| 23214 | MAT 1:1 | चुरी भ्रिबा म्हिला मिनगदे येशू ख्रीष्टला वंशला हिन्ना। येशू ख्रीष्ट दाऊदला वंशरी न्हबा हिन्ना, ओच्छे दाऊद अब्राहामला वंशरी न्हबा हिन्ना। |
| 23215 | MAT 1:2 | अब्राहामला झा इसहाक मुबा, इसहाकला झा याकूब, याकूबला झा यहूदादेन थेला ज्योज्यो आलेगदे मुबा। |
| 23216 | MAT 1:3 | यहूदाला झा फारेसदेन जाहेर मुबा। थेनीगदेला आमा तामार मुबा, फारेसला झा हेस्रोन, हेस्रोनला झा आराम, |
| 23217 | MAT 1:4 | आरामला झा अम्मीनादाब, अम्मीनादाबला झा नहशोन, नहशोनला झा सल्मोन, |
| 23218 | MAT 1:5 | सल्मोनला झा बोअज मुबा, थेला आमा राहाब मुबा, बोअजला झा ओबेद मुबा, थेला आमा रूथ मुबा, ओबेदला झा यिशै, |
| 23219 | MAT 1:6 | यिशैला झा दाऊद ग्ले मुबा, दाऊद ग्लेला सन्तान सोलोमन मुबा, सोलोमनला आमा चा ङाच्छा उरियाहला म्रिङ मुबा। |
| 23220 | MAT 1:7 | सोलोमनला झा रहबाम, रहबामला झा अबिया, अबियाला झा आश, |
| 23221 | MAT 1:8 | आशला झा यहोशापात, यहोशापातला झा यहोराम, यहोरामला झा उज्जियाह, |
| 23222 | MAT 1:9 | उज्जियाहला झा योताम, योतामला झा आहाज, आहाजला झा हिजकिया, |
| 23223 | MAT 1:10 | हिजकियाला झा मनश्शे, मनश्शेला झा आमोन, आमोनला झा योशियाह, |
| 23225 | MAT 1:12 | बेबिलोनरी भोर्माहेन्से यकोनियासला झा शालतिएल न्हजी, ओच्छे शालतिएलला झा यरुबाबेल, |
| 23226 | MAT 1:13 | यरुबाबेलला झा अबिउद, अबिउदला झा एल्याकीम, एल्याकीमला झा आजोर, |
| 23227 | MAT 1:14 | आजोरला झा सादोक, सादोकला झा आखिम, आखिमला झा एलिउद, |
| 23228 | MAT 1:15 | एलिउदला झा एलाजार, एलाजारला झा मत्तान, मत्तानला झा याकूब, |
| 23229 | MAT 1:16 | याकूबला झा योसेफ मुबा, योसेफसे मरियमदा ब्याह लजी। थेनोन मरियमग्याम येशू न्हजी, थेदा जम्मासेन थार्बा पिन्बा ख्रीष्ट भिसी भिला। |
| 23230 | MAT 1:17 | चुह्रङ् लसी अब्राहामहेन्से दाऊदधोना च्युक ब्लि पुस्ता मुबा, थेह्रङ् लसीन दाऊदहेन्से यहूदीगदे बेबिलोनरी भोर्बा धुइधोना च्युक ब्लि पुस्ता मुबा, ओच्छे बेबिलोनरी भोर्बा धुइहेन्से थार्बा पिन्बा ख्रीष्ट न्हबा धुइधोना च्युक ब्लि पुस्ता मुबा। |
| 23231 | MAT 1:18 | येशू ख्रीष्ट चुह्रङ् लसी न्हजी, योसेफसे येशूला आमादा ब्याह लबारी ह्रीबा मुबा। तर थेनीगदेला ब्याह तबा भन्दा ङाच्छान मरियम परमेश्वरला आत्माग्याम न्हसेला तबा मुबा। |
| 23233 | MAT 1:20 | चु ताम म्हन्बान लमा योसेफ छुप निजी, जमाहेन्से म्हाङरी थे मुबा ग्लारी परमप्रभुला दूत खसी थेदा “दाऊद ग्लेला सन्तान योसेफ, ए मरियमदेन ब्याह लबारी थालोङ्गो। तिग्दा भिसम थे परमेश्वरला आत्माग्याम न्हसेला तबा हिन्ना। |
| 23234 | MAT 1:21 | थेसे झा गिक न्हला, एसे थेला मिन येशू थान्गो। तिग्दा भिसम थेसे ह्राङला म्हिगदेदा थेनीगदेला पापग्याम थार्ना लला” भिसी भिजी। |
| 23236 | MAT 1:23 | “च्यागो, ब्याह आलबा म्रिङकोला गिक न्हसेला तला ओच्छे थेसे झा न्हला, थेला मिन इम्मानुएल भिसी थान्ना,” इम्मानुएल भिबा चा “परमेश्वर य्हाङदेन छ्याम” भिबा हिन्ना। |
| 23239 | MAT 2:1 | हेरोद ग्लेला धुइरी यहूदिया अञ्चलला बेथलेहेम भिबा नाम्सारी येशू न्हजी। जमाहेन्से स्यारला ज्योतिषीगदे यरूशलेमरी खजी, ओच्छे थेनीगदेसे, |
| 23240 | MAT 2:2 | “यहूदीगदेला ग्ले दोसी न्हबा कोला खानङ मुला? तिग्दा भिसम ङन्से स्याररी थे न्हजी भिसी उन्बा सार म्राङ्जी। थेतबासेलमा ङनी थेदा झ्याल्बारी खबा हिन्ना” भिसी भिजी। |
| 23242 | MAT 2:4 | जमाहेन्से हेरोद ग्लेसे परमेश्वरला मन्दिररी पूजा लबा मुल म्हिगदेदेन यहूदी धर्मगुरुगदे जम्मादान ग्ला गिकरी ङ्योइसी “थार्बा पिन्बा ख्रीष्ट खानङ न्हला भिसी पाङ्बा मुला?” भिसी ङ्योइबा छार्बा लजी। |
| 23243 | MAT 2:5 | थेनीगदेसे हेरोद ग्लेदा “यहूदियाला बेथलेहेम भिबा नाम्सारी न्हला भिसी पाङ्बा मुला, तिग्दा भिसम अगमवक्तासे चुह्रङ् लसी भ्रिबा मुला, |
| 23244 | MAT 2:6 | ‘यहूदिया अञ्चलरी मुबा बेथलेहेम नाम्सा जजा मुसैनोन घ्रेन तला, तिग्दा भिसम बेथलेहेमग्याम शासन लबा म्हि गिक थोन्ना, थेसे ङाला म्हि इस्राएलीगदेदा वास्ता लला’ भिसी भिजी।” |
| 23245 | MAT 2:7 | जमाहेन्से हेरोदसे थे ज्योतिषीगदेदा जे सुटुक्क ङ्योइसी सार खाइमा म्राङ्बा हिन्ना, भिसी ङ्योइबा छार्बा लजी। ओच्छे थेनीगदेग्याम सार म्राङ्बा धुइ था याङ्जी। |
| 23246 | MAT 2:8 | जमाहेन्से थेसे थेनीगदेदा “निउ, ओच्छे थे कोलादा ज्यना लसी म्हाइगो। थेदा स्याप्मैछ्याम ङादा पाङ्गो, ङाएनोन थेदा झ्याल्बारी निला” भिसी बेथलेहेमरी पुइजी। |
| 23247 | MAT 2:9 | ग्लेला ताम थेःसी थेनीगदे थेग्याम निजी। थेनीगदेसे ङाच्छा स्याररी म्राङ्बा सार दोःसी थेनीगदेला ङाच्छा ङाच्छा निजी, ओच्छे लैनु येशू मुबा ग्लारी धोमाहेन्से थे सार अडेब तजी। |
| 23249 | MAT 2:11 | दिम न्हङरी वाङ्मा थेनीगदेसे लैनु येशूदा थेला आमा मरियमदेन छ्याम म्राङ्जी, जमाहेन्से थेनीगदेसे येशूदा फ्या लसी ह्राङ ह्राङला बाकस ठोङ्सी म्हर, ज्यबा बास्ना खबा धूपदेन मूर्र भिबा महँगो अत्तर भसी फुल्जी। |
| 23251 | MAT 2:13 | ज्योतिषीगदे निमाहेन्से, परमप्रभुला दूत गिक म्हाङरी योसेफ मुबा ग्लारी खजी, ओच्छे थेसे योसेफदा “योसेफ, ए रेःसी लैनु कोलादेन थेला आमादा भोर्सी मिश्र य्हुल्सारी निउ। ओच्छे ङाइ एदा दोःसी खउ भिसी आपाङ्तेधोना एनीगदे थेरीन चिउ। तिग्दा भिसम हेरोदसे लैनु कोलादा साइबारी म्हाइबा मुला” भिसी भिजी। |
| 23255 | MAT 2:17 | जमाहेन्से यर्मिया अगमवक्तासे पाङ्बा ताम पूरा तजी, |
| 23256 | MAT 2:18 | “रामा भिबा ग्लारी क्राबा क्रिङ्बा लबा थेःजी, राहेल ह्राङला कोलागदेला लागिरी क्राबान मुबा। थेदा जम्मासेन सम्झब लसैनोन क्राबा आख्लानी। तिग्दा भिसम थेला कोलागदे साइसी जिन्बा मुबा।” |
| 23257 | MAT 2:19 | ओच्छे हेरोद सिमाहेन्से, मिश्र य्हुल्सारी परमप्रभुला दूत गिक म्हाङरी योसेफ मुबा ग्लारी खजी, ओच्छे थेदा स्वर्गदूतसे, |
| 23258 | MAT 2:20 | “योसेफ, ए रेःसी लैनु कोलादेन थेला आमादा इस्राएल य्हुल्सारी भोर्सी निउ। तिग्दा भिसम लैनु कोलादा साइबारी म्हाइबा म्हिगदे जम्मान सिसी जिन्बा मुला” भिसी भिजी। |
| 23262 | MAT 3:1 | ल्हानान दिङ लिच्छा बप्तिस्मा पिन्बा यूहन्ना यहूदिया अञ्चलला तोङतोङबा ग्लारी खसी चुह्रङ् भिसी पाङ्बारी छ्याइजी, |
| 23263 | MAT 3:2 | “ह्राङ ह्राङला पाप ख्लासी परमेश्वरपट्टि दोःगो, तिग्दा भिसम स्वर्गला य्हुल्सा खसी जिन्बा मुला।” |
| 23264 | MAT 3:3 | यशैया अगमवक्तासे चुनोन यूहन्नाला बारेरी चुह्रङ् भिसी पाङ्बा मुला, “तोङतोङबा ग्लारीक्यार परमप्रभुला ग्याम तयार लउ, ओच्छे ‘परमप्रभु भ्रबाला लागिरी थेला ग्याम सोजो स्होउ,’ भिसी म्हि गिक क्रिङ्बा मुला।” |
| 23265 | MAT 3:4 | यूहन्नासे ऊँटला क्राला क्वान क्वान्मुबा, ओच्छे ढिला पेटी खीमुबा। थेसे तिरीदेन ह्रि सिङसोरला खुदु चमुबा। |
| 23268 | MAT 3:7 | तर फरिसीगदेदेन सदुकीगदे न्हङला ल्हानान म्हिगदे बप्तिस्मा किन्बारी खबान लबा म्राङ्सी थेसे थेनीगदेदा “पुख्रीला कोलागदे, एनीगदेदा परमेश्वरला बोमोग्याम स्योरम्याङ्ला भिसी खाल्से भिजी? |
| 23270 | MAT 3:9 | एनीगदेसे ङाला ताम ङ्यान्गो, एनीगदेसे ‘ङनी अब्राहामला सन्तान हिन्ना’ भिदेमा परमेश्वरला सजायग्याम स्योरम्याङ्ला भिसी थाम्हन्गो। तिग्दा भिसम परमेश्वरसे अब्राहामला लागिरी चु युङबागदेग्यामसेनोन कोलागदे स्होबारी खम्ला। |
| 23271 | MAT 3:10 | च्यागो, दोङ थाबारी तरी थीसी जिन्बा मुला। थेतबासेलमा ज्यबा रो आरोबा जम्मान दोङ टाहेन्सेन थासी मेरी भ्याङ्ला। |
| 23273 | MAT 3:12 | ग्वा य्हाप्बा नाख्ले थेलान छ्यारी मुला, दाहेन्से ग्वा ज्यना लसी य्हाप्सी ग्वा जति भकारीरी थान्ना ओच्छे पोलोवा जति खाइमै आसिबा मेरी ख्राङ्ला।” |
| 23275 | MAT 3:14 | तर यूहन्नासे थेदा “ङाइ चा ह्राङग्याम बप्तिस्मा किन्तोःबा मुला, तिग्दा ह्राङ चा ङा मुबा ग्लारी फेप्खबा?” भिसी रोकब लबारी म्हाइजी। |
| 23278 | MAT 3:17 | जमाहेन्से स्वर्गग्याम “चु ङाइ सेमहेन्सेन माया लबा ङाला झा हिन्ना, चुदा म्राङ्सी ङा ल्हानान ताङ्बा मुला” भिबा काइ खजी। |
| 23282 | MAT 4:4 | तर येशूसे “गेङसे जे म्हि आसो, तर परमेश्वरला सुङग्याम थोन्बा जम्मान बचनसे सोबारी खम्ला भिसी परमेश्वरला बचनरी भ्रिबा मुला” भिसी सुङ्जी। |
| 23284 | MAT 4:6 | ओच्छे थेसे येशूदा “ह्राङ परमेश्वरला झा हिन्सम चुग्याम मार छ्योङ्गो। तिग्दा भिसम बचनरी चुह्रङ् भिसी भ्रिबा मुला, ‘परमेश्वरसे ह्राङदा चुङ्बाला लागिरी ह्राङला स्वर्गदूतगदेदा कुल्ला। ओच्छे एला काङ युङबारी थाठोक्गै भिसी एदा थेनीगदेसे या यारीन ताला’ भिसी भिजी।” |
| 23285 | MAT 4:7 | येशूसे थेदा “बचनरी चुह्रङ् लसी भ्रिबा मुला, ‘एसे ह्राङला परमप्रभु परमेश्वरला सेम च्याबा गे तिगै थालउ’” भिसी सुङ्जी। |
| 23288 | MAT 4:10 | जमाहेन्से येशूसे थेदा “शैतान, ए चुग्याम तुरुन्तन निउ! तिग्दा भिसम बचनरी ‘एसे ह्राङला परमप्रभु परमेश्वरदा फ्या लउ, ओच्छे थेदा जे तेन्गो’ भिसी भ्रिबा मुला” भिसी सुङ्जी। |
| 23291 | MAT 4:13 | ओच्छे नासरत भिबा ग्लारी आफेप्ना कफर्नहुम शहररी धन्छ्याबारी फेप्जी। चु शहर गालील समुन्द्रला कुनीरी मुबा, चु शहर चा जबूलूनदेन नप्ताली भिबा य्हुलला म्हिगदे चिबा जिल्लारी परब तमुबा। |
| 23292 | MAT 4:14 | चुह्रङ् लसी यशैया अगमवक्तासे पाङ्बा ताम पूरा तजी, |
| 23293 | MAT 4:15 | “जबूलूनदेन नप्तालीला जिल्लारी यर्दन क्याम्सङ, समुन्द्रला कुनीरी, यर्दन क्याम्सङ, गालीलरी चिबा अर्गु य्हुलला म्हिगदे |
| 23295 | MAT 4:17 | थे धुइहेन्से येशूसे “एनीगदेसे ह्राङ ह्राङला पाप ख्लासी परमेश्वरपट्टि दोःगो, तिग्दा भिसम स्वर्गला य्हुल्सा खसी जिन्बा मुला” भिसी म्हिगदेदा सुङ्बारी छ्याइजी। |
| 23297 | MAT 4:19 | येशूसे थेनीगदेदा “ङादेन छ्याम भ्रउ, दाहेन्से ङाइ एनीगदेदा तार्ङा चुङ्बा म्हि आहिन, तर म्हिगदेदा परमेश्वर मुबा ग्लारी भबा म्हि स्होला” भिसी सुङ्जी। |
| 23298 | MAT 4:20 | येशूसे थेह्रङ् सुङ्मैछ्याम, ह्राङला घ्याङ ख्लासी थेनीगदे येशूदेन छ्याम भ्रजी। |
| 23302 | MAT 4:24 | जमाहेन्से सिरिया य्हुल्सा नाङनोन येशूला बारेरी थेःजी। ओच्छे म्हिगदेसे ल्हानान थरीला रोगसे स्याप्सी दुख याङ्बागदे, म्हङसे स्याप्बागदे, स्ह म्हङसे स्याप्बागदेदेन काङ या चलब आतबा कुज्या म्हिगदेदा येशू मुबा ग्लारी भजी। जमाहेन्से येशूसे थेनीगदेदा खम्ना लजी। |
| 23303 | MAT 4:25 | ओच्छे गालील, डेकापोलिस, यरूशलेम, यहूदियादेन यर्दन क्याम्सङहेन्सेला ल्हानान म्हिगदे येशूदेन छ्याम भ्रजी। |
| 23305 | MAT 5:2 | ओच्छे येशूसे थेनीगदेदा चुह्रङ् भिसी लोप्बारी छ्याइजी, |
| 23306 | MAT 5:3 | “परमेश्वरथोरी जे आश लबागदेसे परमेश्वरग्याम मोलम याङ्ला, तिग्दा भिसम स्वर्गला य्हुल्सा थेनीगदेलान हिन्ना। |
| 23308 | MAT 5:5 | सोजो म्हिगदेसे परमेश्वरग्याम मोलम याङ्ला, तिग्दा भिसम थेनीगदेसे जम्बुलिङला अधिकार याङ्ला। |
| 23309 | MAT 5:6 | परमेश्वरसे म्हन्बा अन्छार भ्रबारी म्हाइबागदेसे परमेश्वरग्याम मोलम याङ्ला, तिग्दा भिसम परमेश्वरसे थेनीगदेदा भङ पिन्ना। |
| 23310 | MAT 5:7 | स्य्हान्दोदा दया लबागदेसे परमेश्वरग्याम मोलम याङ्ला, तिग्दा भिसम थेनीगदेसे दया याङ्ला। |
| 23311 | MAT 5:8 | ज्यबा सेम थोबागदेसे परमेश्वरग्याम मोलम याङ्ला, तिग्दा भिसम थेनीगदेसे परमेश्वरदा म्राङ्ला। |
| 23312 | MAT 5:9 | स्य्हान्दोदा ढिक्ना लबागदेसे परमेश्वरग्याम मोलम याङ्ला, तिग्दा भिसम थेनीगदे परमेश्वरला झा दोला। |
| 23313 | MAT 5:10 | म्हिगदेसे दुख पिन्सैनोन परमेश्वरसे म्हन्बा अन्छार भ्रबागदेसे परमेश्वरग्याम मोलम याङ्ला, तिग्दा भिसम स्वर्गला य्हुल्सा थेनीगदेलान हिन्ना। |
| 23314 | MAT 5:11 | “ङादा विश्वास लबासे लमा म्हिगदेसे एनीगदेदा खिसी लला, दुख पिन्ना, ओच्छे लुसीला ताम पाङ्सी एनीगदेला बिरोधरी जम्मान नइबा ताम लमैनोन एनीगदेसे परमेश्वरग्याम मोलम याङ्ला। |
| 23315 | MAT 5:12 | तसैनोन एनीगदे ल्हानान ताङ्गो, तिग्दा भिसम स्वर्गरी एनीगदेसे घ्रेन इनाम याङ्ला। एनीगदे भन्दा ङाच्छाला अगमवक्तागदेदाएनोन थेनीगदेसे चुह्रङ् लसीन दुख पिन्मुबा। |
| 23316 | MAT 5:13 | “एनीगदे जम्बुलिङला चजा ह्रङ्बान हिन्ना, तर चजाला ङम्बा स्हे म्हाजी भिसम दोःसी तिग्से ङम्ना लबा? गे आखेल्बासे लमा म्हिसे थेदा भ्याङ्ला, जमाहेन्से म्हिसे नाङ्सी भ्रला। |
| 23318 | MAT 5:15 | म्हिगदेसे नाङसल म्रासी फामसे घप्सी आथान, तर दिमरी मुबा जम्मान म्हिगदेसे म्राङ्गै भिसी नोबा ग्लारी थान्ना। |
| 23320 | MAT 5:17 | “ङा परमेश्वरसे मोशादा पिन्बा ठिमदेन अगमवक्तागदेसे पाङ्बा ताम भ्याङ्बारी आहिन, तर थे पूरा लबारी खबा हिन्ना। |
| 23321 | MAT 5:18 | एनीगदेसे ङाला ताम ङ्यान्गो, तिग्दा भिसम मुदेन जम्बुलिङ नाश आततेधोना परमेश्वरसे मोशादा पिन्बा ठिमरी मुबा हिगी गिकनोन आम्हा। |
| 23323 | MAT 5:20 | एनीगदेसे ङाला ताम ङ्यान्गो, तिग्दा भिसम एनीगदेसे यहूदी धर्मगुरुगदेदेन फरिसीगदेसे भन्दा ज्यना लसी परमेश्वरसे म्हन्बा अन्छार आलनी भिसम तिगै लसीन एनीगदे स्वर्गला य्हुल्सारी वाङ्आम्याङ्। |
| 23324 | MAT 5:21 | “‘एसे म्हि थासाइगो, जुन म्हिसे म्हि साइला थेसे सजाय याङ्ला’ भिसी परमेश्वरसे मोशादा पिन्बा ठिमरी भ्रिबा ताम एनीगदेसे थेःबा मुला। |
| 23325 | MAT 5:22 | तर एनीगदेसे ङाला ताम ङ्यान्गो, जुन म्हिसे खालैदा बोमो लला, थे म्हिसे सजाय याङ्ला, ओच्छे खालैसे स्य्हान्दोदा हेला लजी भिसम थेदा अदालतरी भोर्ला। तर जुन म्हिसे स्य्हान्दोदा ‘ए गे आखेल्बा मूर्ख’ भिसी भिला थेदा नर्गला लोङ्बा खबा मेरी युला। |
| 23326 | MAT 5:23 | “थेतबासेलमा परमेश्वरदा भेटी फुल्बा धुइरी एदेन छ्याम खालै म्हि बोमो खबा मुला भिबा ताम एसे ढन्जी भिसम, |
| 23327 | MAT 5:24 | एला भेटी परमेश्वरला मन्दिररी भेटी फुल्बा ग्लाला ङाच्छापट्टि ख्लासी ङाच्छा थे म्हिदेन छ्याम ढिक्गो, ओच्छे एसे ह्राङला भेटी फुल्गो। |
| 23328 | MAT 5:25 | “एदा मुद्दा युबा म्हिदेन छ्याम अदालतरी निबान लबा धुइरी ग्यामरीन ढिक्गो। आहिन्सम थेसे एदा न्यायाधीशला यारी जिम्मा पिन्ना, ओच्छे न्यायाधीशसे सिपाहीगदेला यारी जिम्मा पिन्ना। जमाहेन्से ए झ्याल्खानरी परब तला। |
| 23329 | MAT 5:26 | एसे ङाला सत्य ताम ङ्यान्गो, एसे जम्मान टाङगा आफातेधोना थेग्याम थोन्बारी आम्याङ्। |
| 23330 | MAT 5:27 | “परमेश्वरसे मोशादा पिन्बा ठिमरी चुह्रङ् भिसी भ्रिबा तामएनोन एनीगदेसे थेःबा मुला, ‘ए स्य्हान्दोला म्रिङदेन छ्याम ब्रेल्सी थाभ्रउ।’ |
| 23331 | MAT 5:28 | तर एनीगदेसे ङाला ताम ङ्यान्गो, जुन म्हिसे खालै म्रिङम्हेमेदा नइबा सेमसे च्याला थेसे सेमरी थे म्रिङम्हेमेदेन छ्याम ब्रेल्सी जिन्बा तला। |
| 23334 | MAT 5:31 | “परमेश्वरसे मोशादा पिन्बा ठिमरी चुह्रङ् भिसी भ्रिबा तामएनोन एनीगदेसे थेःबा मुला, ‘जुन म्हिसे म्रिङ ख्लाला थे म्हिसे छोडपत्रला कागज भ्रिसी पिन्गै।’ |
| 23335 | MAT 5:32 | तर एनीगदेसे ङाला ताम ङ्यान्गो, जुन म्हिसे ह्राङला म्रिङदा स्य्हान्दोदेन छ्याम ब्रेल्सी आभ्रसैनोन ख्लाला, थेसे ह्राङला म्रिङदा स्य्हान्दोदेन छ्याम ब्रेल्सी भ्रबा म्रिङम्हेमे स्होला। ओच्छे थे म्रिङम्हेमेदेन छ्याम जुन म्हिसे ब्याह लला थेएनोन ब्रेल्सी भ्रबा तला। |
| 23336 | MAT 5:33 | “परमेश्वरसे मोशादा पिन्बा ठिमरी चुह्रङ् भिसी भ्रिबा तामएनोन एनीगदेसे थेःबा मुला, ‘एसे लुसीला ताम लसी घ्रान थाफागो, ओच्छे परमेश्वरदेन छ्याम लबा कबुल पूरा लउ।’ |
| 23337 | MAT 5:34 | तर एनीगदेसे ङाला ताम ङ्यान्गो, एनीगदेसे घ्रान भिबा फानोन थाफागो, स्वर्गला मिनरी तसै, जम्बुलिङला मिनरी तसै एनीगदेसे घ्रान थाफागो। तिग्दा भिसम स्वर्ग परमेश्वर धन्छ्याबा ग्ला हिन्ना ओच्छे जम्बुलिङ परमेश्वरला स्य्हाप न्हेःबा ग्ला हिन्ना, ओच्छे यरूशलेम शहर चा जम्मालान ग्ले परमेश्वरला शहर हिन्ना। |
| 23340 | MAT 5:37 | थेतबासेलमा एनीगदेसे पाङ्बा ताम चा ‘हिन्ना’ भिसम ‘हिन्ना,’ ‘आहिन’ भिसम ‘आहिन’ जे तगै। थे भन्दा ल्हाना ताम चा शैतानग्याम खबा हिन्ना। |
| 23341 | MAT 5:38 | “परमेश्वरसे मोशादा पिन्बा ठिमरी चुह्रङ् भिसी भ्रिबा तामएनोन एनीगदेसे थेःबा मुला, ‘मीला बदला मी, ओच्छे स्वाला बदला स्वा किन्गो।’ |
| 23342 | MAT 5:39 | तर एनीगदेसे ङाला ताम ङ्यान्गो, एनीगदेदा बिरोध लबागदेदा एनीगदेसे बदला थाकिन्गो। बरु खालैसे एला दाहिने ग्रम्बारी तोजी भिसम अर्गुपट्टिला ग्रम्बाएनोन तासी पिन्गो। |
| 23346 | MAT 5:43 | “परमेश्वरसे मोशादा पिन्बा ठिमरी चुह्रङ् भिसी भ्रिबा तामएनोन एनीगदेसे थेःबा मुला, ‘एसे ह्राङला खिम्जेमदा माया लउ, ओच्छे शत्रुदा हेला लउ।’ |
| 23347 | MAT 5:44 | तर एनीगदेसे ङाला ताम ङ्यान्गो, एनीगदेसे ह्राङला शत्रुगदेदा माया लउ, ओच्छे एनीगदेदा दुख पिन्बागदेला लागिरी प्रार्थना लउ। |
| 23349 | MAT 5:46 | चुदे एनीगदेदा माया लबादा जे एनीगदेसे माया लजी भिसम एनीगदेसे खाह्रङ् लसी इनाम याङ्ला? थेह्रङ् मी तिरो दुइबा म्हिगदेसेनोन आल? लमुला। |
| 23350 | MAT 5:47 | एनीगदेसे ह्राङला ज्योज्यो आलेगदेदा जे मान लजी भिसम स्य्हान्दोगदेसे भन्दा ज्यबा तिग लजी? थेह्रङ् मी अर्गु य्हुलला म्हिगदेसेनोन आल? लमुला। |
| 23351 | MAT 5:48 | थेतबासेलमा एनीगदेला स्वर्गरी धन्छ्याबा परमेश्वर आबा खाह्रङ्बा मुला, एनीगदेएनोन थेह्रङ्बान दोगो।” |
| 23353 | MAT 6:2 | “एनीगदेसे प्राङबोगदेदा पिन्बा धुइरी कप्टीगदेसे ह्रङ् लसी म्हिगदेदा थेःना लसी थाभ्रउ। तिग्दा भिसम थेनीगदे म्हिगदेसे मान लगै भिसी यहूदीगदे ह्रुप तबा दिमगदेदेन ग्यामरीक्यार निसी स्य्हान्दोदा थेःना लसी भ्रमुला। च्यागो, एनीगदेसे ङाला ताम ङ्यान्गो, थेनीगदेसे याङ्तोःबा इनाम याङ्सी जिन्बा मुला। |
| 23356 | MAT 6:5 | “थेतबासेलमा एसे प्रार्थना लबा धुइरी कप्टीगदेसे ह्रङ् लसी थालउ। तिग्दा भिसम थेह्रङ्बा म्हिगदेसे म्हिगदेदा उन्बाला लागिरी यहूदीगदे ह्रुप तबा दिमगदेदेन ग्यामला कुनीरीक्यार राप्सी प्रार्थना लबारी सेम लमुला। च्यागो, एनीगदेसे ङाला ताम ङ्यान्गो, थेह्रङ्बा म्हिगदेसे याङ्तोःबा इनाम याङ्सी जिन्बा मुला। |
| 23357 | MAT 6:6 | तर ए प्रार्थना लबा धुइरी कोठा न्हङरी वाङ्सी म्राप ढुङ्गो, ओच्छे खालैसे आम्राङ्बा ग्लारी धन्छ्याबा परमेश्वर आबादेन छ्याम प्रार्थना लउ। जमाहेन्से खालैसे आम्राङ्बा तामएनोन म्राङ्बा परमेश्वर आबासे एदा इनाम पिन्ना। |
| 23359 | MAT 6:8 | थेतबासेलमा एनीगदे थेनीगदे ह्रङ्बा थादोगो। तिग्दा भिसम एनीगदेसे ह्रीबा भन्दा ङाच्छान एनीगदेदा तिग तिग स्हे तोःबा मुला, थे एनीगदेला परमेश्वर आबादा था मुला। |
| 23360 | MAT 6:9 | “तर एनीगदेसे चा चुह्रङ् लसी प्रार्थना लउ, ‘स्वर्गरी धन्छ्याबा ङन्ना परमेश्वर आबा, ह्राङदा जम्मासेन मान लगै। |
| 23361 | MAT 6:10 | ओच्छे जम्मानथोरी ह्राङला शासन खगै, ओच्छे ह्राङसे म्हन्बा ताम स्वर्गरी पूरा तबा ह्रङ्नोन चु जम्बुलिङरीनोन पूरा तगै। |
| 23364 | MAT 6:13 | ओच्छे ङन्दा पापरी फसब तबा ग्यामरी भ्रआपुङ्गो, तर शैतानग्याम फेसी थान्गो। ह्राङला य्हुल्सादेन शक्ति ओच्छे ह्राङला मान सदनना लागिरी ह्राङलान हिन्ना, आमेन।’ |
| 23367 | MAT 6:16 | “एनीगदेसे फोइथान चिसी प्रार्थना लबा धुइरी कप्टी म्हिगदेसे ह्रङ् लसी ली धोपधोप लसी थाभ्रउ। तिग्दा भिसम थेनीगदेसे फोइथान चिसी प्रार्थना लबा म्हिगदेसे म्राङ्गै भिसी ली धोपधोप लसी भ्रमुला। थेतबासेलमा एनीगदेसे ङाला ताम ङ्यान्गो, थेनीगदेसे याङ्तोःबा इनाम याङ्सी जिन्बा मुला। |
| 23369 | MAT 6:18 | ओच्छे ए फोइथान चिसी प्रार्थना लबा म्हिगदेसे आहिन, तर खालैसे आम्राङ्बा ग्लारी धन्छ्याबा परमेश्वर आबासे म्राङ्गै। ओच्छे खालैसे आम्राङ्बा तामएनोन म्राङ्बा परमेश्वर आबासे एदा इनाम पिन्ना। |
| 23370 | MAT 6:19 | “ह्राङला लागिरी जम्बुलिङरी धन सम्पत्ति सोसी थाथान्गो, तिग्दा भिसम जम्बुलिङला धन सम्पत्तिगदे बुलुङदेन खियासे चला, ओच्छे दिम फोसी य्होगदेसे य्हो लसी भोर्ला। |
| 23371 | MAT 6:20 | बरु ह्राङला लागिरी स्वर्गरी धन सम्पत्ति सोसी थान्गो। तिग्दा भिसम थेरी बुलुङसेएनोन आच खियासेएनोन आच, ओच्छे य्होसेएनोन वाङ्सी य्हो आल। |
| 23372 | MAT 6:21 | तिग्दा भिसम जुन ग्लारी एनीगदेला धन सम्पत्ति मुला, एनीगदेला सेमएनोन थेरीन तला। |
| 23373 | MAT 6:22 | “मी ल्हुइला लागिरी नाङसल ह्रङ्बान हिन्ना। थेतबासेलमा एला मी ज्यबा मुसम एसे ज्यना लसी म्राङ्ला, |
| 23375 | MAT 6:24 | “खालैसेनोन मालिक न्हीला गे लबारी आखम। तिग्दा भिसम थेसे गिकदा हेला लला, ओच्छे स्य्हान्दोदा माया लला। अथवा थेसे गिकसे भिबा ताम ङ्यान्ना, ओच्छे स्य्हान्दोदा वास्तान आल। थेह्रङ् लसीन एनीगदेसेनोन परमेश्वरदेन धन सम्पत्ति न्हीलान गे लबारी आखम। |
| 23376 | MAT 6:25 | “थेतबासेलमा एनीगदेसे ङाला ताम ङ्यान्गो, सोबाला लागिरी तिग चसे तिग थुङ्से ओच्छे तिग क्वान्से भिसी धन्दा सुर्दा थालउ। तिग्दा भिसम चबा थुङ्बादेन क्वान्बा भन्दा एनीगदेला प्राणदेन ल्हुइ घ्रेन आहिन? |
| 23377 | MAT 6:26 | मुरी चरागदेदा च्यागो, थेनीगदेसे न्ह ब्लु ढ्वला, न्ह बाली दुइसी पोप लला, तर स्वर्गरी धन्छ्याबा एनीगदेला परमेश्वर आबासेन थेनीगदेदा ख्वामुला। चरागदे भन्दा मी एनीगदे घ्रेन आहिन? |
| 23378 | MAT 6:27 | एनीगदे न्हङला खालैसे धन्दा सुर्दा लसी छिन्नङला लागिरी आयू काप्खम्ला? |
| 23379 | MAT 6:28 | “तिग्दा एनीगदेसे क्वान्ना लागिरी धन्दा सुर्दा लबा? ह्रिरी सार्बा म्हेन्दोदा च्यागो, थेसे गेएनोन आलमुला, क्वानएनोन आरामुला। तसैनोन थे खाह्रङ् लसी ल्हेमुला! |
| 23380 | MAT 6:29 | एनीगदेसे ङाला ताम ङ्यान्गो, सोलोमन ग्लेदेन ल्हानान धन सम्पत्ति मुसैनोन थेसे क्वान्बा क्वान थे म्हेन्दोगदे न्हङला गिक तेबै जेबा आरेमुबा। |
| 23381 | MAT 6:30 | तिनी ल्हेबान निसी न्हङगर खर्माहेन्से मेरी फर्बा छेदा मी परमेश्वरसे चुह्रङ् लसी जेना लमुला भिसम झन एनीगदेदा परमेश्वरसे जेना आल? खाइ एनीगदेला विश्वास? |
| 23382 | MAT 6:31 | थेतबासेलमा ‘तिग चसे? तिग थुङ्से? ओच्छे तिग क्वान्से?’ भिसी धन्दा सुर्दा थालउ। |
| 23387 | MAT 7:2 | तिग्दा भिसम एनीगदेसे खाह्रङ् लसी स्य्हान्दोदा दोष लला, थेह्रङ् लसीन एनीगदेदाएनोन दोष लला। ओच्छे एनीगदेसे जुन दप्बा स्हेसे दप्सी पिन्ना, परमेश्वरसेनोन एनीगदेदा थेनोन दप्बा स्हेसे दप्सी पिन्ना। |
| 23388 | MAT 7:3 | “स्य्हान्दोला गोरी सेः भ्रबा म्राङ्बा म्हिसे ह्राङला गोरी मुइ भ्रबा तिग्दा आम्राङ्बा? |
| 23389 | MAT 7:4 | ह्राङला गोरी म्हुइ भ्रबा आम्राङ्बासे खाह्रङ् लसी आलेदा ‘खाइ एला गोला सेः तेःसी पिन्ना भिसी भिखम्ला?’ |
| 23390 | MAT 7:5 | कप्टी, ङाच्छा ह्राङला गोला मुइ तेःगो, ओच्छे जे एसे आलेला गोरी भ्रबा सेः तेःबारी खम्ला। |
| 23391 | MAT 7:6 | “परमेश्वरदा फुल्तोःबा स्हे नगीदा थापिन्गो, तिग्दा भिसम थेसे एदा ख्राप्बारी खला। ओच्छे ह्राङला मोती ढ्वला ङाच्छापट्टि थाभ्याङ्गो। तिग्दा भिसम थेसे मोती नाङ्सी भ्रला। |
| 23393 | MAT 7:8 | तिग्दा भिसम जुन म्हिसे ह्रीला थेदा पिन्ना, ओच्छे जुन म्हिसे म्हाइला थेसे स्याप्ला ओच्छे जुन म्हिसे म्रापरी ढ्वाक ढ्वाक लला थेदा म्राप ठोङ्सी पिन्ना। |
| 23394 | MAT 7:9 | “एनीगदे न्हङला खालैसे ह्राङला कोलासे गेङ ह्रीमा थेदा युङबा पिन्ना? |
| 23395 | MAT 7:10 | खाइमै तार्ङा ह्रीमा थेदा पुख्री पिन्ना? |
| 23400 | MAT 7:15 | “फट्टा अगमवक्तागदे म्राङ्सी होशियार तसी चिउ, थेनीगदे एनीगदे मुबा ग्लारी ग्यु ह्रङ् लसी खमुला, तर थेनीगदेला सेम चा लोङ्बा खबा फार्बा ह्रङ्बान तमुला। |
| 23406 | MAT 7:21 | “ङादा ‘प्रभु, प्रभु’ जे भिबा म्हिगदे स्वर्गला य्हुल्सारी वाङ्बारी आम्याङ्। तर स्वर्गरी धन्छ्याबा ङाला आबासे कुल्बा ताम ङ्यान्बा म्हि जे वाङ्म्याङ्ला। |
| 23407 | MAT 7:22 | जमा धुइरी ल्हानान म्हिसे ङादा ‘प्रभु, ङन्से ह्राङला अधिकारग्याम परमेश्वरला ताम पाङ्बा आहिन? ओच्छे ह्राङला अधिकारग्याम ङन्से म्हङगदे ताप्बा आहिन? थेह्रङ् लसीन ङन्से ह्राङला अधिकारग्याम ल्हानान उदेकला गेगदे लबा आहिन?’ भिसी भिला। |
| 23408 | MAT 7:23 | जमा ङाइ थेनीगदेदा ‘एनीगदेदा ङाइ खाइमै ङोसेबा आरे। पाप गे लबा म्हिगदे, एनीगदे ङा मुबा ग्लाग्याम निउ’ भिसी पाङ्ला। |
| 23409 | MAT 7:24 | “थेतबासेलमा जुन म्हिसे ङाइ पाङ्बा ताम ङ्यान्सी थे अन्छार भ्रला, थे म्हि चा दिम स्होमा नुप्ना जग ख्वसी स्होबा बुद्धि मुबा म्हि ह्रङ्बान हिन्ना। |
| 23411 | MAT 7:26 | तर जुन म्हिसे ङाइ पाङ्बा ताम थेःसी थे अन्छार गे आल, थे म्हि चा दिम स्होमा नुप्ना जग आख्वना स्होबा बुद्धि आरेबा मूर्ख म्हि ह्रङ्बान हिन्ना। |
| 23414 | MAT 7:29 | तिग्दा भिसम येशूसे थेनीगदेला यहूदी धर्मगुरुगदेसे लोप्बा ह्रङ् लसी आहिन, तर अधिकार मुबा म्हिसे ह्रङ् लसी लोप्बा मुबा। |
| 23416 | MAT 8:2 | थेनोन धुइरी कोरे खबा म्हि गिक येशूला ङामरी खसी येशूदा फ्या लजी। ओच्छे “प्रभु, ह्राङला सेम मुसम ह्राङसे ङादा खम्ना लखम्ला” भिसी भिजी। |
| 23417 | MAT 8:3 | जमाहेन्से येशूसे थेदा थुर्सी “ए खम्गै भिबा ङाला सेम मुला, ए खम्गो” भिसी सुङ्मैछ्याम थेला कोरे म्हाजी। |
| 23419 | MAT 8:5 | येशू कफर्नहुम शहररी फेप्खमा रोमी कप्तान गिक खसी, |
| 23420 | MAT 8:6 | “प्रभु, ङाला नोकर काङ या चलब आतना स्हु खसी थलारी मुला” भिसी बिन्ती लजी। |
| 23422 | MAT 8:8 | तर कप्तानसे येशूदा “प्रभु, ह्राङ ङाला दिमरी फेप्खबाधोनाला ङा आरे। थेतबासेलमा ह्राङसे चुग्यामसेन खम्गै भिसी सुङ्जे सुङ्सैनोन ङाला नोकर खम्ला। |
| 23423 | MAT 8:9 | तिग्दा भिसम ङाएनोन ङाला हाकिमला तहरी चिबा म्हि हिन्ना। ङाला तहरीनोन सिपाहीगदे मुला। ङाइ कोइदा निउ भिमा निमुला, कोइदा खउ भिमा खमुला। ओच्छे ङाला नोकरदा ङाइ चुह्रङ् लउ भिमा थेसे थेह्रङ्नोन लमुला” भिसी भिजी। |
| 23424 | MAT 8:10 | चु ताम थेःसी येशू उदेक तसी ह्राङदेन छ्याम भ्रबा म्हिगदेदा चुह्रङ् भिसी सुङ्जी, “च्यागो, एनीगदेसे ङाला ताम ङ्यान्गो, इस्राएल य्हुल्साला म्हिगदे न्हङरीनोन ङाइ चुह्रङ्बा घ्रेन विश्वास मुबा म्हि आस्याप्नी। |
| 23425 | MAT 8:11 | च्यागो, एनीगदेसे ङाला ताम ङ्यान्गो, स्यारदेन ल्हो जम्मान ग्लाग्याम अर्गु य्हुलला ल्हानान म्हिगदे खला। ओच्छे अब्राहाम, इसहाक, याकूबदेन छ्यामनोन स्वर्गला य्हुल्सारी भोज चबारी चिला। |
| 23427 | MAT 8:13 | जमाहेन्से येशूसे थे कप्तानदा “ए निउ, एसे विश्वास लबा ह्रङ्नोन तगै” भिसी सुङ्जी। चुह्रङ् सुङ्बा धुइरीन थे नोकर खम्जी। |
| 23429 | MAT 8:15 | चु म्राङ्सी येशूसे थेला यारी थुर्जी, ओच्छे थेला छवा म्हाजी। जमाहेन्से थे रेःसी येशूदा क्योङ्बारी छ्याइजी। |
| 23431 | MAT 8:17 | येशूसे चुह्रङ् लबासे लमा यशैया अगमवक्तासे पाङ्बा ताम पूरा तजी। यशैया अगमवक्तासे, “य्हाङसे नातोःबा दुख थेसेन नाजी ओच्छे य्हाङला आखम्बागदेएनोन खम्ना लजी” भिसी पाङ्बा मुबा। |
| 23433 | MAT 8:19 | थे धुइरी यहूदी धर्मगुरु गिक खसी येशूदा “गुरु, ह्राङ खानङदमान फेप्सै ङाएनोन ह्राङदेन छ्याम निला” भिसी भिजी। |
| 23434 | MAT 8:20 | जमाहेन्से येशूसे थेदा “च्यागो, ल्हुन्दीगदे चिबारी ऊ मुला, ओच्छे चरागदे चिबारीनोन जङ मुला। तर परमेश्वरसे पुइखबा म्हिला मी ब्लप्बा न्हबा ग्ला सुत्तै आरे” भिसी सुङ्जी। |
| 23435 | MAT 8:21 | स्य्हान्दो चेला गिकसे येशूदा “प्रभु, ङाच्छा ङाला सिबा आबादा ल्हुसी ह्राङदेन छ्याम भ्रला” भिसी भिमा, |
| 23436 | MAT 8:22 | येशूसे थेदा “सिबागदेदा सिबागदे ह्रङ्बासेन ल्हुगै, तर ए चा ङादेन छ्याम भ्रउ” भिसी सुङ्जी। |
| 23437 | MAT 8:23 | जमाहेन्से येशू दोँगारी क्रेःजी, ओच्छे थेला चेलागदेएनोन थेदेन छ्यामनोन निजी। |
| 23439 | MAT 8:25 | जमाहेन्से चेलागदे खसी “प्रभु, य्हाङ सिबारी छ्याइजी, जोगब लउ” भिसी येशूदा छिङ्जी। |
| 23440 | MAT 8:26 | जमाहेन्से येशूसे थेनीगदेदा “एनीगदे तिग्दा लोङ्बा? खाइ एनीगदेला विश्वास?” भिसी सुङ्जी। ओच्छे येशू रेःसी लाबालुङसरदेन समुन्द्रला छालदा बङ्जी। जमाहेन्से लाबालुङसर म्हासी शान्त तजी। |
| 23441 | MAT 8:27 | चुह्रङ् तबा म्राङ्सी थेनीगदे उदेक तजी। ओच्छे थेनीगदेसे “चु खाह्रङ्बा म्हि? चुसे कुल्बा ताम मी लाबालुङसरदेन समुन्द्रला छालसेनोन ङ्यान्बा चीम” भिसी ह्राङ ह्राङ न्हङरी ताम लजी। |
| 23443 | MAT 8:29 | थेनीगदेसे येशूदा म्राङ्सी क्रिङ्बान, “परमेश्वरला झा, ह्राङसे ङन्दा तिग लबारी म्हाइबा? ङन्ना धुइ आतमान ह्राङ ङन्दा नाश लबारी फेप्खबा हिन्ना?” भिसी भिजी। |
| 23449 | MAT 9:1 | जमाहेन्से येशू दोँगारी क्रेःसी क्यामसङपट्टि फेप्जी, ओच्छे ह्राङलान शहररी दोःसी फेप्खजी। |
| 23450 | MAT 9:2 | म्हिगदेसे काङ या चलब आतबा कुज्या तसी म्हेर्सी चिबा म्हि गिकदा येशू मुबा ग्लारी भजी। येशूसे थेनीगदेला विश्वास म्राङ्सी थे कुज्या म्हिदा “कोला, भङ लउ, ङाइ एला पाप माफ लबा मुला” भिसी सुङ्जी। |
| 23452 | MAT 9:4 | येशूसे थेनीगदेला सेमला ताम था याङ्सी “एनीगदेसे तिग्दा चुह्रङ्बा नइबा ताम म्हन्बा? |
| 23453 | MAT 9:5 | ‘एला पाप माफ तबा मुला’ भिबादेन ‘रेःसी भ्रउ’ भिबारी खजिबा चा सजिलो मुला? |
| 23454 | MAT 9:6 | तर परमेश्वरसे पुइखबा म्हिदा चु जम्बुलिङरी म्हिगदेला पापला दोष मेटब लबा अधिकार मुला भिसी ङाइ एनीगदेदा उन्ना” भिसी सुङ्जी। जमाहेन्से येशूसे थे कुज्या म्हिदा “ए रेःगो, ओच्छे एला तीबा नान्बा पुइसी दिमरी निउ” भिसी सुङ्जी। |
| 23457 | MAT 9:9 | येशू थेग्याम फेप्बान लबा धुइरी मत्ती भिबा म्हिदा तिरो दुइबा ग्लारी चिबान लबा म्राङ्जी, ओच्छे येशूसे थेदा “ङादेन छ्याम भ्रउ” भिसी सुङ्जी। जमाहेन्से थे रेःसी येशूदेन छ्याम भ्रजी। |
| 23459 | MAT 9:11 | चु म्राङ्सी फरिसीगदेसे येशूला चेलागदेदा “एनीगदेला गुरु तिग्दा तिरो दुइबा म्हिगदे ओच्छे पापीगदेदेन छ्याम चिसी चबा?” भिसी ङ्योइजी। |
| 23460 | MAT 9:12 | चु ताम थेःसी येशूसे “खम्बा म्हिगदेदा डाक्टर आतोः, तर आखम्बा म्हिगदेदा जे डाक्टर तोःला। |
| 23461 | MAT 9:13 | दाहेन्से एनीगदे निसी चु तामला अर्थ तिग हिन्ना घोबारी म्हाइगो, ‘च्यागो, ङाइ म्हाइबा चा बलिदान आहिन, तर एनीगदेसे स्य्हान्दोदा लबा दया हिन्ना।’ थेतबासेलमा परमेश्वरला ङाच्छा ज्यबा मुबा म्हिगदेदा आहिन, तर पापीगदेदा ङ्योइबारी ङा खबा हिन्ना” भिसी सुङ्जी। |
| 23462 | MAT 9:14 | जमाहेन्से यूहन्नाला चेलागदे येशू मुबा ग्लारी खसी “ङन्देन फरिसीगदे फोइथान चिसी प्रार्थना लमुला, तर ह्राङला चेलागदे चा तिग्दा फोइथान चिसी प्रार्थना आलबा?” भिसी ङ्योइजी। |
| 23463 | MAT 9:15 | येशूसे थेनीगदेदा चुह्रङ् भिसी सुङ्जी, “म्हाछार जन्तीगदेदेन छ्याम मुतेधोना थेरी मुबागदेसे सुर्दा आल। तर म्हाछार थेनीगदेग्याम फेसी भोर्माहेन्से जे थेनीगदे सुर्दा तसी फोइथान चिला। |
| 23464 | MAT 9:16 | खालैसे बोक्टो क्वानरी छार क्वानगेनसे आख्या, छार क्वानगेनसे बोक्टो क्वान ख्याजी भिसम बोक्टो क्वान झन ढेला। |
| 23465 | MAT 9:17 | ओच्छे खालै म्हिसेनोन ढिला बोक्टो ताङरी अङगुरला कलिलो निङगु आयु, चुदे युजी भिसम थे ताङ ढेसी अङगुरला निङगु ङेला। ओच्छे थे ताङएनोन गे आखेल्बा तला। तर अङगुरला कलिलो निङगु ढिला छार ताङरी युला ओच्छे न्हीनोन जोगब तला।” |
| 23466 | MAT 9:18 | येशूसे थेनीगदेदा चुह्रङ् सुङ्बान लबा धुइरी यहूदीगदे ह्रुप तबा दिमला नेता गिक खजी। ओच्छे येशूदा फ्या लसी “दान्दे भर्खर ङाला झामे सिजी, तर ह्राङ फेप्खसी थेदा ह्राङसे थुर्जी भिसम थे सोला” भिसी भिजी। |
| 23467 | MAT 9:19 | जमाहेन्से येशू स्हेङ्सी थे म्हिदेन छ्याम फेप्जी, ओच्छे येशूला चेलागदेएनोन येशूदेन छ्यामनोन निजी। |
| 23470 | MAT 9:22 | फ्लिक दोःसी च्यामा येशूसे थे म्रिङम्हेमेदा म्राङ्जी। ओच्छे येशूसे थेदा “भङ लउ, माइ! एला विश्वाससे लमा ए खम्बा मुला” भिसी सुङ्मैछ्याम थे म्रिङम्हेमे खम्जी। |
| 23472 | MAT 9:24 | चु म्राङ्सी येशूसे जम्मादान “एनीगदे जम्मान मङग्यार थोन्गो। तिग्दा भिसम माइ सिबा आरे, तर म्हेर्सी चिबा मुला” भिसी सुङ्जी। चु ताम थेःसी थेरी मुबा म्हिगदेसे खिसी लसी ङेःजी। |
| 23475 | MAT 9:27 | येशू थेग्याम फेप्बान लबा धुइरी मी आम्राङ्बा म्हि न्हीसे “दाऊद ग्लेला सन्तान, ङन्दा दया लउ” भिसी क्रिङ्बान येशूला लिच्छा लिच्छा खजी। |
| 23476 | MAT 9:28 | येशू दिम न्हङरी वाङ्माहेन्से थे मी आम्राङ्बा म्हि न्हीएनोन येशू मुबा ग्लारी खजी। जमाहेन्से येशूसे थेन्नीदा “ङाइ खम्ना लबारी खम्ला भिसी एनीगदेदा विश्वास मुला?” भिसी ङ्योइमा थेन्नीसे “मुला, प्रभु” भिसी भिजी। |
| 23478 | MAT 9:30 | येशूसे चुह्रङ् सुङ्मैछ्याम थेन्नीसे म्राङ्जी। जमाहेन्से येशूसे थेन्नीदा “च्यागो, चु ताम खालैदान थापाङ्गो” भिसी सुङ्जी। |
| 23484 | MAT 9:36 | म्हिला हुल म्राङ्सी येशूदा ल्हानान दया रेःजी, तिग्दा भिसम थेनीगदे खालैसे आच्याना दुख याङ्बा गोठालो आरेबा ग्युगदे ह्रङ्बान मुबा। |
| 23485 | MAT 9:37 | जमाहेन्से येशूसे ह्राङला चेलागदेदा “च्यागो, बाली मी ल्हानान मिन्बा मुला, तर बाली दुइबा म्हिगदे ल्हाना आरे। |
| 23488 | MAT 10:2 | येशूला मुल चेलागदे चुनोन हिन्ना, जम्मान भन्दा ङाच्छा पत्रुस भिबा सिमोनदेन थेला आले अन्द्रियास, जब्दियाला झा याकूबदेन याकूबला आले यूहन्ना, |
| 23489 | MAT 10:3 | ओच्छे फिलिपदेन बारथोलोमाइ, थोमादेन तिरो दुइबा मत्ती, अल्फयसला झा याकूबदेन थेदियस, |
| 23490 | MAT 10:4 | ओच्छे सिमोन चु सिमोनदा ह्राङला य्हुल्सादा माया लसी ह्राङला य्हुल्साला लागिरी ज्याननोन पिन्खम्बा म्हि भिसी भिमुबा। ओच्छे यहूदा इस्करियोत, चुनोन यहूदा इस्करियोतसे लिच्छा येशूदा चुङ्सी म्हिगदेला यारी जिम्मा पिन्जी। |
| 23491 | MAT 10:5 | येशूसे ह्राङला च्युक न्ही मुल चेलागदेदा चुह्रङ् भिसी कुल्सी पुइजी, “एनीगदे अर्गु य्हुलला म्हिगदेदेन सामरीगदेला शहररी थानिउ। |
| 23501 | MAT 10:15 | च्यागो, एनीगदेसे ङाला ताम ङ्यान्गो, परमेश्वरसे निसाफ लबा धिनकुनु थे शहरला म्हिगदेला गति भन्दा मी सदोमदेन गमोरा शहरला म्हिगदेला गति नाखम्बा तला। |
| 23502 | MAT 10:16 | “च्यागो, ङाइ एनीगदेदा फार्बागदेला गुङरी ग्युदा पुइबा ह्रङ् लसी पुइला। थेतबासेलमा एनीगदे पुख्री ह्रङ्बा चलाक ओच्छे ढुकुर ह्रङ् सोजो तसी भ्रउ। |
| 23503 | MAT 10:17 | तर एनीगदे म्हिगदे म्राङ्सी होशियार तउ, तिग्दा भिसम थेनीगदेसे एनीगदेदा चुङ्सी अदालतरी भोर्ला। ओच्छे यहूदीगदे ह्रुप तबा दिमरी भोर्सी एनीगदेदा कोर्रासे तोबा ग्याङ्बा लला। |
| 23506 | MAT 10:20 | तिग्दा भिसम थे धुइरी एनीगदेसे पाङ्बा आहिन, तर परमेश्वर आबाला आत्मासेन एनीगदेग्याम पाङ्ला। |
| 23507 | MAT 10:21 | “ह्राङलान ज्योज्यो आलेसे ह्राङलान ज्योज्यो आलेदा साइपुङ्ला। थेह्रङ् लसीन आबासे कोलागदेदा साइपुङ्ला, ओच्छे कोलागदेसे आबा आमाला बिरोध लसी साइपुङ्ला। |
| 23509 | MAT 10:23 | म्हिगदेसे एनीगदेदा नाम्सा गिकरी दुख पिन्जी भिसम एनीगदे अर्गु नाम्सारी यार्गो। च्यागो, एनीगदेसे ङाला ताम ङ्यान्गो, परमेश्वरसे पुइखबा म्हि खबा भन्दा ङाच्छा एनीगदे इस्राएलला जम्मान नाम्सारी धोआखम। |
| 23510 | MAT 10:24 | “च्यागो, गुरु भन्दा चेला घ्रेन आत, ओच्छे मालिक भन्दा नोकरएनोन घ्रेन आत। |
| 23511 | MAT 10:25 | चेला ह्राङला गुरु ह्रङ्बा दोबादेन नोकर ह्राङला मालिक ह्रङ्बा दोबान ठीक मुला। तिग्दा भिसम थेनीगदेसे ङा दिमला मुल म्हिदाम म्हङला ग्ले बालजिबुल भिला भिसम झन ङाला म्हेमेगदेदा मी तिग भिला? |
| 23512 | MAT 10:26 | “थेतबासेलमा थेह्रङ्बा म्हिगदेदेन छ्याम थालोङ्गो। तिग्दा भिसम घप्सी आम्राङ्बा स्हे तिगै आरे, ओच्छे छुम्सी था आयाङ्बा स्हे तिगै आरे। |
| 23513 | MAT 10:27 | जुन ताम ङाइ एनीगदेदा धोपधोपरी पाङ्बा मुला, थे ताम एनीगदेसे य्हालरी पाङ्गो, ओच्छे जुन ताम एनीगदेसे थेःला, थे ताम एनीगदेसे दिमला धुरीग्याम थेःना लउ। |
| 23518 | MAT 10:32 | “थेतबासेलमा जुन म्हिसे ङादा म्हिला ओन्छाङरी सेमहेन्से प्रभु भिसी पाङ्ला, ङाएनोन स्वर्गरी धन्छ्याबा आबाला ङाच्छा थेदा ङाला म्हि भिसी भिला। |
| 23519 | MAT 10:33 | तर जुन म्हिसे म्हिगदेला ओन्छाङरी ङादा ङाइ थेदा ङोसेबा आरे भिसी भिला, ङाइएनोन थेदा स्वर्गरी धन्छ्याबा ङाला आबाला ङाच्छा ङोसेबा आरे भिसी भिला। |
| 23520 | MAT 10:34 | “ङा जम्बुलिङरी म्हिगदेदा ढिक्ना लबारी खबा हिन्ना भिसी थाम्हन्गो। तिग्दा भिसम ङा म्हिगदेदा ढिक्ना लबारी आहिन, तर थेनीगदे न्हङरी छेना लबारी खबा हिन्ना। |
| 23521 | MAT 10:35 | तिग्दा भिसम ‘ङा आबाला बिरोधरी झा, आमाला बिरोधरी झामे ओच्छे स्युमीला बिरोधरी चाङ रेःना लबारी खबा हिन्ना। |
| 23523 | MAT 10:37 | “जुन म्हिसे ङादा भन्दा ह्राङला आबा आमादेन कोलागदेदा माया लला, थे म्हि ङाला चेला दोबारी आखम। |
| 23524 | MAT 10:38 | ओच्छे जुन म्हिसे आसितेधोना ह्राङला दुख ह्राङसेन नासी ङादेन छ्याम आभ्र, थे म्हि ङाला चेला दोबाधोनाला आरे। |
| 23527 | MAT 10:41 | जुन म्हिसे अगमवक्तादा ‘अगमवक्ता’ भिसी मान लला, थेसेनोन अगमवक्तासे याङ्बा ह्रङ्बान इनाम याङ्ला। थेह्रङ् लसीन जुन म्हिसे परमेश्वरदा सेम निबा म्हिदा ‘परमेश्वरदा सेम निबा म्हि’ भिसी मान लला, थेसेनोन थे परमेश्वरदा सेम निबा म्हिसे याङ्बा ह्रङ्बान इनाम याङ्ला। |
| 23528 | MAT 10:42 | च्यागो, खालैसे चुगदे न्हङला गिकदा ङाला चेला भिसी सिम्बा क्युइ जे थुङ्बारी पिन्सैनोन थेसे याङ्तोःबा इनाम याङ्ला।” |
| 23530 | MAT 11:2 | थे धुइरी बप्तिस्मा पिन्बा यूहन्ना झ्याल्खानरी मुबा। थार्बा पिन्बा ख्रीष्टसे लबा गेला बारेरी थेःसी यूहन्नासे ह्राङला चेलागदेदा “ङन्से फेप्खला भिसी आश लसी चिबा थार्बा पिन्बा ग्ले ह्राङनोन हिन्ना कि स्य्हान्दो खालैदा भ्रान्तोःबा हिन्ना?” भिसी ङ्योइबारी थार्बा पिन्बा ख्रीष्ट मुबा ग्लारी पुइजी। |
| 23532 | MAT 11:4 | जमाहेन्से येशूसे थेनीगदेदा चुह्रङ् भिसी सुङ्जी, “एनीगदेसे थेःबादेन म्राङ्बा ताम निसी यूहन्नादा पाङ्सी पिन्गो। |
| 23533 | MAT 11:5 | मी आम्राङ्बागदेला मी म्राङ्ना लबा मुला, कुज्यादेन कोरे खबा म्हिगदेदा खम्ना लबा मुला, नाब्यङ आथेःबागदेदा थेःना लबा मुला, सिबागदेदा सोना लबा मुला, ओच्छे प्राङबोगदेदा परमेश्वरला य्हुल्साला समाचार थेःना लबान मुला। |
| 23534 | MAT 11:6 | जुन म्हिसे शङ्का आलना विश्वास लला, थे म्हिसे परमेश्वरग्याम मोलम याङ्ला।” |
| 23535 | MAT 11:7 | थेनीगदे निमाहेन्से येशूसे थेरी मुबा म्हिगदेदा यूहन्नाला बारेरी सुङ्बारी छ्याइजी, “एनीगदे तोङतोङबा ग्लारी तिग च्याबारी निबा मुबा? तिग लाबासे य्होङ्बा मा दोङ च्याबारी निबा हिन्ना? |
| 23536 | MAT 11:8 | ओच्छे एनीगदे तिग च्याबारी थोन्बा मुबा? ज्यबा ज्यबा क्वान क्वान्बा म्हिदा च्याबारी? च्यागो, ज्यबा ज्यबा क्वान क्वान्बा म्हिगदे मी ग्लेखाङरी जे चिमुला। |
| 23537 | MAT 11:9 | एनीगदे तिग च्याबारी निमुबा? तिग अगमवक्तादा च्याबारी निबा आहिन? हिन्ना, ङाइ पाङ्ला एनीगदेसे स्य्हान्दो अगमवक्तागदे भन्दा घ्रेन म्हि गिक म्राङ्बा मुला। |
| 23538 | MAT 11:10 | चुनोन यूहन्नाला बारेरी परमेश्वरला बचनरी चुह्रङ् भिसी भ्रिबा मुला, ‘च्यागो, ङाइ ङाला समाचार भोर्बा म्हिदा एला ङाच्छा ङाच्छा पुइला। थेसे एला लागिरी ग्याम स्होला।’ |
| 23539 | MAT 11:11 | “च्यागो, दान्देधोना बप्तिस्मा पिन्बा यूहन्ना भन्दा घ्रेन म्हि खालैनोन न्हबा आरे। तसैनोन जुन म्हि स्वर्गला य्हुल्सारी जम्मान भन्दा जजा मुला, थे बप्तिस्मा पिन्बा यूहन्ना भन्दा घ्रेन हिन्ना। |