23217	MAT 1:4	Ram oh Aminadap ohe itap oh. Aminadap oh Nason ohe itap oh. Nason oh Sarmon ohe itap ohmur.
23232	MAT 1:19	Ake hatporhan imap oh am hama oh Bokdus brer ake hah kuu moh noh ihan kuu moh mandatpora dahatipmur. Ihat dahatip orhor oh da yah han ohoh ire kintei Noh kuu moh mandatiprohmur rim mandahanoh uh amram kas hamo da er hamo hatipra rim noh ahar mandatpora dahatipmur.
23240	MAT 2:2	Aprisa Nuhur atan marpatdapat merum wamar Juda ire kakhan tit ita ma hapat dahama ihan dir sus ohe danong ham armi matpera rim apriyamur. Gin ama itiri brer oh de tei pat por dahandeingopari.
23246	MAT 2:8	Dahamar am hapat Noh brer ohnong sutpora dahama ihirnong Gin gur Betrehem apteinong sonmur. Susa pomat angmar wamtinmur. Wamara apris napotinmur. Napotperhan noh sus ohe danong ham armi matipramur pongopri.
23253	MAT 2:15	Sus patin gahan amrayaoh Herot oh haputmuro ritperhan it apdapari. Isip mongdapat ma it apdapa oh Got ohe meng porishe han ire han tit ohe mengtei por ma brak matip meng oh arpin dam timdipmur. Gipor ma brak matip oh Nohe brer oh Isip mong tei patin gin aprina potporhan Isip mongdapat apripramuro por ma brak matip oh dam timdipmur.
23254	MAT 2:16	Herot oh na haput patin orhor dakuu han ihir wan mandap saperhan oh Epe. Ihir dasuh naham wan mandap sa piyao daham heisup hangopri. Heisup hama ire Nuhur asut wamtipamur ma ritiri meng oh dahama Jisas oh brer oh ihtin san hat ma hapat daham ohe han ihirnong Gur Betrehem ap mutuhnong susa brer krismas yot na birhit pat brero ama ihtin brer gonsi ihirnong kaimat itinmur. Betrehem aptei pati brersi; Betrehem ap kakduup kakduup aptei ma pati brersi kaimat itinmur por darhengopri. Jisas ohnong kaimat itinmat ohe dasiapruh oh Gur ama aptei brer ihirnong gonsi kaimat itinmur por darhengopri.
23261	MAT 2:23	Oh susa Nasaret ap mutuhnong sus patesuhri. Nasaret aptei ma patesuh oh rih Got ohe meng rishe han ire meng oh Oh Nasaret han hatipramur rim ma brak matpa oh arpin dam tarpatipmur.
23262	MAT 3:1	Nasaret aptei patin gahan Jon oh tom patirisuh han oh aprisa Juda mong tei irat timbas hanip timbas mong tei patesuhri.
23270	MAT 3:9	Gur Nuhur Epraham ohe puh nuhur ohoh ihan Got oh batbet yan oh na napriprawa ma dahapti da oh dahapri. Gur nuhurwi Epraham ohe puh ohoh ihan er dasi hat patin orhor nambutiprawa dahapri. Basra. Wan kweinong mohhe Got oh Epraham ohe puh matin hatinmur.
23272	MAT 3:11	Porpat Noh gure er da ha mandatingwe rim tomwi napatirpatmur. Kasipnap han oh kom apripramur. Ma apripra han oh kasip isipsi han oh apripramur. Nohe kasip oh ohe kasip hrepdapat hat patepramur. Oh kasip yahnapsi han ohoh ihan noh bisei han hatin hat pat ohoh ihan noh orhe tongapnong na apison inasi hat patmur. Ihtin kasipnap han tit aprisa gurnong Got ohe Yahsup ohsi; gure danong nahirmatin ohe irat has hatin ohsi nohe tom ma napatirpatru nahat gure mutuhnong namtipramur.
23275	MAT 3:14	Potporhan Jon oh Es. Gorhordapat nohnong napatirhan yahmuro. Nohdapat kinhato potipri.
23276	MAT 3:15	Potporhan Jisas oh Es. Norhe ma dahapatru nahatina. Nahatporhan Got orhe Ihir ihat ha songwe dahapat mandapnong dimtiprohemuro. Ihyahan yahmuro pongopri. Potporhan Jon oh amrama tom patitipri.
23281	MAT 4:3	Pahoh hatporhan er da nahapat han oh aprisa Go Noh Got orhe brermur ripat ohoh ihan kwei moh den mara dinmur pongopri.
23284	MAT 4:6	Prusa hamekat ka hatdapat Rih Got oh ritporhan ma brak matpa meng moh giritpamur. Got oh orhe atamreipti han enser bap ihirnong Gur oh kwei trah tei tapdiprarim gur marin orhorwi paptenmur porpatmur. rim brak matpamur. Ma brak matparu ihir ihat gonong namrin napapti ohoh ihan pung rim kakdahnong wayonmur. Wasa go Noh Got orhe brermur ripat ohoh ihan ihir ihat namrin napapti ohoh ihan go na tapdiprohmur pongopri.
23291	MAT 4:13	Aprisa Nasaret aptei mandama Kapaneam apteinong sus angopri. Kapaneam oh tom hru hir patmur. Seburun ire mongsi Naptari ire mongsi mong en tei oh patmur.
23293	MAT 4:15	Ma brak matip oh mamaru hat patmur. Seburun ire mong ma pati hano Naptari ire mong ma pati hano tom hrunong sapti mandap tei ma pati hano tom Jodan han tan ma pati hano Gariri mong ma Juda na hat pati han bapo ihir
23306	MAT 5:3	Meng ma am matip oh Amamsi hat ma pati guroh mamarumur. Gur damdapat Noh Got ohe kintei bisei han pat sa ma dahapti gur Got ohe napapat hrepnong hat pati gur ohoh ihan ama gur amamsi hat pati bap gurmur.
23315	MAT 5:12	Gur Ma inahaya moh rih Got ohe meng porishe han ihirnong ma indeisheru ginhe nohnong inahapti ma hapat. Noh kaput Got ohe pat tei yan isip datipra ma hapat daham amam henmur pongopri.
23320	MAT 5:17	Jisas oh porpat ihirnong Gur nohnong Oh Got ohe meng porishe han ire mengo Moses ohe sawa mengo oh amkar mandatinmat apirhe dahapri. Basra. Noh ama ohe pe asoh dam ha timdinohrim apirmur.
23323	MAT 5:20	Noh mama meng moh gurnong napotiprohmur. Sawa am hat pati hano Parisio ihir Nuhur Got ohe mengnong amram saptimur ma ripti oh garpokmur. Gurri ire tan hathe sasipri. Gur gonsi isip mar amratinmur. Na ihyahan Got ohe napapindin teinong na hatiprimur pongopri.
23326	MAT 5:23	Gur Got ohnong apopo deno tit atpora daham sus atpor ihpatin Ai. Nohe arwananah ihirnong ma imtir oh pat sa daham hahhan kapkap kakdah mandama susa meng ohri pomtinmur. Pomara it aprisa atemtinmur.
23327	MAT 5:24	Mameng mohnong daham am hatinmur. Tit han tit gonong Gwe ma nohnong inahatir oh gin meng pondeipti han ire duupnong sus pomtiper napor nambur ushanoh mandap sus orhor Watina. Han mohoh nohnong nambur us mohri meng nasama Gin karapus matina naporpat han ohe bes teinong nahatiprohkin. Nahatporhan ohdapat dupsi han ire bes teinong nahatporhan ihir karapus apnong nahatiprikin. Ihan meng pondeipti han ire duupnong na pim patin orhor meng oh mandap tei morhor pomtipera daham ohnong pora gutagutwi meng pomar mandanmur.
23329	MAT 5:26	Mandap meng na pomara napisus karapus apnong nahahhanoh opis mohotin ohe yan oh go mohopatin tit sup tan pok tit hatip hahhanoh Gin ha ihtinoh. Gin arpit namdamur. Sonmur napotiprada. Basra. Na ginapora gonsinap yan atporhanwi Gin sona napotipramur pongopri. Ma gipotip oh gin mama pati dik morhor er da oh mandama ha yah hatingwe rim gipotipmur.
23339	MAT 5:36	Kak ohe boknonghe mar awam tukeripri. Gur kak batnong kwi bat matin hatindo gun bat matin hatindo. Na imtin hatin ohoh ihan ire boknonghe mar awam tukeripri.
23340	MAT 5:37	Gur Nuhur ihtiprohewa dahayahanhe Nuhur ihtiprohewa rim mandanmur. Na ihtiprohewa dahayahanhe Na itiprohewa rim mandanmur. Amengwi rima mandanmur. Ama meng ohe boknong it kasip matinmat awamhe tukeripri. Ihat mengripti han bap gur er nahapat han ohe atem teimdapat hat patim ihat mengripti han bap gurmur pongopri.
23345	MAT 5:42	Tit napina napor deip nahahhanoh aprishenmur. Ihir Gin go ama han napina. Noh yan hatpora naporhanoh na amram kom asaripra. Aprishenmur pongopri.
23348	MAT 5:45	Ihat ma pati han gurnong ihir wanahama Maihir aw tei ma pat han Got orhe brer hat pati ma hapat sa naporipri. Got oh atano tomo oh Noh yah han ire ru teinong ohwi apripor ripatda. Basra. Tap mat napripat hanmur. Ihtin ohoh ihan gurhe ihtin dawi hat orhorwi patenmur.
23350	MAT 5:47	Gur guragure yah han ihirnongwi amam da apriyahanoh gur kat han Got ohe danong na hat pati han ire ma haptiru guragur tap da hat pati han bap gurmur. Ihirsi tap da hat pati ohoh ihan gur Ihir er hat sapti ma hapat. Nuhur yah hat sapti han bap ma hapat dahapri.
23356	MAT 6:5	Jisas oh ameng oh porpat Gur Got ohsi mengitinmat pang yot hat patim mengripti han ire beten hapti ohe tan ihat beten hapri. Ihir ha am hatingwe rim rotu apo mandap tarmuriya teio tandeim ire kin tei beten haptimur. Ama ihapti ohe yan oh ama orhor dariptimur. Kaput komdapat ma datipri yan oh timbasmur. Noh arpin meng napormur.
23363	MAT 6:12	Nuhurhe kat han ihir er nahatperhan it ihirnong yansi na mar eimat hanhan mar mandaptimur. Ihan gohe nure ihirnong yansi na mar hanhan mar ma mandaptiru mat orhor nure er hat sapti pe oh yansi nahatipra. Dat namdatinmur.
23366	MAT 6:15	Na hanhan mar it yansi mat orhorwi ayahanoh ita ohhe gure er hat ma saya ohe batbet yan oh dat na namdama gure boknong yansi nahat orhorwi napapatmur pongopri.
23367	MAT 6:16	Jisas oh Gur noh gin den na dam Got ohsi mengsarwi inpora dahaya han gur pang yotsi han ire tan hapri. Ihir Mama han moh den na dam Got ohsi meng sarpat hanhe ha dahatingwe rim ihir tahas ariyao rumsi hayao haptimur. Ama ihapti ihir iraire yan dar ihaptimur. Kaput ti na datiprimur. Noh arpin meng napormur. Gur den na dam Got ohsi mengsar inper ihyahanoh ire tan hat ihapri.
23376	MAT 6:25	Jisas oh kuuhan ihirnong Gur amratin. Gur Nure ma indipri oh nuhur den oh kinhat sa indeipri. Watah andin oh kinhat sa indipri daham da trun trun darher ruumsup hapri. Gin de ohe isip hat pat. Dire mama pati oh isip hat patda da den oh isip hat pat. Gin mama pati ina moh isip hat patda da ina teimdapat ma aripti watah oh isip hat pat. Basra. Ina tei ma pat erer oh isip hat na patmur. Hanip dire ma patinong oh isip hat patmur.
23377	MAT 6:26	Gur ner ire ma patinong oh dahenmur. Ihir den gonoyao den ruprup mat sariyao den ruprup mat itin ap hayao na haptimur. Na ihapti orhor ita aw tei mahat ma pat han oh den oh asarpatmur. Got ohe ner win timbas han bap ihirnong indeipat moh hanip winsi bap dirnong atnap imat napapat ma hapat dahenmur.
23378	MAT 6:27	Gur Epe. Nuhur kinkinhatwi sa patepri daham da darher ruumsup hayahanoh ama ihya ohe pe oh guragure da indinnong asoh gar tit dip matin hatinda. Basra. Gur indin danong gar tit na dip matin ina hat patimur. Gur na imtin hatin hat pati ohoh ihan gur Epe. Nuhur kinhat patepri sa daham da darheripri.
23379	MAT 6:28	Gur Epe. Nuhur kian han sa an patepri daham da darheripri. Unuh gwe ma timapatnong dahenmur. Unuh gwe ihir timapti irair tamreima watah hama ariptida.
23380	MAT 6:29	Basra. Na ihapti orhora; ire boknong yahnap hat patimur. Yahnap hat ma pati oh kakhan Soromon ohe watah yahnap aro awataham orhor yahnap hat ma patesuh oh mama unuh gwe yahnap ire hrepdapat hat patesuhmur.
23381	MAT 6:30	Unuh oh ginwi marporhan kimsi kutwidapat pera irat tei saripti han moh Got orhor it watah yahsi deipatmur. Ama imat na paten han garnong oh Got oh awat yahsi deipat ohoh ihan hanip gur Nuhurnong atnap andin ohe watahsi nahat napapat ma hapat dahenmur. Gur Oh imat napapatwa na dahapti ohoh ihan gur Got ohnong Inahatin hatin hanwa ma dahapti oh garpok hat patmur.
23382	MAT 6:31	Ihan gur Epe. Noh kian han sa dam patepra noh kian han sa an patepra daham da trun darheripri.
23384	MAT 6:33	Gur Noh Got ohe napapindin hrepnong hat patneng. Hat patin noh orhe yah hat ma pat da hatin hat patneng daham ama danong ohri henmur. Hatporhan orhor erer oh napriproh basda.
23385	MAT 6:34	Ihan gur Noh kimsi den kinhatiproh sa Noh kimsi kian han sa an patepra daham da trun darheripri. Ihan gur Noh mama ruumsup moh gin orhorwi ma hapat. Kimsi ohe ruumsuphe kimsi orhorwi ma hapat dahat patenmur pongopri.
23389	MAT 7:4	Gur guragure kin irat barak isip ma titapat patnong oh dat mandatpora na daham ire garnong oh Nohana. Gwe huhun gar oh noh dat namdatpora poriptimur. Gipor ma ihirnong sapti oh kianorim gur ihirnong imat saptio.
23397	MAT 7:12	Got ohe meng pot pisashe han ire rim ama brak matpa mengo Moses ohe sawa mengo ama rishe meng ohe duuptei kak hat ma pat da oh mamaru hat ma dahat sapti da ohmur. Kat ihirdapat nuhurnong imat napriptinengo imat napaptinengo ma dahapti da orhor ihirhe dire ma dahapti da hatin morhor hat pati ma hapat daham guragure ma Nuhurnong imat napaptineng ma dahapti da orhor ihirnonghe imat apris paptenmur pongopri.
23398	MAT 7:13	Jisas oh Gur mohnong dahenmur. Er naham timbas nahatin ohe apteinong son mandap oh isip yahnap hat patmur. Ama mandap ron gwateihe isip yahnapmur. Isip yahnap ohoh ihan hanip ruumsan han ihir wamara Isip yahnap mandap moh kapkap son ohe mandap ma hapat daham hanip ruumsan ihir ama mandap oh ros saptimur. Yah hat paten ohe apteinong son ohe mandap oh gop ohmur. Ama mandap ron ohe gwatei kathe gop kat pokmur. Ihtin mandap gop kat ohoh ihan hanip ihir wamar Moh gop mandap kat hanip na son kat ma hapat daham ut han pok ros sapti mandapmur. Ihtin mandap yot pati ohoh ihan gur Nuhur gop mandap moh sasiper daham ama gop kat ros sashenmur pongopri.
23400	MAT 7:15	Porpat Jisas oh tit meng tit gipongopri. Gur ihir Nuhur Got ohe meng poripti han nuhur apriyamur dasuh nahat apriprohe ohoh ihan potahat watahat indinmur. Ihir ina teimdapat sipsip ire manap ham yah hat pati da hatin hat apripri orhor ire mutuh ohon kotwa hanip nipat han hatin hat apripri ohoh ihan gurhe inin hat orhor watahat patenmur.
23401	MAT 7:16	Ihtin han bap ihir ihat apriyahanhe irat gwe timdiporhan wamara Moh ama han irat gwehe daham ma am haptiru hat orhor ire ma saya apriya hapti danong asoh wamar am hatiprohemur. Mamaru be irat asoh kairap hahrit kapom daptida. Hame oh ket hahrit kapom daptida. Basra. Na ihaptimur. Amaru hat orhor ihir hanip ihirnong panggeitin ohe yah dao Got orhe danong hatin ohe dao oh na timahanoh gur wamara Moh Got orhe nita na hat pati ma hapat daham am henmur.
23407	MAT 7:22	Pepe dik oh kat han trun gur Hanipyaha. Nuhur gwe win dap teidapat gwe meng pot pisayao mongsup ga aperiyao na wandeipti han erer asoh imtiperhan tarpatporhan wandeiyao hashemur napotiprimur.
23408	MAT 7:23	Damdapat er hat patim ma ihashe han gur imat napotipri orhora; Noh gurnong hanhan hat patmur. Ihan gur eimat sonmur napotipramur. Ihtin dasuh han bap ihir apripri ohoh ihan gur inin hat patenmur pongopri.
23409	MAT 7:24	Jisas oh ameng oh porpat tit meng tit gipongopri. Nohe meng amram dinahapti han bap gur mama dakuu han moh hatin hat patimur. Ama han oh Noh ap kasipnap tit hatpora daham kasip hanwi dara mong pohmar dahnap deipti ap tam pomat gonomo kasip maro matipri.
23411	MAT 7:26	Nohe meng amram orhor na dindeipti han gur nohe ma napotiproh han bap hatin hat pati bap gurmur. Ama han oh noh ap hatpora dahatipri. Dahama da timbas han ohoh tom dinin tei orhor tam gonoma bingbung ap tit hatipri.
23413	MAT 7:28	Jisas oh ama meng oh potporhan kuuhan ihir Epe. Nure sawa naporipti han ihir mimat na naporiptingwerio. Mama han moh pang buksi han napor moho daham sein bupang ritpari.
23417	MAT 8:3	Potporhan oh bes marima Dawa. Noh gonong yah nahatiprohwa. Gin yah nahahmur porpatin orhor tohohet sapat moh timbas ham yah hangopri.
23420	MAT 8:6	Hanipyaha. Nohe natamreipat han tit ina girir net rim batbet ruumsan ham ap timon patmur. Ihan go ohnong nayah matina por kandeingopri.
23421	MAT 8:7	Por kamtiporhan Noh sus yah matiprohwa pongopri.
23423	MAT 8:9	Noh duuptei han ire hrepdapat hat patem ire poriya meng oh amram ihpatmur. Norhordapathe kat dupsi han ihirnong norhe hrepnong mar papatmur. Paptema tit han ohnong Gin go sona potporhan oh arpin amram sapatmur. Tit han ohnong Gin go aprina potporhan oh arpin amram apripatmur. Norhe natamreipat han ohnonghe Go mihat tamreindinmur potporhan oh aprin norhe ma por mengru hat orhor tamreipatmur. Noh ihat pat han ohoh ihan mateidapat orhor mengwi potporhan oh sa yah hatiproh pongopri.
23426	MAT 8:12	Daprimura; Isrer gurnong oh Got oh norhe hrep naham napaptepramur ma napotip gurnong oh kwitem musum dusnong asoh nahatipramur. Nahatporhan gur yimama guragure ga yot mengsi hama ganong kup matiprimur pongopri.
23433	MAT 8:19	Potporhan sawa meng am deipat han tit Jisas ohe duupnong hama Namgipat hana. Gwe ma sasipra kat oh nohri ditaditwi sasiprimur pongopri.
23434	MAT 8:20	Potporhan oh Go nohsi sasipramur ma ri oh mohnong dahatinmur. Kotwa ihiroh deip temhe apit manhem timaptimur. Ner ihirhe ap ham patimur. Hanip Brer nohnong oh aphe timbas hanmur. Ire ap ap oh timon sapatmur pongopri.
23443	MAT 8:29	Aprisa mongsup ihir Nuhur hanip mandama be ayahan batbetsi ero rima kasip mengtei Got ohe brer go kinnahatporim apir. Nure batbet datin dik oh kopen na hat patin orhor go batbet nahatinmat apirda.
23448	MAT 8:34	Potperhan ihir amrama wamar apingopari. Aprisa Nure imah mohoh gonsi nasutiprahe daham Jisas ohnong Nure mong moh go na indiprohmur. Wannong sonmur pongopari.
23450	MAT 9:2	Kotperhan kat han ihir buh girirnet bes girirnet ritip han kaw tei sara Jisas ohe pat duupnong popingopari. Popriperhan Jisas oh ire Ohwi yah matin hatinwa ma dahaya da oh wamara er han ohnong Nohana. Gin go da yah hatinmur. Gwe er da hat saporhan Got oh ama ohe pe oh heisup nahat napapat da oh gin noh dat namdamur pongopri.
23453	MAT 9:5	Noh gin gwe er da oh eimat dat namdamur porhanoh gur mutuh danong oh wamara Moh arpin indeihe daham am hatin hatinda. Basra. Na am hatin hatin da ohoh. Noh Gin go yah ham masas tandeim sona potporhan gur wamara oh arpin indeipat hanhe daham am hatiprohemur.
23461	MAT 9:13	Amaru hat orhor noh yah hat pati han ihirnong Gur er danong kom asar mandanmur potinmat na apdormur. Nohe ma apdor oh er danong hat ma sapti han ihirnong Gur er danong kom asar mandama Got ohe danong hat sonmur potinmat apdormur. Ihtin ohoh ihan gur ma brak matpa meng oh wamara am hatinmur. Ma brak matpa meng oh mamarumur. Gur Got nohnong apop natemtin danong isip hapti hanip hinhina matin danong pomat na deiyahanoh noh na bopor deipatmur. Hanip ihirnong hinhina matin da oh isip hayahanoh noh bopor deipatmur ama potip oh por brak matpamur pongop.
23462	MAT 9:14	Gahan Jon orhe pinggit pisapat han ihir aprisa Jisas ohnong Parisi ihiro nuhuro Got ohsi mengitinmat oh kakun den na dam Got ohsi mengitin danong ham ohsi mengir patimur. Nure ma ihapti da oh gwe pinggit pisapat han ihir kianorim na ihaptio por dahandeingopa.
23466	MAT 9:18	Porpatin rotu apnong wamat papti han tit apingop. Aprisa Jisas ohe duup oh mong tei wah katin takira Nohe kor uh kopen haputmur. Ihan go susa bes oh uhe basnong matporhan it da sa apriproh pongop.
23468	MAT 9:20	Saptin kuu kwapran hat patin krismas nathei birhitipsi kuu tit Jisas ohe kom aprisa Noh ohe an pat watah boknong bes marihanoh noh yah hatiprohwa dahama ohe watah rumpenong sa marindipri.
23476	MAT 9:28	Pot uat tit apriperhan nuhur ap roperhan ihithe marangopa. Marperhan Jisas oh Gut nohnong Oh arpin yah nahatin hatin hanwa dahayada por dahandeingop. Por dahamtiporhan ihit Hanipyaha. Nuhut arpin ihat dahayamur pongopa.
23487	MAT 10:1	Gahan Jisas oh orhe namgit napisapat nathei han nuhurnong Nohe patnong aprina napor unangop. Unatporhan nuhur apriperhan oh Gin gur nohe kasip mohsi mongsup ga aperiyao tihan er sup tihan er sup oh pondeiyao ha hatingwe rim norhe kasip oh gure basnong nahahmur napongop.
23488	MAT 10:2	Naporpat Gin norhe mengtei norhe meng pot pisashen han gurmur napor ma kis nahatip han nuhuroh mama nathei han nuhurnong kis nahatipmur. Mama kis nahatip han nure win oh ohri ma nure duuptei han hatin hat pat han ohe win oh yot win atpamur. Tit win oh Saimon ohmur. Tit win oh Pita ohmur. Tit han ohe win oh Andru oh Saimon ohe nap ohmur. Yot han ihitoh Jemissi Jon ihitmur. Sebedi ohe mon yot ihitmur.
23494	MAT 10:8	Pot pisusa sik hat pati ihirnong yah deiyao mongsup ga aperiyao hapuriya ihirnong pamsayao ina mong mong moh tohohet patisi han ihirnong yah deiyao mat pisashenmur. Noh gurnong mama kasip napir moh gurdapat it nohnong yan ha napingwe rim na napirmur. Musum be napir ohoh ihan gurhe ihirnong yan timbas be yah mat pisashenmur.
23501	MAT 10:15	Noh arpin meng napotiprohmur. Got ohe nasam ma inahatipra dik oh Sodom ihiro Gomora ihiro ihir er da ham artahat saperhan Got oh heisup mar ma sutip oh isip orhora; oh garpok hat patmur. Mama garnahaya ire ma ihya ohe yan oh isipnap datiprimur napongop.
23504	MAT 10:18	Yah hat orhorwi saptin ihir Maihir Jisas ohe nita ihir ma hapat napor gurnong Juda na hat pati han ire gapman ire bes teinong nahayao mong moh ohe kak hat pati han ire bes teinong nahayao nahatiprimur. Nahatperhan gurdapat oh ihirnongo Juda na hat pati han ihirnongo norhe yah meng oh porinmur.
23506	MAT 10:20	Gurangure da oh na ihtiprohemur. Ita Got orhe Yahsup oh gure atem tei rit natporhan poriprohe ohoh ihan gur Nuhur ihirnong kian meng sa potiprohe daham da trun darheripri.
23509	MAT 10:23	Tit aptei tit saptin gurnong inahamo nimo nahayahanhe ama aptei oh mandama tandur wan apteinong sonmur. Noh arpin meng napotiprohmur. Gur Isrer aptei aptei gon na pim patin Hanip Brer noh it apripramur.
23513	MAT 10:27	Nohe kwitem ahar naporpat hatin meng moh gur da teinong mar uatinmur. Nohe ahar meng ma naporpat meng moh gon ha amratingwe rim pitap teinong mar rinmur.
23515	MAT 10:29	Ner twitwinong dahenmur. Ihir gar ner ihir ohoh ihan mohotper riyahanoh yanhe sup tan titwi ner yot mohoptimur. Na dahatin ner gar orhor Got oh dahat patin suptimur.
23518	MAT 10:32	Naporpat Jisas oh Han gur ihirnong na kasa ham Nohri Jisas orhe nita ham ihat sapatmur rit sayahanoh ama ihat saya han gurnong oh At Got aw tei mahat ma pat han ohe kinteihe noh Maihir norhe nita bap ihirmur potipramur.
23519	MAT 10:33	Ihirnong kasa ham ire kintei Jisas ohnong nuhur hanhanmur riyahanoh nohhe gurnong at Got aw tei mahat ma pat han ohe kinteihe noh Maihir norhe nita bap ihir basmur. Noh ihirnong hanhanmur potipramur ginapongop.
23520	MAT 10:34	Jisas oh ginaporpat Gur nohnong Oh manap teiwi napapten ohe da ohsiwi apris pat ma hapat dahapri. Basra. Noh nohe danong haya hansi; kakdah orhe danong hat ma pati hansi ite mahaw goshat indin ohe da ohsi tap hat apris patmur.
23539	MAT 11:11	Noh arpin meng napotiprohmur. Jon oh ihat orhe gon propet hat pat ohoh ihan hanip bap gonsi gur Jon ohe hrepdapat hatwi gonsi patimur. Ihtin bap hat pati orhor ginnong oh gur norhe ma inahat napapatnong oh ma wandeipti oh Got orhe napapindin hrepnong naham napapindin danong oh gur wamar am hata ohoh ihan ihat Got orhe napapindin hrepnong hat ma pati han gur be han hat pati orhora; Jon oh na wamat pat ohoh ihan oh gure hrepdapat hatin hat patmur.
23542	MAT 11:14	Ama kasip han oh apripramur por ma brak matpa oh Iraija ohe boknong mar brak matpamur. Gur amratiprohehan amratina. Na amratiprohehanoh guragure dawi.
23544	MAT 11:16	Gin mama pati kuuhan gure ma pati da oh Nure da oh ihat pati ma hapat ha dahatingwe rim noh mameng moh naporit guragur dahatinmur. Mamarumur. Brer ihiroh iraire tarmuriya tei oh kat brer ihirnong
23549	MAT 11:21	Ma imtip oh Korasin apteio Betsaida apteio gur Got ohe heisup nahat napapat ohe da ohsi batbet isip ma napripra oh gur hinhinsi han baprano. Gurnong na wandeipti da namgipat orhor gur Nuranure er da moh na mandama orhorsi hat patepera dahat ma pati oh ermuro. Gurnong ma namgipat da moh rih Taia apteio Saidon apteio ihirnonghe pinggisuhneng ihir Nure er hat pati da moh gin mandatpera daham saheih ham simbap ariyao sirap ariyao hapti mandatpanengmur.
23551	MAT 11:23	Kapaneam aptei ma pati bap gur Nuhur yah hat pati ohoh ihan Got oh nambura nure win nadaptuhur aw teinong nahatipramur dahaptida. Basra. Kurwam ohe ga teinong tapan nandutipramur. Noh gurnong mihtin da ma namgi moh rih Sodom aptei han ihirnong ihtin da pinggitipneng ihir wamara da tamburketperhan ihirnong na timbas matipnengmur. Patinengmur.