23214	MAT 1:1	Gu Dabii gio gu Abraam jir diꞌ pɨx am gu bopxiꞌñ guch Xoiꞌkam. Jaꞌpni jaꞌk moo tu tuꞌiiꞌ:
23215	MAT 1:2	Gu Abraam maaꞌn tu mar kat na Isaak tɨɨgich. Miꞌ dhɨr baꞌ moo gu Isaak maaꞌn jup tu mar kat na Jakob jup tɨɨgich. Miꞌ dhɨr baꞌ moo gu Jakob jɨꞌkchip tu maamar kat, maadɨt jir diꞌ guiꞌ na Judaa tɨɨgich.
23216	MAT 1:3	Miꞌ dhɨr baꞌ gu Judaa gook jup tu maamar kat, maaꞌn Paaris tɨɨgich, gu jumai baꞌ Saara, gu ja naan baꞌ Tamaar jup tɨɨgich. Baꞌ gu Paaris maaꞌn jup tu mar kat, Isroom jup tɨɨgich. Miꞌ dhɨr baꞌ gu Isroom maaꞌn jup tu mar kat, Araam jup tɨɨgich.
23217	MAT 1:4	Miꞌ dhɨr baꞌ gu Araam maaꞌn jup tu mar kat, Aminadaa jup tɨɨgich. Miꞌ dhɨr baꞌ gu Aminadaa maaꞌn jup tu mar kat, Nasoon jup tɨɨgich. Miꞌ dhɨr baꞌ gu Nasoon maaꞌn jup tu mar kat, Salomoon jup tɨɨgich.
23218	MAT 1:5	Baꞌ gu Salomoon miꞌ dhɨr maaꞌn jup tu mar kat na Boos jup tɨɨgich, gu dɨꞌɨɨꞌn baꞌ Raab jup tɨɨgich. Baꞌ gu Boos miꞌ dhɨr maaꞌn jup tu mar kat, Obed jup tɨɨgich, gu dɨꞌɨɨꞌn baꞌ Rut jup tɨɨgich. Miꞌ dhɨr baꞌ gu Obed maaꞌn jup tu mar kat, Isayii jup tɨɨgich.
23219	MAT 1:6	Miꞌ dhɨr baꞌ gu Isayii maaꞌn jup tu mar kat na puiꞌ tɨɨgich Dabii. Miꞌ dhɨr baꞌ gu Dabii maaꞌn jup tu mar kat na Salomoon jup tɨɨgich, guiꞌ nar dɨꞌɨɨꞌn guiꞌ na bɨɨpɨꞌ dɨr jir bɨngaꞌn kat gu Uriiyas.
23220	MAT 1:7	Baꞌ gu Salomoon miꞌ dhɨr maaꞌn jup tu mar kat, Roboam jup tɨɨgich. Miꞌ dhɨr baꞌ gu Roboam maaꞌn jup tu mar kat, Abiiyas jup tɨɨgich. Miꞌ dhɨr baꞌ gu Abiiyas maaꞌn jup tu mar kat, Asaa jup tɨɨgich.
23221	MAT 1:8	Miꞌ dhɨr baꞌ gu Asaa maaꞌn jup tu mar kat, Josapaat jup tɨɨgich. Miꞌ dhɨr baꞌ gu Josapaat maaꞌn jup tu mar kat, Joraam jup tɨɨgich. Miꞌ dhɨr baꞌ gu Joraam maaꞌn jup tu mar kat, Usiiyas jup tɨɨgich.
23222	MAT 1:9	Miꞌ dhɨr baꞌ gu Usiiyas maaꞌn jup tu mar kat, Jotaam jup tɨɨgich. Miꞌ dhɨr baꞌ gu Jotaam maaꞌn jup tu mar kat, Akaas jup tɨɨgich. Miꞌ dhɨr baꞌ gu Akaas maaꞌn jup tu mar kat, Esekiiyas jup tɨɨgich.
23223	MAT 1:10	Miꞌ dhɨr baꞌ gu Esekiiyas maaꞌn jup tu mar kat na Manasees jup tɨɨgich. Miꞌ dhɨr baꞌ gu Manasees maaꞌn jup tu mar kat, Amoon jup tɨɨgich. Miꞌ dhɨr baꞌ gu Amoon maaꞌn jup tu mar kat, Josiiyas jup tɨɨgich.
23224	MAT 1:11	Miꞌ dhɨr baꞌ gu Josiiyas jɨꞌkchip tu maamar kat janoꞌ na mɨt paiꞌ dhuuk ja uꞌuuk gu Israel kam jaꞌtkam mu jaꞌk Babiloonia. Baꞌ maadɨt Jekoniiyas tɨɨgich guiꞌ jɨꞌ nam jir maamraꞌn kat.
23225	MAT 1:12	Baꞌ mɨkkat gatuuk nam paiꞌ dhuuk mu jaꞌk xi oiꞌñkat Babiloonia, maaꞌn jup tu mar kat gu Jekoniiyas na Salatial jup tɨɨgich. Miꞌ dhɨr baꞌ gu Salatial maaꞌn jup tu mar kat, Robabeel jup tɨɨgich.
23226	MAT 1:13	Miꞌ dhɨr baꞌ gu Robabeel maaꞌn jup tu mar kat, Abiot jup tɨɨgich. Miꞌ dhɨr baꞌ gu Abiot maaꞌn jup tu mar kat, Eliakiim jup tɨɨgich. Miꞌ dhɨr baꞌ gu Eliakiim maaꞌn jup tu mar kat, Asoor jup tɨɨgich.
23227	MAT 1:14	Miꞌ dhɨr baꞌ gu Asoor maaꞌn jup tu mar kat, Sadook jup tɨɨgich. Miꞌ dhɨr baꞌ gu Sadook maaꞌn jup tu mar kat, Akiim jup tɨɨgich. Miꞌ dhɨr baꞌ gu Akiim maaꞌn jup tu mar kat, Eliob jup tɨɨgich.
23228	MAT 1:15	Miꞌ dhɨr baꞌ gu Eliob maaꞌn jup tu mar kat, Eliasaar jup tɨɨgich. Miꞌ dhɨr baꞌ gu Eliasaar maaꞌn jup tu mar kat, Mataan jup tɨɨgich. Miꞌ dhɨr baꞌ gu Mataan maaꞌn jup tu mar kat, Jakob jup tɨɨgich.
23229	MAT 1:16	Miꞌ dhɨr baꞌ gu Jakob maaꞌn jup tu mar kat na Josee jup tɨɨgich, guiꞌ nar bɨngaꞌn kat gu Mariiya guiꞌ nar dɨꞌɨɨꞌn guch Xoiꞌkam guiꞌ na Jesuus tɨɨꞌ, guiꞌ na saak Dios puꞌñi bha jootsaꞌ jix dhaam dɨr.
23230	MAT 1:17	Baꞌ janoꞌ dɨr nat paiꞌ dhuuk maaxir gu Abraam, mambhɨɨx daman maakob ai mɨt gu jaꞌtkam nat baꞌp ba maaxir gu Dabii. Gio baꞌ miꞌ dhɨr gatuuk jaꞌkbuiꞌ aixkam jup ai mɨt na mɨt maaxir janoꞌ dɨr nat paiꞌ dhuuk gu Dabii maaxir miꞌ juugɨt na mɨt paiꞌ dhuuk ja uꞌuuk gu Israel kam jaꞌtkam mu jaꞌk Babiloonia. Gio baꞌ miꞌ dhɨr janoꞌ nam paiꞌ dhuuk mu jaꞌk xi oiꞌñkat Babiloonia gu Israel kam jaꞌtkam, jaꞌkbuiꞌp ai mɨt mambhɨɨx daman maakob na mɨt maaxir gu jaꞌtkam miꞌ juugɨt nat paiꞌ dhuuk maaxir guch Xoiꞌkam guiꞌ na saak Dios puꞌñi bha jootsaꞌ jix dhaam dɨr.
23231	MAT 1:18	Jaꞌpni jaꞌk jum duu guch Xoiꞌkam janoꞌ nat paiꞌ dhuuk maaxir. Gu dɨꞌɨɨꞌn Mariiya tu taandaꞌ am na sap bɨɨmaꞌn tu kiichaꞌ maaꞌn gu chioꞌñ na puiꞌ tɨɨꞌ Josee, guꞌ ji na guꞌ bɨɨpɨꞌ dɨr nat chakui bɨɨmaꞌn tu kiicha, dɨɨlh pɨx bar alhiꞌch kɨɨkam kaꞌ gu Mariiya, sia kum tɨi chakuir jum bɨpnagɨm, na guꞌ gux Dhuuduꞌ kam jix Uañ Iiꞌmdaꞌ nat puiꞌ jaꞌk bhaan jum tajaa na baꞌ dɨɨlh pɨx ba tɨgiaꞌ maaꞌn gu alhii.
23232	MAT 1:19	Guꞌ baꞌ na guꞌ gu Josee jup jir jix bhaiꞌkam kaꞌ, guiꞌ na bɨɨmaꞌn jix chu kiicham kaꞌ gu Mariiya, puiꞌ bam aagɨt nam jix xɨꞌlhim xim jɨꞌdɨlhkadai gɨt cham tuꞌ bhaan ji chu aꞌgat, na guꞌx joiꞌgɨꞌn gu Mariiya, baꞌ cham aaꞌ na ba ji iattulhdhaꞌ ja bui gu gɇꞌgɇrkam jum aaꞌndam, nam baꞌ cham tu chiñiaꞌ nam muꞌaaꞌ.
23233	MAT 1:20	Baꞌ puiꞌ bam aagɨk na moo maiꞌ ba buaꞌ gɨt gu Mariiya, guꞌ ji nat guꞌ ba tɨɨ maaꞌn gu nobiiꞌñ guch Gɨꞌkoraꞌ tɨɨtkiꞌ bhaan na sap jup tɨtda: ―Aapiꞌ Josee nap jir boxiiꞌñ gu Dabii, chaꞌp jax jum aagɨt bɨɨmaꞌn xi chu kiichai gu Mariiya, na guꞌ gu alhii guiꞌ na tɨgiaꞌ, dhiꞌ gux Dhuuduꞌ kam jix Uañ Iiꞌmdaꞌ pɨx nat puiꞌ jaꞌk tu duu nat bhaan jum tajaa.
23234	MAT 1:21	Baꞌ guiꞌ jɨꞌ gu alhii na tɨgiaꞌ gu Mariiya, Jesuus jap tɨɨtgɨꞌ, na guꞌ dhiꞌ ya jaꞌp uañchudaꞌ gu ja uaꞌtulhdharaꞌ gu Israel kam jaꞌtkam. Puiꞌ ku baꞌr am na puꞌñi jaꞌk tɨɨꞌnkaꞌ.
23236	MAT 1:23	Dɨɨlh pɨx ba tɨgiaꞌ gu alhii maaꞌn gu ubii tɨyaa. Emanoil jam baꞌ tɨɨtgɨꞌ. Baꞌ dhiꞌ jaꞌp kaiꞌñkam jup jum kaiꞌch: Jich aꞌm tɨ nɨiꞌñ gu Dios.
23237	MAT 1:24	Baꞌ nat paiꞌ dhuuk ba ñiñia gu Josee, cham jax ji chɨꞌɨɨk bhaiꞌp ji bhɨi gu Mariiya na jax ba tɨtda gu nobiiꞌñ gu Dios.
23238	MAT 1:25	Ku guꞌ chakui maap jix bhaiꞌ tu oiꞌñcha mɨt ji jaꞌp na moo na jax noꞌm jir jum bɨpnagɨm. Dai gatuuk nat paiꞌ dhuuk ba tɨɨ gu alhii gu Mariiya na mɨt baꞌ maap ba tu oiꞌñcha. Baꞌ gu Josee, Jesuus tɨɨt gu alhii nat jax chia na tɨɨtgɨꞌ gu nobiiꞌñ gu Dios.
23239	MAT 2:1	Baꞌ gu Jesuus bhammɨ maaxir na paiꞌ puiꞌ tɨ tɨɨꞌ Beleen guiꞌ na bhaan bipioꞌ gu Judea dɨbɨɨr, baꞌ janoꞌ maaxir na paiꞌ dhuuk jir gɇꞌkam kaꞌ gu Eroodis na jɨꞌx jir Judea. Baꞌ janoꞌ jɨꞌkchi bhammɨp ba ji bubua mɨt Jerusaleen guiꞌ nam mu jaꞌk oiꞌñkaꞌ xiaꞌlhbui, guiꞌ nam jix maatɨt ja nɨiꞌñdhaꞌ gu chiichiaꞌ, na mɨt muiꞌ ba tɨɨgim guch Xoiꞌkam nat ba maaxir.
23240	MAT 2:2	Baꞌ bhaiꞌ ba tɨ tɨkka am na sap pa jaꞌk jax chuꞌiiꞌ, jup kaiꞌch am: ―¿Pa jaꞌk jax chuꞌiiꞌ guch Xoiꞌkam guiꞌ nat ba maaxir, guiꞌ na saak jir ja gɇꞌkam tuk kaꞌ gu yaꞌ kam dhi Israel? Maaꞌn tɨɨ chich gu gɇꞌ chiꞌɨɨꞌ na puiꞌr jum duukam nat yaꞌ paiꞌ ba maaxir guch Xoiꞌkam. Puiꞌ ku chich baꞌ aach moo bhaiꞌ xi jii na chich bhaiꞌ bha tu daañim buiñor.
23241	MAT 2:3	Baꞌ gampaiꞌ ji dhuu gu Eroodis nat puiꞌ jɨꞌ ja kai, panaas kut giilhim jix buam jum ɨlh, gio gu jaiꞌ nam jɨꞌk bhaiꞌ oiꞌdhaꞌ Jerusaleen ba puiꞌ ɨp.
23242	MAT 2:4	Baꞌ ba ja bai gu Eroodis gu ja gɇꞌgɇrkam tuk guiꞌ nam bhaiꞌ gɇꞌ chiop ja palhbuiꞌñdhaꞌ gu Israel kam jaꞌtkam nam tu daandaꞌ buiñor gu Dios, gio baꞌ guiꞌ nam sap jix mat kaꞌ gu ñioꞌkiꞌñ gu Dios, baꞌ bhaiꞌ ba ja tɨkka na paiꞌ baꞌ puiꞌ maaxilhiaꞌ guch Xoiꞌkam guiꞌ na saak Dios bha jootsaꞌ jix dhaam dɨr.
23244	MAT 2:6	Baꞌ aapiꞌm na pim jɨꞌk miꞌ oiꞌdhaꞌ na paiꞌ puiꞌ tɨ tɨɨꞌ Beleen, guiꞌ na bhaan bipioꞌ gu Judea dɨbɨɨr, cham tuꞌ gampaiꞌ bipioꞌ pim, sia ku guꞌ jaiꞌ kap tɨi gɇꞌgɇr jir kikcham yaꞌ dhi Judea, na guꞌ miꞌ aapiꞌm jam bui maaꞌn maaxilhiaꞌ guiꞌ nar gɇꞌkam kaꞌ ja bui guñ jaꞌtkam tuk Israel kam.
23245	MAT 2:7	Baꞌ ba ja bai ɨp gu Eroodis guiꞌ nam jix maatɨt nɨiꞌñdhaꞌ gu chiichiaꞌ, baꞌ mu jaꞌp dɨlhkob jix xɨꞌlhim ba ja tɨkka nam paiꞌ baꞌ duuk mu paiꞌ pu nɨiꞌñ gu gɇꞌ chiꞌɨɨꞌ na bhaan jix maatɨꞌ nat ba maaxir guch Xoiꞌkam.
23246	MAT 2:8	Baꞌ daipuꞌ nat xi ja tɨkkak muiꞌ xi ja joot mu jaꞌk Beleen, jup ja tɨtda: ―Ea na pim mu jimiaꞌ mu Beleen. Mi jaꞌp japim naiꞌ tu gaaꞌngɨmɨi tɨgiaꞌ gu alhii guiꞌ na puiꞌr jich Xoiꞌkam. Baꞌ noꞌ pimɨt miꞌ paiꞌ tɨɨ, yaꞌ pim xiñ aaꞌñdhidhat na pim paiꞌ dhuuk gio jaꞌk jup ba suulhgiaꞌ na paiꞌ sɨlh jup tuiꞌkaꞌ, nañ baꞌ aañ muiꞌp jimiaꞌ nañ tu daañmɨraꞌ buiñor.
23247	MAT 2:9	Baꞌ guiꞌ daipuꞌ nat jax puꞌñi xi ja tɨɨꞌn gu Eroodis, pu jii mɨt. Baꞌ gamaiꞌ gu bɨɨx boi nam mu jiim, bɨɨpɨꞌ gamaiꞌ ba jim gu gɇꞌ chiꞌɨɨꞌ bha jaꞌp jix dhaam, guiꞌ na mɨt bɨɨpɨꞌ dɨr mummɨ jaꞌk tɨɨ ja kiꞌaam na bha jaꞌp daa jix dhaam, baꞌ muiꞌ pu jim bha jaꞌp jix dhaam gammɨjɨ nam jax jiim gu bɨɨx boi. Baꞌ na mɨt paiꞌ dhuuk ba ai mummɨ Beleen, bhaiꞌ pɨx jaꞌp ji dhaibu gu gɇꞌ chiꞌɨɨꞌ sɨlh miꞌ na paiꞌp tuꞌiiꞌ gu alhii guiꞌ nar jich Xoiꞌkam.
23248	MAT 2:10	Baꞌ joidham jix bhaiꞌm ɨlh jamɨt guiꞌ nam jix maatɨt ja nɨiꞌñdhaꞌ gu chiichiaꞌ na mɨt ba tɨɨ gu gɇꞌ chiꞌɨɨꞌ nat bhaiꞌ pɨx jaꞌp ji dhaibu, nam guꞌx maat na miꞌ bap tuꞌiiꞌ guch Xoiꞌkam.
23249	MAT 2:11	Baꞌ na mɨt muiꞌ ji baap mɨjɨ baꞌk chɨr, miꞌ pɨx ji chɨɨ mɨt gu alhii na mi jaꞌp daa, gio gu dɨꞌɨɨꞌn. Baꞌ nam jax jiim, ja oꞌlhia kɨꞌn guꞌkɨk bhaiꞌ ji chu daanɨ mɨt buiñor gu alhii guiꞌ nar jich Xoiꞌkam, gio na mɨt xi chu kukpioꞌkak mi jaꞌp xi chu dalhxi guiꞌ na miꞌ tu jim guiꞌ nax dhaꞌram tu namɨɨk, puiꞌ na jax gu diꞌoor, gio guiꞌ na joidham uub, gio baꞌ guiꞌ na kɨꞌn tum kubhiondaꞌ.
23250	MAT 2:12	Gatuuk baꞌ dai na mɨt mi jaꞌp ba tɨbia. Baꞌ ba tɨ tɨɨtkɨ mɨt na sap cham bhaaiꞌ nam mu jaꞌk ka jiimdaꞌ buiñor gu Eroodis, na guꞌx bhaam buiñor gu alhii guiꞌ nar jich Xoiꞌkam. Baꞌ maakam jaꞌk bhɨi mɨt na mɨt paiꞌ dhuuk ba jii mu jaꞌk ja kiꞌaam.
23251	MAT 2:13	Baꞌ gatuuk na mɨt paiꞌ dhuuk ba jii guiꞌ nam jix maatɨt ja nɨiꞌñdhaꞌ gu chiichiaꞌ, ba tɨɨ gu Josee maaꞌn gu nobiiꞌñ gu Dios tɨɨtkiꞌ bhaan, baꞌp tɨtda: ―Xi bamiiꞌ Josee, jix kɨɨꞌ bim duuñ kup maiꞌ daiꞌññiaꞌ mu jaꞌk Ejipto, xi bhɨɨji ap dhi alhii, gio gu dɨꞌɨɨꞌn jap bɨɨx jup xi baidhai. Mummɨp baꞌ moo pɨx daakaꞌ, aañ dɨɨlh bam aagiꞌñdhaꞌ na paiꞌ dhuuk jix bhaaiꞌn kaꞌ nap gio bhaiꞌp ba jimiaꞌ, na guꞌ yaꞌ gu Eroodis bha jimdaꞌ jia na bha gaaꞌmɨraꞌ dhi alhii na baꞌ yaꞌ muꞌaaꞌ.
23252	MAT 2:14	Baꞌ nat paiꞌ dhuuk ba ñiñia gu Josee, pu tukaaꞌñ chaꞌm miꞌ bhɨi nat maiꞌ ba mɨɨ mu jaꞌk Ejipto, xi bhɨɨk gu alhii gio gu dɨꞌɨɨꞌn bɨɨx jup xi baidhak.
23253	MAT 2:15	Mu jaꞌk baꞌ pu daakaꞌ na jɨꞌx duakat gu Eroodis. Baꞌ dhiꞌ puꞌñi jaꞌk jum kuugalh gu puiꞌ nat jax jaꞌk tɨꞌɨɨk gu Gɇꞌkam jich Gɨꞌkoraꞌ bhaan jim uaꞌrgidhak maadɨt guiꞌ nam bɨjɨk bhaankam tu aꞌgimɨk, nat puiꞌ jaꞌk tu uaꞌnak na jaꞌpnim kaiꞌch: “Mummɨ dɨr Ejipto ñich bha jaꞌk bai guñ mar.”
23254	MAT 2:16	Baꞌ nat paiꞌ dhuuk puiꞌ ba tɨ kai gu Eroodis na mɨt maakam jaꞌk pɨx ba bhɨi guiꞌ nam jix maatɨt ja nɨiꞌñdhaꞌ gu chiichiaꞌ, giilhim bhaiꞌ ji bhaam, na guꞌ tɨi ka ja nɨɨrat nam saak gio bhaiꞌ bhɨɨyaꞌ gɨt nam bhaiꞌ xi aaꞌñdhidhaꞌ gɨt na paiꞌp tuꞌiiꞌ guch Xoiꞌkam. Baꞌ mu ja joot gu sandaaruiꞌx chugiꞌñ mu Beleen nam sap ja koodaꞌ bɨɨx gu aꞌaalh nam jɨꞌk miꞌ jaiꞌch kaꞌ, sia guiꞌ nam mu jaꞌp oiꞌñkaꞌ juꞌñdharan. Baꞌ dai guiꞌ nam jɨꞌk jix ioꞌm jir aꞌlhich tu chia nam ja koodaꞌ, gio guiꞌ nam jɨꞌk gook oidhaꞌ ba biaꞌ, na jɨꞌx ɨlhiiꞌñ na bar gɇꞌ guch Xoiꞌkam janoꞌ dɨr nam paiꞌ dhuuk tu aagiꞌñ na mɨt tɨɨ gu gɇꞌ chiꞌɨɨꞌ guiꞌ nam jix maatɨt ja nɨiꞌñdhaꞌ gu chiichiaꞌ.
23256	MAT 2:18	Mu na paiꞌ puiꞌ tɨ tɨɨꞌ Ramaa pɨx giilhim tɨm tɨi nat bhaiꞌ ji chum susuanɨ, panaas kum giilhim jix buam jum aagɨt gɇꞌgɇr kɨꞌn suan, guꞌ bak gu Rakeel na suak na mɨt ba ja koi gu maamraꞌn. Baꞌ cham jɨꞌx tɨ jɨjɨkgɨr na guꞌ giilhim jix buam jum aaꞌ, nam guꞌ ba koꞌiix gu maamraꞌn na xi ja nɨiꞌñ.
23258	MAT 2:20	―Xi bamiiꞌ Josee. Xib baꞌ bax bhaaiꞌ nap giop ba jimiaꞌ bhammɨ jaꞌk Israel, xi bhɨɨji ap dhi alhii gio dhi dɨꞌɨɨꞌn jap bɨɨx jup xi baidhai, na mɨt guꞌ ba koi guiꞌ nam jaroiꞌ kax bhaamkidhat dhi alhii.
23259	MAT 2:21	Baꞌ gu Josee nat jax jup bam pu jii ɨp bhammɨ jaꞌk Israel, xi bhɨɨk gu alhii, gio gu dɨꞌɨɨꞌn bɨɨx jup xi baidhak.
23260	MAT 2:22	Guꞌ ji na guꞌ nat chakui bhammɨ ai, puiꞌ ba tɨ kai na gu Arkelao bhaiꞌp bar gɇꞌkam na jɨꞌx jir Judea, guiꞌ nar maraaꞌn gu Eroodis kat. Baꞌ puiꞌ cham muiꞌ ka ai gu Josee, na guꞌx ɨɨbhiꞌñ. Baꞌ gio buiñor jup bam maax gu nobiiꞌñ gu Dios tɨɨtkiꞌ bhaan, baꞌ puiꞌ tɨtda na mu jaꞌk bhɨɨyaꞌ Galilea. Baꞌ gu Josee pu sɨlh bhɨi ɨp mu jaꞌk na paiꞌ tu aagiꞌñ.
23261	MAT 2:23	Baꞌ nat jax mummɨ ai, miꞌ dhɨr mu jaꞌk jup bhɨi na puiꞌ tɨ tɨɨꞌ Nasareet. Baꞌ dhiꞌ puꞌñi jaꞌk jum kuugalh gu puiꞌ na mɨt jax jaꞌk tu uaꞌnak guiꞌ nam bɨjɨk bhaankam tu aꞌgimɨk gu Dios, na saak guch Xoiꞌkam puiꞌ jaꞌk jix mat kaꞌ am gu jaꞌtkam: Jesuus Nasareet kam.
23263	MAT 3:2	jup ja tɨtdadaꞌ: ―Yaꞌ mam ai na paiꞌ dhuuk maaxik jum maaxdhaꞌ gu Dios aapiꞌm jam bui. Miꞌ pim sap puiꞌ ba jimiaꞌ na jax jix aaꞌ.
23264	MAT 3:3	Baꞌ gu Juan jaꞌtkam bopkondam jir diꞌ na aagɨt jup kaiꞌch gu Isaiiyas guiꞌ na bɨjɨk bhaankamuꞌn tu aꞌgimɨk gu Dios nat puiꞌ jaꞌk tu uaꞌnak na jaꞌpnim kaiꞌch: Maaꞌn gu maaꞌnkam mu jaꞌp gampɨx jix chu gak kɨr pɨx oirɨt ba tu ja aꞌgiꞌñdhaꞌ gu jaꞌtkam, jup ja tɨtdadaꞌ: “Gor jix kɨɨꞌ bim duuñ, jaꞌp pɨk bhaiꞌ bar jimdam gu Gɇꞌkam. Miꞌ pim sap puiꞌ ba jimiaꞌ na jax jix aaꞌ.”
23265	MAT 3:4	Baꞌ gu Juan gu tɨiꞌdhar gaꞌn, kameeyo bapoo jir jup duiñxim kaꞌ, gio gu bhiisparuꞌn jir joꞌ kaꞌ ɨp. Gio baꞌ gu koiꞌdhar gaꞌn, gu sossoi ɨp na ja daꞌngɨt ja kuaꞌdaꞌ gio baꞌ gu mɨɨbat guiꞌ na mu jaꞌp gampɨx jix jaiꞌch kaꞌ.
23266	MAT 3:5	Baꞌ muiꞌ jaꞌtkam miꞌ aajidhaꞌ am miꞌ na paiꞌ oirɨdaꞌ gu Juan nam jix kaim kaꞌ na jax tu aꞌgadaꞌ, puiꞌ na jax gu Jerusaleen kam, gio baꞌ guiꞌ nam mu jaꞌp jup oiꞌñkaꞌ bɨɨx kap guiꞌ na dhiꞌ pɨx bhaan jup bipioꞌ gu Judea dɨbɨɨr, gio baꞌ guiꞌ nam jɨꞌk mi jaꞌp amuub jup oiꞌdhaꞌ na paiꞌr Jordaan Ak.
23267	MAT 3:6	Baꞌ puiꞌ ba tɨtdadaꞌ am gu Juan nam sap cham ka aaꞌ nam puiꞌ jaꞌk tu jimdaꞌ na jax bɨɨpɨꞌ dɨr nam bɨɨx aixim jum uaꞌtulhiꞌñdhaꞌ, baꞌ gu Juan dai na xi ja bopkondaꞌ suudaiꞌ kɨꞌn miꞌ na paiꞌr Jordaan Ak.
23268	MAT 3:7	Baꞌ janoꞌ muiꞌ miꞌp ba ai mɨt guiꞌ nam pariseos jum tɨɨtɨꞌndaꞌ gio baꞌ guiꞌ nam saduseos jup jum tɨɨtɨꞌndaꞌ nam puiꞌp xim bopkonamtuꞌ. Baꞌp ja tɨtda gu Juan: ―¿Jaroo jam aagiꞌñ na cham xiim jam tulhiiñchudaꞌ gu Dios ku pim baꞌ gaꞌm ba jiim na pim jix aaꞌ nañ jam bopkonaꞌ na baꞌ cham jam tulhiiñchudaꞌ? Giilhim guꞌ na pim jix bhaaꞌmnaꞌ jaꞌp na gu kookoꞌ.
23269	MAT 3:8	Guꞌ dhiꞌ jam aꞌm jum aaꞌ ji na pim yaꞌ dɨr jaꞌp jaꞌk jix kɨɨꞌp jum duukam bap tu buadaꞌ na baꞌ bhaan jix maatɨꞌ kaꞌ na pim sɨlhkam miꞌ puiꞌ ba jiim na jax jix aaꞌ gu Dios.
23270	MAT 3:9	Chaꞌpim jax jum aaꞌndaꞌ: “Aach matgɨm jich aꞌm tɨ nɨiꞌñ ji gu Dios, nach guꞌr bopxiꞌñ gu Abraam.” Jax dhui na guꞌ gu Dios sia guꞌñi joodai jix bhaaiꞌ na puiꞌ ja duñiaꞌ nam jir bopxiꞌñ kaꞌ gu Abraam, aapiꞌm baꞌ jaꞌp xi jam dui noꞌ pimɨt cham miꞌ puiꞌ jii na jax jix aaꞌ.
23271	MAT 3:10	Baꞌ amuub ba kaat gu baiñdhas guiꞌ na kɨꞌn jum ɨꞌkiaꞌ gu takaaꞌn gu ɨꞌɨɨx, na guꞌ gu jax chuꞌm ɨꞌɨɨx noꞌ cham kɨɨꞌ tu iꞌbhaiꞌñchar, jix bhaaiꞌ nam ɨɨkɨi mu baas buaji bhaiꞌ xi mɨidhaꞌ.
23272	MAT 3:11	Baꞌ aañ nañ xib yaꞌ tu bopkon, jir suudaiꞌ kɨꞌn pɨx, jaꞌppɨx na bhaan jix maatɨꞌ kaꞌ nam jɨꞌk miꞌ puiꞌ jimiim na jax jix aaꞌ gu Dios. Baꞌ guiꞌ na gatuuk bha jim, guiꞌ dho gi guꞌ gux Dhuuduꞌ kam jix Uañ Iiꞌmdaꞌ ji na kɨꞌn jam bopkonaꞌ, gio baꞌ na bɨɨx mɨidhaꞌ gu jam uaꞌtulhdharaꞌ jaꞌp tuꞌm na gu tai kɨꞌn. Baꞌ guiꞌx ioꞌm bɨxchuꞌx aichuꞌn na pu tu duñiaꞌ, cham tuꞌ puiꞌ na jax aañ. Pu cham jɨꞌx jir jupaabkamuꞌn iñ dho moo nam iam tuꞌ suuskaꞌn muiꞌ ba uiꞌdhikaꞌ gɨt.
23273	MAT 3:12	Baꞌ na paiꞌ dhuuk bha jimdaꞌ, pu uaꞌkaꞌ guiꞌ na kɨꞌn jɨlhbidhaꞌ gu tiriik, baꞌ xi kɨɨꞌmpigai dai ba ulhñaꞌ guiꞌ na jɨꞌk jix kɨɨꞌ, gu tanaaraꞌ baꞌ mu jaꞌk xi ñuꞌaaꞌ na paiꞌ cham jɨꞌxkat tuutkɨ gu tai.
23274	MAT 3:13	Baꞌ janoꞌ jɨꞌ na mummɨ gampɨx jix chu gak kɨr oirɨt ja bopkon gu Juan gu jaꞌtkam, miꞌ dhɨr muiꞌ ma jii Galilea gu Jesuus nat ba chiañim ɨp na puiꞌp bakuanaꞌ.
23275	MAT 3:14	Baꞌ nat paiꞌ dhuuk mummɨ ba ai, jaꞌkbuiꞌ kat bhaiꞌ bax aaꞌ gu Juan na bakuanaꞌ gu Jesuus, jup tɨtda: ―Guꞌ aañ puiꞌ ɨlhiiꞌñ ji nap aap jaꞌkbuiꞌ kat jiñ bakuanaꞌ, guꞌ aap jaꞌkbuiꞌ kat bhaiꞌ bañ chiañim nañ jum bakuanaꞌ.
23276	MAT 3:15	Baꞌp tɨtda gu Jesuus: ―Dho guꞌr am kat dho jia, guꞌ pɨx ji na guꞌch aꞌm jum aaꞌ nach puiꞌ jaꞌk tu kuugalhdhaꞌ na jax tu uaꞌñix gu ñioꞌkiꞌñ gu Dios. Baꞌ puiꞌ cham jax ka tɨi gu Juan, dai nat ba bakua gu Jesuus.
23277	MAT 3:16	Baꞌ nat jax miꞌ dhɨr gamaiꞌ ji buus gu Jesuus suudaiꞌ chɨr, panaas kut joidham bhaiꞌ jim kukpioꞌ gux dhaam, baꞌ ba tɨɨ gu Jesuus nat maaxik bhammɨ dɨr bhaiꞌ ji chɨm gux Dhuuduꞌ kam jix Uañ Iiꞌmdaꞌ jaꞌp tuꞌm na gu giodaꞌ.
23278	MAT 3:17	Miꞌ dhɨr baꞌ bhaiꞌ ji chum ñio bhammɨ dɨr jix dhaam, jup tum kaiꞌch: ―Dhiꞌñir diꞌ guñ mar nañ jix ioꞌm jix dhaꞌ, na ñich guꞌ pu bɨjɨk dɨr bhaan tɨ tɨɨ.
23279	MAT 4:1	Baꞌ gux Dhuuduꞌ kam jix Uañ Iiꞌmdaꞌ puiꞌ jaꞌk xi jurtuda gu Jesuus na mu jimiaꞌ mummɨ gampɨx jix chu gak kɨr na sap baꞌ miꞌ maiꞌchiaꞌ gɨt gu jaꞌook.
23280	MAT 4:2	Baꞌ mam saabu gook ooꞌm tanoolh gio gook ooꞌm tukaaꞌ nat pu cham tuꞌ juu, baꞌ gatuuk jix ioꞌm tɨi bax bhioꞌ.
23281	MAT 4:3	Baꞌ miꞌ ba ai gu jaꞌook na tɨi bax maiꞌchim, jup tɨtda: ―Eap puiꞌ xi ja tɨɨꞌn dhi joodai na paan jup jum duñiaꞌ noꞌp baabuiꞌ sɨlhkam Dios jir Maraaꞌn.
23282	MAT 4:4	Baꞌp tɨtda gu Jesuus: ―Jax dhui nap jum kaiꞌch gu ñioꞌkiꞌñ gu Dios miꞌ na paiꞌ tu uaꞌñix na cham tuꞌ dai tuꞌ koiꞌ kɨꞌn dua gu maaꞌnkam, guꞌ jaꞌpji sia ji noꞌ miꞌ puiꞌ jim na jɨꞌk jax jum kaiꞌch gu ñioꞌkiꞌñ gu Dios.
23283	MAT 4:5	Baꞌ gatuuk ma baidhak gu jaꞌook gu Jesuus bhammɨ Jerusaleen na tɨi ɨlhdhat na ma maiꞌchiaꞌ gɨt. Baꞌ bhɨjɨmmɨ daam dɨr kuugaran gu gɇꞌ chiop xi chɨsaaꞌñdhak bhaiꞌ na paiꞌx ioꞌm jix chu xidhuu kaꞌ,
23284	MAT 4:6	jup tɨtda baꞌ bhaiꞌ xi kɨɨsak kookbaꞌn: ―Eap yaꞌ dɨr muiꞌ xi chuudaiñ noꞌ pich moo baabuiꞌ cham muu, na baꞌx maatɨꞌ kaꞌ noꞌp baabuiꞌ moo sɨlhkam Dios jir Maraaꞌn. Na guꞌp jum kaiꞌch miꞌ uꞌuan taꞌm na tu uaꞌñix na jaꞌpni muiꞌ jim kɨksa: Gu Dios bham joochxidhaꞌ gu noonbiꞌñ nam baꞌm nuukdaidhaꞌ, gio nam jum noonob am tu daagɨi tɇꞌkob jum uaꞌkaꞌ nap baꞌ cham jodai chaꞌm jutbui ɨlhiaꞌ.
23285	MAT 4:7	Baꞌp tɨtda ɨp gio gu Jesuus: ―Jax dhui na moo jaꞌpnip jum kaiꞌch ɨp miꞌ na paiꞌ tu uaꞌñix gu ñioꞌkiꞌñ gu Dios na jaꞌpni muiꞌ jim kɨksa: “Cham jir am nap mamaiꞌchɨkdaꞌ gu Gɇꞌkam jich Gɨꞌkoraꞌ, na guꞌx ioꞌm jix xidhuu.”
23286	MAT 4:8	Baꞌ gatuuk maakam jaꞌk tɨip baidhak gu jaꞌook gu Jesuus maaꞌn kap na paiꞌ tɇꞌkob jir oidhaꞌ taꞌm, baꞌ bhammɨ kookbaꞌn xi kɨɨsak mu jaꞌp naiꞌ xi chu joojoiꞌñchuda bɨɨx kap na jɨꞌx jir oiꞌñgaꞌn na baꞌ tɨ tɨgiaꞌ na jɨꞌk tuꞌ naiꞌ jaꞌp jix chu jaiꞌch.
23287	MAT 4:9	Miꞌ dhɨr baꞌ moop tɨtda: ―Dhiꞌ bɨɨx nap jɨꞌk tuꞌ mu jaꞌp nɨiꞌñ nax chu jaiꞌch, dhiꞌ bɨɨx jir aañ gaꞌn. Baꞌ aañ bɨɨx tum makiaꞌ noꞌ pich miꞌñi jaꞌp jum oꞌlhia kɨꞌn xi kɨkbok bhaiꞌ xiñ dhaanɨ.
23288	MAT 4:10	Guꞌ ji na guꞌp tɨtda pɨx gu Jesuus: ―Mu bi jim jaꞌook. Chaꞌp tuꞌ kɨꞌn kañ juandaꞌ. Na guꞌp jum kaiꞌch ɨp miꞌ na paiꞌ tu uaꞌñix gu ñioꞌkiꞌñ gu Dios na jaꞌpni muiꞌ jim kɨksa: “Xi chu daanɨt ap buiñor gu Dios guiꞌ nar gɇꞌkam. Baꞌ dai guiꞌ buiñor jap pɨx tu daandaꞌ, cham tuꞌ jumai buiñor ɨp.”
23289	MAT 4:11	Baꞌ puiꞌ ma jii gu jaꞌook, nat guꞌ cham jɨꞌxkat maꞌiich gu Jesuus. Baꞌ miꞌ ba ai mɨt gu noonbiꞌñ gu Dios nam baꞌ palhbuidhaꞌ gu Jesuus gu tuꞌ na aꞌmiram jum aaꞌndaꞌ.
23290	MAT 4:12	Baꞌ nat paiꞌ dhuuk puiꞌ ba tɨ kai gu Jesuus na mɨt ba kuu gu Juan jaꞌtkam bopkondam, pu jii mu jaꞌk Nasareet guiꞌ na bhaan bipioꞌ gu Galilea dɨbɨɨr.
23291	MAT 4:13	Baꞌ miꞌ dhɨr mu jaꞌk jup bhɨi na paiꞌ puiꞌ tɨ tɨɨꞌ Kapernaum guiꞌ na mummɨ bipioꞌ na paiꞌ gɇꞌgɇr susdaꞌkaꞌ gu suudaiꞌ, miꞌ na paiꞌ jax bhaan bipioꞌ gu ja dɨrbaꞌ gu bopxiꞌñ gu Sabuloon gio baꞌ gu Neptalii.
23293	MAT 4:15	Baꞌ mummɨ na paiꞌ jax tɨ dɨrbaꞌ gu Sabuloon, gio baꞌ miꞌ na paiꞌ jax jup tɨ dɨrbaꞌ gu Neptalii, mummɨ na paiꞌ baasɨꞌn dɨr jaꞌk bipioꞌ miꞌ na paiꞌr Jordaan Ak, mummɨ nam paiꞌ oiꞌdhaꞌ guiꞌ nam cham jir Israel kam jaꞌtkam.
23294	MAT 4:16	Gu jaꞌtkam guiꞌ na jaꞌp ji buusan nam jix chu tukgam tɨr ka oipot na paiꞌx chu muukiꞌ, ampɨx ja aꞌm ton guiꞌ na jaꞌp ji buusan nax chu maax.
23295	MAT 4:17	Baꞌ janoꞌ dɨr miꞌ jɨꞌ dɨr bhaiꞌ ji chɨbgai gu Jesuus nat bhaiꞌ ji chu ja aꞌgi gu jaꞌtkam, jup ja tɨtdadaꞌ: ―Yaꞌ mam aiñ jaaduñ na paiꞌ dhuuk saak maaxik jum maaxdhaꞌ gu Dios aapiꞌm jam bui. Baꞌ dai na jam aꞌm jum aaꞌ na pim miꞌ puiꞌ ba jimiaꞌ na jax jix aaꞌ.
23296	MAT 4:18	Baꞌ na mu jaꞌp ka jim gu Jesuus bɨɨx juꞌñdharan gu gɇꞌ suudaiꞌ guiꞌ na Galilea bhaan bipioꞌ, baꞌ miꞌ ba ja tɨɨ gook gu jaꞌtkam daim sɨspidhim nam mu jaꞌp buppaim suudaiꞌ chɨr maaꞌn gu gɇꞌ asaak nam miꞌ tu bhibhia gu boptop. Baꞌ maadɨt dhiꞌ jɨꞌ Simoon tɨɨꞌ, guiꞌ nam Peegro kɨꞌn jup jix mat kaꞌ, gu jumaiꞌ baꞌ Anrees jup tɨɨꞌ.
23297	MAT 4:19	Baꞌ ba ja baidhim gu Jesuus nam sap kaichgɨdaꞌ, jup ja tɨtda: ―Aañ puiꞌ ɨlhiiꞌñ jiñ jaaduñ na pim xib dɨr jaꞌp jaꞌk bañ kaichgɨdaꞌ na pim baꞌ bar jaꞌtkam bhiadam kaꞌ, na pim tu ja aꞌgidhaꞌ gux bhaiꞌm kaiꞌchdham ñiꞌook. Baꞌ guiꞌ nam jɨꞌk tɨ jɨɨꞌñdhaꞌ, puiꞌ ji buusniaꞌ na pim ba ja bhiaꞌ jaꞌp na gu boptop.
23298	MAT 4:20	Baꞌ guiꞌ cham jax ji chɨꞌɨɨk jup ma oi mɨt. Miꞌ puiꞌ pup tu tuꞌiiꞌ gu gɇꞌgɇr ja aꞌsak guiꞌ nam kɨꞌn ka tu bhiadat gu boptop.
23299	MAT 4:21	Baꞌ gammɨjɨ gu bɨɨx juꞌñdharan gu gɇꞌ suudaiꞌ nam gamaiꞌ jiim, jaiꞌ miꞌp ba ja tɨɨ gu Jesuus gook gu jaꞌtkam nam puiꞌp jir jum sɨspidhim. Baꞌ maadɨt jir diꞌ gu Jakoobo, gu jumai baꞌr Juan, guiꞌ nam jir maamraꞌn gu Sebedeo. Baꞌ bhaiꞌ gɇꞌ kanuub taꞌm ji dharaat jix bhaiꞌ ka ja bua am gu gɇꞌgɇr ja aꞌsak guiꞌ nam kɨꞌn tu bhiadaꞌ gu boptop. Baꞌ gu Jesuus puiꞌp ba ja tɨtda nat jax ja tɨɨdak ja baidhak gu jaiꞌ.
23300	MAT 4:22	Baꞌ guiꞌ puiꞌ cham jax ji chɨꞌɨɨk jup ma oi mɨt. Miꞌ puiꞌ pup tuꞌiiꞌ ɨp gu gɇꞌ ja kanuub guiꞌ nam bhaan ka tu bhiadat gu boptop, dai baꞌ gu ja taat miꞌ pup oirɨ.
23301	MAT 4:23	Baꞌ miꞌ dhɨr bɨɨx kap naiꞌ ji chu aꞌga gu Jesuus na jɨꞌx bhaan bipioꞌ gu Galilea dɨbɨɨr mu jaꞌp nam paiꞌ jax tu daandaꞌ gu dai Israel kam jaꞌtkam, na ja aaꞌñdhidhaꞌ gux bhaiꞌm kaiꞌchdham ñiꞌook nam jax jaꞌk duuji buiñor aayaꞌ gu Dios, gio baꞌ na xi ja duduaꞌñdhidhat guiꞌ nam jɨꞌk jix kakoꞌk kaꞌ na bɨɨx aixim tuꞌm ja ɇɇkaꞌ gu koꞌkdaiꞌ.
23302	MAT 4:24	Baꞌ pɨx jaꞌx puiꞌ tu aꞌgadaꞌ am gu jaꞌtkam bɨɨx na jɨꞌx bhaan bipioꞌ gu Siiria dɨbɨɨr na gu Jesuus mu paiꞌ pɨx oirɨt jix kɨɨꞌp jum duukam jup tu bua. Baꞌ jaiꞌ dhɨt na bɨɨx aixim tuꞌm ja ɇɇkaꞌ gu koꞌkdaiꞌ, muiꞌ ma ja uꞌuuk jamɨt mummɨ na paiꞌ oirɨdaꞌ gu Jesuus na mɨt ba chiañim na ja duduaꞌñdhaꞌ, puiꞌ na jax guiꞌ nam jix ñanaanbiꞌ kaꞌ na ja aꞌm jup tuiꞌñgɨdaꞌ gu cham kɨkɨɨꞌ iꞌiiꞌmdaꞌ, gio baꞌ jaiꞌ guiꞌ nam ampɨx tu kaammukdaꞌ, gio baꞌ jaiꞌ guiꞌ nam jix mamaꞌmkulhiꞌ kaꞌ. Baꞌ bɨɨx ja duduaꞌñ gu Jesuus.
23303	MAT 4:25	Baꞌ mu jaꞌp na jax jimdaꞌ gu Jesuus, muiꞌ jaꞌtkam pɨx chɨbɨɨp kattuꞌndaꞌ am nam oiꞌñchuꞌndaꞌ, puiꞌ na jax gu miꞌ kam Galilea, gio baꞌ jaiꞌ gu Dekaapolis kam, gio baꞌ gu Jerusaleen kam, gio baꞌ guiꞌ nam mu jaꞌp jup oiꞌñkaꞌ na paiꞌ jax bhaan bipioꞌ gu Judea dɨbɨɨr, gio baꞌ guiꞌ nam baasɨꞌn dɨr jup oiꞌñkaꞌ miꞌ na paiꞌr Jordaan Ak, na paiꞌ xiaꞌlhbui jaꞌk bipioꞌ guiꞌ gu dɨbɨɨr.
23304	MAT 5:1	Baꞌ na naiꞌ xi ja nɨiꞌñ gu Jesuus gu jaꞌtkam nam jix ioꞌm nammɨ xi juꞌ nam muiꞌ miꞌp tuꞌiiꞌ, baꞌ maaꞌn kap oidhaꞌ taꞌm xi jimɨɨk bha jaꞌp ji dhaibo. Baꞌ gu noonbiꞌñ muiꞌ ji ai mɨt amuub,
23306	MAT 5:3	―Jaꞌp moo joidham jix bhaiꞌ tu ja jim guiꞌ nam jɨꞌk jix maat na ja aꞌm jum aaꞌ nam miꞌ puiꞌ jiimdaꞌ na jax jix aaꞌ gu Dios, na guꞌ gammɨjɨ ja aꞌm tɨ nɨidhidhaꞌ.
23307	MAT 5:4	’Jaꞌp moo joidham jix bhaiꞌ tu ja jim guiꞌ nam jɨꞌk jix buam jum aaꞌ, nam guꞌx maat na gu Dios gammɨjɨ ja guguuxiꞌñdhaꞌ.
23308	MAT 5:5	’Jaꞌp moo joidham jix bhaiꞌ tu ja jim guiꞌ nam jɨꞌk cham gɇꞌgɇrkam jum taat, na guꞌ gu Dios ja makiaꞌ guiꞌ nat tuꞌ ja iimchuda.
23309	MAT 5:6	’Jaꞌp moo joidham jix bhaiꞌ tu ja jim guiꞌ nam jɨꞌk jaꞌp ji buan nam jix bhioꞌ gu ja iꞌiiꞌmdaꞌ am bhaan, nam jix aaꞌ nam gammɨjɨ miꞌ puiꞌ jiimdaꞌ na jax jix aaꞌ gu Dios, na guꞌ puiꞌ tu duñiaꞌ na puiꞌ ji buusniaꞌ nam jax ɨlhiiꞌñdhaꞌ.
23310	MAT 5:7	’Jaꞌp moo joidham jix bhaiꞌ tu ja jim guiꞌ nam jɨꞌk jix chu joiꞌgɨꞌn, na guꞌ gu Dios puiꞌx joiꞌmdaip ja tɨgiaꞌ.
23311	MAT 5:8	’Jaꞌp moo joidham jix bhaiꞌ tu ja jim guiꞌ nam jɨꞌk cham uꞌuaꞌtulhdhix gu ja jujur am bhaan, nam guꞌx maat nar tuꞌp tuꞌm daꞌ gu Dios.
23312	MAT 5:9	’Jaꞌp moo joidham jix bhaiꞌ tu ja jim guiꞌ nam jɨꞌk gammɨjɨr jix bhabhaiꞌkam kaꞌ, na guꞌ gu Dios puiꞌ ja iim nam jir maamraꞌn.
23313	MAT 5:10	’Jaꞌp moo joidham jix bhaiꞌ tu ja jim guiꞌ nam giilhim jum tulhiiñ nam jix ja bhaamkiꞌñ gu jaꞌtkam nam miꞌ puiꞌ jiim na jax jix aaꞌ gu Dios, na guꞌ gammɨjɨ ja aꞌm ba tɨ nɨidhidhaꞌ.
23314	MAT 5:11	’Jaꞌp moo joidham jix bhaiꞌ tu jam jimiaꞌ noꞌ pim cham jax jum aaꞌ nam paiꞌ dhuuk giilhim jam tɨtdadaꞌ gu jaꞌtkam, piam noꞌm buam pɨx jam bua, piam noꞌm bɨɨx aixim jam iattulhiꞌñ nam xi jam bhaamkidhat na pim tɨ jɨɨgiꞌñ aañ jiñ bui.
23315	MAT 5:12	Baꞌ aapiꞌm cham jax jum aaꞌndaꞌ sia kum cham jam kɨɨgalhiꞌñ gu jaꞌtkam, jix bhaiꞌ pim pɨx jum taat kaꞌ, na pim guꞌ maiꞌchiaꞌ gux dhaꞌram namkɨm bhammɨx dhaam. Na guꞌ sia guiꞌ nam jɨꞌk bɨjɨk ya jaꞌp bhaankam jup tu aꞌgimɨk gu Dios puꞌñi cham jup ja kɨɨgalh jamɨt gu jaꞌtkam, dai na mɨt bɨɨx aixim ja buimɨk ja koi nam cham ja kaim kaꞌ nam tɨi tu ja aagiꞌñdhaꞌ na jax jaꞌk jix aaꞌ gu Dios.
23316	MAT 5:13	’Baꞌ aapiꞌm jaꞌp ji buan yaꞌ dhi oiꞌñgaꞌn na jax gu on. Noꞌ gu on miꞌ jotmodaꞌ cham ka onkak, ¿jax japim dui ɨlhiiꞌñ na giop ka onkalhiaꞌ? Aañ pu kaiꞌch na cham jɨꞌxkat ka onkalhiaꞌ, pu cham tuꞌ ka bhaiꞌ kaꞌ dho baꞌ, dai na mu jaꞌp xim nuꞌaaꞌ dɨɨrap. Miꞌ dho guꞌ pu kɨɨyasaꞌ am gu jaꞌtkam nam mi jaꞌp oipodaꞌ.
23317	MAT 5:14	’Gio baꞌ moo jaꞌpnip ji buan japim yaꞌ dhi oiꞌñgaꞌn na jax gux chu maax, na guꞌ na pim jax bax maat jia paiꞌ jax chuꞌm oidhaꞌ taꞌm noꞌ daaꞌñxim jir gɇꞌ kiicham, na guꞌ mɨk dɨr jaꞌp bhammɨx chu maax kaꞌ, baꞌ cham jɨꞌxkat jum ɨxchuꞌ.
23318	MAT 5:15	Ni na cham jaroiꞌ jaiꞌch gu maaꞌnkam na xi mɨichdhai gu kañdhiir mɨjɨ jaꞌp paiꞌ xi chaaꞌbidhaꞌ tuꞌ kɨꞌn, guꞌ jaꞌpji na bhammɨ jaꞌp xi kɨɨsaꞌ ji tɇꞌkob na baꞌx chu maax kaꞌ miꞌ nam paiꞌp tuiꞌkaꞌ guiꞌ nam miꞌ darkaꞌ.
23319	MAT 5:16	Baꞌ aapiꞌm puꞌñi jaꞌk jup ji buan, jam aꞌm jum aaꞌ na pim jir jix bhabhaiꞌkam kaꞌ ja bui gu jaꞌtkam nam baꞌ ji jam tɨɨgɨi jaiꞌ bhaiꞌp ji chu dañiaꞌ buiñor guñ Gɨꞌkoraꞌ guiꞌ nax dhaam jup tuꞌiiꞌ.
23320	MAT 5:17	’Aañ cham tuꞌ pu kaiꞌñkam bha jii ji nañ yaꞌ ja sooꞌmchulhdhaꞌ gu jaꞌtkam gu puiꞌ nat jax jaꞌk ja chianɨk gu Moisees nam miꞌ puiꞌ jiimdaꞌ gio gu puiꞌ na mɨt jax jaꞌk ja aaꞌñdhak guiꞌ nam bhaankamuꞌn tu aꞌgimɨk gu Dios, guꞌ aañ ji baꞌr diꞌ na ñich bhaiꞌ ba tu kuugalhdham na mɨt jax tu daasak.