| 23233 | MAT 1:20 | चु ताम म्हन्बान लमा योसेफ छुप निजी, जमाहेन्से म्हाङरी थे मुबा ग्लारी परमप्रभुला दूत खसी थेदा “दाऊद ग्लेला सन्तान योसेफ, ए मरियमदेन ब्याह लबारी थालोङ्गो। तिग्दा भिसम थे परमेश्वरला आत्माग्याम न्हसेला तबा हिन्ना। |
| 23236 | MAT 1:23 | “च्यागो, ब्याह आलबा म्रिङकोला गिक न्हसेला तला ओच्छे थेसे झा न्हला, थेला मिन इम्मानुएल भिसी थान्ना,” इम्मानुएल भिबा चा “परमेश्वर य्हाङदेन छ्याम” भिबा हिन्ना। |
| 23240 | MAT 2:2 | “यहूदीगदेला ग्ले दोसी न्हबा कोला खानङ मुला? तिग्दा भिसम ङन्से स्याररी थे न्हजी भिसी उन्बा सार म्राङ्जी। थेतबासेलमा ङनी थेदा झ्याल्बारी खबा हिन्ना” भिसी भिजी। |
| 23242 | MAT 2:4 | जमाहेन्से हेरोद ग्लेसे परमेश्वरला मन्दिररी पूजा लबा मुल म्हिगदेदेन यहूदी धर्मगुरुगदे जम्मादान ग्ला गिकरी ङ्योइसी “थार्बा पिन्बा ख्रीष्ट खानङ न्हला भिसी पाङ्बा मुला?” भिसी ङ्योइबा छार्बा लजी। |
| 23243 | MAT 2:5 | थेनीगदेसे हेरोद ग्लेदा “यहूदियाला बेथलेहेम भिबा नाम्सारी न्हला भिसी पाङ्बा मुला, तिग्दा भिसम अगमवक्तासे चुह्रङ् लसी भ्रिबा मुला, |
| 23246 | MAT 2:8 | जमाहेन्से थेसे थेनीगदेदा “निउ, ओच्छे थे कोलादा ज्यना लसी म्हाइगो। थेदा स्याप्मैछ्याम ङादा पाङ्गो, ङाएनोन थेदा झ्याल्बारी निला” भिसी बेथलेहेमरी पुइजी। |
| 23251 | MAT 2:13 | ज्योतिषीगदे निमाहेन्से, परमप्रभुला दूत गिक म्हाङरी योसेफ मुबा ग्लारी खजी, ओच्छे थेसे योसेफदा “योसेफ, ए रेःसी लैनु कोलादेन थेला आमादा भोर्सी मिश्र य्हुल्सारी निउ। ओच्छे ङाइ एदा दोःसी खउ भिसी आपाङ्तेधोना एनीगदे थेरीन चिउ। तिग्दा भिसम हेरोदसे लैनु कोलादा साइबारी म्हाइबा मुला” भिसी भिजी। |
| 23253 | MAT 2:15 | ओच्छे हेरोद आसितेधोना थेनीगदे थेरीन चिजी। चुह्रङ् लसी परमप्रभुसे अगमवक्ताग्याम “ङाइ ङाला झादा मिश्र य्हुल्साग्याम ङ्योइबा मुला” भिसी सुङ्बा बचन पूरा तबारी हिन्ना। |
| 23256 | MAT 2:18 | “रामा भिबा ग्लारी क्राबा क्रिङ्बा लबा थेःजी, राहेल ह्राङला कोलागदेला लागिरी क्राबान मुबा। थेदा जम्मासेन सम्झब लसैनोन क्राबा आख्लानी। तिग्दा भिसम थेला कोलागदे साइसी जिन्बा मुबा।” |
| 23258 | MAT 2:20 | “योसेफ, ए रेःसी लैनु कोलादेन थेला आमादा इस्राएल य्हुल्सारी भोर्सी निउ। तिग्दा भिसम लैनु कोलादा साइबारी म्हाइबा म्हिगदे जम्मान सिसी जिन्बा मुला” भिसी भिजी। |
| 23260 | MAT 2:22 | तर यहूदियारी हेरोदला झा अर्खिलाउस ग्ले दोबा मुला भिबा थेःसी थेनीगदे थेरी निबारी लोङ्जी। थेतबासेलमा दोःसी परमेश्वरसे थेदा म्हाङरी पाङ्बा अन्छार गालील अञ्चलला नासरत भिबा नाम्सारी निसी चिजी। चुह्रङ् लसी “थेदा नासरी भिला” भिसी अगमवक्तागदेग्याम पाङ्बा ताम पूरा तजी। |
| 23263 | MAT 3:2 | “ह्राङ ह्राङला पाप ख्लासी परमेश्वरपट्टि दोःगो, तिग्दा भिसम स्वर्गला य्हुल्सा खसी जिन्बा मुला।” |
| 23264 | MAT 3:3 | यशैया अगमवक्तासे चुनोन यूहन्नाला बारेरी चुह्रङ् भिसी पाङ्बा मुला, “तोङतोङबा ग्लारीक्यार परमप्रभुला ग्याम तयार लउ, ओच्छे ‘परमप्रभु भ्रबाला लागिरी थेला ग्याम सोजो स्होउ,’ भिसी म्हि गिक क्रिङ्बा मुला।” |
| 23268 | MAT 3:7 | तर फरिसीगदेदेन सदुकीगदे न्हङला ल्हानान म्हिगदे बप्तिस्मा किन्बारी खबान लबा म्राङ्सी थेसे थेनीगदेदा “पुख्रीला कोलागदे, एनीगदेदा परमेश्वरला बोमोग्याम स्योरम्याङ्ला भिसी खाल्से भिजी? |
| 23272 | MAT 3:11 | “ङाइ चा एनीगदेसे ह्राङ ह्राङला पाप ख्लासी परमेश्वरपट्टि दोःजी भिसी क्युइसे बप्तिस्मा पिन्ना। तर ङा भन्दा लिच्छा फेप्खबासे एनीगदेदा परमेश्वरला आत्मादेन मेसे बप्तिस्मा पिन्ना। थे ङा भन्दा शक्तिशाली मुला। ओच्छे ङा थेला लखम पुइबाधोनाला सुत्तै आरे। |
| 23275 | MAT 3:14 | तर यूहन्नासे थेदा “ङाइ चा ह्राङग्याम बप्तिस्मा किन्तोःबा मुला, तिग्दा ह्राङ चा ङा मुबा ग्लारी फेप्खबा?” भिसी रोकब लबारी म्हाइजी। |
| 23276 | MAT 3:15 | तर येशूसे थेदा “दान्देदा चुह्रङ्नोन तगै। तिग्दा भिसम परमेश्वरसे म्हन्बा ताम पूरा लबारी य्हाङसे चुह्रङ्नोन लतोःला” भिसी सुङ्जी। जमाहेन्से यूहन्नासे येशूदा बप्तिस्मा पिन्जी। |
| 23278 | MAT 3:17 | जमाहेन्से स्वर्गग्याम “चु ङाइ सेमहेन्सेन माया लबा ङाला झा हिन्ना, चुदा म्राङ्सी ङा ल्हानान ताङ्बा मुला” भिबा काइ खजी। |
| 23281 | MAT 4:3 | जमाहेन्से शैतान येशू मुबा ग्लारी खसी “ह्राङ परमेश्वरला झा हिन्सम चु युङबागदेदा गेङ दोगो भिसी सुङ्गो” भिसी भिजी। |
| 23282 | MAT 4:4 | तर येशूसे “गेङसे जे म्हि आसो, तर परमेश्वरला सुङग्याम थोन्बा जम्मान बचनसे सोबारी खम्ला भिसी परमेश्वरला बचनरी भ्रिबा मुला” भिसी सुङ्जी। |
| 23284 | MAT 4:6 | ओच्छे थेसे येशूदा “ह्राङ परमेश्वरला झा हिन्सम चुग्याम मार छ्योङ्गो। तिग्दा भिसम बचनरी चुह्रङ् भिसी भ्रिबा मुला, ‘परमेश्वरसे ह्राङदा चुङ्बाला लागिरी ह्राङला स्वर्गदूतगदेदा कुल्ला। ओच्छे एला काङ युङबारी थाठोक्गै भिसी एदा थेनीगदेसे या यारीन ताला’ भिसी भिजी।” |
| 23285 | MAT 4:7 | येशूसे थेदा “बचनरी चुह्रङ् लसी भ्रिबा मुला, ‘एसे ह्राङला परमप्रभु परमेश्वरला सेम च्याबा गे तिगै थालउ’” भिसी सुङ्जी। |
| 23287 | MAT 4:9 | ओच्छे “ह्राङसे ङादा फ्या लसी तेन्जी भिसम चु जम्मान य्हुल्सा ङाइ ह्राङदा पिन्ना” भिसी भिजी। |
| 23288 | MAT 4:10 | जमाहेन्से येशूसे थेदा “शैतान, ए चुग्याम तुरुन्तन निउ! तिग्दा भिसम बचनरी ‘एसे ह्राङला परमप्रभु परमेश्वरदा फ्या लउ, ओच्छे थेदा जे तेन्गो’ भिसी भ्रिबा मुला” भिसी सुङ्जी। |
| 23293 | MAT 4:15 | “जबूलूनदेन नप्तालीला जिल्लारी यर्दन क्याम्सङ, समुन्द्रला कुनीरी, यर्दन क्याम्सङ, गालीलरी चिबा अर्गु य्हुलला म्हिगदे |
| 23295 | MAT 4:17 | थे धुइहेन्से येशूसे “एनीगदेसे ह्राङ ह्राङला पाप ख्लासी परमेश्वरपट्टि दोःगो, तिग्दा भिसम स्वर्गला य्हुल्सा खसी जिन्बा मुला” भिसी म्हिगदेदा सुङ्बारी छ्याइजी। |
| 23297 | MAT 4:19 | येशूसे थेनीगदेदा “ङादेन छ्याम भ्रउ, दाहेन्से ङाइ एनीगदेदा तार्ङा चुङ्बा म्हि आहिन, तर म्हिगदेदा परमेश्वर मुबा ग्लारी भबा म्हि स्होला” भिसी सुङ्जी। |
| 23306 | MAT 5:3 | “परमेश्वरथोरी जे आश लबागदेसे परमेश्वरग्याम मोलम याङ्ला, तिग्दा भिसम स्वर्गला य्हुल्सा थेनीगदेलान हिन्ना। |
| 23314 | MAT 5:11 | “ङादा विश्वास लबासे लमा म्हिगदेसे एनीगदेदा खिसी लला, दुख पिन्ना, ओच्छे लुसीला ताम पाङ्सी एनीगदेला बिरोधरी जम्मान नइबा ताम लमैनोन एनीगदेसे परमेश्वरग्याम मोलम याङ्ला। |
| 23316 | MAT 5:13 | “एनीगदे जम्बुलिङला चजा ह्रङ्बान हिन्ना, तर चजाला ङम्बा स्हे म्हाजी भिसम दोःसी तिग्से ङम्ना लबा? गे आखेल्बासे लमा म्हिसे थेदा भ्याङ्ला, जमाहेन्से म्हिसे नाङ्सी भ्रला। |
| 23317 | MAT 5:14 | “गङरी मुबा शहरदा जम्मासेन म्राङ्बा ह्रङ् लसी एनीगदेएनोन जम्बुलिङला नाङसल तबासे लमा जम्मासेन म्राङ्ला। |
| 23320 | MAT 5:17 | “ङा परमेश्वरसे मोशादा पिन्बा ठिमदेन अगमवक्तागदेसे पाङ्बा ताम भ्याङ्बारी आहिन, तर थे पूरा लबारी खबा हिन्ना। |
| 23324 | MAT 5:21 | “‘एसे म्हि थासाइगो, जुन म्हिसे म्हि साइला थेसे सजाय याङ्ला’ भिसी परमेश्वरसे मोशादा पिन्बा ठिमरी भ्रिबा ताम एनीगदेसे थेःबा मुला। |
| 23326 | MAT 5:23 | “थेतबासेलमा परमेश्वरदा भेटी फुल्बा धुइरी एदेन छ्याम खालै म्हि बोमो खबा मुला भिबा ताम एसे ढन्जी भिसम, |
| 23328 | MAT 5:25 | “एदा मुद्दा युबा म्हिदेन छ्याम अदालतरी निबान लबा धुइरी ग्यामरीन ढिक्गो। आहिन्सम थेसे एदा न्यायाधीशला यारी जिम्मा पिन्ना, ओच्छे न्यायाधीशसे सिपाहीगदेला यारी जिम्मा पिन्ना। जमाहेन्से ए झ्याल्खानरी परब तला। |
| 23330 | MAT 5:27 | “परमेश्वरसे मोशादा पिन्बा ठिमरी चुह्रङ् भिसी भ्रिबा तामएनोन एनीगदेसे थेःबा मुला, ‘ए स्य्हान्दोला म्रिङदेन छ्याम ब्रेल्सी थाभ्रउ।’ |
| 23334 | MAT 5:31 | “परमेश्वरसे मोशादा पिन्बा ठिमरी चुह्रङ् भिसी भ्रिबा तामएनोन एनीगदेसे थेःबा मुला, ‘जुन म्हिसे म्रिङ ख्लाला थे म्हिसे छोडपत्रला कागज भ्रिसी पिन्गै।’ |
| 23336 | MAT 5:33 | “परमेश्वरसे मोशादा पिन्बा ठिमरी चुह्रङ् भिसी भ्रिबा तामएनोन एनीगदेसे थेःबा मुला, ‘एसे लुसीला ताम लसी घ्रान थाफागो, ओच्छे परमेश्वरदेन छ्याम लबा कबुल पूरा लउ।’ |
| 23341 | MAT 5:38 | “परमेश्वरसे मोशादा पिन्बा ठिमरी चुह्रङ् भिसी भ्रिबा तामएनोन एनीगदेसे थेःबा मुला, ‘मीला बदला मी, ओच्छे स्वाला बदला स्वा किन्गो।’ |
| 23346 | MAT 5:43 | “परमेश्वरसे मोशादा पिन्बा ठिमरी चुह्रङ् भिसी भ्रिबा तामएनोन एनीगदेसे थेःबा मुला, ‘एसे ह्राङला खिम्जेमदा माया लउ, ओच्छे शत्रुदा हेला लउ।’ |
| 23352 | MAT 6:1 | “एनीगदेसे लबा ज्यबा गेगदे म्हिगदेदा उन्बाला लागिरी भिसी थालउ। थेह्रङ् लजी भिसम स्वर्गरी धन्छ्याबा एनीगदेला परमेश्वर आबासे एनीगदेदा तिगै इनाम आपिन। थेतबासेलमा होशियार तसी चिउ। |
| 23353 | MAT 6:2 | “एनीगदेसे प्राङबोगदेदा पिन्बा धुइरी कप्टीगदेसे ह्रङ् लसी म्हिगदेदा थेःना लसी थाभ्रउ। तिग्दा भिसम थेनीगदे म्हिगदेसे मान लगै भिसी यहूदीगदे ह्रुप तबा दिमगदेदेन ग्यामरीक्यार निसी स्य्हान्दोदा थेःना लसी भ्रमुला। च्यागो, एनीगदेसे ङाला ताम ङ्यान्गो, थेनीगदेसे याङ्तोःबा इनाम याङ्सी जिन्बा मुला। |
| 23356 | MAT 6:5 | “थेतबासेलमा एसे प्रार्थना लबा धुइरी कप्टीगदेसे ह्रङ् लसी थालउ। तिग्दा भिसम थेह्रङ्बा म्हिगदेसे म्हिगदेदा उन्बाला लागिरी यहूदीगदे ह्रुप तबा दिमगदेदेन ग्यामला कुनीरीक्यार राप्सी प्रार्थना लबारी सेम लमुला। च्यागो, एनीगदेसे ङाला ताम ङ्यान्गो, थेह्रङ्बा म्हिगदेसे याङ्तोःबा इनाम याङ्सी जिन्बा मुला। |
| 23360 | MAT 6:9 | “तर एनीगदेसे चा चुह्रङ् लसी प्रार्थना लउ, ‘स्वर्गरी धन्छ्याबा ङन्ना परमेश्वर आबा, ह्राङदा जम्मासेन मान लगै। |
| 23365 | MAT 6:14 | “एनीगदेदा बिरोध लसी पाप लबागदेदा एनीगदेसे माफ लजी भिसम स्वर्गरी धन्छ्याबा परमेश्वर आबासेनोन एनीगदेदा माफ लला। |
| 23367 | MAT 6:16 | “एनीगदेसे फोइथान चिसी प्रार्थना लबा धुइरी कप्टी म्हिगदेसे ह्रङ् लसी ली धोपधोप लसी थाभ्रउ। तिग्दा भिसम थेनीगदेसे फोइथान चिसी प्रार्थना लबा म्हिगदेसे म्राङ्गै भिसी ली धोपधोप लसी भ्रमुला। थेतबासेलमा एनीगदेसे ङाला ताम ङ्यान्गो, थेनीगदेसे याङ्तोःबा इनाम याङ्सी जिन्बा मुला। |
| 23370 | MAT 6:19 | “ह्राङला लागिरी जम्बुलिङरी धन सम्पत्ति सोसी थाथान्गो, तिग्दा भिसम जम्बुलिङला धन सम्पत्तिगदे बुलुङदेन खियासे चला, ओच्छे दिम फोसी य्होगदेसे य्हो लसी भोर्ला। |
| 23373 | MAT 6:22 | “मी ल्हुइला लागिरी नाङसल ह्रङ्बान हिन्ना। थेतबासेलमा एला मी ज्यबा मुसम एसे ज्यना लसी म्राङ्ला, |
| 23375 | MAT 6:24 | “खालैसेनोन मालिक न्हीला गे लबारी आखम। तिग्दा भिसम थेसे गिकदा हेला लला, ओच्छे स्य्हान्दोदा माया लला। अथवा थेसे गिकसे भिबा ताम ङ्यान्ना, ओच्छे स्य्हान्दोदा वास्तान आल। थेह्रङ् लसीन एनीगदेसेनोन परमेश्वरदेन धन सम्पत्ति न्हीलान गे लबारी आखम। |
| 23376 | MAT 6:25 | “थेतबासेलमा एनीगदेसे ङाला ताम ङ्यान्गो, सोबाला लागिरी तिग चसे तिग थुङ्से ओच्छे तिग क्वान्से भिसी धन्दा सुर्दा थालउ। तिग्दा भिसम चबा थुङ्बादेन क्वान्बा भन्दा एनीगदेला प्राणदेन ल्हुइ घ्रेन आहिन? |
| 23379 | MAT 6:28 | “तिग्दा एनीगदेसे क्वान्ना लागिरी धन्दा सुर्दा लबा? ह्रिरी सार्बा म्हेन्दोदा च्यागो, थेसे गेएनोन आलमुला, क्वानएनोन आरामुला। तसैनोन थे खाह्रङ् लसी ल्हेमुला! |
| 23386 | MAT 7:1 | “स्य्हान्दोदा दोष लसी थाभ्रउ ओच्छे परमेश्वरसेनोन एनीगदेदा दोष आल। |
| 23388 | MAT 7:3 | “स्य्हान्दोला गोरी सेः भ्रबा म्राङ्बा म्हिसे ह्राङला गोरी मुइ भ्रबा तिग्दा आम्राङ्बा? |
| 23391 | MAT 7:6 | “परमेश्वरदा फुल्तोःबा स्हे नगीदा थापिन्गो, तिग्दा भिसम थेसे एदा ख्राप्बारी खला। ओच्छे ह्राङला मोती ढ्वला ङाच्छापट्टि थाभ्याङ्गो। तिग्दा भिसम थेसे मोती नाङ्सी भ्रला। |
| 23392 | MAT 7:7 | “एनीगदेसे ह्रीसम पिन्ना म्हाइसम स्याप्ला ओच्छे म्रापरी ढ्वक ढ्वक लसम एनीगदेला लागिरी म्राप ठोङ्सी पिन्ना। |
| 23394 | MAT 7:9 | “एनीगदे न्हङला खालैसे ह्राङला कोलासे गेङ ह्रीमा थेदा युङबा पिन्ना? |
| 23398 | MAT 7:13 | “एनीगदे साङरो म्रापग्याम वाङ्गो। तिग्दा भिसम घ्रेन म्रापग्याम वाङ्बारी सजिलो मी मुला तसैनोन थे म्रापग्याम नाश तबा ग्लारी धोमुला। चु म्रापग्याम वाङ्बा म्हिगदे चा ल्हानान मुला। |
| 23400 | MAT 7:15 | “फट्टा अगमवक्तागदे म्राङ्सी होशियार तसी चिउ, थेनीगदे एनीगदे मुबा ग्लारी ग्यु ह्रङ् लसी खमुला, तर थेनीगदेला सेम चा लोङ्बा खबा फार्बा ह्रङ्बान तमुला। |
| 23406 | MAT 7:21 | “ङादा ‘प्रभु, प्रभु’ जे भिबा म्हिगदे स्वर्गला य्हुल्सारी वाङ्बारी आम्याङ्। तर स्वर्गरी धन्छ्याबा ङाला आबासे कुल्बा ताम ङ्यान्बा म्हि जे वाङ्म्याङ्ला। |
| 23409 | MAT 7:24 | “थेतबासेलमा जुन म्हिसे ङाइ पाङ्बा ताम ङ्यान्सी थे अन्छार भ्रला, थे म्हि चा दिम स्होमा नुप्ना जग ख्वसी स्होबा बुद्धि मुबा म्हि ह्रङ्बान हिन्ना। |
| 23416 | MAT 8:2 | थेनोन धुइरी कोरे खबा म्हि गिक येशूला ङामरी खसी येशूदा फ्या लजी। ओच्छे “प्रभु, ह्राङला सेम मुसम ह्राङसे ङादा खम्ना लखम्ला” भिसी भिजी। |
| 23417 | MAT 8:3 | जमाहेन्से येशूसे थेदा थुर्सी “ए खम्गै भिबा ङाला सेम मुला, ए खम्गो” भिसी सुङ्मैछ्याम थेला कोरे म्हाजी। |
| 23418 | MAT 8:4 | ओच्छे येशूसे थेदा “एसे चु ताम खालैदा थापाङ्गो। बरु ए निसी परमेश्वरला मन्दिररी पूजा लबा म्हिदा उन्गो। ओच्छे मोशासे कुल्बा अन्छार बलि फुल्गो। थेह्रङ् लजी भिसम म्हिगदेसे ए खम्जी भिसी था याङ्ला” भिसी सुङ्जी। |
| 23420 | MAT 8:6 | “प्रभु, ङाला नोकर काङ या चलब आतना स्हु खसी थलारी मुला” भिसी बिन्ती लजी। |
| 23421 | MAT 8:7 | जमाहेन्से येशूसे कप्तानदा “ङा खसी थेदा खम्ना लला” भिसी सुङ्जी। |
| 23422 | MAT 8:8 | तर कप्तानसे येशूदा “प्रभु, ह्राङ ङाला दिमरी फेप्खबाधोनाला ङा आरे। थेतबासेलमा ह्राङसे चुग्यामसेन खम्गै भिसी सुङ्जे सुङ्सैनोन ङाला नोकर खम्ला। |
| 23424 | MAT 8:10 | चु ताम थेःसी येशू उदेक तसी ह्राङदेन छ्याम भ्रबा म्हिगदेदा चुह्रङ् भिसी सुङ्जी, “च्यागो, एनीगदेसे ङाला ताम ङ्यान्गो, इस्राएल य्हुल्साला म्हिगदे न्हङरीनोन ङाइ चुह्रङ्बा घ्रेन विश्वास मुबा म्हि आस्याप्नी। |
| 23427 | MAT 8:13 | जमाहेन्से येशूसे थे कप्तानदा “ए निउ, एसे विश्वास लबा ह्रङ्नोन तगै” भिसी सुङ्जी। चुह्रङ् सुङ्बा धुइरीन थे नोकर खम्जी। |
| 23431 | MAT 8:17 | येशूसे चुह्रङ् लबासे लमा यशैया अगमवक्तासे पाङ्बा ताम पूरा तजी। यशैया अगमवक्तासे, “य्हाङसे नातोःबा दुख थेसेन नाजी ओच्छे य्हाङला आखम्बागदेएनोन खम्ना लजी” भिसी पाङ्बा मुबा। |
| 23432 | MAT 8:18 | येशूसे ह्राङला क्युर्सीन ल्हानान म्हिगदे म्राङ्सी “य्हाङ समुन्द्रला क्याम्सङपट्टि निइ” भिसी सुङ्जी। |
| 23433 | MAT 8:19 | थे धुइरी यहूदी धर्मगुरु गिक खसी येशूदा “गुरु, ह्राङ खानङदमान फेप्सै ङाएनोन ह्राङदेन छ्याम निला” भिसी भिजी। |
| 23434 | MAT 8:20 | जमाहेन्से येशूसे थेदा “च्यागो, ल्हुन्दीगदे चिबारी ऊ मुला, ओच्छे चरागदे चिबारीनोन जङ मुला। तर परमेश्वरसे पुइखबा म्हिला मी ब्लप्बा न्हबा ग्ला सुत्तै आरे” भिसी सुङ्जी। |
| 23435 | MAT 8:21 | स्य्हान्दो चेला गिकसे येशूदा “प्रभु, ङाच्छा ङाला सिबा आबादा ल्हुसी ह्राङदेन छ्याम भ्रला” भिसी भिमा, |
| 23436 | MAT 8:22 | येशूसे थेदा “सिबागदेदा सिबागदे ह्रङ्बासेन ल्हुगै, तर ए चा ङादेन छ्याम भ्रउ” भिसी सुङ्जी। |
| 23439 | MAT 8:25 | जमाहेन्से चेलागदे खसी “प्रभु, य्हाङ सिबारी छ्याइजी, जोगब लउ” भिसी येशूदा छिङ्जी। |
| 23440 | MAT 8:26 | जमाहेन्से येशूसे थेनीगदेदा “एनीगदे तिग्दा लोङ्बा? खाइ एनीगदेला विश्वास?” भिसी सुङ्जी। ओच्छे येशू रेःसी लाबालुङसरदेन समुन्द्रला छालदा बङ्जी। जमाहेन्से लाबालुङसर म्हासी शान्त तजी। |
| 23441 | MAT 8:27 | चुह्रङ् तबा म्राङ्सी थेनीगदे उदेक तजी। ओच्छे थेनीगदेसे “चु खाह्रङ्बा म्हि? चुसे कुल्बा ताम मी लाबालुङसरदेन समुन्द्रला छालसेनोन ङ्यान्बा चीम” भिसी ह्राङ ह्राङ न्हङरी ताम लजी। |
| 23443 | MAT 8:29 | थेनीगदेसे येशूदा म्राङ्सी क्रिङ्बान, “परमेश्वरला झा, ह्राङसे ङन्दा तिग लबारी म्हाइबा? ङन्ना धुइ आतमान ह्राङ ङन्दा नाश लबारी फेप्खबा हिन्ना?” भिसी भिजी। |
| 23445 | MAT 8:31 | थेतबासेलमा म्हङगदेसे येशूदा “चुदे ह्राङसे ङन्दा चुरी चिआपुङ्बा हिन्सम ङन्दा ढ्वागदे न्हङरी वाङ्पुङ्गो” भिसी बिन्ती लजी। |
| 23446 | MAT 8:32 | जमाहेन्से येशूसे थेनीगदेदा “निउ” भिसी सुङ्माहेन्से थेनीगदे थोन्सी ढ्वागदे न्हङरी वाङ्जी। जमाहेन्से जम्मान ढ्वागदे गङग्याम समुन्द्ररी छ्योङ्सी सिजी। |
| 23448 | MAT 8:34 | जमाहेन्से नाम्साला मुबा जति जम्मान म्हिगदे येशूदा स्याप्बारी खजी। ओच्छे येशूदा म्राङ्सी थे म्हिगदेसे “चु ग्लाग्याम फेप्गो” भिसी बिन्ती लजी। |
| 23450 | MAT 9:2 | म्हिगदेसे काङ या चलब आतबा कुज्या तसी म्हेर्सी चिबा म्हि गिकदा येशू मुबा ग्लारी भजी। येशूसे थेनीगदेला विश्वास म्राङ्सी थे कुज्या म्हिदा “कोला, भङ लउ, ङाइ एला पाप माफ लबा मुला” भिसी सुङ्जी। |
| 23451 | MAT 9:3 | थेरी मुबा यहूदी धर्मगुरुगदे न्हङला कोइ कोइसे “चुसे मी ह्राङसे ह्राङदान परमेश्वर स्होसी ताम लबान मुला” भिसी ह्राङ ह्राङ न्हङरी ताम लजी। |
| 23452 | MAT 9:4 | येशूसे थेनीगदेला सेमला ताम था याङ्सी “एनीगदेसे तिग्दा चुह्रङ्बा नइबा ताम म्हन्बा? |
| 23454 | MAT 9:6 | तर परमेश्वरसे पुइखबा म्हिदा चु जम्बुलिङरी म्हिगदेला पापला दोष मेटब लबा अधिकार मुला भिसी ङाइ एनीगदेदा उन्ना” भिसी सुङ्जी। जमाहेन्से येशूसे थे कुज्या म्हिदा “ए रेःगो, ओच्छे एला तीबा नान्बा पुइसी दिमरी निउ” भिसी सुङ्जी। |
| 23457 | MAT 9:9 | येशू थेग्याम फेप्बान लबा धुइरी मत्ती भिबा म्हिदा तिरो दुइबा ग्लारी चिबान लबा म्राङ्जी, ओच्छे येशूसे थेदा “ङादेन छ्याम भ्रउ” भिसी सुङ्जी। जमाहेन्से थे रेःसी येशूदेन छ्याम भ्रजी। |
| 23459 | MAT 9:11 | चु म्राङ्सी फरिसीगदेसे येशूला चेलागदेदा “एनीगदेला गुरु तिग्दा तिरो दुइबा म्हिगदे ओच्छे पापीगदेदेन छ्याम चिसी चबा?” भिसी ङ्योइजी। |
| 23460 | MAT 9:12 | चु ताम थेःसी येशूसे “खम्बा म्हिगदेदा डाक्टर आतोः, तर आखम्बा म्हिगदेदा जे डाक्टर तोःला। |
| 23462 | MAT 9:14 | जमाहेन्से यूहन्नाला चेलागदे येशू मुबा ग्लारी खसी “ङन्देन फरिसीगदे फोइथान चिसी प्रार्थना लमुला, तर ह्राङला चेलागदे चा तिग्दा फोइथान चिसी प्रार्थना आलबा?” भिसी ङ्योइजी। |
| 23463 | MAT 9:15 | येशूसे थेनीगदेदा चुह्रङ् भिसी सुङ्जी, “म्हाछार जन्तीगदेदेन छ्याम मुतेधोना थेरी मुबागदेसे सुर्दा आल। तर म्हाछार थेनीगदेग्याम फेसी भोर्माहेन्से जे थेनीगदे सुर्दा तसी फोइथान चिला। |
| 23466 | MAT 9:18 | येशूसे थेनीगदेदा चुह्रङ् सुङ्बान लबा धुइरी यहूदीगदे ह्रुप तबा दिमला नेता गिक खजी। ओच्छे येशूदा फ्या लसी “दान्दे भर्खर ङाला झामे सिजी, तर ह्राङ फेप्खसी थेदा ह्राङसे थुर्जी भिसम थे सोला” भिसी भिजी। |
| 23469 | MAT 9:21 | तिग्दा भिसम “ङाइ येशूला क्वान थुर्बारी जे म्याङ्सम ङा खम्ला” भिसी थेसे सेम सेमरी म्हन्बा मुबा। |
| 23470 | MAT 9:22 | फ्लिक दोःसी च्यामा येशूसे थे म्रिङम्हेमेदा म्राङ्जी। ओच्छे येशूसे थेदा “भङ लउ, माइ! एला विश्वाससे लमा ए खम्बा मुला” भिसी सुङ्मैछ्याम थे म्रिङम्हेमे खम्जी। |
| 23472 | MAT 9:24 | चु म्राङ्सी येशूसे जम्मादान “एनीगदे जम्मान मङग्यार थोन्गो। तिग्दा भिसम माइ सिबा आरे, तर म्हेर्सी चिबा मुला” भिसी सुङ्जी। चु ताम थेःसी थेरी मुबा म्हिगदेसे खिसी लसी ङेःजी। |
| 23475 | MAT 9:27 | येशू थेग्याम फेप्बान लबा धुइरी मी आम्राङ्बा म्हि न्हीसे “दाऊद ग्लेला सन्तान, ङन्दा दया लउ” भिसी क्रिङ्बान येशूला लिच्छा लिच्छा खजी। |
| 23476 | MAT 9:28 | येशू दिम न्हङरी वाङ्माहेन्से थे मी आम्राङ्बा म्हि न्हीएनोन येशू मुबा ग्लारी खजी। जमाहेन्से येशूसे थेन्नीदा “ङाइ खम्ना लबारी खम्ला भिसी एनीगदेदा विश्वास मुला?” भिसी ङ्योइमा थेन्नीसे “मुला, प्रभु” भिसी भिजी। |
| 23477 | MAT 9:29 | जमाहेन्से येशूसे थेन्नीला मीरी थुर्सी “एनीगदेसे विश्वास लबासे लमा एनीगदे खम्बा मुला” भिसी सुङ्जी। |
| 23478 | MAT 9:30 | येशूसे चुह्रङ् सुङ्मैछ्याम थेन्नीसे म्राङ्जी। जमाहेन्से येशूसे थेन्नीदा “च्यागो, चु ताम खालैदान थापाङ्गो” भिसी सुङ्जी। |
| 23481 | MAT 9:33 | येशूसे म्हङदा ताप्मैछ्याम थे ताइ दोबा म्हिसे ताम पाङ्बारी छ्याइजी। चु म्राङ्सी थेरी मुबा म्हिगदे उदेक तसी “चुह्रङ्बाम ङन्से इस्राएल य्हुल्साला म्हिगदे न्हङरी खाइमै म्राङ्बा आरेबा” भिसी भिजी। |
| 23482 | MAT 9:34 | तर फरिसीगदेसे चा “चु म्हिसे मी म्हङगदेला ग्लेला शक्तिग्याम म्हङ ताप्बा हिन्ना” भिसी भिबारी छ्याइजी। |