3	GEN 1:3	Na Eaubada i ene, “Bena i mara;” to ie mara.
6	GEN 1:6	Abo Eaubada i ene, “Galewa tehana abo goila duaduaridi eai, abo goila i soiedi.”
9	GEN 1:9	Abo Eaubada i ene, “Bena goila galewa ubuna eai i abigogoi ena aba’ota esega, bena tano pitapitarina i taumasaraha.” Hinage doha, ie tubu.
11	GEN 1:11	Abo Eaubada i ene, “Bena tano ginauri ini’inidi se ini, ma tumadi, eo uaua oeagidi, uauadi se toredi boeadi eai tumadi, esa, esa ano ao i lauwatai tano potana eai.” Hinage doha, ie tubu.
14	GEN 1:14	Abo Eaubada i ene, “Galewa tehana eai bena maradi, asubena eo maiona aba‐abi’udoiedi; isi abo heiheinoi, eo huia aba‐nonoidi, asubena eo borimai.
20	GEN 1:20	Eaubada i ene, “Bena gabogabo ginauri maumauridi eawoidi i hetubudi, eo manu tano ewana eai se loiloiusi galewa tehana eai.”
22	GEN 1:22	Eo Eaubada i ribahelolodi, i ene, “Au ua, au hegamagarimiu gabogabo goiladi au hemonaudi, manu hinage tano potana eai bena se gamagari.”
24	GEN 1:24	Eaubada i ene, “Bena tano ginauri maumauridi adi ao udoi udoi eai i hetubudi; bulumakau ginauri se daladalausi, suisui udoi udoi adi ao udoi udoi eai.” Hinage doha, ie tubu.
26	GEN 1:26	Abotai Eaubada i ene, “Bena tau ta hetubu tautauda eai, eo ada ao eai; eo isi bena gabogabo eamadi se tanuagaidi, eo eada manudi, eo bulumakau, eo tano maudoina, eo ginauri gamagaridi tano eai tau‐daladalausi.”
28	GEN 1:28	Eo Eaubada i ribahelolodi, eo Eaubada i ribalau aridi eai i ene, “Au ua, au hegamagarimiu, tanoubu au hemonau eo tanoubu tanuagaina eai au lau; gabogabo eamadi hinage au tanuagaidi, eada manudi hinage eo ginauri maumauridi gamagaridi isi ede tano potana eai se moimoiu.”
29	GEN 1:29	Eo Eaubada i ene, “Au ita, ginauri ini’inidi gamagaridi tuma se hetuhetubudi, tanoubu maudoina potana eai, isi ede ea lediwa’o, oeagi gamagaridi hinage uauadi eai tumadi; abo au abidi ami aiai.
47	GEN 2:16	GUIAU Eaubada tau wa i lauhesom, i ene, “Oea ta oeagina gamagaridi uauadi abo au ainapaidi;
49	GEN 2:18	Abo GUIAU Eaubada i ene, “Nige i lolo tau iabom mo i mia; ana sagu abo ea ginauri abo i lau loloei.”
54	GEN 2:23	Abo Adamu i ene, “Teina abotai ede siadagu siadana, eo bulumagu bulumana; ia esana abo se atai Sine, paana tau arinai se abihaiyama.”
57	GEN 3:1	Nuura suisuidi GUIAU Eaubada i hetubudi wa, boeadi eai mota iabom i sonoga ariri. I ribalau sine arinai i ene, “Eaubada i ene taba nige oea ta oeagina uauadi au aidi, wa?”
58	GEN 3:2	Sine i ribalau mota arinai i ene, “Oea ta oeagina uauadi taba ai aidi,
60	GEN 3:4	Mota abo i ribalau sine arinai i ene, “Mamohoi taba nige au mate;
65	GEN 3:9	Na GUIAU Eaubada i eogalau Adamu arinai i ene, “Oa ede haedi?”
66	GEN 3:10	Ia abo i heuioi i ene, “Dagugum ea ataiei oea eai, na ea matausi paana ma kohakohagu ina, arinai ea bawayamui.”
67	GEN 3:11	Ia i ene, “Eai i heribam u kohakoha? Oeagi uauana ue ai, wa, iaede ea gorai bena tabu u ai?”
68	GEN 3:12	Tau wa i ene, “Sine u leama ia bena maegu wa, ia oeagi wa uauana i leama, to ea ai.”
69	GEN 3:13	GUIAU Eaubada sine wa arinai ie riba, i ene: “Saha ina u ginauri ta?” Sine i ene, “Mota i boraigu, to ea ai.”
70	GEN 3:14	GUIAU Eaubada mota arinai ie riba, i ene; “Paana teina oa u ginauri, ea ribahematem ta suisui gamagaridi eo suisui manamanabaradi boeadi eai; bogam eai abo u nenene, tano muamuana abo u ai, em mauri asubenadi gamagaridi eai.
72	GEN 3:16	Sine arinai i ene, “Abi‐merumeru arinai abo em amamna ea hegamagari; amamna boeadi eai abo nanatumyao u labasidi, taiede, em gadosisi abo otana mo monem arinai, ia hinage abo i tanuagaim.”
73	GEN 3:17	Adamu arinai i ene, “Paana monem arinana u ataiei, eo oeagi wa ue ai, ea lauhesom wa, ‘Tabu u ai,’ tano ea ribahebaaea ta debam eai; paisoa amamnana mo abo aiaina u ai em mauri asubenadi gamagaridi eai;
78	GEN 3:22	Abo GUIAU Eaubada i ene, “Paana tau i hemala doha ita esau, lolo eo baaea italobaina i italobaiyao, ata nimana i helele mauri oeagina uauana hinage i ai, abo maurina i lau esegai e nige nosina.”
81	GEN 4:1	Adamu monena Eva i nuatui, to ie boga abo Kaina i labasi, i ene, “Tau esau GUIAU arinai ea aabi.”
86	GEN 4:6	GUIAU i ribalau Kaina arinai i ene, “Paana saha u ouyalayala, eo paana saha am ao u hebaaea?
88	GEN 4:8	Kaina i ribalau ena tau Abela arinai i ene, “U laoma ta lau oea eai.” Isi taudi labui se lage’o oea eai abo Kaina i toro ena tau Abela i lului abo i eatu’nui.
89	GEN 4:9	GUIAU abo i ribalau Kaina arinai ie ene, “Em tau Abela wa ia haedi?” I heuio i ene, “Ibai: bena eau egu tau tauitawataina wa?”
90	GEN 4:10	GUIAU i ene, “Saha ue abi ina? Em tau osinana arinana tano eai i dou‐saema arigu eai.
93	GEN 4:13	Kaina abo i ribalau GUIAU arinai i ene, “Egu maisa i lai ariri, nige gonoana ea bahei.
95	GEN 4:15	Abo GUIAU arinai ie riba i ene, “Taba nige’e! Ena taba esau Kaina i unuhemate, ana gum abo i hearo, ma haligigi‐labui.” Abo GUIAU heiheinoina ie tore Kaina arinai, ata tau esau i lobai abo i unui.
103	GEN 4:23	Lameka i ribalau monenayao aridi eai, “Ada eo Silaha e, arinagu ta au ataiei, Omi Lameka monenayao e, hage egu riba au ataiei: tau esau ea eatu’nui paana agu gai ie tore, hewari esau paana i talaigu:
105	GEN 4:25	Abo Adamu monena i nuatuiuioi, to natuna i labasi esana ie tore Seta, i ene, “Eaubada natugu esau i tauribaei enagu, Abela Kaina i unui wa helaudamaina.”
135	GEN 5:29	To esana wa ie tore Noa, i ene, “Tano GUIAU i ribahemate wa boeana eai te ina ta abo aba‐aiyawasina i leama, ada paisoa arinai eo nimada edi paipaisoa aridi eai.”
141	GEN 6:3	Abo GUIAU i ene, “Earuagu taba nige i haiabi da’oi tau nuana eai, ia buluma, ena asubena abo se lau borimai handere esega eo tau‐esega‐i‐mate.”
145	GEN 6:7	Abo GUIAU i ene, “Tau ea hetubu wa abo ea saugabaei tanoubu potana eai, tau eo suisui eo ginauri se daladalausi eo malagaibu manudi, hede nuagu i baaea ea hetubudi wa.”
151	GEN 6:13	Abo Eaubada Noa arinai ie riba, i ene, “Nuagu bena buluma gamagari ea helautomdi; paana isi debadi eai manamanabara tanoubu i monau; besi, maedi tanoubu abo ea hebaaeadi.
161	GEN 7:1	Abotai GUIAU i ribalau Noa arinai i ene, “U awasae ake arona eai, oa eo maem numa taumia gamagaridi, paana ea itam’o oa tau abidudurai matagu eai, teina isi ta boeana eai.
200	GEN 8:16	“Ake me u pesagabaei, oa ma monem, ma nanatumyao, ma nanatumyao monediyao maemyao.
205	GEN 8:21	Abo pane lolona GUIAU i ataiei, to GUIAU ia nuana eai i ene, “Taba nige huia esau tano ea ribahemateuioi tau debana eai, paana tau nuana kamanina i baaea mo, ma hewarina eai i laoma; taba nige huia esau ginauri maumauridi gamagaridi ea hebaaeauioidi, doha ea ginauriyao wa.
207	GEN 9:1	Abo Eaubada Noa mananatunayao i ainauiaidi, aridi eai i ene, “Au ua hegamagari, tanoubu au hemonau.
215	GEN 9:9	“Au ita, egu ribahesunuma ea hetoro arimiu eai, eo ami isimurita se laoma aridi eai hinage.
218	GEN 9:12	Abo Eaubada i ene, “Aigorana heiheinoina ede ina, ede ea ginauri eau eo omi eo ginauri maumauridi maemiuyao wa matada eai, eo isidi gamagaridi maraitom asubena enadi hinage.
223	GEN 9:17	Eaubada i ribalau Noa arinai i ene, “Aigora heiheinoina ede ina, eau ea hetoro ede, eau eo buluma maudoudoina tanoubu eai ta matada eai.”
231	GEN 9:25	I ene, “Kanana ea ribahebaaea ta; abo i hemala ena tataoyao edi tauauau edi heaheari.”
232	GEN 9:26	Hinage i ene, “GUIAU egu Eaubada ia abo Sema i ainauiai, abo Kanana ia ena heaheari tauauauna.
244	GEN 10:9	Ia tauailoea saesaena GUIAU matana eai; arinai ede se ribaei si ene, “Doha Nimoroda, tauailoea saesaena GUIAU matana eai.”
270	GEN 11:3	Abo se oiriba si ene, “Ehei, hage bricks tano eai ta ginauridi, ta gabu komakomanidi.” Wau bricks wa se wa se hepaisoaedi doha edi we’u, eo tar se hepaisoa aba hepatu guduidi.
271	GEN 11:4	Abo si ene, “Ehei, hage eda eanua lailaina ta hetoro, eo numa lailaina ewana i sae e galewa, abo esada edi aba’ataina abo tanoubu matana eai taba nige se hetatagorigorida.”
273	GEN 11:6	Abo GUIAU i ene, “Iaede, isi tatao peledi esega, eo arinadi esega; ina aba hetubuna mo, sora saha abo se ginauri; saha se nuatui bena se ginauri abo gonoadi se ginauri.
300	GEN 12:1	GUIAU i ribalau Aberama arinai i ene, “Em eanua, am bogaoyao, eo tamam ena numa, u torohaigabaedi, u lau eanua esau arinai, iaede abo ea heitam.
306	GEN 12:7	Abo GUIAU i taumasaraha Aberama arinai, i ene, “Am isimurita aridi eai tano ta abo ea mosedi.” Arinai aba‐aitalasam esau i hetoro metai, GUIAU enana wa i taumasaraha arinai.
310	GEN 12:11	Se hanahanau bena se lage Aigupito eai, i ribalau monena Sara arinai, i ene, “Ea nuatui oa sine abo se itam am ao i lolo,
317	GEN 12:18	Abo Parao Aberama i eogai, i ene, “Saha ina ue abi arigu eai ta? Paana saha nige u heribagu u ene ia monem?
327	GEN 13:8	Abo Aberama i ribalau Lota arinai i ene, “Oa eo eau tabu ta haiabi eo em heaheari tataodi egu heaheari tataodi hinage, paana ita boga esega.
333	GEN 13:14	Lota i abihesuara’uioi wa murina eai GUIAU i ribalau Aberama arinai, i ene, “Matam u helabaisinidi, em aba‐toro eai me u italau, tupo bauri, tupo eawana, tupo aruabu, tupo ealasi,
356	GEN 14:19	Eo i ribaheloloei i ene, “Eaubada Saesae‐aririna Aberama i ribahewoiwoinaei, ia wa galewa eo tanoubu tauginauridi;
358	GEN 14:21	Sodoma edi wasawasa Aberama arinai ie riba i ene, “Dodoga mo u ledima, na gogo u abi oabom enam.”
359	GEN 14:22	Na Aberama Sodoma edi wasawasa arinana i heuio i ene, “GUIAU Eaubada Saesaearirina galewa eo tanoubu tauginauridi, arinai ea riba aigora’o.
362	GEN 15:1	Teina ginauridi ta muridi eai GUIAU ena riba i laoma Aberama arinai, enosuai eai, “Aberama e, tabu u matausi, eau em opea ede, em ainauia abo i lai ariri.”
363	GEN 15:2	Na Aberama i ene, “Guiau EAUBADA, saha abo u leama, paana eau nige natugu, eo egu numa tanuagana hede Eliesera, Damaseko tauna wa.”
364	GEN 15:3	Aberama i ene, “U ita, nige natugu u leama, arinai tau‐auau esau egu numa eai se labasi, ia abo egu gogo tauabina.”
365	GEN 15:4	Na hedeona, GUIAU ena riba i uioma arinai, i ene, “Teina tau ta ia taba nige em gogo tauabina; oabom natum tahunuana em gogo abo i abi.”
366	GEN 15:5	Ia abo i woea‐hepesa, i ene, “U itasae galewa eai, ipora hage u hasiridi ena gonoana u hasiridi.” Abo i ribalau arinai i ene, “Am isimurita abo doha ede.”
368	GEN 15:7	Eo i ribalau arinai i ene, “Eau GUIAU tau‐woeahaim Uro eai, Kalidea tataodi enadi wa, bena eanua ta ea leawa u abi enam.”
369	GEN 15:8	Na ia i heuio i ene, “Guiau EAUBADA e, edohana abo ea nuatui, hede abo ea abi enagu?”
370	GEN 15:9	Arinai i ene, “Bulumakau bawesina ena borimai haiona u leama, eo goti bawesina ena borimai haiona, eo mamoe tamoana ena borimai haiona, eo bunebune, eo gabubu natuna.”
374	GEN 15:13	Abo GUIAU i ribalau Aberama arinai i ene, “Nuam eai bena i masaraha ariri, am isimurita abo eanua udoi arinai se mia, eanuana nige enadi, na ma‐auaudi abo se mia, eo abo se heporohedi borimai handere hasi sorasoradi eai.
379	GEN 15:18	Asubena eai ne GUIAU ena aigora i ginauri Aberama arinai i ene, “Am isimurita tano ta abo ea mosedi, Aigupito sagana eai i lau saga lailaina eai wa, Euparatea sagana.
384	GEN 16:2	Abo Sara i ribalau Aberama arinai i ene, “U itayao GUIAU abi merumeru eai i nuahigu; besi, u lau egu heaheari sinena arinai; ata bena ia debana eai abo nanatuguyao ea lobaidi.” Aberama Sara arinana ea i awaabiei.
387	GEN 16:5	Sara abo ie ribalau Aberama arinai i ene, “Se abi‐baaeaigu ta oa hinage am giru! Egu heaheari sinena eau ea leawa nuapoum eai em haitalagado eai, i lau e i itayao ie boga abotai i isuewaigu. GUIAU abo i hegiruda, oa eo eau!”
388	GEN 16:6	Na Aberama Sara ena riba i heuio i ene, “Taiede, em heaheari sinena ta ede oa nimam eai; saha u henua u abi arinai abo u abi.” Abo Sara sine wa i abi‐baaeai, to ie dago.
390	GEN 16:8	I ribalau arinai i ene, “Hagara, Sara ena heaheari sinena e, haedi eai u laoma eo haedi u laulau ina?” I ene, “Tanuagagu Sara arinai ea dadago.”
391	GEN 16:9	GUIAU ena aneru abo i ribalau i ene, “U seuio am tanuaga arinai, eo arinai u awaabi.”
392	GEN 16:10	GUIAU ena aneru ie riba hinage, i ene, “Am isimurita abo ea hegamagari aririedi, edi gamagari taba nige si hasiridi.”
393	GEN 16:11	Eo GUIAU ena aneru wa enaba, “U ita, oa ue boga, eo natum tau abo u labasi; esana abo u tore Isamaela; paana GUIAU i atailaowa em nuaamamna arinai.
395	GEN 16:13	Arinai GUIAU enana tauriba wa esana i atai, “Oa tauitagu Eaubadana,” paana i ene “Mamohoi ede, wa, Eaubada ea i’ita, ea itayao na sora mamaumaurigu.”
399	GEN 17:1	Aberama ena borimai se lage’o tatao‐hasi‐se‐mate‐saudoudoi‐harigigi‐hasi GUIAU i taumasaraha Aberama arinai, i ribalau i ene, “Eau Gigibori‐aririna Eaubadana; matagu eai bena u laulau eo nige aba hegirum.
402	GEN 17:4	“U ita, egu aigora wa u abiyao, oa abo basileia gamagaridi tamadi ede.
407	GEN 17:9	Eaubada ie riba Aberahama arinai i ene, “Na oa mo, oa abo egu aigora ribadi u sogohidi, oa eo am isimurita se murimuritama wa, isidi gamagaridi eai.
413	GEN 17:15	Eaubada abo i ribalau Aberahama arinai, i ene, “Na Sara monem wa, tabu esana u atai Sara, ia esana abo Saraha.
415	GEN 17:17	Aberahama abo i gurisalaoba matana eai, to i maruhi iabom nuana eai, ie riba i ene, “Abo merumeru se labasi tau ena borimai handere esega arinai? Abo Saraha natuna i labasi, ia i lage’o borimai tatao‐hasi‐se‐mate saudoudoi?”
416	GEN 17:18	Abo Aberahama i riba Eaubada arinai, i ene, “Ae, taba Isamaela i mia matam eai mo!”
417	GEN 17:19	Eaubada i ene, “Nige’e, na monem Saraha abo natum i labasi, eo esana abo u atai Isaako. Egu aigora abo ea hemamohoiei ia arinai, aigora miamiatahitahina eo ana isimurita murina eai enadi hinage.
428	GEN 18:3	I ene, “Egu guiau e, ena matam eai ea henualolom, tabu em heaheari tauna u laugabaei.
430	GEN 18:5	Na aiai ami begana ea leama, amnamiu se lolo abotai emi eda eai au lau; paana au laoma’o ina emi heaheari tauna arinai.” To si ene, “Besi, doha u ribaei wa u ginauri.”
431	GEN 18:6	Abo Aberahama i heuheula ie lau numa‐lulu alona eai wa, Saraha arinai, eo i ene, “U heula falawa lolololona nonoina haiona u henonohaidi, u helasa eo keke u ginauridi.”
434	GEN 18:9	Se ribalau ia arinai si ene, “Monem Saraha wa ia haedi?” Ia i ene, “Ia hede numa‐lulu alona eai.”
435	GEN 18:10	I ene, “Abo ea uioma arimiu eai, borimai sigana eai, monem Saraha abo natum i labasi.” Na Saraha wa ia numa‐lulu guduna murina eai i ata’atai, dagelana eai.
437	GEN 18:12	Arinai Saraha nuaboeana eai i maruhi, i ene, “Ea sinesinebada’o, eo monegu i tautaubada’o, abo gonoamai kodena ai lobai?”
438	GEN 18:13	GUIAU abo ie riba Aberahama arinai, i ene, “Paana saha Saraha i maruhi, eo i ene, ‘Mamohoi abo merumeru ea labasi, ea sinesinebada’o ta?’
440	GEN 18:15	Na Saraha i halele, i ene, “Eau nige ea maruhi” — paana i matausi. GUIAU i ene, “Nige’e, na u maruhi wa!”
442	GEN 18:17	GUIAU i ene, “Laulau abo ea ginauri wa, abo ea toreyamui Aberahama arinai, wa?
445	GEN 18:20	Abotai GUIAU i ene, “Lauhegiru Sodoma eo Gomara aridi eai i lai ariri, paana edi baaea i lai ariariri,
448	GEN 18:23	Aberahama i sigilaoma i ene, “Mamohoi abo tatao duduraidi u hebaaeadi maediyao tatao baaeadi wa?
451	GEN 18:26	Abo GUIAU i ene, “Ena Sodoma eai tau laulau dudurai tatao‐labui‐se‐mate‐saudoudoi ea lobaidi, eanuana abo ea nuatoatoaei, isi debadi eai.”
452	GEN 18:27	Aberahama riba ta i heuio i ene, “U ita, nuagu ea tore ina, bena Guiau arinai ea riba, eau doha wenu eo ahu mo.
453	GEN 18:28	Ena taba ta ene, wau tau laulau duduraidi tatao‐labui‐se‐mate‐hesaudoudoina wa haligigi wa nige’e? Abo eanua maudoina u hebaaea, paana haligigi wa nige’e?” I ene, “Taba nige ea hebaaea ena tatao‐labui‐se‐mate‐haligigi nei eai ea lobaidi.”