞌu t ab. K eda g Jerusalem d kownal daikud am t‑jewedga ed. Tsh am dada idam k am ha kakke g hahaꞌichu ch hab kaij,
23245	MAT 2:7	Tsh g Herod am s‑aꞌagim i ha wai hegam s‑chu aꞌamichuddam k ab ha amjed s‑mai matsh hekid ab i e mahsid hegai huꞌu. Tsh am ahgi.
23246	MAT 2:8	Tsh g Herod am hahawa ha ahgi mat gam hu wo hihi Bethlehem wui hab ha ahgch, “Am g wo hihim k am wo si i gah hegai ali k hekid wo sha chehg k ia wo ni‑ahgi. Kunt ahni am hab waꞌap wo him k ab wo ihm mani ab has elid.”
23250	MAT 2:12	Sh g Jiosh am ha ahgid am ha‑chehchki ed matsh pi am hu ep wo hihi Herod wui. Kutsh heg hekaj im hu wabsh hihi e‑jewedga wui am hema wohg ch ed.
23251	MAT 2:13	Tsh ab hahawa i e chehgi g anghil Joseph wui am chehchkij ed k ash hab kaij, “Kownal Herod at am wo i gahghi ihda ali mat wo chum s‑muꞌam. Mt heg hekaj gam hu wo hihi Egypt jewed wui k am wo haꞌichugkad. Kunt am wo em‑ahgi mamt hekid ep wo i hihi.”
23254	MAT 2:16	Pegih, tsh pi am hu ep i hihi Herod wui hegam s‑chu aꞌamichuddam mash wa am ha ahgid g Jiosh. Tsh heg hekaj bagat g Herod. Sh eda idam heki hu ahgid mo am hu d i gohk aꞌahidag mat wa am cheh hegai huꞌu. Kutsh heg hekaj ha cheha g e‑shondalig matsh wehs wo ha kokda g aꞌal wihpiop mash d gohk ahidkam ch am i wecho amai Bethlehem ch ed ch an i wehgaj.
23255	MAT 2:17	Neh, id atsh wa hab e juh hab masma mash wa g Jiosh heki hu waꞌi hab kaij matsh hab masma hab wo e juh. Hegai kelibad Jiosh haꞌichu i tashogiddam mash hab chehgig Jeremiah atki an oꞌoha mash hab kaij g Jiosh:
23257	MAT 2:19	Sh am dadha hegam Joseph g ali wehm Egypt jewed ch ed. Sh am hu hebai, tsh g Herod muh. Tsh am hahawa ep i e chehgi g anghil am chehchkij ed g Joseph k ash hab kaij,
23260	MAT 2:22	K wabshaba g Herodbad alidag wenog am d kownal Judea ch ed ch hab chehgig Arkelaus. Tsh g Joseph am i s‑mai mo id d kownal k atsh sha s‑ehbeni mas am wo i dahiwua amai. Tsh g Jiosh am ep ahgi chehchkij ed matsh pi am hu ep wo hihi Judea wui. Tsh hekaj imhab haꞌab ep hihi Galilee chekshani wui
23261	MAT 2:23	k am dadhaiwua Nazareth kihhim ch ed. Heki atki hu hema oꞌoha g kelibad Jiosh haꞌichu i tashogiddam mamt hab wo aꞌagad ihda “Nazareth t am oꞌodham.”
23264	MAT 3:3	Neh, id o hab ahg John hegai kelibad Jiosh haꞌichu i tashogiddam mash hab chehgig Isaiah mash eda hab kaij: Hema atsh gam hu jeg ed wo ha mihshmad g hemajkam hab kaijch: Neh, in atsh wo i wuhsh jewed dahm hegai mo d ge kownal wehs haꞌichu dahm. Kumt heg wehhejed wo i e nako.
23268	MAT 3:7	Haꞌi atsh am dada hegam mo d Palasi ch hegam mo d Sajusi matsh wo nei ihda pahl wakona. Sh hab ha ahg g John, “Hah, ahpim mam pi ap chegitoidag, bamki e elid mamt wo e doꞌibia ab amjed g s‑koꞌok e‑namkidadag heg wabsh hekaj mam ab d Abrahambad amjedkam. Nt wabshaba wo em‑ahgi mamt pi woho wo e doꞌibia, heg hi wa mamt am wo e chehgi am hab junihidch g s‑apꞌekam mamt gam hu s‑ohhod g pi ap e‑chegitoi. Wehs hegam mat gam hu wo s‑ohhod g pi ap e‑chegitoi at d wo Jiosh hemajkamgak ch hekaj hab masma wo e kuint mo d Abrahambad amjedkam, chum wa g nahnko mahs hemajkam.
23272	MAT 3:11	Kush hab ep kaij g John, “Pi g hab wo ni‑elid manis ahni d si haꞌichu. Ab at hema wo i wuhsh ni‑oidk k d wo si haꞌichuk. Ahni ani hi wa em‑pahl wapkon mamt eda gam hu wo s‑ohhod g pi ap e‑chegitoi. T wabshaba heg ab wo em‑mah g Hekia S‑apꞌekam Gewkdag k gam hu hab wo i juh g pi em‑apꞌekam hab sha masma mat g mehi wo mehi g shaꞌi.
23277	MAT 3:16	Tsh am haha wabsh i chum wuhsh g Jesus shuhdagi t amjed. Tsh g dahm kahchim gam i e kuhpiꞌo. Tsh ab i hud g Hekia S‑apꞌekam Gewkdag ab ab g Jesus hab sha masma mat g hohhi.
23279	MAT 4:1	Sh g Hekia S‑apꞌekam Gewkdag hab hahawa ahg g Jesus mat gam hu hejelko wo hih mo am d tohono jewed matsh wo e aꞌappe. Tsh heg hekaj gam hu hih g Jesus
23283	MAT 4:5	Kutsh g ge Jiawul am hahawa wuhpuij tahgio i mahsid g geꞌe cheopi. Heg o am kehk amai mo hab e aꞌaga Si Hekia S‑apꞌekam Kihhim ch d Jerusalem.
23288	MAT 4:10	Kush hab kaij g Jesus, “Gam g hu hihm, ahpi ge Jiawul. An o hab chuꞌig Jiosh oꞌohana ed: Heg amt waꞌi Jiosh ab wui wo i gehsh k ab wo ihmad ch heg ab wo waꞌi s‑wohog elidad.”
23296	MAT 4:18	Sh an him g Jesus Galilee kahchki hugid an. Kush am haꞌi oiopo g waptopi ha uꞌudam ch am wuhpa g chuagia shuhdagi ch ed ch hekaj am ha uꞌu g waptopi. Hema ash d Simon ch hab hahawa e chechcheg Peter. Kush hema d wehngaj ch hab chehgig Andrew. Jesus atsh am i ha nei idam
23315	MAT 5:12	ch wo si s‑hehgigk no pi geꞌe haꞌichu ab em‑makiog g Jiosh. Heg at wa oidk am hihi g kekelibad Jiosh haꞌichu i tashogiddam.
23317	MAT 5:14	“Ahpim mam ab si ni‑hiwig amt wehs wo ha tonolidad g hemajkam. Heg o wa wepo mam d tonlig am ha wehhejed. Pi g am wo ehstokch hegai mamt haschu hab wo junidad g Jiosh. Neh, no hig pi woho mat pi ap wo e ehsto g kihhim matp am wo dahmkad g tohnk.
23320	MAT 5:17	“Pi ant hab ahgk ia jiwia jewed dahm manis gam hu hab wabsh wo i juh hegai chehanig ch mashchamadag matsh wa g kekelibad Jiosh haꞌichu i tashogiddam ab bei Jiosh t amjed. Heg eda o an oꞌohanas mant has wo masmak ch has wo ni‑juh k wo nahto g ni‑chikpan.
23353	MAT 6:2	“Pi g wo s‑e chehgidamk mamt hekid wo i ha wehmt g shoꞌigkam. Hegam mo s‑e chehgidamk mo i ha wehmt o am hab wua em‑namki ed ch an kahya ch ed. K g hemajkam ab si has ha elid. Neh, id o d ha‑namkidadag. Nt wo si shel em‑ahgi mat g Jiosh pi ab hu has wo ha el.
23356	MAT 6:5	“Pi g wo s‑e chehgidamk mamt hekid wo e hoꞌigeꞌidahu. Hegam mo s‑e chehgidamk at wo gegokiwua k wo e hoꞌigeꞌidahu am em‑namki ed ch an kahya ch ed. Kut wehsijj wo ha neid k ab wo si has ha elidad. Neh, id o d ha namkidadag. Nt wo si shel em‑ahgi mat g Jiosh pi ab hu has wo ha elidad.
23358	MAT 6:7	“Hegam mo pi mahch g Jiosh o am wabsh muꞌikko e dahm hab haꞌichu chechꞌe hab elidch mat hab waꞌi masma wo ha kah g Jiosh. Mt wabshaba ahpim pi hab masma hab wo e junihid.
23367	MAT 6:16	“Pi g wo s‑e chehgidamk mam pi ap e tahtk mamt hekid heꞌekkio pi wo e gegos e hoꞌigeꞌidahunch. Hegam mat wo s‑e chehgidam at wo nei g e‑namkidadag mat g hemajkam ab wo si has ha el. Nt wabshaba wo si shel em‑ahgi mat g Jiosh pi ab hu has wo ha el.
23375	MAT 6:24	“Pi at hedai wo e nako mas ha wepo hab masma ab wo ha neidad g gohk e‑aꞌamo. Hemho wa atp hems hema baꞌich wo i s‑wohog elidad. Em‑kaisdag o heg wa wepo mo d em‑ahmo mamtp heg hekaj baꞌich wo i pihk e elidad mam hi g Jiosh.
23379	MAT 6:28	“Pi g am wo si e kudutad ab amjed mams haschu ab wo enigat. An g wo i neidad g haꞌichu heosig m an wehsko chuhch. Heg o wa wepo mo si s‑kehg e enigadadch ch eda pi haꞌichu shaꞌi shohshom.
23383	MAT 6:32	Hegam mo pi mahch g Jiosh o id am wa si oid. M eda ahpim d Jiosh aꞌaliga. K heg s‑mahch mam tatchua wehs ihda.
23389	MAT 7:4	Do iattogi mamtp hab wo chei mamt haꞌichu ab wo i wuhshad wuhij ed mo eda g baꞌich i geꞌe haꞌichu ab woꞌo em‑wuhi ed. Hemho wa amt wehpeg wo i apꞌech g pi e‑apꞌedag k haha wo e nako mamt wo i apꞌech g hema pi apꞌedag.
23391	MAT 7:6	“Pi g ab hu wo ha ahgid g Jiosh haꞌichu ahga hegam mo pi ab hu tatchua. Heg at wo wa wepok mamt g s‑ta keꞌidam gogogs ab wo ha mah g hekia s‑apꞌekam haꞌichu o g kokji ab wo ha mah g si s‑namkig babiuga. Gogogs at hi ab wabsh wo i nehni k wo s‑koꞌokam has wo em‑juh. T g kokji hi wabsh wo kehiwia g babiuga.
23411	MAT 7:26	“T wabshaba pi wo apꞌek g em‑doakag mamtp pi ab hu wo wohog elidad g haꞌichu ni‑ahga. Heg at wo wa wepok matp hems hema pi wihnam wo shondad g e‑kihta.
23423	MAT 8:9	Bo wa masma ab haꞌichu ni‑chehani g ni‑geꞌejig. Kuni ab s‑wohog elid. K g ni‑shondalig hab waꞌap ab s‑ni‑wohog elid. Hema ant hab wo ah, ‘Am g hihm.’ T am wo hih. Nt hema hab ep wo ah, ‘Ab g i hihm.’ T ab wo i hih. Kuni g ni‑pionag hab ep aꞌaga mat haꞌichu hab wo ni‑juni. K am hab wua.”
23431	MAT 8:17	Heki atki hu waꞌi oꞌoha g Isaiabad matsh id am hab wo e juh. K hegai oꞌohanaj hab chuꞌig: Heg at ab wo moht g t‑mumkidag k im hu hab wo i juh ab t‑amjed.
23446	MAT 8:32	Sh hab ha ahg g Jesus, “Hijiwo.” Tsh wa woho gam hu i wuwha k am wahp kokji ha eda. Kutsh wehsijj idam kokji am agshp i wohp k am shul shuhdagi ch ed k wachkk.
23460	MAT 9:12	D g Jesus am i ha kaiok hab kaij ab ha wui, “Idam pi ap hemajkam o s‑e doꞌibiamk hab masma mat g kokꞌodam wo s‑e doajidam. Hegam mat hab wo e elidad mo s‑apꞌe at pi wo tatchua g mahkai.
23472	MAT 9:24	Sh hab kaij g Jesus ab ha wui, “Gam g hu wo i wuwhaki wehsijj. Heg o wa wepo ni‑wehhejed mo wabsh kohsh g chehia.” Kush wehsijj si s‑koꞌokam ash nash pi s‑mahch matsh muh.
23476	MAT 9:28	Kuchd ged hu i wahp kih ch ed. D idam gohk pi neneadam am dada wui g Jesus. Kud heg ab ha kakke ch hab kaij, “Nam s‑wohochud mant wo ni‑nako mant wo em‑nench?” D hab kaij idam, “Heuꞌu, ab ach si m‑hiwig, s‑apꞌekam t‑kownalig.”
23506	MAT 10:20	Hekia S‑apꞌekam Gewkdag at wo em‑ahgi mamt has wo chei.
23507	MAT 10:21	“Hahaꞌichu at wo em‑kokda. Kut ab ha wui wo em‑gagda chum hems g em‑wepnag o g em‑jehj o g em‑aꞌaliga.
23514	MAT 10:28	Pi g wo shaꞌi ha ehbidad hegam matp hedai wo chum s‑em‑kokdaim. Pi at wo e nako mas baꞌich i s‑koꞌokam has wo em‑juh em‑kokdak. Heg at waꞌi Jiosh wo e nako mat am wo em‑daꞌich Jiawul kih ed mamtp pi am hu wo wohog elidad. Kumt heg ab wo waꞌi si has elidad.
23524	MAT 10:38	Mt gam hu wo dagito g hejel hab e elida k ahni hab ni‑elida hab wo junihid ni‑wehhejed e shoꞌigchudch. Heg at wo wa wepok mam ab mohto g kots ch ab ab wo e muhkid. Kut pi haꞌichu wo namkigk g em‑wohochudadag mamtp pi hab masma ab wo i ni‑oi.
23525	MAT 10:39	Pi amt wo heki wua g e‑doakag mamtp wo hekaj am ni‑wehhejed. Heg at wo heki wua g e‑doakag matp hedai wo chum s‑daꞌad.
23526	MAT 10:40	“Heg o wa wepo mo s‑ap ab ni‑neid ahni matp hedai ahpim s‑ap ab wo em‑neidad. K hab waꞌap s‑ap ab neid g Jiosh matp hedai s‑ap ab wo ni‑neidad.
23527	MAT 10:41	Hegai mat hedai s‑ap ab wo i ha nei g ni‑chuhchai at ha wepo wo bei g s‑kehg mahkigdag. Kut hegai mat hedai s‑ap ab wo i nei g s‑apꞌekam oꞌodham heg wepo wo bei g s‑kehg mahkigdag.
23533	MAT 11:5	Ha ani dodajid g pi ha dodajidam kokꞌodam ch pi neneadam ch pi hihimidkam ch pi chechkaidkam ch ha chechegitoichud g koꞌi ch am ha ahgid g shoꞌigkam mat g Jiosh wo ha doꞌibia.
23536	MAT 11:8	Kumt pi hema s‑neidam mo s‑kakaisim e enigadadch. Hegam mo hab masma e enigadadch o si s‑kakaisim kih.
23538	MAT 11:10	Heg o hab ahg g Jiosh ch hab kaij: Am ant wo hema i maskogi mat am wo i ha apꞌech g hemajkam am wehhejed g si ni‑Kehsha jiwhiadag am jewed dahm. Neh, bash kaij g Jiosh.
23544	MAT 11:16	D hab ep kaij g Jesus, “Hegam mat pi ab hu wohog el g John k pi ab hu ni‑bei o hab masma pi ta wepoma mo g aꞌal. Neh, tp hems am wo chichwid g aꞌal ch hab wo ha ah,
23549	MAT 11:21	ch ab kaij, “Muꞌi s‑hasig haꞌichu ant am hab juh Korasin ch Bethsaida kihhim ch ed. Kutki eda muijj amai pi ab hu ni‑wohochud k heg hekaj ab wo bei g s‑koꞌok e‑namkidadag geꞌe lodaita tash ch ed. Hegam mo am kih Tyre ch Sidon t am ch pi geꞌe mahch ab amjed g Jiosh at pi am hu hugkam wo bei g s‑koꞌok e‑namkidadag. Tp hems ab wo i e shoꞌigchud k gam hu wo s‑ohhod g pi ap e‑chegitoi matp wo nei ihda s‑hasig haꞌichu.
23551	MAT 11:23	Capernaum t am hemajkam o ab si e haschud. T wabshaba g Jiosh gam hu wo shul Jiawul kih ed. Hegam mash wa am kih Sodombad t am at gam hu wo s‑ohhod g pi ap e‑chegitoi matp wo nei ihda s‑hasig haꞌichu. Kut pi wo chum padch g ha‑kihhim.
23557	MAT 11:29	Pi o hasig g ni‑himdag ch pi wechima wo i em‑mohtoꞌi haꞌichu. Si ani s‑hemajima ch ab wabsh ni‑shoꞌigchud. Kumt ab ni‑amjed wo s‑mahch k wo e ulinihogidad. Hegai mant ab heheꞌejel wo em‑mohtoꞌi at wo s‑hawkk nant pi am wo i em‑wehmajk hab sha masma matt wo t‑makodadch g yehwakaj.” Neh, bo kaij g Jesus.
23576	MAT 12:18	Id o d si ni‑Kehsha mat d wo ni‑pionagk. Ab ani si tatchua. K si ni‑tatchui oidch hab masma. Ab ant wo mah g Hekia S‑apꞌekam ni‑Gewkdag. Kut am wo ha ahgi g wehs hemajkam mant s‑ap wo ha aꞌappe.
23586	MAT 12:28	Hekia S‑apꞌekam Gewkdag o ab ni‑mahkch ihda gewkdag mani hekaj gam hu hab i ha wua g jijawul. K id am wohokamchud mat heki hu in i wuhsh g Jiosh kownaltalig em‑shahgid.
23588	MAT 12:30	“Hegai matp hedai pi ab hu wo i ni‑wehmajk o ab ni‑wui kehk ch wabsh ha gantan hegam mani s‑ha doꞌibiamk.
23589	MAT 12:31	Wehs o gam hu hab i junihog g pi ap ha‑chuꞌijig g Jiosh. K wabshaba si geꞌej g em‑chuꞌijig mamtp ab wo has ah g Hekia S‑apꞌekam Gewkdag. T g Jiosh pi hekid gam hu hab wo i juh.
23590	MAT 12:32	Im at hu hab wo i juh g Jiosh g chuꞌijigaj hegai mat ab wo has ni‑ah ahni Jiosh si Kehsha k wabshaba pi hekid gam hu hab wo i juh g chuꞌijigaj hegai mat wo has ah g Hekia S‑apꞌekam Gewkdag.
23596	MAT 12:38	D am haꞌi haꞌichug g chehanig t‑mashchamdam ch Palasi ch hab ahg g Jesus, “Ha mashchamdam, ab g t‑chehgid g s‑hasig haꞌichukaj maptp woho d Jiosh si Kehsha.”
23597	MAT 12:39	D hab kaij g Jesus, “Si o hig woho pi apꞌe ch mehk ab amjed g Jiosh hegam mat pi ab hu wo ni‑hiwgam k hoꞌip nei g s‑hasig haꞌichu. Heg ant ab wo waꞌi ha chehgi mant am oidk hab wo ni‑juh hegai Jiosh haꞌichu i tashogiddam mash hab chehgig Jonah.
23608	MAT 12:50	Hegam mat hab wo junihid g ni‑ohg Jiosh tatchui o hab masma mo d ni‑wepnag ch ni‑jeꞌe.”
23609	MAT 13:1	Heg waꞌi tash ed achd gam hu hihi Galilee Kahchki wui. D am i chum dahiwua g Jesus mat wo t‑mashcha.
23616	MAT 13:8	T wabshaba hegam mat an s‑ap shul moihuna ch ed an wuhshani k muꞌi ab kait. Haꞌi at siant ab kait ch haꞌi chuhdpo wehst‑mahm ch haꞌi waikko wehst‑mahm.”
23620	MAT 13:12	Hegam mat s‑ap wo hekaj g e‑apꞌedag at baꞌich ep wo i nei. T hegam mat pi ap wo hekaj wabsh wo heb hu wua.
23621	MAT 13:13	Heg ani hekaj g haꞌichu wepogidakaj haꞌichu ha ahgid: Mat pi wo amich, chum as wo haꞌichu neid k wo haꞌichu kah
23623	MAT 13:15	no pi g em‑chegitoidag wabsh s‑kohmagi. Heg o wa wepo mamt am si ha kuhkp g e‑wuhpui ch e‑nahnk mamt pi wo neid k pi wo kah k pi wo amich nam pi pi e nohnogidamk ab ni‑wui. Kunt heg hekaj pi am hu wo i em‑apꞌech. Neh, bo chuꞌi g g Jiosh oꞌohana.
23626	MAT 13:18	“Am ant haha wo em‑ahgi mani haschu chum em‑mashcham id hekaj haꞌichu ni‑ahga ab amjed g haꞌichu eshdam. Heg kaichka ani wepogid g Jiosh haꞌichu ahga. Id o am e gantan ha shahgid g hemajkam hab masma mo g haꞌichu kai.
23641	MAT 13:33	D am hema ep ah g haꞌichu wepogida g Jesus hab kaijch, “Jiosh kownaltalig o hab waꞌap wepogidas mo g jewajidakud. Heg amt wo be k am wo wah wehnadk g chuꞌi k am heꞌes wo i dai. T wo chehmo g wahga mat wehs am wo i kopodka. Pegih, t g Jiosh kownaltalig hab wa masma wo chehmo g jewed.”
23643	MAT 13:35	Heki atki hu waꞌi oꞌoha g kelibad Jiosh haꞌichu i tashogiddam mat id am hab wo wa e juh. K hab chuꞌig g oꞌohanaj: Haꞌichu wepogida ant wo hekaj k am wo ha ahgi g hemajkam hegai mo pi hekid shaꞌi s‑e mahch ga hu i shohshonk amjed.
23645	MAT 13:37	D hab kaij, “Heg ani wepogidas mo g haꞌichu eshdam ahni Jiosh si Kehsha.
23646	MAT 13:38	K g oidag d ihda jewed. K g s‑kehg kai d hegam mat wo e doꞌibia k am wo haꞌichugk Jiosh kownaltalig ed. K g ni‑obga d jijawul ha‑geꞌejig. K g eshaj d hegam mat pi wo e doꞌibia. Hihka tash o d lodaita tash. K hegam mat hab wo juh g hihka d anghil.
23648	MAT 13:40	“Hegai shaꞌi mehidda o hab d ahga mat g pi ap hehemajkam gam hu wo i e shul jiawul kih ed mat hekid wo i e ai g lodaita tash.
23653	MAT 13:45	Kud hab ep kaij g Jesus, “Bamt masma wo s‑behim g Jiosh kownaltalig mat g s‑namkig hohodai nolawtdam wo s‑behim hegai mat wehs ha baꞌich wo i s‑kehgajk. Heg at wehs wo gagda g haꞌichu e‑eniga mat wo e nakog k wo ha nolawt hegai s‑namkigchu.”
23655	MAT 13:47	D hab ep kaij g Jesus, “Am ant heꞌes wo i em‑tashogi g Jiosh kownaltalig am wepogidch g waptopi uꞌikud chuagia. Heg at am wo wua g waptopi ha uꞌudam shuhdagi ch ed. T am wo e baꞌiha g nahnko mahs waptopi.
23659	MAT 13:51	D g Jesus ab hahawa t‑kakke, “Namt am wa s‑amich wehs ihda?” Kuchd hab kaij, “Heuꞌu.”
23667	MAT 14:1	D eda am hahasko haꞌi d ha‑kokownalig g Tutuligo ch d giꞌik. D idam am hema d kownal Galilee chekshani ch ed ch hab chehgig Herod. Kumd eda wehsko aꞌaga g Jesus.
23668	MAT 14:2	Kush id hab ha ahgid g e‑hahaꞌichuga, “Heg oki d hegai mo wa ha pahl wapkonahim ch hab chehgig John. Mua ant. Kutki wabshaba uhpam e chegito k hekaj hab e nakog mat hab wo juh g s‑hasig haꞌichu.”
23669	MAT 14:3	Herod atsh wa an bei g John k wulshp k ged hu si kuh am wehhejed g e‑hohnig. Id ash hab chehgig Herodias ch ash d chum hohnigaj g Herod wehnag. Kush heg hab chehgig Philip. Tsh g Herod ehs g hohnigaj.
23670	MAT 14:4	Sh amjed g John chum hekid hab a aꞌaga, “Mo pi shaꞌi hiwgidas maps g e‑wehnag hohnig wo ehs.” Kush g Herodias heg hekaj ahgid g Herod mat ged hu wo si kuh.
23671	MAT 14:5	Tsh g Herod chum s‑muꞌam nash pi am ahg g pi ap ha‑chuꞌijig. K wabshaba g Tutuligo hab kaij mo d Jiosh haꞌichu i tashogiddam. Kush s‑ha ehbid ch hekaj pi mua.
23672	MAT 14:6	Kutsh am i e ai g Herod mahsidag. Sh geꞌe piastchud. Tsh g Herodias uwi mad am e waila ha tahgio. Tsh g Herod si s‑hohhoꞌi ihda
23710	MAT 15:8	Haꞌi idam mo d chum ni‑hemajkamga o hab kaij mo ab si has ni‑elid ch ab ni‑ihm. K wabshaba g ha‑iꞌibdag si s‑kawpk ch si mehk ab ni‑amjed.
23720	MAT 15:18	Heg at im hu hab wabsh wo i em‑juh ab amjed g Jiosh mat wo pi apꞌek g em‑chegitoi.
23721	MAT 15:19	Heg at hab wo em‑juh mamt hab wo juh g haꞌichu pi apꞌekam. Neh, mtp hems wo ha mua o wo ha ehs g ha‑wehm kihkam o hab wo juh g s‑tohntom haꞌichu o wo haꞌichu ha ehs o wo haꞌichu ha iattogi ab hema i ep amjed o wo pi ap neo.
23726	MAT 15:24	D hab kaij g Jesus ab wui ihda uwi, “Heg o d waꞌi ni‑chikpan idani mant wo i ha wehmt g Tutuligo hemajkam.”
23728	MAT 15:26	D hab kaij g Jesus, “Heg at wo wa wepok mamt ab wo ha mah g gogogs g ha‑chechmait g aꞌal.”
23736	MAT 15:34	D hab kaij g Jesus, “Heꞌekia at am i wih g sismito?” Chd hab kaij, “Al wewaꞌak sismito ch al heꞌekia chuꞌuchum waptopi.”
23745	MAT 16:4	D hab ep kaij, “Si o hig woho pi apꞌe ch mehk ab amjed g Jiosh hegam mat pi ab hu wo ni‑hiwgam k hoꞌip nei g s‑hasig haꞌichu. Heg ant ab wo waꞌi ha chehgi mant am oidk hab wo ni‑juh hegai kelibad Jiosh haꞌichu i tashogiddam mash d Jonah.” Bad cheꞌiok k am ha dagito k gam hu hih.
23748	MAT 16:7	Kuchd am si aꞌaga ihda k hab kaij, “Heg oki hekaj hab kaij mattki pi haꞌi uꞌuk g sismito.”
23755	MAT 16:14	Kuchd hab kaij, “Haꞌijj o hab m‑elid map d hegai Johnbad mo wa chum t‑pahl wapkonahim ch haꞌijj hab kaij map d Elijabad o Jeremiabad o hema i ep kekelibad Jiosh haꞌichu i tashogiddam.”