5	GEN 1:5	Arumgimis ki yuḵ moŋkush ki Montee mo dhali mondhurumi’d yuḵa a’di ki Mon’thiny mo. Dhali mom’pimpili/ diki’d mo dhali mon’thamo/ diki’d mo, a’di jin ta’da cim ’de/ mo.
8	GEN 1:8	Dhali Arumgimis ki yuḵa balany ki Momis mo. Dhali mom’pimpili/ diki’d mo dhali mon’thamo/ diki’d mo, a’di jin ta’da cim su/ mo.
10	GEN 1:10	Arumgimis ki yuḵ mo jin ḵuthaḵu’th ki Mony’cesh mo, dhali aris yi’de/ gwansan kun tulu isi monṯal ’de/ mo tani yuḵkina a’di gway ki Ḵumma/ Yi’de/ mo be. Dhali Arumgimis ki p̱ar a’di e ki a’di ’bora’bor mo.
12	GEN 1:12	Mony’cesh a’di dho’thki ton dhii/in kun ’kana le/ mo, to kun sinu mo kun dhodhi maman mo isi ka ḵa’bany buni kun ’kona e uni ki she/ ki she/ mo, dhali cwa kun dho’thki maman ki emen buni ki she/ ki she/ kun c̱inu uni mo, uni ’baar ki isi e kuku/ mo. Dhali Arumgimis ki p̱ar a’di e mo ki a’di ’bora’bor mo.
89	GEN 4:9	Dhali yan’ko’d Tap̱a ki owa Kayiin gwo mo ki: Mana Habiil jin ta’da kam pini mo? A’di ki o gwo mo ki: Mishgaa? Aha/ tana manhila kam pema?
93	GEN 4:13	Kayiin ki o Tap̱a gwo mo ki: Miim pem jin di aha/ ’ba/ a’di caaca gom aha/ mmoḵal mo.
95	GEN 4:15	Dhali yan’ko’d Tap̱a ki o a’di gwo mo ki: Midi wakan yisa. Waḵki/ jan ṯal ’deŋ kamu/ midi ’kosha Kayiin jwa mo tani mori’c midi di ap̱o/ a’di me’di pesu/ mo. Dhali Tap̱a ki c̱iya Kayiin jamas mo, isi ciki/ ki a’din ’de/ yin jin midi ya ap̱o/ a’di midi diki ’kosh a’di jwa mo.
98	GEN 4:18	Dhali Hanuuk dho’th ya/ jin yuḵu ka Irad mo. Dhala Irad ta’da baba ma Mahuya/iil mo dhala Mahuya/iil ta’da baba ma Matusha/iil mo dhala Matusha/iil ta’da baba ma Laamak mo.
118	GEN 5:12	Ka Kinan c̱a’bki’d ki e ki yili iss ’kwanimpa ikwara i’ce’dka ’kume’d mo tani a’di warki’d ka baba ma Mahlal/iil mo.
119	GEN 5:13	Dhala Kinan c̱a’bki’d ki e mo ’ko’di dho’th ma Mahlal/iil mo ki yili iss ’kwanimpa i/iss su/ i’ce’dki iss su/ mo, dhali a’di ta’dki iya/a tiya mo dhali i’bwa/a tiya mo.
121	GEN 5:15	Ka Mahlal/iil c̱a’bki’d ki e ki yili iss ’kwanimpa ikwara i’ce’dka mudhe’d mo tani a’di warki’d ka baba ma Yarid mo.
122	GEN 5:16	Dhala Mahlal/iil c̱a’bki’d ki e mo ’ko’di dho’th ma Yarid mo ki yili iss ’kwanimpa i/iss su/ i’ce’dka iss ’kwanimpa ’de/ i’ce’dka ’kume’da ap̱o/ mo, dhali a’di ta’dki iya/a tiya mo dhali i’bwa/a tiya mo.
123	GEN 5:17	Dhali wakan arisa tee kun c̱a’bkin ma Mahlal/iil ki e mo tani ’kona yili iss ’kwanimpa i/iss su/ i’ce’dki iss ’kwanimpa idoŋon i’ce’dka ḵarpa’c ap̱o/ mo, dhali a’di wuki’d mo.
127	GEN 5:21	Ka Aḵnuuḵ c̱a’bki’d ki e ki yili iss ’kwanimpa ikwara i’ce’dka mudhe’d mo tani a’di warki’d ka baba ma Maṯushaalah mo.
128	GEN 5:22	Aḵnuuḵ nyaḵ ya ka Arumgimis mo ’ko’di dho’th ma Maṯushaalah mo ki yili iss ’kwanimpa ḵarpa’c mo, dhali a’di ta’dki iya/a tiya mo dhali i’bwa/a tiya mo.
131	GEN 5:25	Ka Maṯushaalah c̱a’bki’d ki e ki yili iss ’kwanimpa ipedoŋon i’ce’dka pesu/ mo tani a’di warki’d ka baba ma Laamak mo.
132	GEN 5:26	Dhala Maṯushaalah c̱a’bki’d ki e mo ’ko’di dho’th ma Laamak mo ka yili iss ’kwanimpa i/iss su/ aṯẖ ’de/ i’ce’dka su/ mo, dhali a’di ta’dki iya/a tiya mo dhali i’bwa/a tiya mo.
133	GEN 5:27	Dhali wakan arisa tee kun c̱a’bkin ma Maṯushaalah ki e mo tani ’kona yili iss ’kwanimpa i/iss su/ i’ce’dki iss ’kwanimpa ipekwara i’ce’dka pedoŋon ap̱o/ mo, dhali a’di wuki’d mo.
153	GEN 6:15	Mii a’dihe/ be jin mina /e uḵ a’di mo. Aluc̱ ma ḵur midi ta gula iss ’kwanimpa ḵarpa’c mo dhali beem piti midi ta iss ’kwanimpa isu/ i’ce’dka ’kume’d mo ki gulam piti mo dhali tur piti midi ta iss ’kwanimpa ’de/ i’ce’dka ’kume’d mo ki gulam piti mo.
231	GEN 9:25	a’di o gwo mo ki: Monyjee midi di goma Kanaan mo. C̱iŋkina/ jin tanu mmota c̱iŋkina/ mo tani a’di imidi wakan gom ikam piti mo.
232	GEN 9:26	A’di si’da/ o gwo mo ki: Mom’bor mii gi Tap̱a Arumgimis pem midi di goma Saam mo, dhali dhalka Kanaan ta c̱iŋkinam piti mo.
237	GEN 10:2	Iya/ ma Yap̱aṯẖ: a’di jin ṯwa/a/ yuḵu gway ka Jumar mo, dhala Majuuj mo dhala Maday mo dhala Yawan mo dhala Ṯubal mo dhala Maashik mo dhala Ṯiras mo.
241	GEN 10:6	Iya/ ma Haam: a’di jin ṯwa/a/ yuḵu gway ka Kush mo, dhala Masir mo dhala P̱uth mo dhala Kanaan mo.
248	GEN 10:13	Masir warki’d ka baba ma Ludim mo dhala Anamiim mo dhala Lahabiim mo dhala Nap̱tuhiim mo
258	GEN 10:23	Dhali iya/ ma Araam: a’di jin ṯwa/a/ yuḵu gway ka Uus mo, dhala Hul mo dhala Jaaṯẖar mo dhala Mash mo.
265	GEN 10:30	Dhali mony’cesh jin ’kokina uni nycine/ mo tani a’di p̱arki ’twa/ ki ribi/ ribi/ mo ’peni Pa Misha mo e mo jin ta bway jin c̱u’thki ’twa/ ki Pan Sap̱aar ibampa/ ki paŋ ’kuwosh gi mom’pesho’k mo.
296	GEN 11:29	Dhala Abraam dhala Nahur mashkin mo. Dhali asha Abraam yuḵu gway ka Saray, dhali gway gi asha Nahur yuḵu ka Milkah mo a’di jin ta ’bwa/ ma Haraan mo a’di jin ta com ga Milkah dhala Yiskah mo.
305	GEN 12:6	Abraam yaki’d ki tur mo e mony’cesh gi bampa/ gi Pan Shakiim mo e dhan cwa jin wana e ka ’kwaṯṯan ma Murah mo. Ka cim c̱aan mo tani ’Kwani Kanaan uni ’kokin e mony’cesh c̱aan mo.
309	GEN 12:10	Dhali ṯe/ ’koshki’d kagahara mo e bampa/ mo. Wakan Abraam yaki’d ka luŋgu’b e Pam Masir mo ki ya yilkina/ mo e mun mo, haali/ ṯe/ shina ’kosh ki shi/ e bampa/ mo.
310	GEN 12:11	Ki a’di ’dishi ’twa/ mmocic̱ Pam Masir mo tani a’di ki owa Saray gwo mo, a’di jin ta ash mo ki: Aha/ misha ki /e tana ’bom jin ta jaro/ ki jaro/ jin ṯeru/ mo.
311	GEN 12:12	Dhali ki ’Kwani gi Pam Masir mini p̱ar /e e mo tani uni mini o gwo mo ki: A’di yansan ta ashim piti mo. Dhali yan’ko’d uni mini ’kosh aha/ jwa mo, hili /e minu dhalku/ ki e mo.
313	GEN 12:14	Ka Abraam cic̱ki’d e Pam Masir mo tani ’Kwani gi Pam Masir p̱arki’da ’bom e jin shina jaro/ i me’d mo.
320	GEN 13:1	Wakan Abraam yaki’d ka gagamis ’peni Pam Masir mo a’di uni ki ashim piti nyaḵki a’di mo dhali aris to kun tana a’di mo dhala Luuth si’da/ nyaḵki uni mo eya Januub mo.
329	GEN 13:10	Dhala Luuth ’de’kki em piti ki mis mo dhali mishki mo mo ki embul ma Uurdun a’di ya’thkunu ki ’bore/ eya ris mo ’baar mo me’d bwaagoŋ jin ta monsinu gi Tap̱a mo, me’d bampa/ gi Pam Masir si’da/ e mo jin c̱utha a’di bway ’kup̱ ki Pan Suugar mo. Yansan diki’di ṯwa/a/ mo ki Pan Saduum dhali Paŋ Gamuura ’konuki ’ce’d sho’k mo ki Tap̱a mo.
337	GEN 13:18	Wakan Abraam ijoc̱ki gu’b burrinyem piti mo dhali a’di p̱u’dki’d mo dhali c̱a’bki’d mo e ’ko’d gwar gi dhan cwa jin wana e ka ’kwaṯṯan ma Mamra kun ’kon e Pa Habruun mo. Dhali e mun mo tani a’di ki nyaŋa gwaṯa/ jin miinuwa bas gom Tap̱a mo be.
350	GEN 14:13	Dhali yan’ko’d jan ’de/ jin yeki’d mo tani a’di p̱u’dki’d mo dhali a’di ki ṯora Abraam, a’di jin ta ji Ibraani gwo mo, a’di jin diki’d mmoc̱a’b mo e ’ko’d gwar gi dhan cwa jin wana e ka ’kwaṯṯan ma Mamra mo, a’di jin ta wathi/ gi Pa Amuur mo, jin ta’da kam ma Ashkuul mo dhala Anir mo. Uni ta imangam gwo me’d mo nyaḵka Abraam mo.
354	GEN 14:17	Dhali ’ko’di modoḵ piti ka nyaŋ’ko’d mo ’peni mo jin p̱inuwa Kadarla/oomar e mo dhali itap̱a kun nyaḵ ’ko ki a’di mo tani tap̱a gi Pan Saduum mo yaki’d ka pije/ mmogam a’di ’kup̱ mo e Embul ma Shawa (a’di jin onu mo ki, Embul ma Maliḵ mo).
355	GEN 14:18	Dhala Malkisaadag si’da/ jin ta’da maliḵ gi Pan Saliim mo a’di ki ’doyu tonṯe/ ka pije/ mo dhali yimana mura’th jin ḵa/u ki ŋah ŋah mo. A’di ta’da gasiis ma Arumgimis jin Cayaa/ e ki Ca mo.
356	GEN 14:19	Dhali a’di ’borki a’di mii mo dhali oki gwo mo ki: Mom’bor mii midi di goma Abraam mo ka Arumgimis jin Cayaa/ e ki Ca mo, a’di jin uḵki momis dhali mony’cesh mo.
361	GEN 14:24	Toŋ kamu/ miga/ bu’th yisa, hili jasi a’di jin shwakina ’kwanin dhuru’c mo dhali to jin pwaḵkunu bwa mo gom ’kwaniŋ gwas kun nyaḵ ii ki aha/ mo. Dhalka Aanir mo dhala Ashkuul mo dhala Mamra mo bu’th to kun pwaḵkunu bwa mo gom uni mo ma.
373	GEN 15:12	Me’d jin din ma tente/ mmoyul mo tani mo jin ’ce’du e kagahara biṯki’da p̱owa Abraam mo. Dhali hili mo mo ma, dhan mondhurumi’d jin deenu ki bir bir biṯki’da ap̱o/ a’di mo.
374	GEN 15:13	Dhali yan’ko’d Tap̱a oki’da Abraam gwo mo ki: Mishi gwo ’ban mo ma me’d to jin ’tashu ’twa/ mo ki emen pini kun mini pi ’peni /e mo tani uni mini ta uni kun iiki iiŋ ’kus e bampa/ jin diki ta jim buni mo, dhali uni mini ta c̱iŋkina/ e mun mo, dhali uni minu siri’c ki sho’k mo ki yili iss ’kwanimpa i/iss ’de/ mo.
379	GEN 15:18	Ka tee yin mo tani Tap̱a gamki gwo me’d mo nyaḵka Abraam mo mmo/o gwo mo ki: E emen kun mini pi mo ’peni /e mo tani aha/ mina c̱i bampa/ yan mo ’peni yi’deŋ ḵumma/ ma Masir mo ntagi dhan yi’deŋ ḵumma/ ma Elp̱uraat mo
383	GEN 16:1	Dhala Saray, a’di jin ta asha Abraam mo tani ayim dho’thki a’di a’ciŋ kamu/ yisa. Dhala yim ta’dki nyarany c̱iŋkina/ gi Pam Masir jin yuḵu gway ka Haagar mo.
384	GEN 16:2	Dhala Saray oki’da Abraam gwo mo ki: Hili mo mo ma, Tap̱a a’di ki non aha/ mo mmodho’th uc̱i mo. Mashi nyarany c̱iŋkinam pem mo ma, ma a’di miga/ gam uc̱i ki a’di moyi. Dhala Abraam ciḵki ’twa/ ma Saray mo be.
385	GEN 16:3	Wakan ’ko’di Abraam c̱a’bki’d mo e Paŋ Kanaan mo ki yili ’kume’d mo tani Saray jin ta asha Abraam mo tani bu’thki’da Haagar jin ta ji gi Pam Masir mo dhali jin ta nyarany c̱iŋkina/ ma yim mo dhali c̱iki a’di ka Abraam jin ta’da kaṯẖim piti mo mmota ash mo.
388	GEN 16:6	Hili Abraam ki owa Saray gwo mo ki: Hili mo mo ma, nyarany c̱iŋkinam pini di’d e mom’bi’th pini mo. Miiyi to ka yim me’d jin o /e bwa mo ma. Yan’ko’d Saray ki us mii is mo ki gwony ’cwar goma yim mo dhala ayim ki gus ya ŋwac̱a/ mo ’peni a’di mo be.
426	GEN 18:1	Dhali Tap̱a piki a’di i is mo e ’ko’d gwar gi dhan cwa kun wana e ka ’kwaṯṯan ma Mamra mo me’d jin c̱a’bkina a’di eya campur gi gu’b burrinyem piti mo e mo jin ta mom’batha’d jin ’koshki to montee mo.
430	GEN 18:5	ki aha/ ki ya guwa gabul maaŋḵuthu’d mo ki um mini ye is bum ’ba/ mo dhali ŋ’ko’d mo tani um mini mish iim pe mo – haali/ um p̱u’dkin mo e c̱iŋkinam bum mo. Wakan uni oki gwo mo ki: Miiyi me’d jin okina /e mo mo ma.
434	GEN 18:9	Uni oki a’di gwo mo ki: Mane Saarah jin ta ashim pini mo mane? Dhali a’di oki gwo mo ki: A’di di’di gu’b burrinye/ mo be.
450	GEN 18:25	Dhalka mii gi wakan midi mii diki thoṯẖ /e is mo ma mmo’kosh uni gun mii miiŋḵar/e mo nyaḵki uni gun mii tonthus mo, wakan ki uni gun mii miiŋḵar/e mina e wa gi uni gun mii tonthus mo. Dhalka mii yan midi mii diki thoṯẖ /e is mo ma. A/min ma Mandwall aris mony’cesh gwo mo diki mii miim ’boro’da?
463	GEN 19:5	Dhali uni yuḵki ’twa/ eya Luuth mo ki: Mane ’kwaniŋ gwas kun p̱u’dkin e /e mon’thiny yan mo mane? Susi uni ka pije/ e aman mo ma ki aman mina mish uni mo.
495	GEN 19:37	Dhali ayim jin ta bwanyara/ dho’thki ya/ mo dhali a’di yerkunu gway mo ka Muwab mo. A’di yaase ita com gom ’Kwani gi Pa Muwab mo ntagi shwanesan mo be.
523	GEN 21:9	Hili Saarah p̱arki ya/ ma Haagar jin ta ji gi Pam Masir e mo, a’di jin dho’thkin ma yim goma Ibrahiim mo, dhali a’di ki mii a’di ka maḵ mo.
535	GEN 21:21	Dhali a’di c̱a’bki’d e mombwaasho gi Pam P̱aaraan mo dhali kum ki ŋap̱ki a’di a’bom mo ’peni Pa Masir mo.
550	GEN 22:2	Dhali a’di ki o gwo mo ki: Susi ya/m pini shwane/ a’di jin ta jim piniŋ gana/ mo, a’di jin ena /e, isi a’di jin ta’da Is/hak mo dhali iiyi mo eya ’cesh gi Pa Muriyya dhali /e mini ’ciṯẖ a’di ’kus mmomiiya roroc̱o/ e ’kuwosh mo e mo jin miga/ ṯor /e mo be.
568	GEN 22:20	Dhali a’di warki’d ki mo jin peki’d mo ’ko’da ris to gwansan gun ṯorkunu Ibrahiim mo mmo/o ki: Hili mo mo ma, aMilkah a’di dho’thki uc̱i mo ka kan ka Nahur mo,
571	GEN 22:23	Dhala Baṯu/iil dho’thki’da Rip̱ka mo. Uc̱i ipekwara gwansan idho’thkin ma Milkah goma Nahur mo jin ta’da kam ma Ibrahiim mo be.
572	GEN 22:24	Dhala ’boma ’bwaash piti jin yuḵu gway ka Ra/uumah mo ayim si’da/ dho’thki’da Thaabah mo dhala Jaaham mo dhala Taahash mo dhala Maakah mo be.
581	GEN 23:9	ki a’di midi c̱i aha/ jurum wosh gi Pa Makp̱iilah mo a’di jin ta jim piti mo, a’di jin di’di shemen buntom piti mo. Ka ṯẖaman gana/ mo tani dhalki a’di c̱i a’di aha/ e bwambori um mo ki a’di midi ta mo jin miga/ bu’th mmokana/ kan mo be.
587	GEN 23:15	Tap̱am pem, ciḵi gwo ’peni aha/ mo ma. Mony’cesh jin yolka/ tani a’di ta iss ’kwanimpa i/iss ’de/ jin ta’da guurush gi ’dolkon kush mo. To yan midi ta atinta ibwaman /e dhali aha/ mo? Kani jwam pini mo ma.
589	GEN 23:17	Gom gwo gi wakan mo tani bunto ma Ip̱ruun e Pa Makp̱iilah a’di jin di’d ’kup̱ ka bor ki mis gi Pa Mamra mo, e bunto jin dina jurum wosh a’di jin di’di bwaman mo dhala ris cwa kun ’koni bunto mo ntagi shemen piti ’baar mo tani a’di i’kwarkunu mo
591	GEN 23:19	Ŋ’ko’d mii yan mo tani Ibrahiim kanki’da Saarah jin ta ash mo e jurum wosh gi mom bunto jin ta Makp̱iilah mo jin di’d ’kup̱ki mis ki Pa Mamra mo (a’di jin ta Pa Habruun) jin ta bampa/ gi Paŋ Kanaan mo.
592	GEN 23:20	Mombunto dhali jurum wosh jin di’di bwaman mo tani uni i’kwarkunu mo ga Ibrahiim mo mmota jim piti mo gom mo jin minu kana kan ki ’Kwani gi Pa Hiṯẖṯẖa mo be.
607	GEN 24:15	Nṯwa/a/ ki a’di ki ’baarki gwom piti mmo/o mo tani hili mo mo ma, Rip̱ka a’di jin dho’thkunu ka Baṯu/iil jin ta ya/ ma Milkah jin ta ash ma Nahur jin ta’da kam ma Ibrahiim mo tani a’di yayi’d ka pije/ ka dhur yi’dem piti me’d e ’kup̱a bi ma yim mo be.
616	GEN 24:24	Ayim ki o a’di gwo mo ki: Aha/ tana ’bwa/ ma Baṯu/iil jin ta ya/ ma Milkah mo a’di jin dho’thkin ma yim ka Nahur mo be.
619	GEN 24:27	Dhali a’di ki o gwo mo ki: Mom’bor mii gom Tap̱a mo a’di jin ta’da Arumgimis gi tap̱am pem ka Ibrahiim mo, a’di jin diki dhal mo/en piti ’pen mo dhali mii ma isiŋ gana/ ’kup̱ ki tap̱am pem mo. Dhali gom aha/ tani Tap̱a ki shu aha/ bway gu’b gi ibas gi itap̱am pem mo.
639	GEN 24:47	Gom gwo gi wakan mo tani aha/ p̱ikina mo dhala yim ki c̱i ki kalman mmop̱i si’da/ mo be. Dhali yan’ko’d mo tani aha/ ki doṯa yim gwo mo mmo/o ki: /E ta ’bwa/ maja si’da/? Ayim ki thoḵ aha/ gwo mo ki: Aha/ tana ’bwa/ ma Baṯu/iil jin ta ya/ ma Nahur mo, a’di jin dho’thkin ma Milkah a’di mo. Gom gwo gi wakan mo tani aha/ ki kar dhirriny ’dolkon e shush ma yim dhali gurany ’per eya bi ma yim mo be.
648	GEN 24:56	Hili a’di ki o uni gwo mo ki: Dhalku/ ki mii aha/ mii ka diiṯe/ mo. Me’d jin ’borkina Tap̱a aha/ mii e bway pem mo tani dhalki aha/ yana mo ki aha/ mina ya mo e tap̱am pem mo.
661	GEN 25:2	Ayim dho’thki a’di aSimraan mo dhala Yagshaan mo dhala Madaan mo dhala Midyaan mo dhala Yishbaag mo dhala Shuha mo be.
663	GEN 25:4	Dhali iya/ ma Midyaan uni si’da/ annihe/ mo: Ep̱ah dhala Ip̱ir mo dhala Hanuuk mo dhala Abiidaa/ mo dhala Elda/ah mo be. Aris uc̱i gwansan uni ta kuma Gathuurah mo be.
668	GEN 25:9	Is/hak dhala Isma/iil uni kun ta iya/m piti mo tani uni kanki a’di e jurum wosh ma Makp̱iilah mo e bwam bunto ma Ip̱ruun jin ta ya/ ma Suuhar jin ta wathi/ Hiṯẖṯẖa jin di’d ’kup̱ ka bor ki mis ki Pa Mamra mo be.
671	GEN 25:12	Uni kun ta emen ma Isma/iil kun yerkunu gwayi ’ko’d mo a’di jin ta ya/ ma Ibrahiim mo ka Haagar jin ta ji Masir mo a’di jin ta c̱iŋkina/ nyara/ ma Saarah a’di jin dho’thkina a’di ka Ibrahiim mo be.
672	GEN 25:13	Gway gi iya/ ma Isma/iil mo tani uni annihe/ mo, a’di jin yerkunu ka baṯẖ ’pen ka dho’th buni mo: Nabayuut a’di ita’da bwanyara/ ma Isma/iil mo dhala Gidar mo dhala Adab/iil mo dhala Mibsaam mo,
673	GEN 25:14	dhala Mishmaa/ mo dhala Duumah mo dhala Massa mo
677	GEN 25:18	Uni ’peni Pa Hawiila ntagi Pan Shur mo a’di jin di’d ka p̱ar ’twa/ ki Pa Masir mo ’kup̱ki bway jin c̱uthi ’twa/ ’kup̱ki bway Pa Ashshuur mo be. A’di c̱a’bki’da p̱o/ aris ’kwanim piti mo be.
686	GEN 25:27	Me’d jin cakina uc̱i su/ mo tani Iisu ta wathi/ jin kora e ki kor e mompar mo, a’di ta wathi/ ma shoŋ gana/ mo ka Yakuub ta wathi/ jin bu’th is piti ka mathaŋ’kur dhali c̱a’b e gu’b burrinye/ mo be.
691	GEN 25:32	Iisu thoḵki gwo mo ki: Aha/ mura wu ’te/ mo be. Mo ma bwanyara/ yan midi miiya ta gom aha/ mo?
695	GEN 26:2	Dhali Tap̱a piki a’di i is mo, dhali o a’di gwo mo ki: Dhalku/ ki ya ka luŋgu’b bway Pa Masir mo. Hili c̱a’bi /e eya ’cesh jin miga/ ṯor /e mo.
727	GEN 26:34	Me’d jin ’kona yili Iisu i issu/ mo tani a’di bu’thki ash mo jin yuḵu gway ka Yahudiit jin ta ’bwa/ ma Biiri jin ta Wathi/ Hiṯẖṯẖa mo dhala Basmah jin ta ’bwa/ ma Iiluun jin ta Wathi/ Hiṯẖṯẖa mo.
741	GEN 27:13	Kum ki o a’di gwo mo ki: Monyjeem pini midi di ap̱o/ aha/ mo ya/m pem mo, hili hayi gwom pem e mo dhali yayi mo dhali kwanyi uni gom aha/ mo.
748	GEN 27:20	Hila Is/hak oki ya/m piti gwo mo ki: Mii wakata ganne/ gamkina /e a’di ki jahanne/ kan mo? ya/m pem. A’di ki thoḵ gwo mo ki: Haali/ Tap̱a Arumgimis pini a’di c̱iki aha/ a’di ki ’ta’b kan mo be.
757	GEN 27:29	Dhalka ris ’kwani ’baar mo mii /e to ime’d mo, dhali aris kal gi mony’cesh mina ’ko ka bamambor mmoluŋ /e mo. Tayi tap̱a ap̱o/ ikam pini mo dhali dhalki iya/in gi kwan mini ’ko ka bamambor mmoluŋ /e mo. Monyjee midi di ap̱o/ aris ’kwani ’baar ka ’deṯe/ ’deṯe/ kun jeeki /e mo, dhali mom’bor mii midi di ap̱o/ aris ’kwani ’baar mo kun ’borki /e mii mo.
783	GEN 28:9	Iisu a’di yaki’d mo eya Isma/iil mo dhali butha ’bom mo mmomar up̱a tiya kun takina a’di is mo a’di jin ta’da Mahlah jin ta ’bwa/ ma Isma/iil mo jin ta ya/ ma Ibrahiim mo a’di jin ta ’bwaham ma Nabayuut mo be.
787	GEN 28:13	Dhali hili mo mo ma, Tap̱a doshki’di ’kup̱i a’di mo dhali o gwo mo ki: Aha/ tana Tap̱a Arumgimis ma Ibrahiim jin ta’da babam pini mo dhali Arumgimis ma Is/hak mo. Mony’cesh yan jin isha /e ap̱o/ mo tani aha/ mina c̱i a’di ki /e mo dhali emen pini mo be.
791	GEN 28:17	Dhali a’di ḵo/ki is mo dhali o gwo mo ki: Mo yan ta mo jin ḵogu mo. Mo yan a’di ita isi gu’b ma Arumgimis gana/ mo ’tese/ be dhali yansan a’di ita ’twaŋkala goŋ gi bway momis mo be.
842	GEN 30:11	Dhala Le/ah ki o gwo mo ki: Mo i e ki ’bor mo, wakan ayim ki yuḵ a’di gway mo ka Jaad mo.
923	GEN 31:49	Dhala tiŋkiliŋ yan yuḵkunu gway ka Misp̱ah mo haali/ a’di oki gwo mo ki: Tap̱a a’di ihilki’da hil e bwaman /e mo dhali aha/ mo ki ana mina mii p̱i mo ka rem’kup̱ ’pena kamuŋ kamu/ mo.
929	GEN 32:1	Mon’thamo/ ka ’tum mo aLaabaan a’di cuki mis mo dhali p̱i idhancom ’twa/ mo dhali i’bwa/m piti mo dhali ’bor uni mii mo dhali yan’ko’d a’di ki ḵwa/ is piti bwa ’peni uni mo dhali doḵ bway pa ka nyaŋ’ko’d mo be.
931	GEN 32:3	Dhali ka Yakuub mishi uni mo tani a’di oki gwo mo ki: Uni gwansan ita ’kwani ma mee ma Arumgimis mo. Wakan a’di yuḵki mo c̱aan gway mo ka Mahanaayim mo.