33	GEN 2:2	Na asubena hehaligigi‐labuina eai Eaubada paisoa i paisoaei wa, i heohi, arinai asubena hehaligigi‐labuina eai ana paisoa gamagaridi wa i aiyawasiedi.
34	GEN 2:3	Arinai Eaubada asubena hehaligigi‐labuina i ainauiai eo i hetabuei, paana arinai Eaubada ana paisoa wa i aiyawasiei, ena hetuhetubu paisoana wa.
43	GEN 2:12	eanua ne ena gold i lolo dumaduma; bedelium eo onyx we’una hinage metai.
53	GEN 2:22	eo wau oitarina wa GUIAU Eaubada tau lisilisina eai i niusihai wa, arinai sine i ginauri, eo i woeaiyama tau arinai.
54	GEN 2:23	Abo Adamu i ene, “Teina abotai ede siadagu siadana, eo bulumagu bulumana; ia esana abo se atai Sine, paana tau arinai se abihaiyama.”
64	GEN 3:8	Abo GUIAU Eaubada dagudaguguna se ataiei, oea eai wa i laulauwaiyo maimailahi wayawayauna eai, Adamu ma monena GUIAU Eaubada matana eai se bawayamui oea wa oeagina boeadi eai.
66	GEN 3:10	Ia abo i heuioi i ene, “Dagugum ea ataiei oea eai, na ea matausi paana ma kohakohagu ina, arinai ea bawayamui.”
71	GEN 3:15	Hewaiununa abo ea tore oa eo sine duaduarimiu eai, eo oa tumamyao eo sine tumanayao duaduaridi eai hinage; ia abo urum i utuhegaro, eo oa abo ae gedurina u oihegaro.”
72	GEN 3:16	Sine arinai i ene, “Abi‐merumeru arinai abo em amamna ea hegamagari; amamna boeadi eai abo nanatumyao u labasidi, taiede, em gadosisi abo otana mo monem arinai, ia hinage abo i tanuagaim.”
78	GEN 3:22	Abo GUIAU Eaubada i ene, “Paana tau i hemala doha ita esau, lolo eo baaea italobaina i italobaiyao, ata nimana i helele mauri oeagina uauana hinage i ai, abo maurina i lau esegai e nige nosina.”
85	GEN 4:5	na Kaina eo ena ainauia nige i nualoloedi. Arinai Kaina i ouyalayala ariri, eo ana ao i hebaaea.
86	GEN 4:6	GUIAU i ribalau Kaina arinai i ene, “Paana saha u ouyalayala, eo paana saha am ao u hebaaea?
94	GEN 4:14	U ita, wau tano eai ta u aiduiegu; oa matam eai hinage abo ea tauyamui; eau abo taudago eo tauelitata tanoubu eai ta, ena esau i lobaigu abo i unuigu.”
99	GEN 4:19	Lameka monenayao labui; esau esana Ada, eo esau Silaha.
101	GEN 4:21	Ena tau esana Iubala; ia huelele tauoi eo baubau tauyuhi tataodi tamadi ede.
103	GEN 4:23	Lameka i ribalau monenayao aridi eai, “Ada eo Silaha e, arinagu ta au ataiei, Omi Lameka monenayao e, hage egu riba au ataiei: tau esau ea eatu’nui paana agu gai ie tore, hewari esau paana i talaigu:
110	GEN 5:4	Adamu asubenana, huia ne i hemala tama wa murina eai ede borimai handere haligigi‐haiona; nanatunayaao headi tatao eo sisine hinage i labasidi.
113	GEN 5:7	Inosi se labasi wa murina eai Seta ie mia borimai handere haligigi‐haiona eo haligigi‐labui; ia nanatunayao headi tatao eo sisine i abidi hinage.
116	GEN 5:10	Kenana se labasi wa murina eai Inosi borimai handere haligigi‐haiona eo saudoudoi‐haligigi ie mia, eo nanatunayao headi tatao eo sisine ie abidi hinage.
119	GEN 5:13	Mahalalela se labasi murina eai Kenana ie mia borimai handere haligigi‐haiona eo tatao‐labui‐se‐mate, eo nanatunayao tatao eo sisine headi i abidi.
122	GEN 5:16	Iareda se labasi wa murina eai Mahalalela borimai handere haligigi‐haiona eo tau‐esega‐i‐mate‐saudoudoi, eo nanatunayao tatao eo sisine headi i abidi.
125	GEN 5:19	Enoka se labasi wa murina eai Iareda borimai handere haligigi‐haiona ie mia, eo nanatunayao tatao eo sisine headi i abidi hinage.
128	GEN 5:22	Metusela se labasi wa murina eai Enoka Eaubada maena se laulau borimai handerehaiona, eo nanatunayao tatao eo sinine headi i abidi.
130	GEN 5:24	Enoka Eaubada maena se laulau esega, i lau e ia nige’e, paana Eaubada ia i abiya’o.
132	GEN 5:26	Lameka se labasi wa murina eai Metusela ie mia borimai handere haligigi‐labui eo tatao‐hasi‐se‐mate eo labui, eo nanatunayao tatao eo sisine headi i abidi.
135	GEN 5:29	To esana wa ie tore Noa, i ene, “Tano GUIAU i ribahemate wa boeana eai te ina ta abo aba‐aiyawasina i leama, ada paisoa arinai eo nimada edi paipaisoa aridi eai.”
136	GEN 5:30	Noa se labasi wa murina eai Lameka ie mia borimaina handere haligigi eo tatao‐hasi‐semate‐saudoudoi‐haligigi, eo nanatunayao headi, tatao eo sisine i abidi.
139	GEN 6:1	Tatao se hetubu se gamagari ariri tanoubu potana eai, eo nanatudiyao sisine se labasidi,
140	GEN 6:2	abo Eaubada nanatunayao tatao se italau sisine wa aridi eai tatao nanatudiyao se itadi adi ao se lolo; abo headi se abidi monediyao, esa esa ena hinehineri eai.
142	GEN 6:4	Tatao lailaidi tanoubu eai ma miadi nei asubenadi eai ne, huia ne murina eai hinage, Eaubada nanatunayao wa, huia eai ne se laulau tatao nanatudiyao sisine aridi eai, isi abo nanatudiyao se labasidi. Teina tatao ta tatao adiadidiridi ede mumuga eai, eo tatao wasadi se lai.
148	GEN 6:10	Eo Noa nanatunayao haiona, Sema, Hama eo Iapeta.
156	GEN 6:18	Na oa mo arim eai egu aigora abo ea hetoro; oa abo u awasaema ake arona eai, oa eo nanatumyao tatao wa, eo monem, eo nanatumyao monediyao maemyao.
157	GEN 6:19	Eo ginauri maumauridi, buluma udoi udoi, labui to labui abo u ledima ake arona eai, maemyao au mauri, isi abo tamoana eo bawesina.
167	GEN 7:7	Abo Noa ma nanatunayao tatao, ma monena, ma nanatunayao wa monediyao, se awasaegogo ake eai dibori utu’utu goilana wa bena se dagoei.
173	GEN 7:13	Asubena eai ne Noa ma nanatunayao Sema, Hama, eo Iapeta, eo Noa monena, eo nanatunayao monediyao haiona, se awasae ake eai wa.
179	GEN 7:19	Goila wa i lai ariri eo i didiga tanoubu potana eai i lau e oea tupidi gamagaridi galewa maudoina ubuna eai, i hetauyamuidi.
183	GEN 7:23	Ginauri maumauridi tanoubu potana eai ta, i saugabae‐heohidi, tau, suisui, ginauri daladalausidi, malagaibu manudi, tanoubu eai se saugabaedi. Noa iabom ie mia, eo isi wa ia maenayao ake alona eai wa.
200	GEN 8:16	“Ake me u pesagabaei, oa ma monem, ma nanatumyao, ma nanatumyao monediyao maemyao.
202	GEN 8:18	Arinai abo Noa ie pesa, ma nanatunayao, ma monena eo nanatunayao ma monediyao.
205	GEN 8:21	Abo pane lolona GUIAU i ataiei, to GUIAU ia nuana eai i ene, “Taba nige huia esau tano ea ribahemateuioi tau debana eai, paana tau nuana kamanina i baaea mo, ma hewarina eai i laoma; taba nige huia esau ginauri maumauridi gamagaridi ea hebaaeauioidi, doha ea ginauriyao wa.
207	GEN 9:1	Abo Eaubada Noa mananatunayao i ainauiaidi, aridi eai i ene, “Au ua hegamagari, tanoubu au hemonau.
209	GEN 9:3	Ginauri maumauridi moimoyudi isi abo ami aiai ede, doha hinage ginauri ini’inidi eo ginauri gamagaridi eau ea lediwa’o.
214	GEN 9:8	Abo Eaubada i ribalau Noa ma nanatunayao aridi eai i ene,
216	GEN 9:10	Eo ginauri maumauridi gamagaridi arimiu eai wa, manu eo bulumakau eo tano taumiaina gamagaridi maemiuyao ake eai au pesama wa.
218	GEN 9:12	Abo Eaubada i ene, “Aigorana heiheinoina ede ina, ede ea ginauri eau eo omi eo ginauri maumauridi maemiuyao wa matada eai, eo isidi gamagaridi maraitom asubena enadi hinage.
224	GEN 9:18	Noa nanatunayao tatao wa, isi ede ake se pesagabaei wa, ede Sema, Hama eo Iapeta. Hama ede Kanana tamana.
225	GEN 9:19	Teina tataodi haiona ta ede Noa nanatunayao, isi aridi eai tanoubu maudoina se tubuma.
228	GEN 9:22	To Hama wa, Kanana tamana, tamana ma kohakohana eai ie ita, to ena tataoyao labui murimuri eai i heribadi.
229	GEN 9:23	Abo Sema eo Iapeta lulu esau se abi, dabayarodi eai se wese, eo se murimuri siwasiwa se laulau e abo tamadi kohakohana se heabobo; matadi wa se laei hesuara tamadi ma kohakohana wa nige se ita.
230	GEN 9:24	Abotai Noa ena waina nomna arinai i siliata, natuna taumurita wa ena abi i nuatuiya’o.
231	GEN 9:25	I ene, “Kanana ea ribahebaaea ta; abo i hemala ena tataoyao edi tauauau edi heaheari.”
236	GEN 10:1	Noa ma nanatunayao Sema, Hama eo Iapeta, isidi ede ina; ma nanatudiyao hinage dibori utu’utu wa murina eai se labasidi.
237	GEN 10:2	Iapeta nanatunayao tatao: Gomera, Magoga, Madai, Iavan, Tubala, Meseka eo Tirasa.
238	GEN 10:3	Gomera nanatunayao tatao: Askenasa, Ripata eo Togarama.
239	GEN 10:4	Iavan nanatunayao tatao: Elisa, Tarisiso, Kitima, eo Dodanima.
240	GEN 10:5	Teina tatao ta aridi eai geregere taumia se tadada. Isi wa Iapeta nanatunayao isibom edi tano eai, eo isibom arinadi eo adi bogao eo edi basileia se tubu.
241	GEN 10:6	Hama nanatunayao tatao: Kusa, Aigupito, Puta eo Kanana.
242	GEN 10:7	Kusa nanatunayao tatao: Seba, Havila, Sabata, Raama eo Sabeteka. Raama nanatunayao tatao: Siba eo Dedani.
255	GEN 10:20	Teina Hama nanatunayao ede, eo adi bogao, edi arina, edi tano eo edi basileia.
256	GEN 10:21	Sema arinai hinage, Ebera nanatunayao tamadi wa, eo Iapeta ana taubaguna, ia arinai merumeru se labasidi.
257	GEN 10:22	Sema nanatunayao tatao: Elama, Asura, Arepakasa, Luda eo Arama.
258	GEN 10:23	Arama nanatunayao tatao: Usa, Hula, Getera eo Masaha.
261	GEN 10:26	Ioketana nanatunayao Alemodada, Selepi, Hasamaweta, Iera.
264	GEN 10:29	Opira, Havila eo Iobaba; gamagaridi ta Ioketana nanatunayao ede.
266	GEN 10:31	Teina Sema ana isimurita, adi bogaoyao, arinadi, edi tano, eo edi basileia.
267	GEN 10:32	Teina Noa nanatunayao adi bogaoyao ede, ma adi isi edi basileia eai; basileia ta aridi eai se tadada tanoubu tupo gamagari eai, dibori utu’utu wa murina eai.
272	GEN 11:5	Abo GUIAU i dobima eanua i itasipoi, eo numa lailaina wa tatao nanatudiyao se hetoro.
278	GEN 11:11	Arepakasa se labasi murina eai Sema borimai handere haligigi ie mia, eo nanatunayao headi tatao eo sisine i hetubudi.
280	GEN 11:13	Sela se labasi murina eai Arepakasa ena borimai handere hasi eo haiona ie mia, eo nanatunayao headi, tatao eo sisine, i hetubudi.
282	GEN 11:15	Ebera se labasi murina eai Sela borimai handere hasi eo haiona ie mia, eo nanatunayao headi, tatao eo sisine, i hetubudi.
284	GEN 11:17	Pelege se labasi murina eai Ebera borimai handere hasi eo tau‐esega‐i‐mate‐saudoudoi ie mia, eo nanatunayao headi, tatao eo sisine, i hetubudi.
286	GEN 11:19	Reu se labasi murina eai Pelege borimai handere labui eo haligigi‐hasi ie mia eo nanatunayao headi, tatao eo sisine, i hetubudi.
288	GEN 11:21	Seruga se labasi murina eai Reu ena borimai handere labui eo haligigi‐labui ie mia, eo nanatunayao headi, tatao eo sisine, i hetubudi.
290	GEN 11:23	Nahora se labasi murina eai Seruga borimai handere labui ie mia, eo nanatunayao headi, tatao eo sisine i hetubudi.
292	GEN 11:25	Teraha se labasi murina eai Nahora borimai handere esega eo saudoudoi‐haligigihasi‐ie‐mia, eo nanatunayao headi, tatao eo sisine, i hetubudi.
296	GEN 11:29	Aberama eo Nahora monediyao se tawasoraidi; Aberama monena wa esana Sara, eo Nahora monena esana Mileka, ia Harana natuna, Mileka eo Iseka tamadi wa.
300	GEN 12:1	GUIAU i ribalau Aberama arinai i ene, “Em eanua, am bogaoyao, eo tamam ena numa, u torohaigabaedi, u lau eanua esau arinai, iaede abo ea heitam.
304	GEN 12:5	Aberama monena Sara i woeai, eo Lota ena tau natuna wa, eo edi gogo gamagari se lauheagogo, eo edi tataoyao Harana eai se abidi; eo se torohai bena se lau Kanana tanona eai. Se lage’o Kanana tanona eai.
341	GEN 14:4	Borimai saudoudoi‐labui Kedorolaoma se heayaiyei, na borimai hesaudoudoi‐haiona na na se oipiriei.
342	GEN 14:5	Kedorolaoma ena borimai hesaudoudoi‐hasina eai ia eo wasawasa maenayao wa se laoma tatao ta se saepoidi, Repaima Aseterota‐karanaima eai wa, eo Susim Hama eai wa, eo Emima Save‐kiriataima eai wa.
351	GEN 14:14	Aberama wasa i ataiei ana boga esau se abi se pai, abo ia ena tataoyao se heata komakomanidi’o, ena numa eai se labasidi, tataodi handere haiona eo saudoudoi‐haligigi‐haiona, i woeaidi se aihenau se lau e se lage Dani eai.
354	GEN 14:17	Kedorolaoma eo wasawasa maenayao wa tausaguina wa i hetatagorigoridi to i uioma na Sodoma edi wasawasa i torohai bena i hailobai Save gonuna eai (ia ede Wasawasa ena Gonu.)
357	GEN 14:20	Eo Eaubada Saesae‐aririna ia i nuawoiwoinaem, am waiunuyao wa taulediwa nimam eai!” Eo Aberama ginauri gamagaridi wa i soiedi, hesaudoudoina lausoisoina esega i mosei.
361	GEN 14:24	Eau taba nige saha ea abi, egu hewari adi aiai mo se aiya’o, eo tatao maeguyao taulau wa edi tupo abo se abi, Anera, Esekola, eo Mamare isi hinage edi tupo taba se abi.”