3	GEN 1:3	En avong enek, Ahi viteni vit, “!Maen meneai vakistal!” Ka meneai kistal.
6	GEN 1:6	Evus, Ahi viteni vit, “!Maen mesaiuai tai vatiti vas atas vakeka out valu!”
9	GEN 1:9	Evus, Ahi viteni vit, “Maen atas koa mul netan vamai en out vatas, ka atan hemai hekikistal rani.” Ka kistal suval koa viteni.
11	GEN 1:11	Evus, kei viteni vit, “Maen out netan valing tounah keil vamoul ien: koakeil iling utite, koakeil iling aneite, ka koakeil ison heite koa utite mul ien.” Ka kistal suval koa viteni.
15	GEN 1:15	Keil ititin en teilang ka isan meneai ka maim hemita en out netan.” Ka kistal suval koa viteni.
20	GEN 1:20	Evus, Ahi viteni vit, “Maen tounah keil koa amoul ihilelau en atas. Ka maen aman keil ihilelau en teilang.”
22	GEN 1:22	Kei san tokolkatien onen min keil, viteni min koakeil amul en atas vit, “Mihehas hehi houlu ka hesakin atas hehilelau en kami.” Ka min aman keil viteni vit, “Kami mun, mihehas hehi houlu ka hesakin out netan hehilelau en kami.”
24	GEN 1:24	Evus, Ahi viteni vit, “Maen tounah vasi koa moul keil ikikistal en out netan: koakeil amah, ka koakeil ten eivorohus; koakeil amarite, ka koakeil avi havipi.” Ka mai kistal suval koa viteni.
26	GEN 1:26	Evus, Ahi viteni vit, “Ekek, tovoumon meatin koa hesuval iatel. Ka tounah sav keil ten out netan hel en hen: mesau keil ka aman keil; tirendan keil koa amah ka koakeil ten eivorohus; koakeil amarite, ka koakeil avi havipi.”
30	GEN 1:30	Ka min tounah sav keil koa amoul en out netan, nasan oumunai ka ouai keil iani. Nasani min tirendan keil ten out netan ka aman keil amuka en teilang: koakeil amarite ka koakeil avi havipi.” Ka kistal suval koa viteni.
48	GEN 2:17	Ka vatiai tas koa kilea vasan ileilien ten asa koa tahos ka asa koa tisa navong kokan heite teni, vatiai enek konaantei varei heite. Veni en hati avong koa kiani, kimat.”
49	GEN 2:18	Evus, Iahova viteni vit, “Rotahostei keke meatin vato sasen. Numon meatin tamun hekatauni, ka keilu luheto out hetas.”
54	GEN 2:23	Ka navong meahos lesi vit, “Anatin eli, koanek suval inau varei. Sin amumoni ran sik; aven amumoni ran avek. Sakini, niling isen hehi ‘ahin’ veni kei kistal ran meatin.”
57	GEN 3:1	En Ah Iden, tetal tai mul ien koa ongon kas mulin tirendan vasi keil koa Iahova mumoni. Kei mai ka vis ahin enek, “?Anatin keke Ahi viteni min kamil vit milherkantei heiai ten vatiai vasi koa mul ekok?”
59	GEN 3:3	Ka vatte tas koa mul luhu keke Ahi vit koe vit melherkantei ka melhertokoltei. Veni munak melheani vuo melhetokoli, melhemat varei.”
61	GEN 3:5	Ahi viteni mukonek veni kilea keke munak milheani, ileilien onamil hemai hesuval kei, ka milheilea asa tahos ka asa tisa.”
65	GEN 3:9	Ka Iahova vise meatin vit, “?Meatin? ?Keik kave?”
66	GEN 3:10	Ka meatin vit risi mini vit, “Naraengonuk koretoun en ah, ka nametau veni inau nakaka hon. Sakini, naro suai enuk.”
67	GEN 3:11	Iahova visi vit, “?Isei viteni vit keik kovakaka hon? ?Mukave? ?Keik kokan heiai koa naviteni navit konaantei?”
68	GEN 3:12	Ka meatin viteni vit, “Ahin koa kolingi ro ral minau san heiai enek minau, nakani.”
69	GEN 3:13	Ka Iahova vis ahin vit, “?Vensa komumoni mukok?” Ka kei viteni mini vit, “Amot luvos nau, sakini nakani.”
71	GEN 3:15	Numon keik hetal min ahin, tinomil heat kamil, ka titam ka titan ahin, tine mun heat keil. Titan keil ititi lin vatum, ka keik, kiat ale tanetan.”
72	GEN 3:16	Ka Iahova viteni min ahin vit, “Numon keik kilonge hetisa navong kikur titam, eisilum hemah hemariso. Avaseini kilong mahien, ka kiles kindem kat meatin onom, ka kei hehi avat minuk.”
75	GEN 3:19	En avetin ten umen onom, kikur tounah taanien heha vis … kimat, ka kimai ris kihi atan. Veni keik, namumonuk en atan, ka kiha ris en atan.”
78	GEN 3:22	Lumusin evus, Iahova selus sasen vit, “Ekek, meatin mai suval iatel keke lumai lukileile en asa tahos ka asa tisa. Mukonek, tehermaentei keilu luhekur heiai tamun ran vatiai koa kilea vasan moulien ten lisenges. Veni munak luheani, lusakras luvamat.”
81	GEN 4:1	Evus, Adam ro ral min ahin onen ka kei meas en titiali tai. Avong muli, ka kur titiali tai ka ling isen vi ‘Ken’ koa aneite teni vi ‘nakuri’ veni viteni vit, “Ven kataunien onen Iahova, inau nakur ehon tai.”
87	GEN 4:7	Munak komumon sakien koa mal, kimai kimal en metok. Ka munak komumon sakien koa tisa, tisaen mul suai vapurunuk suval tirendan tisa tai. Tisaen enek vit vahi hetetamen en moulien onom, ka keik esuk, kuasi heha netan ka kimai kihi hetetamen eni.”
88	GEN 4:8	Evus, Ken viteni min tunali vit, “Lovamea ran out ekek, lovoual lovaha nah.” Ka navong lurokol out enek, Ken viles min tunali ka muasi mat.
89	GEN 4:9	Evus, Iahova vis Ken vit, “?Tumali Ebel kave?” Ka Ken vit risi mini vit, “Nareingeingeni. ?Inau keke nil nilei kat tuak onak?”
92	GEN 4:12	Navong kiluh vis etai tounah, atan hersan kestei ui umen onom. Ka keik, lises kilohosai ran meatin sav keil ka out tato revi ien onom hetovuol.”
105	GEN 4:25	Sua vahis muli, Adam ro ral min ahin onen ka Iv meas eris ka kur titaealu tamun koa meahos. Ling isen vi ‘Set’ koa aneite teni vi ‘sani’ veni viteni vit, “Ahi san ris titiali tamun vakur vulin Ebel, koa Ken muasi mat.”
145	GEN 6:7	Sakini, viteni min kei sasen vit, “Koakeil namumoni ekek, nu rasilin keil ran out netan. Keil ral min tirendan keil, aman keil, ka tounah keil emun koa amoul, veni nalonge tisa houlu vis houlu mok ven keil. Tahos imok vahit marmumontei keil.”
159	GEN 6:21	Evus, kikur anien tateisav vasi keil koa hehi ami ka ae, ka kiling revi en mari sip enek.”
164	GEN 7:4	Kumoni hemukonek veni avong oulu (7) sesuk keke nisan mari ous hous. Ous hous meneai ka vongien heha vio … hetokol avong hanumau elu (40). Ka en avong enek, tounah sav vasi keil koa amoul koa namumon keil, inau nu lin keil ran out netan.”
201	GEN 8:17	Aman keil ka tirendan vasi keil, kilokovein keil vasi isisital. Keil ihaha ika vasi out, ka ihasi titae keil ihi houlu mok.”
206	GEN 8:22	“Navat kati keke: Kosa hetokol keite ten out netan, avong ten tounah vasi hemai hekistal: avong taluhluhien ka avong tasuhutien, avong ten anni ka avong out hetin, avong ten ous ka avong ten annimes. Ka meneai keilu vongien luhemai lises ka lisenges.”
213	GEN 9:7	“Ka kami, ek vati keke titami keil ihi houlu, hesakin keil ihilelau en out vasi netan.”
221	GEN 9:15	Ka navong nilesi, nindem kat hatkatien takeih onak koa namumoni ral minuk ka ral min tirendan vasi keil keke nirmu lintei mun keil en mari oai tai.”
270	GEN 11:3	Evus, keil aviteni min keil eris avit, “!Almai! Tahos keke rehoumon brikis en tanvili koanik ka rehetan keil en avul tai hemai hekeih.” Sakini, keil amumon eim keil one en brikis keil enek ka akapil vituaini en koltar.
271	GEN 11:4	Amumoni evus, ka aviteni avit, “Almai, rehoumon mari meteimal tai hetal min mari eim tai koa vahina nesa vatokol teilang. Koanek hesakin ir rehertasiltei ka meatin sav keil ilonglong en iser.”
274	GEN 11:7	Mukonek, tovahita netan ka tovahilehiles selusien one vasakin keil irlong kileatei keil eris.”
302	GEN 12:3	Koakeil asan selusien ten tokolkatien minuk, inau nisan tokolkatien min keil. Ka koakeil asesenda enuk, numoni hetisa en keil. Ka keik kihi sise ten tokolkatien onak heha min vatiamal vasi keil ten out netan.”
306	GEN 12:7	Evus, Iahova mai kistal ven Ebram ka viteni mini vit, “Atan ten out enek, nisani min koakeil ika en vatiamal onom.” Evus, Ebram kur mari ahat keil ka mumon ahor ten sanien keke vanit sanien votut vahina min Iahova koa mai kistal veni.
328	GEN 13:9	Ven koanek, Ebram viteni min Lot vit, “Hetahos lehetasil ekok. Keik kihiten etai hati atan koa keik em vati, ka inau, niha en out sav.”
336	GEN 13:17	Ekek, kiha kual kiles atan vasi keil enek ven inau nisa vasi minuk.”
362	GEN 15:1	Evus, Iahova selus min Ebram en leisanien tai vit, “Ebram, konametautei. Nikur koe keik en avong keil takeih ka nisan sanien tai minuk koa hemarite mok ven longkatien onom.”
364	GEN 15:3	Anatin, kei koa vi slev enges onak koa avasi en teim onak hekur vasi tounah onak veni korsan etai titiali minau.”
365	GEN 15:4	Evus, raengon Iahova selus eris mini vit, “Slev Eliesar enek herkurtei vulum ka tounah vasi keil onom. !Vuo! Ehon kati onom, kei enges hekur vulum ka tounah vasi keil onom.”
366	GEN 15:5	Evus, Iahova mulamuni va hae ka vit, “Kilele hehina nesa en teilang ka kihuli vis hitu keil. Kosakras. Ka vatiamal keil onom isuval hitu keil enek.”
384	GEN 16:2	Ka Serae viteni min meatin onen vit, “Iahova sakinau nasakras makur ehon. Sakini, keik kikur ahin toumien onak ka kimatil hetal mini. Vahesa nakilea makur etai ehon heka eni vahi titaralu.” Navong Ebram longe, maeni.
400	GEN 17:2	Num ris hatkatien takeih hetal minuk ka numon vatiamal keil koa hekistal enuk hehi houlu mok.”
404	GEN 17:6	Nisakin vatiamal keil koa ikistal ika enuk imai ihi mari kantri keil, ka keil koa imai ihi asuv houlu keil.”
412	GEN 17:14	Munak meatin etai hervatei en vekahoi, hervitei mun meatin tai onak, veni kei rolong kattei hatkatien takeih onak.”
414	GEN 17:16	Nitokol kati ka nimaeni hekur ehon tai onamil. Numoni hemai hehi mama ten mari vangi meatin keil ka asuv houlu emun keil ikistal rani.”
415	GEN 17:17	Ebraham malingling ven Ahi, nan rokol atan, ka mul viteai min kei sasen. En rendemien onen vit, “?Meatin kilea vasan ehon min ahin tai navong sua onen rokol handred tai (100)? ?Ka Serah emun kilea veah vakur ehon navong sua onen rokol hanumau ehat ka halualim emun (90) tuai?”
416	GEN 17:18	Kei vis Ahi vit, “?Kosakras kovamaeni li keke Ismael vakur tokolkatien koa kosani minau?”
419	GEN 17:21	Ka hatkatien takeih onak, numoni hetal min natmali Aesak koa Serah hekuri en avati koanek en sua koa hemai.”
521	GEN 21:7	?Isei kilea vahitehiteni min Ebraham keke inau etin, nitounat en titiali tai? Mukos navi tovuli, ka nakur titan ulmatu onak.”
524	GEN 21:10	Navong Serah lesi, viteni min Ebraham vit, “Sila lat ahin toumien enek keilu natnali luvaha. Naman kivuol navong etai, natin ahin enek nakur etai tounah keil onom koa hehi onen natkuli Aesak.”
527	GEN 21:13	Ka en Ismael, natin ahin toumien enek, inau numon vatiamal keil koa ikistal ika eni imai ihi mari vangi meatin tai veni kei emun vi natmali.”
530	GEN 21:16	Kei va rani soutin neli ka rondan netan ka mul mis vit, “!Aue li, ek rovattei males natkuli vamat!”
532	GEN 21:18	Kimea, kiha veni, kitali lati. Veni inau, numon koakeil ikistal ika en vatiamal onen imai ihi mari vangi meatin tai.”
549	GEN 22:1	Avong muli, Ahi vit vasak vis Ebraham. Sakini vise vit, “!Ebraham!” Ka Ebraham vit, “!O-o, inau li ke!”
550	GEN 22:2	Ahi viteni mini vit, “Kikur natmali kati koa Aesak, koa envatien onom mariso mul ien, ka kihina en atan ten out Moraea. Ekonek en hou tai koa nitie minuk, ku vini ka kiniti hehi sanien tai onom minau.”
553	GEN 22:5	Navong lesi mukok, Ebraham viteni min meatin toumien keilu onen vit, “Milheto ekok hetal dongki ekek. Ehon ekek ka inau melheha en out keiva ekek, ka melheha netan min Ahi. Evus, melhemai ris ven kamil.”
555	GEN 22:7	Aesak viteni min tata onen vit, “!Tata!” Tata onen vit, “?Asa natkuli?” Aesak visi vit, “?Nalesi lokur av ka ahang, ka sipsip koa lovaniti vahi sanien kave?”
556	GEN 22:8	Ebraham vit, “Ahi, kei varei hesani.” Ka keilu lumual ruai luva.
559	GEN 22:11	Ka hatte tas, angelo onen Iahova viso ka en out nesa vit, “!Ebraham, Ebraham!” Ka kei vit risi vit, “O-o, inau li ke.”
560	GEN 22:12	“Konou vinitei ehon onom. Konoumontei tounah nasut natmali. Ekek nakilea keke keik kovouhou min Ahi ka kolong kati, veni keik kormutut kattei natmali ran Ahi, natmali kati koa tas koa vi onom.”
562	GEN 22:14	Ebraham ling isen out enek vi ‘Iahova Jaerah’ koa aneite teni vi ‘Iahova sani.’ Ka selusien koanik, meatin keil amul aviteni rokol kosa avit, “En hou onen Iahova, kei varei hesani.”
566	GEN 22:18	Vatiamal onom keil ihi sise ten tokolkatien onak heha min vangi meatin vasi keil ten out netan. Koanek hehi sanien onak minuk veni kolong kat inau.’”
681	GEN 25:22	Ka en vangen, maeh keilu lumul ien ka lumul lukumkum neim. Sakini mama onealu long mahien houlu. Ven koanek, Rebekah mundemi vit, “?Vensa nalong mahien houlu mukok?” Ka va vis min Ahi ven aneite teni.
682	GEN 25:23	Ka Iahova viteni mini vit, “Ehon elu lumul en vangom. Tai koa hekatau hemai hemarite mok helin koa helamu. Anatin, koa helamu hel en hen koa katau. Ka luhemai luhehi mari tata ten mari vangi meatin elu, ka vangi meatin elu enek koa kikur keilu, luhetisa min keilu. Ka koakeil ikistal ika en koa katau ikeih imok isulin onen koa mulamu.”
689	GEN 25:30	Sakini viteni min Siekob vit, “!Amai katnau vareis! !San tei sup tahilhili keisom maani!” Ven koanek, aling isen tamun vi ‘Edom’ koa aneite teni vi ‘vilhili.’
690	GEN 25:31	Siekob vit risi mini vit, “Nakilea nisan tei minuk munak keik kisani minau vulum ten moeite.”
691	GEN 25:32	Esao vit, “Tahosis, kuri. ?Veni munak amai heat vini inau nimat, vuluk ten moeite hekataunau hemukave?”
692	GEN 25:33	Siekob vit risi mini vit, “Helamu, kumon hatkatien keke keik kisa lat vulum ten moeite minau.” Sakini, Esao maeni ka mumoni suvali.
698	GEN 26:5	Nitokol kat kami veni tata onom Ebraham long kat nau ka musil mengkatien keil onak.”
729	GEN 27:1	Avong muli va, ka Aesak mai vi ulmatu ka meten var. Avong tai, san selusien va min natnali koa moeite vit vamai veni. Ka navong Esao mai, Aesak visi vit, “?Natkuli, keik somok eke?” Ka Esao vit risi mini vit, “Inau ke.”
732	GEN 27:4	Kikukoni hesuval koa kokilea inau ek vati. Navong nianian hevus, inau nisan tokolkatien ekor ten moeite esuk minuk, veni nareingeingeni nimat nengeis.”
735	GEN 27:7	Kei viteni mini mukok vit, ‘Kuas etai tirendan venau ka kikukoni hesuval koa kokilea inau ek vati. Navong nianian hevus, en meten Iahova, inau nisan tokolkatien onak esuk minuk, veni nareingeingeni nimat nengeis.’”
738	GEN 27:10	Keik kikuri heha veni ka navong heani hevus, hesan tokolkatien onen minuk, veni roreingeingeni hemat nengeis.”
740	GEN 27:12	Ka vahesa tata hetokol avek, heilea keke rovitei Esao ka hehotini keke namul naluvosi. Nasakini tokolkatien natovuol varei en moulien onak, nametau tata nasesendanau.”
741	GEN 27:13	Mama onen viteni mini vit, “Natkuli, munak hemukonek, sesendaen enek hersuttei keik, hesut inau nges. Kikalah, kumon asas naviteni, kiha kikur nani elu hemai venau.”
746	GEN 27:18	Evus, Siekob va ven tata onen ka vise vit, “!Tata!” Ka tata onen visi vit, “!O-o, inau li ke! ?Ka kamil en sei ke?”
747	GEN 27:19	Siekob vit, “Inau Esao, titam koa moeite. Namumoni suval koa koviteni minau. Mea, tondan revi ka kian vuseri koa nakuri minuk. Ka navong kiani hevus, kokilea kovasan tokolkatien onom minau.”
748	GEN 27:20	Aesak vit, “?Natkuli, kovotini kalah mukave?” Siekob vit, “Iahova, Ahi onom, kataunau eni.”
749	GEN 27:21	Aesak viteni mini vit, “Amai li vesesal venau hesakini nakilea matokoluk mailea keik somok Esao.”
750	GEN 27:22	Sakini va vesesal ven tata onen, ka ulmatu kamus hen ka viteni vit, “Rem suval Siekob, ka hem keilu lusuval hen Esao.”
752	GEN 27:24	ka vis risi vit, “?Keik somok Esao?” Ka Siekob vit, “He-e, inau varei.”
753	GEN 27:25	Aesak viteni mini vit, “!San vuseri ak maani! Niani hevus, nitokol katuk.” Sakini, kuri, sani mini, ka san hati uaen muni.
754	GEN 27:26	Evus tata onen viteni mini vit, “Natkuli, kimai vesesal venau ka kiav katnau.”
757	GEN 27:29	Ahi houmon meatin keil um minuk, meatin keil ten kantri sav keil ihouhou minuk. Kihi hetetamen helin tumali keil, titan mama onom keil iha netan enuk. Meatin keil koa isesenda enuk, Ahi hesesenda en keil. Ka koakeil isan selusien ten tokolkatien minuk, Ahi hetokol kat keil!”
759	GEN 27:31	Kei mun kukon more anien tai ka kuri va ven tata onen vani. Ka vit, “Tata, mea li, tondan ka kian vuseri koa nakuri minuk. Ka hevus, kisan tokolkatien onom minau.”
760	GEN 27:32	“?Keik sei?” Esao vit, “Inau Esao, moeite onom.”
761	GEN 27:33	Navong Aesak longe mukok, mutimanin ka maleilei houlu ka visi vit, “?Isei keke muas tirendan ka kuri mai venau? Nakani etin vus, keik kumai. Nasan vasi tokolkatien ekor onak mini. Ka nasakras mahilesi, tokolkatien enek heles eni lises.”
762	GEN 27:34	Navong Esao raengoni, longe tisa ka muai roha vit, “!Tata, tokol kat nau li mun!”
763	GEN 27:35	Ka Aesak vit, “Tumali mai luvos nau ka kur vasi tokolkatien onom tuai.”
764	GEN 27:36	Esao viteni vit, “Hatte elu keinek keke kei sak luvos nau. Isen koa vi Siekob mal varei. Mulamu, kei kulat vuluk ten moeite ranau, ka kosa, kei kulat tokolkatien emun ten moeite ranau. ?Korling etai li hati tokolkatien onom vahi onak?”
765	GEN 27:37	Aesak vit risi mini vit, “Kei, namumoni tuai mai vi hetetamen mulik, ka namumon vatiamal keil vasi onen imai ihi meatin toumien onen. Nasani mini anien ka uaen. ?Natkuli, asa ris nakilea masani minuk?”