3	GEN 1:3	Ghoro Maaron isaav ighaze: “Ghazooŋa ivot.” Tovenen ghazooŋa ivot.
7	GEN 1:7	Tovenen mbeb tonenen ivot itaghon ye tau aliŋa.
9	GEN 1:9	Maaron isaav muul ighaze: “Ya to ineep ila sambam paroŋania, ila ilup ila dige ee moghon, ve ndug imamaas.” Tovenen mbeb tonenen ivot itaghon ye tau aliŋa.
12	GEN 1:12	Tovenen mbeb tonowen titub tiza, itaghon ye tau aliŋa. Ve Maaron ighita poia.
14	GEN 1:14	Maaron isaav muul ighaze: “Mbeb pida tivot ila sambam paroŋania. Leso tisul taan, ve tivalag ndag ve mboŋ, ve tinim ghilalooŋ pa kaiyo, ndaman, ve sawa pida paam.” Tovenen mbeb naol tonowen tivot titaghon ye tau aliŋa.
20	GEN 1:20	Maaron isaav muul ighaze: “Te ivon pa iigh toman mbeb naol naol to matadi iyaryaar. Ve man naol tivot ve tiroov ila tata paroŋania.”
21	GEN 1:21	Tovenen Maaron ighur mbeb tintina to te, toman mbeb naol naol to tineep ila te ve ya lolodi. Ve ighur man to naol ne paam. Ve Maaron ighita poia.
24	GEN 1:24	Maaron isaav muul ighaze: “Taan ivon pa ŋgai naol naol to su ve paanu, toman mbeb gegegeu to tindandarab ila taan.” Tovenen mbeb naol tonowen tivot titaghon ye tau aliŋa.
27	GEN 1:27	Tovenen Maaron ighur tamtoghon tinimale ye tau. Ighur di tigham ye tau nagho. Ighur nditamoot ve ndiliva.
34	GEN 2:3	Tauto Maaron ipait sawa to inim liim ve ru pani, ve ighur poia toni ineep izala, ve ighuri inim umbom patabuaŋ. Pasa, sawa tonenen, ye ate izi pa uraat toni to ighur sambam, taan, ve mbeb tisob.
39	GEN 2:8	Taan suruvu eez to ineep ila pa ndag iza, iza Eden. Maaron Yoova ighur mbeb popoiadi titub ila uum tonowen lolo le paghuna kat. Ghoro ighur tamtoghon to ye tau igharaata ila ineep tonowe.
42	GEN 2:11	Boga eez, iza Pison. Nene ireer irau taan Avila isob. Taan Avila, gol popoia toman yaam popoia pida to tinim mbaliiŋ, tineep ila taan lolo.
45	GEN 2:14	Ve boga ite inim tol, iza Tigris. Nene ireer ila pa taan Asiria dige to ila pa ndag iza. Ve boga to inim paaŋ, iza Euprates.
49	GEN 2:18	Ghoro Maaron Yoova mata iŋgal ighaze: “Tamtoghon tonene eŋgeni ineep, nene poia maau. You irau naghur le ita ite eta pa iuuli.”
50	GEN 2:19	Tovenen Maaron Yoova ikor taan ila nima, ipoli, ve igharaat ŋgai naol naol to tilaghlaagh ila taan, ve man to tirovroov ila tata paroŋania. Le isob, ghoro ilup di ve igham di tila to tamtoghon tonenen, leso ighita: Pale iwaat izadi vena? Ve izadi to ye iwaat di, nene tinim mbeb tonowen izadi.
52	GEN 2:21	Tovenen Maaron Yoova igham tamoot igheenmaat, ve ipas raŋoraŋo eez ivot, ve ipoona muul pa minda.
54	GEN 2:23	Tamoot ighita liva tonowen, ve isaav ighaze: “Aa ghara leg itag ite! Tua, nene you tuag. Ve minda, nene you mindag. You pale nawaata naghaze ‘liva.’ Pasa, ye ivot ila to you tamoot.”
62	GEN 3:6	Liva ighita ai anoŋa tonowen paghuna kat pa mata ve poia pa ghaniiŋ paam. Ye lolo pani kat pasa, ighaze ai anoŋa tonenen pale igham ŋgar toni ighazooŋ. Tovenen ighami ve ighani, ve igham pida pa azuwa ve ana ighan paam.
63	GEN 3:7	Yesuru tighani le isob, ghoro matadi pakia ve tighilaal tighaze tinidi ŋginiŋa. Tovenen yesuru tila tigham ai raua ve tidagini, ve tipoon di pani.
64	GEN 3:8	Rabrab izi ve ndug iluum, ghoro yesuru tilooŋ Maaron Yoova ilaghlaagh ila uum lolo. Tovenen tila tiyooŋ pani ila ai lolo.
66	GEN 3:10	Tamoot ipamuul aliŋa ighaze: “You nalooŋ aghem avolutu ila uum lolo, tovenen namatughez payom ve nayooŋ. Pasa, tinig ŋginiŋa.”
67	GEN 3:11	Tovenen Maaron ighasoni ighaze: “Sei isaav payom ighaze tinim ŋginiŋa? Ai to you naŋgalsekin ghom pani, yom avaat ughan anoŋa eta wa.”
68	GEN 3:12	Tamoot ipamuul Maaron aliŋa ighaze: “You maau. Liva to yom ugham payou ughaze yeru nineep, tauto igham ai tonowen anoŋa pida payou ve naghani.”
69	GEN 3:13	Tovenen Maaron Yoova isaav pa liva ana ighaze: “Yom ugham ŋgar tonene pasa?” Liva ipamuul Maaron aliŋa ighaze: “You maau. Moot itombaan ghou, tauto naghani.”
70	GEN 3:14	Tovenen Maaron Yoova isaav pa moot ighaze: “Yom to unum pughu pa sosor tonene. Tauto pataŋani tiina kat pale iza tiom ilib pa ŋgai tisob to paanu ve su. Yom pale undarab ila atem, ve ughan ghavuur to taan ila ila le irau mateeŋ tiom.
73	GEN 3:17	Ghoro Maaron isaav pa tamoot ighaze: “Yom ulooŋ azuwam aliŋa, ve ughan ai anoŋa to you naŋgalsekin ghom pani. Tovenen you pale nawaghamun taan. Nepooŋam izi taan, yom pale ugham uraat tiina, ve uyamaan katin pataŋani, ghoro ughita anoŋa.
75	GEN 3:19	Tovenen yom pale urab taum pa uraat le ughun wadedeŋam, ghoro ughita uraat tiom anoŋa ve ughan. Ve pataŋani tovene pale ikiskis ghom le irau mateeŋ tiom. Pasa, you nagharaat ghom pa taan. Tovenen yom pale umuul ula unum taan.”
76	GEN 3:20	Tamoot iwaat azuwa iza Eva. Pasa, ye pale inim ival tisob to tineep izi taan ne tinandi.
78	GEN 3:22	Ghoro Maaron Yoova isaav ighaze: “Laak. Tamtoghon ŋgar todi ivot inimale iit, ve tighilaal ŋgar poia ve ŋgar samia wa. [Tovenen iit irau tapul di tineep uum tonene muul maau.] Pasa, ighaze nimadi ila pa ai to igham di tineep matadi iyaryaar ne anoŋa ve tighani paam, nene pale tineep tovene itaghoni taghoni gha ila.”
79	GEN 3:23	Tovenen Maaron Yoova indiir di pa uum Eden. Leso tila tigham uraat pa taan to yesuru tivot pani.
82	GEN 4:2	Tinepneep le muri ghoro, Eva ipoop Kain tazi Abel. Yesuru tinim ndolman, ghoro Abel iŋginŋgin sipsip, ve Kain ighamgham uraat pa uum.
85	GEN 4:5	Eemoghon Kain toman watooŋrau toni, Yoova irere pani. Tauto Kain ate yabyab kat le nagho isami.
86	GEN 4:6	Tovenen Yoova ighason Kain ighaze: “Pughu vena to atem yabyab ve naghom isami?
87	GEN 4:7	Ighaze yom ugham ŋgar deŋia, pale lolog poia payom ve tinim iza. Eemoghon ighaze ugham ŋgar to deŋia maau, yom upatum ghom. Pasa, ŋgar samia inepneep ataam tiom avo, ve isasaŋan ghom ighaze igham ghom unum le. Tovenen yom irau uyoon ariaŋa ve utatan ŋgar samia tonanan izi.”
89	GEN 4:9	Tovenen Yoova ighason Kain ighaze: “Kain, tazim Abel ineep sine?” Kain ipamuul aliŋa ighaze: “You nakankaan pani. Vena, you nanim ŋginiiŋ to tazig?”
90	GEN 4:10	Ghoro Yoova isaav pani muul ighaze: “Yom ugham ŋgar tovene pasa? Ulooŋ. Tazim siŋ toni to imaliŋ izi taan, tauto imboboob iza inim tiou.
91	GEN 4:11	Yom urab tazim imaat, ve taan tonene ighun siŋ toni wa. Tovenen you pale naghur pataŋani tonene iŋarua ghom: Yom irau uneep muul izi taan tonene maau.
96	GEN 4:16	Kain ipul Yoova, ve ilaagh ila ivot taan suruvu eez, iza Nod, ve ineep tonowe. Taan tonowen ineep uum Eden dige ila pa ndag iza.
102	GEN 4:22	Lamek azuwa ite Zila ipoop Tuval-Kain. Tuval-Kain papaghu toni, to tighagharaat ain ve baras tinim mbeb pida to uraat. Tuval-Kain livu iza Naama.
111	GEN 5:5	Tovenen Adam ineep irau ndaman 930, ghoro imaat.
114	GEN 5:8	Tovenen Set ineep irau ndaman 912, ghoro imaat.
117	GEN 5:11	Tovenen Enos ineep irau ndaman 905, ghoro imaat.
120	GEN 5:14	Tovenen Kenan ineep irau ndaman 910, ghoro imaat.
123	GEN 5:17	Tovenen Malalel ineep irau ndaman 895, ghoro imaat.
126	GEN 5:20	Tovenen Yared ineep irau ndaman 962, ghoro imaat.
128	GEN 5:22	Metusela izi, ve Enok ineep muul irau ndaman 300, ve tipoop ndinatudi nditamoot ve ndiliva pida. Enok nepooŋ toman laghooŋ toni, ye mata iŋgalŋgal Maaron ve itaghon ataam toni irau sawa isob. Tovenen ineep irau ndaman 365, ghoro Maaron ighami izala, ve tighita muul maau.
133	GEN 5:27	Tovenen Metusela ineep irau ndaman 969, ghoro imaat.
135	GEN 5:29	Lamek ighaze: “Maaron iwaghamun taan, tauto nigham uraat tiina kat pa nikaal amai aniiŋ. Eemoghon natumai tonene pale igham ulaaŋ ivot payei pa uraat pataŋani to nighamghami pa nimamai.” Tauto iwaat natu tonowen iza Noa.
137	GEN 5:31	Tovenen Lamek ineep irau ndaman 777, ghoro imaat.
139	GEN 6:1	Sawa to tamtoghon timasa tinim naol izi taan, Maaron ndinatu tighita tamtoghon ndinatudi liva paghunadi kat. Tovenen tigham di irau taudi lolodi, ve tivai di.
141	GEN 6:3	Yoova ighita mbeb tonenen, ve isaav ighaze: “Tamtoghon, nene yes taan sorok. Avuvug irau ineep toman di ve tineep matadi iyaryaar le alok ne maau. Pale tineep irau ndaman tamoot liim tamoot eez (120) moghon, ve sawa todi isob ve timaat.”
144	GEN 6:6	Tovenen lolo ipataŋan kat pa tamtoghon to ye tau ighur di tizi taan, ve ikausim muul pa tau ighaze: “Wais, nagharaat di pasa? Nagharaat di maau, tone poia.
145	GEN 6:7	Tambaŋa. You pale napasob tamtoghon le tisob pa taan. Ve yes moghon maau. Ŋgai, man, ve mbeb to tindandarab izi taan ne paam, you pale napasob di pa taan ve tisob tilaledi. Onoon, you taug nagharaat di. Eemoghon tighamgham ŋgar samsamia naol. Tauto tigham ghou tinig imum padi kat.”
149	GEN 6:11	Sawa tonenen, Maaron ighita ŋgar samsamia naol tivotvot irau taan isob. Ve ŋgar to ghamuuŋ malmal paam, ivot tiina le irau ndug tisob. Tovenen ye ighita taan isami kat. Pasa, tamtoghon tisob tiwaghamun nepooŋ todi izi taan.
151	GEN 6:13	Tovenen Maaron isaav pa Noa ighaze: “Ulooŋ. You naghita tamtoghon tighamgham malmal irau taan isob. Tauto matag iŋgal naghaze napasob tamtoghon pa taan. You pale nawaghamun di toman taan ve mbeb naol to tineep izi taan le tisob tilaledi.
152	GEN 6:14	Tovenen yom irau ughuz lem waaŋ eta. Ughita ai ariaŋadi, ve usap di, leso ughuz waaŋ pani. Urab motmotin waaŋ lolo inim naol. Ve uŋgal ndimir ila waaŋ lolo ve pumuri paam. Leso te ilooŋ ila sob.
156	GEN 6:18	Eemoghon you pale nambua saveeŋ ariaŋa toman ghom, leso talup ghiit tanim ee moghon. Tovenen yom irau ugham azuwam, ndinatum tol toman ndizwadi ve yamŋa alooŋ ala waaŋ lolo.
161	GEN 7:1	Muri ghoro, Yoova isaav pa Noa ighaze: “You naghita tamtoghon to tineep pa sawa tonene, yom eŋgengom to utaghon ŋgar deŋia ila matag. Tovenen umundig, ugham azuwam toman ndinatum tol ve ndizwadi, ve yamŋa alooŋ ala waaŋ lolo.
167	GEN 7:7	Tovenen Noa yesuru azuwa, ndinatu, ve ndirawa liva tisob tilooŋ tila waaŋ lolo. Leso yawaaŋa iwaghamun di sob, ve tineep pooi.
170	GEN 7:10	Tilooŋ tila waaŋ lolo, ve tineep mboŋ liim ve ru le isob, ghoro ya ivon toman yawaaŋa tiina, le itatab taan isob.
171	GEN 7:11	Tovenen indeeŋ Noa ndaman toni irau 600, kaiyo inim ru pani, ve mboŋ inim saaŋgul liim ve ru pani, ghoro taan avo ikaak, ve ya tiina to ineep taan lolo, bokia iza toman tapiri tiina. Ve tata tovene paam. Avo ikaak, ve ya to ineep sala, imaliŋ izi toman tapiri tiina.
172	GEN 7:12	Tovenen uman tiina kat izi taan le irau ndag tamoot ru ve mboŋ tamoot ru.
175	GEN 7:15	Tovenen mbeb tisob to matadi iyaryaar, ruŋaruŋa, nditamoot ve paŋgaar, tilooŋ tila waaŋ lolo, titaghon Maaron aliŋa. Ghoro Noa ana ilooŋ ila, ve Yoova tau ipoon ataam to waaŋ.
181	GEN 7:21	Tovenen mbeb to tinepneep izi taan, tisob timatmaat. Ŋgai to paanu, ŋgai to su, man, ve mbeb naol to tindandarab ila taan, toman tamtoghon paam timatmaat le tisob.
183	GEN 7:23	Nene ataam to Maaron ipasob mbeb tisob pa taan. Tamtoghon, ŋgai, mbeb to tindandarab ila taan, ve man to tirovroov ila tata paroŋania, eta ineep muul maau. Tisob tilaledi. Eemoghon yes to tineep toman Noa ila waaŋ lolo, yes moghon to tineep pooi.
184	GEN 7:24	Tovenen ya itatab taan, ve ipot irau mboŋ 150 (kaiyo liim ma venen).
185	GEN 8:1	Eemoghon Maaron mata iŋgalŋgal Noa ve mbeb naol tisob to su ve paanu to tineep tomani ila waaŋ lolo. Tovenen igham yaghur ilaagh izala ya pogho, leso iviviir ya ve izi.
187	GEN 8:3	Tauto ya izizi poipoi irau mboŋ 150. Indeeŋ kaiyo inim liim ve ru, ve ndag to inim saaŋgul liim ve ru pani, waaŋ ilot izala lolooz eez to taan Ararat daba.
192	GEN 8:8	Noa ighaze iwatag: Ya imaak wa, ma sone? Tovenen imbaaŋ man mbaluuz eez ila.
193	GEN 8:9	Eemoghon ya imaak kat sone. Tovenen man mbaluuz tonowen irau indeeŋ ina poia eta pa ate izi maau, ve iroov imuul ila pa waaŋ. Noa izuzuun nima ivot ila pumuri, ve man mbaluuz tonenen iroov inim le imbutur izala, ve Noa ighami ilooŋ ila waaŋ lolo muul.
195	GEN 8:11	Ila irovroov le rabrab izi, ghoro iŋaaŋ ai oliv mbila eez ila dadabu, ve iroov imuul ila pa waaŋ. Tovenen Noa iwatag ighaze ya imaak wa.
197	GEN 8:13	Tovenen sawa to Noa ndaman toni irau 601, kaiyo to ivot muuŋ, ve ndag inim mata, taan imamaas wa. Tovenen Noa ipas atob pida pa waaŋ ve iŋgig ndug, ve ighita taan imamaas.
199	GEN 8:15	Tovenen Maaron isaav pa Noa ighaze: “Yamru azuwam, ndinatum, ve ndirawam liva, apul waaŋ, ve avot ala pumuri.
202	GEN 8:18	Tovenen Noa yesuru azuwa, toman ndinatu ve ndirawa liva tipul waaŋ, ve tivot tila pumuri.
205	GEN 8:21	Yoova iyaaz watooŋrau tonowen vuzi poia kat, ve isaav ila lolo ighaze: “Muri, you irau nawaghamun taan pa sosor to tamtoghon muul maau. Pasa, you nawatag: Sawa to yes ndipain papaghu ve inim, ŋgar samsamia iyaryaaŋ ila lolodi. Tovenen you irau nawaghamun mbeb matadi yaryaara muul inimale aazne naghami ne maau.
211	GEN 9:5	Tovenen ighaze ŋgeu eta, ma ŋgai eta irab tamtoghon imaat, you Maaron naghur atia pani tovene: Ye pale imaat paam. Leso iyat siŋ to tamtoghon tonenen.
212	GEN 9:6	Tovenen ighaze ŋgeu eta irab tamtoghon eta imaat, nene pale ye paam tirabi imaat. Leso iyat siŋ to tamtoghon tonenen. Pasa, Maaron ighur tamtoghon tigham ye tau nagho.
218	GEN 9:12	Ve Maaron isaav muul ighaze: “Maalraŋgo tiou to ineep ila yaghur tae ve izi, aazne naghuri inim ghilalooŋ pa saveeŋ mbuaaŋ tiou tonene. Saveeŋ tonene, you nambua toman gham, ve mbeb matadi yaryaara tisob to tineep toman gham izi taan. Saveeŋ tonene pale iyoon ariaŋa itaghoni taghoni gha ila. Tovenen maalraŋgo pale inim ghilalooŋ pa saveeŋ mbuaaŋ to you nambua toman mbeb tisob to tineep izi taan.
222	GEN 9:16	Tovenen maalraŋgo ighaze ivot toman yaghur tae, nene pale naghita, ve matag iŋgal saveeŋ to nambua toman mbeb matadi yaryaara tisob to tineep izi taan. Saveeŋ tonene pale iyoon tovene itaghoni taghoni gha ila.”
223	GEN 9:17	Tovenen Maaron isaav pa Noa ighaze: “Maalraŋgo, nene inim ghilalooŋ pa saveeŋ to you nambua toman mbeb matadi yaryaara tisob to tineep izi taan.”
227	GEN 9:21	Sawa eez, ye ighun vaen le iyamaan tau maau, ve uli toni imaruat. Tovenen igheen tini ŋginiŋa ila mbeez toni lolo.
231	GEN 9:25	Tovenen isaav pani ighaze: “Pataŋani tonene pale iŋarua Kanaan. Ye toman papaghu toni pale tinim mbesooŋa sorok pa toŋvetaz todi.”
234	GEN 9:28	Yawaaŋa tiina ivot le isob, ghoro Noa ineep muul irau ndaman 350. Tovenen ndaman toni inim 950, ghoro imaat.
237	GEN 10:2	Yapet ndinatu, nene: Gomer, Magog, Madai, Yaban, Tubal, Mesek, ve Tiras.
238	GEN 10:3	Gomer ndinatu, nene: Askenaz, Ripat, ve Togarma.
239	GEN 10:4	Yaban ndinatu, nene: Elisa, Tarsis, Kitim, ve Dodanim.
244	GEN 10:9	Ve ye ŋgeu to kalooŋ ŋgai sagsag. Tovenen muri, ighaze tipait ŋgeu eta iza, ghoro tiparim pani tovene: “Ŋgeu tonene, Yoova igham le ŋgar tiina pa kalooŋ ŋgai sagsag inimale Nimrot.”
245	GEN 10:10	Nimrot iŋgin taan suruvu tiina eez, iza Sinar. Taan tonowen, ndug tintina tol tineep ila, izadi Babel, Erek, ve Akad.
250	GEN 10:15	Kanaan natu aidaba Sidon, ve nditazi, nene: Het, Yebus, Amor, Girgas, Hiv, Aki, Sini, Arvad, Semar, ve Amat. Muri ghoro, papaghu to Kanaan timbiriis, ve tila tineep irau ndug todi todi. Taan todi ila imuul to ndug Sidon, ve itaghon naari ila imuul ndug Gerar ve ndug Gaza. Ghoro imbuti ilooŋ ila pa taan to ndug Sodom, Gomora, Adma, ve Seboim, le malmali ila ivool pa ndug Lasa. Nene taan to yes Kanaana.
260	GEN 10:25	Eber ndinatu ru. Eez iza Peleg, ve ite iza Yoktan. Sawa to Peleg ineep izi taan, tamtoghon to taan tivalag taudi, ve tila tineep ledi ledi. Tauto tiwaat iza Peleg.
265	GEN 10:30	Taan todi, ndug Mesa inim ŋgat pani, ve ila imuul lolooz to taan Separ to ineep ila pa ndag iza.
269	GEN 11:2	Yes tineep izi ndug ee moghon maau. Tindurnduur tilala pa ndag iza, le tivot izi taan raapa eez to ineep ila taan suruvu to Sinar, ve tighur inadi to nepooŋ tonowe.