34	GEN 2:3	Tojo weegʉ Õꞌacʉ̃ aꞌtiro nicʉ niwĩ: “Nitʉori nʉmʉ yʉꞌʉ weemʉꞌtãꞌque nʉmʉrĩ weronojõ nisome. Ya nʉmʉ, yʉꞌʉ soodutiri nʉmʉ nirõsaꞌa. Ti nʉmʉ añurĩ nʉmʉ nirõsaꞌa”, ni cũucʉ niwĩ Õꞌacʉ̃.
66	GEN 3:10	Cʉ̃ peꞌe Õꞌacʉ̃rẽ yʉꞌticʉ niwĩ: —Mʉꞌʉ wesepʉ sijawãꞌcãticã tʉꞌoapʉ. Yʉꞌʉ peꞌe suꞌti marĩgʉ̃ niasʉ. Tojo weegʉ uigʉ duꞌtiasʉ, ni yʉꞌticʉ niwĩ.
69	GEN 3:13	Cʉ̃ tojo nicã tʉꞌogʉ, co numiorẽ sẽrĩtiñaꞌcʉ niwĩ: —¿Mʉꞌʉ deꞌro weego tojo weeati? Co cʉ̃rẽ yʉꞌtico niwõ: —Pĩrõ yʉꞌʉre nisooami. Yʉꞌʉ tojo weego baꞌasʉ, ni yʉꞌtico niwõ.
83	GEN 4:3	Yoáca beꞌro Caĩ́ niꞌcã nʉmʉ cʉ̃ daꞌrase cjasere Õꞌacʉ̃rẽ oꞌogʉ waꞌacʉ niwĩ.
103	GEN 4:23	Niꞌcã nʉmʉ Lamec cʉ̃ nʉmosãnumiarẽ, Ada, Zilare aꞌtiro nicʉ niwĩ: “Yʉꞌʉ ucũsere añurõ tʉꞌoya. Yʉꞌʉre cãmidaꞌrese wapa niꞌcʉ̃ ʉmʉrẽ wẽjẽcãꞌpʉ. Niꞌcʉ̃ maꞌmʉrẽ yʉꞌʉre paase wapa mejãrõta weeapʉ.
104	GEN 4:24	‘Caĩrẽ́ wẽjẽgʉ̃nojõ sietetiri cʉ̃rẽ aꞌmenoꞌgʉ̃sami’, nicʉ niwĩ Õꞌacʉ̃. Yʉꞌʉ peꞌema setenta y sietetiri aꞌmenoꞌrõsaꞌa”, nicʉ niwĩ.
141	GEN 6:3	Õꞌacʉ̃ peꞌe aꞌtiro nicʉ niwĩ: “Yʉꞌʉ masãrẽ aꞌti nucũcãpʉ catinuꞌcũcã weesome. Na boacjãrã diaꞌcʉ̃ nima. Ciento veinte cʉ̃ꞌmarĩta catirãsama”, nicʉ niwĩ Õꞌacʉ̃.
143	GEN 6:5	Titare masã ñaꞌabutiaro weeseticãrã niwã. Ñaꞌarõ weese diaꞌcʉ̃rẽ wãcũcãrã niwã. Õꞌacʉ̃ na tojo weeseticã ĩꞌagʉ̃, narẽ ne tʉꞌsaticʉ niwĩ. “Yʉꞌʉ masãrẽ weeticã, añubopã”, ni wãcũcʉ niwĩ. Tojo ni, pũrõ bʉjawetise meꞌrã aꞌtiro nicʉ niwĩ: “Masã yʉꞌʉ weemiꞌcãrãrẽ cõꞌapeꞌocʉ̃ti. Tojo nicã waꞌicʉrã, nucũcãpʉ nirã́, wʉʉrã, nipeꞌtirãrẽ cõꞌapeꞌocʉ̃ti. Yʉꞌʉ pũrõ bʉjawetiꞌi. Yʉꞌʉ narẽ weeticã, añubopã”, nicʉ niwĩ.
151	GEN 6:13	Õꞌacʉ̃ Noerẽ́ aꞌtiro nicʉ niwĩ: “Yʉꞌʉ nipeꞌtirã masãrẽ cõꞌapeꞌocʉ̃ti. Na basu ñaꞌarõ weecã, aꞌti ʉmʉcopʉre aꞌmewẽjẽse yʉꞌrʉmajã waꞌaꞌa. Tojo weegʉ masã, diꞌtare miopeꞌocʉ̃ti.
152	GEN 6:14	Tojo weegʉ mʉꞌʉ aꞌtiro weeya. Yucʉsʉ pajipjʉjo weeya. Yucʉgʉ añucjʉ cjasere mii, aꞌmedoꞌoya. Tiwʉ poꞌpeapʉre peje tucũrĩ weeya. Aco sãjãrĩ nígʉ̃, buꞌire, poꞌpeapʉ quẽꞌrãrẽ ope meꞌrã añurõ biꞌaya.
155	GEN 6:17	Yʉꞌʉ aꞌti diꞌtare miogʉ̃tigʉ weeꞌe. Nipeꞌtirã aꞌti diꞌtacjãrã catise cʉorãnojõ mirĩ, wẽrĩpeꞌtia waꞌarãsama.
156	GEN 6:18	Yʉꞌʉ mʉꞌʉ meꞌrã pũrĩcãrẽ añurõ wee, apogʉti. Mʉꞌʉ, mʉꞌʉ nʉmo, mʉꞌʉ põꞌrã ʉmʉa, na nʉmosãnumia meꞌrã tiwʉpʉre sãjã́árãsaꞌa.
217	GEN 9:11	Yʉꞌʉ mʉsã meꞌrã apoꞌque ne dʉcayusome. Aꞌtiro niꞌi. Masãrẽ, waꞌicʉrãrẽ ne apaturi aco meꞌrã miosome. Ne aꞌti diꞌtare tojo weenemosome.
218	GEN 9:12	Yʉꞌʉ mʉsãrẽ, mʉsã pãrãmerã nituriarãrẽ, waꞌicʉrãrẽ ne apaturi tojo weesome majã nisere ĩꞌogʉ̃, aꞌtiro weegʉti.
222	GEN 9:16	Ti da oꞌmecuraripʉ bajuacã, yʉꞌʉ ĩꞌagʉ̃saꞌa. Ĩꞌagʉ̃, yʉꞌʉ nipeꞌtirã masã meꞌrã, aꞌti nucũcãpʉ nirã́ meꞌrã ‘Yʉꞌʉ apoꞌque ne peꞌtisome’ níꞌquere wãcũgʉ̃ti.
300	GEN 12:1	Niꞌcã nʉmʉ Õꞌacʉ̃ Abrãrẽ pijio weetjĩagʉ̃, aꞌtiro nicʉ niwĩ: “Mʉꞌʉ ya diꞌtare, mʉꞌʉ acawererãrẽ, mʉꞌʉ pacʉ ya wiꞌire wijayá. Ape diꞌtapʉ mʉꞌʉ waꞌagʉsaꞌa. Yʉꞌʉ mʉꞌʉrẽ ti diꞌtare ĩꞌogʉ̃ti.
310	GEN 12:11	Beꞌro Egipto diꞌtapʉ etarã, Abrã cʉ̃ nʉmo Saraire aꞌtiro nicʉ niwĩ: “Yʉꞌʉ ĩꞌacã, mʉꞌʉ numio añugõ niꞌi.
312	GEN 12:13	Tojo weego mʉꞌʉ, ‘Cʉ̃ nʉmo niꞌi’, niticãꞌña. ‘Yʉꞌʉ cʉ̃ acabijo niꞌi’, niña. Mʉꞌʉ tojo weecã, mʉꞌʉrẽ ʉarã, yʉꞌʉre añurõ weerãsama. Tojo nicã yʉꞌʉre wẽjẽsome”, nicʉ niwĩ.
318	GEN 12:19	‘Yʉꞌʉ acabijo nimo’, nimiapʉba. Tere tʉꞌogʉ, yʉꞌʉ core cãꞌrõ nʉmotimiasʉ. ¡Ma! Aꞌtigo nimo. Core miaña. Mʉꞌʉ quẽꞌrã waꞌaya”, nicʉ niwĩ.
337	GEN 13:18	Tojo weegʉ Abrã niꞌcʉ̃ masʉ̃ Mamre wãmetigʉ pʉꞌto waꞌacʉ niwĩ. Yucʉ pacasepagʉ nirṍ tojaqueꞌacʉ niwĩ. Topʉ cʉ̃ ye wiꞌseri suꞌti caseri meꞌrã weeꞌque wiꞌserire nʉꞌcõcʉ niwĩ. To Hebrṍ wãmetiri macã pʉꞌtopʉ nicaro niwʉ̃. Topʉ Õꞌacʉ̃rẽ ẽjõpeogʉti nígʉ̃, waꞌicʉrãrẽ ʉ̃jʉ̃amorõpeorore niꞌcã mesã ʉ̃tã meꞌrã seeneocũucʉ niwĩ.
360	GEN 14:23	“Ne cãꞌrõ mʉꞌʉ ye apeyenojõ meꞌrã tojasome. Ne niꞌcã yuta da, ne niꞌcã da sapatu dʉꞌteri danojõrẽ miasome. Yʉꞌʉ miacãma, beꞌropʉre mʉꞌʉ yʉꞌʉre aꞌtiro nibosaꞌa, ‘Yʉꞌʉ cʉ̃rẽ niyerubʉcʉ waꞌacã weewʉ’, nibosaꞌa.
361	GEN 14:24	Tojo weegʉ yʉꞌʉ peꞌe ne apeyenojõ mʉꞌʉ yere miasome. Yʉꞌʉ meꞌrã waꞌaꞌcãrã na baꞌaꞌquema dʉcayuya. Tojo nicã, yʉꞌʉre baꞌpatiꞌcãrã pũrĩcã Aner, Escol, Mamre na ʉasere miarãsama”, nicʉ niwĩ Abrã.
362	GEN 15:1	Beꞌro nipeꞌtise tojo waꞌáca beꞌro Õꞌacʉ̃ quẽꞌerõpʉ Abrãrẽ aꞌtiro ni ucũcʉ niwĩ: —Abrã, uiticãꞌña. Yʉꞌʉ mʉꞌʉrẽ coꞌtegʉti. Mʉꞌʉrẽ peje añuse oꞌogʉti, nicʉ niwĩ.
368	GEN 15:7	Cʉ̃ tojo ẽjõpeocã ĩꞌagʉ̃, cʉ̃rẽ aꞌtiro nicʉ niwĩ: —Yʉꞌʉ mʉꞌʉ wiogʉ niꞌi. Yʉꞌʉta mʉꞌʉ Ur caldeo masã ya macãpʉ nimiꞌcʉre miiwijawʉ. Aꞌti diꞌta mʉꞌʉ ya diꞌta niato nígʉ̃, tojo weewʉ.
370	GEN 15:9	Cʉ̃ tojo nicã tʉꞌogʉ, Õꞌacʉ̃ aꞌtiro nicʉ niwĩ: —Yʉꞌʉre niꞌcõ wecʉo, niꞌcõ cabra, niꞌcʉ̃ oveja ʉmʉ miitia. Nanʉcʉ̃ iꞌtiarẽ cʉ̃ꞌmarĩ cʉorã niato. Tojo nicã niꞌcʉ̃ buja, apĩ buja wĩꞌmagʉ̃acãrẽ miitia, nicʉ niwĩ Õꞌacʉ̃.
387	GEN 16:5	Co tojo weecã ĩꞌagõ, Sarai Abrãrẽ aꞌtiro nico niwõ: —Agar yʉꞌʉre ĩꞌacõꞌase mʉꞌʉ ye buꞌiri niꞌi. Yʉꞌʉ basuta yʉꞌʉre daꞌracoꞌtegore mʉꞌʉ nʉmo weronojõ cʉoato nígõ, mʉꞌʉrẽ oꞌowʉ. Niꞌcãrõacã co nijĩpaco nitjĩagõ, “Yʉꞌʉ co nemorõ wapatiꞌi”, nisamo. Õꞌacʉ̃ “¿Noa peꞌe buꞌiri cʉoti?” ni beseato, nico niwõ Sarai.
390	GEN 16:8	Core topʉ bocaejagʉ, aꞌtiro ni sẽrĩtiñaꞌcʉ niwĩ: —Agar, Saraire daꞌracoꞌtego, ¿noꞌopʉ níꞌco aꞌtiati mʉꞌʉ? Tojo nicã ¿noꞌopʉ waꞌago weeti? Cʉ̃ tojo nicã tʉꞌogo, cʉ̃rẽ yʉꞌtico niwõ: —Yʉꞌʉ wiogo Saraire duꞌtigo weeꞌe, nico niwõ.
392	GEN 16:10	Õꞌacʉ̃ cʉ̃ basuta nimigʉ̃ cʉ̃rẽ werecoꞌtegʉ weronojõ upʉsãjãnʉꞌcã, apeye core ninemocʉ niwĩ tja: “Yʉꞌʉ mʉꞌʉrẽ pãjãrã põꞌrãticã weegʉti. Ne niꞌcʉ̃ na pãjãrãrẽ queo põtẽosome.
399	GEN 17:1	Abrã noventa y nueve cʉ̃ꞌmarĩ cʉori cura Õꞌacʉ̃ cʉ̃rẽ apaturi bajuacʉ niwĩ. Aꞌtiro nicʉ niwĩ: —Yʉꞌʉ Õꞌacʉ̃, tutuayʉꞌrʉnʉꞌcãgʉ̃ niꞌi. Yʉꞌʉ ĩꞌorõpʉre añurõ buꞌiri marĩgʉ̃ niña.
400	GEN 17:2	Yʉꞌʉ mʉꞌʉ meꞌrã “Aꞌtiro weegʉti” ni ucũꞌquere ĩꞌogʉ̃ti. Mʉꞌʉ pãrãmerã nituriarã pãjãrã waro nicã weegʉti, nicʉ niwĩ Õꞌacʉ̃.
402	GEN 17:4	—Yʉꞌʉ mʉꞌʉ meꞌrã apogʉ, aꞌtiro weegʉti. Mʉꞌʉ peje diꞌtacjãrã ñecʉ̃ tojagʉsaꞌa.
403	GEN 17:5	Abrã wãmetisome majã. Yʉꞌʉ nírõnojõta mʉꞌʉrẽ peje diꞌtacjãrã ñecʉ̃ tojacã weegʉsaꞌa. Tojo weegʉ niꞌcãcã meꞌrã Abrahã wãmetigʉsaꞌa.
404	GEN 17:6	Yʉꞌʉ mʉꞌʉ pãrãmerã nituriarãrẽ pãjãrã weegʉti. Na peje macãrĩcjãrã nirãsama. Tojo nicã niꞌcãrẽrã mʉꞌʉ pãrãmerã nituriarã diꞌta dutirã wiorã nirãsama.
405	GEN 17:7	Mʉꞌʉ meꞌrã “Aꞌtiro weegʉti” nise ne peꞌtisome. Yʉꞌʉ mʉꞌʉrẽ níꞌcaronojõta mʉꞌʉ pãrãmerã quẽꞌrãrẽ añurõ weegʉti. Mʉꞌʉ wiogʉ, tojo nicã mʉꞌʉ pãrãmerã nituriarã wiogʉ nigʉ̃ti. Mʉꞌʉ, tojo nicã na quẽꞌrã yʉꞌʉre ẽjõpeorãsama.
408	GEN 17:10	Yʉꞌʉ mʉꞌʉ meꞌrã, tojo nicã mʉꞌʉ pãrãmerã nituriarã meꞌrã apoꞌque aꞌtiro niꞌi. Mʉsã tiropʉ nirã́ ʉmʉa nipeꞌtirã õꞌrẽcjʉ yapa caserore yejecõꞌanoꞌcãrã niato.
418	GEN 17:20	Ismae peꞌere, cʉ̃ ye cjasere, mʉꞌʉ níꞌquere tʉꞌoapʉ. Cʉ̃ quẽꞌrãrẽ añurõ waꞌacã weegʉti. Pãjãrã põꞌrãticã weegʉti. Cʉ̃ pãrãmerã nituriarã pãjãrã nirãsama. Cʉ̃ doce wiorã pacʉ nigʉ̃sami. Yʉꞌʉ cʉ̃ meꞌrã pajibutiari curua weegʉti.
419	GEN 17:21	Yʉꞌʉ “Mʉsã meꞌrã tojo weegʉti” níꞌque peꞌema Isaa, Sara macʉ̃ meꞌrã apogʉti. Cʉ̃ ape cʉ̃ꞌma aꞌtocateronojõta bajuagʉsami, nicʉ niwĩ Õꞌacʉ̃.
435	GEN 18:10	Cʉ̃ tojo yʉꞌticã tʉꞌogʉ, niꞌcʉ̃ na meꞌrãcjʉ̃ Abrahãrẽ nicʉ niwĩ: —Ape cʉ̃ꞌma mʉsãrẽ ĩꞌagʉ̃ aꞌtigʉti tja. Yʉꞌʉ tocãꞌrõ aꞌticã, mʉꞌʉ nʉmo niꞌcʉ̃ wĩꞌmagʉ̃ põꞌrãtigosamo. Sara cʉ̃ tojo ucũrĩ cura wiꞌi sãjãrõ Abrahã sẽꞌema ejanʉꞌcã, na tojo ni ucũsere tʉꞌopeꞌocãꞌco niwõ.
439	GEN 18:14	Mʉsã tʉꞌoñaꞌcã, ¿yʉꞌʉre apeyenojõ weemasĩtise nibosari? Ape cʉ̃ꞌma mʉsãrẽ ĩꞌagʉ̃ aꞌtigʉti tja. Yʉꞌʉ tocãꞌrõ aꞌticã, mʉꞌʉ nʉmo wĩꞌmagʉ̃ põꞌrãtigosamo.
440	GEN 18:15	Aꞌtere tʉꞌogo, Sara uigo, aꞌtiro nico niwõ: —Yʉꞌʉ bujigo mejẽta weeapʉ. Õꞌacʉ̃ core yʉꞌticʉ niwĩ: —Yʉꞌʉ masĩꞌi; mʉꞌʉ bujiapʉ, nicʉ niwĩ.
444	GEN 18:19	Yʉꞌʉ cʉ̃ põꞌrãrẽ, cʉ̃ pãrãmerã nituriarãrẽ yʉꞌʉ buꞌesere yʉꞌtidutigʉ, tojo nicã añuse, diacjʉ̃ cjase weeato nígʉ̃, cʉ̃rẽ besewʉ. Na tojo weecã, nipeꞌtise yʉꞌʉ ‘Tojo weegʉti’ níꞌque queoro waꞌarosaꞌa”, ni wãcũcʉ niwĩ.
452	GEN 18:27	Abrahã ninemocʉ niwĩ tja: —Mʉꞌʉ Õꞌacʉ̃ niꞌi. Yʉꞌʉ pũrĩcã masʉ̃ mejõ nigʉ̃ niꞌi. Tojo nimigʉ̃, noꞌo ʉaro bʉsʉmaꞌagʉ̃ weronojõ mʉꞌʉrẽ ucũmaꞌasaꞌa.
455	GEN 18:30	Abrahã peꞌe sẽrĩtiñaꞌnemocʉ niwĩ tja: —Yʉꞌʉ meꞌrã uaticãꞌña. Mʉꞌʉrẽ apaturi sẽrĩtiñaꞌnemogʉ̃ti. ¿Deꞌro weegʉsari treinta añurãrẽ bocaejagʉ waro? Õꞌacʉ̃ apaturi nicʉ niwĩ: —Treinta añurãrẽ bocaejagʉ, ti macãcjãrãrẽ acobojogʉti.
456	GEN 18:31	Abrahã sẽrĩtiñaꞌnemosãjãcʉ niwĩ tja: —Yʉꞌʉ wiogʉ, uiro marĩrõ mʉꞌʉrẽ ucũmiapʉba. Veinte añurã bocaejagʉ, ¿deꞌro weegʉsari? Õꞌacʉ̃ yʉꞌticʉ niwĩ tja: —Na veinte añurã nicã quẽꞌrãrẽ ti macãcjãrãrẽ cõꞌasome.
457	GEN 18:32	Abrahã sẽrĩtiñaꞌtʉocʉ niwĩ: —Yʉꞌʉ wiogʉ, yʉꞌʉ meꞌrã uacʉpa. Mʉꞌʉrẽ aꞌtota sẽrĩtiñaꞌtʉogʉti majã. Ne caribonemosome. ¿Deꞌro weegʉsari mʉꞌʉ, diez diaꞌcʉ̃ añurãrẽ bocaejagʉ? Õꞌacʉ̃ nicʉ niwĩ: —Diez añurã nicã, ti macãcjãrãrẽ cõꞌasome.
460	GEN 19:2	narẽ nicʉ niwĩ: —Yʉꞌʉ mʉsãrẽ daꞌracoꞌtegʉ niꞌi. Tojo weerã ya wiꞌipʉ cãrĩrã aꞌtia. Topʉ mʉsã dʉꞌpocãrĩrẽ coerãsaꞌa. Beꞌro ñamiñaꞌcũrõ mʉsã waꞌaropʉ yʉꞌrʉwãꞌcãrãsaꞌa. Cʉ̃ tojo nicã, yʉꞌticãrã niwã: —Niweꞌe. Aꞌto macã deco cãrĩrãsaꞌa.
465	GEN 19:7	Narẽ nicʉ niwĩ: —Yʉꞌʉ meꞌrãcjãrã, narẽ tojo ñaꞌarõ weeticãꞌña.
466	GEN 19:8	Aꞌtiro peꞌe weeya. Yʉꞌʉ põꞌrã, pʉarã numia ne niꞌcʉ̃ ʉmʉ meꞌrã nitirã numia nima yujupʉ. Narẽ wĩorẽgʉ̃ti. Mʉsã narẽ noꞌo weesĩꞌrĩrõ weeya. Ãꞌrã ʉmʉa yʉꞌʉ tiro etaꞌcãrã peꞌema, narẽ ñaꞌarõ weeticãꞌña. Na yʉꞌʉ pijioꞌcãrã nima. Narẽ añurõ coꞌtegʉti.
476	GEN 19:18	Lot peꞌe narẽ nicʉ niwĩ: —Yʉꞌʉ wiorã, ʉ̃rʉ̃gʉ̃pʉre waꞌadutiticãꞌña.
477	GEN 19:19	Mʉsã yʉꞌʉre añurõ weetamuapʉ. Yʉꞌʉ wẽrĩboꞌcʉre mʉsã yʉꞌrʉoapʉ. Yʉꞌʉ ʉ̃rʉ̃gʉ̃pʉre ejatibosaꞌa. To waꞌari curata macãrẽ ʉ̃jʉ̃ase yʉꞌʉre ẽmʉejábosaꞌa. Tojo weegʉ yʉꞌʉ maꞌa deco wẽrĩbosaꞌa.
486	GEN 19:28	Topʉ waꞌagʉ, Sodoma, Gomorra níꞌcaro nipeꞌtiro ti papʉre ĩꞌaquejocʉ niwĩ. Yoaropʉ cʉ̃ ĩꞌacã, pã́ na ʉ̃jʉ̃arõ oꞌme mʉjãrõ weronojõ oꞌmepuꞌsumorõcaro niwʉ̃.
498	GEN 20:2	Cʉ̃ topʉ nígʉ̃, cʉ̃ nʉmo Sarare “Yʉꞌʉ acabijo nimo”, ni werecʉ niwĩ. Cʉ̃ tojo nicã tʉꞌo, Geracjʉ̃ wiogʉ Abimelec Sarare nʉmotigʉti nígʉ̃, miidutigʉ oꞌócʉ niwĩ.
500	GEN 20:4	Abimelec peꞌe Sara meꞌrã ne niticʉ niwĩ yujupʉ. Tojo weegʉ Õꞌacʉ̃rẽ yʉꞌticʉ niwĩ: “Yʉꞌʉ wiogʉ, yʉꞌʉ ñaꞌarõ weetimicã, ¿yʉꞌʉre, tojo nicã aꞌti macãcjãrã quẽꞌrãrẽ wẽjẽgʉ̃sari?
501	GEN 20:5	Abrahã basuta yʉꞌʉre, ‘Co yʉꞌʉ acabijo nimo’, niami. Co quẽꞌrã, ‘Yʉꞌʉ maꞌmi nimi’, niamo. Tojo weegʉ ‘Marãpʉ moogõ nimo’, ni wãcũgʉ̃, tojo weeasʉ. Ne ñaꞌarõ weetiapʉ”, nicʉ niwĩ.
502	GEN 20:6	Cʉ̃ tojo nisere tʉꞌo, Õꞌacʉ̃ Abimelere quẽꞌerõpʉ yʉꞌticʉ niwĩ: “Yʉꞌʉ masĩꞌi. Mʉꞌʉ añurõ wãcũse meꞌrã tojo weeapʉ. Tojo weegʉ mʉꞌʉ co meꞌrã cãjĩsĩꞌrĩcã cãꞌmotaꞌapʉ. Mʉꞌʉ co meꞌrã nígʉ̃, yʉꞌʉre ñaꞌarõ wéégʉ weronojõ weeboapã.
507	GEN 20:11	Abrahã cʉ̃rẽ yʉꞌticʉ niwĩ: —Yʉꞌʉ aꞌtiro wãcũcãti. “Aꞌtopʉ Õꞌacʉ̃rẽ ne ẽjõpeotisama”, nicãti. Yʉꞌʉ, “Yʉꞌʉ nʉmo nimo” nicãrẽ, “Yʉꞌʉre wẽjẽbosama”, ni wãcũasʉ.
508	GEN 20:12	Diacjʉ̃ta niꞌi. Co yʉꞌʉ acabijota nimo. Yʉꞌʉ pacʉ macõ nimo. Paco peꞌe apego nimo. Tojo weegʉ core nʉmotiwʉ.
509	GEN 20:13	Yʉꞌʉ pacʉ tiropʉ níꞌcʉ Õꞌacʉ̃ dutiro meꞌrã wijagʉ, core aꞌtiro niwʉ̃: “Noꞌo marĩ waꞌaro etago, ãpẽrãrẽ, ‘Yʉꞌʉ maꞌmi nimi’, niña”, niwʉ̃.
524	GEN 21:10	Tojo weego co Abrahã tiro waꞌa, aꞌtiro nico niwõ: —Sico daꞌracoꞌtego macʉ̃ mʉꞌʉ wẽ́rĩ́ca beꞌro, mʉꞌʉ ye níꞌquere ne ñeꞌesome. Yʉꞌʉ macʉ̃ Isaa peꞌe ñeꞌegʉ̃sami. Tojo weegʉ daꞌracoꞌtegore, co macʉ̃ meꞌrãta cõꞌawĩrõcãꞌña, nico niwõ.
537	GEN 21:23	Tojo weegʉ Õꞌacʉ̃ tʉꞌoropʉ mʉꞌʉ aꞌtiro weecã ʉasaꞌa. Yʉꞌʉre, yʉꞌʉ põꞌrãrẽ, yʉꞌʉ pãrãmerãrẽ ne mejẽcã weeticãꞌña. Yʉꞌʉ mʉꞌʉrẽ wééꞌcaronojõta yʉꞌʉre añurõ weeya. Mʉꞌʉ apesecjʉ̃ nimigʉ̃, ʉ̃sã ya diꞌtapʉ niꞌi. Aꞌti diꞌtacjãrã quẽꞌrãrẽ añurõ weeya. “Õꞌacʉ̃ wãme meꞌrã tojota weegʉti” niña, nicʉ niwĩ Abimelec.
549	GEN 22:1	Yoáca beꞌropʉ Õꞌacʉ̃ Abrahãrẽ “¿Diacjʉ̃ta yʉꞌʉre ẽjõpeomiti?” nígʉ̃, cʉ̃rẽ pisucʉ niwĩ. —¡Abrahã! nicʉ niwĩ. Cʉ̃ tojo pisucã tʉꞌogʉ, Abrahã, “Aꞌto niꞌi”, ni yʉꞌticʉ niwĩ.
553	GEN 22:5	Tojo weegʉ cʉ̃rẽ daꞌracoꞌterãrẽ nicʉ niwĩ: —Mʉsã burro meꞌrã aꞌto tojayá. Yʉꞌʉ, yʉꞌʉ macʉ̃ meꞌrã sõꞌopʉ Õꞌacʉ̃rẽ eꞌcatipeorã waꞌarã weeꞌe. Tojo weetoja, mʉsã tiro tojatirãsaꞌa tja.
560	GEN 22:12	—Mʉꞌʉ macʉ̃rẽ ne mejẽcã weeticãꞌña. Niꞌcãrõacã yʉꞌʉ masĩꞌi. Mʉꞌʉ yʉꞌʉre, “Yʉꞌʉ macʉ̃ niꞌcʉ̃ nigʉ̃rẽ mʉꞌʉrẽ oꞌosome”, ne nitiapʉ. Tojo weegʉ yʉꞌʉ masĩꞌi mʉꞌʉ yʉꞌʉre wiopesase meꞌrã ĩꞌaꞌa, nicʉ niwĩ.
564	GEN 22:16	Aꞌtiro nicʉ niwĩ: —Õꞌacʉ̃ aꞌtiro niami: “Aꞌte mʉꞌʉ weeꞌquere masĩꞌi. Yʉꞌʉre, ‘Yʉꞌʉ macʉ̃ niꞌcʉ̃ nigʉ̃rẽ mʉꞌʉrẽ oꞌosome’, ne nitiapʉ. Tojo weegʉ yʉꞌʉ basu yʉꞌʉ wãme meꞌrã mʉꞌʉrẽ añurõ waꞌacã weegʉti.
568	GEN 22:20	Yoáca beꞌropʉ Abrahã cʉ̃ acabiji Nacor ye quetire tʉꞌocʉ niwĩ. Nacor nʉmo Milca wĩꞌmarãrẽ cʉ̃rẽ põꞌrãtibosaco niwõ.
576	GEN 23:4	—Yʉꞌʉ mʉsã waꞌteropʉre apesecjʉ̃ nimicã, niꞌcã ʉ̃tã tuti yʉꞌʉ nʉmorẽ yaatji tutire duaya.
578	GEN 23:6	—Ʉ̃sãrẽ tʉꞌoníña yujupʉ. Mʉꞌʉ ʉ̃sã waꞌterore niꞌcʉ̃ Õꞌacʉ̃ beseꞌcʉ, wiogʉ macʉ̃ weronojõ niꞌi. Tojo weegʉ mʉꞌʉ nʉmorẽ ʉ̃sã ye ʉ̃tã tutiri waꞌtero añurĩ tutipʉ yaaya. Ne niꞌcʉ̃ ʉ̃sã waꞌteropʉ nigʉ̃́, “Ya tuti niꞌi, yaaticãꞌña”, nisome.
581	GEN 23:9	Niꞌcã ʉ̃tã tuti Macpela wãmetiri tuti cʉ̃ ya diꞌta nitʉoro nirĩ tutire yʉꞌʉre duato. Yʉꞌʉ ti tuti wapatiro ejatuaro wapayegʉti. Yʉꞌʉ tore duugʉ, mʉsã waꞌteropʉ yaari tuti cʉogʉsaꞌa.
583	GEN 23:11	—Niweꞌe, yʉꞌʉ wiogʉ. Añurõ tʉꞌoya. Yʉꞌʉ mʉꞌʉrẽ ti diꞌtare, tojo nicã ti diꞌtapʉ nirĩ tutire wapamarĩrõ oꞌogʉti. Yʉꞌʉ acawererã tʉꞌoropʉ mʉꞌʉrẽ ti diꞌtare oꞌoꞌo. Mʉꞌʉ nʉmorẽ yaaya majã.
585	GEN 23:13	Tojo wee, masã to nirã́ tʉꞌoro Efrṍrẽ nicʉ niwĩ: —Yʉꞌʉre tʉꞌoya. Ti diꞌta wapa queoro wapayegʉti. Mʉꞌʉ “Jaʉ”, nicã, topʉ yʉꞌʉ nʉmorẽ yaagʉti majã.
599	GEN 24:7	Yʉꞌʉ wiogʉ Õꞌacʉ̃ ʉꞌmʉsecjʉ̃, yʉꞌʉ pacʉ ya wiꞌi níꞌcʉre, tojo nicã yʉꞌʉ acawererã ya diꞌtapʉ níꞌcʉre miiwĩorẽwĩ. Miiwĩorẽ, aꞌti diꞌtare “Mʉꞌʉ pãrãmerã nituriarãrẽ oꞌogʉti”, niwĩ. Cʉ̃ta mʉꞌʉ dʉporo cʉ̃rẽ werecoꞌtegʉre oꞌoyugʉsami. Tojo weegʉ mʉꞌʉ yʉꞌʉ macʉ̃ nʉmo niacjo tocjõrẽ boca, miitigʉsaꞌa.
604	GEN 24:12	Tojo weetoja, Õꞌacʉ̃rẽ aꞌtiro sẽrĩcʉ niwĩ: “Õꞌacʉ̃, yʉꞌʉ wiogʉ Abrahã ẽjõpeogʉ, niꞌcãcãrẽ yʉꞌʉre añurõ waꞌacã weeya. Yʉꞌʉ wiogʉre mʉꞌʉ maꞌisere ĩꞌoña.
613	GEN 24:21	Co tojo weesere ĩꞌagʉ̃, Abrahãrẽ daꞌracoꞌtegʉ “Yʉꞌʉ aꞌtopʉ aꞌticã, Õꞌacʉ̃ cʉ̃ ‘Aꞌtiro weegʉti’ níꞌquere ¿diacjʉ̃ta weegʉsari?”, ni tʉꞌoñaꞌgʉ̃, tojo ĩꞌacãꞌcʉ niwĩ.
616	GEN 24:24	Co yʉꞌtico niwõ: —Yʉꞌʉ Betuel macõ niꞌi. Cʉ̃ Milca, Nacor macʉ̃ nimi.
619	GEN 24:27	Aꞌtiro nicʉ niwĩ: “Õꞌacʉ̃, Abrahã yʉꞌʉ wiogʉ ẽjõpeogʉ, mʉꞌʉ añuyʉꞌrʉaꞌa. Yʉꞌʉ wiogʉre añurõ wéégʉ, mʉꞌʉ ‘Aꞌtiro weegʉti’ níꞌquere queoro weeapʉ. Yʉꞌʉ quẽꞌrãrẽ cʉ̃ acawererã ya wiꞌipʉ miitiapʉ”, nicʉ niwĩ.
625	GEN 24:33	Na baꞌase etiri cura, Abrahãrẽ daꞌracoꞌtegʉ aꞌtiro nicʉ niwĩ: —Yʉꞌʉ mʉsãrẽ nigʉ̃ti níꞌquere weretimigʉ̃, baꞌatisaꞌa. —To pũrĩcãrẽ ucũmʉꞌtaña, nicʉ niwĩ Labán.
626	GEN 24:34	Abrahãrẽ daꞌracoꞌtegʉ narẽ nicʉ niwĩ: —Yʉꞌʉ Abrahãrẽ daꞌracoꞌtegʉ niꞌi.
628	GEN 24:36	Apeyema cʉ̃ nʉmo Sara bʉcʉo nimigõ, niꞌcʉ̃ põꞌrãtiwõ. Yʉꞌʉ wiogʉ cʉ̃ macʉ̃rẽ nipeꞌtise cʉ̃ cʉosere oꞌowĩ.
629	GEN 24:37	Yʉꞌʉ wiogʉ yʉꞌʉre, cʉ̃ macʉ̃rẽ ne niꞌcõ ti diꞌta Canaá cʉ̃ nirõcjõ meꞌrã omocã dʉꞌtedutitiwĩ. Tere nígʉ̃, yʉꞌʉre cʉ̃ dutisere Õꞌacʉ̃ wãme meꞌrã “Diacjʉ̃ta mʉꞌʉ dutiro weegʉti”, ni yʉꞌtidutiwĩ.
630	GEN 24:38	Cʉ̃ yʉꞌʉre ninemowĩ: “Yʉꞌʉ pacʉ acawererã tiropʉ waꞌa, to nirã́ numia waꞌterore niꞌcõ cʉ̃ nʉmo niacjore aꞌmaña”, niwĩ.
631	GEN 24:39	Yʉꞌʉ peꞌe yʉꞌʉ wiogʉre niwʉ̃: “Yʉꞌʉ wiogʉ, co numio yʉꞌʉ meꞌrã aꞌtisĩꞌrĩticã warore, ¿deꞌro weegʉsari?”
632	GEN 24:40	Cʉ̃ yʉꞌʉre yʉꞌtiwĩ: “Yʉꞌʉ Õꞌacʉ̃ ʉaronojõ nisetigʉ niꞌi. Mʉꞌʉ waꞌaro añurõ waꞌato nígʉ̃, mʉꞌʉ meꞌrã Õꞌacʉ̃ cʉ̃rẽ werecoꞌtegʉre oꞌógʉsami. Tojo weegʉ yʉꞌʉ pacʉ acawererã põꞌrã numia waꞌterore niꞌcõ yʉꞌʉ macʉ̃ nʉmo niacjore bocagʉsaꞌa.
637	GEN 24:45	Yʉꞌʉ Õꞌacʉ̃rẽ sẽrĩtuꞌajatimigʉ̃, Rebeca aco co waatjʉre wʉawãꞌcãtigore ĩꞌapʉ. Aco waari pepʉ buꞌa, acore waamiiamo. Core niapʉ: “Mʉꞌʉ aco waaꞌquere yʉꞌʉre cãꞌrõ tĩaña”, niapʉ.
638	GEN 24:46	Tojo weego acotʉre miidijo, yʉꞌʉre niamo: “Jaʉ, sĩꞌrĩña. Mʉꞌʉ yarã cameyoa quẽꞌrãrẽ tĩagõti.” Yʉꞌʉre aco tĩa, yarã cameyoa quẽꞌrãrẽ tĩamo.
639	GEN 24:47	»Beꞌro core sẽrĩtiñaꞌpʉ: “¿Noa macõ niti mʉꞌʉ?” Co yʉꞌʉre yʉꞌtiamo: “Yʉꞌʉ Betuel macõ niꞌi. Cʉ̃ Nacor, Milca macʉ̃ nimi”, niamo. Beꞌro ẽꞌquẽa yoosari beꞌtore ẽꞌquẽapʉ yooapʉ. Tojo nicã pʉa beꞌto omocã tuusãase beꞌtorire tuusãapʉ.
646	GEN 24:54	Beꞌro cʉ̃rẽ baꞌpatiꞌcãrã meꞌrã baꞌa, sĩꞌrĩ, topʉta cãrĩcãrã niwã. Ape nʉmʉ wãꞌcã, Abrahãrẽ daꞌracoꞌtegʉ narẽ nicʉ niwĩ: —Yʉꞌʉ wiogʉ ya wiꞌipʉ dajatojaacã, mʉsã macõrẽ oꞌoya majã.
648	GEN 24:56	Abrahãrẽ daꞌracoꞌtegʉ peꞌe aꞌtiro nicʉ niwĩ: —Yʉꞌʉ tojaacã, cãꞌmotaꞌanemoticãꞌña majã. Õꞌacʉ̃ yʉꞌʉ aꞌtiꞌquere añurõ waꞌacã weetojami. Tojo weerã yʉꞌʉ wiogʉ ya wiꞌipʉ dajatojaadutiya.
657	GEN 24:65	Abrahãrẽ daꞌracoꞌtegʉre sẽrĩtiñaꞌco niwõ: —¿Noa niti sĩꞌi marĩrẽ põtẽrĩgʉ̃ aꞌtigʉ? nico niwõ. —Yʉꞌʉ wiogʉ nimi, nicʉ niwĩ. Tere tʉꞌogo, suꞌtiro casero meꞌrã co diapoare moꞌaco niwõ.
689	GEN 25:30	Tojo weegʉ cʉ̃ acabijire nicʉ niwĩ: —Yʉꞌʉre pajañaꞌña. Sise baꞌase sõꞌase mʉꞌʉ cʉosere yʉꞌʉre oꞌocureya. Yʉꞌʉ ʉjʉaboa wẽrĩgʉ̃ weesaꞌa, nicʉ niwĩ. (Tojo weerã ape wãme Esaúre Edom pisusama.)
691	GEN 25:32	Tere tʉꞌogʉ, Esaú nicʉ niwĩ: —¿Mʉꞌʉ yʉꞌʉre ĩꞌaweti? Yʉꞌʉ ʉjʉaboa wẽrĩgʉ̃ weesaꞌa. Tojo weero yʉꞌʉ masã maꞌmi nise yʉꞌʉma wapamarĩꞌi, nicʉ niwĩ.
695	GEN 26:2	Topʉ Õꞌacʉ̃ cʉ̃rẽ bajua, ucũcʉ niwĩ. Aꞌtiro nicʉ niwĩ: “Egiptopʉre waꞌaticãꞌña. Yʉꞌʉ mʉꞌʉrẽ tojadutirota tojapa.
696	GEN 26:3	Niꞌcãrõacãrẽ aꞌti diꞌtata toja, níniꞌña yujupʉ. Yʉꞌʉ mʉꞌʉ meꞌrã nigʉ̃ti. Mʉꞌʉrẽ añurõ waꞌacã weegʉti. Mʉꞌʉrẽ, mʉꞌʉ pãrãmerã nituriarãrẽ aꞌti diꞌtare oꞌogʉti. Aꞌtiro wéégʉ, mʉꞌʉ pacʉ Abrahãrẽ yʉꞌʉ ‘Tojo weegʉti’ níꞌquere queoro waꞌacã weegʉti.
700	GEN 26:7	Topʉ nirã́ masã Isaare Rebecare “Aꞌtigo waro ¿noanojõ niti?” ni sẽrĩtiñaꞌcãrã niwã. Isaa, “Yʉꞌʉre co ye buꞌiri wẽjẽbosama” ni uigʉ, “Yʉꞌʉ acabijo nimo”, nicʉ niwĩ. Co Rebeca añugõ niyucã, tojo nicʉ niwĩ.